གཉིས་པ་ཚུལ་ཁྲིམས་ཀྱི་མི་མཐུན་ཕྱོགས་ལ།
གཉིས་པ་ཚུལ་ཁྲིམས་ཀྱི་མི་མཐུན་ཕྱོགས་ལ།
༨ མཚམས་མེད་བྱས་པ་དང་རྩ་ལྟུང་བྱུང་བ་ལ་དེ་རྒྱུ་མཚན་དུ་བྱས་ནས་སེམས་གཉིས་ཀྱིས་ཡལ་བར་དོར་ཞིང༌། ཁྱད་དུ་བསད་ན་ཚུལ་ཁྲིམས་འཆལ་བ་ཡལ་བར་དོར་བའི་ཉེས་བྱས། འདི་ལ་དགོས་པའི་སྒོ་ནས་ཉེས་མེད་ནང་ཁྲིམས་བསྲུང་བ་སོགས་སོ། །༩ ཁྱིམ་པ་སོགས་ཀྱི་སེམས་བསྲུང་བ་སྟེ་མ་དད་པ་རྣམས་དད་པ་སོགས་ཀྱི་ཕྱིར་ཆང་མི་འཐུང་བ་སོགས་སོ་ཐར་གྱི་བསླབ་པ་རྣམས་ལ་སེམས་གཉིས་ཀྱིས་ཉན་ཐོས་རྣམས་དང་འདྲ་བར་མི་བསླབ་ན་ཕ་རོལ་དད་ཕྱིར་མི་སློབ་པའི་ཉེས་བྱས། འདི་ལ་གཞུང་འགའ་ཞིག་ཏུ་རབ་བྱུང་གི་བྱང་སེམས་ལ་བཤད་པ་ལ། འོན་ཀྱང་བྱང་སེམས་ཁྱིམ་པ་ལའང་སོ་ཐར་དང་ཐུན་མོང་གི་བཅས་རྐྱང་མང་པོ་སྣང་བར་གསུངས་སོ། །༡༠ དོན་དང་བྱ་བ་ཉུང་བ་སྙིང་ལས་ཆུང་ངུར་གནས་པ་སྟེ་འཕགས་པའི་རིགས་བཞི་ལ་གནས་པའི་ཕྱིར། བཅས་པ་ཞག་བཅུ་འཆང་སྤང་སོགས་ལ་ཉན་ཐོས་དང་མཚུངས་པར་མི་སློབ་པར་དགོས་པ་ལས། སེམས་གཉིས་ཀྱིས་དེ་དང་མཚུངས་པར་སློབ་ན་སེམས་ཅན་དོན་ལ་བྱ་བ་ཆུང་བའི་ཉེས་བྱས། དེ་ཡང་གནང་བ་དེ་རྣམས་ཀྱང་གཞན་གྱི་དོན་མིན་པ་ལ་རང་དོན་ཁོ་ནའི་ཆེད་དུ་བྱས་ན་འདུལ་བ་ནས་བཤད་པའི་ཉེས་བྱས་ཇི་སྐད་བཤད་པ་བཞིན་འབྱུང་བས་ན་རང་སེམས་ལ་བརྟགས་ནས་བསྲུང་བར་བྱའོ། །༡༡ བྱང་སེམས་ཁྱིམ་པ་ལ་བདག་ལས་གཞན་གཅེས་པའི་བྱང་ཆུབ་ཀྱི་སེམས་དང་ལྡན་པས། གཞན་དོན་ཁྱད་པར་ཅན་དུ་འགྱུར་ན། ལུས་ངག་གི་ལས་བདུན་གནང་བའི་སྐབས་ཡོད་བཞིན་དུ། དེ་ལ་མ་ཞུགས་ན་སྙིང་བརྩེ་བཅས་པར་མ་བྱས་པའི་ཉེས་བྱས། དེ་ཡང་སེམས་ཅན་རེ་རེའི་དོན་བསྐལ་བ་དུ་མར་མནར་མེད་དུ་གནས་ན་ཅི་མ་རུང་སྙམ་པའི་བདག་གཞན་བརྗེ་བའི་སེམས་བཅོས་མིན་དགོས་ཀྱི། གཞན་དུ་རང་གི་ལས་ངན་སྡིག་པོ་ཆེར་བསགས་ཉེན་ཆེ་བས། སྙིགས་མའི་རང་མཚང་མི་ངོམས་པར་བྱའོ། །༡༢ ལོག་འཚོ་ལྔ་གང་རུང་བྱུང་བ་དང་དུ་ལེན་ཞིང་དེ་དག་གི་གཉེན་པོ་མི་བསྟེན་ན་འཚོ་བ་ལོག་པ་དང་དུ་ལེན་པའི་ཉོན་མོངས་ཅན་གྱི་ཉེས་བྱས།ལོག་འཚོ་ལྔའི་ཚུལ་འཆོས་ནི། རྙེད་བཀུར་གྱི་ཕྱིར་དབང་པོའི་སྒོ་སྡོམ་པ་སྟེ་སྤྱོད་ལམ་མཛེས་པར་བཅས་པ། ཁ་གསག་ནི་རྙེད་བཀུར་གྱི་ཆེད་དུ་ངེད་གཉིས་སྔར་ནས་ངོ་ཤེས་ཀྱི་མཐུན་གྲོགས་ཡིན་ཞེས་པ་ལྟ་བུ་ཡིད་བཅུག་པའི་ཚིག་སྨྲ་བ། གཞོགས་སློང་ནི་རྫས་དེ་ཐོབ་པའི་ཆེད་དུ་ཁྱོད་ཀྱི་རྫས་འདི་ཤིན་ཏུ་ལེགས་ཞེས་བསྔགས་པ་བརྗོད་པ། ཐོབ་ཀྱི་འཇལ་བ་ནི་རྙེད་པ་ཐོབ་ཕྱིར་ཁྱོད་ཀྱི་ཁྱིམ་དུ་ཡོན་གནས་ཁྱད་པར་ཅན་བྱུང་བ་ཁྱོད་བསོད་ནམས་ཆེ་ཞེས་བརྗོད་པ། རྙེད་པའི་རྙེད་པ་ནི་རྙེད་པའི་ཆེད་དུ་ཁྱོད་ཀྱིས་སྔར་བྱིན་པ་ཤིན་ཏུ་ལེགས་པ་ཞེས་སོགས་བརྗོད་པའོ། །༡༣ རྒོད་པ་དང་བརྗེད་པ་གང་རུང་གི་སེམས་ཀྱིས་རྒོད་པ་རྩེ་བ་ཅ་ཅོ་འདོན་པ་གཡེང་བ་གཞན་ལའང་རྒོད་དུ་གཞུག་པར་འདོད་ན། འཕྱ་ནས་རབ་ཏུ་རྒོད་པ་དང་བཅས་པའི་ཉེས་བྱས། རྟེན་དེ་བསལ་འདུན་ཅན་དང་དགོས་པའི་སྒོ་ནས་ཉེས་མེད་གཉིས། ༡༤ མདོ་ལས། བྱང་སེམས་འཁོར་བ་ལ་དགའ་བ་ལྟར་མྱ་ངན་ལས་འདས་པ་ལ་དེ་ལྟ་མ་ཡིན་ནོ། །ཞེས་སོགས་ལ་འཁྲུལ་ནས་བྱང་སེམས་ནི་མྱང་འདས་ལ་རྒྱབ་ཀྱིས་ཕྱོགས་ཤིང་ཉོན་མོངས་ལ་མི་འཇིགས་པར་འཁོར་བར་འཁོར་ཞིང་བྱང་ཆུབ་བསྒྲུབ་དགོས་སོ་ཞེས་བལྟ་ཞིང༌། དེ་སྐད་སྨྲས་ན་འཁོར་བར་གཅིག་བུ་བགྲོད་པར་སེམས་པའི་ཉོན་མོངས་ཅན་གྱི་ཉེས་བྱས། ༡༥རང་གི་ཚིག་མི་བཙུན་པའམ་མི་བཙུན་པར་གྱུར་བའི་དྲི་ངས་སྐྱོན་ཆེན་པོ་དང༌། མི་སྙན་པ་སྐྱོན་འབྲིང་དང༌། གཏམ་ངན་སྐྱོན་ཆུང་ངུ་འབྱུང་བའི་གཞི་རང་ལ་ཡོད་པའི་དངོས་པོ་མི་བསྲུང་བ། དང་པོར་འབྱུང་བ་མི་འགོག་པ་དང་མི་སེལ་བ། བྱུང་ཟིན་འཕྲོ་མི་གཅོད་ན་ཉོན་མོངས་ཅན་དང༌། དེ་འདྲའི་གཞི་མེད་པ་མི་བདེན་པ་མི་བསྲུང་ཞིང་མི་སེལ་ན་ཉོན་མོངས་ཅན་མིན་པ་ནི་གྲགས་པ་མ་ཡིན་པ་མི་སྤོང་བའི་ཉེས་བྱས། བརྗོད་མཁན་མུ་སྟེགས་པ་དང༌། ཡིད་མི་ཆེས་པ། ཁྲོ་བས་ནོན་པ་གསུམ་དང༌། བརྗོད་བྱ་རབ་བྱུང་དང་དགེ་བ་སྤྱོད་པ་སོགས་ལ་མི་སྙན་པ་བརྗོད་པ་མ་སེལ་ཀྱང་ཉེས་པ་མེད་དོ། །༡༦ ཕ་རོལ་བོའི་ལུས་ངག་གི་ཉེས་སྤྱོད་འདུལ་ཐབས་དྲག་པོའི་ཆད་པས་ཕྱིར་བཅོས་པར་མཐོང་བཞིན་དུ། གཞན་ལ་མི་དགའ་བ་ཙམ་བསྲུང་བའི་ཕྱིར་ཐབས་དེས་མི་འཆོས་ན་ཉོན་མོངས་བཅས་ཀྱང་མི་འཆོས་པའི་ཉེས་བྱས་ཉོན་མོངས་ཅན་ནོ། །ཕ་རོལ་ལ་དོན་ཆུང་ལ་ཡིད་མི་བདེ་ཆེན་པོར་འགྱུར་བ་དང༌། གཞན་དོན་ཆུང་ལ་རང་ལ་ཚེགས་ཆེ་བ་གཉིས་ལ་ཉེས་མེད་དོ། །དེ་དག་ནི་ཚུལ་ཁྲིམས་ཀྱི་མི་མཐུན་ཕྱོགས་དགུའོ། །