ཁྲོ་བོའི་རྒྱལ་པོ་སྨེ་བརྩེགས་ལ་བསྟོད་པའི་སྔགས།

༄༅། །ཁྲོ་བོའི་རྒྱལ་པོ་སྨེ་བརྩེགས་ལ་བསྟོད་པའི་སྔགས་བཞུགས་སོ། །

རྒྱ་གར་སྐད་དུ། ཀྲོ་དྷ་བྷུ་ར་ཀུ་མ་ཀུ་ཊ་རཱ་ཛ་སྟྲོཏྲ་མནྟྲ། བོད་སྐད་དུ། ཁྲོ་བོའི་རྒྱལ་པོ་སྨེ་བརྩེགས་ལ་བསྟོད་པའི་སྔགས། དཀོན་མཆོག་གསུམ་ལ་ཕྱག་འཚལ་ལོ། །ཨོཾ་བྷུ་ར་ཀུཾ་མ་ཧཱ་པྲ་ཎ་ཡ། བྷུར་ཙི་བྷུར་ཀི་མ་ཎཱ་སི། ཨུ་ཙུསྩ་ཀྲོ་དྷ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཕྱག་འཚལ་ཕྱག་འཚལ་ཕྱག་འཚལ་བསྟོད། །ཁྲོ་ལ་ཁྲོས་པས་ཁྲོ་བོ་ཆེ། །སངས་རྒྱས་སངས་རྒྱས་སྔར་སངས་རྒྱས། །ཆོས་སྐུ་ལོངས་སྐུ་སྤྲུལ་པའི་སྐུ། །སྨེ་བརྩེགས་ཞེས་བྱ་བདག་ཕྱག་འཚལ། །བསྐལ་པའི་མེ་ལྟར་འབར་དབུས་ན། །པདྨ་ཉི་ཟླའི་གདན་ལ་བཞུགས། །ལྗང་ནག་ཆེན་པོ་སྨེ་བ་ཅན། །ཞལ་གསུམ་པ་ལ་ཕྱག་དྲུག་སྟེ། །གཡས་དཀར་གཡོན་དམར་དབུས་ལྗང་བ། །སྤྱན་གསུམ་འཇིགས་པའི་མཆེ་བ་གཅིག །མི་གཙང་བདུད་རྩི་སྨན་བཞིན་གསོལ། །གཡས་པར་རྡོ་རྗེ་རལ་གྲི་བསྣམས། །གཡོན་པར་ཞགས་པ་ལྕགས་ཀྱུའོ། །ཐ་མ་སྡིག་མཛུབ་ཐུགས་ཀར་བསྣོལ། །སྨེ་གཙང་མེད་པའི་ལས་དག་བརྩོན། །གདུག་པ་སྦྲུལ་གྱིས་དབུ་ལུས་བརྒྱན། །འཇིགས་སྔངས་མེད་པར་བཏུལ་ཞུགས་སྤྱོད། །ཁྲོ་རྒྱལ་ཁྱོད་ལ་ཕྱག་འཚལ་བསྟོད། །མི་གཙང་བ་ནི་གཙང་བར་མཛད། །ཁྲོ་རྒྱལ་ཁྱོད་ལ་ཕྱག་འཚལ་བསྟོད། །འཇིགས་པ་ཀུན་ལས་སྐྱོབ་པར་མཛད། །ཁྲོ་རྒྱལ་ཁྱོད་ལ་ཕྱག་འཚལ་བསྟོད། །ནད་དང་རིམས་ལས་སྲུང་བར་མཛད། །ཁྲོ་རྒྱལ་ཁྱོད་ལ་ཕྱག་འཚལ་བསྟོད། མི་གཙང་ཟས་དང་མི་གཙང་གོས། །ཐམས་ཅད་སེལ་བར་བྱེད་པའི་མཆོག །ལྷ་དང་ཀླུ་དང་གནོད་སྦྱིན་གདོན། །ཐམས་ཅད་མ་ལུས་དགའ་བར་མཛད། །ནད་དང་རིམས་དང་དལ་ཡམས་རྣམས། །སྲུང་བའི་ལས་མཛད་ཕྱག་འཚལ་བསྟོད། །བདག་ལ་སྲུང་བ་མཛད་དུ་གསོལ། མི་གཙང་བ་རྣམས་གཙང་བར་མཛད། །སྨེ་བ་རྣམས་ནི་མིང་སྨེར་མཛད། །ལྕི་བ་རྣམས་ནི་ཡང་བར་མཛད། །དོག་པ་ཡངས་པ་མཛད་ལ་བསྟོད། །ཁྲོ་བོའི་རྒྱལ་པོ་སྨེ་བརྩེགས་ཁྱེད། །སངས་རྒྱས་ཀུན་གྱིས་བྱིན་གྱིས་བརླབས། །གང་དག་ཁྱོད་ལ་མོས་བརྟེན་རྣམས། །ལུས་བདེ་སེམས་བདེ་དབང་པོ་བདེ། །བདེ་བའི་ལྷ་ལ་ཕྱག་འཚལ་ལོ། །ལུས་དག་སེམས་དག་དབང་པོ་དག །དག་པའི་ལྟ་ལ་ཕྱག་འཚལ་ལོ། །ལུས་གཙང་སེམས་གཙང་དབང་པོ་གཙང༌། གཙང་བའི་ལྷ་ལ་ཕྱག་འཚལ་ལོ། །ལུས་དྭང་སེམས་དྭང་དབང་པོ་དྭང༌། །དྭང་བའི་ལྷ་ལ་ཕྱག་འཚལ་ལོ། །ལུས་གསལ་སེམས་གསལ་དབང་པོ་གསལ། །གསལ་བའི་ལྷ་ལ་ཕྱག་འཚལ་ལོ། །ལྷ་ཀླུ་ཡི་དྭགས་འདྲེ་སྲིན་སོགས། །གནོད་སྦྱིན་འབྱུང་པོས་འདི་ཐོས་ན། །སྡུག་བསྔལ་ཞི་ནས་བདེ་བར་འགྱུར། །གངས་རྒྱུད་བཞིན་དུ་དཀར་བར་འགྱུར། །ཤེལ་དཀར་བཞིན་དུ་གཙང་བར་འགྱུར། །མེ་ལོང་བཞིན་དུ་གསལ་བར་འགྱུར། །ནམ་མཁའ་བཞིན་དུ་དྭངས་བར་འགྱུར། །ས་དང་མཁའ་ལ་འཁོད་པ་ཡི། །ལྷ་ཀླུ་ལ་སོགས་སྡེ་བརྒྱད་ཀུན། །དགེ་བའི་བསམ་པས་འཁོད་འགྱུར་ཏེ། །གཞན་ལ་མ་གནོད་ཞི་བར་མཛོད། །ཁྲོ་བོའི་རྒྱལ་པོ་སྨེ་བརྩེགས་ལ་བསྟོད་པའི་སྔགས་སོ། །ཞུས་དག །སརྦ་མངྒ་ལཾ། །དགེའོ།། །།