སུན་ཟློག་བྱོན་ཞུས་མ་ཐ་ནས་ཡར་ཞུས།
སུན་ཟློག་བྱོན་ཞུས་མ་ཐ་ནས་ཡར་ཞུས་སོ།། ཀྱཻ། སངས་རྒྱས་མཁའ་འགྲོའི་ཞལ་ན་རེ། །སྔགས་འཆང་རྒྱལ་པོ་སྙན་གསོན་དང་། །ངེད་འོང་བ་དབུས་ཀྱི་ཕྱོགས་ནས་འོང་། །འདུག་ས་དབུས་ཀྱི་དུར་ཁྲོད་ཡིན། །མིང་ནི་སངས་རྒྱས་མཁའ་འགྲོ་བྱ། །རྐྱེན་ངན་སུན་མ་བསྒྱུར་དུ་འོང་། །བཞེས་ནི་འདོད་ཡོན་ལྔ་ལ་བཞེས། །དཔའ་བོས་དེ་ཟླ་ལྟར་དགོངས་པར་མཛོད།། ༼ཀ༽ ཀྱཻ། རྡོ་རྗེ་མཁའ་འགྲོའི་ཞལ་ན་རེ། །སྔགས་འཆང་རྒྱལ་པོ་སྙན་གསོན་དང་། །ངེད་འོང་བ་ཤར་གྱི་ཕྱོགས་ནས་འོང་། །འདུག་ས་དུར་ཁྲོད་ཤར་ན་འདུག །མིང་ནི་རྡོ་རྗེ་མཁའ་འགྲོ་བྱ། །རྐྱེན་ཟློག་སུན་མ་བསྒྱུར་དུ་འོང་། །བཞེས་ནི་འདོད་ཡོན་ལྔ་ལ་བཞེས། །དཔའ་བོས་དེ་ལྟར་དགོངས་པར་མཛོད། ཁ༽ ཀྱཻ། རིན་ཆེན་མཁའ་འགྲོའི་ཞལ་ན་རེ། །སྔགས་འཆང་རྒྱལ་པོ་སྙན་གསོན་དང་། །ངེད་འོང་བ་ལྷོ་ཡི་ཕྱོགས་ནས་འོང་། །འདུག་ས་ལྷོ་ཡི་དུར་ཁྲོད་ཡིན། །མིང་ནི་རིན་ཆེན་མཁའ་འགྲོ་བྱ། །རྐྱེན་ངན་སུན་མ་བསྒྱུར་དུ་འོང་། །བཞེས་ནི་འདོད་ཡོན་ལྔ་ལ་བཞེས། །དཔའ་བོས་དེ་ལྟར་དགོངས་པར་མཛོད། །༼ག༽ ཀྱཻ། པདྨ་མཁའ་
འགྲོའི་ཞལ་ན་རེ། །སྔགས་འཆང་རྒྱལ་པོ་སྙན་གསོན་དང་། །ངེད་འོང་བ་ནུབ་ཀྱི་ཕྱོགས་ནས་འོང་། །བཞུགས་ས་ནུབ་ཀྱི་དུར་ཁྲོད་ཡིན། །མིང་ནི་པདྨ་མཁའ་འགྲོ་བྱ། །རྐྱེན་ངན་སུན་མ་བསྒྱུར་དུ་འོང་། །བཞེས་ནི་འདོད་ཡོན་ལྔ་ལ་བཞེས། །དཔའ་བོས་དེ་ལྟར་དགོངས་པར་མཛོད།། ང༽ ཀྱཻ། ལས་ཀྱི་མཁའ་འགྲོའི་ཞལ་ན་རེ། །སྔགས་འཆང་རྒྱལ་པོ་སྙན་གསོན་དང་། །ངེད་འོང་བ་བྱང་གི་ཕྱོགས་ནས་འོང་། །འདུག་ས་བྱང་གི་དུར་ཁྲོད་ཡིན། །མིང་ནི་ལས་ཀྱི་མཁའ་འགྲོ་བྱ། །རྐྱེན་ངན་སུན་མ་བསྒྱུར་དུ་འོང་། །བཞེས་ནི་འདོད་ཡོན་ལྔ་ལ་བཞེས། །དཔའ་བོས་དེ་ལྟར་དགོངས་པར་མཛོད། ༼ཅ༽ ཀྱཻ། སྔགས་འཆང་རྒྱལ་པོ་སྙན་གསོན་དང་། །ངེད་འོང་ནི་ཨོ་རྒྱན་ཡུལ་ནས་འོང་། །བཞུགས་ས་དུར་ཁྲོད་གནས་བརྒྱུད་ཡིན། །མིང་ནི་སྣ་ཚོགས་མཁའ་འགྲོ་ཡིན། །ཕྲིན་ལས་སུན་མ་བསྒྱུར་དུ་འོང་། །དགྱེས་ནི་འདོད་ཡོན་ལྔ་ལ་དགྱེས། །དཔའ་བོས་དེ་ལྟར་དགོངས་པར་མཛོད། ༼ཆ༽ ཀྱཻ། སྔགས་འཆང་རྒྱལ་པོ་སྙན་གསོན་དང་། །རིགས་ནི་གསང་སྔགས་ཐེག་ཆེན་རིགས། །གནས་ནི་ཡེ་ཤེས་དབྱིངས་ལ་
གནས། །ལྟ་ནི་སྟོང་ཉིད་དོན་ལ་ལྟ། །འདུག་ནི་བདེ་གསལ་ངང་ལ་འདུག །ཟས་སུ་བདུད་རྩི་ལྔ་ལ་མྱོང་། །ལས་སུ་འགྲོ་དྲུག་ཐུགས་རྗེས་འདྲེན། །ངེད་མཁའ་འགྲོའི་མཚན་ཉིད་དེ་ལྟར་ལགས། །ཨོ་རྒྱན་ཡུལ་གྱི་མཚན་ཉིད་ནི། །རང་བཞིན་ལྷུན་གྱིས་གྲུབ་པའི་གནས། །སྒྱུ་མ་ལུས་ཀྱི་ཞིང་ཁམས་ན། །དེ་ལ་སྐྲག་འཇིགས་ཡེ་ནས་མེད། །ཡེ་ཤེས་འོད་ཀྱི་གཞལ་ཡས་ལ། །མ་རིག་འཁྲུལ་པའི་རྒྱུས་མ་གོས། །སྣང་སྟོང་སྒྱུ་མའི་དཀྱིལ་འཁོར་ལ། །ཆགས་འཛིན་བྱུང་དོར་རྒྱུས་མ་གོས། །ཆོས་སྐུ་མཁའ་ལྟར་དག་པ་ལ། །ཁ་དོག་འཛིན་པའི་མཐའ་དང་བྲལ། །ལོངས་སྐུ་འགགས་པ་མེད་པ་ལ། །སྐྱེ་འཆི་གཉིས་མེད་ལྷུན་གྱིས་གྲུབ། །སྤྲུལ་པ་ཉི་ལྟར་གསལ་བ་ལ། །ལོང་ལ་མུན་པའི་སྐྱོ་མི་འཇིགས། །རྒྱུ་དང་རྐྱེན་གྱིས་མ་གོས་པའི། །ལྷ་ཆེན་སྐར་ཆེན་ཤར་འདྲ་ཡོད། །ལྷ་བྲན་སྐར་བྲན་ཤར་འདྲ་ཡོད། །སྒྲོན་མེ་ཉི་མ་ཤར་འདྲ་ཡོད། །མེ་ཏོག་རྩི་ལྟར་རྒྱས་འདྲ་ཡོད། །བདུག་སྤོས་སྤྲིན་ལྟར་གཏིབས་འདྲ་ཡོད། །སྣང་གསལ་ལྷ་མོ་འོད་འཕྲོ་ཡོད། །རོ་མཆོག་བརྒྱད་ལྡན་ཞལ་ཟས་ཡོད། །རྐང་གླིང་ཐོད་རྔའི་སྒྲ་
དབྱངས་ཡོད། །མ་རྨོས་པ་ཡི་ལོ་ཏོག་ཡོད། །རི་བོ་ཐམས་ཅད་རིན་ཆེན་རི། །རྩི་ཤིང་ཐམས་ཅད་དཔག་བསམ་ཤིང་། །འབྲས་བུ་ཐམས་ཅད་ནོར་བུ་སྨིན། །ལོ་འདབ་ཐམས་ཅད་དར་ཟབ་ཡིན། །ཆུ་ཀླུང་ཐམས་ཅད་ཟག་མེད་ཆུ། །སྒྲ་སྐད་ཐམས་ཅད་མཁའ་འགྲོའི་སྒྲ། །དབྱར་དགུན་ཟེར་བའི་དྲོ་གྲང་མེད། །ཉིན་མཚན་ཟེར་བའི་གསལ་འགྲིབ་མེད། །ལྷ་ཕམ་ལྟུང་ཟེར་བའི་སྡུག་བསྔལ་མེད། །ལྷ་མིན་འཐབ་རྩོད་ཟེར་བ་མེད། །མི་ལུས་དབུལ་ཕོངས་ཟེར་བ་མེད། །དམྱལ་བ་ཚ་གྲང་ཟེར་བ་མེད། །བྱོལ་སོང་གླེན་ལྐུགས་ཟེར་བ་མེད། །ཡི་དྭགས་བཀྲེས་སྐོམ་ཟེར་བ་མེད། །ཉོན་མོངས་དུག་ལྔ་ཟེར་བ་མེད། །ཅི་ཡང་མ་གྲུབ་སྟོང་པའི་ངང་། །སྟོང་པའི་ངང་ལ་གསལ་བར་གསལ། །དེ་ཨོ་རྒྱན་ཡུལ་གྱི་མཚན་ཉིད་ཡིན། །དུར་ཁྲོད་བརྒྱད་ཀྱི་གནས་ལུགས་ནི། །ཨོ་རྒྱན་ཡུལ་གྱི་ཤར་ཕྱོགས་ན། །གཏུམ་དྲག་འབར་བའི་དུར་ཁྲོད་ཡོད། །དེ་ན་རྡོ་རྗེ་མཁའ་འགྲོ་བཞུགས། །ཨོ་རྒྱན་ཡུལ་གྱི་ལྷོ་ཕྱོགས་ན། །གད་རྒྱངས་སྒྲོགས་པའི་དུར་ཁྲོད་ཡིན། །དོན་གྲུབ་རིན་ཆེན་མཁའ་འགྲོ་བཞུགས། ཨོ་རྒྱན་ཡུལ་གྱི་ནུབ་ཕྱོགས་
ན། །པདྨ་འཁྱིལ་པའི་དུར་ཁྲོད་ཡོད། །དྲི་མེད་པདྨ་མཁའ་འགྲོ་བཞུགས། །ཨོ་རྒྱན་ཡུལ་གྱི་བྱང་ཕྱོགས་ན། །ཀཱི་ལ་སྒྲོགས་པའི་དུར་ཁྲོད་ཡོད། །བདེ་ཆེན་ལས་ཀྱི་མཁའ་འགྲོ་བཞུགས། །ཤར་ལྷོ་རབ་འཇིགས་དུར་ཁྲོད་ཡོད། །དམ་ཚིག་ལྡན་པའི་མཁའ་འགྲོ་བཞུགས། །ལྷོ་ནུབ་གཏུམ་པོའི་དུར་ཁྲོད་ཡོད། །མི་མཐུན་སྣ་ཚོགས་མཁའ་འགྲོ་བཞུགས། །ནུབ་བྱང་རབ་རྒྱུའི་དུར་ཁྲོད་ཡོད། །ཀུན་རྒྱུག་ཐམས་ཅད་མཁའ་འགྲོ་བཞུགས། །བྱང་ཤར་དྲག་ཤུལ་དུར་ཁྲོད་ཡོད། །རྒྱུད་འཛིན་འཇིག་རྟེན་མཁའ་འགྲོ་བཞུགས། །དུར་ཁྲོད་བརྒྱད་ཀྱི་གནས་ལུགས་ཡིན། །དཔའ་བོས་དེ་ལྟར་དགོངས་པར་མཛོད། །ཅེས་བྱོན་ཞུས་དྲི་མེད་མཁའ་འགྲོ་ལས་ཁོལ་དུ་ཕྱུང་བའོ། །མངྒ་ལཾ།།