འཁོར་འདས་དབྱེར་མེད་ཀྱི་ལྟ་བའི་གནད་རྣམས་ལེགས་པར་བཤད་པ་བདུད་རྩིའི་ཉིང་ཁུ།

བླ་མ་དང་ལྷག་པའི་ལྷ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཅིང་སྐབས་དབྱེ་བར་མཛད་དུ་གསོལ། འདིར་ལྟ་བ་འཁོར་འདས་དབྱེར་མེད་ཀྱི་བསྒོམ་ཚུལ་གྱི་གནད་ཅུང་ཟད་བཤད་ན། སྤྱིར་འཁོར་འདས་དབྱེར་མེད་ཀྱི་ལྟ་བ་གསལ་སྟོང་ཟུང་འཇུག་ཅེས་པ་འདི་ལ་གོ་བ་མྱོང་ལུགས་མི་འདྲ་བ་དུ་མ་ཞིག་ཡོད་དེ། ཡུམ་ལས་གཟུགས་སྟོང་པའོ། །སྟོང་པ་ཉིད་ཀྱང་གཟུགས་སོ་ཞེས་སོགས་སྟོང་ཉིད་བཞི་སྦྱོར་གསུངས་པ་ལྟར། སྣང་བ་སེམས་བསྒྲུབ་མ་བྱས་པའི་གསལ་སྟོང་ཟུང་འཇུག་ཞིག་དང་། རྨི་ལམ་གྱི་དཔེ་སོགས་ཀྱི་སྒོ་ནས་སྣང་བ་སེམས་བསྒྲུབ་བྱས་ཏེ་སེམས་ཀྱི་རང་བཞིན་གང་དུའང་མ་གྲུབ་པར་ཤེས་པའི་གསལ་སྟོང་ཟུང་འཇུག་གཉིས་ལས། དེ་གཉིས་ཀ་ལའང་སྟོང་ཚུལ་ཆོས་དང་གང་ཟག་གི་བདག་གཉིས་ཀྱིས་གདོད་མ་ནས་སྟོང་པར་ཤེས་པ་ཞིག་དགོས་ཀྱི། སྟོང་ཚུལ་ཇི་བཞིན་མ་ཤེས་ན་ངན་འགྲོར་འགྲོ་བ་དང་། གཟུགས་མེད་སྐྱེ་མཆེད་མུ་བཞི་སོགས་སུ་གོལ་བ་འབྱུང་། བརྒྱུད་པ་འདི་ཡི་བཀའ་སྲོལ་ལས་བྱུང་བ་བཞིན་དུ་འཁོར་འདས་གཉིས་ཀྱིས་བསྡུས་པའི་ཆོས་ཐམས་ཅད་རང་གི་ལུས་ལ་རྩ་ཁམས་ཀྱི་ཚུལ་དུ་ཚང་ཞིང་། དེ་ཐམས་ཅད་གསང་བ་སེམས་ཀྱི་སྟེང་ན་བག་ཆགས་ཀྱི་ཚུལ་དུ་ཡོད་པའི་གོ་བ་དཔྱིས་ཕྱིན་པ་ཞིག་བླ་མའི་མན་ངག་གི་དྲིན་གྱིས་རང་ལ་ཉམས་མྱོང་གི་ཚུལ་གྱི་སྐྱེ་སྟེ། རང་གི་སེམས་གསལ་སྟོང་ཟུང་འཇུག་ཏུ་ངོ་སྤྲོད་པ་གསུམ་ལས། ཕྱི་མ་འདི་དཔལ་ས་སྐྱ་པའི་ལྟ་བ་འཁོར་འདས་དབྱེར་མེད་ཟེར་བ་དེ་ཡིན། འདི་ལའང་གཞི་ལམ་འབྲས་གསུམ་དབྱེར་མེད་དུ་ཤེས་པའི་གནད་འདི་མེད་ན་འཁོར་འདས་དབྱེར་མེད་མཚན་ཉིད་བར་མི་འགྲོ། དེ་ལྟ་བུའི་གནད་དང་ལྡན་པའི་ལྟ་བ་འཁོར་འདས་དབྱེར་མེད་ལ་གོ་མྱོང་ལེགས་པོ་ཞིག་ཤར་ནས་བཟུང་། སྐྱོན་དང་བར་ཆད་ཐམས་ཅད་རང་གྲོལ་དུ་འགྲོ་ཞིང་ཡོན་ཏན་དང་དངོས་གྲུབ་ཐམས་ཅད་འབད་མེད་དུ་འབྱུང་བའི་གནད་ཞིག་ཡོད་དེ། དེ་ཡང་ཕྱོགས་ཙམ་བརྗོད་ན། བདེན་གཉིས་ཟུང་འཇུག་ཏུ་ཤེས་པའི་སྟོབས་ཀྱིས་བསོད་ནམས་དང་ཡེ་ཤེས་ཀྱི་ཚོགས་གཉིས་ལྷན་ཅིག་རྫོགས་པའི་གནད་དང་། ༡གཞི་འབྲས་དབྱེར་མེད་དུ་རྟོགས་པའི་ཐ་མལ་སྣང་ཞེན་གྱིས་མི་གོས་ཤིང་སྣང་བ་དཀྱིལ་འཁོར་གྱི་འཁོར་ལོར་འཆར་བའི་གནད་དང་། ༢སྐུ་བཞི་རང་ལ་ལྷུན་གྲུབ་ཏུ་ཡོད་པ་ཤེས་ནས་རྩ་ཐིག་རླུང་གསུམ་ལ་གནད་དུ་བསྣུན་པས་གྱ་ནོམ་ལྷར་ཞེན་ལས་གྲོལ་ཞིང་། རྫོགས་རིམ་གྱི་ཡེ་ཤེས་འདྲེན་ནུས་པའི་བསྐྱེད་རྫོགས་ཟུང་འཇུག་ཏུ་འགྱུར་བའི་གནད་དང་། ༣ཉོན་མོངས་པ་གདོད་ནས་རང་གྲོལ་དུ་ཤེས་པས་དུག་ལྔའི་གོལ་ས་མི་འབྱུང་ཞིང་ཚོགས་དྲོད་འབྱོར་བའི་གང་ཟག་ལའང་ཉོན་མོངས་དང་རྣམ་རྟོག་གང་ཤར་ཐམས་ཅད་མཚོན་བྱེད་དཔེའི་ཡེ་ཤེས་སུ་འཆར་བའི་གནད་དང་། ༤སྣང་སྲིད་གདོད་ནས་ལྷ་དང་ཡེ་ཤེས་སུ་ངོ་འཕྲོད་པའི་དམ་ཡེ་དབྱེར་མེད་དུ་རྟོགས་ནས་རང་སེམས་རིགས་བརྒྱའི་ཁྱབ་བདག་ཏུ་ཤེས་པའི་གནད་དང་། ༥འཁོར་འདས་དབྱེར་མེད་ཀྱི་ཀློང་ན་བཟང་ངན་སྤང་བླང་མེད་པ་ཤེས་ནས་གཙང་སྨེ་གཉིས་སུ་འཛིན་པའི་རྟོགས་པ་ལས་གྲོལ་ཏེ་ཡེ་ཤེས་བདུད་རྩིའི་ཚོགས་འཁོར་ལ་རོལ་ནུས་པའི་གནད་དང་། ༦གཞི་ལམ་འབྲས་གསུམ་རང་སེམས་སྐད་ཅིག་མའི་སྟེང་དུ་ངོ་འཕྲོད་པའི་དུས་གསུམ་དུས་མེད་དུ་རྟོགས་ནས་གྲངས་མེད་གསུམ་གྱི་དཀའ་སྤྱད་མི་དགོས་པ་ཚེ་གཅིག་ལུས་གཅིག་གི་འཚང་རྒྱ་བའི་གནད་དང་། ༧སྣང་སྲིད་དག་པ་རབ་འབྱམས་སུ་ཤེས་པས་བདུད་དང་གོལ་ས་རང་གྲོལ་དུ་གྱུར་ཏེ། འཇིག་རྟེན་རང་རྒྱུད་པ་ལས་མཆོག་གི་དངོས་གྲུབ་ལེན་ནུས་པའི་གནད་དང་། ༨རྟེན་དཀྱིལ་འཁོར་བཞི་ལ་གནད་དུ་བསྣུན་པའི་སྣང་བ་སེམས་བསྒྲུབ་ཐུན་མོང་མ་ཡིན་པའི་སྟོབས་ཀྱིས་ལུས་ཟག་མེད་འཇའ་ལུས་དང་། སེམས་རྟོག་མེད་ཆོས་སྐུར་ངོ་འཕྲོད་དེ་ལུས་སེམས་དུས་གཅིག་ལ་གྲོལ་བའི་གནད་དང་། ༩རང་བཞིན་རྣམ་དག་ལ་གློ་བུར་དྲི་བྲལ་གྱི་རྒྱས་ལེགས་པར་ཐེབས་པའི་གཙང་བདེ། རྟག་བདག་དང་། རང་དོན་ཡིད་བྱེད་། ཐ་མལ་སྣང་ཞེན་གྱ་ནོན་སྙན་ཞེན་སོགས་ཀུན་ཏུ་བརྟགས་པའི་དུག །ཀུན་ཏུ་རྟོག་འི་དུག །གྱ་ནོམ་ལྷར་ཞེན་གྱི་དུག་གསུམ་པོ་དུས་གཅིག་ལ་ཆོད་པའི་གནད་དང་། ༡༠མི་མཐུན་པ་མེད་ཅིང་འདུས་པ་དང་ལྡན་པ་ཞེས་གསུངས་པ་ལྟར། ཐེག་པ་གསུམ་གྱི་རྟོགས་རིགས་ཡར་ལྡན་དུ་ཚང་བའི་གནད་ཤེས་ན་ཉམས་ལེན་ལམ་དུས་སོགས་ཀྱི་སྦྱོར་དངོས་རྗེས་གསུམ་གཞི་ལམ་འབྲས་བུའི་ཡོན་ཏན་རྣམས་རིག་པ་སྐད་ཅིག་མའི་སྟེང་དུ་བསྡུ་ཤེས་པའི་གནད་དང་། ༡༡བདག་འཛིན་གཉིས་དུས་གཅིག་ཆོད་པའི་ལྷའི་ང་རྒྱལ་བསྒོམ་པས་གང་ཟག་གི་བདག་འཛིན་དང་། དཀྱིལ་འཁོར་གྱི་རྣམ་དག་དྲན་པ་ཆོས་ཀྱི་བདག་འཛིན་གྱི་གཉེན་པོར་འགྲོ་བའི་གནད་དང་། ༡༢འཁོར་འདས་ཕྱི་རུ་མ་ལུས་པ་སྤྲོས་པ་ནང་ནས་ཆོད་པས་རེ་དོགས་གཉིས་འཛིན་གྱིས་རྟོག་པ་ཡལ་ཏེ་སྐྱོན་ཡོན་ཏན་དུ་སློང་། བར་ཆད་དངོས་གྲུབ་ཏུ་ལེན། སྣང་བ་དགེ་བའི་བཤེས་གཉེན་དུ་འཆར་བའི་གནད་དང་། ༡༣མཉམ་རྗེས་གང་གི་དུས་སུའང་ཚོགས་དྲུག་གི་ཡུལ་སྣང་ཐམས་ཅད་ལ་ལྟ་བ་འཁོར་འདས་དབྱེར་མེད་ཀྱིས་རྒྱས་ལེགས་པར་ཐེབས་ན་སྡོམ་པ་གསུམ་གྱི་སྤང་བྱ་ཐམས་ཅད་དུས་གཅིག་ལ་བསྡོམས་ཏེ་སུམ་ལྡན་རྡོ་རྗེ་འཛིན་པ་ཆེན་པོར་འགྱུར་བའི་གནད་དང་། ༡༤ཉན་ཐོས་ཀྱི་ལམ་གནད་ཚང་བས། སྲིད་མཐའ་ལ་མི་གནས། ཐེག་ཆེན་ཕ་རོལ་ཏུ་ཕྱིན་པའི་ལམ་གནད་ཚང་བས་ཞི་མཐའ་ལ་མི་ཕྱོགས། གསང་ཆེན་བླ་ན་མེད་པའི་གནད་ཚང་བས་སྤང་བྱ་གཉེན་པོར་ཤར་ཏེ་དུས་མྱུར་དུ་འཚང་རྒྱ་བའི་གནད་དང་། ༡༥སྣང་བ་ལ་སྐུར་པ་མ་བཏབ་པར་རྟེན་འབྲེལ་ལམ་དུ་བྱས་ཏེ་དག་སྣང་གིས་རྒྱས་ཐེབས་པའི་ས་དང་ལམ་གྱིས་ཡོན་ཏན་ཐམས་ཅད་ལྷུན་གྲུབ་ཏུ་འབྱུང་བའི་གནད་དང་། ༡༦གང་ལ་ཡང་དངོས་འཛིན་གྱི་འཁྲུལ་པ་ཆོད་པས་སྣང་བའི་མི་འཆིང་བའི་གནད་དང་། ༡༧བཟང་ངན་དང་མང་ཉུང་མཐོ་དམན་ཡང་དོག་དང་དུས་ཡུན་རིང་ཐུང་སྐད་ཅིག་བསྐལ་པ་ཞིམ་མི་ཞིམ། སྤངས་གཉེན། གསལ་མི་གསལ་སོགས་གཉིས་ཆོས་ཐམས་ཅད་གཉིས་མེད་ཀྱི་ཀློང་དུ་མཉམ་པ་ཉིད་དུ་ཤེས་ན་གང་ལ་ཡང་མི་བདེ་བ་མེད་པའི་གནད་དང་། ༡༨རང་རེ་རྣམས་ཀྱི་ཉམས་ལེན་ལམ་དུས་ལྟ་བུར་ལ་མཚོན་ན། ཕྱི་ནང་གི་བསྐྱེད་རིམ་ལམ་དུས་ཀྱི་དབང་ཡན་ལག་དང་བཅས་པ། འཁོར་བའི་གནས་ཚུལ་དང་མཐུན་པའི་འཁྲུལ་སྣང་གིས་བག་ཆགས་དབྱིངས་སུ་སྦྱངས་ནས་འཁོར་བ་མ་སྤངས་ལམ་དུ་ཁྱེར་བ་དང་། མྱང་འདས་ཀྱིས་བཞུགས་ཚུལ་དང་མཐུན་པའི་སངས་རྒྱས་ཀྱི་སྐུ་དང་ཡེ་ཤེས་ཕྲིན་ལས་ཐམས་ཅད་གཞི་ལ་རྫོགས་ཤིང་། རྒྱལ་བའི་ཕྲིན་ལས་ད་ལྟ་ནས་ལམ་དུ་བྱེད་ནུས་པ་དང་། ཕྱི་ནང་གིས་རྟེན་འབྲེལ་གྱི་གནད་ཀྱིས་རྩ་ཐིག་རླུང་གསུམ་ལ་གནད་དུ་བསྣུན་པའི་བསྐྱེད་རྫོགས་ཟུང་འཇུག་ཏུ་འགྱུར་ཏེ། མཚོན་བྱེད་དཔེའི་ཡེ་ཤེས་མྱུར་དུ་སྐྱེ་ཞིང་། དེས་མཚོན་བྱ་དོན་གྱི་ཡེ་ཤེས་འདྲེན་ནུས་པའི་གནད་དང་། ༡༩ཕྱི་ནང་གི་རྟེན་འབྲེལ་གྱི་གནད་ཇི་ལྟ་བ་བཞིན་མཁྱེན་པ་རྫོགས་པའི་སངས་རྒྱས་ཁོ་ན་ཡིན་པས་དམན་པ་བདག་ལྟ་བུས་ཤེས་པ་མི་ནུས་ཀྱང་བརྒྱུད་པ་བཟང་པོ་དང་ལྡན་པའི་བླ་མའི་བཀའ་དྲིན་གྱིས་གོ་ཡུལ་ཅུང་ཟད་ནི་ཞུས་ཟིན་ལ། འགའ་ཞིག་ནི་སྨྲ་མི་སྤོབས་ཀྱང་། ཕྱོགས་ཙམ་མཐོང་ནའང་གྲུབ་མཐའ་ཐམས་ཅད་འགལ་མེད་དུ་རྟོགས། གཞུང་ལུགས་ཐམས་ཅད་གདམས་ངག་ཏུ་ཤར། རྒྱལ་བའི་དགོངས་པ་བདེ་བླག་ཏུ་རྙེད། ཉེས་སྤྱོད་ཐམས་ཅད་རང་འགགས་སུ་འགྲོ་བའི་གནད་དང་། ༢༠ཐུན་མོང་མ་ཡིན་པའི་མན་ངག་བཞིན་སྣང་བ་སེམས་སུ་བསྒྲུབ་སྟེ་རིག་པ་སྐད་ཅིག་མ་སེམས་གསལ་བའི་སྟེང་ན་འཁོར་འདས་ཚང་བའི་ངེས་པ་རྙེད་ན་རེ་དོགས་ཀྱིས་སྤྲོས་པ་ཆོད་པར་འགྱུར་བའི་དང་པོ་སྣང་སེམས་བསྲེ། སེམས་གསལ་བའི་ཆ་དེའང་དབྱིངས་སྤྲོས་པ་དང་བྲལ་བ་ལས་ནམ་ཡང་གཡོ་བ་མེད་པར་ཤེས་ནས། དབྱིངས་རིག་བསྲེ་ཏེ་བཅས་བཅོས་དགག་བསྒྲུབ་མེད་པར་མཉམ་པར་བཞག་ན་གསལ་སྟོང་ཟུང་འཇུག་ཏུ་འགྱུར་བའི་གནད་དང་། ༢༡དེ་བཞིན་ཉིད་ཀྱིས་དག་པའི་དབྱིངས་སྤྲོས་པ་དང་བྲལ་བ་ལ་ཡིད་ཆེས་བསྐྱེད་ནས། ལྷ་སོ་སོའི་དག་པ་ཀུན་རྫོབ་ཐ་མལ་སྣང་ཞེན་ལས་བཟློག་སྟེ། དེ་གཉིས་ཟུང་དུ་འཇུག་པའི་ཕྱིར། རང་རིག་པ་དག་པའི་རིག་པ་ཡེ་ཤེས་ཀྱི་ངོ་ན་ལྷ་དང་ཡེ་ཤེས་ཐ་དད་དུ་མེད་པར་ངོ་འཕྲོད་པ་ལ་དག་པ་གསུམ་ཞེས་བརྗོད་པ་ལ་གནད་འདི་མ་ཤེས་ན་ཀུན་རྫོབ་འཁྲུལ་སྣང་ལྷར་བསྒོམ་ཀྱང་ལྷར་མི་འགྱུར་ཞེས་དང་། ལྷ་ཡིན་ན་དོན་དམ་ཆོས་ཉིད་ཡིན་དགོས་ཞེས་གྲུབ་མཐའ་མི་མཐུན་པ་དུ་མ་འབྱུང་བའི་དག་པ་གསུམ་གྱིས་གནད་ལ་མཁས་པར་བྱས་ན་སྦྱང་གཞི་སྦྱོང་བྱེད་ཀྱིས་སྦྱོར་ཚུལ་དང་། སྣང་བ་དཀྱིལ་འཁོར་གྱི་འཁོར་ལོར་འཆར་བའི་ངེས་ཤེས་བཅོས་མིན་འབྱུང་བའི་གནད་དང་། ༢༢གནད་ཐམས་ཅད་ཀྱི་གཙོ་བོ་བདག་ཅག་གི་བླ་མ་ཆོས་ཀྱི་རྗེ་ལྟ་བུ་བླ་མ་མཚན་ལྡན་ལས་དབང་དང་གདམས་ངག་ཐོབ་ནས་ལམ་དུས་དང་བླ་མའི་རྣལ་འབྱོར་སོགས་ཐུན་བཞིའི་རྣལ་འབྱོར་ལ་ཁ་ཞེ་ངོ་ལྐོག་མེད་པའི་མོས་གུས་ཀྱིས་འབད་ནུས་ན་དྲོད་གཤེར་འཛོམས་པའི་ཕྱོགས་སུ་རྩི་ཤིང་སྐྱེ་བ་ལྟར་རྟེན་འབྲེལ་ཐམས་ཅད་ནང་ནས་སྐྱེ་དགོས་པས། ཉམས་མྱོང་ཚད་མ་རང་ལས་འབྱུང་བར་འགྱུར་བ་ནི་རྟེན་འབྲེལ་གྱི་ཆོས་ཉིད་ཀྱིས་གནད་ཡིན་ནོ། །༢༣གོང་དུ་ཉོན་མོངས་པ་རྣམས་གདོད་ནས་རང་གྲོལ་དུ་ཤེས་ཞེས་དང་། གཞི་དུས་ནས་སྐུ་བཞི་རང་ལ་ལྷུན་གྱི་གྲུབ་ཚུལ་དང་། ཐམས་ཅད་མཉམ་པ་ཉིད་སྨྲས་པ་རྣམས་རྙིང་མ་སོགས་གྲུབ་མཐའ་གཞན་གྱིས་ཆོས་སྐད་མ་ཡིན་ནམ་ཞེ་ན། རང་རེའི་དཀྱིལ་ཆོག་གི་དམ་ཚིག་གསུམ་གྱི་གླུ་ལེན་པའི་སྐབས། གདོད་ནས་གྲོལ་བ་དེ་བཞིན་གཤེགས་ཞེས་དང་། དགོངས་པ་ལུང་བསྟན་ལས། རྒྱུ་འབྲས་ལྷུན་གྲུབ་ཏུ་སྤྱོད་ཅིང་། ཞེས་སོགས་དང་། བརྟག་གཉིས་ལས། རོ་མཉམ་སློབ་མའི་སྤྱོད་ཡུལ་ཉིད་ཅེས་སོགས་མང་དུ་འབྱུང་བའི། རྒྱུས་མེད་ཕུག་ལ་མ་མངག་ཟེར་བའི་དཔེ་ལྟར་ཆོས་འདི་ལ་དུས་ཕྱིས་ཐོས་བསམ་བསྒོམ་བསྒྲུབ་བྱེད་མཁན་ཉུང་བས་རང་ལ་ཅི་ཡོད་རང་གི་བུ་ཚ་རྣམས་ཀྱིས་མཁྱེན་དཀའ་བའི་རྟོགས་དཔྱོད་མི་མང་བའི་ཡིད་ཆེས་མཛད་ན་ཁོ་བོ་ལ་ཉམས་མྱོང་མེད་ཀྱང་ཆོས་འདི་ལ་ནོར་འཁྲུལ་མེད་པའི་ཡིད་ཆེས་ཤིག་ཡོད་པ་ལགས་སོ། །སླར་སྨྲས་པ། ཟབ་མོའི་གནད་དོན་འདུས་པའི་གསང་གཏམ་འདི། །རྡོ་རྗེའི་གྲོགས་ཀྱིས་ཞལ་ངོ་མ་ཆོག་པར། །སྦས་དོན་ཡི་གེར་བྲིས་པའི་ནོངས་པ་ཀུན། །རྗེ་བཙུན་མཁའ་འགྲོའི་ཚོགས་ལ་བཟོད་པར་གསོལ། །དགེ་བའི་སྙིང་གི་གྲོགས་པོ་ཁྱེད་རྣམས་ཀྱིས། །དགོས་མེད་ཚེ་འདིའི་བྱ་བས་མི་གཡེངས་པར། །གཅིག་ཏུ་བསྒྲུབ་ལ་གཞོལ་བའི་ངང་ཚུལ་དེས། །མྱུར་དུ་སྙིང་པོའི་བཙན་ས་ཟིན་པར་ཤོག །ཀུན་མཁྱེན་གཉིས་པ་ས་སྐྱ་པ། །ཀུན་སྙིང་ཡབ་སྲས་རིང་ལུགས་མཆོག །ཀུན་ལ་མེད་པའི་ཁྱད་ཆོས་འདི། །ཀུན་དགའ་རྒྱལ་མཚན་ཞེས་བྱས་བྲིས། །དགེའོ།། །།