འཇམ་དཔལ་མཚན་བརྗོད་ལས་ཀུན་མཁྱེན་མི་ཕམ་རྒྱ་མཚོ་ལུང་གིས་ཟིན་ཚུལ་བསྟན་པ།
དེ་ཡང་འཇམ་དཔལ་མཚན་བརྗོད། སོ་སོར་གཟིགས་པའི་ཡེ་ཤེས་བསྟོད་པའི་སྐབས་ཀྱི། སྨྲ༷་བའི༷་སེ༷ངྒེ༷་ཚུ༷གས་པ༷་མེ༷ད། །ཞེས་པའི་ཐད་ཀྱི་རབ་གསུང་གི་རྒྱ་དཔེ་ན། བཱ་དི་སཾ་ཧོ་པ་རཱ་ཛི་ཏཿཞེས་ཡོད་པ་ལ། དེ་ལས་པ་རཱ་མཆོག་དང་ཕ་རོལ་དམ་པ་ཡོངས་ལ་འཇུག་ལ། ཛི་ཏཿའི་སྔོན་དུ་ལེགས་སྦྱར་གྱི་དགག་ཚིག་ཨ་ཐུང་བཞག་པས། ཨ་ཛི་ཏཿནི་མི༷་ཕ༷མ་པའམ་མི༷་ཚུ༷གས་པ་ཞེས་པར་འགྱུར་ལ། དེ་ལས་སྔ་མ་ལྟར་བསྒྱུར་ན། སྨྲ༷་བ༷འི་སེ༷ངྒེ༷་མི༷་ཕ༷མ་མཆོ༷ག ཅེས་པར་བསྒྱུར་ཚེ། ཉེར་བསྒྱུར་གྱི་པ་ར་ཨ་ཛི་ཏཿའི་སྔོན་དུ་ཡོད་པ་དེའི་སྐད་དོད་གར་སོང་མེད་པས་བསྒྱུར་ཚུལ་འདི་ནི་མི་བཟང་བར་སེམས་སོ། །འོ་ན་སྔ་འགྱུར་གྱི་དུས་སུ་བསྒྱུར་བའི་གླུ་བླངས་ན་ཡང་། སྨྲ༷་བའི༷་སེ༷ངྒེ༷་ཚུ༷གས་པ༷་མེ༷ད། །ཅེས་པར་བསྒྱུར་ཡོད་པས། འགྱུར་མི་བཟང་ངམ་ཞེ་ན། ཀ་ཡེ་བཞིན་བཟང་ཁྱོད་ཀྱིས་སྔ་འགྱུར་གླུ་བླངས་ཀྱི་རྒྱ་དཔེ་མཐོང་ངམ། མ་མཐོང་ན་རབ་གསུང་གི་རྒྱ་དཔེའི་གླུ་བླངས་ཀྱི་འགྱུར་ལ་སྐྱོན་འདོགས་ཇི་ལྟར་བྱེད། དེས་ན་འདི་གཉིས་ཀྱི་རྒྱ་དཔེ་མི་མཚུངས་བར་དོན་གྱིས་ཤེས་ཏེ། རྣ༷མ༷་རྒྱ༷ལ་པ༷དྨ༷་དཀ༷ར་པོ༷འི་སྤྱ༷ན། །ཞེས་པ་དང་། རབ་འཇོམས་རབ་འཇོམས་དབང་ཕྱུག་པོ། །ཞེས་སོགས་ཤིན་ཏུ་མང་པོ་གོང་འོག་ཀུན་ཏུ་ཡོད་པས། ཞིབ་ཏུ་བརྟག་ན་ཇི་བཞིན་ངེས་པར་འགྱུར་རོ། །དེས་ན་སྒྲ་གཞུང་ལས། ཉེར་བསྒྱུར་སྔོན་དུ་འཇོག་དགོས་པས། པ་ར་སྔོན་དུ་བྱས་པའི་ཨ་ཛི་ཏཿབཞག་ནས། བརྡའ་སྤྲོད་ཀྱི་གཞུང་དུ། འདྲ་བའི་ཡི་གེ་བྱུང་བ་ལ་ལྷན་གཅིག་ཏུ་རིང་པོའོ། །ཞེས་པས་རའི་སྲོག་གི་ཨ་ཐུང་དང་། ཨ་ཛིའི་ཨ་གཉིས་རིང་པོ་གཅིག་ཏུ་བྱས་ནས་པ་རཱ་ཛི་ཏཿཞེས་པར་གྲུབ་བོ། །དེ་ལྟར་རབ་གསུང་གི་རྒྱ་དཔེའི་སྐབས་འདི་ལ་ཞིབ་ཏུ་བརྟག་ཚེ། རང་ཅག་གི་འདྲེན་པ་མཚུངས་མེད་སྙིགས་དུས་ཀྱི་ཐམས་ཅད་མཁྱེན་པ་སྔ་འགྱུར་བསྟན་པའི་ཤིང་རྟ་སྤོབས་པའི་གཏེར་ཆེན་བརྒྱད་ལ་དབང་འབྱོར་བའི་འཇམ་དབྱངས་མི་ཡི་རྣམ་རོལ་ཏུ་བྱོན་པ་ཀུན་གཟིགས་མ་ཧཱ་པཎྜི་ཏ་མི༷་ཕ༷མ་འཇ༷མ་དབྱ༷ངས་རྣ༷མ་རྒྱ༷ལ་རྒྱ༷་མཚོ༷་ཉིད་དཔལ་ལྡན་རྒྱུད་ཀྱི་རྒྱལ་པོ་འདིར། བསླུ་མེད་རྡོ་རྗེའི་ལུང་གི་ཆེད་དུ་བསྔགས་ཤིང་ལུང་བསྟན་པར་མཛད་པས། མཁས་གྲུབ་ཕལ་བའི་ཁྱད་པར་དུ་འཕགས་པར་གྲུབ་པ་འདི་ནི་ཤིན་ཏུ་ཡིད་ཆེས་པའི་གནས་ཡིན་ཏེ། བོད་སྐད་དུ་བསྒྱུར་ཟིན་རྣམས་ནི་ལེགས་སྦྱར་གཅིག་ལ་ཡང་། གོ་སྒྲ་བཞིན་སྒྲ་དོན་གཉིས་ལ་སྣ་ཚོགས་ཡོད་ཀྱང་། ལོ་ཙཱ་བའི་ཞེ་འདོད་ཀྱང་ཐ་དད་དུ་མར་འགྱུར་རོ། །ཞེས་པ་འདི་ཡང་ཀུན་གཟིགས་མཁན་ཆེན་བླ་མའི་གསུང་ཟིན་ཞིག་ལགས།