འཕགས་པ་རྣམ་གྲོལ་སྡེ་དང་སློབ་དཔོན་དཀོན་མཆོག་གསུམ་གྱི་འབངས།
༈ འཕགས་པ་རྣམ་གྲོལ་སྡེ་ནི་ཡུལ་དབུས་དང་ལྷོ་ཕྱོགས་ཀྱི་མཚམས་འབར་བའི་ཕུག་དང་ཉེ་བར་འཁྲུངས། སངས་རྒྱས་འབངས་ཀྱི་དབོན་པོ་ཡིན་ཞིང་། ཐེག་ཆེན་ལ་མོས་ནས་དབྱིག་གཉེན་གྱི་དྲུང་དུ་བྱོན། ཤེར་ཕྱིན་ཉན་ནས་དེའི་མདོ་སྡེ་རྣམས་ཡོངས་རྫོགས་བཟུང་། འོན་ཀྱང་མན་སྔགས་མ་གསན་ནོ། །སླར་སློབ་དཔོན་དགེ་འདུན་བསྲུང་བ་ལ་གསན་པར་གྲགས། སློབ་དཔོན་འདི་བོད་ལ་གྲགས་པ་ལྟར་ན། དབྱིག་གཉེན་གྱི་སློབ་མ་ཕར་ཕྱིན་རང་ལས་མཁས་པ་དེ་ཡིན་ཟེར། རྒྱ་གར་བ་འགའ་ཞིག་ནི་ཕྱོགས་གླང་གི་སློབ་མ་དང་། དབྱིག་གཉེན་གྱི་ཞབས་ཀྱང་མ་ཟིན། ཤེར་ཕྱིན་ཀྱང་སློབ་དཔོན་ཆོས་འབངས་ལ་གསན། མན་ངག་ལེགས་ལྡན་ལ་ཞུས་སོ་ཞེས་ཀྱང་ཟེར། གང་ལྟར་ཡང་སློབ་དཔོན་འདིས་ཤེར་ཕྱིན་ལ་བསམ་སྒོམ་མཛད་པའི་ཚེ་དོན་ལ་ཐེ་ཚོམ་མེད་ཀྱང་མདོ་དང་མངོན་རྟོགས་ཀྱི་ཚིག་འགའ་རེ་མི་འབྱོར་བ་བྱུང་སྟེ་ཐུགས་མ་བདེ་བའི་ཚེ། མནལ་ལམ་དུ་བྱམས་པས་ཝ་ར་ཎཱ་སིར་དོན་ཆེན་པོ་རྙེད་པར་གྱུར་ཏོ། །ཞེས་པའི་ལུང་བསྟན་བྱུང་བ་ལྟར་བྱོན་པས། དགེ་བསྙེན་ཞི་བའི་གོ་ཆ་ལྕགས་ཀྱི་བྱིན་པ་ཅན་དུ་གྲགས་པས། ལྷོ་ཕྱོགས་པོ་ཏ་ལ་ནས་ཉི་ཁྲི་ལེ་བརྒྱད་མའི་དཔེ་སྤྱན་དྲངས་པ་དང་འཛོམ། མདོ་ཚིག་རྒྱན་དང་མཐུན་པར་བྱུང་བས་དབུགས་དབྱུང་
ཐོབ་བོ། །སློབ་དཔོན་དེས་མདོ་ལེའུ་བརྒྱད་མ་དང་། མངོན་རྟོགས་རྒྱན་ངོ་བོ་ཉིད་མེད་པར་སྨྲ་བའི་དབུ་མའི་དོན་དུ་བཀྲལ་བ་དང་། མདོ་རྒྱན་བསྲེས་པའི་བསྟན་བཅོས་མཛད་པ་པོ་ཡིན། འདི་མ་བྱུང་བའི་སྔོན་རོལ་དུ་དེ་ལྟར་མེད། ཉི་ཁྲི་སྣང་བར་སྔོན་ཆད་གཞན་གྱིས་མ་མྱོང་གསུང་བའི་རྒྱུ་མཚན་དེ་ལྟར་ཡིན་ནོ་ཟེར། ཤེར་ཕྱིན་རྩལ་བཏོན་གྱི་འཆད་ཉན་དགེ་སློང་སྟོང་ཚོ་རེས་ཉུང་མཐའ་བྱས་པར་ལོ་གསུམ་ཙམ་མཛད་པར་གྲགས། རྒྱ་བོད་གཉིས་སུ་ས་དང་པོ་དང་། སྦྱོར་ལམ་པ་དང་། འཕགས་པ་དང་ཉེ་བས་དེའི་ཁོངས་སུ་གཏོགས་པ་ཡིན་ཟེར་ཡང་། སྐྱེས་མཆོག་དམ་པ་ངོ་མཚར་ཅན་ཞིག་ཡིན་པར་རྩོད་པ་མི་སྣང་ངོ་། །༈ སློབ་དཔོན་དཀོན་མཆོག་གསུམ་གྱི་འབངས་ནི། དབྱིག་གཉེན་ལས་མངོན་པའི་སྡེ་སྣོད་ཐོས་པ་ཕྱོགས་གླང་དང་མཛའ་བཤེས་སུ་གྱུར་པ་དེ་ལ་ཤེར་ཕྱིན་ཉན་པའི་སློབ་མ་ཞིག་སྟེ་བློ་གྲོས་ཕྱོགས་གླང་དང་མཉམ་པར་གྲགས་ཤིང་། འདིས་མཛད་པའི་ཡོན་ཏན་མཐའ་ཡས་པར་བསྟོད་པ་ལས། ཕྱོགས་གླང་གིས་བསྡུས་དོན་མཛད་དོ། །སློབ་དཔོན་དཀོན་མཆོག་གསུམ་གྱི་འབངས་སློབ་དཔོན་དཔའ་བོའི་མཚན་དུ་འདོད་ཅིང་། གང་དག་བསྟོད་པ་བརྒྱ་ལྔ་བཅུ་པ་ལ་ཕྱོགས་གླང་གྱིས་སྤེལ་མར་བསྟོད་པའི་ཁ་སྐོང་མཛད་ཅེས་སྨྲ་བ་ནི་རང་བཟོའི་ལོ་རྒྱུས་ལ་དག་པའི་རྗེས་སུ་ཕྱོགས་པར་ཟད་དེ། སྤེལ་མར་བསྟོད་པའི་ནང་གི་ཕྱོགས་གླང་གི་གསུང་རྣམས་བསྟོད་པ་བརྒྱ་ལྔ་བཅུ་པའི་ཚིགས་བཅད་དེ་དང་དེའི་མཚམས་སྦྱོར་རམ། དོན་གསལ་བྱེད་ཁོ་ན་ཡིན་པས། འགྲེལ་བར་སྦྱར་བ་ཡིན་གྱི་སློབ་དཔོན་དེ་གཉིས་ཀྱིས་རྩོམ་རེས་བྱས་པ་ག་ལ་ཡིན་ཞེས་གོ་དགོས་སོ། །སླད་ཀྱིས་སློབ་དཔོན་དེ་ལྷོ་ཕྱོགས་སུ་བྱོན་ཏེ་གཙུག་ལག་ཁང་དུ་མའི་མངའ་བདག་མཛད་ནས་སྐྱེ་བོ་དུ་མ་ལ་ཆོས་བསྟན། དྲ་བ་ལིའི་ཡུལ་དུ་ཆོས་གཞི་ཆེན་པོ་ལྔ་བཅུ་ཙམ་གསར་དུ་བཙུགས་ནས་བསྟན་པ་ཡུན་རིང་དུ་གསལ་བར་མཛད། མཐར་གནོད་སྦྱིན་མོ་བསྒྲུབ་ནས་རིའི་རྒྱལ་པོ་མེ་ཏོག་བརྒྱ་པ་ཞེས་བྱ་བར་བཞུད་དོ། །