གསང་སྔགས་ཀྱི་བསྟན་པ་དར་ཚུལ།
གསང་སྔགས་ནི་ས་ར་ཧ་དང་ཀླུ་སྒྲུབ་ཡབ་སྲས་དང་གྲུབ་ཐོབ་ཤ་ཝ་རི་པའི་བར་དུ་བརྒྱུད་པ་ནས་བརྒྱུད་པར་རྗེས་སུ་བཟུང་བ་ཡོངས་སུ་གྲགས་པ་ལྟར་ཡོད་པར་མངོན་ལ། གཞན་དུ་དེ་ཡན་ཆད་ཀྱི་སློབ་དཔོན་སྔགས་ལམ་ལ་སྤྱོད་པ་བསམ་གྱིས་མི་ཁྱབ་པ་བྱུང་བ་ཐམས་ཅད་འཇའ་ལུས་སུ་གྱུར་ནས་དེའི་རྗེས་སུ་གདམས་པ་བཞག་པའང་མེད་པར་མངོན། ཤིན་ཏུ་གསང་བའི་སྒོ་ནས་ཉམས་ལེན་མཛད་པས་དངོས་གྲུབ་ཀྱི་རྟགས་མཚན་མ་ཐོན་གྱི་བར་དུ་སྔགས་ལམ་པ་ཡིན་མིན་ཀྱང་ཤེས་དཀའ་འོ། །
འཕགས་པ་ཐོགས་མེད།
༈ དེ་ལ་འཕགས་པ་ཐོགས་མེད་ཀྱི་ལོ་རྒྱུས་ནི། སྔོན་འཕགས་པ་སྤྱན་རས་གཟིགས་ལ་ཡི་དམ་དུ་བྱེད་པའི་དགེ་སློང་ཞིག་གིས་དགེ་སློང་གཞན་ཞིག་དང་བརྒལ་བརྟག་བྱེད་པའི་ཚེ་ང་རྒྱལ་གྱིས་དེ་ལ་བུད་མེད་ཀྱི་རིག་པ་ཅན་འདི་ཞེས་སྨད་པས། དེར་སྤྱན་རས་གཟིགས་ཀྱིས་ཁྱོད་ཀྱི་ལས་དེས་སྐྱེ་བ་མང་པོར་བུད་མེད་དུ་སྐྱེ་བར་འགྱུར་རོ། །འོན་ཀྱང་ཁྱོད་ཀྱིས་བྱང་ཆུབ་མ་ཐོབ་བར་དུ་ངས་ཁྱོད་ཀྱི་བཤེས་གཉེན་བྱའོ། །ཞེས་གསུངས་པས་བྲམ་ཟེ་མོ་གསལ་བའི་ངང་ཚུལ་མ་ཞེས་བྱ་བ་ཞིག་ཆུང་ངུ་ནས་རང་གི་སྐྱེ་བ་དྲན་པ་དང་འཕགས་པ་སྤྱན་རས་གཟིགས་མཆོད་པ་ཞིག་སངས་རྒྱས་ཀྱི་བསྟན་པའི་ཆེད་དུ་རྒྱལ་རིགས་དང་འདུས་པ་ལས་འཕགས་པ་ཐོགས་མེད་བྱུང་བ་ཁྱེའུ་མཚན་དང་ལྡན་པ་དེ་ཆེར་སྐྱེས་པ་ན། མས་དམ་པའི་ཆོས་དར་བའི་ཕྱིར་ཡིན་པས་རབ་ཏུ་བྱུང་ནས་མང་དུ་ཐོས་པ་དང་ཏིང་ངེ་འཛིན་ཐོབ་པར་གྱིས་ཤིག། ཅེས་གསུངས་པ་ལྟར་བྱས་པས། སྡེ་སྣོད་གསུམ་དང་ཐེག་ཆེན་གྱི་མདོ་ཕལ་ཆེར་རྟོགས་པར་སླ་ཡང་ཤེར་ཕྱིན་གྱི་དོན་རྟོགས་དཀའ་བས། སློབ་དཔོན་ཨརྷ་ཏས་སྒྱུ་འཕྲུལ་དྲ་བའི་དཀྱིལ་འཁོར་དུ་དབང་བསྐུར་བས་མེ་ཏོག་རྒྱལ་བ་མ་ཕམ་པ་ལ་ཕོག་པ་ལྟར་རི་བོ་བྱ་རྐང་ཅན་དུ་བྱམས་པ་ལོ་གསུམ་ཚན་བཞི་སྟེ་བཅུ་གཉིས་ཀྱི་བར་བསྒྲུབས་སོ། །དེར་བྱམས་པས་ཞལ་བསྟན་ནས་ཅི་འདོད་གསུང་བ་ན། ཐེག་ཆེན་དར་བར་ཞུས་པས། ངའི་གོས་ཀྱི་མཐའ་ལ་འཇུས་ཤིག་གསུངས་ནས་དགའ་ལྡན་དུ་ཁྲིད་པར་མཛད་དེ་ལོ་ཉེར་ལྔ་བཞུགས་ནས་ཐེག་ཆེན་གྱི་ཆོས་མཐའ་དག་གསན་པས་མདོ་སྡེ་ཐམས་ཅད་ཀྱི་དོན་ཐུགས་སུ་ཆུད། བྱམས་པའི་ཆོས་ལྔ་གསན་པ་ན་དོན་ཚན་རེ་རེ་གསན་པ་ཙམ་གྱིས་ཏིང་ངེ་འཛིན་གྱི་སྒོ་མི་འདྲ་བ་རེ་ཐོབ། སླར་ཡང་མི་ཡུལ་དུ་བྱོན་ནས་མ་ག་དྷའི་ཡུལ་གྱི་ཕྱོགས་སི་ལུ་པ་ན་ཞེས་བྱ་བའི་གནས་སུ་གཙུག་ལག་ཁང་མཛད་དེ་བཞུགས་ནས་ཁྲིམས་ལྡན་མང་ཐོས་བརྒྱད་ལ་ཆོས་ཟབ་མོ་དག་བཀྲལ་ཅིང་བསྟན། གནས་དེ་ལ་ཆོས་ཀྱི་མྱུ་གུའི་དགོན་པར་གྲགས། དེར་བྱམས་པའི་ཆོས་ལྔ་ཡང་ཡི་གེར་བཀོད། མངོན་པ་ཀུན་ལས་བཏུས་དང་། ཐེག་བསྡུས་དང་། ས་སྡེ་ལྔ་དང་། མངོན་པར་རྟོགས་པའི་རྒྱན་གྱི་རྣམ་བཤད་ལ་སོགས་པ་བསྟན་བཅོས་ཕལ་ཆེར་མཛད། དེ་ལྟར་སློབ་དཔོན་དེ་ཉིད་དང་སློབ་མའི་མཆོག་བརྒྱད་དང་བཅས་པ་རྣམས་ཀྱིས་ཆོས་བསྟན་པས། ཐེག་པ་ཆེན་པོ་ལ་རིགས་སད་ཅིང་མདོ་སྡེའི་དོན་ལ་བློ་གྲོས་རྒྱས་པ་སྟོང་ཕྲག་བརྒལ་བ་ཙམ་བྱུང་སྟེ། བར་སྐབས་སུ་བསྟན་པ་ལ་དགྲ་བྱུང་ནས་ནུབ་པ་སླར་ཡང་དར་བར་གྱུར་ཏོ་ཞེས་ཕྱོགས་ཀུན་ཏུ་གྲགས་སོ། །དེ་ཡང་སྔོན་ཐེག་པ་ཆེན་པོ་ཤིན་ཏུ་དར་བའི་ཚེ་ཡང་ཐེག་ཆེན་གྱི་དགེ་སློང་ཁྲི་ཕྲག་ཏུ་ལོང་པ་ནི་མེད། ཀླུ་སྒྲུབ་ཀྱི་ཚེ་ཡང་དགེ་འདུན་ཕལ་ཆེར་ཉན་ཐོས་ཡིན། རྒྱུ་མཚན་དེ་རྣམས་ཀྱི་སྒོ་ནས་ཐེག་པ་ཆེན་པོའི་བསྟན་པ་མཐའ་དག་གི་བདག་པོ་ཡིན་ནོ་ཞེས་གྲགས་སོ། །
གཅུང་དབྱིག་གཉེན།
༈ གཅུང་དབྱིག་གཉེན་ནི། བོད་ན་འཕགས་པའི་མཚེ་མའི་སྐུ་མཆེད་དུ་འདོད་པ་དང་། འགའ་ཞིག་ཆོས་ཀྱི་སྐུ་མཆེད་དུ་འདོད་པར་སྣང་ཡང་། འཕགས་ཡུལ་མཁས་པ་ལ་དེ་ལྟར་མ་གྲགས་ཏེ། ཡབ་མི་གཅིག་པའི་སྐུ་མཆེད་ཐོགས་མེད་རབ་ཏུ་བྱུང་བའི་ཕྱི་ལོ་འཁྲུངས་པ་ལ། ཡུམ་གྱིས་བསྟན་པ་སྤེལ་དགོས་ཚུལ་གཅེན་ཐོགས་མེད་དང་འདྲ། ན་ལེནྡྲར་རབ་ཏུ་བྱུང་ནས་ཉན་ཐོས་ཀྱི་སྡེ་སྣོད་མཐའ་དག་ལ་མཁས་པར་བྱས་ཀྱང་མངོན་པའི་མཐའ་མ་རྟོགས་པའི་ཕྱིར་ཁ་ཆེར་སློབ་དཔོན་སངྒ་བྷ་དྲ་གཙོ་བོར་བསྟེན་ནས། བྱེ་བྲག་ཏུ་བཤད་པ་སོགས་རྟོག་གེའི་ཚུལ་མཐའ་དག་ལ་བྱང་ཞིང་མཁས་པར་བྱས་ནས་སླར་དབུས་སུ་བྱོན་པས། ཐོགས་མེད་ཀྱིས་མཛད་པའི་ས་སྡེའི་གླེགས་བམ་གཟིགས་པས་ཐེག་ཆེན་ཐུགས་སུམ་ཆུད་ཅིང་། ལྷག་པའི་ལྷ་ལ་གསན་པར་ཐུགས་ཡིད་མ་ཆེས་ནས། ཀྱེ་མ་ཐོགས་མེད་ནགས་སུ་ལོ། །བཅུ་གཉིས་བར་ཏུ་ཏིང་འཛིན་བསྒྲུབས། །ཏིང་འཛིན་མ་འགྲུབ་གླང་ཆེན་གྱི། །རྒྱབ་ཁལ་ལོངས་པའི་གྲུབ་མཐའ་བརྩམས། །ཞེས་གསུངས་པར་གྲགས། གང་ལྟར་ཡང་ཅུང་ཟད་བསྟིང་ཚིག་ཏུ་མཛད་པས། དེ་གཅེན་པོ་འཕགས་པས་གསན་ནས་འདུལ་བའི་དུས་ཡིན་པར་དགོངས་ནས། བློ་གྲོས་མི་ཟད་པའི་མདོ་དང་ས་བཅུ་པའི་མདོ་གཉིས་འཛིན་ཏུ་བཅུག་པའི་དགེ་སློང་གཉིས་དབྱིག་གཉེན་གྱི་དྲུང་དུ་བརྫངས་པས། དེ་གཉིས་ཀྱིས་ཀྱང་སྲོད་ལ་བློ་གྲོས་མི་ཟད་པ་བཏོན་པས། ཐེག་ཆེན་འདི་རྒྱུ་བཟང་ལ་འབྲས་བུ་གཡེལ་ལམ་དགོངས། ཐོ་རེངས་ས་བཅུ་པ་བཏོན་པས། རྒྱུ་འབྲས་གཉིས་ཀ་བཟང་བ་ལ་སྐུར་བ་བཏབ་པས་སྡིག་པ་ཆེན་པོ་བསགས་འདུག་སྙམ་རང་གི་ལྗགས་བཅད་པར་བྱའོ་གསུངས་པས། དེ་གཉིས་ན་རེ་ལྗགས་བཅད་པས་ཅི་ཕན། དེ་བཤགས་པའི་ཐབས་གཅེན་ལ་མངའ་བས་དེར་གཤེགས་པར་ཞུ་བྱས་པས། འཕགས་པ་ཐོགས་མེད་ཀྱི་དྲུང་དུ་བྱོན་ནས་སྡིག་པ་བྱང་བའི་ཐབས་ཞུས་པས། འཕགས་པས་རྒྱལ་བ་མ་ཕམ་པ་ལ་ཞུའོ་གསུངས། ཡུད་ཙམ་ཅང་མི་གསུང་བར་བཞུགས་ནས། ཐེག་པ་ཆེན་པོའི་ཆོས་མང་པོ་བཤད་དོ། །མདོ་སྡེ་མང་པོ་ལ་འགྲེལ་པ་གྱིས། གཙུག་ཏོར་རྣམ་པར་རྒྱལ་བའི་རིག་སྔགས་མང་དུ་ཟློས་ཤིག། ཅེས་གསུངས་བར་གདའ་གསུངས་པས། གཅེན་ལས་ཐེག་ཆེན་གྱི་མདོ་སྡེ་མཐའ་དག་ཚར་གཅིག་གསན་པས་ཐུགས་སུ་ཆུད་ཅིང་ཏིང་འཛིན་ཁྱད་པར་ཅན་མངའ་བར་གྱུར། དེའི་ཚེ་རྒྱལ་བའི་བཀའ་མི་ཡུལ་དུ་བཞུགས་པ་མཐའ་དག་ཐུགས་སུ་ཆུད་པས། སྟོན་པ་མྱ་ངན་ལས་འདས་པའི་འོག་ཏུ་དབྱིག་གཉེན་ལྟ་བུའི་མང་དུ་ཐོས་པ་ནི་མ་བྱུང་བར་གྲགས་ཏེ། ཉན་ཐོས་ཀྱི་སྡེ་སྣོད་གསུམ་ལ་མདོ་ལྔ་བརྒྱ་ཤོ་ལོ་ཀ་འབུམ་ཕྲག་གསུམ། དཀོན་བརྩེགས་འདུས་པ་ཞེ་དགུ་གཅིག་ཏུ་བསྡོམས། ཕལ་ཆེན་དང་འདུས་པ་རིན་པོ་ཆེ། ཤེར་ཕྱིན་འབུམ་ལ་སོགས་པ་ཐེག་ཆེན་གྱི་མདོ་ཆེ་ཆུང་ཀུན་བསྡོམས་པས་ལྔ་བརྒྱ་དང་། གཟུངས་སྔགས་ལྔ་བརྒྱ་སྟེ། དེ་དག་ལོ་རེའི་ནང་དུ་ལན་རེ་ཞལ་འདོན་མཛད་དེ། ཏིལ་མར་གྱི་རྫིང་བུའི་ནང་དུ་ཞུགས་ནས་ཉིན་མཚན་སྦྲེལ་པ་བཅོ་ལྔས་ཚར་རེ་གྲུབ་ཅིང་། བརྒྱད་སྟོང་པ་ཉིན་རེ་བཞིན་འདོན་པར་མཛད་པ་ཡང་ཆུ་ཚོད་གཅིག་ཙམ་ལ་གྲུབ། འཕགས་པ་ཐོགས་མེད་འདས་པའི་འོག་ཏུ་ན་ལེནྡྲའི་མཁན་པོ་མཛད་ནས། ཉིན་རེ་བཞིན་རབ་བྱུང་བསྙེན་རྫོགས་མཛད་པ། སོ་སོའི་ལྟུང་བ་ཕྱིར་བཅོས་སུ་འཇུག་པ། བདག་ཉིད་ཆོས་སྤྱོད་བཅུ་མ་ཆག་པ། གཞན་དེ་ལ་སྦྱོར་བ། ཐེག་ཆེན་གྱི་མདོ་མི་འདྲ་བ་རེའི་ཆོས་ཐུན་རེ་གསུང་བ། སྲོད་དུས་ཆོས་རྣམས་ཀྱི་སྙིང་པོ་བསྡུས་:དེ་༼ཏེ༽གལ་བཟུང་བ་དང་གཞུང་གཟུགས་པར་མཛད་ཅིང་། གུང་ཐུན་ལ་མནལ་བའི་ངང་ལས་ལྷག་པའི་ལྷ་ལ་ཆོས་གསན་པ། ཐོ་རངས་ཏིང་ངེ་འཛིན་ལ་མཉམ་པར་འཇོག་པ། བར་བར་དུ་བསྟན་བཅོས་བརྩམས་པ་དང་། མུ་སྟེགས་ཀྱིས་རྒོལ་བ་བཟློག་པ། ཉི་ཁྲི་ལྔ་སྟོང་། བློ་གྲོས་མི་ཟད་པ། ས་བཅུ་པ། དཀོན་མཆོག་རྗེས་དྲན། ཕྱག་རྒྱ་ལྔའི་མདོ། རྟེན་འབྲེལ་མདོ། མདོ་རྒྱན་དང་འབྱེད་གཉིས་སོགས་གཞན་འགྲེལ་དུ་མཛད་པ་ལྔ་བཅུ་ཙམ་དང་། རང་རྐང་དུ་པྲ་ཀ་ར་ཎ་སྡེ་བརྒྱད་སོགས་མང་ཞིག་བརྩམས། དེ་ལྟར་ཆོས་ཀྱི་ཕྲིན་ལས་ལ་བསམ་ན་བློའི་ར་བ་ལས་འདས་ཀྱང་ཆེ་ལོང་ཙམ་དུ། སྔ་ཕྱིར་ཆོས་གཞི་བཙུགས་པ་དྲུག་བརྒྱ་ལྔ་བཅུ་རྩ་བཞི་ཙམ་དང་ཐེག་ཆེན་གྱི་དགེ་འདུན་ཐོགས་མེད་ཀྱི་དུས་ལས་ཀྱང་ཆེས་མང་སྟེ། ཀུན་བསྡོམས་ན་ཐེག་པ་ཆེན་པོའི་དགེ་སློང་དྲུག་ཁྲི་ལོངས་པ་ཙམ་བྱུང་སྐད། དབྱིག་གཉེན་གྱིས་དགུང་ལོ་བརྒྱར་ཉེ་བ་ཙམ་བཞུགས། མཐར་སློབ་མ་སྟོང་གིས་བསྐོར་ནས་བལ་ཡུལ་དུ་བྱོན་༼ནས༽ཆོས་སྟོན་སྐབས། ཁྱིམ་བཙུན་ཆོས་གོས་གྱོན་ནས་ཞིང་རྨོ་བ་གཟིགས་པས། སྟོན་པའི་བསྟན་པ་ཉམས་སོ་གསུངས་ནས་ཐུགས་མུག་སྟེ། དགེ་འདུན་གྱི་དབུས་སུ་ཆོས་བསྟན་ནས་གཙུག་ཏོར་རྣམ་རྒྱལ་གྱི་གཟུངས་མགོ་ཞབས་བཟློག་པ་ཚར་གསུམ་ཟློས་པས་དེ་ཉིད་དུ་སྐུ་འདས་ཏེ། རེ་ཞིག་ཆོས་ཀྱི་ཉི་མ་ནུབ་བོ་ཞེས་གྲགས་སོ། །དེར་སློབ་མ་རྣམས་ཀྱིས་མཆོད་རྟེན་ཡང་བྱས་སོ། །སློབ་དཔོན་དབྱིག་གཉེན་གྱི་སྐུ་ཚེའི་སྨད་ཀྱི་དུས་ན་རྒྱལ་པོ་ཟབ་མོའི་ཕྱོགས་འདས་པའི་རྗེས་སུ་ནུབ་ཕྱོགས་མ་རུའི་ཡུལ་དུ་རྒྱལ་པོ་ཤྲི་ཧཪྴ་ཞེས་བྱ་བ་སྟོབས་དང་ལྡན་པ་བྱུང་། རྒྱལ་པོ་དེས་ཀླ་ཀློའི་ཆོས་རྣམས་བསྣུབས་པར་འདོད་ནས། ཀླ་ཀློའི་དགོན་གནས་ཆེན་པོ་ཤིང་ཁང་འབའ་ཞིག་ལ་གྲུབ་པ་བྱས། དེའི་སྟོན་པ་མཐའ་དག་བསྡུས། ཟླ་བ་མང་པོར་ཡོ་བྱད་ཐམས་ཅད་ཀྱིས་བསྟབས། དེའི་རིང་ལུགས་ཀྱི་གླེགས་བམ་ཐམས་ཅད་ཀྱང་བསྡུས། ཐམས་ཅད་མེ་ལ་བསྲེགས་པས་ཀླ་ཀློའི་གྲུབ་མཐའ་འཛིན་པ་སྟོང་ཚོ་བཅུ་གཉིས་ཙམ་ཚིག། དེའི་གྲུབ་མཐའ་ཤེས་པའི་ཐགས་འཐག་མི་གཅིག་ལུས་པ་ལས་ཕྱིས་ཀྱི་ཀླ་ཀློ་རྣམས་ཡིན་པར་གྲགས། དེའི་དུས་སུ་འགྲོ་དོན་མཛད་པའི་སྐྱེས་བུ་ནི། རྒྱ་གར་ཤར་ཕྱོགས་སུ་སློབ་དཔོན་བློ་གྲོས་བརྟན་པ་དང་ཕྱོགས་ཀྱི་གླང་པོ་ནུབ་ཕྱོགས་སུ་ཐོགས་མེད་ཀྱི་སློབ་མ་སངས་རྒྱས་འབངས་ཀྱི་སྐུ་ཚེའི་སྨད་དང་། ཡོན་ཏན་འོད་ཀྱི་འགྲོ་དོན་དར་བའི་དུས་སོ། །ཁ་ཆེར་བཙུན་པ་དགེ་འདུན་འབངས་རྣམས་ཀྱིས་མཛད་དོ། །
སློབ་དཔོན་ཡོན་ཏན་འོད།
༈ སློབ་དཔོན་ཡོན་ཏན་འོད་ནི་ཡུལ་བཅོམ་བརླག་ཏུ་བྲམ་ཟེའི་རིགས་ལས་འཁྲུངས། དབྱིག་གཉེན་གྱི་དྲུང་དུ་བྱོན་ནས་ཐེག་པ་ཆེ་ཆུང་གི་མདོ་སྡེ་མཐའ་དག་ལ་མཁས་པར་སྦྱངས། འདུལ་བ་འབུམ་སྡེ་རྟག་ཏུ་ཞལ་འདོན་མཛད། རྒྱལ་པོའི་བླ་མར་གྱུར་པས་ཡོ་བྱད་དཔག་ཏུ་མེད་པའི་འདུ་བ་རྒྱ་ཆེར་བྱུང་འཕྲལ་དགེ་བར་བསྒྱུར་ནས་རང་ཉིད་སྦྱངས་ཡོན་ལས་ཉམས་པ་མི་མངའ་འོ། །
སློབ་དཔོན་བློ་གྲོས་བརྟན་པ།
༈ སློབ་དཔོན་བློ་གྲོས་བརྟན་པ་ནི་དབྱིག་གཉེན་འབུམ་སྡེ་དགུ་བཅུ་གོ་དགུར་གྲགས་པ་ཞལ་འདོན་མཛད་དུས། གདུང་ཕྲག་ན་ཕུག་རོན་ཅང་ཤེས་གཅིག་གིས་ཤིན་ཏུ་གུས་པས་ཉན་ནོ། །དེ་ཤི་ནས་ལྷོ་ཕྱོགས་སུ་ཚོང་དཔོན་གྱི་བུར་སྐྱེས་མ་ཐག་སློབ་དཔོན་དབྱིག་གཉེན་གང་ན་ཡོད་ཟེར་བ་ལོ་བདུན་ན་དབྱིག་གཉེན་གྱི་དྲུང་དུ་བསྐྱལ་ཏེ་རིག་པ་སློབ་ཅིང་ཡོད་པས་ཀྱང་དཀའ་བ་མེད་པར་ཤེས། དེའི་ཚེ་སྲན་མ་སྤར་གང་རྙེད་པ་ཟའམ་སྙམ་ནས་སྒྲོལ་མའི་ལྷ་ཁང་ཞིག་ན་ཡོད་པ་ལ། འཕགས་མ་ལ་མ་ཕུལ་བར་རང་བཟར་མི་རུང་སྙམ་ནས། སྲན་མ་འགའ་ཞིག་ཕུལ་བས་འགྲིལ་ནས་བྱུང་། ཟད་ཟད་ཕུལ་ཡང་འགྲིལ་ཏེ་བྱུང་བ་ན། བྱིས་པར་གྱུར་པས་ངུས་སོ། །འཕགས་མས་ཞལ་མངོན་སུམ་དུ་བསྟན་ནས་ཁྱོད་མ་ངུ་ཞིག་ངས་བྱིན་གྱིས་རློབ་བོ་གསུངས། སྐད་ཅིག་དེ་ལ་བློ་གྲོས་མཐའ་ཡས་པར་གྱུར་ཅིང་། ཕྱིས་གནས་བརྟན་སྡེ་སྣོད་འཛིན་པ། བྱ་བ་ཐམས་ཅད་སྒྲོལ་མས་ལུང་སྟོན་པའི་ཐེག་པ་ཆེ་ཆུང་གི་མངོན་པ་མཐའ་དག་ལ་མཁས་ཤིང་དཀོན་བརྩེགས་ཞལ་འདོན་དུ་མཛད་པ། དེ་དང་དབུ་མ་རྩ་བ་ལ་འགྲེལ་པ་ཡང་མཛད། དབྱིག་གཉེན་སྐུ་འདས་ནས་མུ་སྟེགས་པའི་རྒོལ་བ་ངན་པ་ཚར་བཅད་དེ་སྨྲ་བའི་ཁྱུ་མཆོག་ཏུ་གྲགས་སོ། །
སློབ་དཔོན་ཕྱོགས་ཀྱི་གླང་པོ།
༈ སློབ་དཔོན་ཕྱོགས་ཀྱི་གླང་པོ་ནི། ལྷོ་ཕྱོགས་གྲོང་ཁྱེར་སིངྒ་པཀྵ་ཞེས་བྱ་བར་བྲམ་ཟེའི་རིགས་སུ་འཁྲུངས་ཤིང་། མུ་སྟེགས་ཀྱི་གྲུབ་མཐའ་ལ་ཤིན་ཏུ་མཁས་པར་བྱས། ནམ་ཞིག་གནས་མ་བུའི་སྡེ་བའི་གྲུབ་མཐའ་འཛིན་པ་གླང་པོ་བྱིན་ཞེས་བྱ་བ་ལས་རབ་ཏུ་བྱུང་། ཉན་ཐོས་ཀྱི་སྡེ་སྣོད་ལ་མཁས་པར་བྱས། མཁན་པོ་དེ་ཉིད་ལ་གདམས་པ་ཞུས་པས། བརྗོད་དུ་མེད་པའི་བདག་འཚོལ་བའི་གདམས་པ་བྱིན། དེར་རྣམ་པར་བརྟགས་ཤིང་དཔྱད་ན་ཡོད་པར་མ་མཐོང་བར་གོ་ཡང་། ཉིན་མོ་སྐར་ཁུང་ཐམས་ཅད་བསལ། མཚན་མོ་ཕྱོགས་བཞིར་མར་མེ་བཏང་སྟེ། རང་གི་ལུས་གཅེར་བུར་ཕྱུངས་ནས་ཕྱི་ནང་ཀུན་ཏུ་ཡང་ཡང་བལྟས་སོ། །དེ་ལྟར་བྱེད་པ་གྲོགས་ཀྱིས་མཐོང་སྟེ་མཁན་པོར་བཤད་པ་ན། མཁན་པོས་དེ་ལྟར་བྱས་པ་བདེན་ནམ་གསུངས་པས། སྒྲིབ་བྱེད་ཀྱིས་བསྒྲིབས་སོ་སྙམ་དེ་ལྟར་བྱས་ནས་བལྟས་པ་ཡིན་བྱས་པས། མཁན་པོ་ཁྲོས་ཏེ། ཁོ་བོའི་གྲུབ་མཐའ་ལ་ཟུར་ཟ་བ་ཁྱོད་མ་འདུག་ཅིག་ཅེས་བསྐྲད་པ་ན། དེ་ཉིད་དུ་རིགས་པས་སུན་དབྱུང་བར་རིགས་མོད་ཀྱང་། འོས་མ་ཡིན་ནོ་སྙམ་ནས་ཕྱག་བྱས་ཏེ་ཕྱིར་བྱོན་ནོ། །དེ་ནས་དབྱིག་གཉེན་གྱི་དྲུང་དུ་བྱོན། ཐེག་པ་ཆེ་ཆུང་གི་སྡེ་སྣོད་མཐའ་དག་མཁས་པར་གསན། སྔགས་མཁན་གྱི་སློབ་དཔོན་ཞིག་ལ་རིག་སྔགས་མནོས་ཏེ་བསྒྲུབ་པས་འཇམ་དཔལ་གྱི་ཞལ་བསྟན་ནས། ཨོ་ཌི་བི་ཤའི་ཡུལ་གྱི་ཤིན་ཏུ་དབེན་པའི་བྲག་ཕུག་ཅིག་ཏུ་བསམ་གཏན་ལ་ཡུན་རིང་དུ་བཞུགས། ནམ་ཞིག་ན་ལེནྡྲར་མུ་སྟེགས་དུར་ཛ་ཡ་ཞེས་བྱ་བ་རང་གི་ལྷ་མངོན་སུམ་དུ་མཐོང་བ་རྟོག་གེ་ལ་ཤིན་ཏུ་བྱང་བ་ཐུབ་དཀའ་ཞེས་བྱ་བ་ཞིག་གི་རྩོད་པ་བྱུང་བ་ལ། ཕྱོགས་གླང་སྤྱན་དྲངས་པས། མུ་སྟེགས་དེ་ལན་གསུམ་ཕམ་པར་མཛད་ནས་ནང་པའི་བསྟན་པ་ལ་བཀོད། དེར་རྣམ་རིག་དང་རྟོག་གེའི་བསྟན་བཅོས་ཐོར་བུ་མང་དུ་མཛད་པ་རྣམས་ཡོངས་སུ་བསྡོམས་ན་བསྟན་བཅོས་བརྒྱ་རྩ་ཙམ་ཡོད་པར་གྲགས། སླར་ཡང་རང་གི་སྔར་གྱི་བྲག་ཕུག་ཏུ་བསམ་གཏན་ལ་གནས་པའི་སྐབས་ཤིག་ན་རང་གི་ཐུན་མོང་མ་ཡིན་པའི་བློ་གྲོས་ཀྱི་མཐུ་ལས་བྱུང་བའི་རྟོག་གེའི་ཚུལ་ལུགས་འདི་ལ་སྔར་བརྩམས་པའི་བསྟན་བཅོས་རྣམས་འཐོར་བ་བཞིན་དུ་གྱུར་པས་གཅིག་ཏུ་བྱ་བར་དགོངས་ཏེ། ཚད་མ་ཀུན་ལས་བཏུས་ཀྱི་མཆོད་བརྗོད་དམ་བཅའ། ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་བར་གཤེགས་ལ་ཕྱག་བཙལ་ནས། །ཚད་མ་བསྒྲུབ་ཕྱིར་རང་གི་གཞུང་ཀུན་ལས། །བཏུས་ཏེ་སྣ་ཚོགས་འཐོར་རྣམས་འདིར་གཅིག་བྱ། །ཞེས་རྡོ་ཐལ་གྱིས་བྲིས་པས། ས་གཡོ་བ་དང་། ཕྱོགས་ཀུན་ཏུ་སྣང་བས་ཁྱབ་པ་དང་། སྒྲ་ཆེན་པོ་གྲགས་པར་གྱུར་པས། དེར་བྲམ་ཟེ་ནག་པོ་ཞེས་བྱ་བས་དེ་ལྟ་བུའི་ལྟས་ཡིན་པར་ཤེས་ཏེ། སློབ་དཔོན་བསོད་སྙོམས་ལ་བཞུད་པའི་ཤུལ་དུ་དེ་འོངས་ཏེ་བསུབས། དེ་ལྟར་ལན་གཉིས་སུ་བསུབས་པས། ལན་གསུམ་བྲིས་ནས། འདི་ཀུ་རེ་དང་ཀྱལ་ཀའི་ཕྱིར་བསུབས་པ་ཡིན་ན་དགོས་པ་ཆེན་པོ་ཡོད་པས་མ་བསུབ་ཅིགགལ་ཏེ་དོན་ནོར་ཏེ་རྩོད་པར་འདོད་ན་ལུས་སྣང་བར་གྱིས་ཤིགཅེས་པ་བྲིས་ཏེ། ཡང་བསོད་སྙོམས་ལ་གཤེགས་པའི་ཤུལ་དུ་བསུབ་ཏུ་འོངས་པས་ཡི་གེ་མཐོང་སྟེ་བསྡད་དོ། །དེར་སློབ་དཔོན་གྱིས་བསྟན་པ་དཔང་དུ་བཙུགས་ཏེ་བརྩད་པས། ལན་མང་པོར་མུ་སྟེགས་ཕམ་པར་བྱས་ནས། ད་ཁྱོད་བསྟན་ལ་ཞུགས་ཤིག་བྱས་པ་ན། དེས་སྔགས་བཟླས་པའི་ཐལ་བ་གཏོར་བས་སློབ་དཔོན་གྱི་ཡོ་བྱད་ཐམས་ཅད་ཚིགསློབ་དཔོན་རང་ཡང་ཚིག་ལ་ཁད་པ་བྱུང་སྟེ། དེར་མུ་སྟེགས་ཕྱིར་སོང་ངོ་། །བདག་གིས་སེམས་ཅན་འདི་གཅིག་པུའི་དོན་ཡང་མི་ནུས་ན་གཞན་ལྟ་སྨོས་སྙམ། སེམས་བསྐྱེད་བཏང་བར་བརྩམས་པ་ན། འཕགས་པ་འཇམ་དཔལ་མངོན་སུམ་དུ་བྱོན་ནས། བུ་མ་བྱེད་མ་བྱེད་སྐྱེ་བོ་དམན་དང་འཕྲད་ན་བློ་གྲོས་ངན་སྐྱེ་སྟེ། །ཁྱོད་ཀྱི་བསྟན་བཅོས་འདི་ལ་མུ་སྟེགས་སོགས་ཀྱིས་གནོད་མི་ནུས་པར་ཤེས། །ཁྱོད་ཀྱི་སངས་རྒྱས་མ་ཐོབ་བར་དུ་དགེ་བའི་བཤེས་སུ་ང་འགྱུར་གྱིས། །ཕྱི་མའི་དུས་སུ་བསྟན་བཅོས་ཀུན་གྱི་མིག་གཅིག་ཏུ་ནི་འདི་འགྱུར་རོ། །ཞེས་གསུངས་པས། སློབ་དཔོན་གྱིས། བཟོད་དཀའ་ིསྡུག་བསྔལ་དུ་མ་དང་ལྡན་བརྣག་དཀའ་ལ། །སེམས་ཀྱང་དམ་པ་མིན་པའི་སྤྱོད་པ་ལ་དགའ་ཞིང་། །སྐྱེ་བོ་དམ་པ་འཕྲད་དཀའ་གལ་ཏེ་ཁྱོད་ཀྱི་ཞལ་མཐོང་ཡང་། །བདག་ལ་བྱིན་གྱིས་མ་རློབ་དེ་ལ་ཅི་བགྱིད་མཆིས། །ཞེས་ཞུས་པས། བུ་མ་དགའ་བར་མ་བྱེད་ཅིགཉམ་ང་བ་ཐམས་ཅད་ལ་བདག་གིས་བསྲུང་ངོ་། །ཞེས་གསུངས་ནས་མི་སྣང་བར་གྱུར་ཏོ། །དེ་ནས་བསྟན་བཅོས་དེ་ཡང་ལེགས་པར་བརྩམས། ལན་ཅིག་མནལ་བའི་དུས་སངས་རྒྱས་མང་པོའི་ཞལ་མཐོང་། ལྷོ་ཕྱོགས་ཀྱི་རྒྱུད་དུ་ཡུལ་ཐ་དད་ཀྱི་མུ་སྟེགས་ཀྱི་རྒོལ་བ་རྣམས་ཚར་བཅད། སྔོན་གྱི་སློབ་དཔོན་རྣམས་ཀྱིས་བཙུགས་པའི་ཆོས་གཞི་ཉམས་པ་རྣམས་སོར་ཆུད་པར་མཛད། སླར་ཡང་ཨོ་ཌི་བི་ཤའི་རྒྱལ་པོའི་བློན་པོ་བྷ་དྲ་པ་ལི་ཏ་ཞེས་བྱ་བ་རྒྱལ་པོའི་མཛོད་ཀྱི་སྤྱན་པ་ཡིན་པ་དེ་སངས་རྒྱས་ཀྱི་བསྟན་པ་ལ་བཅུག་སྟེ། དེས་གཙུག་ལག་ཁང་བཅུ་དྲུག་བཞེངས། དེ་རེ་རེར་དགེ་འདུན་གྱི་སྡེ་ཆེན་པོ་རེ་དང་ཆོས་གཞི་རེ་ཡང་ཡོད་པར་བྱས། དགེ་འདུན་དེ་རྣམས་ཁྲིམས་རྣམ་པར་དག་པའི་རྟགས་སུ་བྲམ་ཟེའི་སྐྱེད་མོས་ཚལ་དུ་ནད་ཐམས་ཅད་གསོ་བར་ནུས་པའི་མུཥྞ་ཧ་རི་ར་ཀ་ཞེས་བྱ་བ་ཨ་རུ་རའི་སྡོང་པོ་ཁྱད་འཕགས་ཤིག་སྐྱེས་པ་སོགས་འགྲོ་ཕན་ནི་དཔག་པར་དཀའ། ཆོས་ཀྱིས་འབྲེལ་བའི་སློབ་མས་ཕྱོགས་ཐམས་ཅད་ལ་ཁྱབ། འདོད་ཆུང་ཆོག་ཤེས་པས་ཇི་སྲིད་འཚོའི་བར་དུ་སྦྱང་ཡོན་བཅུ་གཉིས་ལ་གནས་ནས་མཐར་ཨོ་ཌི་བི་ཤའི་ནགས་ཚལ་དབེན་པ་ཞིག་ཏུ་སྐུ་འདས་སོ། །
བཙུན་པ་དགེ་འདུན་འབངས།
༈ བཙུན་པ་དགེ་འདུན་འབངས་ནི། སློབ་དཔོན་དབྱིག་གཉེན་གྱི་སློབ་མ་ཞིག་སྟེ་ཡུལ་ལྷོ་ཕྱོགས་པ་བྲམ་ཟེའི་རིགས། སྡེ་པ་ཐམས་ཅད་ཡོད་སྨྲ་ཡིན། རྡོ་རྗེ་གདན་དུ་ཡུན་རིང་བཞུགས་ནས་དེར་འདུལ་བ་དང་མངོན་པའི་ཆོས་གཞི་ཉི་ཤུ་རྩ་བཞི་བཙུགས། ཁ་ཆེར་བྱོན་ནས་རིན་ཆེན་སྦས་པའི་གཙུག་ལག་ཁང་དང་། ཀུམྦྷ་ཀུཎྜི་ལིའི་གཙུག་ལག་ཁང་བཞེངས། ཐེག་ཆེན་མང་དུ་སྤེལ། ཁ་ཆེའི་ཡུལ་དེར་སྔོན་ཐོགས་མེད་སྐུ་མཆེད་ཀྱིས་ཐེག་ཆེན་ཅུང་ཟད་དར། སློབ་དཔོན་འདིས་ཕྱིས་དར་རྒྱས་མཛད་ནས་མཐར་ཡུལ་དེ་ཉིད་དུ་སྐུ་འདས་སོ། །
སློབ་དཔོན་ཆོས་འབངས།
༈ སློབ་དཔོན་ཆོས་འབངས་ནི། ཤར་ཕྱོགས་བྷངྒ་ལར་འཁྲུངས། སྐུ་མཆེད་གཉིས་ཀྱི་སློབ་མ་ཡིན། ཕྱོགས་བཞིར་འཇམ་དཔལ་གྱི་ལྷ་ཁང་རེ་བཞེངས། རྣལ་འབྱོར་སྤྱོད་པའི་ས་ཡོངས་རྫོགས་ལ་འགྲེལ་པ་མཛད་དོ་ཞེས་གྲགས། ༈སློབ་དཔོན་སངས་རྒྱས་བསྐྱངས་ནི་ལྷོ་ཕྱོགས་ཏམྦྷ་ལའི་ཡུལ་དུ་འཁྲུངས། སློབ་དཔོན་ཀླུའི་བཤེས་གཉེན་གྱི་སློབ་མ་སློབ་དཔོན་དགེ་འདུན་བསྲུང་བ་ལས་ཀླུ་སྒྲུབ་ཀྱི་གཞུང་ལུགས་རྣམས་ཐོས་པར་བྱས་ནས་བསྒོམས་པས་ཡེ་ཤེས་མཆོག་བརྙེས། འཇམ་དཔལ་གྱི་ཞལ་གཟིགས། འཕགས་པ་ཡབ་སྲས་དང་སློབ་དཔོན་དཔའ་བོ་སོགས་ཀྱི་གཞུང་ལུགས་མང་པོར་རྣམ་བཤད་མཛད། མཐར་རི་ལུའི་དངོས་གྲུབ་སྒྲུབ་པས་གྲུབ་བོ། །
སློབ་དཔོན་ལེགས་ལྡན།
༈ སློབ་དཔོན་ལེགས་ལྡན་ནི། ལྷོ་ཕྱོགས་མང་རྒྱ་རར་རྒྱལ་རིགས་སུ་སྐྱེ་བ་བརྙེས། ཡུལ་དེ་ཉིད་དུ་རབ་ཏུ་བྱུང་སྡེ་སྣོད་གསུམ་ལ་མཁས་པར་སྦྱངས། དབུས་སུ་བྱོན་ནས་སློབ་དཔོན་དགེ་འདུན་བསྲུང་བ་ལས་ཐེག་ཆེན་གྱི་མདོ་སྡེ་དུ་མ་དང་ཀླུ་སྒྲུབ་ཀྱི་མན་ངག་མནོས་ཏེ། སླར་ཡང་ལྷོ་ཕྱོགས་སུ་བྱོན་ནས་ཕྱག་རྡོར་གྱི་ཞལ་གཟིགས་ཆོས་མང་དུ་བསྟན། སློབ་དཔོན་སངས་རྒྱས་བསྐྱངས་སྐུ་འདས་པའི་འོག་ཏུ། དེས་མཛད་པའི་བསྟན་བཅོས་རྣམས་གཟིགས། དབུ་མ་རྩ་བའི་གཞུང་ལས་སློབ་དཔོན་སྔ་མའི་བཞེད་པ་དེ་སུན་ཕྱུང་སྟེ་འགྲེལ་བ་མཛད་ཅིང་ཀླུ་སྒྲུབ་ཀྱི་མན་ངག་ལ་བརྟེན་པར་ཞལ་གྱིས་བཞེས་ནས། མདོ་སྡེ་འགའ་ཞིག་ལ་འགྲེལ་བ་མཛད་དོ། །དེ་ལ་སློབ་དཔོན་འདི་གཉིས་ཀྱིས་དབུ་མ་ངོ་བོ་ཉིད་མེད་པར་སྨྲ་བའི་གཞུང་བཙུགས་ཤིང་། སངས་རྒྱས་བསྐྱངས་སློབ་མ་ཧ་ཅང་མང་བ་མ་ཡིན་ཡང་། ལེགས་ལྡན་གྱིི་སློབ་མ་ཤིན་ཏུ་མང་བས་དགེ་སློང་སྟོང་ཕྲག་དུ་མ་རྗེས་སུ་འབྲང་བ་ཡིན་པས་ལུགས་དེ་ཤིན་ཏུ་དར་བར་གྱུར་ཏོ། །སློབ་དཔོན་འདི་གཉིས་མ་བྱོན་གོང་དུ་ཐེག་ཆེན་མཐའ་དག་བསྟན་པ་གཅིག་ཏུ་གནས། སློབ་དཔོན་འདི་གཉིས་ཀྱིས་ཀླུ་སྒྲུབ་དང་ཐོགས་མེད་གཉིས་ཤིན་ཏུ་ཐ་དད་དེ། ཐོགས་མེད་ཀྱིས་དབུ་མའི་ལམ་མི་སྟོན་སེམས་ཙམ་ཁོ་ན་ཡིན་ལ། ཁོ་བོ་ཅག་གི་འདི་ལས་གཞན་དུ་མེད་དོ་ཞེས་མཐའ་གཞན་འགོག་པར་མཛད་པས་ལེགས་ལྡན་སྐུ་འདས་པའི་འོག་ཏུ་ཐེག་ཆེན་ལའང་ནང་དུ་སྡེ་གཉིས་སུ་གྱེས་རྩོད་པ་བྱུང་ངོ་། །བོད་རྣམས་སངས་རྒྱས་བསྐྱངས་ཀླུ་སྒྲུབ་ཀྱི་སྐུ་ཚེའི་སྟོད་ཀྱི་སློབ་མ་དང་། ལེགས་ལྡན་སྐུ་ཚེའི་སྨད་ཀྱི་སློབ་མ་ཡིན་པ་དང་། རྩོད་པ་བྱས་པ་སྐད་དང་། སངས་རྒྱས་བསྐྱངས་ཟླ་གྲགས་སུ་སྐྱེ་བ་བཞེས་ཟེར་བ་སོགས་རིགས་པས་གྲས་པའི་ཅོལ་གཏམ་དུ་ཟད་དོ། །
འཕགས་པ་རྣམ་གྲོལ་སྡེ།
༈ འཕགས་པ་རྣམ་གྲོལ་སྡེ་ནི་ཡུལ་དབུས་དང་ལྷོ་ཕྱོགས་ཀྱི་མཚམས་འབར་བའི་ཕུག་དང་ཉེ་བར་འཁྲུངས། སངས་རྒྱས་འབངས་ཀྱི་དབོན་པོ་ཡིན་ཞིང་། ཐེག་ཆེན་ལ་མོས་ནས་དབྱིག་གཉེན་གྱི་དྲུང་དུ་བྱོན། ཤེར་ཕྱིན་ཉན་ནས་དེའི་མདོ་སྡེ་རྣམས་ཡོངས་རྫོགས་བཟུང་། འོན་ཀྱང་མན་སྔགས་མ་གསན་ནོ། །སླར་སློབ་དཔོན་དགེ་འདུན་བསྲུང་བ་ལ་གསན་པར་གྲགས། སློབ་དཔོན་འདི་བོད་ལ་གྲགས་པ་ལྟར་ན། དབྱིག་གཉེན་གྱི་སློབ་མ་ཕར་ཕྱིན་རང་ལས་མཁས་པ་དེ་ཡིན་ཟེར། རྒྱ་གར་བ་འགའ་ཞིག་ནི་ཕྱོགས་གླང་གི་སློབ་མ་དང་། དབྱིག་གཉེན་གྱི་ཞབས་ཀྱང་མ་ཟིན། ཤེར་ཕྱིན་ཀྱང་སློབ་དཔོན་ཆོས་འབངས་ལ་གསན། མན་ངག་ལེགས་ལྡན་ལ་ཞུས་སོ་ཞེས་ཀྱང་ཟེར། གང་ལྟར་ཡང་སློབ་དཔོན་འདིས་ཤེར་ཕྱིན་ལ་བསམ་སྒོམ་མཛད་པའི་ཚེ་དོན་ལ་ཐེ་ཚོམ་མེད་ཀྱང་མདོ་དང་མངོན་རྟོགས་ཀྱི་ཚིག་འགའ་རེ་མི་འབྱོར་བ་བྱུང་སྟེ་ཐུགས་མ་བདེ་བའི་ཚེ། མནལ་ལམ་དུ་བྱམས་པས་ཝ་ར་ཎཱ་སིར་དོན་ཆེན་པོ་རྙེད་པར་གྱུར་ཏོ། །ཞེས་པའི་ལུང་བསྟན་བྱུང་བ་ལྟར་བྱོན་པས། དགེ་བསྙེན་ཞི་བའི་གོ་ཆ་ལྕགས་ཀྱི་བྱིན་པ་ཅན་དུ་གྲགས་པས། ལྷོ་ཕྱོགས་པོ་ཏ་ལ་ནས་ཉི་ཁྲི་ལེ་བརྒྱད་མའི་དཔེ་སྤྱན་དྲངས་པ་དང་འཛོམ། མདོ་ཚིག་རྒྱན་དང་མཐུན་པར་བྱུང་བས་དབུགས་དབྱུང་ཐོབ་བོ། །སློབ་དཔོན་དེས་མདོ་ལེའུ་བརྒྱད་མ་དང་། མངོན་རྟོགས་རྒྱན་ངོ་བོ་ཉིད་མེད་པར་སྨྲ་བའི་དབུ་མའི་དོན་དུ་བཀྲལ་བ་དང་། མདོ་རྒྱན་བསྲེས་པའི་བསྟན་བཅོས་མཛད་པ་པོ་ཡིན། འདི་མ་བྱུང་བའི་སྔོན་རོལ་དུ་དེ་ལྟར་མེད། ཉི་ཁྲི་སྣང་བར་སྔོན་ཆད་གཞན་གྱིས་མ་མྱོང་གསུང་བའི་རྒྱུ་མཚན་དེ་ལྟར་ཡིན་ནོ་ཟེར། ཤེར་ཕྱིན་རྩལ་བཏོན་གྱི་འཆད་ཉན་དགེ་སློང་སྟོང་ཚོ་རེས་ཉུང་མཐའ་བྱས་པར་ལོ་གསུམ་ཙམ་མཛད་པར་གྲགས། རྒྱ་བོད་གཉིས་སུ་ས་དང་པོ་དང་། སྦྱོར་ལམ་པ་དང་། འཕགས་པ་དང་ཉེ་བས་དེའི་ཁོངས་སུ་གཏོགས་པ་ཡིན་ཟེར་ཡང་། སྐྱེས་མཆོག་དམ་པ་ངོ་མཚར་ཅན་ཞིག་ཡིན་པར་རྩོད་པ་མི་སྣང་ངོ་། །
སློབ་དཔོན་དཀོན་མཆོག་གསུམ་གྱི་འབངས།
༈ སློབ་དཔོན་དཀོན་མཆོག་གསུམ་གྱི་འབངས་ནི། དབྱིག་གཉེན་ལས་མངོན་པའི་སྡེ་སྣོད་ཐོས་པ་ཕྱོགས་གླང་དང་མཛའ་བཤེས་སུ་གྱུར་པ་དེ་ལ་ཤེར་ཕྱིན་ཉན་པའི་སློབ་མ་ཞིག་སྟེ་བློ་གྲོས་ཕྱོགས་གླང་དང་མཉམ་པར་གྲགས་ཤིང་། འདིས་མཛད་པའི་ཡོན་ཏན་མཐའ་ཡས་པར་བསྟོད་པ་ལས། ཕྱོགས་གླང་གིས་བསྡུས་དོན་མཛད་དོ། །སློབ་དཔོན་དཀོན་མཆོག་གསུམ་གྱི་འབངས་སློབ་དཔོན་དཔའ་བོའི་མཚན་དུ་འདོད་ཅིང་། གང་དག་བསྟོད་པ་བརྒྱ་ལྔ་བཅུ་པ་ལ་ཕྱོགས་གླང་གྱིས་སྤེལ་མར་བསྟོད་པའི་ཁ་སྐོང་མཛད་ཅེས་སྨྲ་བ་ནི་རང་བཟོའི་ལོ་རྒྱུས་ལ་དག་པའི་རྗེས་སུ་ཕྱོགས་པར་ཟད་དེ། སྤེལ་མར་བསྟོད་པའི་ནང་གི་ཕྱོགས་གླང་གི་གསུང་རྣམས་བསྟོད་པ་བརྒྱ་ལྔ་བཅུ་པའི་ཚིགས་བཅད་དེ་དང་དེའི་མཚམས་སྦྱོར་རམ། དོན་གསལ་བྱེད་ཁོ་ན་ཡིན་པས། འགྲེལ་བར་སྦྱར་བ་ཡིན་གྱི་སློབ་དཔོན་དེ་གཉིས་ཀྱིས་རྩོམ་རེས་བྱས་པ་ག་ལ་ཡིན་ཞེས་གོ་དགོས་སོ། །སླད་ཀྱིས་སློབ་དཔོན་དེ་ལྷོ་ཕྱོགས་སུ་བྱོན་ཏེ་གཙུག་ལག་ཁང་དུ་མའི་མངའ་བདག་མཛད་ནས་སྐྱེ་བོ་དུ་མ་ལ་ཆོས་བསྟན། དྲ་བ་ལིའི་ཡུལ་དུ་ཆོས་གཞི་ཆེན་པོ་ལྔ་བཅུ་ཙམ་གསར་དུ་བཙུགས་ནས་བསྟན་པ་ཡུན་རིང་དུ་གསལ་བར་མཛད། མཐར་གནོད་སྦྱིན་མོ་བསྒྲུབ་ནས་རིའི་རྒྱལ་པོ་མེ་ཏོག་བརྒྱ་པ་ཞེས་བྱ་བར་བཞུད་དོ། །
དགེ་བསྙེན་ཞི་བའི་གོ་ཆ།
༈ དགེ་བསྙེན་ཞི་བའི་གོ་ཆ་པོ་ཏ་ལར་ཕྱིན་པ་ཡང་འདི་དག་དང་དུས་མཚུངས་པ་སྟེ། དེའི་ལོ་རྒྱུས་ཅུང་ཟད་བརྗོད་ན། ཡུལ་པུཎྜ་ཝརྡྷ་ནའི་ནགས་ཚལ་ན། དགེ་བསྙེན་དེ་སྤྱན་རས་གཟིགས་བསྒྲུབས་ཤིང་གྲུབ་རྟགས་ཀྱང་བྱུང་བ་ན། རྒྱལ་པོ་ཤུ་བྷ་ས་ར་ཞེས་པའི་རྨི་ལྟས་སུ་དགེ་བསྙེན་དེ་ཡུལ་འདིར་སྤྱན་འདྲེན་པར་རི་བོ་པོ་ཏ་ལར་རྫོངས་ཤིག་ཅེས་པ་རྨིས་པས། དེ་ལ་མུ་ཏིག་གི་ཕྲེང་བ་དང་སྤྱན་འདྲེན་པའི་ཡི་གེ་གཏད། ལམ་རྒྱགས་པ་ཎ་དག་ཀྱང་སྦྱིན་པ་ན། དགེ་བསྙེན་གྱི་བསམ་པར། ལམ་བགྲོད་དཀའ་ཞིང་རིང་བས་སྲོག་གི་བར་ཆད་ཀྱང་བྱེད་སྲིད་ན་འོན་ཀྱང་ཡི་དམ་གྱི་ལྷ་བཞུགས་པར་བསྐུལ་བའི་ངག་གཅོག་པར་ནི་ཆ་མ་ཡིན་ནོ་སྙམ་ནས་ལམ་ཡིག་ཐོགས་ནས་སོང་། མཐར་དྷ་ན་ཤྲིའི་གླིང་དཔལ་ལྡན་འབྲས་སྤུངས་ཀྱི་མཆོད་རྟེན་དུ་སླེབས། དེ་ནས་པོ་ཏ་ལར་ས་འོག་ཅུང་ཟད་བརྒྱུད་ནས་ཕྱིན་པ་ན། སླར་ས་སྟེང་ནས་འགྲོ་ས་ཡོད་པ་དེང་སང་རྒྱ་མཚོ་ལུད་པས་ས་གཞི་ནོན་ཏེ་མི་ཐར་ས་མེད་གསུངས། སྔོན་གྱི་དུས་དེ་ཙམ་ན་ལམ་ཡོད་པས་དེ་ལས་བརྒྱུད་ནས་སོང་། དེར་ཆུ་བོ་ཆེན་པོ་ཞིག་ལ་མ་ཐར་བར་ལམ་ཡིག་ལྟར་སྒྲོལ་མ་ལ་གསོལ་བ་བཏབ་པས་བསྒྲལ། དེ་ནས་མཚོར་མ་ཐར་བར། ཁྲོ་གཉེར་ཅན་གྱིས་བསྒྲལ། ནགས་ཀྱི་མེ་འབར་ནས་མ་ཐར་བར། རྟ་མགྲིན་གྱིས་ཆར་ཕབ་སྟེ་བསྒྲལ། ངམ་གྲོག་འཇིགས་སུ་རུང་བར། རལ་གཅིག་མས་སྦྲུལ་ཟམ་བྱས་ཏེ་བསྒྲལ། དེ་ནས་སྤྲེའུ་གླང་པོ་ཆེའི་ལུས་ཙམ་མང་པོས་ལམ་བཀག་པར། དོན་ཞགས་ཀྱིས་དེ་རྣམས་བསྐྲད་དེ་ལམ་ཕྱེ་ཞིང་བཟའ་བཅའ་བཟང་པོ་དག་ཀྱང་བྱིན། དེ་ནས་རི་པོ་ཏ་ལའི་རྩར་སླེབས་ཀྱང་བྲག་རི་ལ་མ་ཐར་སྤྱན་རས་གཟིགས་ལ་གསོལ་བ་བཏབ་པས། སྦ་ཐག་གི་སྐས་བྱུང་ནས་དེ་ལ་འཛེགས་ཏེ་ཕྱིན་པ་ན། ཕྱོགས་ཐམས་ཅད་སྨུག་པས་ནོན་ཏེ་ལམ་མ་རྙེད་ཡུན་རིང་དུ་གསོལ་བ་བཏབ་པས་ན་བུན་སངས་སོང་བར། རི་དེའི་སུམ་ཆ་ལ་སྒྲོལ་མའི་སྐུ་བརྙན་དང་རི་སྐེད་ན་ཁྲོ་གཉེར་ཅན་གྱི་སྐུ་བརྙན་སོགས་མཐོང་། རིའི་རྩེ་མོར་ཕྱིན་པ་ན་གཞལ་མེད་ཁང་སྟོང་པ་མེ་ཏོག་ཐོ་རེ་བ་ལས་གཞན་སུ་ཡང་མི་འདུག་གོ། དེར་གསོལ་བ་འདེབས་ཀྱིན་ཟླ་བ་གཅིག་ཏུ་བསྡད་པ་ན། ནམ་ཞིག་བུད་མེད་གཅིག་འོངས་ནས་འཕགས་པ་བྱོན་པས་འདིར་ཤོག་ཅིག་ཟེར་ཏེ་ཁྲིད་ནས། ཕོ་བྲང་གི་སྒོ་རིམ་པ་སྟོང་ཕྱེ་བ་ལས་སྒོ་རེ་རེ་ཕྱེ་བས་ཏིང་ངེ་འཛིན་རེ་རེ་སྐྱེས། འཕགས་པ་ལྷ་ལྔ་དང་དངོས་སུ་མཇལ་མེ་ཏོག་སྐུ་ལ་གཏོར། རྒྱལ་པོའི་ཡི་གེ་དང་རྟེན་ཕུལ། འཛམ་བུའི་གླིང་དུ་འབྱོན་པར་གསོལ་བ་བཏབ་པས་ཞལ་གྱིས་བཞེས་ཏེ། དགེ་བསྙེན་ལ་ལམ་རྒྱགས་པ་ཎ་མང་པོ་གནང་། འདི་ཙམ་གྱིས་འཚོ་བ་ལ་བརྟེན་ནས་ཁྱོད་ཡུལ་དུ་སླེབ་པར་འགྱུར་གྱིས། པ་ཎ་མ་ཟད་པ་ན་འོང་ངོ་ཞེས་གསུངས་ཤིང་ལམ་བསྟན། རི་སྐེད་དང་རི་རྩའི་སུམ་ཆ་ན་ཡོད་པའི་སྐུ་བརྙན་ཚོ་ཡང་དངོས་སུ་མཐོང་། ཚུར་འོང་པ་ན་ཞག་བཅུ་བཞི་སོང་བའི་ཉིན་མོ། པུཎྜ་ཝརྡྷ་ནའི་རི་མཐོང་ནས་རབ་ཏུ་དགའ་སྟེ། པ་ཎ་ལྷག་པོས་བཟའ་བཏུང་ལྷག་པོར་ཉོས་ཏེ་ཟོས། རྒྱལ་པོའི་གྲོང་ཁྱེར་དུ་མ་སླེབས་པར་རང་གི་སྒྲུབ་གནས་དང་ཉེ་བར་སླེབས་པའི་ཚེ་ན་པ་ཎ་ཟད། ས་དེར་བསྡད་ནས་ཉིན་རངས་པར་འཕགས་པ་འབྱོན་ནམ་སེམས་པ་ན་མ་བྱོན། ནམ་ཕྱེད་ན་གཉིད་ལ་སོང་བ་རོལ་མོའི་སྒྲས་སད་པ་ན་བལྟས་པས་རྒྱབ་རྟེན་གྱི་ཤིང་གི་ངོས་ལ་ལྷ་ལྔ་དངོས་སུ་བྱོན་འདུག་པར། ཕྱག་བཙལ་གསོལ་བ་བཏབ། རྒྱལ་པོའི་ཡུལ་དུ་འབྱོན་པར་ཞུས་པས་དང་པོ་པ་ཎ་མ་ཟད་ན། དེ་ལྟར་ཡིན་ཡང་ད་ནི་འདི་ཁོ་ནར་གནས་སོ་གསུངས། དེ་ནས་ནགས་ཚལ་དེར་ལྷ་ཁང་བཞེངས་པ་ཁ་སཪྤ་ཎིའི་ལྷ་ཁང་དུ་གྲགས་སོ། །དེ་ལྟར་ནི་རྒྱ་གར་སྤྱི་ཁྱབ་ཏུ་གྲགས་པ་ལྟར་ཡིན། ཉི་ཁྲི་ལེའུ་བརྒྱད་པའི་ལོ་རྒྱུས་ལྟར་ན། རྒྱལ་པོས་བསྐུལ་བའི་འཕྲོས་མེད་པར་པོ་ཏ་ལར་ལན་གསུམ་བྱོན་པའི་དང་པོ་རང་ཉིད་ཀྱིས་མཇལ་བའི་དོན་དང་། གཉིས་པ་མདོ་རྒྱན་གཉིས་ཚིག་མ་མཐུན་པའི་དོགས་གཅོད་ལ་ཝ་ར་ཎཱ་སིའི་དགེ་འདུན་གྱིས་བཏང་བར་དོགས་གཅོད་མ་ཞུས་པར་ཁ་སཪྤ་ཎི་སྤྱན་དྲངས། ཁ་སཪྤ་ཎི་ལ་ཞུས་པས། ང་སྤྲུལ་པ་ཡིན་པས་མི་ཤེས་གསུངས་པ་ལན་གསུམ་པ་དེའི་དོགས་གཅོད་ལ་བྱོན་ནས་ལེའུ་བརྒྱད་པ་སྤྱན་དྲངས་ཟེར་རོ། །གང་ལྟར་ཡང་དགེ་བསྙེན་དེ་ཡོ་བྱད་ལ་བལྟས་ནས་ཆོམ་རྐུན་པས་བཀྲོངས་པར་བརྩམ་པའི་ཚེ། མྱོང་བར་ངེས་པའི་ལས་ཀྱི་མཐུར་ཤེས་ནས། མགོ་བོ་འཕགས་པའི་ཕྱག་ཏུ་ཕུལ་ཞིག་བྱས་པས། ཆོམ་རྐུན་པས་ཀྱང་དེ་བཞིན་དུ་བྱས། འཕགས་པས་སྤྱན་ཆབ་ཕྱུངས། ཀླད་ཁུ་ས་རུ་སོང་བས། དེ་ཐམས་ཅད་རིང་བསྲེལ་དུ་གྱུར། དེ་ཕྱིན་ནས་མཆོད་པ་དངོས་སུ་མ་བཞེས་ཞེས་གྲགས་སོ། །དེ་ནས་རྒྱལ་པོ་ཤྲི་ཧ་ར་ཤའི་བུ་རྒྱལ་པོ་ངང་ཚུལ་ཞེས་བྱ་བ་བྱུང་ནས། དཀོན་མཆོག་མཆོད་པའི་རྒྱལ་པོར་གྱུར་ནས་ལོ་བརྒྱ་དང་བཞི་བཅུ་ཐུབ། རྒྱལ་སྲིད་ཀྱང་ལོ་བརྒྱར་ཉེ་བ་བྱས། འདི་སྐབས་ཡོན་ཏན་འོད་ཀྱི་སྐུ་ཚེའི་གཞུག་ཙམ་ཡིན་པར་གྲགས། ཤར་དུ་རྒྱལ་པོ་ལི་ཙཱ་བིའི་རིགས་ལས་བྱུང་བའི་སེང་གེ་ཞེས་བྱ་བ་མངའ་ཐང་ཆེན་པོ་ཞིག་ཀྱང་བྱུང་། དེའི་དུས་སློབ་དཔོན་ཙནྡྲ་གོ་མི་འཁྲུངས། སེང་གེའི་བུ་རྒྱལ་པོ་བྷ་ར་ཤ་ཞེས་བྱ་བས་ཀྱང་རྒྱལ་སྲིད་རིང་དུ་བྱས། འདི་སྐབས་ལེགས་ལྡན་དང་འཕགས་པ་གྲོལ་སྡེའི་སྐུ་ཚེའི་སྨད་ཀྱི་དུས་ཡིན། སློབ་དཔོན་ཉི་མ་སྦས་པ་གྲོལ་སྡེའི་སློབ་མ་མཆོག་སྡེ་དང་། སངས་རྒྱས་བསྐྱངས་ཀྱི་སློབ་མ་ཀ་མ་ལ་བུདྷིའི་སྐུ་ཚེ་སྨད་དང་། ཡོན་ཏན་འོད་ཀྱི་སློབ་མ་ཟླ་བའི་ནོར་བུ་དང་། ན་ལེནྡྲའི་མཁན་ཆེན་རྒྱལ་བའི་ལྷ་རྣམས་དུས་མཚུངས་སུ་བྱུང་ཞིང་། ལྷོ་ཕྱོགས་སུ་སློབ་དཔོན་ཟླ་བ་གྲགས་པའང་བྱོན། སློབ་དཔོན་ཆོས་སྐྱོང་དང་། ཞི་བ་ལྷ་དང་། གྲུབ་ཐོབ་བི་རུ་པའི་སྐུ་ཚེའི་སྟོད་ཀྱི་དུས་ཙམ་མོ། །འཕགས་པ་ལྷ་ཡང་འདི་དུས་བྱུང་བར་མངོན་ཏེ། མེ་ཏོག་ཕྲེང་རྒྱུད་ཤེས་རབ་གྲགས་ཀྱིས་བསྒྱུར་བ་ན། འཕགས་པ་དགེ་འདུན་འབངས་ཀྱི་སློབ་མ། འཕགས་པ་ས་ག་ལྷས་མཛད་པ་ཅེས་འབྱུང་བའོ། །
དཔལ་ལྡན་ཟླ་བ་གྲགས་པ།
༈ དཔལ་ལྡན་ཟླ་བ་གྲགས་པ་ནི། ལྷོ་ཕྱོགས་མནྟར་སྐུ་འཁྲུངས། ཆུང་ངུ་ཉིད་ནས་རིག་གནས་མཐའ་དག་ལ་སྦྱངས། རབ་ཏུ་བྱུང་ཞིང་སྡེ་སྣོད་མཐའ་དག་ལ་མཁས་པར་བྱས། ལེགས་ལྡན་གྱི་སློབ་མ་མང་པོ་དང་། སངས་རྒྱས་བསྐྱངས་ཀྱི་སློབ་མ་ཀ་མ་ལ་བུདྷི་ལ། ཀླུ་སྒྲུབ་ཀྱི་གཞུང་ལུགས་དང་མན་ངག་ཐམས་ཅད་མནོས། མཁས་པ་ཆེན་པོར་གྱུར་ནས་དཔལ་ན་ལེནྡྲའི་མཁན་པོ་མཛད། རྩ་འཇུག་བཞི་གསུམ་དང་། རིགས་པ་དྲུག་ཅུ་པའི་འགྲེལ་བ་ལ་སོགས་པ་མཛད་དེ་སངས་རྒྱས་བསྐྱངས་ཀྱི་ལུགས་དེ་ཉིད་ཆེར་དར་བར་མཛད་པ་ཡིན་ནོ། །རི་མོར་བྲིས་པའི་བ་ལས་འོ་མ་དང་རྩིག་པ་སོགས་ལ་ཐོགས་མེད་དུ་བཞུད་པ་སོགས་ངོ་མཚར་བའི་ལྟས་དུ་མ་ཡོད་ཅིང་། མུ་སྟེགས་ཀྱི་རྒོལ་བ་མང་པོ་ཚར་བཅད། བྲམ་ཟེ་དང་ཁྱིམ་བདག་ཕལ་ཆེར་བསྟན་པ་ལ་བཅུག་ནས་ཆོས་གཞི་ཆེན་པོ་མང་དུ་བཏབ། མཐར་སྔགས་ལམ་ལ་བརྟེན་ནས་མཆོག་ཐོབ་པར་བཞེད། བོད་ཀྱི་ལོ་རྒྱུས་ལྟར་ན་དགུང་ལོ་སུམ་བརྒྱ་བཞུགས་པར་གྲགས་སོ། །
སློབ་དཔོན་ཙནྡྲ་གོ་མི།
༈ སློབ་དཔོན་ཙནྡྲ་གོ་མི་ནི། སྤྱན་རས་གཟིགས་ཀྱི་ཞལ་མཐོང་བའི་པཎྚི་ཏ་མུ་སྟེགས་རྒྱང་འཕེན་པའི་སྟོན་པ་ཞིག་དང་རྩོད་པར་གྱུར་ཏེ། དེའི་རིང་ལུགས་སུན་ཕྱུང་ཡང་རིགས་པ་ནི་བློས་སྣར་བརྟགས་པ་ཡིན་པས་གང་བློ་བསྒྲིན་པ་དེ་རྒྱལ་བ་ཡིན་གྱི། སྐྱེ་བ་སྔ་ཕྱི་ཡོད་པའི་རྟགས་མངོན་སུམ་དུ་མེད་པས་ཁོ་བོ་ཅག་མི་འདོད་ཟེར་བ་ན། དེར་རྒྱལ་པོ་ལ་སོགས་དཔང་པོར་བཞག་སྟེ། ང་ཉིད་སྐྱེ་བ་ལེན་པ་ཡིན་པས་དཔྲལ་བར་རྟགས་ཐོབ་ཅིག་བྱས་ནས། དེས་དཔྲལ་བར་མཚལ་གྱི་ཐིག་ལེ་ཤ་ལ་ཐིམ་པ་གཅིག་བྱས། ཁ་ནང་དུ་མུ་ཏིག་གཅིག་བཅུག་ནས་དེ་ཉིད་དུ་འདས་ཏེ། དེའི་ལུས་ཟངས་ཁ་སྦྱོར་གྱི་ནང་དུ་བཅུག་ནས་རྒྱལ་པོས་རྒྱ་བཏབ་བོ། །དེ་རྒྱལ་རིགས་ཀྱི་པཎྚི་ཏ་བི་ཤི་ས་ག་ཞེས་པའི་བུར་སྐྱེ་བར་ཁས་བླངས་པ་བཞིན་དེ་ལ་ཁྱེའུ་མཚན་དང་ལྡན་པ་ཞིག་བཙས་མ་ཐག་ཏུ་མཚལ་གྱི་རི་མོ་དཔྲལ་བར་ཡོད་པ་ཁ་ནང་དུ་མུ་ཏིག་ཡོད་པ་དེ་བྱུང་། རྒྱལ་པོ་སོགས་ཀྱིས་སྔར་གྱི་ཕུང་པོ་དེར་བལྟས་པས་དཔྲལ་བའི་མཚལ་གྱི་རི་མོ་ཡང་བྱིད། མུ་ཏིག་གི་ཤུལ་ཧར་རེ་འདུགདེར་མུ་སྟེགས་དེ་ཡང་སྐྱེ་བ་སྔ་ཕྱི་ཡོད་པར་ཡིད་ཆེས་སྐད། ཁྱེའུ་བཙས་མ་ཐག་ཏུ་མ་ལ་ཕྱག་བྱས་ཏེ་ཟླ་བ་བཅུར་འོ་མ་བརྒྱལ་ལམ་བྱས་པས། བཙས་མ་ཐག་སྨྲ་བ་ལྟས་ངན་ནོ་སྙམ་ནས་ཁ་རོག་འདུག་བྱས་པས་ལོ་བདུན་བར་ཅང་མ་སྨྲས་པས་ལྐུག་པའོ་སྙམ་མོ། །དེར་མུ་སྟེགས་ཀྱིས་རྒོལ་བ་ཤིན་ཏུ་གོ་དཀའ་བ་སྙན་དངགས་ཀྱི་ཚིགས་བཅད་སངས་རྒྱས་པ་རྣམས་ཀྱི་གྲུབ་མཐའ་འགོག་པར་བྱེད་པ་གཅིག་བརྩམས་ནས་རྒྱལ་པོ་དང་མཁས་པའི་ཚོགས་ཐམས་ཅད་ལ་བྲིམས་སོ། །དེར་བི་ཤི་ས་གའི་ཁྱིམ་དུ་བྱུང་བ་ན། དོན་དེ་ཡུན་རིང་བརྟགས་པས་མ་གོ་བས་ལན་གདབ་པར་ག་ལ་ནུས། ལན་གཅིག་བྱ་བ་ཞིག་གི་ཕྱིར་ཁྱིམ་གྱི་ཕྱི་རོལ་དུ་སོང་བ་ན། དེར་ཙནྡྲ་གོ་མི་ལོ་བདུན་འགྲོ་བ་དེས་བལྟས་པ་ན། དོན་དེ་ཤེས་པར་དཀའ་བ་མེད་དོ། །དོན་འགྲོལ་གྱི་ཡིག་ཆུང་བཏབ། ལན་གྱི་ཚིགས་བཅད་ཀྱང་བྲིས་སོ། །ཕས་ནང་དུ་འོངས་པ་ན་དེ་ལྟར་བྲིས་པ་མཐོང་ནས། ཁྱིམ་དུ་སུ་བྱུང་ཞེས་ཙནྡྲ་གོ་མིའི་མ་ལ་དྲིས་སོ། །གཞན་སུ་ཡང་མ་འོངས་བུ་ལྐུག་པས་བལྟ་ཞིང་བྲིས་སོ། །དེར་ཕས་བུ་ལ་དྲིས་པ་ན་མའི་གདོང་ལ་བལྟ་ཞིང་འདུག་གོ། མས་སྨྲོས་ཤིག་བྱས་པས། འདི་ནི་བདག་གིས་བྲིས་ཏེ་རྒོལ་བ་འདི་བཟློག་པ་ནི་དཀའ་བ་མ་ཡིན་ཞེས་ཟེར། དེ་ནས་ནངས་པར་ཙནྡྲ་གོ་མི་དང་མུ་སྟེགས་ཀྱི་སྟོན་པ་དེ་གཉིས་བརྩད་པས་ཙནྡྲ་གོ་མི་རྒྱལ་ཏེ་བྱ་དགའ་ཆེན་པོ་ཐོབ་ཕྱོགས་ཐམས་ཅད་དུ་མཁས་པའི་གྲགས་པས་ཁྱབ་བོ། །དེ་ནས་སློབ་དཔོན་བློ་གྲོས་བརྟན་པ་ལ་མདོ་སྡེ་དང་མངོན་པའི་སྡེ་སྣོད་ཕལ་ཆེར་ལན་གཅིག་གསན་པས་མཁྱེན། རིག་འཛིན་གྱི་སློབ་དཔོན་མྱ་ངན་མེད་པར་བཀའ་ལུང་མནོས་ཏེ་རིག་སྔགས་བསྒྲུབས་པས་སྤྱན་རས་གཟིགས་དང་སྒྲོལ་མའི་ཞལ་གཟིགས། དེ་ནས་ཤར་ཕྱོོགས་རྒྱལ་པོ་བྷ་ར་ཤའི་ཡུལ་དུ་སྨན་དཔྱད་དང་སྡེབ་སྦྱོར་སོགས་བཟོའི་གནས་ཀྱི་བསྟན་བཅོས་མང་དུ་བྱས། ཁྱད་པར་སྒྲ་རིག་པ་མང་དུ་བཤད། དེའི་ཚེ་རྒྱལ་པོའི་བུ་མོ་ཏཱ་ར་ཞེས་བྱ་བ་བག་མར་བླངས་ཤིང་རྒྱལ་པོས་ཡུལ་འཁོར་ཞིག་ཀྱང་སྦྱིན་པར་བྱས། དུས་ལན་གཅིག་གཡོག་མོས་ཏཱ་ར་འབོད་ཀྱིན་འདུག་པས། ཡི་དམ་དང་མཚན་མཐུན་པ་ཁྱིམ་ཐབ་ཏུ་མི་རུང་ངོ་སྙམས་ནས། ཡུལ་གཞན་དུ་འགྲོ་བར་བརྩམས་པས་རྒྱལ་པོས་ཤེས་ཏེ། ངའི་བུ་མོ་དང་ལྷན་ཅིག་མི་འདུག་ན་གང་ག་ལ་སྐུར་ཅིག་ཅེས་བསྒོས་ཏེ་དེ་བཞིན་བྱས་པ་ན། སློབ་དཔོན་གྱིས་སྒྲོལ་མར་གསོལ་བ་བཏབ་པས། གང་ག་དང་རྒྱ་མཚོ་འཕྲད་མཚམས་ཀྱི་རྒྱ་མཚོའི་གླིང་ཞིག་ལ་ཐོན། གླིང་དེ་འཕགས་མས་སྤྲུལ་བ་ཡིན་ཡང་ཟེར་ཏེ་ཙནྡྲ་དི་པ་ཞེས་བྱ་བ་ད་ལྟ་ཡང་ཡོད་དེ་གྲོང་བདུན་སྟོང་ཙམ་ཤོང་བ་ཞིག་འདུག་ཟེར། སྤྱན་རས་གཟིགས་ཀྱིས་ལུང་བསྟན་པ་ལས་གོ་མི་དགེ་བསྙེན་མཛད། མཚན་ཙནྡྲ་ཡིན་ལ། དེ་ཕྱིན་ཆད་ནས་ཙནྡྲ་གོ་མིར་གྲགས་སོ། །སླར་ཡང་འཛམ་གླིང་ལྷོ་ཕྱོགས་ཀྱི་རྒྱུད་དུ་བྱོན། བྲམ་ཟེ་མཆོག་སྲེད་ཀྱི་ལྷ་ཁང་ན་ཀླུ་ལ་སྒྲ་ཉན་པའི་བཀོད་པ་དང་། ཀླུ་ཤི་ཥས་བྱས་པའི་པཱ་ཎིའི་འགྲེལ་པ་འདུག་པ་ཡང་གཟིགས་པས། ཀླུ་ནི་རབ་ཏུ་རྨོངས་པས། ཚིག་མང་བ། དོན་ཉུང་བ་ཟློས་པ། མ་རྫོགས་པའོ། །ཞེས་སྨད་ནས། པཱ་ཎི་པའི་དོན་འགྲེལ་དུ་ཙནྡྲ་བྱཱ་ཀ་ར་ཎ་ཡན་ལག་དང་བཅས་པ་མཛད། གཞུང་དེར། ཉུང་ངུ་རྣམ་གསལ་ཡང་དག་རྫོགས། །ཞེས་གསུངས་པ་ཡང་ཀླུ་ལ་ཟུར་ཟ་བའོ། །དེ་ནས་དཔལ་ན་ལེནྡྲར་བྱོན། དེའི་ཚེ་མཁན་པོར་གྱུར་པ་ཟླ་བ་གྲགས་པ་ཡིན་པ་དང་མཇལ་ནས། ཁྱེད་གང་ནས་འོངས་བྱས་པས། ལྷོ་ཕྱོགས་ནས་འོངས། ཆོས་གང་ཤེས་དྲིས་པས། སྒྲ་པཱ་ཎི་པ་དང་། བསྟོད་པ་བརྒྱ་ལྔ་བཅུ་པ་དང་། མཚན་ཡང་དག་པ་བརྗོད་པ་གསུམ་ཤེས་བྱས་པས། འདི་གཞུང་གསུམ་ལས་མི་ཤེས་ཞེས་ཚིག་ཁེངས་སྐྱུང་ཡང་། དོན་ལ་ཐམས་ཅད་ཤེས་པར་ཁས་བླངས་པ་ཡིན་པས། ཙནྡྲ་གོ་མི་ཡིན་ནམ་སྙམ་དྲིས་པས། འཇིག་རྟེན་ན་དེ་ལྟར་གྲགས་གསུངས། འོ་ན་མཁས་པ་ཆེན་པོ་ཐོག་བབས་སུ་བྱོན་པ་མ་ལེགས་ཀྱིས། དགེ་འདུན་གྱིས་བསུ་བ་བྱེད་དགོས་པས་རེ་ཞིག་གྲོང་ཁྱེར་དུ་བཞུད་ཅིག་གསུངས་པས། བདག་དགེ་བསྙེན་ལ་དགེ་འདུན་གྱིས་བསུ་བ་བྱར་ག་ལ་རུང་། འདི་ལ་ཐབས་ཡོད་དོ་གསུངས་ནས། ཤིང་རྟ་གསུམ་ལས། དབུས་མར་འཇམ་དཔལ་བཞུགས། གཞན་གཉིས་སུ་སློབ་དཔོན་གཉིས་ཀྱིས་རྔ་ཡབ་གཡབ་ཅིང་མདུན་ནས་དགེ་འདུན་གྱིས་བསུ་བ་དང་བཅས་བྱོན་ན་འཇམ་དཔལ་གྱི་སྐུ་ལ་བསུ་བ་བྱས་པར་འགྲོ་གསུངས་ནས། དེ་ལྟར་བྱས་པས་ཙནྡྲ་གོ་མིར་འཇམ་དཔལ་གྱི་སྐུ་བརྙན་གྱིས་ཞལ་བསྟན་པས་དེར་བསྟོད་པ་མཛད་པ་སྐུ་བརྙན་ཞལ་ཕྱིར་ལོག་གིས་གསན་པ་དུས་དེར་སྐྱེ་བོ་ཀུན་གྱིས་མཐོང་ནས་སྐུ་གཟུགས་ཕ་གི་ནི་དེ་ལྟར་བྱེད་དོ་བྱས་པ་དེ་ག་ལ་ལུས་ཏེ་འཇམ་དབྱངས་མཇིང་ཡོན་མར་གྲགས། དེ་ནས་ཙནྡྲ་གོ་མིས་ཐོགས་མེད་ཀྱི་སྲོལ་ལ་བརྟེན་ཏེ་རྣམ་རིག་གི་ཕྱོགས་བཟུང་། ཟླ་གྲགས་ནི་ཀླུ་སྒྲུབ་ཀྱི་གཞུང་སངས་རྒྱས་བསྐྱངས་སོགས་ཀྱིས་བཀྲལ་བ་ལ་བརྟེན་ཏེ་ངོ་བོ་ཉིད་མེད་པར་སྨྲ་བའི་ཕྱོགས་བཟུང་། ལོ་བདུན་གྱི་བར་དུ་བགྲོ་གླེང་གི་བརྒལ་བརྟག་མཛད་དོ། །རྩོད་པ་དེ་བལྟ་བའི་ཕྱིར་སྐྱེ་བོ་མང་པོ་རྟག་ཏུ་འདུས་པས། གྲོང་པའི་ཁྱེའུ་དང་བུ་མོ་ཚུན་ཆད་ཀྱིས་ཀྱང་ཕྱོགས་ཙམ་རིག་ནས། ཀྱེ་མ་འཕགས་པ་ཀླུ་སྒྲུབ་གཞུང་། །ལ་ལའི་སྨན་ལ་ལ་ལའི་དུག། མི་ཕམ་འཕགས་པ་ཐོགས་མེད་གཞུང་། །སྐྱེ་བོ་ཀུན་ལ་བདུད་རྩི་ཉིད། །ཅེས་གླུར་ལེན་པ་བྱུང་ངོ་། །ཟླ་གྲགས་ཀྱི་དགོངས་པར། འདི་ལ་རྩོད་པ་སློབ་མི་ཞིག་ཡོད་དོ་བསམས་ནས། ཙནྡྲ་གོ་མིའི་ཕྱི་བཞིན་ཕྱིན་པ་སྤྱན་རས་གཟིགས་ཀྱི་ལྷ་ཁང་ཞིག་ཡོད་པར། སྒོའི་ཕྱི་ནས་ཉན་པས། སྤྱན་རས་གཟིགས་ཀྱི་རྡོ་སྐུ་དེས་སློབ་དཔོན་གྱིས་སློབ་མ་ལ་སྟོན་པ་བཞིན་ཆོས་གསུང་བ་གཟིགས་པས་འཕགས་པ་ལ་ཉེ་རིང་མི་མངའ་འམ་ཞེས་སྒོ་ཕྱེ་བས་དེ་ཉིད་དུ་རྡོ་སྐུར་གྱུར་ཏེ། ཆོས་སློབ་བཞིན་པའི་ཕྱག་སོར་ཀེར་རེ་བར་ལུས་པས་སྤྱན་རས་གཟིགས་འཛུབ་ཀེར་མར་གྲགས། དེ་སྐབས་ནས་རྩོད་པ་རང་ཞི་བའོ། །དེ་ནས་ན་ལེནྡྲའི་གནས་དེར་བཞུགས་ནས་ཆོས་མང་དུ་བསྟན། ཟླ་གྲགས་ཀྱིས་མཛད་པའི་སྒྲའི་བསྟན་བཅོས་ཀུན་ཏུ་བཟང་པོ་ཞེས་བྱ་བ་ཚིགས་བཅད་ལེགས་པོ་གཟིགས་པས་རང་གིས་མཛད་པའི་སྒྲ་མདོ་སྡེབ་མི་ལེགས་པར་མཁྱེན་ནས། འགྲོ་དོན་མི་འབྱུང་ངམ་སྙམ་ནས་དཔེ་ཁྲོན་པར་བསྐྱུར་བས། རྗེ་བཙུན་སྒྲོལ་མས། ཁྱོད་ཀྱི་འདི་ནི་སེམས་ཅན་ལ་ཕན་པར་འགྱུར་གྱི། ཟླ་གྲགས་ཀྱི་འདི་ནི་མཁས་པའི་ང་རྒྱལ་གྱིས་བྱས་པས་གཞན་ལ་ཕན་ཐོགས་ཆུང་ངུར་འགྱུར་རོ། །དེའི་ཕྱིར་གླེགས་བམ་ཁྲོན་པ་ནས་ཕྱུངས་ཤིག། ཅེས་ལུང་བསྟན་པ་ལྟར་བླངས་ཏེ། ཁྲོན་པ་དེའི་ཆུ་འཐུང་བས་ཀྱང་ཤེས་རབ་ཆེན་པོར་བྱུང་སྐད། ཙནྡྲ་པ་ནི་དེ་ནས་ད་ལྟའི་བར་དུ་དར་རྒྱས་ཤིན་ཏུ་ཆེ་ཞིང་། ཕྱི་ནང་ཐམས་ཅད་སློབ་པར་བྱེད་ལ། ཀུན་ཏུ་བཟང་པོ་ནི་མི་རིང་བར་ནུབ་སྟེ་ད་ལྟ་དཔེ་ཙམ་ཡང་ཡོད་པར་མི་སྣང་ངོ་། །དེར་བཟོའི་གནས་བརྒྱ་རྩ་བརྒྱད་དང་། སྒྲ་དང་། རྟོག་གེ་དང་། སྨན་དཔྱད་དང་། སྡེབ་སྦྱོར་དང་། ཟློས་གར་དང་། མངོན་བརྗོད་དང་། སྙན་དངགས་དང་། སྐར་རྩིས་ལ་སོགས་པའི་བསྟན་བཅོས་མང་དུ་བརྩམས་ཤིང་འཆད་སྤེལ་མཛད་པའི་ཚེ། འཕགས་མ་སྒྲོལ་མས། ས་བཅུ་པ་དང་ཟླ་བ་སྒྲོན་མེ་དང་། །སྡོང་པོས་བརྒྱན་པ་དང་ནི་ལངྐར་གཤེགས། །རྒྱལ་བ་རྣམས་ཀྱི་ཡུམ་གྱུར་ཀློགས་ཤིག་ཀྱེ། །སྡེབ་སྦྱོར་ངན་གཡོའི་སྦྱོར་བས་ཁྱོད་ལ་ཅི། །ཞེས་གསུངས་པས་ཕྱི་རོལ་གྱི་རིག་གནས་ཉུང་ངུར་བཏང་ནས། རྨད་དུ་བྱུང་བའི་མདོ་ལྔ་པོ་དེ་ཉིན་རེ་ཞལ་འདོན་དང་གཞན་ལ་འཆད་སྤེལ། དེ་ལྔ་ལ་དོན་བསྡུས་བསྟན་བཅོས་རེ་ཡང་མཛད། འདིས་སྔ་ཕྱིར་མཛད་པའི་བསྟན་བཅོས་ནི། བསྟོད་པ་བརྒྱ་དང་བརྒྱད། ནང་རིག་པའི་བསྟན་བཅོས་བརྒྱ་དང་བརྒྱད། ཕྱི་རོལ་པའི་བསྟན་བཅོས་བརྒྱ་དང་བརྒྱད། བཟོ་གནས་བརྒྱ་དང་བརྒྱད། སྒྲོལ་མ་དང་སྤྱན་རས་གཟིགས་གཉིས་ཀྱི་སྒྲུབ་ཐབས་བརྒྱ་རྩ་རེ། ཕྲ་མོ་ཐོར་བུ་བ་བཞི་བརྒྱ་སུམ་ཅུ་རྩ་གཉིས་རྣམས་མཛད་པར་གྲགས། དེ་ལྟར་སེམས་ཅན་གྱི་དོན་ཡུན་རིང་མཛད་ནས་མཐར་པོ་ཏ་ལར་གཤེགས་པར་བཞེད་ནས། འཛམ་བུའི་གླིང་ནས་དྷ་ན་ཤྲིར་གླིང་དུ་བྱོན་པ་ན། བློན་ཀླུ་ཤེ་ཥ་ལ་སྨད་པས་འཁོན་དུ་བཟུང་ནས་རྒྱ་མཚོའི་རླབས་ཆེན་པོས་གྲུ་གཟིངས་ཞིག་པར་བརྩམས། རྒྱ་མཚོའི་དབུས་ནས་སྒྲ་བྱུང་ནས། ཙནྡྲ་གོ་མི་ཕྱུངས་ཤིག་ཟེར། སྒྲོལ་མ་ལ་གསོལ་བ་བཏབ་པས། འཕགས་མ་གཙོ་འཁོར་ལྔ་མཁའ་ལྡིང་ལ་ཆིབས་ནས་མདུན་གྱི་ནམ་མཁར་བྱོན་པས། ཀླུ་རྣམས་འཇིགས་ཤིང་སྐྲག་ནས་བྲོས། གྲུ་དྷ་ན་ཤྲིར་བདེ་བར་སླེབས་སོ། །དེར་དཔལ་ལྡན་འབྲས་སྤུངས་ཀྱི་མཆོད་རྟེན་ཡང་མཆོད་ཅིང་སྒྲོལ་མ་དང་སྤྱན་རས་གཟིགས་ཀྱི་ལྷ་ཁང་བརྒྱ་རྩ་རེ་བཞེངས། རི་བོ་ཏ་ལར་གཤེགས་ནས་ད་ལྟ་ཡང་སྐུ་ལུས་མ་སྤངས་པར་བཞུགས་སོ། །
དུལ་བའི་སྡེ་དང་བཙུན་པ་གྲོལ་སྡེ་སོགས།
རྒྱལ་པོ་སེང་གེ་ལྔ་པའི་དུས་སུ་མཆོག་སྡེའི་སློབ་མ་དུལ་བའི་སྡེ་དང་། མ་ག་དྷར་བཙུན་པ་གྲོལ་སྡེ་དང་ཡོན་ཏན་འོད་ཀྱི་སློབ་མ་མངོན་པ་ཡོན་ཏན་བློ་གྲོས་དང་། སློབ་དཔོན་ཆོས་སྐྱོང་དང་། དབང་ཕྱུག་སྡེ་དང་བཅས་པ་རྣམས་བྱོན། དུལ་བའི་སྡེ་དང་བཙུན་པ་རྣམ་གྲོལ་སྡེའི་ལོ་རྒྱུས་རྒྱས་པ་མ་མཐོང་ངོ་། །
མངོན་པ་ཡོན་ཏན་བློ་གྲོས།
མངོན་པ་ཡོན་ཏན་བློ་གྲོས་རིག་གནས་མཐའ་དག་ལ་མཁས་ཤིང་མངོན་པ་མཛོད་ཀྱི་འགྲེལ་བཤད་ཀྱང་བྱས། དབུ་མ་རྩ་བ་ལ་བློ་བརྟན་གྱི་རྗེས་སུ་འབྲངས་ཏེ་ལེགས་ལྡན་འགོག་པའི་འགྲེལ་བར་གྲགས་སོ། །
སློབ་དཔོན་ཆོས་སྐྱོང་།
༈ སློབ་དཔོན་ཆོས་སྐྱོང་ནི། སློབ་དཔོན་ཆོས་འབངས་ལས་རབ་ཏུ་བྱུང་ཞིང་འདུལ་བ་ཉན། ཕྱོགས་གླང་ལས་སྡེ་སྣོད་ཡན་ལག་དང་བཅས་པ་ཉན་ཏེ་མཁས་པའི་དབང་ཕྱུག་མདོ་སྡེ་ཆེན་པོ་བརྒྱ་རྩ་ཞལ་འདོན་མཛད་པ། འཕགས་པ་ནམ་མཁའི་སྙིང་པོས་ཞལ་གཟིགས་ནས་རྟག་ཏུ་ཆོས་ཉན་པ། ཟླ་གྲགས་ཀྱི་རྗེས་སུ་ན་ལེནྡྲའི་མཁན་པོ་ཡང་མཛད། མུ་སྟེགས་ཀྱི་རྒོལ་བ་རྣམས་ཁྲོ་བོ་དབྱུག་སྔོན་གྱིས་བསྡིགས་ནས་ངག་གནོན་པར་བྱེད་པ་ཞིག་སྟེ། འདིས་དབུ་མ་བཞི་བརྒྱ་པ་ལ་རྣམ་རིག་ཏུ་བཀྲལ་བའི་འགྲེལ་པ་ཡང་མཛད་པ་སོགས་འགྲོ་ཕན་རྒྱ་ཆེ། མཐར་བཅུད་ལེན་གྱི་དངོས་གྲུབ་སྒྲུབ་ནས་ལྷའི་གནས་སུ་བཞུད་དོ། །ཞེས་གྲགས་སོ། །དེའི་འོག་ཏུ་ན་ལེནྡྲའི་མཁན་པོ་རྒྱལ་བའི་ལྷས་མཛད། དེའི་སློབ་མ་ཞི་བ་ལྷ་དང་བི་རུ་པ་ཡིན་ནོ། །
བི་རུ་པ།
༈ བི་རུ་པ་ནི། ན་ལེནྡྲར་སློབ་གཉེར་བྱེད་སྐབས། ལན་གཅིག་དི་བི་ཀོ་ཊར་ཕྱིན་པས། བུད་མེད་ཅིག་གིས་མེ་ཏོག་ཨུཏྤལ་གཅིག་དང་མགྲོན་བུ་ཞིག་གཏད་པ་བླངས་ཕྱིན་པས། མི་རྣམས་མཁའ་འགྲོ་མས་རྒྱས་བཏབ་པ་སྙིང་རེ་རྗེ་ཟེར་རྒྱུ་མཚན་ཅི་བྱས་པས། དེ་བོར་དང་ཟེར་བོར་བས། ལག་པ་ལ་འབྱར་ཏེ་འབོར་མ་ཐུབ། དེ་ནས་ནང་པའི་མཁའ་འགྲོ་མ་ཞིག་དང་འཕྲད་ནས། སྐྱོབ་དགོས་བྱས་པས། ངེད་ཕྱི་ནང་གཉིས་ཀྱི་མཁའ་འགྲོ་མ་རྣམས་མེ་ཏོག་སྤྲོད་ས་སུ་སྔ་དབང་བར་བྱས་ཟེར། ཐབས་གཞན་མེད་དམ་བྱས་པ་ན། དཔག་ཚད་ལྔའི་ཕ་རོལ་ཏུ་ཕྱིན་ན་ཐར་ཏེ་ཉི་མ་དགོང་ཁར་སོང་བས་མི་སླེབས་ཟེར། མགྲོན་ཁང་ཞིག་ཏུ་རྫ་མ་ཁ་སྦུབ་པའི་འོག་ཏུ་བསྡད་སྟོང་པ་ཉིད་བསྒོམས་སོ། །དེ་ནུབ་དེ་ན་ཡོད་པའི་མི་རྣམས་རེ་རེ་ནས་ཕྲ་མེན་གྱིས་ཁྲིད་ཀྱང་རྒྱས་བཏབ་པ་དེ་མ་ཡིན་པར་ཤེས་ཏེ་ཐམས་ཅད་རང་གནས་སོ་སོར་བསྐྱལ། བཱི་རུ་པ་མ་མཐོང་བའི་ངང་ལ་ནམ་ལངས་ཏེ་དེ་རྣམས་གྱེས་སོ། །དེ་ནས་བྲོས་ཏེ་སླར་ན་ལེནྡྲར་ཕྱིན་པཎྜི་ཏར་གྱུར་ནས། ཕྲ་མེན་མ་རྣམས་འདུལ་དགོས་དགོངས་སློབ་དཔོན་ཀླུའི་བྱང་ཆུབ་ལ་གཤིན་རྗེ་གཤེད་ཞུས་ནས་བསྒོམས་པས་ཞལ་མངོན་སུམ་དུ་མཐོང་སྟེ་བྱོན་པས་ཕྲ་མེན་རྣམས་སྔར་རྒྱས་བཏབ་པ་དེ་བྱུང་ངོ་ཟེར་འཇིགས་པའི་གཟུགས་ཀྱིས་ཟ་བར་བརྩམས་པ་ན། གཤིན་རྗེ་གཤེད་ཀྱི་དཀྱིལ་འཁོར་དུ་བཞེངས་པས། དེ་རྣམས་བརྒྱལ་ཞིང་ཤི་ལ་ཁད་པར་སོང་བ་དེ་རྣམས་དམ་ལ་བཞག་ནས་སྤྱོད་པ་ལ་བྱོན་པ་ཡིན་ནོ། །
ཞི་བ་ལྷ།
༈ ཞི་བ་ལྷ་ནི་རྒྱལ་པོའི་སྲས་སུ་འཁྲུངས། སྔོན་གྱི་ལས་འཕྲོའི་མཐུས་ཆུང་ངུ་ནས་མནལ་ལམ་དུ་འཇམ་དཔལ་ཞལ་གཟིགས། དེ་ནས་རྒྱལ་སྲིད་དུ་བསྐོ་བའི་ནུབ་མོ་ཁྲི་ཐོག་ཏུ་འཇམ་དཔལ་བཞུགས་ནས། བུ་གཅིག་འདི་ནི་ང་ཡི་སྟན་ཡིན་ཏེ། །ང་ནི་ཁྱོད་ཀྱི་དགེ་བའི་བཤེས་གཉེན་ཡིན། །ཁྱོད་དང་ང་ཉིད་སྟན་གཅིག་ལ་འདུག་པ། །འདི་ནི་རྣམ་པ་ཀུན་ཏུ་རིགས་མ་ཡིན། །ཞེས་གསུངས་པ་དང་། སྒྲོལ་མས་ཀྱང་རང་གི་མའི་ཚུལ་གྱིས་ཆུ་ཚན་སྤྱི་བོར་བླུགས་ནས་རྒྱལ་སྲིད་ནི་དམྱལ་བའི་ཆུ་ཚན་ནོ། །ཞེས་སོགས་བྱུང་བས་རྒྱལ་སྲིད་བཟུང་དུ་མི་རུང་བར་མཁྱེན་ནས་བྲོས་ནས་སོང་ངོ་། །ནགས་ཚལ་ཞིག་ཏུ་སླེབས་པ་ན་བུད་མེད་གཅིག་གིས་ཁྲིད་དེ་ནགས་ཚལ་གྱི་བྲག་ཕུག་ན་རྣལ་འབྱོར་པ་འདུག་པའི་དྲུང་དུ་བསྐྱལ་བྱུང་བར་དེར་གདམས་པ་ཞུས་ནས་བསྒོམས་པས་ཏིང་ངེ་འཛིན་དང་ཡེ་ཤེས་བསམ་གྱིས་མི་ཁྱབ་པ་ཐོབ་བོ། །རྣལ་འབྱོར་པ་དེ་འཇམ་དཔལ་དང་བུད་མེད་དེ་སྒྲོལ་མ་ཡིན་པར་གྲགས་ཏེ། དེ་ནས་རྟག་ཏུ་འཇམ་དཔལ་གྱིས་ཞལ་གཟིགས་སོ། །དེ་ནས་ཤར་ཕྱོགས་སུ་བྱོན་པས་རྒྱལ་པོ་སེང་གེ་ལྔ་པའི་འཁོར་བྱེད་དགོས་པ་བྱུང་སྟེ། དེར་བཟོའི་གནས་སྔོན་མེད་པ་རྣམས་ཀྱང་དར་བར་བྱས། རྒྱལ་སྲིད་ཀྱང་ཆོས་བཞིན་དུ་སྐྱོང་དུ་བཅུག་པས། བློན་པོ་གཞན་རྣམས་ཀྱིས་ཕྲག་དོག་བྱས་ཏེ། རྒྱལ་པོ་ལ་འདི་ནི་གཡོ་ཅན་ཞིག་སྟེ་རལ་གྲི་ཡང་ཤིང་ལས་མེད་བྱས་པས། ཡི་དམ་ལྷའི་ཕྱག་མཚན་ཤིང་གི་རལ་གྲི་ཡོད་པ་རྒྱལ་པོས་སྟོན་ཟེར། སློབ་དཔོན་གྱིས་འདི་བསྟན་ན་ལྷ་ཉིད་ལ་གནོད་པར་འགྱུར་རོ་བྱས་པས། ལྷག་པར་ཐེ་ཚོམ་སྐྱེས་ཏེ། གནོད་ཀྱང་སླ་ཡི་ངེས་པར་སྟོན་ཅིག་ཟེར། འོ་ན་སྤྱན་གཡས་པ་ཁོབ་ལ་གཡོན་པས་གཟིགས་ཤིག་གསུང་། དེ་ལྟར་བསྟན་པས་རལ་གྲིའི་འོད་ཀྱི་རྒྱལ་པོའི་སྤྱན་གཡོན་པ་ལྷུང་ངོ་། །དེ་ནས་གྲུབ་ཐོབ་ཡིན་པར་ཤེས་ཏེ་བསྙེན་བཀུར་རོ། །དེ་ནས་ཡུལ་དབུས་སུ་བྱོན་མཁན་པོ་རྒྱལ་བའི་ལྷ་ལས་རབ་ཏུ་བྱུང་ནས་མིང་ཞི་བ་ལྷར་བཏགས་སོ། །དེར་པཎྜི་ཏ་རྣམས་དང་ལྷན་ཅིག་གནས་ནས་ཆོས་ཐམས་ཅད་ཐུགས་སུ་ཆུད་ཏེ་བསླབ་པ་ཀུན་ལས་བཏུས་དང་མདོ་ཀུན་ལས་བཏུས་ལེགས་པར་བརྩམས། འཕགས་པ་འཇམ་དཔལ་ལས་ཆོས་གསན་ཞིང་། ཉིན་མཚན་དུ་མནལ་བ་ལྟར་ལས། ཕྱི་རོལ་གཞན་ངོར་ཐོས་བསམ་སྒོམ་གསུམ་གང་ཡང་མི་བྱེད་པར་བསྟན་པས། དགེ་འདུན་རྣམས་ཀྱིས་དད་ཟས་ཆུད་འཛའ་བས་འདི་བསྐྲད་དགོས་པ་ལས། མདོ་འདོན་རེས་བྱས་ན་རང་བུད་ལ་འགྲོ་ཞེས་བགྲོས་ནས། མཐར་མདོ་འདོན་རེས་བབས་པ་ལ། ཐོག་མར་ཞལ་གྱིས་མ་བཞེས། ནན་གྱིས་:འཆུ་༼ཞུས་༽བ་ལ། འོ་ན་ཁྲི་རྩིགས་ཤིག་འདོན་པར་བྱའོ་གསུངས་པས་འགའ་ཞིག་ཐེ་ཚོམ་དུ་གྱུར། ཕལ་ཆེར་དམའ་དབབ་པའི་དོན་དུ་ཡིན་པས། ཁྲི་མཐོ་བར་བརྩིགས་པ་ལ། དེར་འཛེགས་ནས། སྔར་བྱུང་བ་ཞིག་འདོན་ནམ་མ་བྱུང་བ་ཞིག་འདོན་བྱས་པས། ཐམས་ཅད་ཀྱིས་ཚོད་ལེན་པའི་ཕྱིར་མ་བྱུང་བ་ཐོན་ཅིག་ཟེར། བྱང་ཆུབ་སེམས་དཔའི་སྤྱོད་པ་ལ་འཇུག་པ་གསུངས་ཏེ། གང་ཚེ་དངོས་དང་དངོས་མེད་དག། བློ་ཡི་མདུན་ན་མི་གནས་པ། །ཞེས་པའི་ཚིག་མཚམས་ནས་ནམ་མཁར་འཕུར་ཞིང་གཤེགས་ནས། སྐུ་ལུས་མི་སྣང་ཡང་གསུང་གི་སྣང་བ་མ་ཆད་པ་བྱུང་སྟེ་སྤྱོད་འཇུག་རྫོགས་པར་གསུངས་སོ། །དེར་པཎྜི་ཏ་གཟུངས་ཐོབ་པ་རྣམས་ཀྱིས་བློ་ལ་བཟུང་བས། ཁ་ཆེ་བ་རྣམས་ཀྱིས་ཤླཽ་ཀ་སྟོང་ལྷག་པ་ཅིག་བྱུང་། ཤར་པ་རྣམས་ཀྱི་ཤླཽ་ཀ་བདུན་བརྒྱ་ལས་མེད་པ། མཆོད་བརྗོད་དབུ་མ་རྩ་བའི་དེ་བཅུགདེ་ཡང་བཤགས་ལེ་དང་ཤེར་ལེ་གཉིས་ཆད་པ་ཡིན། དབུས་པ་རྣམས་ཀྱིས་མཆོད་བརྗོད་དང་རྩོམ་པར་དམ་བཅའ་མེད་པ་རྗེས་སྔགས་ཀྱི་དབང་དུ་བརྩིས་པའི་ཤླཽ་ཀ་སྟོང་ཡོད་པ་གཅིག་བྱུང་བར། དེར་ཐེ་ཚོམ་དུ་གྱུར་པས། བོད་ལྟར་ན་གྲོང་ཁྱེར་དཔལ་ཡོན་ཅན་ན་བཞུགས་ཟེར་ནའང་། གྲོང་ཁྱེར་ཀ་ལིངྐར་གཤེགས་ཏེ་བཞུགས་པ་ཐོས་པས་པཎྜི་ཏ་གསུམ་གྱིས་དེར་སོང་སྟེ་གསུམ་པོ་དེ་གང་དག་ཅེས་ཞུས་པས། ཡུལ་དབུས་པ་རྣམས་ཀྱིས་བཟུང་བ་ལྟར་ཡིན་གསུངས་སོ། །དེ་ནས་ལྷོ་ཕྱོགས་གྱི་ནང་དུ་ཕྱི་ནང་གཉིས་རྩོད་པའི་ནུས་པ་འགྲན་པ་ན། ནང་པས་མ་ནུས་པའི་སར་བྱོན། དེར་མུ་སྟེགས་ཀྱིས་རྡུལ་ཚོན་གྱི་དཀྱིལ་འཁོར་ནམ་མཁར་བྲིས་པ་སྐད་ཅིག་ལ་རླུང་ལ་བསྐུར་ཏེ་མུ་སྟེགས་པ་དང་དེར་དགའ་བའི་སྐྱེ་བོ་ཀུན་ཀྱང་རླུང་དྲག་པོས་ཁྱེར་ཏེ་ཆུ་བོ་ཞིག་ཡོད་པའི་ཕ་རོལ་ཏུ་འཕངས། ནང་པ་རྣམས་ལ་ཅི་ཡང་མ་སྐྱོན། དེ་ནས་མུ་སྟེགས་ཀྱི་ཆོས་བསྣུབས་ནས་ནང་པའི་ཆོས་ལ་བཙུད་དེ་དར་བར་བྱས། ཡུལ་དེར་མུ་སྟེགས་ཕམ་པའི་ཡུལ་ཞེས་གྲགས་སོ། །གང་ལྟར་ཡང་། ལྷག་པའི་ལྷ་མཉེས་ན་ལེནྡྲའི། །བཀོད་པ་ཕུན་ཚོགས་རྩོད་པ་བཟློག། ཡ་མཚན་ཅན་དང་སྤྲང་པོ་དང་། །རྒྱལ་པོ་མུ་སྟེགས་བཏུལ་བ་དང་། །ཞེས་ངོ་མཚར་ཅན་གྱི་གཏམ་བདུན་ཡིན་པར་འདོད་དོ། །
ཐམས་ཅད་མཁྱེན་པའི་བཤེས་གཉེན།
༈ ཐམས་ཅད་མཁྱེན་པའི་བཤེས་གཉེན་ནི། ཁ་ཆེའི་ཡུལ་གྱི་རྒྱལ་པོ་ཞིག་གི་ཟུར་བུ་བྱིས་པ་ཆུང་ངུའི་སྐབས་ཁང་སྟེང་དུ་བསྙལ་ནས། མ་མེ་ཏོག་འཐུར་སོང་བར་བྱ་རྒོད་ཀྱིས་ཁྱེར་ཏེ་ན་ལེནྡྲའི་གནྡྷོ་ལ་ཞིག་གི་རྩེ་མོར་བཞག་གོ། པཎྜི་ཏ་རྣམས་ཀྱིས་དེ་བླངས་ཏེ་གསོས་ནས་ཆེར་སྐྱེས་པ་ན་བློ་རྣོ་བར་གྱུར་ཏེ་དགེ་སློང་སྡེ་སྣོད་འཛིན་པའི་བར་དུ་གྱུར། སྒྲོལ་མ་བསྒྲུབས་པས་ཞལ་གཟིགས་ཤིང་ལོངས་སྤྱོད་མི་ཟད་པ་བྱུང་། ཐམས་ཅད་སྦྱིན་པར་བཏང་བས་ནམ་ཞིག་སྦྱིན་རྒྱུ་ཟད། སློང་བ་པོ་མང་བས་ཐག་རིང་ཞིག་ཏུ་བྱོན་སྐབས། བྲམ་ཟེ་རྒན་མོ་མིག་ལོང་བ་བུས་ལོང་ཁྲིད་བྱས་པ་དང་འཕྲད། གར་འགྲོ་དྲིས་པས། ཐམས་ཅད་མཁྱེན་པའི་བཤེས་གཉེན་གྱིས་སྦྱིན་པས་ཐམས་ཅད་མགུ་བར་བྱེད་པ་ཡོད་ཟེར་བས། དེར་སློང་ལ་འགྲོ་ཟེར་དེ་ཉིད་ང་ཡིན་ན་ཡོ་བྱད་ཐམས་ཅད་ཟད་པས་འདིར་འོངས་སོ་བྱས་པས། དེ་ཤིན་ཏུ་སྡུག་བསྔལ་གྱིས་ཉམ་ཐག་གོ། དེ་ལ་སྙིང་རྗེ་ཚད་མེད་པ་སྐྱེས་ཏེ། ཁྱོད་སྡུག་བསྔལ་བར་མ་བྱེད་ཅིག་ངས་ཡོ་བྱད་བླངས་ནས་འོང་ངོ་བྱས། དེའི་ཚེ་ལྟ་བ་ལོག་པའི་སློབ་དཔོན་ཞིག་ཡོད་པ་དེས། རྒྱལ་པོ་ས་ར་ཎ་ཞེས་བྱ་བ་ལ། མི་བརྒྱ་རྩ་བརྒྱད་ཉོས་ནས་སྦྱིན་སྲེག་བྱས་ན། དེ་རྣམས་ཀྱི་བསོད་ནམས་དང་དབང་ཐང་ཐམས་ཅད་བདག་ཉིད་ལ་འབྱུང་ཞིང་ཐར་པའི་རྒྱུ་ཡང་ཡིན་ནོ་བྱས་པར། བརྒྱ་དང་བདུན་ཉོས་ཏེ་རྙེད་གཅིག་མ་རྙེད་པའི་སྐབས་དེར་སློབ་དཔོན་གྱིས་དེར་ཕྱིན་ནས་མི་ཉོ་བ་སུ་ཡོད་བྱས་པ་རྒྱལ་པོས་ཉོ་ཟེར། རིན་དུ་སློབ་དཔོན་གྱི་ལུས་རྗིད་དང་མཉམ་པའི་གསེར་གཞལ་བྱུང་བ་བྲམ་ཟེ་ལོང་བ་ལ་བྱིན་ནས་མགུ་བར་བྱས་ཏེ་བྱོན་པས། མི་དེ་རྣམས་ན་རེ། གལ་ཏེ་ཁྱོད་མ་འོངས་ན་ངེད་རྣམས་ཐར་བ་ཡང་སྲིད་པ་ལས། ད་ནི་ད་ལྟ་ཉིད་དུ་མེ་ལ་སྲེག་གོ་ཞེས་ཤིན་ཏུ་སྡུག་བསྔལ་བར་འདུག་ཅིང་། དེའི་ནུབ་མོ་ཕྱོགས་ཡངས་པ་ཞིག་ཏུ་ཤིང་གི་ཚོགས་རི་ལྟར་སྤུངས་པའི་དབུས་སུ་མི་བརྒྱ་རྩ་བརྒྱད་པོ་བཅིངས་ཏེ་བཞགལྟ་ལོག་གི་སློབ་དཔོན་དེས་ཆོ་ག་བྱས། ཤིང་ཐམས་ཅད་མེ་འུར་གྱིས་འབར་བའི་ཚེ། མི་བརྒྱ་རྩ་བདུན་པོ་དེ་རྣམས་ཆོ་ངེ་འདོན་ཅིང་ཉམ་ཐག་པར་སློབ་དཔོན་སྙིང་རྗེ་མི་ཟད་པ་སྐྱེས་ཏེ། འཕགས་མ་སྒྲོལ་མ་ལ་ཡུས་ཀྱིས་གསོལ་བ་བཏབ་པས་རྗེ་བཙུན་མ་མདུན་དུ་བྱོན་ཏེ་ཕྱག་ལས་བདུད་རྩིའི་རྒྱུན་བབས། སྐྱེ་བོ་རྣམས་ཀྱི་སྣང་ངོར་ཕྱོགས་གང་ན་ཡང་མེད་པར་མེ་འབར་བ་ཁོ་ནའི་ཐད་དུ་ཆར་གྱི་རྒྱུན་གཉའ་ཤིང་ཙམ་བྱུང་མེ་ཞི་ནས་མཚོ་རྫིང་དུ་གྱུར། རྒྱལ་པོ་ཡ་མཚན་སྐྱེས་ཏེ་སློབ་དཔོན་ལ་གུས་པར་མཆོད། མི་རྣམས་ཀྱང་རང་གནས་སུ་བཏང་ངོ་། །དུས་འདི་ཙམ་ན། གྲུབ་ཆེན་ཌོཾ་བི་ཧེ་རུ་ཀ་དང་། གྲུབ་ཆེན་རྡོ་རྗེ་དྲིལ་བུ་པ་ཡང་བྱུང་། བི་རུ་པས་གྲུབ་པ་ཐོབ་ནས་ལོ་བཅུ་ཙམ་ན། ཌོཾ་བི་ཧེ་རུ་ཀས་དངོས་གྲུབ་བརྙེས། དེ་ནས་ལོ་བཅུ་ཙམ་ན་དྲིལ་བུ་པས་བརྙེས་སོ། །དེ་ནས་ལོ་མང་ཙམ་སོང་བ་ན་སྤྱིར་སངས་རྒྱས་ཀྱི་བསྟན་པ་ཤིན་ཏུ་དར་ཡང་། ཐོགས་མེད་སྐུ་མཆེད་དང་། ཕྱོགས་ཀྱི་གླང་པོ་བཞུགས་པ་ཙམ་ལ་ལྟོས་ན། ཤར་ཕྱོགས་དང་ལྷོ་ཕྱོགས་ཀྱི་རྒྱུད་ཀུན་ཏུ་མུ་སྟེགས་འཕེལ་ཞིང་། སངས་རྒྱས་པ་འགྲིབ་པའི་ཚུལ། མུ་སྟེགས་ཀྱི་རྩོད་པའི་ཁྱུ་མཆོག་ཏུ་གྱུར་པ་གཞོན་ནུ་རོལ་པ་དང་། གཟེགས་མ་སྒྲ་སྒྲོག་ཅེས་པ་གཉིས་བྱུང་སྟེ། སངས་རྒྱས་བསྐྱངས་དང་། ལེགས་ལྡན་དང་། ཆོས་འབངས་དང་། ཕྱོགས་གླང་གི་སློབ་མ་རྣམས་དང་། ཉན་ཐོས་ཀྱི་དགེ་འདུན་མང་པོ་དག་གི་ལོངས་སྤྱོད་དང་མངའ་ཐང་འཕྲོག་ནས་ཉམས་སྨད་པར་བྱས། དེ་དུས་སློབ་དཔོན་ཆོས་སྐྱོང་གི་སློབ་མ་དེ་ཝ་ཤྲ་མ་ཞེས་བྱ་བས་ཟླ་གྲགས་འགོག་པར་བརྩམས་ནས་དབུ་མའི་འགྲེལ་པ་དཀར་པོ་རྣམ་པར་འཆར་བ་བྱས། མུ་སྟེགས་འགའ་ཞིག་དང་བརྩད་པས་ཡང་རྒྱལ་ཏེ། རྒྱལ་པོ་ས་ལ་ཝ་ཧན་ཞེས་པ་སངས་རྒྱས་ཀྱི་བསྟན་པར་བཅུགདེས་ལྷ་ཁང་དང་མཆོད་རྟེན་མང་དུ་བཞེངས། ཆོས་གཞི་ཡང་ཅི་རིགས་བཙུགས་པར་གྲགས། སློབ་དཔོན་དབྱིག་གཉེན་བཞུགས་པ་ཡན་ཆད་ན་སྡེ་བ་བཅོ་བརྒྱད་པོ་ཡང་ཆ་ཚང་ཙམ་ཡོད་ལ། དེ་ནས་བར་སྐབས་དེ་རྣམས་སུ་རྩོད་པའི་རྒྱུ་མཚན་དང་། སྟེས་དབང་གིས་ནུབ་པ་སྣ་ཚོགས་བྱུང་སྟེ། དགེ་འདུན་ཕལ་ཆེན་པ་ལས། ཤར་གྱི་རི་བོ་པ་དང་། ནུབ་ཀྱི་རི་བོ་པ་དང་། གངས་རིར་གནས་པ་གསུམ་སྟོངས། ཐམས་ཅད་ཡོད་སྨྲ་ནས། འོད་སྲུང་པ་དང་རྣམ་པར་ཕྱེ་སྟེ་སྨྲ་བ་གཉིས་སྟོངས། གནས་བརྟན་པ་ལས། གཙུག་ལག་ཁང་ཆེན་པ་དང་། མང་བཀུར་བ་ལས་བསྲུང་བ་པའི་སྡེ་པ་སྟོངས་ཏེ། ལྷག་མ་རྣམས་དར་བར་ཡོད་དོ། །དེ་ལ་ཉན་ཐོས་རྣམས་ཀྱི་སྒྲུབ་པའི་བསྟན་པ་ནི་ལོ་ལྔ་བརྒྱ་ནས་ཉམས་པ་ལྟར་གྱུར་པ་ཡིན་མོད། དེའི་གྲུབ་མཐའི་ཕྱོགས་འཛིན་པ་ནི་ད་ལྟའི་བར་དུ་ཡོད་པས་སོ། །
དཔལ་ལྡན་ཆོས་ཀྱི་གྲགས་པ།
༈ དཔལ་ལྡན་ཆོས་ཀྱི་གྲགས་པ་ནི། ལྷོ་ཕྱོགས་རྒྱལ་དབང་གཙུག་གི་ནོར་བུ་ཞེས་བྱ་བར་འཁྲུངས་ཞེས་སྔོན་གྱི་མཁས་པ་རྣམས་གསུངས་ལ། ཏྲེ་མ་ལའི་ཡུལ་ཡིན་པ་ཕྱི་ནང་ཀུན་ལ་གྲགས་པས་སྔོན་དུས་དེ་ལ་རྒྱལ་དབང་གཙུག་ནོར་དུ་གྲགས་སྐད། འཁྲུངས་པའི་དུས་ནི་རྒྱལ་པོ་སེང་གེ་ལྔ་པ་དང་། གསལ་བ་སོགས་ཀྱི་དུས་ཡིན་པར་སྔོན་ཡབ་བྲམ་ཟེའི་རིགས་ཀྱི་མུ་སྟེགས་ཀུན་ཏུ་རྒྱུ་རོ྅་ནནྡ་ཞེས་བྱ་བའི་བུར་སྐྱེས་ཏེ། ཆུང་ངུ་ནས་བློ་གྲོས་ཤིན་ཏུ་སྒྲིན་པས། བཟོ་གནས་དང་། རིག་བྱེད་ཡན་ལག་དང་བཅས་པ་དང་། སྨན་དཔྱད་དང་། བརྡའ་སྤྲོད་པ་དང་། མུ་སྟེགས་ཅན་གྱི་གྲུབ་པའི་མཐའ་མ་ལུས་པ་ལ་ཤིན་ཏུ་སྦྱངས་པས་མུ་སྟེགས་ཀྱི་གྲུབ་མཐའ་ལ་མཁས་པར་གྱུར་ནས། བྲམ་ཟེ་རྣམས་ཀྱིས་བསྔགས་འོས་ལྷག་པར་བསྟོད་པའི་སྐབས་ཤིག་ན། སངས་རྒྱས་ཀྱི་གསུང་རབ་འགའ་རེ་གཟིགས་པས་རང་གི་སྟོན་པ་དང་གྲུབ་མཐའ་རྣམས་སྐྱོན་དུ་གཟིགས། སངས་རྒྱས་དང་དམ་པའི་ཆོས་ལ་མོས་པ་སྐྱེས་ཏེ། ནང་པའི་དགེ་བསྙེན་གྱི་ཆ་ལུགས་སུ་བསྒྱུར་བས། བྲམ་ཟེ་རྣམས་ཀྱིས་རྒྱུ་མཚན་དྲིས་པ་ན། སངས་རྒྱས་ཀྱི་བསྔགས་པ་བརྗོད་པས་དེ་རྣམས་ཀྱིས་གནས་ནས་བསྐྲད་དོ། །དེ་ནས་ཡུལ་དབུས་སུ་བྱོན་སློབ་དཔོན་ཆོས་སྐྱོང་ལས་རབ་ཏུ་བྱུང་ནས་སྡེ་སྣོད་གསུམ་ལ་མཁས་པར་བྱས། མདོ་སྡེ་གཟུངས་སྔགས་བསྡོམས་པ་ལྔ་བརྒྱ་ཙམ་ཐུགས་ནས་འདོན། རྟོག་གེའི་བསྟན་བཅོས་གཞན་གྱིས་བློ་མ་ཁེངས། དབང་ཕྱུག་སྡེ་ལ་ཚད་མ་ཀུན་ལས་བཏུས་པ་ཚར་གཅིག་ཉན་པས་དབང་ཕྱུག་སྡེ་ཉིད་དང་མཉམ་པར་གྱུར། ལན་གཉིས་ཉན་པས་ཕྱོགས་གླང་དང་མཉམ་པར་གྱུར། གསུམ་ཉན་པས། དབང་ཕྱུག་སྡེས་ཀྱང་ཕྱོགས་ཀྱི་གླང་པོའི་དགོངས་པ་འགའ་ཞིག་ནོར་བར་མཁྱེན་ཏེ། སློབ་དཔོན་ཉིད་ལ་བཟླས་པས་ཤིན་ཏུ་དགྱེས་ཏེ། ཁྱོད་ནི་ཕྱོགས་ཀྱི་གླང་པོ་དང་མཉམ་སྟེ་གྲུབ་མཐའ་ནོར་བ་ཐམས་ཅད་སུན་ཕྱུངས་ལ། ཚད་མ་ཀུན་ལས་བཏུས་པ་ལ་འགྲེལ་པ་ཡང་གྱིས་ཤིག་ཅེས་སློབ་དཔོན་ལས་གནང་བ་ཐོབ་བོ། །སློབ་དཔོན་གྱི་དྲུང་དུ་གསང་སྔགས་ཞུས་ནས་བསྒོམས་པས་ཧེ་རུ་ཀས་ཞལ་མངོན་སུམ་དུ་བསྟན་ཏེ། ཅི་འདོད་གསུངས། ཕྱོགས་ལས་རྣམ་པར་རྒྱལ་བ་འཚལ་ལོ། །ཞུས་པས་ཧ་ཧ་ཧཱུྃ་གསུངས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་མུ་སྟེགས་ཀྱི་གྲུབ་མཐའི་གསང་ཚིག་བསླབ་པར་བཞེད་ནས། ཁོལ་པོའི་ཆ་ལུགས་སུ་བརྫུས་ཏེ་ལྷོ་ཕྱོགས་ཀྱི་རྒྱུད་དུ་བྱོན། སུ་མཁས་དྲིས་པས། གཞོན་ནུ་རོལ་རྩེད་ལ་འགྲན་གྱི་ཟླ་མེད་ཟེར། དེར་ཕྱིན་པ་ན་ཁོ་མངའ་ཐང་ཆེ་སྟེ། ཕྱི་ནང་གི་ལས་བྲན་ཕོ་ལྔ་བཅུ་དང་བྲན་མོ་ལྔ་བཅུས་བྱེད་པ་དེ་སློབ་དཔོན་གཅིག་པུས་གྲུབ་པར་བྱས་པ་ན། གཞོན་ནུ་རོལ་རྩེད་ཆུང་མར་བཅས་པ་ཤིན་ཏུ་དགའ་འོ། །ཁྱོད་ཅི་འདོད་ཟེར་བར། གྲུབ་མཐའ་ཉན་པར་འཚལ་ལོ་བྱས་པས། རིག་པ་མཐའ་དག་བསྟན། གསང་ཚིག་བུ་དང་ཆུང་མ་མ་གཏོགས་གཞན་ལ་མི་སྟོན་པ་འགའ་ཞིག་ཡོད་པ་རྣམས་ཀྱང་ལས་ཀྱི་བྱ་བས་བུ་དང་ཆུང་མ་མགུ་བར་བྱས་ཏེ། དེ་རྣམས་ལ་དྲིས་པས་ཤེས་སོ། །དེར་གྲུབ་མཐའི་གནད་དོན་ཇི་ལྟར་འགོག་པའི་ཚུལ་རྣམས་ཀྱང་ལེགས་པར་ཤེས་པ་ན། བྲམ་ཟེ་ནོར་ལ་སྲེད་པས་ནོར་མ་སྦྱིན་ན་ཉེས་པར་འགྱུར་རོ་སྙམ་ནས། དེ་ན་གནས་པའི་གནོད་སྦྱིན་ཞིག་ལས་གསེར་གྱི་དོང་ཙེ་བདུན་སྟོང་བླངས་ནས་གཞོན་ནུ་རོལ་པ་ལ་བྱིན། རང་གི་གླ་དངུལ་པ་ཎ་ལྔ་བརྒྱ་ཡོད་པ་དེས་བྲམ་ཟེ་རྣམས་ལ་སྟོན་མོ་ཆེར་བྱས་ཏེ། དེ་ནུབ་བྲོས་ནས་བྱོན་ནོ། །ཀཱ་ཀ་ཀུ་ཧ་ཞེས་བྱ་བའི་ཚོང་འདུས་ཆེན་པོ་ཕོ་བྲང་དང་བཅས་ཡོད་པ་ལ། འདིར་རྩོད་པར་འདོད་པ་སུ་ཡོད་ཅེས་སྒོ་ཡིག་བཏབ་སྟེ་བསྡད་པས། གཟེགས་ཟན་གྱི་གྲུབ་མཐའ་འཛིན་པ་བྲམ་ཟེ་ཀ་ན་གུཔྟ་དང་། གཞན་ཡང་ལྟ་བ་དྲུག་གི་གྲུབ་མཐའ་འཛིན་པ་ལྔ་བརྒྱ་ཙམ་འདུས་བྱུང་ནས། ཟླ་བ་གསུམ་དུ་བརྩད་པས། ཐམས་ཅད་སུན་ཕྱུངས་ཏེ་སངས་རྒྱས་ཀྱི་བསྟན་པ་ལ་བཅུགརྒྱལ་པོས་ཀྱང་དེ་དག་གི་ནང་ན་བྲམ་ཟེ་ལོངས་སྤྱོད་དང་ལྡན་པ་ལྔ་བཅུ་ཙམ་གྱིས་ནང་པའི་ཆོས་གཞི་རེ་འཛུགས་སུ་བཅུགགཏམ་དེ་གཞོན་ནུ་རོལ་པས་ཐོས་ནས་ཤིན་ཏུ་ཁྲོས་ཏེ། རང་ཉིད་བྲམ་ཟེ་ལྔ་བརྒྱ་དང་བཅས་རྩོད་པར་འོངས། གལ་ཏེ་ཁོ་བོ་རྒྱལ་ན་ཆོས་ཀྱི་གྲགས་པ་སོད་ཅིགཆོས་ཀྱི་གྲགས་པ་རྒྱལ་ན་ང་སོད་ཅིག་ཅེས་རྒྱལ་པོ་ལ་བསྒོ་བ་ལས། སློབ་དཔོན་གྱིས་གལ་ཏེ་གཞོན་ནུ་རོལ་པ་རྒྱལ་ན་རྒྱལ་པོས་ཤེས། གལ་ཏེ་བདག་རྒྱལ་ན་གཞོན་ནུ་རོལ་པ་གསད་དུ་མི་འཚལ་ཏེ། སངས་རྒྱས་ཀྱི་བསྟན་པ་ལ་གཞུག་པར་བྱའོ་གསུངས། དེར་བསྟན་པ་དཔང་དུ་བཙུགས་ནས་བརྩད་པས། གཞོན་ནུ་རོལ་པའི་ཐུན་མོངས་མ་ཡིན་པའི་དམ་བཅའ་ལྔ་བརྒྱ་ཡོད་པ་ཐམས་ཅད་རེ་རེ་ནས་རིགས་པའི་རྣམ་གྲངས་བརྒྱ་བརྒྱས་སུན་ཕྱུངས། དེར་གཞོན་ནུ་རོལ་པས་ཀྱང་ནང་པ་མཆོད་པར་བྱས། བྲམ་ཟེ་ལྔ་བརྒྱ་ཡང་སངས་རྒྱས་ཀྱི་བསྟན་པ་ལ་དད་དེ་རབ་ཏུ་བྱུང་བ་བྱས། གཞན་ཡང་མུ་སྟེགས་ཀྱི་རྩོད་ཟླ་ཡོད་དོ་ཅོག་ཚར་བཅད་པར་མཛད་དོ། །སླར་ཡང་དྲ་བ་ལེའི་ཡུལ་དུ་བྱོན་ནས། ཡུལ་འདི་ན་རྩོད་པར་འདོད་པ་སུ་ཡོད་ཅེས་དྲིལ་བསྒྲགས་པས། མུ་སྟེགས་ཕལ་ཆེར་བྲོས། འགའ་ཞིག་གིས་རྩོད་པར་མི་ནུས་པར་ཁས་བླངས་སོ། །དེའི་ཚེ་དཔལ་ན་ལེནྡྲར་ས་ག་ར་ཨཱ་ཙརྱས་རྩོད་པ་བྱེད་དོ་ཞེས་འཕྲིན་བརྫངས་སོ། །དེ་རྣམས་ཀྱིས་ཀྱང་སང་ཕོད་བྱའོ་ཞེས་ཕྱི་དུས་བཏབ། ཆོས་ཀྱི་གྲགས་པ་ལྷོ་ཕྱོགས་ནས་སྤྱན་དྲངས་སོ། །དེ་ནས་རྩོད་པའི་དུས་སུ་བབས་པ་ན། སངས་རྒྱས་པ་རྣམས་དང་། བྲམ་ཟེ་དང་མུ་སྟེགས་མཐའ་དག་རྒྱལ་པོ་རབ་གསལ་གྱིས་ཝ་ར་ཎཱ་སིར་བསྡུས་ཏེ། རྒྱལ་པོ་དཔང་པོའི་ཚོགས་དང་བཅས་པའི་དབུས་སུ། ས་ག་ར་ཨཱ་ཙརྱ་དང་ཆོས་ཀྱི་གྲགས་པ་རྩོད་པར་ཕྱོགས་པ་ན་སམ་ག་ར་ན་རེ། གལ་ཏེ་ངེད་རྒྱལ་བ་ན་ཁྱེད་གང་ག་ལ་མཆོང་ངམ། མུ་སྟེགས་ལ་འདམ་ཁ་གྱིས། ཅི་སྟེ་ཁྱེད་རྒྱལ་ན་ངེད་གང་ག་ལ་མཆོང་སྟེ་འཆི་བར་བྱེད་དོ་ཟེར་ནས་བརྩད་པས། ཆོས་ཀྱི་གྲགས་པས་ས་ག་ར་ཡང་ནས་ཡང་དུ་ཕམ་པར་བྱས་ཏེ། མཐར་ཅང་མི་སྨྲ་བའི་གནས་ལ་བཀོད། དེ་ནས་ས་ག་ར་གང་ག་ལ་འཆི་བར་རྩོམ་པ་སློབ་དཔོན་གྱིས་བཟློག་ཀྱང་མ་ཉན་པར། ཁོ་རང་གི་སློབ་མ་བྷ་ཊ་ཨཱ་ཙརྱ་ལ་ཁྱོད་ཀྱིས་རྩོད་པ་གྱིས་ལ། མགོ་རེག་འདི་ལས་རྒྱལ་བར་གྱིས་ཤིགམ་རྒྱལ་ཡང་རུང་། ང་ཁྱོད་ཀྱི་བུར་སྐྱེ་བ་བླངས་ནས་འདི་རྣམས་ཕྱེ་མར་འཐག་པར་བྱའོ་ཟེར་ནས་གང་གར་མཆོངས་ནས་ཤིའོ། །དེའི་སློབ་མ་མང་ཙམ་སངས་རྒྱས་ཀྱི་བསྟན་པ་ལ་བཙུད། ལྷག་མ་རྣམས་ཐག་རིང་པོར་བྲོས་སོ། །དེའི་ཕྱི་ལོ་ཉིད་བྷ་དྲ་ཨཱ་ཙརྱའི་བུར་སྐྱེ་བ་བླངས། བྷ་དྲ་ཨཱ་ཙརྱས་ཀྱང་ལོ་གསུམ་དུ་ལྷ་མཉེས་པར་བྱས། ཡང་ལོ་གསུམ་དུ་ནང་པའི་གྲུབ་མཐའ་འགོག་བྱེད་ཀྱི་རིག་པ་བསམས། ལོ་བདུན་པ་ལ་སྔར་བཞིན་བསྟན་པ་དཔང་དུ་བཙུགས་ནས་བརྩད་པས། སྔར་བཞིན་ཕམ་ནས་གང་ག་ལ་མཆོང་སྟེ་ཤིའོ། །དེར་དེ་ཉིད་ཀྱི་བུ་ཐུ་བོ་བྷ་ཌ་ཨཱ་ཙརྱ་གཉིས་པ་དང་། སམ་ག་ར་ཨཱ་ཙརྱའི་སྐྱེ་བ་དང་། རང་གི་གྲུབ་མཐའ་ལ་ཞེན་པ་རྣམས་ཤར་ཕྱོགས་ཐག་རིང་པོར་བྲོས་སོ། །བྲམ་ཟེ་ལྔ་བརྒྱ་ཙམ་ནི་བསྟན་པ་ལ་རབ་ཏུ་བྱུང་། ལྔ་བརྒྱ་ཙམ་དཀོན་མཆོག་ལ་སྐྱབས་སུ་སོང་། དེ་ལས་གཞན་མ་བྷ་དྷའི་བྲམ་ཟེ་གང་བ་ཞེས་བྱ་བ་དང་། བཅོམ་བརླག་ཏུ་བྲམ་ཟེ་གང་བ་བཟང་པོ་ཞེས་བྱ་བ་གཉིས་ཀྱང་བཏུལ་ཏེ། དེ་གཉིས་ཀྱིས་སོ་སོའི་ཡུལ་དུ་ནང་པའི་ཆོས་གཞི་ལྔ་བཅུ་རེ་བཙུགས་སོ། །དེར་སྙན་པའི་གྲགས་པས་ས་སྟེང་ཐམས་ཅད་ལ་ཁྱབ་བོ། །དེ་ནས་མ་ག་དྷ་དང་ཉེ་བ་དྲང་སྲོང་མ་ཏམ་གའི་གནས་སུ་ཡུན་རིང་དུ་བཞུགས་ཏེ་རིག་སྔགས་མང་པོ་གྲུབ་པར་མཛད། དེ་ནས་འབིགས་བྱེད་ཀྱི་རི་བོའི་ཁོངས་ན། རྒྱལ་པོ་མེ་ཏོག་གི་བུ་མེ་ཏོག་ཀུན་ཏུ་རྒྱས་པ་ཞེས་བྱ་བ་ཡོད་དེ། གྲོང་འབུམ་ཕྲག་སུམ་ཅུ་ལ་དབང་བསྒྱུར་བ་ལོངས་སྤྱོད་ཀྱི་ཁྱད་པར་ནི་ལྷ་དང་མཚུངས་སོ་ཞེས་གྲགས་པ་ཞིག་ཡོད་པའི་སར་ལྗོངས་རྒྱུ་ཞིང་གཤེགས་པ་ལས། མཐར་གྱིས་རྒྱལ་པོའི་ཕོ་བྲང་དུ་བྱོན་པ་ན། རྒྱལ་པོས་སུ་ཡིན་དྲིས་པས། ཤེས་རབ་ཅན་ནི་ཕྱོགས་ཀྱི་གླང་པོ་སྟེ། །ཙནྡྲ་གོ་མི་བརྗོད་པ་རྣམ་པར་དག། སྙན་དངགས་དཔའ་བོ་ལས་བྱུང་སྡེབ་སྦྱོར་མཁས། །ཕྱོགས་ལས་རྣམ་པར་རྒྱལ་བ་ང་མིན་སུ། །ཞེས་གསུངས་པ་ན། ཆོས་ཀྱི་གྲགས་པ་ཡིན་ནམ་ཞེས་དྲིས་པས། འཇིག་རྟེན་ན་དེ་ལྟར་འདོགས་གསུངས། རྒྱལ་པོ་དེས་ཀྱང་གཙུག་ལག་ཁང་མང་དུ་བཞེངས་ཤིང་དེར་ཆོས་ཀྱི་གྲགས་པ་བཞུགས་སུ་གསོལ། ཚད་མ་སྡེ་བདུན་གྱི་བསྟན་བཅོས་ཀྱང་བརྩམས་ནས། གལ་ཏེ་ཆོས་ཀྱི་གྲགས་པ་ཡི། །སྨྲ་བའི་ཉི་མ་ནུབ་པ་ན། །ཆོས་རྣམས་གཉིད་ལོག་ཡང་ན་ཤི། །ཆོས་མ་ཡིན་རྣམས་ད་གདོད་ལོངས། །ཞེས་ཆེད་དུ་བརྗོད་པ་རྒྱལ་པོའི་སྒོ་ཁང་དུ་ཡི་གེར་བྲིས་སོ། །ཡུལ་དེར་དགེ་སློང་ཁྲི་ཕྲག་སྙེད་བྱུང་ཞིང་ཆོས་གཞི་ཡང་ལྔ་བཅུ་ཙམ་བཙུགས། དེ་ནས་མཐའ་འཁོབ་ཀྱི་ཡུལ་གུ་ཛིར་ཐར་བྱོན་ནས་མུ་སྟེགས་མང་པོ་སངས་རྒྱས་ཀྱི་བསྟན་པ་ལ་བཙུད། གོ་ཏ་སྡུ་ལི་ཞེས་བྱ་བའི་ལྷ་ཁང་བཞེངས། ཡུལ་དེར་མུ་སྟེགས་ཤིན་ཏུ་མང་བ་ལས། དེ་རྣམས་ཀྱིས་སློབ་དཔོན་གྱི་བྲང་ཁང་ལ་མེ་བཏང་སྟེ་ཕྱོགས་ཐམས་ཅད་མེས་ཚིག་པར་གྱུར་པ་ན། ལྷག་པའི་ལྷ་དང་གསང་སྔགས་རྗེས་སུ་དྲན་པས་ནམ་མཁའི་ལམ་ལ་བགྲོད་ནས་ཕྱོགས་དེ་ནས་དཔག་ཚད་གཅིག་ཙམ་གྱི་ཡུལ་དེ་ཉིད་ཀྱི་རྒྱལ་པོའི་ཕོ་བྲང་དང་ཉེ་བར་བྱོན། ཐམས་ཅད་ངོ་མཚར་དུ་འཛིན་པར་གྱུར་ཏོ། །གྲུབ་ཐོབ་བརྒྱད་ཅུའི་བསྟོད་པར་ཡང་། རྒོལ་བ་ཚར་གཅོད་མཁའ་ལ་གཤེགས། །ཞེས་པ་ཡང་གཏམ་རྒྱུད་འདི་ལ་བརྟེན་པར་མངོན་ནོ། །དེའི་ཚེ་ས་ག་ར་ཨཱ་ཙརྱ་སླར་ཡང་སྐྱེ་བ་བླངས་པ་དེ་ཉིད་སྔ་མ་ལས་ཀྱང་ཆེས་ཤིན་ཏུ་བློ་རྣོ་ཞིང་། རྩོད་པ་ལ་མཁས་པ། བུམ་པའི་སྟེང་དུ་ལྷས་ལུས་རྫོགས་པར་སྟོན་པ་གཅིག་བྱུང་། དཔལ་ཆོས་ཀྱི་གྲགས་པ་ལ་རྩོད་པར་འདོད་དེ། ཝ་ར་ཎ་སིར་འོངས་ནས་རྒྱལ་པོ་མ་ཧཱ་སྱ་ནི་ལ་བསྒོས་ཤིང་། ཕྱོགས་ཐམས་ཅད་དུ་དྲིལ་བསྒྲགས། དེར་སློབ་དཔོན་ལྷོ་ཕྱོགས་ནས་སྤྱན་དྲངས་ཏེ། བྲམ་ཟེའི་སྐྱེ་བོ་སྟོང་ཕྲག་ལྔ་ཙམ་དང་། རྒྱལ་པོ་ལ་སོགས་པ་སྐྱེ་བོ་དཔག་ཏུ་མེད་པ་ཡང་འདུས་སྔོན་བཞིན་བསྟན་པ་དཔང་དུ་བཙུགས་པ་ལས། ཤིན་ཏུ་ཚར་བཅད་པས། ཡང་གངྒ་ལ་མཆོངས་ཏེ་ཤིའོ། །དེ་དག་གི་རྗེས་འབྲང་མང་པོ་ལ་ལ་རབ་ཏུ་བྱུང་། ལ་ལ་དགེ་བསྙེན་ལ་བཙུད་དོ། །དེའི་ཚེ་ཁ་ཆེའི་སློབ་དཔོན་གསུམ་བྱུང་བར་དྲང་པོའི་སེམས་ཀྱིས་གྲུབ་མཐའ་ལ་བརྒལ་བརྟག་མང་དུ་བྱས་པས་ནང་པ་ལ་ཤིན་ཏུ་དད་དེ། སྐྱབས་འགྲོ་དང་བསླབ་པ་བླངས་གྲུབ་མཐའ་ཉན་ནས་ཚད་མ་སྡེ་བདུན་ལ་ཤིན་ཏུ་མཁས་པར་གྱུར་ནས་བྱང་ཕྱོགས་ཁ་ཆེའི་ཡུལ་དུ་སོང་ནས་ཆོས་ཀྱི་གྲགས་པའི་ལུགས་ཀྱི་རྟོག་གེ་དར་བར་བྱས་སོ། །སླར་ཡང་ལྷོ་ཕྱོགས་ཀྱི་རྒྱུད་དུ་བྱོན་ཏེ། སངས་རྒྱས་ཀྱི་བསྟན་པ་དར་བ་དང་། བསྟན་པའི་འགལ་རྐྱེན་རྣམས་རྩོད་པས་ཚར་བཅད། རྒྱལ་པོ་དང་བློན་པོ་ལ་སོགས་པ་ཆོས་ཀྱི་སྒོ་ནས་དབང་དུ་བསྡུས། དགེ་འདུན་གྱི་སྡེ་དང་ཆོས་གཞི་ཐུག་མེད་དུ་དར་བར་མཛད། སློབ་དཔོན་ཉིད་ཀྱིས་བཞེངས་པའི་ལྷ་ཁང་ཡང་བརྒྱ་རྩ་ཙམ་ཡོད་ཅིང་། གཞན་ལ་བསྐུལ་ཏེ་བཞེངས་པ་ནི་བགྲངས་བ་ལས་འདས། སློབ་དཔོན་འདིས་ཡོངས་སུ་བསྐུལ་ཏེ་བསྟན་པ་ལ་བཅུག་པའི་དགེ་སློང་དང་དགེ་བསྙེན་ཡན་ཆད་བསྡོམ་ན་འབུམ་དུ་ཉེ་བ་ཙམ་ཡོད་པར་གྲགས་ནའང་། ཕལ་ཆེར་མཁན་སློབ་གཞན་ལ་གཏད་པ་ཁོ་ན་ཡིན་ཅིང་། ཆོས་ཀྱི་འབྲེལ་བའི་སློབ་མས་ནི་ས་སྟེང་ཐམས་ཅད་ཁྱབ་ཀྱང་། ཕྱི་བཞིན་རྗེས་སུ་འབྲངས་པ་ནི་ལྔ་ལས་ལྷག་པ་ཡོངས་སུ་མ་བཟུང་ངོ་ཞེས་གྲགས་སོ། །སྐུ་ཚེ་ཐ་མའི་ཚེ་ཡང་སྔར་གྱི་ས་ག་ར་ཨཱ་ཙརྱ་དེ་ཉིད་བྷ་དྲ་ཨཱ་ཙརྱ་ཕྱི་མའི་བུར་སྐྱེ་བ་བླངས་ཏེ་སྔོན་ལས་ཀྱང་བློ་གྲོས་ཀྱི་སྟོབས་ལྷག་པར་ཆེ་བ། རང་གི་ལྷ་མདུན་དུ་འོངས་ཏེ་མངོན་སུམ་དུ་རིག་པ་སློབ་པ། རེས་འགའ་དེའི་ལུས་ལ་ཞུགས་ནས་ཀྱང་སྔོན་མེད་པའི་རིག་པ་བརྗོད་པ་བྱུང་བ། སུ་རྒྱལ་གྲུབ་མཐའ་ལ་འཇུག་པར་བྱས་ནས་བརྩད་པས། དཔལ་ཆོས་ཀྱི་གྲགས་པ་རྒྱལ་བ་བྱུང་བས། དེ་ཉིད་སངས་རྒྱས་ཀྱི་བསྟན་པ་ལ་བཅུག་ནས། ལྷོ་ཕྱོགས་ཀྱི་རྒྱུད་དུ་བྲམ་ཟེ་དགེ་བསྙེན་ཚངས་སྤྱོད་ལ་གནས་པ་སངས་རྒྱས་ཀྱི་བསྟན་པ་མཆོད་པར་བྱེད་པ་བྱུང་ངོ་ཞེས་གྲགས་ཤིང་། དེ་ནས་དུས་ཀྱི་མཐར་ཡུལ་ཀ་ལིངྐར་གཙུག་ལག་ཁང་བཞེངས་ཤིང་སྐྱེ་བོ་མང་པོ་ཆོས་ལ་བཀོད་ནས་སྐུ་འདས། གདུང་དུར་ཁྲོད་དུ་ཞུགས་ལ་བཞུས་པས་མེ་ཏོག་གི་ཆར་བབས་ཤིང་། ཕྱོགས་ཐམས་ཅད་དྲི་བཟང་པོ་དང་རོལ་མོས་ཁྱབ་པ་ཞག་བདུན་གྱི་བར་དུ་བྱུང་། གདུང་ཐམས་ཅད་མཆིང་བུ་འདྲ་བའི་རྡོའི་གོང་བུ་གཅིག་ཏུ་འདྲིལ་བ་ལས་རུས་པའི་རྣམ་པ་ཡེ་མེད་དེ་ད་ལྟ་ཡང་དུས་སྟོན་གྱི་མཆོད་པ་བྱེད་དོ། །སློབ་དཔོན་འདི་དང་བོད་ཀྱི་རྒྱལ་པོ་སྲོང་བཙན་སྒམ་པོ་དུས་མཉམ་མོ་ཞེས་གྲགས་པ་བཞིན་དོན་ལ་གནས་པར་མངོན་ནོ། །སློབ་དཔོན་འདིས་སྡེ་བདུན་བརྩམས་ནས་པཎྜི་ཏ་ཕལ་ཆེར་གྱིས་མ་གོ། འགའ་ཞིག་གོ་བ་བྱུང་ཡང་ཕྲག་དོག་གི་དབང་གིས་མི་ལེགས་སོ་བྱས། ཁྱིའི་མཇུག་མ་ལ་བཏགས་པས། ཁྱི་ནི་ལམ་སྲང་ཀུན་ཏུ་རྒྱུ་བ་དེ་བཞིན་དུ་ངའི་བསྟན་བཅོས་ཀྱང་ཕྱོགས་ཀུན་ཏུ་ཁྱབ་པར་འགྱུར་རོ་ཞེས་གསུངས་ཤིང་། གཞུང་གི་མགོར། སྐྱེ་བོ་ཕལ་ཆེར་ཕལ་ལ་ཆགས་ཤིང་སོགས་ཤླཽ་ཀ་གཅིག་བཅུག་པ་དང་། ཕྱིས་སློབ་དཔོན་ལྷ་དབང་བློ་དང་། ཤཱཀྱ་བློ་ལ་སྡེ་བདུན་ལེགས་པར་བཤད་དེ། རང་འགྲེལ་གྱི་འགྲོས་ལྷ་དབང་བློ་ལ་བརྩམས་པར་བསྐོས། ལན་གཅིག་བརྩམས་ཏེ་གཟིགས་ཕུལ་བས་ཆུས་བཀྲུས། ཡང་བརྩམས་པ་མེས་བསྲེགས་ཏེ་སླར་ཡང་བརྩམས་ཏེ། ཕལ་ཆེར་སྐལ་བ་མེད་ཉིད་དང་། །དུས་ལའང་སྡོད་པ་མེད་པའི་ཕྱིར། །གོམས་པའི་ཕྱིར་ནི་མདོར་བསྡུས་ནས། །དཀའ་འགྲེལ་འདི་ནི་འདིར་བྱས་སོ། །ཞེས་བྲིས་ཏེ་ཕུལ་བས། འཕྲོས་དང་ཚིག་ཟུར་གྱིས་མཚོན་པའི་གནད་དོན་རྣམས་མ་བྱུང་བ་འདུག་ཅིང་ཚིག་གི་དངོས་བསྟན་གྱི་དོན་རྣམས་བྱུང་འདུག་གསུངས་ནས་བཞགངའི་རིགས་པ་འདི་དཔྱིས་ཕྱིན་པ་སུས་ཀྱང་མི་ཤེས་པ་འདུག་དགོངས་ནས་རྣམ་འགྲེལ་གྱི་མཇུག་ཏུ། རྒྱ་མཚོ་ལ་ནི་ཆུ་བོ་བཞིན་དུ་རང་གི་ལུས་ལ་ཐིམ་ཞིང་ནུབ་པ་ཉིད་དུ་འགྱུར། །ཞེས་པའི་ཚིགས་བཅད་བཅུག་གོ། དེ་ལྟར་ན་རྒྱན་དྲུག་པོ་དེ་དག་ལས། ཀླུ་སྒྲུབ། ཐོགས་མེད། ཕྱོགས་གླང་གསུམ་ནི་གཞུང་བྱེད་པ་པོ་ཡིན་ལ། འཕགས་པ་ལྷ། དབྱིག་གཉེན། ཆོས་ཀྱི་གྲགས་པ་གསུམ་ནི་འགྲེལ་བྱེད་ཡིན་ནོ། །དེ་རྣམས་སོ་སོའི་དུས་སྐབས་ལ་ལྟོས་ཏེ་བསྟན་པ་གསལ་བར་བྱེད་པའི་མཛད་པ་མཉམ་པས་རྒྱན་དྲུག་ཅེས་གྲགས་སོ། །དེའི་༼ཚེ༽གྲུབ་པ་ཐོབ་པའི་རྣལ་འབྱོར་པ་ནི། སློབ་དཔོན་ལྭ་ཝ་པ་དང་ཨིནྡྲ་བྷུ་ཏི་བར་པ་དང་། ཀུ་ཀུ་རཱ་ཛ་དང་། སློབ་དཔོན་མཚོ་སྐྱེས་རྡོ་རྗེ་དང་། ལཱ་ལི་ཏ་བཛྲ་རྣམས་འོལ་སྤྱི་ཙམ་དུ་དུས་མཉམ་མོ། །འདི་སྐབས་ཀྱི་མཚོ་སྐྱེས་རྡོ་རྗེ་ནི་བར་པ་དེ་ཡིན་ནོ། །ལཱ་ལི་ཏ་བཛྲ་ནི་ན་ལེནྡྲའི་པཎྜི་ཏ་གཅིག་ཡིན་ལ། རྣམ་སྣང་སྒྱུ་དྲྭའི་རྒྱུད་ལ་བརྟེན་ཏེ་འཇམ་དཔལ་ལ་ཡི་དམ་དུ་བྱས་ནས་སྒྲུབ་པ་མཛད་པས་ལོ་ཉི་ཤུ་ཙམ་ན་ཞལ་གཟིགས་ཏེ་རྒྱུད་བྱིན་གྱིས་བརླབས། ཨོ་རྒྱན་གྱི་གནས་ཆོས་ཀྱི་མཛོད་ནས་གཤིན་རྗེ་གཤེད་ཀྱི་རྒྱུད་སྤྱན་དྲོངས་ཤིག་པའི་ལུང་བསྟན་བྱུང་བ་ལྟར། ཨོ་རྒྱན་གྱི་གནས་དྷརྨ་གཉྫ་ཞེས་བྱ་བ་ནས། མ་འོངས་པའི་སེམས་ཅན་ལ་ཕན་པའི་དོན་དུ་གཤིན་རྗེ་གཤེད་ཀྱི་རྒྱུད་སྤྱན་འདྲེན་ནོ་ཞེས་མཁའ་འགྲོ་མ་རྣམས་ལ་ཞུས་པར། ཞག་བདུན་དུ་བློ་ལ་ཇི་ལྟར་བཟུང་བར་ནུས་པ་དེ་གནང་ངོ་། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་ནག་པོའི་རྒྱུད་དང་། སྡོམ་གསུམ་པ་དང་། རྟོག་པ་བདུན་པ་དང་། གཞན་ཡང་གཟུངས་དང་རྒྱུད་དང་། རྟོག་པའི་རིམ་པ་ཐོར་བུ་བ་མང་པོ་དང་བཅས་པ་ཐུགས་སུ་ཆུད་ནས་འཛམ་བུའི་གླིང་དུ་དར་བར་མཛད་དོ། །གཞན་ཡང་མུ་སྟེགས་ཕམ་པ་དང་། ལྷ་ཁང་བཞེངས་པ་སོགས་མཛད་པ་མཐའ་ཡས། གཤིན་རྗེ་གཤེད་ཀྱི་རིག་སྔགས་ཀྱིས། ནང་པ་ལ་ཤིན་ཏུ་གནོད་པའི་ཀླུ་དང་བསྟན་པར་སྡང་བའི་མུ་སྟེགས་དང་། མི་མ་ཡིན་གདུག་པ་ཅན་དང་། སྟག་གཟིག་སོགས་མང་པོ་མངོན་སྤྱོད་ཀྱི་ཕྲིན་ལས་ཀྱིས་འགྲོ་དོན་མཛད་ནས་མཐར་འཇའ་ལུས་སུ་གཤེགས་སོ། །དེའི་སློབ་མ་ལཱི་ལ་བཛྲ་གྱིས་སློབ་དཔོན་གྱི་གསུང་ངག་ཡི་གེར་བཀོད་པས་གཤིན་རྗེ་གཤེད་འབྱུང་བ་དང་ཞི་ཁྲོ་རྣམ་རོལ་སོགས་ལཱི་ལ་བཛྲ་ཆེན་པོས་མཛད་པར་བྱེད་དོ། །ལྭ་ཝ་པ་དང་། ལཱ་ལི་བཛྲ་དང་། ཨིཎྜ་བྷུ་ཏི་རྣམས་ཀྱིས་ཆོ་འཕྲུལ་འགྲན་པའི་ལོ་རྒྱུས་ཡོད་ཀྱང་མ་བྲིས། རྣལ་འབྱོར་གྱི་དབང་ཕྱུག་བི་རུ་པ་ནི་གཤིན་རྗེ་གཤེད་ཉིད་དང་མི་གཉིས་པ་ཡིན་པས་གཤེད་དམར་གྱི་རྒྱུད་སྤྱན་དྲངས་ཤིང་། སྒྲུབ་ཐབས་དང་མན་ངག་ཡི་གེར་བཀོད། དེའི་སློབ་མ་ཌོོཾ་བྷི་ཧེ་རུ་ཀས། ཀུ་རུ་ཀུ་ལེའི་རྟོགས་པ་དང་ཨ་ར་ལི་གཉིས་སྤྱན་དྲངས། རྒྱུད་དོན་མངོན་ཤེས་ཀྱིས་མཁྱེན་ཅིང་། ཡེ་ཤེས་ཀྱི་མཁའ་འགྲོ་མ་རྣམས་དང་བཀའ་བགྲོས་པ་ལས་དགྱེས་རྡོར་གྱི་རྒྱུད་ཀྱི་སྙིང་པོ་བླངས་ནས། བདག་མེད་མའི་སྒྲུབ་ཐབས་དང་ལྷན་ཅིག་སྐྱེས་སྒྲུབ་ལ་སོགས་པ་གཞུང་དུ་མ་མཛད་ཅིང་སློབ་མ་ལ་དབང་བསྐུར་རོ། །དེ་ནས་སློབ་དཔོན་ལྭ་ཝ་པ་དང་མཚོ་སྐྱེས་རྡོ་རྗེ་གཉིས་ཀྱིས་དགྱེས་རྡོར་གྱི་རྒྱུད་སྤྱན་དྲངས་ནས་བསྟན་བཅོས་མཛད་པས་སྒྲུབ་ཐབས་མཚོ་སྐྱེས་རྡོ་རྗེ་ཞེས་གྲགས་སོ། །ཆོས་ཀྱི་གྲགས་པ་སྐུ་འདས་ཙམ་ན། རྒྱལ་པོ་བྷརྠཱ་རི་དང་གོ་བི་ཙནྡྲ་བྱུང་། རྒྱལ་པོ་དེ་གཉིས་གྲུབ་ཐོབ་ཛ་ལནྡྷ་རི་པ་དང་། སློབ་དཔོན་ནག་པོ་སྤྱོད་པས་བཏུལ་ནས་གྲུབ་པ་ཐོབ་ཚུལ་འདུག་གོ། དེ་སྐབས་ཐགས་མཁན་གྱི་བྱ་བས་འཚོ་བའི་གྲུབ་ཐོབ་ཏནྟི་པ་ཡང་བྱུང་། ཡུལ་པ་རྣམས་མ་མོ་མཆོད་པའི་ཕྱིར་ར་སྐྱེས་སྟོང་ཕྲག་མང་པོ་གསོད་པར་བརྩམས་པ་ན། སློབ་དཔོན་དེས་ར་རྣམས་ལ་སྔགས་བཟླས་པས། ཐམས་ཅད་ཀྱང་ལྕེ་སྤྱང་གི་གཟུགས་སུ་གྱུར། མ་མོས་གཟུགས་བསྟན་པར། མངར་གསུམ་གྱི་མཆོད་པས་ཚིམ་པར་བགོས་པས་ད་ལྟའི་བར་དུ་ཡང་དེ་ལྟར་བྱེད་དོ། །དེ་རྗེས་གྲུབ་ཐོབ་རྒྱལ་པོ་ལྷན་སྐྱེས་རོལ་པ་དང་། སློབ་དཔོན་དུལ་བ་ལྷ་བྱུང་། དེས་ཚད་མ་སྡེ་བདུན་ལ་འགྲེལ་པ་བྱས། མདོ་སྡེ་འཛིན་པ་ཤུ་བྷ་མི་རྟ་དང་། ཚུལ་ཁྲིམས་བསྐྱངས་དང་། ཤནྟི་སོ་མ་ལ་སོགས་བྱུང་། རྣམ་རིག་གི་གྲུབ་མཐའ་རྩ་བར་བཟུང་། མདོ་སྡེ་དང་འདུལ་བ་ཡང་དར་བར་བྱས་སོ། །
སློབ་དཔོན་ཡེ་ཤེས་སྙིང་པོ།
༈ སློབ་དཔོན་དཔལ་སྦས་རང་གི་ལོ་རྒྱུས་ཞིབ་པ་མ་མཐོང་ཡང་དེའི་སློབ་མ་སློབ་དཔོན་ཡེ་ཤེས་སྙིང་པོ་ནི། ལེགས་ལྡན་གྱི་སྲོལ་འཛིན་དབུ་མ་པ་ཆེན་པོར་གྲགས་པ་ཡིན་ཏེ། སྤྱན་རས་གཟིགས་བསྒྲུབས་ནས་ཡིད་བཞིན་ནོར་བུའི་འཁོར་ལོས་སྒྱུར་བ་ཞལ་གཟིགས། མངོན་ཤེས་དང་ལྡན་པ་ཞིག་བྱུང་། མདོ་སྡེ་དུ་མ་ཐུགས་ནས་འདོན་པ་མུ་སྟེགས་རྣམས་ཕམ་པར་མཛད་པ་ཡིན་ནོ། །
དགེ་བསྙེནབཙུན་པ་ངོ་བོ་ཉིད་མེད་པ།
༈ དགེ་བསྙེནབཙུན་པ་ངོ་བོ་ཉིད་མེད་པ་ནི། ཐེག་པ་ཆེན་པོར་རིགས་སད་ཅིང་འཇམ་དཔལ་གྱིས་ཞལ་གཟིགས། མདོ་སྡེ་ལྔ་བཅུ་ཙམ་ཐུགས་ནས་འདོན་པ། འཁོར་དགེ་བསྙེན་སྟོང་ཕྲག་དང་བཅས་པ། འཁོར་རྣམས་ལ་དུག་སྦྲུལ་གྱི་གནོད་པ་བྱུང་བ་སྒྲོལ་མའི་རིག་སྔགས་ཀྱིས་མེ་ཏོག་གཏོར་བས་ཁོང་དུ་མིད་པ་རྣམས་ཀྱང་ཕྱིར་ཕྱུང་སྟེ་ཐམས་ཅད་བདེ་བར་གྲོལ་ལོ། །དུས་སྐབས་འདི་ཙམ་ན་དུས་དབང་གིས་མཁས་པ་ཉུང་བ་དང་། མུ་སྟེགས་ཀྱི་རྒོལ་བ་ལྷག་པར་མང་བས། ནང་པའི་རྒོལ་བ་རྣམས་སེམས་འཚབ་འཚབ་མོར་གནས་པ་གཅིག་ཡོད་པ་ན། པཎྜི་ཏ་བི་ཧ་ར་ཞེས་བྱ་བ་ཞིག་ཡོད་པ་དེས། ནངས་པར་རྒོལ་བའི་མུ་སྟེགས་མང་པོ་དང་རྩོད་པར་ཁས་བླངས་ཀྱང་། ཐུབ་བམ་མི་ཐུབ་བམ་སྙམ་པའི་ཐེ་ཚོམ་མེ་ཡོད་པ་ལས། བུད་མེད་རྒན་མོ་ཞིག་བྱུང་ནས། ཚེར་མ་ལྟ་བུའི་ཅོད་པན་མགོ་བོར་གྱོན་ཏེ་རྩོད་ཅིག་རྒྱལ་བར་འགྱུར་རོ་ཟེར་དེ་བཞིན་བྱས་པས། དེར་རྒྱལ་ཞིང་། གཞན་དུ་ཡང་རྒྱལ་བ་བྱུང་ནས། དེ་ཕྱིན་ཆད་ནས་པཎྜི་ཏ་རྣམས་ཞྭ་རྩེ་རིང་གྱོན་པ་རིམ་གྱིས་དར་རོ། །དེ་ནས་ལི་ཁ་ར་ཤིང་འཕེལ་གྱི་ནགས་ཚལ་དང་ཉེ་བ་ཞིག་ན། རྒྱལ་རིགས་ཀྱི་བུ་མོ་གཟུགས་བྱད་ལེགས་པ་ཞིག་ཤིང་གི་ལྷ་དང་འདུས་པ་ལས། ནམ་ཞིག་ན་ཁྱེའུ་མཚན་དང་ལྡན་པ་ཞིག་བཙས། ཆེར་གྱུར་ནས་ལྷ་མོ་ཙནྡྲ་ལིའི་སྒོམ་ལུགས་ཞུས་ཏེ་སྒྲུབ་པས་རྨི་ལམ་དུ་ཞལ་བསྟན་ཏེ། རྒྱལ་སྲིད་ཐོབ་པར་གསོལ་བ་བཏབ་པས། ཁྱོད་ཤར་ཕྱོགས་སུ་སོང་ཞིག་དང་ཐོབ་པར་འགྱུར་རོ་ཞེས་ལུང་བསྟན་ཏེ། དེའི་ཚེ་བྷངྒ་ལའི་ཡུལ་དུ་རྒྱལ་པོ་མེད་པར་མང་ཞིག་སོང་། ཡུལ་མི་རྣམས་སྡུག་བསྔལ་བར་གྱུར་བས། གཙོ་བོ་རྣམས་འདུས། གྲོས་བྱས་ཏེ། རྒྱལ་པོ་ཞིག་བསྐོས་པ་ལས། དེ་ན་ཀླུ་མོ་མཐུ་ཆེ་བ་གདུག་རྩུབ་ཅན་ཞིག་ཡོད་པ་དེས་བསྐོས་པའི་ནུབ་མོ་ཟོས་སོ། །དེར་རེས་ཀྱིས་བསྐོས་ཀྱིན་སྔ་དྲོ་བསྐོས་པ་དེ་ནུབ་ཟོས་པས་སྐྱ་རེངས་ཤར་བ་ཙམ་ན་ཕུང་པོ་འདོན་ནོ། །ལྷ་མོ་ཙནྡྲ་གྲུབ་པ་དེ་ཁྱིམ་ཞིག་ཏུ་ཕྱིན་པ་དེ་རྣམས་སྡུག་བསྔལ་གྱིས་ནོན་པ་ལ། རྒྱུ་མཚན་དྲིས་པས། ནངས་པར་དེའི་བུ་ལ་རྒྱལ་པོ་རེས་བབས་ཟེར། གླ་བྱིན་ན་ངས་ཚབ་བྱའོ་བྱས་པས་ཤིན་ཏུ་དགའ་སྟེ། གླ་ཡང་བླངས། ནངས་པར་རྒྱལ་སར་བསྐོས། དེའི་ནམ་ཕྱེད་ན་ཀླུ་མོ་དེ་སྲིན་མོའི་གཟུགས་སུ་བསྒྱུར་སྔར་བཞིན་ཟ་བར་འོངས་པ་ལ། ཡི་དམ་གྱི་ཕྱག་མཚན་བསྣུན་པས་ཀླུ་མོ་རང་ཤིའོ། །ཐོ་རངས་ཕུང་པོ་འབྱིན་མཁན་རྣམས་བྱུང་བ་ལ། མ་ཤི་བར་མཐོང་ནས་ཐམས་ཅད་ཡ་མཚན་དུ་གྱུར་ནས་རྒྱལ་སྲིད་ལ་བསྐོས་ཏེ། སྐུ་ཚེའི་སྟོད་ལ་བྷངྒ་ལར་དབང་བསྒྱུར། སྨད་ལ་བྷངྒ་པ་དབང་དུ་བསྡུས་ཏེ། ཨོ་ཏནྟ་པུ་རི་དང་ཉེ་བར་ནཱ་ལེན་དྲ་ཞེས་བྱ་བའི་གཙུག་ལག་ཁང་ཞིག་ཀྱང་བཞེངས། ཡུལ་དེ་ཉིད་དུ་དགེ་འདུན་གྱི་སྡེ་མང་དུ་བཙུགས་ནས་བསྟན་པ་མཆོད་པར་བྱས་སོ། །རྒྱལ་སྲིད་ལོ་ཞེ་ལྔ་བྱས། རྒྱལ་པོ་འདིའི་རིང་ལ་ཞི་བ་འོད་དང་། བསོད་ནམས་གྲགས་ཀྱི་སློབ་མ་ཤཱཀྱ་འོད་ཀྱི་ཁ་ཆེའི་ཡུལ་དུ་འགྲོ་དོན་མཛད། དེའི་ཡུལ་དུ་དྷ་ན་ཤི་ལ་ཆེན་པོ་དང་། ཁྱད་པར་བཤེས་གཉེན་དང་། ཤེས་རབ་གོ་ཆ་དང་། འདུལ་འཛིན་སློབ་དཔོན་དཔའ་བོ་རྣམས་བྱུང་། ཤར་ཕྱོགས་སུ་སློབ་དཔོན་ཡེ་ཤེས་སྙིང་པོ་ཡོད་ཐོགསངས་རྒྱས་ཡེ་ཤེས་ཞབས། ཡེ་ཤེས་སྙིང་པོ། ཞི་བ་འཚོ་རྣམས་ཀྱིས་དབུ་མའི་ལུགས་སྲོལ་འཛིན། དེ་རྗེས་ནུབ་ཕྱོགས་གཙྪའི་ཡུལ་དུ་བི་བྷ་རཊྚ་ཞེས་བྱ་བའི་རྒྱལ་པོ་བྱུང་། དེའི་དུས་སུ་བི་རུ་པ་ཆུང་བ་བྱུང་། རྒྱལ་པོ་དེ་ནང་པ་ལ་མོས་ཀྱང་བློན་པོ་རྣམས་ཕྱི་པ་ལ་མོས་པས། དེར་ལྷ་ཁང་ཕྱི་ནང་གཉིས་ཀའི་ལྷའི་རྡོ་སྐུ་མི་ཚད་ཙམ་མང་པོ་བཞེངས། ཕྱི་ནང་གི་ལྷ་ཁང་ཐ་དད་བྱེད་བྱས་པས་བློན་པོ་རྣམས་ཀྱིས་གཅིག་ཏུ་བཀོད་དེ། དེར་རབ་གནས་ལ་མཁས་པ་གཅིག་དགོས་པར་གཞན་མེད། ནང་པའི་དགེ་བསྙེན་ཞིག་ལ་ཡོན་ཏན་དེ་འདུག་པ་མཐོང་སྟེ། དེས་གྱིས་བྱས་པ། མུ་སྟེགས་པའི་སྒྲུབ་གཡོག་མི་བྱེད་ཟེར། དེ་ན་རེ། ཁྱོད་མུ་སྟེགས་པ་ལ་སྐྱབས་སུ་འགྲོ་ནི་མི་དགོས་ལོངས་སྤྱོད་མི་ཟད་པ་འབྱུང་བས་ཆོས་དར་བ་བྱས་ཆོག་མོད་ཟེར། འོ་ན་སློབ་དཔོན་ལ་ཞུས་ནས་འོང་གི་བྱས་ནས། ཞུས་པས་གནང་སྟེ་དེའི་སྒྲུབ་གཡོག་བྱས། རོ་ལངས་ལྕེ་ཕྱིར་གཡུག་པ་ལན་གསུམ་བྱེད། དང་པོ་ཟིན་ན་དངོས་གྲུབ་ཆེན་པོ། གཉིས་པ་འབྲིང་། གསུམ་པ་ལ་ཆུང་ངུ་འགྲུབ། ལན་གསུམ་པ་ལ་མ་ཟིན་ན། དང་པོར་འོ་སྐོལ་གཉིས་ཟ། དེ་ནས་ཡུལ་ཁམས་ཐམས་ཅད་སྟོངས་པ་ཙམ་དུ་འགྲོ་ཟེར། དགེ་བསྙེན་དེས་དང་པོ་གཉིས་ལ་མ་ཟིན། དེ་ནས་རོ་ལངས་དང་ཁ་སྤྲད་དེ་བསྡད་པས། གསུམ་པ་ལ་སོ་བཏབ་པས་ཟིན། དེ་ནས་ལྕེ་རལ་གྲིར་གྱུར། ལུས་གསེར་དུ་སོང་ངོ་། །དགེ་བསྙེན་གྱིས་རལ་གྲི་ཐོགས་ཏེ་བསྐོར་བས་ནམ་མཁའ་ལ་འཕགས་པ་ན། མུ་སྟེགས་པ་ན་རེ། ངས་རལ་གྲིའི་དོན་དུ་བསྒྲུབ་པ་ཡིན་པས་རལ་གྲི་ང་ལ་གཏོད་ཟེར། ངས་ལྟད་མོ་ཞིག་བལྟས་ལ་འོང་གི་བྱས་ནས་རི་རབ་གྱི་རྩེ་མོར་ཕྱིན། གླིང་བཞི་གླིང་ཕྲན་དང་བཅས་པ་ཡུད་ཀྱིས་བསྐོར་ནས། རལ་གྲི་ཁོ་རང་ལ་གཏད་པས། ལུས་གསེར་དུ་སོང་བ་འདི་ཁྱོད་རང་གྱིས། རུས་པ་ལ་མ་ཐུག་པར་ཤའི་ཐད་ནས་ཆོད། ཆང་རིན་དང་སྨད་ཚོང་མའི་དོན་སོགས་ལོག་པ་ལ་མ་སོང་བ་གྱིས། རང་འཚོ་བ་དང་དགེ་བའི་ལས་ལ་སྤྱད་ན་དེ་རིང་བཅད་པའི་ཤུལ་དོ་ནུབ་གང་སྟེ་ཟད་མི་ཤེས་པ་ཡིན་ནོ་ཟེར། ཁོ་རང་རལ་གྲི་ཐོགས་ནས་ལྷ་ཡུལ་དུ་སོང་ངོ་། །དགེ་བསྙེན་དེས་རོ་ལངས་ཀྱི་གསེར་ལ་བརྟེན་ནས། ཨོ་ཏནྟ་པུ་རིའི་གཙུག་ལག་ཁང་བཞེངས། ཨོ་ཏནྟ་འཕུར་བྱེད་ཀྱི་དོན་ཡིན་ལ། ནམ་མཁར་ཕྱིན་ནས་རི་རབ་གླིང་བཞི་དངོས་སུ་མཐོང་བའི་བཀོད་པ་ལྟར་བཞེངས། དེ་བཞེངས་པའི་རྒྱུ་དང་དེར་གཉུག་མར་གནས་པའི་དགེ་སློང་ལྔ་བརྒྱ་དང་། དགེ་བསྙེན་ལྔ་བརྒྱའི་འཚོ་བའང་སྦྱར། རང་མ་ཤིའི་བར་ཁོ་རང་གིས་ཆོས་གཞི་བཏེགའདའ་བའི་ཚེ་གསེར་ལྷག་མ་མ་འོངས་པའི་སེམས་ཅན་གྱི་དོན་དུ་གཏེར་དུ་སྦས། ཆོས་གཞི་རྒྱ་ཆེན་པོ་དེ་ཝ་པཱ་ལར་གཏད་པར་གྲགས། དེ་ཀླུའི་བུ་ཡིན་པར་གྲགས་ཏེ། རྒྱལ་པོ་འདིའི་ཡབ་རྒྱལ་པོ་གཽ་པཱ་ལ་ཡིན་ལ། དེའི་བཙུན་མོས་བྲམ་ཟེ་རིག་སྔགས་གྲུབ་པ་ཞིག་ལ་རྒྱལ་པོ་དབང་དུ་བྱེད་པའི་རིག་སྔགས་ཞུས་པས། སྨན་ལ་སྔགས་བཏབ་ཁ་ཟས་དང་སྦྱར་རྒྱས་བཏབ་རྒྱལ་པོ་ལ་དྲོངས་ཤིག་བྱས་ནས་བྲན་མོ་ལ་བསྐུར་བས་རྫས་ཆུ་ལ་ལྷུངས་ཆུས་ཁྱེར་ཏེ་ཀླུའི་གནས་སུ་སླེབས་པ་ན། ཀླུའི་རྒྱལ་པོ་རྒྱ་མཚོ་སྐྱོང་ཞེས་བྱ་བས་ཟོས་པས། དེ་དབང་དུ་གྱུར་ཏེ། རྒྱལ་པོའི་གཟུགས་ཀྱིས་འོངས་ནས་བཙུན་མོ་དང་འཕྲད་སྦྲུམ་པར་གྱུར་པས་ནམ་ཞིག་ཁྱེའུ་བཙས་ཏེ་ལྷ་མཆོད་པའི་ཚེ་སྦྲུལ་མགོ་རོང་གིས་བྱུང་བས། ཀླུའི་རྒྱལ་པོའི་བུར་ཤེས་ནས་སྐྱེད་བསྲིངས། རྒྱལ་པོ་གཽ་པཱ་ལ་འདས་ནས་རྒྱལ་པོ་དེ་ཝ་པཱ་ལ་དེས་སྲིད་བྱས། གོང་མ་ལས་ཀྱང་མངའ་ཐང་ཆེ་སྟེ། ཤར་ཕྱོགས་ཝ་རེནྡྲ་མངའ་འོག་ཏུ་འདུས། གཙུག་ལག་ཁང་ཁྱད་འཕགས་ཤིག་རྩིག་པར་བཞེད་ནས་སོ་མ་པུ་རི་བཞེངས། འདི་ལ་བོད་ཀྱི་ལོ་རྒྱུས་ཕལ་ཆེ་ན་ཆོས་སྐྱོང་ལ་མར་མེ་ཕུལ་ནས་གསོལ་བ་བཏབ་ཀོང་བུ་གང་དུ་ཁྱེར་བ་དེར་རྩིག་གོ་སྙམ་པ་ན་ཆོས་སྐྱོང་གི་སྤྲུལ་པ་བྱ་རོག་ཅིག་བྱུང་ནས་ཀོང་བུ་མཚོར་བསྐྱུར་བས་ཡིད་ཆད་པ་ན་ཀླུའི་རྒྱལ་པོ་སྦྲུལ་མགོ་ལྔ་པ་བྱུང་ཏེ་ང་ཁྱོད་ཀྱི་ཕ་ཡིན་མཚོ་བསྐམས་ནས་རྩིག་པར་གཞུག་གོ་བྱས་པ་ལྟར་མཚོ་བསྐམས་པའི་ཤུལ་དུ་བརྩིག་ཟེར་བ། དེ་ནི་ཁ་ཆེའི་ཡུལ་གྱི་རྒྱ་མཚོ་སྦས་པའི་གཙུག་ལག་ཁང་བཞེངས་པའི་ལོ་རྒྱུས་འདིར་སྦྱར་བར་ཟད་དོ་ཞེས་ཇོ་ནང་རྗེ་བཙུན་ཏ་ར་ནཱ་ཐས་གསུང་། རྒྱལ་པོ་འདིས་མུ་སྟེགས་རྣམས་ཕམ་པར་བྱ་བའི་ཆེད་དུ་དམག་བསྡུས་ནས་གནས་པ་ན་ནག་པོ་ཆེན་པོས་བྱེ་མའི་ཕུང་པོ་འདི་བསལ་བའི་འོག་ན་མུ་སྟེགས་ཀྱི་ལྷ་ཁང་ཡོད་དེ་འཇིག་པར་འདོད་ན་མཐའ་དམག་གིས་སྐོར་ལ་རོལ་མོ་གྱིས་ཤིག་ཟེར། དེ་ལྟར་བྱས་པས། བྱེ་མའི་ཕུང་པོའི་འོག་ནས་རྡོའི་ལྷ་ཁང་ངོ་མཚར་ཅན་ཞིག་ཐོན། དཔལ་ཚ་གསུམ་གྱི་གཙུག་ལག་ཁང་དུ་མིང་བཏགས་སོ། །ལོ་རྒྱུས་ཁ་ཅིག་ན། དེ་ལྟར་བྱས་པས་བྱེ་མའི་འོག་ནས་ཉན་ཐོས་འགོག་པའང་བྱུང་ཆོ་འཕྲུལ་བསྟན་ནས་མྱ་ངན་ལས་འདས། མུ་སྟེགས་ཀྱི་གཙུག་ལག་ཁང་དང་གནས་གཞི་བཞི་བཅུ་ཙམ་རང་ཞིག་པར་སོང་ངོ་ཟེར་བར་ཡང་སྣང་། རྒྱལ་པོ་འདིའི་རིང་ལ་ནག་པོ་སྤྱོད་པ་ཆུང་བ་བྱའོ། །དེས་ནི་བདེ་མཆོག་བསྒོམ་པས་མཁའ་འགྲོ་མས་ལུང་བསྟན་ནས། ཀཱ་མ་རུའི་ལྷ་མོའི་གནས་ན་དངོས་གྲུབ་ཀྱིས་རྫས་ཡོད་ལོངས་ཤིག་ཟེར། དེར་ཕྱིན་པས་ཟ་མ་ཏོག་ཅིག་རྙེད། ཁ་ཕྱེ་བས་ཌཱ་མ་རུ་དྲ་བ་ཅན་ཞིག་བྱུང་། དེ་ལག་ཏུ་ཐོགས་པ་ཙམ་གྱིས་རྐང་པ་ས་ལ་མི་རེག་ཅིང་། དྲག་ཏུ་དཀྲོལ་ན་གྲུབ་པའི་རྣལ་འབྱོར་ཕོ་མོ་ལྔ་བརྒྱ་ཙམ་གང་ནས་ཆ་མེད་པར་འོངས་ནས་དེའི་འཁོར་བྱེད་པ་བྱུང་སྟེ་ཡུན་རིང་པོར་འགྲོ་དོན་མཛད་དོ། །འདི་སྐབས་སློབ་དཔོན་ཤཱཀྱ་འོད་ཀྱི་སློབ་མ་ཤཱཀྱ་བཤེས་གཉེན་དང་། དཥྚཾ་སྱ་ན་སྟེ་མཆེ་བའི་སྡེ་དང་། ཡེ་ཤེས་ཟླ་བ་དང་། རྡོ་རྗེ་མཚོན་ཆ་དང་། འཇམ་དཔལ་གྲགས་པ་དང་། ཡེ་ཤེས་བྱིན་དང་། ལྷོ་ཕྱོགས་ཀྱི་རྒྱུད་དུ་བཙུན་པ་སྤྱན་རས་གཟིགས་བརྟུལ་ཞུགས་གྲུབ་པ་རྣམས་དང་། སློབ་དཔོན་སེང་གེ་བཟང་པོ་ཡང་རྒྱལ་པོ་འདིའི་དུས་པཎྜི་ཏར་གྱུར། དེ་ནས་རྒྱལ་པོ་ཏཱ་པ་པཱ་ལས་རྒྱལ་སྲིད་ལོ་བཅུ་གཉིས་བྱ་སྐབས། ཨོ་རྒྱན་གྱི་སློབ་དཔོན་སྒེག་པ་རྡོ་རྗེ་དཔལ་ན་ལེནྡྲར་ལོ་བཅུའི་བར་དུ་བཞུགས།
སློབ་དཔོན་སྒེག་རྡོར།
༈ དེ་ལ་སློབ་དཔོན་སྒེག་རྡོར་ནི། ཨོ་རྒྱན་གྱི་གནས་སུ་རབ་ཏུ་བྱུང་ཞིང་གྲུབ་མཐའ་རྣམ་རིག་དབུ་མ་པ། རིག་པའི་གནས་ཐམས་ཅད་ལ་མཁས་པའི་མཐར་ཕྱིན། ཨོ་རྒྱན་གྱི་གླིང་ཕྲན་མ་དྷཱི་མ་ཞེས་བྱ་བར་འཇམ་དཔལ་གྱི་སྒྲུབ་པ་མཛད་པས་བྲིས་སྐུའི་ཞལ་ལས་འོད་ཟེར་ཆེན་པོ་བྱུང་སྟེ་གླིང་དེ་ཡུན་རིང་དུ་སྣང་བར་བྱས། དུས་དེར་ལོག་པར་ལྟ་བ་འགའ་ཞིག་ལ་ནང་པའི་པཎྜི་ཏའི་དབང་པོ་ལྔ་སྒྲུབ་རྫས་ལ་དགོས་པ་བྱུང་། སློབ་དཔོན་བཀྲོང་དུ་འོངས་པས་གླང་པོ་དང་རྟ་དང་བུ་མོ་ཁྱེའུ་སོགས་སྣ་ཚོགས་ཀྱི་གཟུགས་སུ་བསྒྱུར་བས་ངོ་མ་ཤེས་པར་ཕྱིར་ལོག་པས། སྣ་ཚོགས་གཟུགས་ཅན་ཞེས་པའི་མཚན་གསོལ། དེ་ལ་སོགས་ཏེ་ངོ་མཚར་བའི་མཛད་པ་མཐའ་ཡས། མཐར་འཇའ་ལུས་རྡོ་རྗེའི་སྐུ་བརྙེས་སོ། །དེའི་རྗེས་རྒྱལ་པོ་དྷརྨ་པཱ་ལས་རྒྱལ་སྲིད་ལོ་དྲུག་ཅུ་རྩ་བཞི་བྱས་སྐབས་སུ། ཡེ་ཤེས་ཞབས་བླ་མར་བསྟེན། གསང་འདུས་དང་ཕར་ཕྱིན་ཤེས་པ་པཎྜི་ཏ་ཀུན་གྱི་གྲལ་མགོར་འཇོག་པ་སོགས་དེ་གཉིས་ལ་གུས་པ་ཆེར་མཛད། རྒྱལ་པོ་འདིས་སྤྱིར་ཆོས་གཞི་ལྔ་བཅུ་ཙམ་བཙུགས་པ་ལས། ཤེར་ཕྱིན་འཆད་པའི་ཆོས་གཞི་སུམ་ཅུ་སོ་ལྔ་ཡོད། དཔལ་བི་ཀྲ་མ་ལ་ཤྲཱི་ལའི་གཙུག་ལག་ཁང་བཞེངས་ཏེ། དེ་ཡང་མ་ག་དྷའི་བྱང་ངོས་ཆུ་བོ་གངྒའི་འགྲམ་རི་དེའུ་ཞིག་གི་རྩེ་ལ་ཡོད་ཅིང་དབུས་སུ་བྱང་ཆུབ་ཆེན་པོའི་སྐུ་ཚད་ཀྱི་ལྷ་ཁང་། མཐའ་སྐོར་དུ་གསང་སྔགས་ནང་གི་ལྷ་ཁང་ཆུང་བ་ལྔ་བཅུ་ང་གསུམ། ལྷ་ཁང་དཀྱུས་མ་ལྔ་བཅུ་ང་བཞི་སྟེ་ལྷ་ཁང་བརྒྱ་རྩ་བརྒྱད་ཡོད་པ་ཕྱི་ལྕགས་རིས་བསྐོར་བ་བཞེངས། པཎྜི་ཏ་བརྒྱ་རྩ་བརྒྱད། གཏོར་མའི་སློབ་དཔོན། རབ་གནས་སློབ་དཔོན། སྦྱིན་བསྲེག་སློབ་དཔོན། བྱི་བ་བསྲུང་བ། ཕུག་རོན་བསྲུང་བ་དང་། ལྷ་འབངས་ཀྱི་གཉེར་བྱེད་པ་བརྒྱ་དང་བཅུ་བཞི་ལ་ཟས་གོས་འཚོ་བའི་ཁྱད་པར་འགྲན་དུ་མེད་པར་སྦྱར། ཟླ་དུས་སུ་ཆོས་ཉན་པ་པོ་དང་བཅས་པ་ཐམས་ཅད་ལ་རྟག་རེས་འཁོར་གྱི་སྟོན་མོ་དང་འབུལ་བ་བཟང་པོ་རེ་ཡང་མཛད། རགས་རྩིས་ཙམ་དུ་བྱས་ན་རྒྱལ་པོ་འདི་དང་བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་དུས་མཉམ་དུ་བཤད། འདིའི་དུས་སུ་སངས་རྒྱས་གསང་བ་དང་། སངས་རྒྱས་ཞི་བ་དང་། ཁ་ཆེའི་ཡུལ་དུ་སློབ་དཔོན་པདྨ་འབྱུང་གནས་དབྱངས་དང་། རྟོག་གེ་པ་ཆོས་འབྱུང་བྱིན་དང་། འདུལ་འཛིན་སེང་གེའི་གདོང་པ་ཅན་སོགས་བྱུང་།
སློབ་དཔོན་སེང་གེ་བཟང་པོ།
༈ དེ་ལ་སློབ་དཔོན་སེང་གེ་བཟང་པོ་ནི་རྒྱལ་པོའི་རིགས་ལས་རབ་ཏུ་བྱུང་བ། གཞུང་ལུགས་ལ་མཁྱེན་པ་རྒྱས་ཤིང་། སློབ་དཔོན་ཞི་བ་འཚོ་ལ་དབུ་མ་དང་། མཁན་པོ་རྣམ་སྣང་མཛད་ལ་ཤེར་ཕྱིན་གསན། རྒྱལ་བ་མ་ཕམ་པ་སྒྲུབ་པས་མནལ་ལམ་དུ་ཞལ་བསྟན་ནས། ཤེར་ཕྱིན་གྱི་དོན་འགྲེལ་བར་བྱེད་པའི་བསྟན་བཅོས་གྲུབ་མཐའ་མི་གཅིག་པ་མང་ནས། སུའི་རྗེས་སུ་འབྲང་ཞུས་པས་འཐད་པའི་ཆ་བསྡུས་ཤིག་ཅེས་བཀའི་གནང་བ་ཐོབ། རྒྱལ་པོ་དྷརྨ་པཱ་ལས་སྤྱན་དྲངས་ནས་ཚ་བ་གསུམ་གྱི་གཙུག་ལག་ཁང་དུ་བཞུགས་ཏེ་ཤེར་ཕྱིན་ཉན་པ་སྟོང་ཕྲག་མང་པོ་ལ་ཆོས་སྟོན་ཅིང་བརྒྱད་སྟོང་འགྲེལ་ཆེན་སོགས་བསྟན་བཅོས་མང་དུ་མཛད་པ་སོགས་འགྲོ་ཕན་རྒྱ་ཆེ་བར་གྲགས།
སློབ་དཔོན་རྒྱ་མཚོའི་སྤྲིན།
༈ སློབ་དཔོན་རྒྱ་མཚོའི་སྤྲིན་ནི། རྒྱལ་བ་མ་ཕམ་པས་ཞལ་གཟིགས་ནས་ས་སྡེ་ལྔ་ལ་འགྲེལ་པ་མཛད་པར་ཡང་གྲགས་ཤིང་བྱང་སའི་འགྲེལ་པ་ནི་གྲགས་ཆེའོ། །
པདྨ་འབྱུང་གནས་དབྱངས།
༈ པདྨ་འབྱུང་གནས་དབྱངས་ནི་ལོ་དྲི་མཁན་པོ་ཡིན་ནམ་སེམས།
སངས་རྒྱས་ཡེ་ཤེས་ཞབས།
༈ སངས་རྒྱས་ཡེ་ཤེས་ཞབས་ནི། སེང་བཟང་གི་སློབ་མའི་ཐོག་མ་ཡིན། མི་རིང་བར་གྲུབ་པ་ཐོབ། རྒྱལ་པོའི་བླ་མར་གྱུར། སློབ་དཔོན་འདི་ལ་ནུབ་རེ་བཞིན་ཛམ་བྷ་ལས་གསེར་པཱ་ན་བདུན་བརྒྱ་རེ་དང་ནོར་རྒྱུན་མས་མུ་ཏིག་དོ་ཤལ་སུམ་བརྒྱ་རེ་འབུལ་ཞིང་། ལྷའི་མཐུས་དེ་དག་ཉོ་བ་ཡང་ཕྱི་དེ་ཉིན་ཁོ་ནར་འབྱུང་ལ། དེ་ཐམས་ཅད་དགེ་བའི་ལས་མི་ཟད་པར་མཛད་ནས་ཚུལ་དེས་དུས་འདའ་བར་མཛད་དེ། དཔལ་གསང་བ་འདུས་པ་ལྷ་བཅུ་དགུ་ལ་མར་མེ་ཤིང་རྟའི་འཕང་ལོ་ཙམ་བདུན་བདུན། བྱང་སེམས་བརྒྱད་དང་ཁྲོ་བོ་དྲུག་ལ་གསུམ་གསུམ། ཕྱོགས་སྐྱོང་ཆེན་པོ་བཅོ་ལྔ་ལ་གཏོར་མ་མི་གཉིས་ཀྱི་འཁྱོགས་ཀྱིས་འདེགས་པ་བཅོ་ལྔ་རེ་སྟར་མ་ཆག་པ་འབུལ་ཞིང་། ཆོས་ཉན་པའི་སློབ་མ་དང་། རབ་ཏུ་བྱུང་བ་དང་། སློང་མོ་བ་ལ་སོགས་པ་ཐམས་ཅད་སྦྱིན་པས་ཚིམ་པར་མཛད་པར་གྲགས། སློབ་དཔོན་འདིས་ཀྲྀ་ཡོག་གསུམ་དང་། འདུས་པ་མདོ། སྒྱུ་འཕྲུལ། མཉམ་སྦྱོར། ཟླ་གསང་ཐིག་ལེ། འཇམ་དཔལ་ཁྲོས་པ་སྟེ་ནང་གི་རྒྱུད་སྡེ་ཡང་མང་དུ་གསུངས། ཁྱད་པར་གསང་བ་འདུས་པ་རྩལ་བཏོན་དུ་དར་བར་མཛད་དོ། །
རྒྱལ་རིགས་སྒྲ་གཅན་འཛིན་བཟང་པོ།
༈ རྒྱལ་རིགས་སྒྲ་གཅན་འཛིན་བཟང་པོ་ནི། རིག་གནས་ལ་སྦྱངས་པས་པཎྚི་ཏའི་གནས་ཐོབ། སངས་རྒྱས་ཡེ་ཤེས་ཀྱིས་དབང་བསྐུར་ཞིང་བྱིན་གྱིས་བརླབས། གསང་བ་འདུས་པའི་སྒྲུབ་པ་མཛད་པས། དེ་བཞིན་གཤེགས་པ་ལྔའི་ཞལ་གཟིགས། གསང་བའི་བདག་པོ་དངོས་སུ་འགྲུབ། འཛམ་བུའི་གླིང་དུ་འགྲོ་དོན་ཆེར་མ་མཛད། འགྲོ་ལྡིང་གི་ཡུལ་དུ་བྱོན་ནས་གསང་སྔགས་ཀྱི་རྒྱུད་སྡེ་མང་དུ་གསུངས་ཤིང་། ཀླུ་རྣམས་འདུལ་བར་བཞེད་ནས་རྒྱ་མཚོའི་འགྲམ་དུ་བྱོན་ཏེ་ད་ལྟའང་བཞུགས་པར་གྲགས།
སློབ་དཔོན་སངས་རྒྱས་གསང་བ།
༈ སློབ་དཔོན་སངས་རྒྱས་གསང་བ་ནི། སངས་རྒྱས་ཡེ་ཤེས་ཞབས་ཀྱི་སློབ་མ་ཡིན། ཝ་ར་ཎ་སིར་འཇམ་དཔལ་སྒྲུབ་པས་ནམ་ཞིག་ན་བྲིས་སྐུ་བཞད། དངོས་གྲུབ་ཀྱི་རྫས་བ་དམར་སེར་གྱི་མར་ཡང་ཁོལ། མེ་ཏོག་རྙིང་པ་རྣམས་ཁ་འབུས་པས་དངོས་གྲུབ་ཀྱི་ལྟས་སུ་མཁྱེན་ཀྱང་། ཐོག་མར་མེ་ཏོག་འབུལ་ལམ་མར་ཁུ་འཐུང་སྙམ་ཐེ་ཚོམ་དུ་ཅུང་ཟད་ལུས་པ། གནོད་སྦྱིན་མོ་ཞིག་གིས་གེགས་བྱས་ཏེ། སློབ་དཔོན་གྱི་འགྲམ་པར་ཐལ་ལྕག་བརྒྱབ་པས་སློབ་དཔོན་ཅུང་ཟད་བརྒྱལ། བརྒྱལ་བ་སངས་ཙམ་ན་བྲིས་སྐུ་རྡུལ་གྱིས་གོས། མེ་ཏོག་རྙིང་། མར་ཁུ་ཡང་བོ། འོན་ཀྱང་རྡུལ་ཕྱིས། མེ་ཏོག་དབུ་ལ་ཕུལ། མར་ཁུ་གང་ཡོད་འཐུངས་པས་སྐུ་ལུས་ནད་ཐམས་ཅད་དང་བྲལ་ཞིང་། སྟོབས་དང་ལྡན་པ། བློ་གྲོས་རྣོ་བ། མངོན་ཤེས་དང་ལྡན་པ་བྱུང་། སངས་རྒྱས་ཞི་བས་རྫས་དང་བྲིས་སྐུ་སོགས་གང་གིས་ཀྱང་སྤྲོས་པ་མེད་པར་སྒོམ་པས་ཀྱང་སངས་རྒྱས་གསང་བ་དང་ཡོན་ཏན་མཚུངས་པ་ཐོབ། སློབ་དཔོན་དེ་གཉིས་རི་བོ་ཏ་ལར་བྱོན། རིའི་རྩ་བར་འཕགས་མ་སྒྲོལ་མ་ཀླུའི་ཚོགས་ལ་ཆོས་སྟོན་པར་བཞུགས་པ་རྒན་མོ་བ་གླང་གི་ཁྱུ་ཆེན་པོ་འཚོ་བར་མཐོང་། རི་སྐེད་ན་ཁྲོ་གཉེར་ཅན་མ་ལྷ་མིན་དང་གནོད་སྦྱིན་གྱི་ཚོགས་ལ་ཆོས་སྟོན་པ་བུ་མོ་ར་ལུག་འཚོ་བར་གཟིགས། རིའི་རྩེར་བྱོན་པས་སྤྱན་རས་གཟིགས་ཀྱི་སྐུ་རྡོ་སྐུ་ལས་མ་གཟིགས། སངས་རྒྱས་ཞི་བས་རང་ལས་སྣང་མ་དག་པ་ཡིན། གནས་འདི་ན་ཕལ་པ་ག་ལ་ཡོད་སྙམ་ཡིད་ཆེས་ཆེན་པོ་བྱས་ནས་གསོལ་བ་བཏབ་པས་ཐུན་མོང་གི་དངོས་གྲུབ་མངོན་ཤེས་སོགས་དང་མཆོག་གི་དངོས་གྲུབ་གནས་ལུགས་ནམ་མཁའ་དང་མཉམ་པའི་དོན་རྟོགས་པ་གཅིག་བྱུང་། སངས་རྒྱས་གསང་བ་ཡིད་མ་ཆེས་བཞིན་དུ་གསོལ་བ་བཏབ་པས། ཞབས་ས་ལ་མ་རེག་པར་འགྲོ་བ་ཙམ་གྱི་དངོས་གྲུབ་ཐོབ། དེར་རྒན་མོ་དེས། ཁྱོད་རང་རི་ཁ་བ་ཅན་གྱི་གངས་ཏི་སེར་སོང་ལ་སྒྲུབ་པ་གྱིས་ཞེས་ལུང་བསྟན་པ་བཞིན་བྱོན་ནས། ཏི་སེར་སྒྲུབ་པ་མཛད་པས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོས་ཡང་ནས་ཡང་དུ་ཞལ་གཟིགས་ཤིང་། འཕགས་པ་འཇམ་དཔལ་དང་མི་ལབ་པ་བཞིན་དུ་བྱུང་། དེའི་ཚེ་བོད་ཀྱི་བཙན་པོ་ཁྲི་སྲོང་ལྡེའུ་བཙན་གྱིས་དབས་མཉྫུ་ཤྲཱི་ལ་སོགས་པ་སྤྱན་འདྲེན་དུ་བཏང་ཡང་འཇམ་དཔལ་གྱིས་བཀའ་མ་གནང་བས་མ་བྱོན། དེར་ཀྲི་ཡོག་སྡེ་གསུམ་གྱི་བཤད་པ། རྡོ་རྗེ་དབྱིངས་ཀྱི་སྒྲུབ་ཐབས་ཡོ་ག་ལ་འཇུག་པ། རྣམ་སྣང་མངོན་བྱང་གི་བསྡུས་འགྲེལ། བསམ་གཏན་ཕྱི་མའི་རྒྱས་འགྲེལ་ལ་སོགས་པ་བསྟན་བཅོས་མང་དུ་མཛད་དོ། །དེ་རྗེས་རྟོག་གེ་པ་ཆོས་མཆོག་དང་། དྷརྨ་མི་ཏྲ་དང་། དྷརྨ་ཀ་ར་ལ་སོགས་པ་བྱུང་། འདི་ཙམ་ན་རགས་རྩིས་སུ་བྱས་ན་བོད་ན་བཙད་པོ་ཁྲི་རལ་སྐུ་འདས་པ་ཙམ་གྱི་དུས་ཡིན་པར་བཤད། དེ་རྗེས་གྲུབ་ཐོབ་ཏི་ལི་པ་དང་སློབ་དཔོན་ཀུན་དགའ་སྙིང་པོ་ཡང་བྱུང་། དེ་རྗེས་ཤེས་རབ་འབྱུང་གནས་སྦས་པ། ཡོ་ག་ལྕགས་ཀྱུ་པདྨ། ཛེ་ཏ་རི། ནག་པོ་དམ་ཚིག་རྡོ་རྗེ། སློབ་དཔོན་ཐ་ག་པ་ལ་སོགས་པ་བྱུང་བར་གྲགས། དེ་ནས་བྲམ་ཟེ་ཡེ་ཤེས་ཞབས་དང་ནག་པོ་སྤྱོད་པ་ཆུང་བ་ཡང་བྱུང་། འདི་ཙམ་ན་བོད་ན་བསྟན་པ་ཕྱི་དར་གྱི་མགོ་བརྩམ་པ་རགས་རྩིས་བྱས་ན་མཉམ་པར་བཤད།
མཁས་པ་སྒོ་དྲུག
༈ དེ་ནས་མཁས་པ་སྒོ་དྲུག་བྱུང་བ་བི་ཀྲ་མ་ལའི་གཙུག་ལག་ཁང་ན་བཞུགས་པ་སྟེ། ཤར་ན་ཤནྟི་པ། ལྷོ་ན་ངག་གི་དབང་ཕྱུག་གྲགས་པ། ནུབ་ན་ཤེར་འབྱུང་བློ་གྲོས། བྱང་ན་ནཱ་རོ་པཎ་ཆེན། དབུས་ན་རིན་ཆེན་རྡོ་རྗེ་དང་། ཛྙཱ་ན་ཤྲི་རྣམས་ལས། ཤནྟི་པའི་ལོ་རྒྱུས་མ་མཐོང་།
ལྷོ་སྒོ་བ་ངག་གི་དབང་ཕྱུག་གྲགས་པ།
༈ ངག་གི་དབང་ཕྱུག་གྲགས་པ་ནི་དགེ་འདུན་ཕལ་ཆེན་པ་ཡིན་ཅིང་། སྒྲ་ཚད་དང་གཞུང་ལུགས་དུ་མ་མཁྱེན་ཅིང་། ངག་གི་དབང་ཕྱུག་གི་དངོས་གྲུབ་བསྒྲུབ་ན་འགྲུབ་བམ་མི་འགྲུབ་སྙམ་བརྟགས་པ་མཛད་པས་འགྲུབ་པར་མཁྱེན་ནས་གངྒའི་འགྲམ་དུ་བསྒྲུབས་པས། ཤིང་ཀ་ར་ཝི་རིའི་མེ་ཏོག་དམར་པོ་སྒྲ་དང་འོད་འབྱིན་པ་དེ་གངྒ་ལ་འཕངས། དཔག་ཚད་མང་པོར་ཡུད་ཀྱིས་ཁྱེར་ནས། སླར་ཡང་གྱེན་དུ་ལྡོག་པས་དེ་ཉིད་ཆུ་དང་བཅས་པ་གསོལ་བས་ངག་གི་དབང་ཕྱུག་ཆེན་པོ་གྲུབ་སྟེ། ཉིན་རེར་ཚིགས་བཅད་སྟོང་ཕྲག་རེའི་གཞུང་གི་ཚིག་དོན་མཁྱེན་པར་ནུས་པའི་བློ་གྲོས་བྱུང་བས་ངག་གི་དབང་ཕྱུག་ཅེས་མཚན་གསོལ། འཆད་རྩོད་རྩོམ་གསུམ་དང་མདོ་སྔགས་རིག་གནས་མཐའ་དག་ཕུལ་དུ་ཕྱིན། ཁྱད་པར་འཕགས་མ་སྒྲོལ་མས་ཞལ་བསྟན་ནས་ཐེ་ཚོམ་གཅོད་པ་བྱུང་། མུ་སྟེགས་ཚར་གཅོད་པ་ཞེས་པའི་གྲགས་པས་ཁྱབ་པས། རྒྱལ་པོས་སྤྱན་དྲངས་ནས་ན་ལེནྡྲ་དང་བི་ཀྲ་མ་ལ་ཤྲཱི་ལའི་ལྷོ་སྒོ་བསྲུང་བར་བསྐོས། ཆོས་ཀྱི་ཕྲིན་ལས་དང་རྫུ་འཕྲུལ་གྱི་མཛད་པ་མཐའ་ཡས་སོ། །
ནུབ་སྒོ་སྲུང་བ་པོ་ཤེས་རབ་འབྱུང་གནས་བློ་གྲོས།
༈ ནུབ་སྒོ་སྲུང་བ་པོ་ཤེས་རབ་འབྱུང་གནས་བློ་གྲོས་ནི། རིག་པའི་གནས་ཐམས་ཅད་ལ་མཁས་ཤིང་འཇམ་དཔལ་གྱིས་ཞལ་གཟིགས་པས། མུ་སྟེགས་དང་རྩོད་པའི་ཚེ་འཇམ་དཔལ་ཡིད་ལ་དྲན་ཞིང་གསོལ་བ་བཏབ་པ་ཙམ་གྱིས་མུ་སྟེགས་ཀྱི་རྩོད་པ་ཇི་ལྟར་ཟེར་བ་དང་། དེའི་ལན་འདེབས་ཚུལ་གཉིས་ཆར་ཐུགས་ལ་ཤར་ནས་རྩོད་པ་ངེས་པར་རྒྱལ་བ་ཞིག་ཡོད་པར་གྲགས་སོ། །ཤེར་འབྱུང་བློ་གྲོས་དང་ཤེར་འབྱུང་སྦས་པ་གཉིས་གཅིག་པར་འདོད་པའི་འཁྲུལ་པ་ཡང་འདི་ནི་རྟེན་དགེ་སློང་ཡིན་ལ། ཤེར་འབྱུང་སྦས་པ་ནི་དགེ་བསྙེན་ནོ། །
བྱང་སྒོ་སྲུང་བ་ནཱ་རོ་པ།
༈ བྱང་སྒོ་སྲུང་བ་ནཱ་རོ་པ་ནི། རྫུ་འཕྲུལ་ཟླ་དང་བྲལ། སློབ་མ་ནི་རྩོད་དུས་ཀྱི་ཐམས་ཅད་མཁྱེན་པ་ཤནྟི་པས་ཆོས་གསན་དབང་ལུང་སོགས་རྗེས་སུ་གདམས་པ་ཤིན་ཏུ་མང་བར་གནང་དངོས་གྲུབ་ཀྱང་བརྙེས། སྐབས་ཤིག་ན་ནཱ་རོ་པས་ཐོད་པ་གཅིག་བསྣམས་ཏེ། སྐྱེ་བོ་ཀུན་ལ་སློང་བ་ལྟར་མཛད་པ་ལ། ཆོམ་པོ་གཅིག་གིས་ཐོད་པའི་ནང་དུ་གྲི་ཆུང་གཅིག་བསྐྱུར། ནཱ་རོ་པས་ལྟ་སྟངས་མཛད་པས་མར་ཞུ་བ་ལྟར་སྟེམས་ཀྱིས་ཞུ་ནས་གསོལ་ཏེ་སོང་། བཞི་མདོ་ན་གླང་ཆེན་ཤི་བའི་རོར་གྲོང་འཇུག་མཛད་དེ་དུར་ཁྲོད་དུ་བསྐྱལ་ཏེ་ཁོ་བོ་རྣལ་འབྱོར་པ་ཡིན་པའི་རྟགས་དེ་ལྟར་ཡིན། མཁས་པ་ཆེན་པོ་ཡང་རྟགས་སྟོན་པར་མི་སྤྲོའམ་ཞེས་ཤནྟི་པ་ལ་གནང་བས། བདག་ལྟ་བུས་ཅི་འཚལ་ཏེ། འོན་ཀྱང་ཁྱོད་ལྟ་བུས་སྣང་ན་བྱའོ་གསུང་། ཆུའི་བུམ་པ་ཐོགས་པ་འགའ་སླེབས་བྱུང་བར་ཆུ་ལ་སྔགས་རེ་བཏབ་པས་ཐམས་ཅད་གསེར་ཞུན་མར་སོང་། དེར་དགེ་འདུན་རྣམས་དང་བྲམ་ཟེ་རྣམས་ལ་བྱིན་པར་གྲགས་སོ། །དེ་ནས་ནཱ་རོ་པས་བྱང་སྒོ་བསྲུང་བ་ལོ་འགའ་ཞིག་མཛད་ནས་རྣལ་འབྱོར་ལ་གཤེགས་སོ། །དེ་རྗེས་དེའི་ཚབ་གནས་བརྟན་བྱང་བཟང་གིས་མཛད། དེ་ནི་སྤྱན་རས་གཟིགས་འགྲུབ་ནས་ཞལ་གཟིགས་ཏེ་ཆོས་དངོས་སུ་གསན་པ་གཅིག་གོ།
དབུས་ཀྱི་ཀ་ཆེན་དང་པོ་བྲམ་ཟེ་རིན་ཆེན་རྡོ་རྗེ།
༈ དབུས་ཀྱི་ཀ་ཆེན་དང་པོ་བྲམ་ཟེ་རིན་ཆེན་རྡོ་རྗེ་ནི། སྔོན་ཁ་ཆེའི་ཡུལ་དུ་བྲམ་ཟེ་ཞིག་གིས་ལྷ་དབང་ཕྱུག་སྒྲུབ་པས་ཁྱོད་ཀྱི་རིགས་རྒྱུད་ལ་མཁས་པ་གྲགས་ལྡན་ཤ་སྟག་འབྱུང་ངོ་ཞེས་ལུང་བསྟན་ཐོབ་པ་ལྟར་ལོ་གྲངས་ཉི་ཤུ་རྩ་བཞིའི་བར་དུ་མུ་སྟེགས་ཀྱི་གྲུབ་མཐའ་ལ་མཁས་པར་གྱུར། རྩ་ལྔ་པར་དེས་སངས་རྒྱས་པ་དང་བསྟན་པ་དཔང་དུ་བཙུགས་ཏེ་བརྩད་པས་ཕམ་སྟེ་ནང་པ་ལ་ཞུགས། ཆོས་ཀྱང་མཁས་པར་མཁྱེན་པའི་པཎྚི་ཏར་གྱུར། དེའི་སྲས་རིན་ཆེན་རྡོ་རྗེ་འདི་ཡིན་ཅིང་། ཆུང་ངུ་ནས་མདོ་སྔགས་རིག་གནས་ཐམས་ཅད་ལ་མཁས་པར་གྱུར། སྡེ་བདུན་དང་བྱམས་ཆོས་སྡེ་ལྔ་ལ་འཆད་ཉན་གཙོ་བོར་མཛད། མུ་སྟེགས་མང་པོ་ཞིག་རྩོད་པས་སུན་ཕྱུང་ནས་སངས་རྒྱས་ཀྱི་བསྟན་པ་ལ་བཙུད། སྐུ་ཚེའི་སྨད་ཨོ་རྒྱན་གྱི་ཡུལ་དུ་བྱོན་ནས་དབང་ཕྱུག་གི་ཞལ་མཐོང་བའི་མུ་སྟེགས་པ་ཞིག་ཡོད་པ་རྩོད་པས་ཕམ་པར་བྱས་ཏེ་ནང་པའི་བསྟན་པ་ལ་བཙུད། ཕྱིས་དངོས་གྲུབ་ཀྱང་ཐོབ་སྟེ་བོད་དུ་བྱོན་པའི་ཨཱ་ཙརྱ་དམར་པོར་གྲགས་པ་དེ་ཡིན།
དབུས་ཀྱི་ཀ་ཆེན་གཉིས་པ་ཛྙཱ་ན་ཤྲཱི་མི་ཏྲ།
༈ དབུས་ཀྱི་ཀ་ཆེན་གཉིས་པ་ཛྙཱ་ན་ཤྲཱི་མི་ཏྲ་ནི་མཐའ་གཉིས་སེལ་བའི་བསྟན་བཅོས་མཛད་མཁན་དེ་ཡིན། དཔལ་ཨ་ཏི་ཤའི་སྐུ་དྲིན་ཆེ་བའི་བླ་མ་གཅིག་ཡིན། ཀླུ་སྒྲུབ་དང་ཐོགས་མེད་ཀྱི་གཞུང་ལ་མཁས་པར་སྦྱངས། ཁྱད་པར་མདོ་རྒྱུད་ཀྱི་གསན་རྒྱ་ཤིན་ཏུ་ཆེ། རྟག་ཏུ་བྱང་ཆུབ་ཀྱི་སེམས་ལ་གོམས་པས་ཤཱཀྱའི་རྒྱལ་པོ་དང་། བྱམས་པ་དང་། སྤྱན་རས་གཟིགས་ཀྱིས་ཡང་ཡང་ཞལ་གཟིགས། མངོན་ཤེས་ཐོགས་མེད་མངའ། ལན་གཅིག་བི་ཀྲ་མ་ལར་བཞུགས་སྐབས་སློབ་མ་དགེ་ཚུལ་ཞིག་ཡོད་པ་དེར་བྱང་ཆུབ་ཆེན་པོ་བཞུགས་པའི་གནྡྷོ་ལ་ལ་མེའི་གནོད་པ་འོང་བ་འདུག་པས་ཁྱོད་མྱུར་བར་སོང་ལ་ཉི་མ་གུང་ལ་ག་ཡའི་གྲོང་དུ་སླེབས་པ་གྱིས། དེར་རྡོ་རྗེ་གདན་གྱི་དགེ་འདུན་དང་དཀོན་གཉེར་རྣམས་བྲམ་ཟེ་ཞིག་གི་དུས་སྟོན་ལ་བོས་ནས་ཡོད་པར་དེ་རྣམས་ཁྲིད་ལ་མེ་རྣོལ་ཞིག་གསུང་། དེས་དེར་ཕྱིན་ནས་ཁོ་བོའི་སློབ་དཔོན་གྱིས་ལུང་བསྟན་པ་ཡིན་པས་འབྱོན་པར་བཞེངས་ཞེས་གསོལ་བས། ཕྱེད་ཙམ་ཡིད་མ་ཆེས་པར་བསྡད། ལྷག་མ་ཕྱེད་ཙམ་དང་བཅས་རྡོ་རྗེའི་གདན་དུ་སོང་བས་རྡོ་རྗེ་གདན་གྱི་གནྡྷོ་ལ་ལ་མེ་ཤོར་ཏེ། ཕྱི་ནང་ཀུན་ཏུ་འབར་གྱིན་འདུགདེར་ལྷ་ལ་གསོལ་བ་འདེབས་ཀྱིན་མེ་བསད་པས་ལྷ་ཁང་ཞིག་པ་ཆེར་མ་བྱུང་། རི་མོ་:གཟུགས་༼ཟུབ༽་པ་དང་ཤིང་ཚིག་པ་རྣམས་སློབ་དཔོན་གྱིས་གསོས་པ་སོགས་ངོ་མཚར་བའི་མཛད་པ་མཐའ་ཡས་སོ། །མཁས་པ་སྒོ་དྲུག་འདས་པའི་འོག་ཏུ། ཇོ་བོ་རྗེ་དཔལ་ལྡན་ཨ་ཏི་ཤ་མཁན་པོར་སྤྱན་དྲངས། འདིས་ཨོ་ཏནྟ་པུ་རི་ཡང་བསྐྱངས། དེ་ནས་མངའ་བདག་མེ་ཏྲིའི་ཕྲིན་ལས་ཡང་དར་བ་ཡིན།
སློབ་དཔོན་ཨ་བྷ་ཡ་ཀ་ར་སོགས།
༈ དེ་ནས་ལོ་མང་ཞིག་སོང་བ་དང་སློབ་དཔོན་ཨ་བྷ་ཡ་ཀ་ར་དང་། ཁ་ཆེའི་ཡུལ་དུ་པཎྚི་ཏ་ཆེན་པོ་ཤཱཀྱ་ཤྲི་བྷ་དྲ་དང་། ཆོས་འབྱུང་ཞི་བ་དང་། བུདྡྷ་ཤྲི་དང་། བཛྲ་ཤྲི་ལ་སོགས་པའི་པཎ་གྲུབ་རྣམས་དང་། ཨ་བྷ་ཡ་ཀ་ར་དང་། ནཱ་རོ་པའི་སློབ་རྒྱུད་ལ་སོགས་པ་རྣམས་ཀྱིས་བསྟན་པ་བསྐྱངས་བར་མཛད་དོ། །དེ་ནས་ལོ་མང་ཙམ་སོང་བ་ན་མུ་སྟེགས་པ་འཕེལ་ཆེ་ཞིང་སྟག་གཟིག་དང་ཀླ་ཀློའི་གྲུབ་མཐའ་འཛིན་པ་ཡང་མང་དུ་བྱུང་བས་རྡོ་རྗེ་གདན་དུ་ཐེག་ཆེན་གྱི་གྲྭ་མ་ཚུགས། ཨོ་ཏནྟ་པུ་རི་དང་བི་ཀྲ་མ་ལ་ཤྲི་ལར་ཡང་རྒྱལ་པོས་རྫོང་གི་རྣམ་པ་ཅུང་ཟད་བྱས་ཏེ་དམག་གིས་བསྲུང་བ་བྱུང་། དེ་ནས་ལོ་འགའ་ཞིག་འདས་པ་ན་གངྒ་དང་ཡ་མུ་ནའི་བར་གྱི་ཡུལ་ཨནྟར་བྷི་དིའི་ཡུལ་དུ་རུཥྐའི་རྒྱལ་པོ་ཟླ་བ་ཞེས་བྱ་བ་བྱུང་། དགེ་སློང་འགའ་རེས་རྒྱལ་པོའི་ཕོ་ཉ་བྱས་པས་རྐྱེན་བླངས་ཏེ། ཡུལ་གཞན་དང་གཞན་ན་གནས་པའི་རྒྱལ་ཕྲན་མང་པོ་ཕྱོགས་གཅིག་ཏུ་བསྡུས་ཏེ། མ་ག་དྷའི་ཡུལ་ཐམས་ཅད་བཅོམ་ཨོ་ཏནྟ་པུ་རིའི་རབ་ཏུ་བྱུང་བ་མང་པོ་ཞིག་བསད། དེ་དང་བི་ཀྲ་མ་ལ་གཉིས་ཀ་བཤིགཤུལ་དུ་སྟག་གཟིག་གིས་རྫོང་བཅས། པཎྜི་ཏ་ཤཱཀྱ་ཤྲི་ཤར་ཕྱོགས་སུ་བྱོན། དེར་ལོ་གསུམ་བཞུགས་ནས་བོད་དུ་བྱོན་པ་ཡིན། པཎ་ཆུང་བརྒྱ་ཙམ་ནུབ་ཕྱོགས་ཀྱི་ཡུལ་དུ་བྱོན། སྟོབས་བཅུ་མངའ་བའི་སློབ་དཔོན་བཛྲ་ཤྲི་དང་པཎ་ཆུང་མང་པོ་ལྷོ་ཕྱོགས་ཐག་རིང་པོའི་སར་བྲོས། མ་ག་དྷར་བསྟན་པ་ནུབ་པ་ལྟར་གྱུར་ཏོ། །དེ་སྐབས་གྲུབ་པ་ཐོབ་པ་དང་། རྫུ་འཕྲུལ་སྟོན་ནུས་པ་མང་ཞིག་ཡོད་ཀྱང་། སེམས་ཅན་སྤྱི་མཐུན་གྱི་ལས་ལ་བཟློག་ཐབས་མ་བྱུང་བར་གྲགས། དེ་རྗེས་བྷཾ་ག་ལའི་ཡུལ་དུ་ཙ་ག་ལ་ར་ཙ་ཞེས་བྱ་བ་ཤུགས་ཆེན་པོ་གཅིག་བྱུང་། དེས་ཏུ་རུཥྐ་ཐམས་ཅད་ལ་དབང་བསྒྱུར། དེ་དང་པོ་བྲམ་ཟེ་ལ་དད་པ་ཞིག་ཡིན་ཡང་། བཙུན་མོ་སངས་རྒྱས་ལ་དད་པས་བློ་བསྒྱུར་ཏེ། དེས་རྡོ་རྗེ་གདན་དུ་མཆོད་པ་ཆེན་པོ་བྱས། ལྷ་ཁང་ཐམས་ཅད་ལ་ཞིག་གསོས་དང་། གནྡྷོ་ཆེན་པོ་དགུ་ཐོག་ཡོད་པའི་ཐོག་བཞི་བར་སྐབས་ཏུ་རུཀྵས་བཤིག་པ་ལེགས་པར་གསོས། པཎྜི་ཏ་ཤ་རི་པུ་ཏྲ་བཞུགས་ཏེ་ཆོས་གཞི་བཙུགས། ན་ལེནྡྲར་ཡང་མཆོད་པ་ཆེན་པོ་བྱས། འོན་ཀྱང་ཆོས་གཞི་རྒྱ་ཆེན་པོ་ནི་མ་ཚུགས། རྒྱལ་པོ་འདི་ཚེ་རིང་པོ་བྱུང་བར་གྲགས། འདི་འདས་ནས་ལོ་བརྒྱ་དང་དྲུག་ཅུ་ཙམ་སོང་བ་ནས་མ་གྷ་དྷའི་ཡུལ་དུ་ཆོས་ལ་སྤྱོད་པ་མ་བྱུང་བར་གྲགས་སོ། །ཆོས་འབྱུང་བསྟན་པའི་ཉི་མ་ལས། རྒྱ་གར་འཕགས་པའི་ཡུལ་གྱི་སྐབས་ཏེ་དང་པོའོ།། །།