དགུང་ལོ་ཞེ་བཞི་པ་མུ་མཐུད།

ས་སྦྲུལ་ཧོར་ཟླ་གསུམ་པའི་ཚེས་གསུམ་ནས་བཟུང་གོང་ཞབས་ཡས་ཕྱིན་གྱི་སྐུ་ཚེའི་སྒྲུབ་པ་ཞག་བཅུའི་བར་སྐུ་མཚམས་ཀྱི་ཁོངས་དེ་ཉིད་དུ་མཛད། དེ་དུས་ཚེས་བཞིའི་ནུབ་ཞབས་དྲུང་གདུང་བརྒྱུད་རིན་པོ་ཆེའི་ཡུམ་ལ་སྐུ་ཆགས་ཤིན་ཏུ་བདོ་བ་བཟློག་ཏུ་མེད་པའི་མནལ་ལྟས་འཚུབ་པ་བྱུང་གསུང་། ཚེས་བཅུ་གསུམ་གྱི་སྔ་དྲོ་གཟའ་སྐར་དགེ་བ་ལ་སྐུ་བཅད་རྒྱའི་ནང་མཚམས་བཀྲོལ་ཏེ་གདུང་བརྒྱུད་རིན་པོ་ཆེ་ལྗགས་ཀློག་སྦྱོང་བའི་སྐར་འཛིན་ཙམ་གནང་ཞིང་། དེ་ཉིན་ ཆུ་བཟང ་ནས་ཡུམ་དྲུང་སྐུ་མཆེད་ཀྱི་ཁ་བཏགས་ཆེ་བ་དགུ། གོས་དར་ཡུག་བཅུ་གསུམ། ཇ་མར་སོགས་འབུལ་མི་འབྱོར་བ་ལྟར་སྐུ་རྐྱང་གིས་བདེ་གཤེགས་ཀུན་འདུས་ཀྱི་སྒོ་ནས་ཚེ་སྒྲུབ་མཛད་ཅིང་། གྲྭ་པ་བདུན་གྱིས་ཡང་སྙིང་ཀུན་འདུས་དང་། གསུམ་གྱིས་བདུད་རྩི་བུམ་ཆུང་གི་ཚེ་སྒྲུབ་བགྱིད་དུ་སྩལ་ནས་ལོ་གཉིས་གསུམ་ཚུན་སྐུ་མཆེད་གཉིས་ཀའི་སྐུ་ཚེ་ལ་བར་ཆད་མི་འབྱུང་བའི་ལུང་བསྟན་དང་བཅས་གནས་ཚུལ་འབུལ་མི་བརྫངས། ས་སྐྱ་ནས་ལྷ་གཟིགས་ལྕམ་གྱི་མགུལ་བསྲུང་ཞུ་མི་དང་། གླིང་ནས་ཕྱག་མཛོད་ནང་སོ་སོགས་མཇལ་མི་ངོ་ཆེན་འགའ་ཞིག་ལ་བུག་སྒོ་ནས་མཇལ་ཁ་དང་བྱིན་རླབས་སོགས་ཀྱིས་རེ་བ་ཆོས་བཞིན་དུ་སྐོང་བར་མཛད། གོང་དུ་ཚེ་རྫས་འབུལ་མི་ཆེད་དུ་གནང་བའང་འཁོར་ཏེ་ཡས་ཕྱིན་གཉིས་ཀ་ནས་ཤིན་ཏུ་མཉེས་པའི་བཀའ་ཤོག་དང་། ན་བཟའ་ཆ་ཚང་། བཟང་ཇ་གོས་དར་སོགས་གནང་སྦྱིན་ཕུན་སུམ་ཚོགས་པ་འབྱོར། ཨེ་པའི་ཡིག་མཁན་རྣམས་ཀྱིས་བཀའ་འགྱུར་བཞེངས་པའི་ལས་འཕྲོ་དང་། ཞོ་ར་བ་རྣམས་ཀྱིས་བསི་ཐང་གྲུ་བཞི་མའི་བྲིས་བཀོད་ཇི་ལྟ་བའི་ཐུབ་ཆེན་གནས་བརྟན་བཅུ་དྲུག་དང་བཅས་པའི་ཐང་སྐུ་གྲ་ཚར་ཉི་ཤུ་རྩ་གཅིག་བཞེངས་པའི་སྐྱ་རིས་ཚུགས་པའི་ཞལ་བཀོད་མཛད། ས་ག་ཟླ་བའི་ཚེས་གཅིག་གི་སྔ་དྲོ་སྐུ་ཞང་ཚེ་དབང་མི་འགྱུར་རབ་བརྟན་གྱིས་སྟན་དཀར་དྲི་མ་མེད་པ་རྡོ་རྗེའི་རེ་ཁཱ་ཅན་དང་། འབུལ་བའི་དངོས་པོ་བཟང་ཞིང་རྒྱ་ཆེ་བ། འདུས་ཚོགས་སུ་མང་ཇ་སྦྱོར་སྦྲེལ་ཐོག་ཕྱག་འགྱེད་དང་། གཟིམས་ཆུང་འགག་ཏུའང་གསོལ་འདེབས་པའི་གྲྭ་པ་བཅུ་ལ་འགྱེད་འཕར་མ་དང་བཅས་ཏེ་ཞབས་བརྟན་ཕུལ། ཚེས་ལྔའི་ཉིན་རེས་གཟའ་འོད་དཀར་ཅན་རྒྱལ་གྱི་དགའ་མ་དང་བརྩེ་བའི་དུས་སྦྱོར་དགེ་བར། སྔར་སྙིང་པོའི་རྒྱུད་འདོན་པ་ཉི་ཤུ་སྐོར་ཙམ་ཡོད་པ་ལ་བདེ་འདུས་རྩ་རྒྱུད་དང་། དེ་ཕྱིན་གྱི་གྲྭ་པ་རགས་རིམ་ཕལ་ཆེ་བར་སྒྱུ་འཕྲུལ་རྩ་རྒྱུད་དེ་རྒྱུད་སྡེ་དང་སྒྲུབ་སྡེ་གཉིས་ཀྱི་རྩ་བར་གྱུར་པའི་བླ་ན་མེད་པའི་རྒྱུད་ཆེན་གཉིས་པོ་སོ་སོའི་འདོད་ཐབས་ཀྱི་མན་ངག་དང་བཅས་ཏེ་ཟླ་བ་ངོ་རེ་བཞིན་གྱི་དུས་བཟང་གསུམ་ལ་སྟར་ཆགས་སུ་འདོན་པའི་རྒྱུན་ཚུགས་པར་ཇ་དར་ཚན་གྲངས་ཀྱི་འགྱེད་དཔངས་གཏོད་པ་སྩལ། ཆོས་འཁོར་ཡང་རྩེའི་དགེ་སློང་སྤོང་བ་ལ་བློ་མཆོག་ཏུ་གཞོལ་བ་གསུམ་ལ་ཐུགས་ཐིག་གི་དབང་ཁྲིད་གནང་། ཐན་པ་ཆེས་པས་ཞིང་པ་ཀུན་མྱ་ངན་གྱིས་གདུངས་པ་ལ་སྙིང་རྗེའི་སྟོབས་ཆེན་པོས་ཐུགས་དྲངས་ཏེ་ཉི་ཤུའི་སྔ་དྲོ་ལྷ་སྲིན་དམ་འདོགས་མཛད་པས་དེ་འཕྲལ་འཇམ་ཆར་ཅུང་ཟད་ཙམ་དང་། དེ་ནས་མུ་མཐུད་དེ་ཆར་ཤིན་ཏུ་གཤིམ་པ་བབས། ཟླ་མཇུག་ནས་རྒྱ་ཧོར་གྱི་གོས་བཟང་པོའི་རྒྱུ་ལས་གུ་རུ་མཚན་བརྒྱད་ཀྱི་ཡོལ་ཐང་བཞེངས་པའི་དྲ་ཚེམ་དང་། ཨེ་པ་དབུ་མཛད་དཔལ་འཛིན་སོགས་ཀྱིས་མ་མགོན་ལྕམ་དྲལ་གསུམ་གྱི་འཆམས་སྐུ་བཞེངས་པའིི་བཟོ་གྲྭ་འཛུགས་པར་མཛད། ཟླ་བ་ལྔ་པའི་ནང་དུ་བོ་དོང་མངའ་བདག་བྲག་པ། ཆོས་འཁོར་ཡང་རྩེའི་དགེ་སློང་གསུམ། ཁམས་པ་ཀུན་བཟང་རིག་འཛིན་སོགས་ལ་གུར་དྲག་དང་རྡོར་སེམས་ཀྱི་དབང་ལུང་། བཀའ་འབུམ་གྲས་ནས་ཨོ་རྒྱན་གསོལ་འདེབས། དྲག་པོ་སྡེ་ལྔའི་བསྐང་གསོ། བསང་མཆོད་ལ་སོགས་པའི་ལུང་ཕྲན་མང་པོ་དང་། གྲྭ་ཚང་ཆེན་མོའི་གྲྭ་པ་ངག་དབང་དཔལ་མགོན་ལ་རྒྱ་ཅན་གྱི་ཕྱག་རྡོར་དྲེགས་འདུལ་གྱི་དབང་དང་དམིགས་རིམ་གྱི་ཁྲིད། དམག་ཟོར་མའི་མདོས་ཆོག་གི་ལུང་རྣམས་མཛད་ཅིང་། སྤ་ལུང་སྤྲུལ་སྐུའི་ཞབས་བརྟན་འབུལ་མི་དང་།  ཆུ་བཟང ་ནས་ཡུམ་དྲུང་སྐུ་མཆེད་ཀྱིས་འཚམས་དྲིའི་ཞུ་འཕྲིན་གོས་དར་གྱི་འབུལ་བ་གྱ་ནོམ་པ། སྟག་རྩེ་ཞབས་དྲུང་མ་ཆེན་གཤེགས་པའི་བསྔོ་རྟེན་དཔངས་གཏོད་པ་བཅས་འབྱོར་བར་གང་ལ་གང་འཚམས་ཀྱི་བཞེད་པ་ཆོས་བཞིན་སྐོང་བར་མཛད། ཧོར་ཟླ་དྲུག་པའི་ཚེས་བཞིའི་ནུབ་གདུང་བརྒྱུད་རིན་པོ་ཆེའི་ཡུམ་ལ་བར་ཆད་ཀྱི་དབང་དུ་ཐལ་བའི་མཚན་ལྟས་ཤིན་ཏུ་ངན་པ་དང་། སང་ནུབ་དེ་ཡང་ད་རེས་བཅོས་སུ་མེད་པ་དང་སླད་ཀྱི་དོན་སྒྲུབ་པ་ལ་སོགས་པའི་མནལ་ལམ་འཚུབ་ཅིང་མཚར་བ་བྱུང་། ཚེས་བདུན་བརྒྱད་ཙམ་ནས་ཞབས་དྲུང་གདུང་བརྒྱུད་རིན་པོ་ཆེ་ཅུང་ཟད་སྐུ་ཁམས་མ་བདེ་བ་ལ་སྤྱོད་ལམ་ལོག་པས་གཉན་ཚད་ཀྱི་སྙུང་གཞི་ཐུ་མོར་སོང་སྟེ། ད་རང་ཞལ་མི་འཚོ་བ་འདྲ་སྙམ་དུ་ཐམས་ཅད་སེམས་ཁོང་དུ་ཆུད་པ་ན། རྗེ་རིན་པོ་ཆེའི་ཞལ་ནས། ནད་བབས་ལྕི་ཡང་སྐྱོན་པའི་ངེས་པ་མེད་པས་རིམ་གྲོ་ལ་འབད་རྩོལ་ཐོན་ཅིག་པའི་ཞལ་ཏ་ཕེབས་པ་ལྟར་གྲྭ་ཕྱི་ནང་གི་དགོན་སྡེ་ཆེ་ཕྲ་ཐམས་ཅད་ལ་མང་ཇ་དང་། དར་གླིང་དང་འདི་གའི་མགོན་ཁང་སྟེང་ཤོད་དུ་སྲུང་མ་རྣམས་ཀྱི་བསྐང་བཤགས་ཀྱི་རྒྱུན། གྲྭ་ཚང་འདུས་ཚོགས་ཀྱིས་བཀའ་འགྱུར་གསུང་སྒྲོག་དང་ཡང་བཟློག་གི་སྔགས་རྒྱུན། བདག་གིས་ཁྲོས་ནག་གི་མེ་མཆོད་སྟོང་ཚར། བདེ་གཤེགས་ཀུན་འདུས་དང་མཁའ་འགྲོའི་ཚོགས་བརྒྱ། མཁྱུད་སྤྱད་ནས་འབྱུང་བའི་འཆི་བསླུ། ན་བཟའ་དཀོར་ཆ་བཟང་པོ་དང་བཅས་པའི་སྐུ་གླུད་རྟ་དང་བཅས་པ་གླིང་ཁའི་བར་སྐྱེལ་བའི་རྟེན་འབྲེལ་དང་། དགེ་སློང་གཉིས་དང་རབ་འབྱམས་པ་གཉིས་ཀྱིས་བླ་བྲང་གི་སྒོ་འཕྱོར་དུ་ས་སྡེ་བཙུགས་ཏེ་གསེར་འོད་གསུང་མི་ཆད་དུ་སྒྲོག་པ་དང་། ནུབ་རེ་བཞིན་སྐུ་གླུད་དང་ཆ་གསུམ་གཏོར་མ། གཞན་ཡང་བརྒྱ་བཞི་དང་སྔགས་རྩིས་ལས་འབྱུང་བའི་མདོས་ཕྲན་མང་པོ་དང་། རི་མཐོ་རྣམས་སུ་དར་འཕན་འཛུགས་པ། ལྷ་བསངས། ཆུ་གཏོར། སྲོག་བསླུ། ལམ་འཕྲང་བསལ་བ་སོགས་སྣ་མ་འགགས་པ་དང་། ཁྱད་པར་རྗེ་ཉིད་ནས་འཆི་བསླུ། བྱབ་བ ཀྲུ། དབང་བྱིན་རླབས་སོགས་མཛད་ཅིང་། དཔོན་ཚང་ཆོས་མཛད་ཀྱིས་སྨན་བཅོས་ཀྱང་དྲག་ཏུ་ཕུལ་བས་གདུང་བརྒྱུད་རིན་པོ་ཆེའི་སྐུ་ལ་འཕྲོད་ངོ་ཅུང་ཟད་བ ལྟས་པ་དང་། ཡུམ་ཉིད་གློ་བུར་དུ་སྙུང་དྲག་པོས་ཐེབས་ཏེ། བཅུ་དགུའི་ཉིན་དེར་བྱིན་རླབས་མཛད་དུ་ཕེབས་སྐབས་བཀའ་ལས། ཁ་སང་ནས་རྨི་ལྟས་སོགས་གང་ལ་བརྟགས་ཀྱང་ད་རེས་འགོ་འཐོན་པ་ཞིག་མི་འོང་ཞེས་གསུང་པ་ལྟར་སྐུ་རིམ་སྨན་དཔྱད་སོགས་ཐབས་གང་གིས་ཀྱང་ངོ་མ་བལྟས་པར་སྙུང་ཡུན་ཡང་ཞག་བཞི་ལྔ་ཙམ་ལས་མ་བྱུང་སྟེ། ཉི་ཤུ་གཅིག་གི་ཉིན་སྔར་ལས་སྐུ་བདེ་ཉམས་ཆེ་ཞིང་སྲོད་དུས་སྔ་ཆའི་བར་མནལ་ཀྱང་འཇམ་པར་གྱུར། དེ་ནས་སྲོད་འཁོར་ཙམ་ན་མནལ་སད་ནས་ཅུང་ཟད་ཙོག་ཙམ་མཛད་པའི་མོད་དེ་ག་ལ་སྙུང་ཟུག་སོགས་ཅི་ཡང་མེད་པར་ལྷན་ཅིག་སྐྱེས་མའི་ཞིང་ཁམས་ག་ལ་བ་དེར་སྤྲུལ་པ་བསྡུས་ཏེ་གཤེགས། དེའི་ཚེ་རྗེ་ཉིད་ནས་རང་བཞིན་གྱི་འོད་གསལ་སྒྲིབ་བྲལ་རྣམ་པར་དག་པའི་ཡེ་ཤེས་འཆར་བར་འགྱུར་བ་གང་གསལ་འདེབས་པ་སོགས་དུས་དེར་འཕྲོད་པའི་གདམས་པས་རྗེས་སུ་འཛིན་པར་མཛད་ཅིང་། གནས་སྐབས་སུ་སྲས་ཀྱི་སྐུ་རིམ་འགྱུར་བ་ལྟ་བུ་ཞིག་བྱུང་ཡང་། དོན་ལ་རྗེ་རིན་པོ་ཆེ་འདི་ཉིད་ཀྱི་སྐུ་ཆགས་འགྱུར་བ་ཡིན་པར་སྣང་སྟེ། སྔ་ལོ་རྒྱལ་གྱི་ཟླ་བར་མནལ་ལྟས་སུ་སྤྱིར་བསྲུང་མ་རྣམས་གྲིབ་འཁོན་གྱིས་འཁངས་པའི་ལྟས་དང་། ཁྱད་པར་མི་ཆས་གོས་གཟབས་འཕྱོར་ཅན་ངོ་མི་མཁྱེན་པ་མང་པོས་རྟ་དཀར་པོ་སྒ་ཆས་ལེགས་པ་སྤྲད་པ་ཞིག་ཁྲིད་ནས་རྗེ་ཉིད་རང་མྱུར་སྟབས་ཀྱིས་སྤྱན་འདྲེན་དུ་བྱུང་བར་རྟ་དེ་ལ་ཆིབས་ནས་ཐེགས་རྩིས་ལ། ཆིབས་མ་ཚར་ཙམ་དེར་གཞིས་སུ་བསླབ་སྟོན་འདྲ་གནང་དགོས་པ་ཡོད་དགོངས་ཏེ། ལྗགས་བཀོད་གནང་ཁུལ་གྱི་མུར་མནལ་སད་པ་སོགས་མནལ་ལམ་འཚུབ་པར་རྟེན་དེ་ལ་དམིགས་པའི་ཐུགས་དམ་དང་། ཞབས་བརྟན་སྐུ་རིམ་སོགས་ལ་འབད་རྩོལ་བསྐྱེད་པས་མཚན་ལྟས་འགྱུར་ཏེ། ཕྱིས་དབོ་ཟླ་དང་ཆུ་སྟོད་ཅན་གྱི་ཚེས་བཞི་སོགས་ལ་ཡུམ་ཉིད་ཁོ་ན་ལ་བཟློག་ཏུ་མེད་པའི་མཚན་ལྟས་འཚུབ་ཅིང་མཚར་བ་དག་བྱུང་བས་མཚོན་ཅིང་། ཁྱད་པར་གཅུང་རྒྱལ་སྲས་རིན་པོ་ཆེ་དང་མ་གཅིག་སྔ་མ་གཉིས་སྐུ་ཚེ་ཐུང་བ་ལྟར་སྣང་བའང་སྔར་དར་གླིང་དུ་བཞུགས་དུས་རྟེན་འབྲེལ་གྱི་སྒྲིག་ཐབས་ཤིག་ལ་དམ་སྲིའི་བར་གཅོད་ཀྱིས་གླགས་རྙེད་དེ་རྐྱེན་ཆེར་མེད་པར་ཐུགས་འུར་ནས་གཏེར་ཤོག་ཞུགས་ལ་འབུལ་བར་མཛད་པ་སོགས་རྐྱེན་འགས་རྟེན་འབྲེལ་གྱི་སྣ་ལོག་པ་ཡིན་པར་སྣང་ངོ་། །དེ་སྐབས་ཞབས་དྲུང་གདུང་བརྒྱུད་རིན་པོ་ཆེའི་སྙུང་གཞི་བདེ་འགོ་གཏད་པ་ཙམ་ལས་དྭངས་བསྐྱེད་ཆེར་མེད་པར་བརྟེན། རེ་ཞིག་གི་བར་དུ་ཡུམ་གཤེགས་པ་ཉིད་ཤིན་ཏུ་གསང་དམ་པར་མཛད་དེ། སྐུ་རིམ་ལ་བསྙད་ནས་ལྷ་ཁང་རྣམས་སུ་མཆོད་འབུལ། གྲྭ་ཚང་དུ་ཇ་ཚུལ་འཕར་མ་བཙུགས་ཏེ་ཕུང་པོ་གསུམ་པའི་ཞལ་འདོན་དང་དྲི་མེད་བཤགས་རྒྱུད་ཀྱི་གསུང་སྒྲོག གཞན་ཡང་ཆུ་གཏོར། ཁྲོས་ནག་གི་མེ་མཆོད། མཁའ་འགྲོ་ཆེན་མོའི་སྒོ་ནས་ཚོགས་བརྒྱ་སོགས་སྒྲུབ་ཏུ་སྩལ་ཅིང་། ཉེར་བཞིའི་ཉིན་རྗེ་ཉིད་ནས་རིག་འཛིན་བླ་མའི་དཀྱིལ་འཁོར་ལ་བརྟེན་ནས་སྒྲིབ་སྦྱོང་གསལ་འདེབས་དང་། ཉེར་ལྔའི་ཉིན་བདག་གིས་སྐུ་གདུང་གི་དྲུང་དུ་བདེ་གཤེགས་ཀུན་འདུས་ཀྱི་ཆོ་ག་དང་འབྲེལ་བར་ཐུགས་དམ་བསྐུལ་ཞིང་མཆོད་པ་ཕུལ། དེ་ནུབ་མནལ་བའི་འོད་གསལ་གྱི་གཟིགས་སྣང་ལ། ཡུམ་ཉིད་མཛེས་ཉམས་ཅན་དཔྲལ་བར་ལི་ཁྲིའི་ཐིག་ལེ་བསྐུས་པ་སྐུ་མདུན་དུ་བྱོན་ནས་ཕྱི་རྟགས་ཀྱི་ལུང་བསྟན་དང་བར་གཅོད་བསལ་བའི་མཚན་མ་ངོ་མཚར་བ་དག་བསྟན། ཟླ་བ་བདུན་པའི་ཚེས་གསུམ་ལ་གསང་རྒྱ་བཀྲོལ་ཏེ། དེ་ནུབ་ནས་ཞག་ཉི་ཤུ་རྩ་བཞིའི་བར་སྐུ་གདུང་གི་དྲུང་དུ་ཆོ་ག་བ་གྲངས་བཅད་སོ་སོས་ཞི་ཁྲོ་དོང་སྤྲུགས་དང་། དགོངས་འདུས་ཀྱི་སྐོང་བཤགས། ཞི་ཁྲོ་དགོངས་པ་རང་གྲོལ། ཚོགས་པ་བྱིངས་ཀྱིས་འདུ་ཁང་དུ་ཞི་ཁྲོ་རིགས་བསྡུས་ཀྱི་དཀྱིལ་འཁོར་ཆེན་པོ་སྒྲུབ་ཅིང་མཆོད་པ་ལ་སོགས་ཏེ་གདུང་མཆོད་འཛུགས་པར་མཛད། ཚེས་བཞིའི་ཉིན་གོང་ཞབས་ནས་ཐུགས་དམ་བརྟག་པའི་བཀའ་ཤོག་གནང་ཆའི་སྐྱེས་བཟང་པོ་དེ་བཞིན་གཤེགས་པའི་འཕེལ་གདུང་དང་བཅས་པ། མི་དབང་ཆེན་པོས་བཟང་གོས་ཀྱི་བཞུགས་སྟན་ལ་སོགས་ཏེ་དངོས་པོ་གྱ་ནོམ་པ་དང་བཅས་བརྟན་བཞུགས་འབུལ་བར་ཆེད་དུ་གནང་བའང་ཕེབས། ཡུམ་གྱི་སྐུ་རྗེས་སུ་རིས་མེད་པའི་དགེ་འདུན་གྱི་སྡེ་གྲགས་ཆེ་བ་རྣམས་དང་། ལྷོ་ཁའི་དགོན་ཆེ་ཕྲ་ཕལ་ཆེ་བར་མང་ཇ་རྣམ་བཞག་བསྔོ་རྟེན་དང་བཅས་པ། གོང་མ་རྒྱལ་བའི་དབང་པོ་སོགས་སྐྱེས་བུ་དམ་པ་རྣམས་ཀྱི་སྤྱན་སྔར་བསྔོ་རྟེན། མཆིམས་ཕུ་དང་བསམ་ཡས་སོགས་སུ་བརྒྱ་མཆོད་ཀྱིས་མཚོན་གནས་ཆེན་ཀུན་ཏུ་སྙན་དར་དཀར་མེ་ཅོད་པན་ལ་སོགས་པའི་མཆོད་འབུལ། གྲྭ་ཕྱི་ནང་མོན་མཁར་རྣམས་ཀྱི་སྡེ་ཆེ་ཕྲ་ཕལ་ཆེ་བ་སྤྱན་དྲངས་ནས་དཀྱིལ་འཁོར་མང་པོའི་སྒྲུབ་མཆོད་དང་སྨོན་ལམ་ཁྱད་པར་ཅན་རྣམས་འདོན་པ་སོགས་སྐུ་ཚིགས་སོ་སོ་དང་། སྐུ་འདད་དངོས་གཞིའི་སེར་ཚོགས། ནང་རྟེན་རབ་གནས་ཀྱི་བར་དེ་སྲིད་དུ་མཆོད་པ་དང་དགེ་འདུན་གྱི་བསྙེན་བཀུར་སོགས་སྔར་ཁྲི་ལྕམ་དེ་ཉིད་ཀྱི་གཤེགས་རྫོངས་ལ་ཆ་བཞག་པ་དང་། ཚེས་བཅོ་བརྒྱད་ཀྱི་ནུབ་སྐུ་གདུང་མཆིམས་ཕུར་སྤྱན་དྲངས་ཏེ། གུར་དཀར་ཕུག་གི་འདབས་སློབ་དཔོན་ཆེན་པོས་ལྷ་ལྕམ་པདྨ་གསལ་གྱི་སྤུར་ཞུགས་ཀྱིས་སྦྱོང་བའི་ཚུལ་བསྟན་པའི་གནས་དེ་ཉིད་དུ་མཁའ་འགྲོའི་དཀྱིལ་འཁོར་བཞེངས་པ་ལ་བཞུགས་སུ་གསོལ་ནས་བླ་མ་དང་རྣལ་འབྱོར་མ་ལྷ་དགུའི་ཆོ་ག་དང་འབྲེལ་བར་སྤུར་སྦྱོང་བའི་ཞབས་ཏོག་མཐར་ཕྱིན་པར་བསྒྲུབས་ཏེ་དབུ་ཐོད་སྤྱན་དྲངས་པ་ནི་དེང་སང་བདེ་སྐྱོང་དུ་གྲགས་པ་མཁྲེགས་ཤིང་ལྗིད་དང་ལྡན་ལ་དབྱིབས་མདོག་ལེགས་པས་མཐོང་བ་ཙམ་གྱིས་ཡིད་འཛིན་པ་དཔྲལ་བའི་ཕྱོགས་ན་ཧྲཱིཿཡིག་གསལ་པོར་དོད་པ་འདི་ཡིན་ཞིང་། དད་པ་ཅན་དག་གི་ལག་ཏུ་བྱུང་བའི་ཚེམས་ལ་ཡང་འཕགས་པ་བཅུ་གཅིག་ཞལ་གྱི་སྐུ་བྱོན་པ་ལ་སོགས་པ་དང་། དུས་དེར་ས་ཕྱོགས་ཐམས་ཅད་ཆར་ཟིམ་གྱི་ར་བས་བསྐོར་བ་ལས་གནས་དེ་རང་གི་ཐད་ཀྱི་ནམ་མཁའ་ཤིན་ཏུ་དྭངས་པ་སོགས་ངོ་མཚར་བའི་དགེ་མཚན་མང་དུ་བྱུང་བར་སྣང་ཞིང་། གདུང་ཆོག་གྲོལ་ནས་ཀྱང་ནམ་མཛོད་སྒྲུབ་སྡེ་པ་བསྙེན་སོང་བཞིས་ཞག་ཉི་ཤུ་རྩ་ལྔའི་བར་ཀུན་རིག་གི་སྒྲུབ་མཆོད་དང་། སྟན་གཅིག་པའི་དགེ་འདུན་བརྒྱད་ཀྱིས་ཞག་བཅུ་སྐོར་བདེ་གཤེགས་བརྒྱད་ཀྱི་ཐུགས་དམ་བསྐུལ་བའི་ཆོ་ག སྨིན་གྲོལ་གླིང་དུ་ཇི་སྲིད་བར་དུས་མཆོད་ལ་གསང་བ་སྙིང་པོ་དང་བདེ་འདུས་རྩ་རྒྱུད་ཀྱི་རྒྱུད་འདོན་ཆག་མེད་དང་ལི་མ་ལྷ་ཁང་དུ་མར་མེ་རྒྱུན་འཛུགས་སོགས་གཤེགས་རྫོངས་ཕུལ་དུ་བྱུང་བ་སྒྲུབ་པར་མཛད། དེ་དག་གི་སྐབས་སུ་གཙོ་བོར་གོང་ཞབས་ཡས་ཕྱིན་ནས་གྲུབ་རྒྱལ་གླིང་པ་མི་སྣར་གནང་བའི་གནང་ཆ་བཟང་ཞིང་སྤམ་མཐོ་བ་དང་། གཞན་ཡང་ཐུགས་འབྲེལ་ཅན་ཐམས་ཅད་ཀྱིས་ཀྱང་སྐུ་ཚིགས་གསོལ་བ་དང་གདུང་འབུལ་སྙེལ་ཇ་འབུལ་བ་སོགས་མང་དུ་བྱུང་ཞིང་། གྲུབ་རྒྱལ་གླིང་པར་གུར་དྲག་གི་དབང་དང་། ཁམས་པ་བླ་མ་ཆོས་རྒྱལ་གླིང་པའི་འབུལ་སྐྱེལ་བ་དང་འབྲས་ལྗོངས་པདྨ་ཡང་རྩེའི་དབུ་མཛད་སོགས་ལ་རྡོར་སེམས་ཀྱི་བཀའ་ལུང་སྩལ། ཟངས་རི་སྡེ་སྲིད་གནམ་དུ་གཤེགས་པའི་བསྔོ་རྟེན་གཡང་ཊིའི་ཞལ་དཀར་སོགས་དངོས་སྤྱད་བཟང་ཞིང་རྒྱ་ཆེ་བ་འབྱོར་བར་བྱང་ཆེན་དུ་བསྔོ་སྒྱུར་མཛད། འདི་སྐབས་ལྷོ་བྲག་གནས་གཞིའི་གུ་རུ་བའི་གདུང་བརྒྱུད་རྫོགས་པར་བརྟེན་རྗེ་ཉིད་གཏེར་ཁ་གོང་འོག་གཉིས་ཀའི་ཆོས་ཀྱི་བདག་པོར་གྱུར་པ་ལ་ཆེད་དུ་དགོངས་ཏེ་གཞུང་ས་མཆོག་ནས་གནས་གཞིའི་དགོན་མ་ལག་ཆོས་གཞིས་རྟེན་གསུམ་ནང་སྤྱད་དང་བཅས་པ་སྦྱོར་འཇགས་ཀྱི་བཀའ་ཤོག་ཕེབས་པ་ལྟར་རྩིས་ལེན་པའང་རྫོང་སྟ་གནང་ཞིང་། ཀཿཐོག་པ་བླ་མ་བྱང་ཆུབ། དོལ་པོ་བླ་མ་ཚེ་རིང་དཔལ་བཟང་། བདུད་འདུལ་རྡོ་རྗེའི་སྲས་རྣམས་ཀྱི་འབུལ་སྐྱེལ་བ་སོགས་རིམ་པར་འབྱོར་བ་ལ་རྡོར་སེམས་ཀྱི་ལུང་དང་། ནམ་མཛོད་སྒྲུབ་སྡེ་བའི་གྲྭ་པ་བཞི་ལ་འཕོ་བ་འཇག་ཚུགས་མ། སྐུ་ཞང་ཚེ་དབང་མི་འགྱུར་ལ་ལོ་མ་གྱོན་མའི་རྗེས་གནང་། ཡིག་དྲུག་གི་བཟླས་ལུང་། ལེའུ་བདུན་མ་སོགས་འདོན་ཆོས་མང་ཞིག་གི་བཀའ་ལུང་། བླ་མ་འདུས་ཆེན་རབ་རྒྱས་པ་དང་ཐེ་སེ་འོར་སྒྲུབ་སྡེའི་བླ་མ་གཉིས་འཁོར་གསུམ་ཡོངས་དག་གི་འབུལ་བ་རྒྱ་ཆེར་བཏེག་སྟེ་འབྱོར་བ་དང་། བོ་དོང་མངའ་བདག་བྲག་པ་སོགས་དད་འདུས་ཅན་མང་པོར་ཐུགས་ཐིག་གི་དབང་ལུང་། འཇོམས་བྱེད་ཀྱི་དབང་གུར་དྲག་དང་རྡོར་སེམས་ཀྱི་ལུང་རྣམས་སྩལ། ཟངས་རི་སྡེ་སྲིད་ཀྱི་བསྔོ་རྟེན་བསྐྱར་མ་དང་འདུས་ཚོགས་སུ་སྐོང་བཤགས་སོགས་འཛུགས་པའི་ཡོ་བྱད་ཕུན་སུམ་ཚོགས་པ་འབྱོར་བ་ལྟར་ཆོ་ག་སྨིན་རྒྱས་སུ་སྒྲུབ་ཏུ་སྩལ་ཅིང་དགེ་ཚོགས་རྫོགས་བྱང་དུ་བསྔོ་བ་དང་། སྨོན་གྲུབ། ཕུན་རབ། ཕུག་ནས་སོགས་ཞལ་མཇལ་ཞུ་མི་རྣམས་ལའང་རྐྱེན་སེལ་གྱི་དབང་སོགས་གང་ལ་གང་འཚམས་པས་སོ་སོའི་རེ་འདོད་སྐོང་བར་མཛད། ཟླ་བ་དགུ་པའི་ནང་དུ་ ཆུ་བཟང ་ནས་སེམས་མ་དགེ་བའི་ཐུགས་ཅན་ཡུམ་དྲུང་སྐུ་མཆེད་ཀྱིས་ཞབས་པད་རིང་འཚོའི་གསོལ་བ་འདེབས་པ་དག་གདུང་བརྒྱུད་རིན་པོ་ཆེ་བསྙུན་དྭངས་པའི་ལེགས་སོ་བཅས་ཡབ་སྲས་གཉིས་ཀར་འབུལ་བ་རྒྱ་ཆེ་བ་འབྱོར་ཞིང་། གཞན་ཡང་སྐབས་འདི་དག་ཏུ་ཏྲེའོ་སྤྲུལ་སྐུ་རིན་པོ་ཆེ་དང་། བོན་ལུང་སྤྲུལ་པའི་སྐུ། གནས་གཞི་སྤྱི་སོ་རྣམས་ཀྱི་ཞབས་བརྟན་དང་། གསུང་སྙན་བླ་མ་སོགས་མཇལ་ཁ་ཞུ་མི་མང་པོ་ལ་ཡང་དེ་དང་དེར་གང་འཚམས་ཀྱི་བཞེད་དོན་སྒྲུབ་པའི་བཀའ་དྲིན་དང་། གླིང་གྲྭ་ཚང་ནས་བརྒྱད་སྟོང་པ་རྒྱུགས་འབུལ་མིར་ཡང་གནང་ཆ་རྒྱས་པར་སྩལ། རྡོ་རྗེ་བྲག་ཏུ་རིག་འཛིན་སྤྲུལ་པའི་སྐུ་པདྨ་ཕྲིན་ལས་ལ་ཞབས་བརྟན་འབུལ་མི་ཆེད་དུ་རྫོང་སྟ་གནང་ཞིང་། ཚེས་བརྒྱད་ཀྱི་ཉིན་ཞབས་དྲུང་གདུང་བརྒྱུད་རིན་པོ་ཆེ་བསྙུན་ལས་རྣམ་པར་གྲོལ་བའི་གཏང་རག་ཏུ་མགོན་ཁང་སྟེང་ཤོད་རྣམས་སུ་དར་ཚོན་གྱི་སྙན་ཤལ། རལ་གྲི། གོ་ཁྲབ། སག་ཐག་སོགས་སྤྱན་གཟིགས་དང་གཏོར་ཚོགས་རྒྱ་ཆེར་བསྟར་ཏེ་བསྐང་གསོ་རྒྱས་པར་མཛད། བཅུ་བཞི་ལ་ཉིད་ཀྱི་ཡུམ་ལྷ་འཛིན་དབྱངས་ཅན་སྒྲོལ་མས་ཡབ་སྲས་གཉིས་ཀ་ལ་སྟན་དཀར་དྲི་མ་མེད་པ་རྡོ་རྗེའི་རེ་ཁཱ་ཅན་སོགས་འབུལ་བ་ཚོགས་འཁོར་ཆོ་ག་བ་རྣམས་ལ་ཡོན་གྱི་དངོས་པོ་སོགས་རྒྱས་པར་བཏེག་སྟེ་འཆི་མེད་ཡང་སྙིང་འདུས་པའི་སྒོ་ནས་ཞབས་བརྟན་འབུལ་བར་མཛད་ཅིང་། དེ་ཉིན་མདོར་ཇ་ལེན་གྱི་ཚོང་པ་དཔོན་གཡོག་རྣམས་ལ་ཚེ་དབང་སྩལ། ཟླ་མཇུག་ལ་ཡུམ་རིན་པོ་ཆེ་སྐུ་མཆེད་ཀྱིས་གསེར་དང་། ཤེལ་བུམ་ཁྱད་མཚར། གོས་དར་སོགས་ཀྱི་འབུལ་བ་དང་ཚོགས་བརྒྱ་སྒྲུབ་པའི་ཡོ་བྱད་རྒྱ་ཆེ་བ། ཧོར་ཁོར་ཚ་རུ་རྙིང་ནས་དགེ་སློང་འགྱུར་མེད་ཅན་གྱི་རྟ་འབུལ་དང་། དཔོན་སྒྲོལ་མ་འདས་པའི་བསྔོ་རྟེན་བཅས་འབྱོར་ཞིང་། འབྲོམ་སྟོན་གཞན་ཕན་རྣམ་རོལ་མཇལ་དུ་བྱུང་བར་ཁོང་པའི་གསུང་གིས་བདག་རང་ན་སོ་ཡར་སླེབས་པས་ད་འཆད་ཉན་ཕེར་བ་ཞིག་མི་འདུག རིགས་བརྒྱུད་རྣམས་ནི་ལས་སུ་མ་རུངས་པས། ད་ནི་ཆོས་བདག་པོ་ཉིད་ཀྱི་ཕྱག་ཏུ་འབུལ་བ་ཡིན་གསུངས་ཏེ་རྡོར་གླིང་གཏེར་ཆོས་ཀྱི་གླེགས་བམ་ཡོངས་སུ་རྫོགས་པ་ཤིན་ཏུ་དགྱེས་པ་དང་བཅས་པས་ཕུལ་བར་མཉེས་ཐུབ་པའི་གནང་སྦྱིན་སོགས་རྒྱ་ཆེར་སྤྲོ་བར་མཛད། ཟླ་བ་བཅུ་པའི་ཚེས་གཉིས་ཀྱི་ཉིན་ཡུམ་དྲུང་སྐུ་མཆེད་ནས་གོས་དར་བསེ་སྒམ་ལ་སོགས་པའི་འབུལ་བ་དང་འདུས་ཚོགས་སུ་མང་འགྱེད་དང་བཅས་རྒྱ་ཆེར་འབྱོར་ཞིང་། ཉེ་འཁོར་དུ་འབྲུམ་ནད་ཐོར་བུ་སླེབ་པར་བརྟེན་འབྲུམ་ཡོལ་ལ་གནས་གཞན་དུ་ཐེག་པ་འགམ་བམ་མི་འགབ་ཐུགས་དམ་བརྟག་པ་མཛད་པ་ན། མནལ་ལམ་དུ་གདུང་བརྒྱུད་རིན་པོ་ཆེའི་རྨོ་རྨོ་དེ་ཡིན་དགོངས་པའི་བུད་མེད་གཟི་མདངས་ཅན་ཞིག་གིས་བླ་བྲང་བར་ཁྱམས་ཀྱི་བྱ་གདང་སྟེང་ནས་རས་ཡུག་དྲི་མ་ཅུང་ཟད་ཡོད་པ་ཞིག་ཕྲག་པར་བཀལ་བའི་བརྡ་དང་བཅས་ཏེ་སྐས་ལ་བབས་ནས་ལངས་སོང་བས་ཐེགས་ན་བཟང་བར་དགོངས་ཏེ། ཞབས་ཕྱིར་ཐོར་པ་མ་ཐར་བའི་གྲྭ་པ་རྣམས་འཁྲིད་པར་མཛད་ནས་ཚེས་བདུན་གྱི་ཉིན་གྲྭ་མང་རྣམས་སྐྱིད་རུ་དང་། རྗེ་ཉིད་ཡབ་སྲས་འབྲས་བུ་བདེ་བ་ཅན་དུ་དཔགས་ཏེ་ནངས་པར་དར་རྒྱས་ཆོས་གླིང་དུ་ཕེབས། ཚེས་བཅུ་གཉིས་ནས་བཟུང་བདུན་ཕྲག་གསུམ་གྱི་བར་དུ་སྐུ་མཚམས་ཀྱི་བཅད་རྒྱ་དམ་པོ་མཛད་དེ་ཐུགས་དམ་ལ་རྩེ་གཅིག་ཏུ་བཞུགས། དེ་གྲོལ་མཚམས་འདུམ་པོའི་ཞལ་ངོ་རྣམས་མཇལ་དུ་བྱུང་བར་ཚེ་དབང་དང་བཀའ་བསྒོ་སོགས་རྐྱེན་སེལ་གྱི་བྱིན་རླབས་མཛད། ཟླ་བ་བཅུ་གཅིག་པའི་ནང་དུ་གཞུང་དུ་ཞུ་ཡིག་འབུལ་མི་མངགས་པར་དགྱེས་བཞིན་པའི་བཀའ་ལུང་རྒྱས་པར་ཕེབས་ཤིང་། དར་གླིང་གཞི་བའི་བཙུན་པ་རྣམས་ལ་ཐུགས་ཐིག་གི་དབང་དང་ལས་བྱང་གི་ལུང་། གྲྭ་བཙུན་ཐམས་ཅད་ལ་པད་གླིང་བླ་མའི་གཏོར་དབང་དང་འདོན་ཆ་སྐོར་གྱི་ལུང་རྣམས་མཛད། གྲྭ་པ་རགས་བསྡུས་ལ་ཆོ་གའི་ལག་ལེན་འཆམས་དབྱངས་སོགས་བར་སྐབས་སུ་རྒྱུན་ཇེ་ཕྲར་གྱུར་པ་རྣམས་ཉམས་གསོའི་བསླབ་སྦྱོང་བགྱིད་དུ་སྩལ་ཅིིང་རང་དགོན་གྲྭ་པ་ཆེ་ཁག་ཕལ་ཆེ་བར་མང་ཇ་བརྒྱ་རེ་དར་འགྱེད་དང་བཅས་པ་དང་། བྱིངས་ལ་མང་ཇ་ཉི་ཤུ་རེ་དང་དར་འགྱེད། ཇོ་སྟན་ཚོགས་པ་སོགས་གྲྭ་ནང་གི་དགོན་པ་གཞན་རྣམས་ལའང་མང་ཇ་སྦྱོར་བཅུ་རེ་གནང་། ཟླ་བ་བཅུ་གཉིས་པའི་འགོར་གྲྭ་ཚང་གི་གྲྭ་པ་རྣམས་དུས་རིམ་གྱི་སྟབས་ཕྱིར་སློག་པར་མཛད་རྗེས། ཉིད་ཀྱི་ཡུམ་ལྷ་འཛིན་དབྱངས་ཅན་སྒྲོལ་མ་དང་སྐུ་ཞང་བསོད་ནམས་རབ་བརྟན་གཉིས་ལ་ཐུགས་ཐིག་གི་རྫོགས་རིམ་སྨིན་ཁྲིད་དུ་སྩལ་ཅིང་། ཞབས་ཕྱིའི་ཁྲོད་ནས་དྲུང་འཚོ་ཆོས་མཛད། དགེ་སློང་བློ་གསལ། མཆོད་དཔོན་རྣམས་དང་། གཞི་བའི་གྲྭ་པ་ཁ་ཤས་བཅས་པར་ཨ་ཏི་ཟབ་དོན་སྙིང་པོའི་ཀ་དག་གི་ཁྲིད། རྩེ་ལེ་བླ་མ་ལྷ་ས་ནས་ཚུར་འཁོར་ནས་ཆེད་དུ་གསོལ་བ་བཏབ་པ་ལྟར། ཞབས་དྲུང་གདུང་བརྒྱུད་རིན་པོ་ཆེས་དབུས་རྩེ་ལེ་བ་དང་ཞབས་ཕྱི་ནང་སྐོར་བ་བདུན་ཙམ་དང་བཅས་པར་རས་བྲིས་ཀྱི་དཀྱིལ་འཁོར་དུ་སྒྱུ་འཕྲུལ་ཞི་བའི་ཕན་ནུས་ཀྱི་དབང་། ཁྲོ་བོའི་ཕན་ནུས་ཟབ་མོའི་དབང་། ཁྲོ་རོལ་ལྗགས་བསྒྲིགས་མའི་ལུང་རྣམས་མཛད། གཞི་བའི་སྒྲུབ་མཆོད་དང་མ་ཎི་བ་རྣམས་ལའང་ཚོགས་འཁོར་དང་ཉིན་རེ་བཞིན་མང་ཇ་ཐུག་ཚུལ་སོགས་རྒྱས་པར་སྩལ་ཅིང་། ཡབ་རྗེའི་ལོ་མཆོད་ཟླ་བ་གཉིས་པའི་ཉེར་གཉིས་དང་། གདུང་བརྒྱུད་རིན་པོ་ཆེའི་ཡུམ་གྱི་ལོ་མཆོད་ཟླ་བ་དྲུག་པའི་ཉེར་གཅིག་གི་དུས་མཆོད་སྟར་ཆགས་སུ་འཛུགས་པར་མཛད་པའི་ཆ་རྐྱེན་གྱི་ཇ་རྣམས་ངོ་ཐོག་དང་། དེ་ཕྱིན་གྱི་གཏོང་སྒོ་ཆེ་ཕྲ་གཞན་རྣམས་ཀྱི་ཐེབས་སུ་ས་ཞིང་གི་སྦྱོར་འཇགས་ཀྱང་མཛད།