གཉིས་པ་གདམས་ངག་བཤད་པ།
གཉིས་པ་གདམས་ངག་བཤད་པ།
རྗེ་བཙུན་བྱམས་པ་མགོན་པོ་ལ་ཕྱག་འཚལ་ལོ། །དེ་ལ་འདིར་གཉིས་པ་གདམས་ངག་བཤད་པ་ལ། སྤྱིར་བཤད་པ་དང༌། བྱེ་བྲག་འདིར་བསྟན་གདམས་ངག་བཅུ་བཤད་པ་དང་གཉིས། དང་པོ་ལ་སྤྱི་དོན་དང་མཐའ་རགས་ཙམ་དཔྱད་པ་དང་གཉིས། དང་པོ་ལ་གདམས་ངག་གི་མཚན་ཉིད། དབྱེ་བ། ས་མཚམས་བཤད་པ་དང་གསུམ། གདམས་ངག་གི་མཚན་ཉིད། གདུལ་བྱ་ལ་བརྗོད་བྱའི་དོན་ཕྱིན་ཅི་མ་ལོག་པར་ཐར་བ་ཐོབ་པའི་ཐབས་སུ་འདོམས་པའི་རྗོད་བྱེད་རྣམ་དག ཐེག་ཆེན་གདམས་ངག་གི་མཚན་ཉིད། ཐེག་ཆེན་གྱི་གདུལ་བྱ་ལ་བརྗོད་བྱའི་དོན་མ་ནོར་བར་ཐེག་ཆེན་གྱི་ཐར་བ་ཐོབ་པའི་ཐབས་སུ་འདོམས་པའྀ་རྗོད་བྱེད་རྣམ་དག་དེ་ཡིན་ཏེ། མདོ་ལུགས་མ་ལས། བྱང་ཆུབ་སེམས་དཔའ་ལ་ཐེག་ཆེན་གྱི་ཆོས་ཕྱིན་ཅི་མ་ལོག་པར་འདོམས་བྱེད་ཀྱི་ངག་ནི་མཚན་ཉིད་དོ། །ཞེས་གསུངས་སོ། །ཐེག་དམན་གདམས་ངག་གི་མཚན་ཉིད། དམན་པའི་གདུལ་བྱ་ལ་བརྗོད་བྱའི་དོན་ཕྱིན་ཅི་མ་ལོག་པར་ཐེག་དམན་གྱི་ཐར་བ་ཐོབ་པའི་ཐབས་སུ་འདོམས་པའི་རྗོད་བྱེད་རྣམ་དག་དེའོ། །
གཉིས་པ་དབྱེ་བ་ནི།
ཐེག་ཆེན་གདམས་ངག་དང༌། ཐེག་དམན་གདམས་ངག་གཉིས། ཡང་ན་གདམས་ངག་ལ་རྗེས་བསྟན་དང་གདམས་པའི་གདམས་ངག་གཉིས།དེ་གཉིས་ཀྱི་ངོ་བོ་ནི། ས་བཟང་གི་མདོ་སྡེ་རྒྱན་གྱི་རྣམ་བཤད་ལས། གདམས་ངག་དང་རྗེས་བསྟན་གཉིས་ཀྱི་དང་པོ་ནི། སྒོམ་ཚུལ་གྱི་ངོ་བོ་ཕྱིན་ཅི་མ་ལོག་པར་སྟོན་པའི་ངག་ཡིན་ལ། ཞེས་དང༌། རྗེས་བསྟན་ནི། བླང་དོར་གྱི་ཚུལ་ཕྱིན་ཅི་མ་ལོག་པར་སྟོན་པའི་ངག ཅེས་དང༌། ཉ་ཊཱིཀ་ལས། གདམས་ངག་གང་ཞིག ཐོབ་ཟིན་པའི་ཡོན་ཏན་སྐྱོང་བའི་དོན་གྱིས་མི་བརྗེད་པར་བྱེད་པ་གདམས་ངག་གདམས་པ། གང་ཞིག མ་ཐོབ་པའི་ཡོན་ཏན་ཐོབ་པར་བྱེད་པ་རྗེས་བསྟན་ནོ། །ཨཱརྱ་འགྲེལ་ཆེན་ནོ། །ཉན་སར། སེམས་དང་ཤེས་རབ་ཀྱི་བསླབ་པ་ལ་འདོམས་པ་གདམས་པ། ཚུལ་ཁྲིམས་ལ་འདོམས་པ་རྗེས་བསྟན་དུ་བཤད་དོ། །ཞེས་གསུངས་སོ། ། གསུམ་པ་ས་མཚམས་ནི། ལམ་མ་ཞུགས་ནས་སངས་རྒྱས་ཀྱི་སའི་བར་དུ་ཡོད་དོ། །