ལེའུ་ཞེ་བསྒོམ་ལོང་མ་བྱུང་འཆི་བ་བྱུང་བ་ལ། །ཞིང་བགྲོད་རྟ་མཆོག་བ་ལ་ཧ་ཞེས་ཡོད། །
༼པི༽ རི་ཆོས་མཚམས་ཀྱི་ཞལ་གདམས་ལས། བསྐྱེད་རྫོགས་ཤེས་ཤིང་ཉམས་ལེན་ཅུང་ཟད་ཡོད་ཀྱང་སྒྱུ་བརྟན་པ་མ་ཐོབ་པར་འཆི་བ་གློ་བུར་དུ་བྱུང་ན་ཞིང་ཁམས་བགྲོད་པའི་གདམས་ངག་རྟ་མཆོག་བྷ་ལ་ཧའི་བཞོན་པ་ཞེས་བྱ་བ་བཞུགས་སོ། །ན་མོ་ཨ་མི་ཏ་བྷཱ་ཡ། བདག་བན་རྒན་
རཱ་ག་ཨ་སྱ་ལ། །བུ་བརྩོན་འགྲུས་རྒྱ་མཚོས་འདི་སྐད་ཟེར། །ལོ་བརྒྱ་ལས་མི་ཐུབ་འཆི་དུས་ཀྱི། །སྐབས་དེ་དུས་བསྐྱེད་རྫོགས་ཇི་ལྟར་བྱེད། །དོན་འཕོ་བའི་གདམས་པ་ཇི་ལྟར་བྱེད། །སེམས་རིག་པ་ཞིང་ཁམས་གང་ལ་གཏད། །ལུས་བེམ་རིག་བྲལ་བའི་སྡུག་བསྔལ་དུས། །སྐབས་དེ་དུས་སྡུག་བསྔལ་ཇི་ལྟར་ཟློག །དོན་འདི་ལ་གདམས་པ་ཐུགས་རྗེས་ཟུངས། །བུ་གསོན་དང་བཱིརྱ་སཱ་ག་ར། །དུས་དེང་སང་བཞི་བཅུ་ཁ་རལ་དུས། །ལོ་བརྒྱ་ཙམ་ཐུབ་པ་ཨི་སྲིད་ན། །དུས་ད་ལྟ་ཡོད་པའི་མི་ཕལ་ཆེར། །སང་ད་ཚོད་ས་ཡི་སྟེང་ན་མེད། །ལར་སྐྱེས་པའི་ཐ་མ་འཆི་བ་སྟེ། །དེ་མི་མྱོང་ཐབས་ཤིག་ངས་མི་ཤེས། །དེ་འཆི་ཁ་གནད་གཅོད་སྡུག་བསྔལ་ཡིན། །དོན་འཆི་བ་སྐད་ཅིག་བཏང་སྙོམས་པ། །ཤི་ཚར་ནས་བར་དོའི་འཇིགས་སྐྲག་ཡོད། །དེ་མི་མྱོང་ཐབས་འགའ་གསུངས་མོད་ཀྱང་། །མི་ཕལ་ཆེར་ཆོས་སྒོར་ཞུགས་པ་རྣམས། །ན་གཞོན་ཚེ་སློབ་གཉེར་བྱེད་པས་ཡེངས། །དོན་དབང་ལུང་གདམས་ངག་མང་ཐོབ་ཀྱང་། །དེ་གོ་ཡུལ་དཔེ་ཆའི་སྟེང་དུ་ལུས། །སེམས་བསྐྱེད་རྫོགས་གདམས་ངག་ཤེས་ན་ཡང་། །དེ་བརྟན་པ་མ་
ཐོབ་རྐྱེན་མི་ཁྱག །དུས་ནམ་ཞིག་འཆི་ནད་དྲག་པོས་ཐེབ། །སྲུང་ཟློག་པ་རིམ་གྲོས་ཕྱིར་ལ་ཐུ། །ཕན་རེ་བའི་སྨན་པས་ཝ་བྲོས་བྱེད། །སེམས་བརྩེ་བའི་གྲྭ་སློབ་མཆི་མ་འདོན། །རང་དཔོན་སློབ་དཀོར་ཟས་མང་པོ་ཟོས། །ཁྱེད་ཅིས་ཀྱང་ཐུགས་དམ་བཞུགས་དགོས་ཟེར། །རིང་བསྐྱེད་རྫོགས་བརྟན་པ་མ་ཐོབ་པས། །རང་ཐུགས་༔ དམ་ཨི་ཟིན་ཆ་མེད་ཕྱིར། །ད་རོ་རུལ་ཆགས་ནས་ཅི་ཞིག་བྱེད། །།ང་མི་འདུག་འཕོ་བ་བྱེད་དོ་ཞེས། །དུས་འཆི་ཁ་རང་ལའང་རྡོ་བརྫུ་བྱེད། །དཔལ་རྡོ་རྗེ་གདན་བཞིའི་རྒྱུད་འགྲེལ་ལས། །ནད་མ་ཕོག་གོང་དུ་འཕོ་དགོས་ཀྱི། །ནད་ཕོག་ནས་རང་ཉིད་འཕོ་མ་ནུས། །དེ་གསུངས་ཕྱིར་འཕོ་བསམ་འཁྲུལ་པར་སེམས། །དོན་དེ་དུས་ཕན་པའི་གདམས་ངག་འདི། །རྗེ་དྭགས་པོ་ལྷ་རྗེས་གསུངས་པ་ཡིན། །ང་ཚེ་འདིར་དེ་སྔོན་འཆི་མ་མྱོང་། །དོན་དེ་ཕྱིར་མྱོང་བ་མེད་ན་ཡང་། །བདག་རང་དང་འདྲ་བའི་མཆེད་གྲོགས་འགའ། །གླུ་ཁོང་འདས་ཚེ་གདམས་ངག་འདི་བསླབས་པས། །དེས་ཕན་ཐོགས་ཆེ་བའི་ལག་བླངས་ཡོད། །དོན་དེ་ཕྱིར་འདི་ཉིད་སྙིང་ལ་ཆོངས། །གོ་བདེ་ཕྱིར་ལུང་འདྲེན་མང་པོ་བཞག །
ཚིག་བཤད་པའི་ན་ཡམ་ཕར་ལ་སྒྱུར། །དོན་ཧྲིལ་གྱིས་དྲིལ་ན་འདི་རང་ཡིན། །རང་ངེས་པར་འཆི་བའི་དུས་བྱུང་ཚེ། །ལུས་ཡི་དམ་རྒྱལ་བ་རྒྱ་མཚོའི་སྐུ། །ལུས་ནང་སྟོང་ཕུ་མ་ཕུས་བཏབ་བཞིན། །རྩེ་དབུ་མ་ཁང་སྟོང་ཀ་བ་ལྟར། །དེ་མར་སྣེ་ལྟེ་འོག་ཕུག་རྡུགས་ཏེ། །དཔེ་སྨྱུག་མའི་ཚིགས་པ་འགག་པ་བཞིན། །རྩ་ཕྱི་དཀར་ནང་དམར་སྟོང་སང་ངེ་། །རྩ་ཡར་སྣེ་སྤྱི་བོར་ཧད་པོ་སྟེ། །དཔེ་སྐར་ཁུང་བཞིན་དུ་གསལ་ཧ་རེ། །གནས་སྤྱི་གཙུག་ཁྲུ་གང་ནམ་མཁའ་ལ། །གདན་པདྨ་སྟོང་ལྡན་ཟླ་བའི་སྟེང་། །རྗེ་ཡབ་སྲས་སྐྱེལ་སོགས་བླ་མ་དང་། །དོན་དབྱེར་མེད་སྐྱབས་གསུམ་ཀུན་འདུས་པ། །རྗེ་རྒྱལ་བ་མགོན་པོ་འོད་དཔག་མེད། །སྐུ་རཱ་གའི་མདོག་ཅན་མཚན་དཔེ་རྫོགས། །སྐུ་ཆོས་གོས་རྣམ་གསུམ་སྐྱིལ་ཀྲུང་བཞུགས། །ཕྱག་མཉམ་བཞག་བདུད་རྩིའི་ལྷུང་བཟེད་བསྣམས། །ནུབ་བདེ་བ་ཅན་དུ་བཞུགས་པ་དང་། །དོན་དབྱེར་མེད་ངོ་བོ་གཅིག་ཏུ་བསྒོམ། །དེ་ངག་གིས་ནུས་སམ་མ་ནུས་ན། །སེམས་ཡིད་ཀྱིས་སྐྱབས་འགྲོ་ལན་གསུམ་དང་། །མ་འགྲོ་དྲུག་སེམས་ཅན་ཀུན་གྱི་ཕྱིར། །དུས་ད་རེས་འཆི་བ་ཆོས་སྐུར་སྦྱང་། །སང་བར་དོ་
ལོངས་སྤྱོད་རྫོགས་སྐུར་བཞེངས། །དུས་དེ་ནས་སྐྱེ་བ་སྤྲུལ་པའི་སྐུ། །ནུབ་བདེ་བ་ཅན་དུ་བརྫུས་སྐྱེས་ནས། །རྗེ་འོད་དཔག་མེད་པ་མཆོད་བྱེད་ཅིང་། །དུས་ནམ་ཞིག་ས་བཅུ་ཐོབ་པའི་ཚེ། །ངས་སྤྲུལ་པ་བྱེ་བ་ཕྲག་བརྒྱ་འགྱེད། །མ་འགྲོ་དྲུག་སེམས་ཅན་འདྲེན་པ་ལ། །ལྷ་སྤྱན་རས་གཟིགས་དང་དབྱེར་མེད་ཤོག །དེ་སྙིང་ནས་ལན་གསུམ་སེམས་བསྐྱེད་བྱ། །ལུས་ལོངས་སྤྱོད་དགེ་རྩ་ཅི་ཡོད་དང་། །རང་སེམས་ལ་ཆགས་ཞེན་གང་ཡོད་ཀྱི། །ནོར་ལོངས་སྤྱོད་མཆོད་ཆ་དཔེ་ཆ་དང་། །ཡུལ་ཡོན་བདག་གྲྭ་སློབ་ཉེ་འབྲེལ་སོགས། །དེ་ཐམས་ཅད་མཎྜལ་གཅིག་ཏུ་བསྡུས། །རྗེ་འོད་དཔག་མེད་ལ་ཡིད་ཀྱིས་ཕུལ། །ངག་མཎྜལ་ཚིགས་བཅད་ལན་གསུམ་བརྗོད། །དཔེ་འབུལ་བ་ཚར་བའི་ཡོན་བདག་བཞིན། །དེ་ཕྱིན་ཆད་དེ་ཕྱོགས་སེམས་མི་འཕྲེང་། །ད་སུས་ཁྱེར་ཁྱེར་ལ་ཅི་བྱེད་གྱིས། །མི་ངས་ནི་ལྷ་ལ་ཕུལ་ཚར་སྙམ། །སེམས་ཆགས་ཞེན་ཅུང་ཟད་ལྟ་ཀྱིས་ཀྱང་གནོད། །དོན་དེ་ཕྱིར་ཆགས་འཛིན་རྩད་ནས་སྤང་། །རང་ཐུགས་ཀར་ཐུགས་དབུས་དབུ་མའི་ནང་། །ཧཱི༔དམར་པོ་ཚེགས་དྲག་བཅས་པ་ལས། །ཧྲཱིཿདེ་འདྲ་རིམ་
བཞིན་འཕྲོས་པ་ཡིས། །མར་ངན་སོང་འགྲོ་བའི་སྒོ་གསུམ་པོ། །འོག་གཤང་ལམ་ཆུ་ལམ་ཐིག་ལེའི་ལམ། །ཡར་ཁ་ཡི་ལམ་དང་བཞི་པོ་བཀག །བར་མི་དང་ལྷ་མིན་འདོད་ལྷའི་ལམ། །གནས་ལྟེ་བ་སྣ་གཡོན་སྣ་གཡས་བཀག །མི་འཁོར་ལོས་བསྒྱུར་རྒྱལ་གྲུལ་བུམ་དང་། །ཡར་གཟུགས་ཁམས་རྣམས་སུ་སྐྱེ་བའི་ལམ། །མིག་གཡས་གཡོན་རྣ་བ་གཡས་གཡོན་བཀག །འདིར་འདོད་བཞེད་མང་སྟེ་ཐེ་ཚོམ་སྐྱུར། །གནས་གཟུགས་ཁམས་གཟུགས་མེད་སྐྱེ་བའི་སྒོ། །གནས་སྨིན་མཚམས་ཚངས་སྨེ་བདུད་སྒོ་བཀག །དེ་ཐམས་ཅད་ཧཱུྃཡིག་དམར་པོ་རེ། །འོག་སྲ་མཁྲེགས་ལྡན་པས་ཁྲིག་གེར་བཀག །དཔེ་ཐེམ་བུ་ཐེམ་གྱིས་དགག་པ་བཞིན། །ལུས་ཆགས་འཇིག་གཉིས་ཀ་བྱེད་པའི་གནས། །རང་ལྟེ་འོག་དབུ་མའི་ནང་དེ་རུ། །གདན་པདྨ་དམར་པོ་འདབ་མ་བཞི། །དེའི་སྟེང་དུ་ཟླ་དཀྱིལ་ཆུང་ངུའི་སྟེང་། །རང་རྣམ་ཤེས་རླུང་སེམས་ཀུན་འདུས་པ། །དབྱིབས་ཐིག་ལེ་དཀར་ཟླུམ་སྲན་མ་ཙམ། །མདོག་དཀར་དམར་མདངས་ལྡན་འབར་ལ་ཁད། །དཔེ་སྐར་ཁུང་ནང་ནས་མདའ་འཕང་བཞིན། །ཡར་དབུ་མར་བརྒྱུད་དེ་རྒྱངས་སེ་ཐོན། །རྗེ་
འོད་དཔག་མེད་པའི་ཐུགས་ཀར་བསྟིམ། །དེ་ཡང་ནས་ཡང་དུ་བསྒོམ་ཝིག་བྱ། །དཔེ་སྐར་མདའ་ཡང་ཡང་ཆད་པ་བཞིན། །ལན་ཉེར་གཅིག་ལས་ནི་མི་ཉུང་བྱ། །དུས་དེ་ནས་རང་ལུས་སྤྱན་རས་གཟིགས། །ལྷ་རྒྱལ་བ་རྒྱ་མཚོའི་ང་རྒྱལ་བསྐྱེད། །རང་གདམས་ངག་ཟབ་མོ་འདི་འདྲ་བསྒོམ། །མི་མི་འཆི་འདུག་ས་གཅིག་མེད་དེ། །མི་ང་ལས་སྐྱིད་པ་མེད་སྙམ་པའི། །སེམས་ཞུམ་པ་སྤང་ལ་ང་རྒྱལ་སྐྱེད། །འདི་ཤིན་ཏུ་གལ་ཆེན་ཡིན་པར་གསུངས། །རང་སྙིང་དབུས་པདྨ་ཟླ་སྟེང་དུ། །ཐུགས་ཧཱིཡིག་ཡི་གེ་དྲུག་པས་བསྐོར། །ཧཱིའོད་ཟེར་ཉི་མ་ཤར་བ་བཞིན། །ལུས་ནང་ཀུན་ཤིན་ཏུ་གསལ་བར་བསྒོམ། །རང་སེམས་ངོ་གཏན་ནས་མ་རྟོགས་ཀྱང་། །འདི་ཁོ་ནས་ཐུགས་དམ་ཤིན་ཏུ་བརྟན། །སེམས་གནས་འགྱུ་ཙམ་ཡང་མི་ཤེས་པའི། །ཁོང་དགེ་བཤེས་མང་པོའི་དགུང་ཞག་ལ། །སྤུར་བཀྲག་མདངས་མ་ཡལ་ཐུགས་དམ་བརྟན། །དེ་ཐུགས་ཀའི་ཡི་དམ་སྒྱུ་ས་བོན་ལ། །སེམས་རིག་པ་གཏད་པ་མ་གཏོགས་པ། །གཞན་བསྒོམ་རྒྱུ་མེད་པ་ཐག་གིས་ཆོད། །རང་དེ་ནས་ཅི་ཡང་མི་བསྒོམ་པར། །སེམས་གང་ཤར་ངོ་བོར་བལྟ་བར་
བྱ། །ལུས་ཕྱི་ནང་འབྱུང་བའི་ཐིམ་རིམ་དང་། །དུས་དེ་རྗེས་དཀར་ལམ་དམར་ལམ་དང་། །དེ་འཆར་ལུགས་དཔག་མེད་བཤད་ན་ཡང་། །ཡུན་རིང་པོ་མ་ཡིན་སེ་གོལ་ཙམ། །དེ་སོ་སོར་ངོས་བཟུང་བྱ་མི་དགོས། །སེམས་ཁོ་རང་མ་གཏོགས་འཆར་རྒྱུ་མེད། །གང་ཤར་ཡང་དེ་ཡི་ངོ་བོ་བལྟ། །དེའི་ངང་ལ་ཕྱི་དབུགས་ཆད་མ་ཐག །ཕྱི་ལུས་ལ་ཚོར་བ་ཅི་ཡང་མེད། །ནང་སེམས་ཉིད་དྲན་མེད་ནག་ཐོམ་འགྲོ། །དུས་དེ་ཚེ་གདུང་བཅས་གཟབ་ཅིག་སྨྲ། །ཡུན་འདི་འདུག་ཚོད་ཟིན་མེད་ན་ཡང་། །ལར་འཆི་ཁའི་སེམས་དེ་སྟོབས་ལྡན་པས། །དེ་གང་བསམ་ཐོག་ཏུ་འགྲོ་བའི་ཕྱིར། །མི་ཆོས་པ་རྣམ་དག་འགའ་ཞིག་ཀྱང་། །འཕྲལ་འཆི་རྐྱེན་མཚམས་སྦྱོར་ངན་པའི་མཐུས། །དབུགས་འགྲོ་ཁར་ཞེ་སྡང་སྨོན་ལམ་གྱིས། །བདུད་ལྷ་སྲིན་དྲག་པོར་སྐྱེས་ལ་ལྟོས། །སྟོན་རྒན་རྒོན་འཆི་ཁ་ལོ་ཏོག་ལ། །སྲུས་མ་རག་བསམ་པའི་སེམས་ཀྱི་མཐུས། །སྟོན་འབྲས་དྲུག་འཇོམས་པ་དེ་ལ་ལྟོས། །སང་མི་འགྲོ་ཀ་མེད་གལ་ཆེན་དུས། །སང་ཐོ་རངས་སྐར་རྗེན་ཤར་ཙམ་ན། །འགྲོ་བསམ་པའི་གཉིད་ཁའི་དམ་བཅའ་དེས། །གཉིད་དེ་དུས་སད་དང་མཚུངས་
པར་གསུངས། །རང་ཞག་བདུན་ལ་སོགས་ནམ་འདོད་པར། །རང་ཐུགས་དམ་འདུག་པའི་དམ་བཅའ་བཟུང་། །དེ་ཐོག་ཏུ་འགྲོ་བ་མྱོང་བས་གྲུབ། །ལུས་གདུང་བཅས་གཟབ་པ་ཚར་དུས་ཙམ།། །ཁྱེད་ཐུགས་དམ་མ་ཡེངས་བརྗོད་དུ་བཅུག །དུས་དེ་དུས་ཚོགས་བརྒྱད་མི་གསལ་ཡང་། །མིང་གཞི་ཡི་འོད་གསལ་ཞེས་སུ་གྲགས། །དོན་ངོ་བོ་རྗེན་པར་ནང་ནས་འཆར། །དོན་དེ་ཡི་ངང་ལ་གནས་པར་བྱ། །ཕྱི་འབྲུག་སྒྲ་འུར་ཆོམ་ལ་སོགས་ལ། །དེར་རྣམ་རྟོག་རགས་པ་མ་སྐྱེས་ན། །ནང་དེ་རུ་རྣམ་རྟོག་ཕྲའུ་འགའ། །དེ་སྐྱེས་ཀྱང་ཐུགས་དམ་མི་གྲོལ་ཏེ། །དོན་བར་དོ་ཐོས་གྲོལ་ངོ་སྤྲོད་ལས། །ཕྱིར་རྣམ་ཤེས་འཕོ་རྟགས་མ་བྱུང་བར། །མཆུ་རྣ་བར་མ་རེག་ཙམ་བྱས་ནས། །ཚིག་ངོ་སྤྲོད་ཡང་ཡང་བྱ་བར་གསུངས། །དེ་སྦྱོར་དྲུག་སྐོར་ནས་བཤད་དང་མཚུངས། །དོན་འདི་ཡང་ཉམས་ལེན་མྱོང་བས་གྲུབ། །གྲྭ་འཁོར་སློབ་གདུང་བཅས་གཟབ་མཁས་ན། །དེ་ཐུགས་དམ་གྲོལ་ཡང་མི་ཡོ་ཞིང་། །དེ་མ་མཁས་མ་གྲོལ་ན་ཡང་ཡོ། །དོན་འདི་ཡང་མྱོང་བས་ལན་མང་གྲུབ། །དེ་ཐུགས་དམ་གྲོལ་དང་མ་གྲོལ་རྟགས། །འདི་བརྟག་
གཞིག་ཤིན་ཏུ་ཞིབ་པ་གཅེས། །ལུས་མ་སྐམ་ཡི་ག་མ་ཆད་ཅིང་། །དེ་འཆི་ཁ་སྐོམ་རྩི་སྦྱོང་སྨན་མང་། །དེ་ཐུགས་དམ་གྲོལ་བ་མ་ཡིན་ཡང་། །ཁ་སྣ་དང་བུ་གར་རླན་སོགས་འབབ། །ལུས་སྐམ་སྒོག་ཡི་ག་ཡུན་རིང་ཆད། །དེ་ཐུགས་དམ་གྲོལ་བར་གྱུར་ཀྱང་ནི། །དེ་གྲོལ་རྟོགས་སྣ་སྒོར་ཆུ་སེར་མེད། །དེ་གཉིས་པོ་མ་ཡིན་སྐྱེ་འཚམས་ལ། །དེ་གྲོལ་རྟགས་སྣ་ནས་ཆུ་སེར་འབབ། །ཁོང་ས་ལམ་མཐོན་པོ་ཡིན་ན་ནི། །དེ་ཆུ་སེར་འཐིག་པ་རིང་བསྲེལ་འགྱུར། །རབ་འགའ་རེས་སྤྱི་བོར་ཆུ་སེར་འཕྲུམ། །ཡང་འཆི་ཁར་ཆུ་གཅིན་འགགས་པ་འགའ། །དེ་ཐུགས་དམ་གྲོལ་རྟགས་ཆབ་གསིལ་འབྱུང་། །དོན་འདི་ཡང་མྱོང་བས་ལན་འགའ་གྲུབ། །བཀའ་གསར་རྙིང་གཏེར་ཁ་གང་ནས་ཀྱང་། །མི་འཆི་དུས་འོད་གསལ་ཟིན་པའི་རྟགས། །ལུས་ཚུགས་ཐུབ་ཙོག་པུར་འདུག་མང་གསུངས། །ཕྱི་རྟགས་མཚན་ནམ་མཁའ་གཡའ་དག་ལ། །དེ་སྟོན་ཀ་ཡིན་ཀྱང་སད་མི་འབྱུང་། །ནང་རྟགས་མཚན་ཤ་བཀྲག་ཡུན་རིང་གནས། །དོན་གསང་བའི་རྟགས་མཚན་ཨ་ཡིག་དང་། །ཧཱུཾ་རིང་བསྲེལ་ལ་སོགས་འབྱུང་བར་གསུངས། །དོན་དེ་ཕྱིར་ལུས་
ཚུགས་གདུང་བཅས་ཤེས། །དོན་བལྟ་ས་ཤ་བཀྲག་ཁོ་ན་ཡིན། །སྐུ་བགྲེས་དྲག་ཤ་བཀྲག་མེད་པ་ལ། །དེ་འདས་ཙ་གསར་དུ་གང་ནས་འབྱུང་། །ད་འོན་ཀྱང་གསོན་དུས་སྐུ་མདོག་ལས། །དེ་བག་ཙམ་དཀར་མདངས་སྣུམ་བག་ཚགས། །ཁོང་གཞོན་དུས་ཡིན་ཀྱང་གསོན་དུས་ལས། །མདོག་བག་ཙམ་དཀར་ཞིང་སྣུམ་འོད་ཆགས་། །སྤྱན་ཟིམ་བུ་ཞལ་ཡང་འཛུམ་པ་འདྲ། །ཤངས་མ་སྡིབ་རྣ་བ་མ་འབྱར་བར། །བཞིན་དཔྲལ་བའི་རྩ་རྣམས་ཚུར་ལ་ལངས། །ཚུར་སྐྱི་མོ་འཐེན་ན་ཕར་ལ་རང་། དབྱར་ཡིན་ཡང་སྦྲང་བུ་མི་འཁོར་རོ། །དགུན་ཡིན་ཡང་འཁེང་བར་མི་འགྱུར་ཏེ། །མདུན་དེ་རུ་ཉམས་ལེན་ཡོད་པའི་མི། །དེར་ཕྱིན་ཅིང་བསྡད་ན་ཉམས་རྟོགས་གསལ། །དེ་ཐུགས་དམ་ཡིན་པའི་རྟགས་སུ་ངེས། །སྤྲོས་རོལ་མོ་གྱེར་དབྱངས་འཛེམ་སྲོལ་གདའ། །དེ་འཛེམ་སྲོལ་ཞག་བདུན་ཚུན་ལ་ཆེ། །དཔེ་མེ་སྟག་ཆུང་ངུ་འདའ་སླ་བཞིན། །དེ་ཕན་ཆད་འོད་གསལ་ཆེར་མཆེད་པས། །དེ་འཛེམ་པ་མི་དགོས་གསུངས་སྲོལ་གདའ། །དོན་དེ་ཡང་བདེན་པར་མྱོང་བས་གྲུབ། །ད་འོན་ཀྱང་བླ་མ་ཁོང་ཉིད་དང་། །མཁོན་དམ་
ཚིག་ཚབས་ཆེན་ཆག་པའི་མི། །དེས་མཇལ་ན་ཐུགས་དམ་གྲོལ་རྐྱེན་བྱེད། །དེ་མིན་པའི་སུས་མཇལ་གནོད་པ་མེད། །དོན་དེ་ལ་ནོར་ས་གཅིག་ཡོད་པས། །མི་སྡིག་ཅན་སེམས་ངོ་མི་ཤེས་པ། །དེ་འཆི་དུས་ལུས་ཚུགས་རང་ཚོ་ཐུབ། །ངོ་ནད་མེད་དུས་བཞིན་སྣུམ་རྩིག་གེ །དེ་ཐུགས་དམ་ཟིན་པ་མ་ཡིན་ཏེ། །གདོན་དྲི་ཟ་ཕུང་པོར་ཞུགས་པ་ཡིན་། །ཚབས་ཆེ་ན་རོ་ལངས་བྱེད་ཉན་ཡོད། །དེ་ཆོས་དྲུག་རྒྱས་པའི་ནང་ནས་གསལ། །དོན་འདི་ཡང་ལན་མང་མྱོང་བས་གྲུབ། །རོས་ཚིག་སྨྲ་བཤུད་པ་བྱེད་ཅེས་ཐོས། །ལུས་སྐམ་པའི་ཐུགས་དམ་གྲོལ་རྟགས་ནི། །ཁྲག་ཆུ་སེར་གཅིན་སོགས་མ་བྱུང་ཡང་། །མདོག་ཉམས་ཤིང་སྣ་ཞོམ་མིག་འབྲས་སྡིབ། །དབྱར་ཡིན་ན་སྦྲང་བུ་འཁོར་བ་དང་། །དགུན་ཡིན་ན་ལུས་པོ་འཁེངས་འདུག་ན། །དེ་ཐུགས་དམ་གྲོལ་བའི་རྟགས་སུ་ངེས། །སྤུར་བཞུ་ཁ་ཐུགས་དམ་གཤེགས་གསོལ་ཞེས། །དེས་ལུས་ལྷ་དབང་ལྷ་བསྟིམ་པ་རྣམས། །དེ་མཆོད་བསྟོད་བྱ་ཞིང་གཤེགས་གསོལ་བྱ། །ལྷ་རྣམ་སྣང་དམ་ཚིག་གཙོ་རྐྱང་ཞིག །སླར་བསྐྱེད་ནས་ཡེ་ཤེས་མི་བསྟིམ་པར། །དུས་དེ་ནས་གནས་ཡིག་སོགས་
སྦྱར་ཏེ། །དེ་མ་བྱས་ཕུང་པོ་བསྲེག་པ་ན། །དེར་ལུས་ལྷ་དཀྱིལ་འཁོར་ཡོངས་རྫོགས་པ། །དེ་བཤིག་པས་སྡིག་པ་ཆེ་ཞེས་གསུངས། །དེ་བྱས་ན་རྟེན་ཤུགས་ཆུང་བ་འབྱུང་། །དོན་ལྷ་དང་ཁོང་གཉིས་དབྱེར་མེད་དུ། །དེ་བསྒོམས་ནས་སྲེག་བླུགས་ཕུལ་བ་ལ། །སྡིག་མི་འབྱུང་ཡོན་ཏན་རྟེན་ཤུགས་ཆེ། །དེས་གདུང་སྒོ་ཐིལ་སོགས་མི་དགོས་པར། །འཕྲལ་ཉིད་ནས་བྱོན་པའི་རྟེན་ཞལ་རུང་། །ཡང་གལ་ཏེ་གཤེགས་གསོལ་བྱས་ན་ནི། །སླར་གདུང་སྒོ་ཞག་གསུམ་མཐིལ་བྱས་ཏེ། །དེར་ཁོང་གི་ཡི་དམ་དཀྱིལ་འཁོར་བསྐྱེད། །དེར་ཞག་གསུམ་སྤྱན་འདྲེན་མཆོད་གཏོར་འབུལ། །དེ་མི་གཤེགས་རུས་བུ་རྣམས་ལ་བསྟིམ། །རྔ་རོལ་མོ་དང་བཅས་བྱིན་འབེབ་བྱ། །སྔགས་རྟེན་འབྲེལ་པོས་རབ་ཏུ་གནས། །སླར་བཀྲ་ཤིས་བརྗོད་ནས་རྟེན་ཞལ་བསྟན། །དེར་མེ་ལོང་ངོས་ནས་ཁྲུས་གསོལ་འབུལ། །རྟེན་འབྱོན་ལུགས་བཏགས་གྲོལ་གཞུང་མཐུན་འབྱུང་། །ཚེ་སྔོན་གྱི་ལས་འབྲས་ཁྱད་པར་གྱིས། །ཚེ་འདི་ལ་ཐུགས་དམ་རྩེ་གཅིག་པའི། །ལྷ་སྐུ་དང་སྔགས་སོགས་མི་འབྱུང་ཞིང་། །དོན་མེད་པའི་ལྷ་སྔགས་འབྱོན་སྲིད་
ཀྱང་། །ལྷ་ཐམས་ཅད་ངོ་བོ་གཅིག་པའི་ཕྱིར། །དེར་ཐེ་ཚོམ་བསྐྱེད་པར་མི་བྱའོ། །ཚེ་འདི་ལ་ཐུགས་དམ་དཔག་མེད་ཅིང་། །སྔགས་བསྙེན་སྒྲུབ་མང་དུ་ཐེམས་པ་ལ། །གཞུང་རྣམས་ནས་བཤད་ལྟར་རྟེན་འབྱོན་ཏེ། །དོན་སྟོང་ཉིད་ཁོ་ན་བསྒོམ་པ་ལ། །ཕྱི་ནམ་མཁའ་གཡའ་དག་མ་གཏོགས་པ། །རྟེན་ཅི་ཡང་འབྱོན་པར་མ་གསུངས་པས། །རྟེན་ཅི་ཡང་བྱོན་པར་མ་གྱུར་ན། །ཁོང་སྦྱིན་བདག་དད་པ་མི་ལོག་ཕྱིར། །རྟེན་བཟོ་ཐབས་མང་པོ་གསུངས་ན་ཡང་། །དེ་ཇོ་བརྫུ་རྫུན་ཚིག་ཆེ་བའི་ཕྱིར། །རང་འདུལ་ཁྲིམས་སྡོམ་པ་ཉམས་དོགས་མཆིས། །དོན་དེ་ཕྱིར་རྟེན་བཟོ་སྤང་བར་བྱ། །རྟེན་རིང་བསྲེལ་བྱོན་ངེས་ཡིན་ན་ཡང་། །དོན་དེ་ལ་རབ་འབྲིང་ཐ་མ་གསུམ། །རབ་ས་ཐོབ་ཡན་གྱི་འཕགས་པའི་གདུང་། །དེ་སྲ་མཁྲེགས་གཞོམ་ཞིག་བྲལ་བ་སྟེ། །དེ་ཡིན་མིན་ལྕགས་གཏུན་ནང་དུ་བཞག །དེ་གཏུན་མདིལ་ལྕགས་ཀྱིས་དྲག་བསྣུན་ན། །དེ་མི་འཆག་ལྕགས་ལ་རྗེས་གཏོད་པ། །དེ་རྫོགས་སངས་རྒྱས་དང་རང་རྒྱལ་དང་། །དགྲ་བཅོམ་པའི་རིང་བསྲེལ་ཡིན་པའི་རྟགས། །མདོག་དཀར་སེར་དམར་ལྗང་མཐིང་ག་ལྔ། །མིང་ཤ་
རི་རམ་དང་ཆུ་རི་རམ། །གདུང་མེ་རི་རམ་དང་ཉ་རི་རམ། །དེ་པཉྩ་རམ་དང་རྣམ་པ་ལྔ། །དེ་གདུང་ལྔ་མཐོང་རེག་དོན་དང་ལྡན། །ཡང་རིང་བསྲེལ་ནག་པོ་དམྱལ་བའི་རྒྱུ། །མདོག་དམར་ནག་ཁམ་ནག་དུད་ཁའི་མདོག །དེ་བདུད་དང་སྲིན་པོར་སྐྱེ་གསུངས་ཀྱང་། །དེ་སྤྱིར་བཏང་ཡིན་གྱི་ངེས་ཏིག་མེད། །སྔོན་ཇོ་བོ་རྗེ་ལའང་ནག་པོ་མང་། །དེ་མན་ལ་སྐུ་གདུང་མིང་མི་འཐོབ། །མདོག་རིགས་ལྔ་ཕྲ་ཞིབ་སྣུམ་ལ་འདྲིལ། །དེ་བརྡུང་ན་འཆག་པས་རྡུང་མི་བཏུབ། །སྣོད་ཐེབ་ཙེ་གཙང་མར་ཉི་མའི་ནང་། །རྟེན་ལི་མ་ཚད་པས་ཐག་གིས་ལེན། །དེ་བྱིན་རླབས་ལྡན་པའི་རིང་བསྲེལ་རྟགས། །ཡང་བཟོ་མ་རྡོ་ཡི་རིང་བསྲེལ་སོགས། །རྟེན་ལི་མས་ལེན་པ་མ་ཡིན་ནོ། །དོན་ལོག་པའི་སྡིག་པའི་རིང་བསྲེལ་ནི། །མི་མཚམས་མེད་སྡིག་སྟོབས་ཅན་ལ་འབྱུང་། །དེ་མིན་པའི་ལས་ངན་བདུད་སྤྲུལ་གྱི། །རོ་བསྲེག་ཚེ་བེ་ཀར་རྒྱལ་པོ་དེས། །ཁོས་བར་ཆད་སྲོ་མ་སྤར་གང་བཏབ། །དེ་མི་འོས་རིང་བསྲེལ་ཚན་ཆེར་འབྱུང་། །དེ་དད་གུས་བྱས་ཚད་ངན་འགྲོར་ལྟུང་། །དེ་བཞིན་དུ་བྱ་ཕག་ཉ་ལ་སོགས། །བར་སྐྱེ་བ་གཞན་གྱིས་མ་ཆོད་
པར་། །ལུས་སྐྱེ་བདུན་བརྩེགས་མར་བླངས་པ་ཡི། །སྤྱིར་སེམས་ཅན་སུ་ལའང་རིང་བསྲེལ་འབྱུང་། །དེ་མཚན་མ་རྫས་ཀྱི་རིང་བསྲེལ་ཡིན། །ཕག་རིང་བསྲེལ་ཅན་གྱི་ཤ་ཟོས་ན། །དེ་དམྱལ་བར་འགྲོ་ཞེས་ཀུན་ལ་གྲགས། །མི་དལ་འབྱོར་ཆོས་ལྡན་སྐྱེ་བ་བདུན། །དེ་བརྩེགས་མར་བླངས་ལ་རིང་བསྲེལ་འབྱུང་། །ཤ་རུས་པ་སྐྱེ་བདུན་རུ་རྩིའི་རྫ་ས་། །ལར་རྟེན་བཟོ་ལ་སོགས་མིན་ངེས་ན། །སྐུ་ཡིག་འབྲུ་བྱོན་པ་འཁྲུལ་པ་མེད། །དབུ་བུམ་རིལ་དུང་དཀར་གཡས་འཁྱིལ་སོགས། །དེ་བྱོན་ན་མཆོག་སྟེ་ནོར་འཁྲུལ་མེད། །ཐུགས་ལྗགས་དང་སྤྱན་གཉིས་གྲགས་ཆེ་ཡང་། །དེ་བྱོན་པ་དང་ནི་མ་བྱོན་གཉིས། །དོན་སྲེག་ཚོད་ཟིན་དང་མ་ཟིན་ཁྱད། །དབྱིབས་གདུང་གཡོག་ལག་པའི་འདུ་བྱེད་ཙམ། །དུས་དེང་སང་ཐུགས་ལྗགས་སྤྱན་འབྲས་ཟེར། །འདི་ནོར་ས་མཚར་པོ་གདའོ་ཨང་། །འདིར་གདུང་གཡོག་རིག་པ་རྣོ་བ་གཅེས། །རྟེན་འབྱོན་ལ་ཁྲུས་གསོལ་རབ་གནས་བྱ། །དེ་མ་བྱས་སྐུ་དང་ཡིག་འབྲུ་རྣམས། །དེ་དང་པོ་གསལ་ཡང་མི་གསལ་འགྲོ། །རྟེན་རིང་བསྲེལ་ཕྲ་ཞིབ་མི་སྣང་ཡལ། །མི་དད་ལྡན་དམ་ཚིག་གཙང་བའི་
མགུལ། །ཅི་མ་བྱོན་རུས་དུམ་བཏགས་པ་དེར། །སྐུ་ཡིག་འབྲུ་རིང་བསྲེལ་བྱོན་པའང་སྣང་། །དེ་བཞིན་དུ་གདུང་ཐལ་ཐུམ་བུའི་ནང་། །སྔར་མེད་པའི་རིང་བསྲེལ་འབྱུང་བའང་སྣང་། །མི་དམ་ཉམས་ལོག་ལྟ་ཆེ་བའི་མགུལ། །སྔར་བྱོན་པ་ཕྱིས་ནས་མེད་པའང་འབྱུང་། །དོན་དེ་ཚོ་ངོ་མཚར་རྨད་དུ་བྱུང་། །དོན་དེ་ཚོ་ཕལ་ཆེར་མྱོང་བས་གྲུབ། །ཨེ་མ་ཧོ། གལ་ཏེ་ཐུགས་དམ་བརྟན་པོ་མ་ཟིན་ན། །ཞག་གསུམ་ཉི་མའི་དྲོས་བཞི་དུས་འཕོས་ན། །བར་དོའི་ཡིད་ལུས་མ་བླངས་སྐབས་དེ་ལ། །འོད་གསལ་ཕྱག་ཆེན་ངོ་བོ་རྗེན་པར་འཆར། །དེ་ཚེ་དེ་ཉིད་ངོས་བཟུང་དེ་ངང་བཞག །དེ་ཡི་ངང་ལ་ཡུན་རིང་གནས་པ་ན། །འོད་གསལ་གཉིས་པ་ཞེས་བྱ་ཟིན་པ་ཡིན། །དེ་ཉིད་མ་ཟིན་ཟིན་ཡང་ཡུན་ཐུང་ན། །བར་དོ་ཡིད་ཀྱི་ལུས་སུ་ཀྲོང་གིས་སྐྱེ། །དེ་དུས་གདོས་བཅས་ཤ་ཁྲག་ལུས་མེད་ཀྱང་། །རྨི་ལམ་དུས་ལྟར་ལུས་གཅིག་ཡོད་སྣང་འབྱུང་། །ཤི་འམ་མ་ཀླུ་ཤི་རང་གིས་ངོ་མི་ཤེས། །སྔར་བཞིན་ཁྱིམ་དང་ཉེ་སྐོར་དེ་རུ་འཁོར། །དེ་ནས་རྣམ་སྣང་ལ་སོགས་ཞི་ཁྲོའི་ལྷ། །རིམ་པ་བཞིན་དུ་འཆར་བར་བཤད་ན་ཡང་། །སྔོན་དུ་འོད་
གསལ་བརྟན་པོ་ཟིན་ན་ནི། །དེ་ནས་ལྷ་རྣམས་གཅིག་ཀྱང་མི་འཆར་སྲིད། །བར་དོ་གཉིས་པ་ཅུང་ཟད་ཟིན་ན་ནི། །ཞག་བརྒྱད་དུས་སུ་སྣང་བ་མཐའ་ཡོས་འཆར། །འོད་གསལ་མ་ཟིན་ཞག་བདུན་ཉིན་པར་འཆར། །ཐོས་གྲོལ་སྣང་བ་མཐའ་ཡས་འཆར་གསུངས་དང་། །མདོ་ལས་བདེ་བ་ཅན་དུ་སྐྱེ་རྒྱུ་རྣམས། །མདུན་དུ་འོད་དཔག་མེད་པ་འབྱོན་གསུངས་པ། །དོན་གཅིག་ཞག་བརྒྱད་ཉིན་པར་འཆར་བར་ངེས། །དེ་ཕྱིར་ཞག་བདུན་ཐུགས་དམ་འདུག་པ་དང་། །ཐུགས་དམ་གྲོལ་དང་འོད་དཔག་འཆར་བ་གཉིས། །དུས་མཉམ་འོང་རྒྱུ་བྱས་པས་ལེགས་པ་སྟེ། །ད་ལྟ་བློ་རྩེ་གཏད་ཕྱོགས་སྨོན་ལམ་མཐུས། །ངེས་པར་འཆར་ཞིང་དེ་ཡང་ངོས་ཟིན་ཏེ། །ཟིན་རྟགས་མཁའ་ལ་འཇའ་ཚོན་ངོ་མཚར་བ། །དམར་སེར་ཤས་ཆེ་ཁ་དོག་ལྔ་ལྡན་འབྱུང་། །འདི་ཡང་ལག་ལེན་མྱོང་བས་གྲུབ་པ་ཡིན། །དེས་ནི་ངེས་པར་བདེ་ཆེན་ཞིང་དུ་སྐྱེ། །དེ་ནི་གང་ཟག་ཐ་མའི་འབྲིང་དུ་བརྩི་།དེ་ལྟར་ཐུགས་དམ་བཟུང་ལུགས་དེ་བྱས་པས། །དང་པོ་སྐྱབས་འགྲོ་བྱས་པས་རྒྱབ་རྟེན་བཟང་། །དེ་ནས་སེམས་བསྐྱེད་བསམ་པའི་བཟོ་རྒྱ་ལེགས། །འབུལ་བ་ཚར་
བའི་ཀ་ཆ་གར་སོང་ཡང་། །ཡོན་བདག་དེ་ལ་ཆགས་ཞེན་མི་སྐྱེ་ལྟར། །མཎྜལ་ཕུལ་བས་ཆགས་ཞེན་འཁྲི་བ་ཆོད། །སྒོ་དགུ་བཀག་པས་ལོག་པའི་ལམ་མི་འགྲོ། །དང་པོ་འཕོ་བའི་དམིགས་པ་བསྒོམ་པ་དེས། །ཐུགས་དམ་མ་ཟིན་པའམ་འགྲོགས་ཤོར་ཡང་། །ཚངས་བུག་མ་གཏོགས་སྒོ་གཞན་དེར་མི་འགྲོ། །རང་ལུས་ལྷར་བསྒོམ་ཧཱིལ་སེམས་གཏད་པས། །ཐུགས་དམ་བརྟན་པོ་ཟིན་ཅིང་འགྲོགས་པར་དཀའ། །ཐུགས་དམ་བརྟན་ཅིང་གསལ་པོ་ཟིན་པ་དེས། །སྦྱིན་བདག་དད་ཅིང་གྲྭ་སློབ་ངོ་སོ་མཐོ། །ཕྱི་རབས་ཆོས་པ་ཀུན་གྱི་བསྟན་ལ་ཕན། །ཞག་བདུན་བཞུགས་ནས་ཞག་བརྒྱད་ཉིན་འཕོས་པས། །འོད་དཔག་འབྱོན་དང་འཕྲད་པས་རང་ཉིད་འཚེང་། །གྲྭ་སློབ་རྣམས་ལ་སྟབས་བདེ་རིང་ཐུང་འཚམས། །འདི་ལྟར་འཕོ་བ་ཐུགས་དམ་ཟུང་འཇུག་ལ། །ཐོས་རྒྱ་ཆུང་བའི་རྨོངས་པ་འགའ་ཞིག་གིས། །འཕོ་བ་ཐུགས་དམ་འགལ་ཞེས་འཕྱ་ཐོས་ཀྱང་། །ཆོས་སྐུའི་འཕོ་བ་ཐུགས་དམ་དོན་གཅིག་སྟེ། །འཕོ་བྱ་འཕོ་བྱེད་མེད་པའི་བྱ་བཏང་གིས། །ལུས་གནས་ཡེ་ཤེས་བརྗོད་མེད་ཕྱག་རྒྱ་ཆེ། །དེ་ལས་གུད་ན་སངས་
རྒྱས་གཞན་མེད་པས། །རང་གྲོལ་དྭགས་པོ་བཀའ་བརྒྱུད་འགྲུབ་པར་ཤོག །གསུངས་པའི་དོན་ཡང་དེ་ལ་དགོངས་པ་ཡིན། །ལོངས་སྐུའི་འཕོ་བ་ལྷ་སྐུ་བསྒོམ་པ་དང་། །ཆོས་སྐུའི་འཕོ་བ་དམིགས་མེད་འཇོག་པ་གཉིས། །འགལ་ལོ་སྙམ་དུ་ཐེ་ཚོམ་སྐྱེས་པ་ན། །བསྐྱེད་རྫོགས་ཟུང་འཇུག་ཉམས་ལེན་མེད་པའི་རྟགས། །འདི་དང་ཕྱི་མ་བར་དོ་གསུམ་ཀ་ལ། །ཉམས་ལེན་གཅིག་གིས་ས་ལམ་གཅོད་དགོས་པས། །སྤྱི་བོར་འོད་དཔག་རང་ལུས་སྤྱན་རས་གཟིགས། །ཐུགས་ཀར་ཧྲིལ་སེམས་གཏད་ངོ་བོ་སྐྱོང་། །བསྐྱེད་རྫོགས་ཟུང་འཇུག་དེ་ཡི་ངང་དུ་འཆི། །འཕོ་བ་ཐུགས་དམ་ཟུང་འཇུག་གདམས་ངག་ཟབ། །གལ་ཏེ་ཉམས་ལེན་ལྡན་པའི་གང་ཟག་ཀྱང་། །སྐམ་པོའི་ལག་སྟབས་ཆུ་ནང་མི་འོང་དཔེ། །མཚམས་སྦྱོར་ངན་པས་ཤི་འམ་གནད་གཅོད་ཆེ། །འཆི་ཁར་སྨྱོ་འམ་དབང་པོ་མི་གསལ་འཐིབ། །དེ་འདྲའི་རྐྱེན་གྱིས་བསྐྱེད་རྫོགས་མ་ཟིན་ན། །གང་ཟག་དབང་པོ་རབ་འབྲིང་ཉེར་གཅིག་གིས། །ཐ་མའི་ཡང་མཐའ་གྲོལ་བའི་གདམས་ངག་སྟེ། །འཆི་ཁའམ་བར་དོ་གྲོལ་བ་མ་ཐོབ་ན། །ཕྱི་མ་སྤྲུལ་སྐུའི་དྲུང་དུ་དབུགས་དབྱུང་ཐབས། །
འཆི་ཁར་འཕོ་བ་ཐེབས་སམ་མ་ཐེབ་རུང་། །འཆི་དུས་འོད་གསལ་ཟིན་ནམ་མ་ཟིན་རུང་། །ཞི་ཁྲོའི་ལྷ་ངོས་ཟིན་ནམ་མ་ཟིན་རུང་། །ཤི་ནས་བདུན་ཕྲག་ཕྱེད་གསུམ་ཙམ་གྱི་དུས། །རང་ཉིད་ཤི་བ་ཡིན་པར་ཐག་ཆོད་ཅིང་། །ཟག་བཅས་མངོན་པར་ཤེས་པ་ཤིན་ཏུ་གསལ། །རྫུ་འཕྲུལ་ཐོགས་མེད་གར་འགྲོ་རང་དབང་ཆེ། །ཤི་བས་སེམས་སྡུག་གཉེན་ལ་རེ་མཁང་ཆེ། ༈ །སྡིག་པ་གང་བྱས་དྲན་ཅིང་འགྱོད་པ་ཆེ། །གཤིན་རྗེའི་ཕོ་ཉ་འོང་དོགས་སྐྲག་པ་ཆེ། །ད་རེས་དམ་ཆོས་མ་འགྲུབ་ཞེ་འགྱོད་ཆེ། །ས་ཕྱོགས་ཡུལ་རིས་ནོར་ལ་ཆགས་སེམས་ཆེ། །ཉེ་དུ་མཐུན་གྲོགས་རྣམས་ལ་གདུང་སེམས་ཆེ། །དག་པའི་ཞིང་ཀུན་འགྲོ་དབང་ཡོད་ན་ཡང་། །ཐག་རིང་འགྲོ་ཤེས་མི་ནུས་ཕྱོགས་དེར་ཆགས། །ཉེ་སྐོར་འདི་རུ་མི་ལུས་གཅིག་ལོན་ན། །དེ་ནས་དམ་ཆོས་གཤའ་མ་བྱེད་དོ་སྙམ། །དེ་ཡང་འགྱོགས་དགོས་ཡུན་རིང་བསྒུག་ལོངས་མེད། །གཤིན་རྗེའི་ཕོ་ཉས་ལྟ་ཁྲིད་ནས་གཤིན་རྗེའི་མདུན། །དགེ་སྡིག་གཤག་རལ་ཞིབ་ཏུ་བྱེད་དགོས་ན། །དགེ་སྡིག་གང་མང་མི་ཤེས་སྐྱོན་རེ་ཆེ། །དེ་བས་མྱུར་དུ་ལུས་ལེན་བསམ་ནས་ཚོལ། །ས་རྡོའི་
བར་དུའང་ལུས་པོ་བརྫོང་ལ་ཐུག །དེ་ཚེ་གདམས་ངག་འདི་ཉིད་དྲན་པར་གྱིས། །ཀྱེ་མ་ཀྱེ་ཧུད་བསྐལ་པ་གྲངས་མེད་ན། །འཁོར་བ་འདི་ནས་མ་ཐར་གཉུག་རེ་བུད། །སྔོན་བྱོན་སངས་རྒྱས་གྲངས་མེད་བསྟན་པ་ལ། །བདག་ནི་ད་དུང་མ་གྲོལ་ལས་རེ་ངན། །སྐྱེ་འཆི་གྲངས་མེད་དེ་ཙམ་མྱོང་བ་ལ། །ད་དུང་འཚེར་སྣང་མེད་པ་སྙིང་རེ་རུལ། །ངན་སོང་གནས་སུ་ལྟུང་ན་ཡ་རེ་ང་། །མཐོ་རིས་བདེ་བ་མི་རྟག་རྨི་ལམ་ཙམ། །དེང་སང་དུས་ངན་སྙིགས་མ་བསྟན་པའི་མཇུག །མི་ལུས་བླངས་ན་སྡུག་བསྔལ་རིན་གྱིས་ཉོས། །སངས་རྒྱས་རྣམས་ཀྱིས་འགྲོ་དོན་འགྲུབ་དཀའ་ན། །འགྲོ་དོན་ཕར་སྐྱུར་ངན་སོང་ལྟུང་ཉན་ཆེ། །ད་ནི་འཁོར་བའི་གནས་འདིར་འདུག་རེ་ཀན། །སྡུག་བསྔལ་ཀུན་བྲལ་གཏན་བདེ་འགྲུབ་པའི་གནས། །བདེ་བ་ཅན་གྱི་ཞིང་དེར་མི་འགྲོ་རེ། །བློ་གཏད་བཅས་པའི་བླ་མ་ཡི་དམ་ལྷ། །བསྙེན་ཅིང་བསྒྲུབས་པའི་མཁའ་འགྲོ་ཆོས་སྐྱོང་ཚོགས། །བདག་ནི་བར་དོར་འཁྱམས་པ་གཟིགས་ལགས་སམ། །ཐུགས་རྗེའི་ཐུགས་དམ་ཕྲིན་ལས་དུས་ལ་བབས། །བདེ་བ་ཅན་གྱི་ཞིང་དེར་ལམ་སྣ་དྲོངས། །ཞེས་སོགས་ལྷ་དང་བླ་མར་འབོད་
པར་བྱ། །སྨན་བླ་ཐུགས་དམ་བྱས་པའི་མི་ཡིན་ན། །བྱང་ཆུབ་སེམས་དཔའ་མཆེད་བརྒྱད་དེར་བྱོན་ནས། །བདེ་བ་ཅན་དུ་འགྲོ་བའི་ལམ་སྟོན་པར། །སྨན་བླ་མཆེད་བདུན་མདོ་ལས་གསུངས་པ་ཡིན། །ཕྱག་བཞི་པ་དང་ཞིང་སྐྱོང་ལ་སོགས་པ། །བསྙེན་ཅིང་བསྒྲུབས་པའི་གང་ཟག་ཡིན་ན་ནི། །དེར་འབྱོན་བདེ་བ་ཅན་དུ་ཁྲིད་པ་ནི། །ཕྱག་བཞི་པ་ཡི་གྲི་གུག་བརྩེགས་རྒྱུད་དང་། །ཞིང་སྐྱོང་སྲོག་རྒྱུད་ནང་ནས་གསལ་བར་གསུངས། །གལ་ཏེ་དམ་ཚིག་ཆག་ཉམས་ཀྱིས་བསྒྲིབས་ན། །ལམ་སྟོན་བྱེད་མཁན་ལྷ་ཡང་མ་མཐོང་ཞིང་། །བར་དོར་ཉི་མ་ཟླ་བ་མི་སྣང་བས། །ནུབ་ཀྱི་ཕྱོགས་དེ་གར་ཡིན་མ་ཤེས་ན། །བདེ་བ་ཅན་གྱི་ཞིང་དང་འོད་དཔག་མེད་། །ཡིད་ལ་དུང་དུང་་བསྒོམ་ཞིང་སོང་བས་ན། །ཞིང་ཁམས་དེ་རུ་ངེས་པར་ཕྱིན་པ་ནི། །དགོངས་འདུས་ཐུགས་རྗེ་ཆེན་པོ་ལ་སོགས་པ། །ཨོ་རྒྱན་གྱིས་མཛད་བྱང་བུའི་ལམ་བསྟན་གསལ། །འཇིག་རྟེན་ཁམས་ནི་གང་གཱའི་བྱེ་མ་སྙེད། །འདས་པའི་ཕ་རོལ་ས་ཐག་རིང་ན་ཡང་། །མི་ཕྱིན་པ་ཡི་དོགས་པ་མེད་པ་སྟེ། །མགྱོགས་བུལ་ད་ལྟའི་འགྱུ་བ་འདི་ཉིད་ཡིན། །དེ་
ཕྱིར་མ་ཆགས་མ་ཞེན་ཐེ་ཚོམ་སྤང་། །།བྱ་རྒྱལ་རྒོད་པོ་རྙི་ནས་ཐར་བ་བཞིན། །ནུབ་ཀྱི་ཕྱོགས་སུ་ཁ་གཏད་ནམ་མཁའི་དབྱིངས། བྱ་རྒྱལ་རྒོད་པོས་གནམ་འཕང་གཅོད་བཞིན་སོང་། །འདི་ནས་འགྲོ་དང་ཞིང་དེའི་བར་ལམ་དུ། །ཁྱོད་ཀྱི་ཕ་མ་ཉེ་འདུ་མཐུན་གྲོགས་རྣམས། །ང་ཡིན་མ་འགྲོ་མ་སྒྱུར་འདིར་ཤོག་ཟེར། །མིང་ནས་འབོད་ཅིང་སྨྲེ་སྔགས་འདོན་པ་ན། །བདུད་བགེགས་ལོག་འདྲེན་ཐར་པའི་བར་ཆད་ཡིན། །ཕྱི་མིག་མ་བལྟ་སྐད་ལན་མ་སྦྱིན་ཅིག །སངས་རྒྱས་འོད་དཔག་མེད་པ་མ་གཏོགས་པ། །ཡིད་ལ་ཅི་ཡང་བསྒོམ་པར་མ་བྱེད་ཅིག །བདེ་བ་ཅན་གྱི་བདེ་སྐྱིད་མ་གཏོགས་པ། །ཅི་དང་གང་ལའང་འདོད་སེམས་མ་སྐྱེད་ཅིག །དེ་བྱས་བདེ་བ་ཅན་དུ་ཕྱིན་པར་ངེས། །ཞིང་དེར་དེ་བཞིན་གཤེགས་པ་འོད་དཔག་མེད། །པདྨ་རཱ་གའི་རི་འདྲ་འོད་ཟེར་འབར། །ཞལ་མཇལ་སྐུ་ཡི་འོད་ཟེར་ཕོག་མ་ཐག །ལས་དང་ཉོན་མོངས་སྒྲིབ་པ་ཕལ་ཆེར་དག །སྐུ་རྒྱབ་གཏད་པའི་བྱང་ཆུབ་ཤིང་ཆེན་དེ། །མཐོང་བས་ཡོན་ཏན་དཔག་མེད་རྒྱུད་ལ་སྐྱེས། །དེ་ནས་མེ་ཏོག་པདྨ་ཁ་ཟུམ་པ། །གཅིག་ལ་ང་ཡིས་ཡིན་སྙམ་ཆགས་སེམས་སྐྱེ། །དེ་མ་
ཐག་ཏུ་དེ་ནང་བརྫུས་ཏེ་སྐྱེ། །སྐྱེས་མ་ཐག་ཏུ་ལུས་རྫོགས་མཚན་དཔེས་བརྒྱན། །ད་ལྟ་མི་སྐྱེ་དོགས་པར་ཐེ་ཚོམ་ན། །ལོ་གྲངས་ལྔ་བརྒྱར་མེ་ཏོག་ཁ་མི་བྱེ། །བདེ་སྐྱིད་ལྡན་ཡང་སངས་རྒྱས་ཞལ་མཐོང་འཕྱི། །ཐེ་ཚོམ་མེད་ན་དེ་མ་ཐག་ནས་བྱེ། །སངས་རྒྱས་མཆོད་ཅིང་དམ་ཆོས་ཐོས་པ་དང་། །བྱང་ཆུབ་མཆོག་གི་ལུང་བསྟན་ཐོབ་པར་འགྱུར། །དེར་སྐྱེས་ཕྱིར་ལ་ལྟུང་བ་མི་སྲིད་པས། །འབྲེལ་ཐོགས་ལ་སོགས་འདྲེན་དགོས་མང་ན་ཡང་། །རྫུ་འཕྲུལ་སྟོབས་ཀྱིས་དམྱལ་བ་བར་དོ་སོགས། །བགྲོད་ཅིང་དེ་དག་འདྲེན་པས་ཆོག་པ་ཡིན། །ཆོས་སྤངས་མཚམས་མེད་བྱས་པ་མ་གཏོགས་པ། །བསམ་པ་བྱང་ཆུབ་མཆོག་ཏུ་སེམས་བསྐྱེད་ཅིང་། །ཞིང་ཁམས་དེ་རུ་སྨོན་ལམ་བཏབ་པ་དང་། །སངས་རྒྱས་འོད་དཔག་མེད་ལ་རྩེ་གཅིག་དད། །དགེ་སྡིག་གཉིས་ལས་དགེ་བ་སྟོབས་ཆེ་ན། །ཞིང་དེར་སྐྱེ་བ་འོད་དཔག་སྨོན་ལམ་སྟོབས། །ཁྱད་པར་མན་ངག་འདི་ཡོད་ཐེ་ཚོམ་མེད། །སེམས་བསྐྱེད་མི་ལྡན་སྨོན་ལམ་མ་བཏབ་དང་། །སྡིག་ཤས་ཆེ་བ་རྣམས་ནི་དེར་མ་གཏོགས། །ཆོས་སྒོར་མ་ཞུགས་རྣམས་ནི་ག་ལ་གཏོགས། །འོན་ཀྱང་
དབང་བསྐུར་མཚན་ཐོས་ཕན་ཡོན་དང་། །རྗེས་ནས་བསྔོ་བ་སྨོན་ལམ་མཐུ་ཤུགས་ཀྱིས། །དུས་མཐར་སྐྱེ་བའི་རྒྱུ་རུ་འགྱུར་བ་སྟེ། །དེ་དོན་འབྲེལ་བ་ཐོགས་ཆོག་ནང་དུ་གསལ། །དེ་ཕྱིར་དབང་ཐོབ་ཙམ་དང་མཚན་ཐོས་ཙམ། །ཡབ་སྲས་ཞལ་མཐོང་ཙམ་གྱིས་སྐྱེ་གསུངས་པ། །རྫུན་དུ་མི་འགྱུར་དེ་ལ་དགོངས་པ་ཡིན། །དེ་ཕྱིར་དགེ་རྩ་ཆུང་ཟད་ཙམ་རེས་ཀྱང་། །ཞིང་དེར་སྐྱེ་གསུངས་དོན་དེ་ཤེས་པར་གྱིས། །དེ་དོན་བརྩོན་འགྲུས་རྒྱ་མཚོས་ཞུས་པའི་ལན། །ཤཱཀྱའི་དགེ་སློང་རཱ་ག་ཨ་སྱ་ཡིས། །རྟ་ལོ་ཁྲུམས་ཟླའི་ཆ་དམར་པོའི་བཅུ་གཅིག་ཉིན། །མདོ་རྒྱུད་མན་ངག་ཀུན་གྱི་བཅུད་བསྡུས་པ། །དཔེ་ལ་མ་བལྟས་འཕྲལ་དུ་ངག་ནས་སྨོས། །དགེ་བཤེས་བརྩོན་འགྲུས་རྒྱ་མཚོ་ཡི་གེ་བ། །ནོངས་པ་མེད་པས་བཤགས་བྱ་ཅང་མ་མཆིས། །དགེ་བས་འདི་ཉིད་མཐོང་ཐོས་དྲན་རེག་ཀུན། །སྐྱེ་བ་གཞན་གྱིས་བར་མཚམས་མི་ཆོད་པར། །བདེ་བ་ཅན་གྱི་ཞིང་དེར་བརྫུས་སྐྱེས་ནས། །འོད་དཔག་མེད་མགོན་མཆོད་པས་མཉེས་བྱེད་ཤོག །ལེའུ་ཞེ་གསུམ་པའོ་མངྒ་ལཾ།། །།