རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་བཤད་པ།
རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་བཤད་པ། གསུམ་པ་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་འབྱེད་ཆ་མཐུན་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། རང་རྒྱལ་གྱི་ལམ་མངོན་སུམ་དུ་ཤེས་པའི་ཚུལ་བཤད་པའི་འོག་ཏུ། དེའི་ངེས་འབྱེད་ཆ་མཐུན་འཆད་ཚུལ་ཡོད་དེ། རང་རྒྱལ་གྱི་ལམ་ཤེས་པའི་ལམ་ཤེས་ཀྱི་རྒྱུ་ངེས་པར་འབྱེད་པའི་ཆ་དང་མཐུན་པ་ཐོབ་ན་སྔར་ཇི་སྐད་བཤད་པའི་ལམ་ཤེས་སྐྱེ་བས་དེ་འཆད་པ་ཡིན་པའི་ཕྱིར། གཉིས་པ་ལ། དྲོད་ནི། དེའི་རྒྱུ་ངེས་འབྱེད་ཆ་མཐུན་དུ་གྱུར་པའི་སྦྱོར་ལམ་དྲོད་ཡོད་དེ། ཕྱི་དོན་མེད་པར་རྟོགས་ཀྱང་། བརྡར་བཏགས་པའི་ཆོས་ཉིད་དང་མི་འགལ་བར་གཟུགས་སོགས་སྟོན་པའི་རྣམ་པ་དྲོ་བར་གྱུར་པ་དེ་ཡིན་པའི་ཕྱིར། རྩེ་མོ་ནི། དེ་འདྲའི་རྩེ་མོ་གཞག་ཏུ་ཡོད་དེ། གཟུགས་ལ་སོགས་པ་ཕྱི་རོལ་གྱི་དོན་དུ་འགྲིབ་པ་མེད་པ་ལ་སོགས་པས་ཕྱེ་བ་དེ་དེ་འདྲའི་རྩེ་མོར་གྱུར་པའི་ཕྱིར། བཟོད་པ་ནི། དེ་འདྲའི་བཟོད་པ་ཡོད་དེ། མིག་སོགས་ནང་གི་སྐྱེ་མཆེད་རྣམས་སྟོང་པར་རྟོགས་པ་ལ་སོགས་པའི་མཐུ་ཡིས་གཟུགས་སོགས་ཕྱི་རོལ་དོན་དུ་མི་འཛིན་པ་དེ་དེ་འདྲའི་བཟོད་པ་ཡིན་པའི་ཕྱིར། ཆོས་མཆོག་ནི། དེ་འདྲའི་ཆོས་མཆོག་གཞག་ཏུ་ཡོད་དེ། གཟུགས་སོགས་ཕྱི་རོལ་དོན་དུ་སྐྱེ་བ་མེད་པ་སོགས་ཀྱི་རྣམ་པ་ཅན་ནི། དེར་གྱུར་པའི་ཆོས་ཀྱི་མཆོག་ཡིན་པའི་ཕྱིར། གསུམ་པ་ལ། དྲོད་ནི། བཏགས་པའི་ཆོས་ཉིད་ཅེས་སོགས་རྩ་
འགྲེལ་གྱི་དོན་ཡོད་དེ། གཟུགས་ལ་སོགས་པ་ཐ་སྙད་ཙམ་དུ་ཡོད་པའི་ཆོས་ཀྱི་བརྡ་ལས་བྱུང་བའི་བཏགས་པའི་ཆོས་ཉིད་མི་འགལ་བར་རབ་ཏུ་སྟོན་པ་ལྟར་རྟོགས་པའི་དྲོད་དངོས་སུ་བསྟན་ནས། གཟུང་འཛིན་རྫས་ཡོད་ཀྱིས་སྟོང་པར་རྟོགས་པའི་དྲོད་ཤུགས་ལ་བསྟན་པའི་ཕྱིར། རྩེ་མོ་ནི། རྐང་པ་ལྷག་མ་གཉིས་རྩ་འགྲེལ་གྱི་དོན་ཡོད་དེ། གཟུགས་ལ་སོགས་པ་ལ་དོན་དམ་པར་འགྲིབ་པ་དང་འཕེལ་བ་མེད་པ་ལ་སོགས་པའི་དོན་དུ་སློབ་པ་ལྟར་རྟོགས་པའི་རྩེ་མོ་དངོས་སུ་བསྟན་ནས། ཅིག་ཤོས་ཤུགས་ལ་བསྟན་པའི་ཕྱིར། བཟོད་པ་ནི། རྐང་པ་ལྷག་མ་རྩ་འགྲེལ་གྱི་དོན་གཞག་ཏུ་ཡོད་དེ། དོན་དམ་པར་ངོ་བོ་ཉིད་ཀྱིས་སྟོང་པ་ཉིད་ཀྱི་ཕྱིར་གཟུགས་ལ་སོགས་པ་ལ་ནང་དང་ཕྱི་རོལ་ལ་སོགས་པ་བདེན་པས་སྟོང་པ་ཉིད་དུ་རྟོགས་པ་ཉིད་ཀྱིས་གཟུང་བྱ་བདེན་གྲུབ་ཡོངས་སུ་མི་འཛིན་པའི་བཟོད་པ་དངོས་སུ་བསྟན་ནས་ཅིག་ཤོས་ཤུགས་ལ་བསྟན་པའི་ཕྱིར། ཆོས་མཆོག་ནི། རྐང་པ་ལྷག་མ་རྩ་འགྲེལ་གྱི་དོན་ཡོད་དེ། གཟུགས་ལ་སོགས་པ་ལ་དོན་དམ་པར་སྐྱེ་བ་དང་འགག་པ་ལ་སོགས་པ་མེད་པར་རྟོགས་པའི་ཆོས་མཆོག་གི་ཡེ་ཤེས་དངོས་སུ་བསྟན་ནས། ཅིག་ཤོས་ཤུགས་ལ་བསྟན་པའི་ཕྱིར། དོན་བསྡུ་ནི། ཤེས་བྱ་ཆོས་ཅན། བྱང་སེམས་ཀྱི་རྒྱུད་ལ་རང་རྒྱལ་གྱི་ལམ་ཤེས་པའི་ལམ་ཤེས་ཀྱི་ངེས་པར་འབྱེད་པའི་ཆ་དང་མཐུན་པ་སྐྱེ་ཚུལ་ཡོད་དེ། སྔར་བཤད་པའི་རྣམ་པ་རྣམས་ཀྱིས་བདེན་པ་བཞིའི་གོ་རིམ་བཞིན་དུ་བདེན་པ་བཞིའི་དམིགས་པ་ལ་དམིགས་ནས་བསྒོམས་པས་སྐྱེ་བའི་ཕྱིར།