དཔེ་རྒྱན་གྱི་སྐོར་བཤད་པ།
དཔེ་རྒྱན་གྱི་སྐོར་བཤད་པ།གཉིས་པ་དཔེ་རྒྱན་ལ། མཚན་ཉིད། དཔེར་བརྗོད། སྐྱོན་ཡོན། མཚུངས་པ་གསལ་བྱེད་ཀྱི་སྒྲ་དང་བཞི། དང་པོ་ནི། མཚོན་བྱེད་ཀྱི་དཔེ་ལ་ཇི་ལྟར་ཡོད་པ་དག་ཇི་གཞིག་ཏུ་མཚོན་བྱའི་དཔེ་ཅན་ལ་དེ་ལྟར་ཡོད་པར་མཚུངས་པ་གསལ་བར་གང་དུ་རྟོགས་པར་བྱེད་པ་དེ་ནི་དཔེའི་རྒྱན་ཞེས་བྱ་སྟེ། དེ་ཡི་སྤྲོས་པ་མཐའ་དག་འདིར་ནི་རབ་ཏུ་བཤད་པར་བྱའོ། །གཉིས་པ་ལ་སུམ་ཅུ་རྩ་གཉིས་ལས། དང་པོ་ཆོས་དཔེ་ནི། །དཔེ་ཅན་མཛེས་མ་ཁྱོད་ཀྱི་ལག་པའི་མཐིལ་ནི། དཔེ་དཀར་དམར་གྱི་མདངས་དང་ལྡན་པའི་ཆུ་སྐྱེས་བཞིན་དུ་ཀུན་ཏུ་དམར་བར་ཆོས་མཚུངས་(༣༧བ)
སོ་ཞེས་པས་ཆོས་དཔེ་དངོས་སུ་ནི་བསྟན་ཏེ། རྒྱུ་མཚན་མཚུངས་པའི་ཆོས་དམར་པོ་དག་སྒྲས་གསལ་བར་བསྟན་པའི་ཕྱིར་རོ། །དཔེར་ན། ངག་དབང་དབྱངས་ཅན་དགྱེས་པའི་ཞལ་གྱི་སྒོ། །ཡིད་འོང་འཛུམ་པའི་དབུས་ན་བཞི་བཅུའི་ཚེམས། །ཚར་དུ་དངར་འདི་ཉི་འོད་ཀྱིས་ཁྱབ་པའི། །གངས་ཀྱི་རི་བོ་ལྟ་བུར་དཀར་ཞིང་མཛེས། །ཞེས་པ་ལྟ་བུ།གཉིས་པ་དངོས་དཔེ་ནི། དཔེ་ཅན་མཛེས་མ་ཁྱོད་ཀྱི་གདོང་དང་མིག་དག་ནི། དཔེ་པདྨ་དང་ཨུཏྤལ་ལ་སྔོན་པོ་བཞིན་ནོ། །ཞེས་དཔེ་དང་དཔེ་ཅན་གྱི་ངོ་བོ་ཙམ་དངོས་སུ་བརྗོད་ནས། མཚུངས་ཆོས་གདོང་དང་པདྨ་དཀར་ཞིང་མཛེས་པ་དང་། མིག་དང་ཨུཏྤལ་མཐིང་ཞིང་དཀྱུས་རིང་བ་སོགས་དངོས་སུ་མི་གསལ་བར་ཤུགས་ལ་བསྟན་པས་མཚུངས་ཆོས་གཅིག་ཏུ་རྟོགས་པར་བྱེད་པ་དེ་ནི་དངོས་པོའི་དཔེ་ཉིད་དོ། །དཔེར་ན། དབྱངས་ཅན་ལྷ་མོའི་དབུ་སྐྲའི་ཟུར་ཕུད་འདི། །སྤྲིན་བྲལ་འཆི་མེད་ལམ་དང་ཡང་དག་མཚུངས། །ལང་ཚོའི་རང་བཞིན་དར་བའི་ནུ་འབུར་ཟུང་། །དབྱར་གྱི་ཆུ་འཛིན་གསར་པ་གཡོ་བ་བཞིན། །ཞེས་པ་ལྟ་བུ། གསུམ་པ་ཟློག་པའི་དཔེ་ནི། དཔེ་ཅན་མཛེས་མ་ཁྱོད་ཀྱི་གདོང་བཞིན་དུ། དཔེ་པདྨ་ནི་རྣམ་པར་རྒྱས་པར་གྱུར་རོ་ཞེས་པ་དེ་ནི། སྤྱིར་འཇིག་རྟེན་གྲགས་ཚོད་ལ་དཔེས་དཔེ་ཅན་ཕར་འཇལ་དགོས་པ་ལ། དེ་ལས་གོ་ཟློག་པའི་ཕྱིར་ཟློག་པའི་དཔེ་ཞེས་བྱ་བར་འདོད་དོ། །དཔེར་ན། འཇོ་སྒེག་ཉམས་ལྡན་བརྟན་པའི་འཁོར་ལོའི་སྐུ། །འོད་ཀྱི་ཕུང་པོ་མངོན་པར་འཕྲོ་བ་བཞིན། བཅུ་གཉིས་(༣༨ན)
བདག་པོ་འཆར་ལ་མངོན་ཕྱོགས་པའི། །མཚམས་སྤྲིན་གསར་པའི་ཁ་དོག་ཡིད་དུ་འོང་། །ཞེས་པ་ལྟ་བུ། བཞི་པ་ཕན་ཚུན་གྱི་དཔེ་ནི། དཔེ་ཅན་མཛེས་མ་ཁྱོད་ཀྱི་ཞལ་བཞིན། ཆུ་སྐྱེས་མཛེས་པ་ལྟར། དཔེ་ཆུ་སྐྱེས་བཞིན་དུ་ཁྱོད་ཀྱི་ཞལ་ཡང་མཛེས་སོ་ཞེས་པ་དཔེ་དཔེ་ཅན་གཉིས་ཕན་ཚུན་འཇལ་རེས་བྱས་པའི་སྒོ་ནས་དཀར་མཛེས་སོགས་གཉིས་ཀ་ལ་མཚུངས་པའི་ཁྱད་འཕགས་བརྗོད་པར་བྱེད་པ་འདི་ནི་ཕན་ཚུན་གྱི་དཔེའོ། །དཔེར་ན། དབྱངས་ཅན་འདོད་པའི་མྱོས་བུམ་ཇི་བཞིན་དུ། །ལང་ལོང་གཡོ་བའི་ཆུ་འཛིན་གསར་པ་སྟེ། །སྤྲིན་དཀར་ལྟ་བུར་ཁྱོད་ཀྱི་ནུ་འབུར་ཡང་། །རབ་དཀར་གཡོ་བ་ཡིད་ཀྱི་དཔལ་དུ་འཇེབས། །ཞེས་པ་ལྟ་བུ། ལྔ་པ་ངེས་པའི་དཔེ་ནི། དཔེ་ཅན་ལུས་ཕྲ་ཁྱོད་ཀྱི་ཞལ་ནི། དཔེ་པདྨ་ཉིད་གཅིག་པུ་དང་མཛེས་པ་སོགས་ཀྱི་སྒོ་ནས་མཚུངས་ཀྱི། དཔེ་ཅན་ཁྱད་པར་དུ་འཕགས་པའི་དབང་གིས་དེའིདཔེར་འོས་པ་གཞན་ནི་འགའ་ཞིག་སྟེ་གང་དང་ཡང་ཡོད་པ་མིན་ནོ་ཞེས་པ་སྟེ། འཇིག་རྟེན་ན་མཚུངས་པ་གཞན་ཟློག་ཕྱིར། འདི་ནི་ངེས་པ་ཉིད་ཀྱི་དཔེའོ། །དཔེར་ན། སྙན་ཚིག་གཞུང་ལུགས་རྒྱ་མཚོ་སྨྲ་བ་ལ། །ངག་གི་དཔལ་གྲུབ་ཤོང་སྟོན་ལོ་ཙཱ་བ། །མཚོ་བྱུང་སྙིང་གར་རོལ་བ་དཎྜཱི་དང་། །མཚུངས་ཀྱི་རིགས་མཐུན་གཞན་ན་ཡོད་མ་ཡིན། །ཞེས་པ་ལྟ་བུ། དྲུག་པ་ངེས་མེད་ཀྱི་དཔེ་ནི། །རེ་ཞིག་དཔེ་ཅན་ལུས་ཕྲ་ཁྱོད་ཀྱི་གདོང་ནི། དཔེ་པདྨ་ཡི་རྗེས་སུ་འགྲོ་བར་མ་ཟད། དཔེ་གཞན་ཡང་། དཔེ་པདྨ་དེ་དང་འདྲ་བ་གལ་ཏེ་ཡོད་ན་གདོང་གི་དཔེ་དེས་བྱེད་པར་འགྱུར་རོ་ཞེས་པ་འདི་ནི་གཅིག་ཏུ་(༣༨བ)
མེད་པའི་དཔེའོ། །དཔེར་ན། འཇམ་མགོན་བླ་མ་ཀུན་མཁྱེན་ཙོང་ཁ་པ། །ཤིང་རྟ་ཆེན་པོ་ཀླུ་སྒྲུབ་དང་མཚུངས་ཀྱི། །གཞན་དུ་དེ་འདྲའི་ངང་ཚུལ་ལྡན་པ་དག །སྲིད་འདིར་མཆིས་ན་ཁྱོད་ཀྱི་དཔེ་ཟླར་རིགས། །ཞེས་པ་ལྟ་བུ། བདུན་པ་བསྡུས་པའི་དཔེ་ནི། དཔེ་ཅན་ཁྱོད་ཀྱི་གདོང་མཛེས་པ་ཁོ་ན་ཡིས། དཔེ་ཟླ་བའི་རྗེས་སུ་འགྲོ་བ་མ་ཡིན་ཏེ། བྱ་བའི་ཁྱད་པར་གཞན་དགའ་བ་སྐྱེད་པར་བྱེད་པའི་ལས་ཀྱིས་ཀྱང་ཟླ་བ་དང་མཚུངས་སོ་ཞེས་པ་འདི་འདྲ་ཡོན་ཏན་གཞན་དག་བསྡུས་པའི་དཔེ་ཡང་ཡོད་དོ། །དཔེར་ན། ཆོས་རྒྱལ་དགེ་དབང་དྲང་སྲོང་བློ་ལྡན་དང་། །སྙན་པར་སྨྲ་བའི་ངག་གི་དངོས་གྲུབ་དག །ཐོབ་པ་ཙམ་གྱིས་མཚུངས་མིན་ལེགས་བྲིས་ཀྱི། །ཕུམ་སུམ་ཚོགས་པའི་ངང་ཚུལ་ལྡན་འདིས་ཀྱང་། །ཞེས་པ་ལྟ་བུ། བརྒྱད་པ་ཕུལ་བྱུང་གི་དཔེ་ནི། དཔེ་ཅན་མཛེས་མ་ཁྱོད་ཀྱི་ཞལ་ནི། ཁྱོད་ཀྱི་གཟུགས་ཉིད་ཁོ་ན་ལས་མཐོང་ཞིང་། དཔེ་ཟླ་བ་ནི་ནམ་མཁའ་ལས་མཐོང་བའི་མཐོང་ཡུལ་གྱི་ཁྱད་པར་ཅུང་ཟད་ཙམ་འདི་ཉིད་ཁོ་ནས་ཐ་དད་དེ། གཞན་ཁྱད་པར་མེད་ཅེས་འུད་ཆེན་པོ་བྱས་པ་འདི་ཕུལ་བྱུང་གི་དཔེ་སྟེ། དངོས་གནས་ལ་གདོང་ལས་ལྷག་པའི་ཁྱད་པར་ཟླ་བ་ལ་མང་དུ་ཡོད་པས་སོ། །དཔེར་ན། སྐད་གཉིས་སྨྲ་བ་རྡོ་རྗེ་རྒྱལ་མཚན་དང་། །ངག་གི་དབང་ཕྱུག་ལྷ་མོ་དབྱངས་ཅན་མ། །འདོད་པའི་མྱོས་བུམ་ལྡན་དང་མི་ལྡན་གྱི། །དབྱེ་བ་ཙམ་ལས་གཞན་དུ་ཐ་མི་དད། །ཅེས་པ་ལྟ་བུ། དགུ་པ་རབ་བཏགས་ནི། དཔེ་ཅན་མཛེས་མ་དེ་ཡི་བཞིན་གྱི་དཔལ། དཔེ་ཟླ་བ་ང་ཉིད་ལ་ཡོད་ཅེས་ཟླ་བ་སྙེམས་པར་བྱེད་མི་དགོས་སོ་ཞེས་དཔེ་ལ་བསམ་པ་(༣༩ན)
མེད་བཞིན་དུ་སྒྲོ་བཏགས་ཏེ། ཟླ་བ་ཁྱོད་དུ་མ་ཟད་པདྨ་ལ་ཡང་མཛེས་མའི་གདོང་གི་ཡོན་ཏན་དེ་ཡོད་པའི་ཕྱིར། ཞེས་པ་འདི་ནི་རབ་བཏགས་ཀྱི་དཔེའོ། །དཔེར་ན། འཇམ་མཉེན་ཆུ་སྐྱེས་གཞོན་ནུའི་ཡལ་འདབ་རྣམས། །དབྱངས་ཅན་ལྷ་མོའི་ཕྱག་གི་སོར་མོའི་དཔལ། །སྙེམས་པར་མི་འཚལ་ལེགས་བྲིས་རྐེད་མེད་མའི། །ལག་པའི་ཡལ་ག་དེ་ཡི་དགྲ་ཟླ་བྱེད། །ཅེས་པ་ལྟ་བུ། བཅུ་པ་རྨད་བྱུང་གི་དཔེ་ནི། གལ་ཏེ་དཔེ་པདྨ་འགའ་ཞིག་ལ་འདོད་པས་རྣམ་པར་འཕྲུལ་བའི་མིག་དང་ལྡན་ན། དཔེ་ཅན་སྨིན་ལེགས་མ་ཁྱོད་ཀྱི་བཞིན་གྱི་དཔལ་འཛིན་ཏེ། ཞེས་དཔེ་མིག་དང་ལྡན་པའི་པདྨ་དཀོན་པ་ལྟར་བྱས་ཏེ། དཔེ་ཅན་ངོ་མཚར་བར་སྟོན་པ་འདི་ནི་རྨད་བྱུང་གི་དཔེའོ། །དཔེར་ན། ན་ཚོད་དར་བབས་ཡན་ལག་མཆོག་མ་ཡིས། །མི་ཟད་ངག་གི་དངོས་གྲུབ་སྟེར་ནུས་ན། །རྣ་བ་བརྒྱད་པའི་མཆེ་བ་ལས་འོངས་པའི། །ངག་དབང་དབྱངས་ཅན་མ་དེའི་འགྲན་ཟླར་བྱེད། །ཅེས་པ་ལྟ་བུ། བཅུ་གཅིག་པ་རྨོངས་པའི་དཔེ་ནི། དཔེ་ཅན་ལུས་ཕྲ་མ་ཁྱོད་ཀྱི་གདོང་དང་། དཔེ་རི་བོང་ཅན་གཉིས་ཧ་ཅང་འདྲ་བས་གང་ཡིན་ཞེས་བརྟགས་ཀྱང་ཤན་མ་ཕྱེད་པར། ཁྱོད་ཀྱི་གདོང་ནི་ཟླ་བར་འཁྲུལ་བའི་བསམ་པ་ཡིས། ཆགས་པའི་དབང་གིས་བཅོ་ལྔའི་ཟླ་བ་ཤར་བ་འདིའི་ཡང་རྗེས་སུ་སྙེག་གོ །ཞེས་པ་འདི་ནི་དཔེ་ཅན་དཔེ་རུ་འཁྲུལ་བས་རྨོངས་པའི་དཔེ་རུ་བཤད་དོ། །དཔེར་ན། འཆི་མེད་ཡུལ་དུ་གཤེགས་ཕྱིར་ཤཱཀྱའི་ཏོག །ཀུན་གསལ་ངོས་སུ་ཐོགས་མེད་རྒྱུ་བ་ན། །(༣༩བ)
རྟ་བདུན་མཁའ་ལ་འགྲོ་ཞེས་བླུན་པོ་འགའ། །པད་དཀར་འདབ་མ་འཛུམ་ལ་ལྟ་ཕྱིར་རྒྱུག །ཅེས་པ་ལྟ་བུ། བཅུ་གཉིས་པ་ཐེ་ཚོམ་གྱི་དཔེ་ནི། དཔེ་ཁྱད་གཞི་པདྨའི་ནང་དུ་ཁྱད་ཆོས་ཀྱི་བུང་བ་འཁོར་བའམ། དཔེ་ཅན་ཁྱད་གཞི་མཛེས་མ་ཁྱོད་ཀྱི་གདོང་པ་ལ་ཁྱད་ཆོས་མིག་གཡོ་བ་གང་རུང་ཞིག་ཅི་ལྟར་ཡིན་པ་འདྲ་ཡང་། བདག་གི་སེམས་ནི་ཐེ་ཚོམ་གྱི་རྣམ་པར་གཡོ་བ་ལས་གཅིག་ཏུ་ངོས་མ་ཟིན་ནོ། །ཞེས་པ་འདི་ནི་ཐེ་ཚོམ་གྱི་དཔེའོ། །དཔེར་ན། སྨྲ་མཁས་དྲང་སྲོང་ལྷ་ཡི་བླ་མ་དེ། །འཛམ་བུས་མཛེས་པའི་གླིང་འདིར་འོངས་པའམ། །ཡང་ན་ཐམས་ཅད་མཁྱེན་པ་ཆོས་སྐྱོང་བཟང་། །འཆད་རྩོད་རྩོམ་ལ་བྲེལ་སྙམ་འཕྱང་མོ་ཉུག །ཅེས་པ་ལྟ་བུ། བཅུ་གསུམ་པ་གཏན་ལ་འབེབས་པའི་དཔེ་ནི། ཟླ་བ་ཁ་སྐྱེངས་པར་བྱེད་པའི་ཤིན་ཏུ་མཛེས་པ་འདི་དཔེ་པདྨ་མ་ཡིན་ཏེ། པདྨ་དེ་ནི་ཟླ་བས་ཚར་གཅོད་ཅིང་ཟུམ་པར་བྱེད་ལ། འདི་ཚར་མི་གཅོད་པ་དེའི་ཕྱིར། ཟླ་བས་མི་འཇོམས་པའི་དཔེ་ཅན་མཛེས་མ་ཁྱོད་ཀྱི་གདོང་ཉིད་དོ། །ཅེས་དཔེ་དཔེ་ཅན་ཟླ་བས་འཇོམས་མི་འཇོམས་ཀྱི་ངེས་ཚིག་ཡོད་པ་འདི་གཏན་ལ་ཕེབས་པའི་དཔེའོ། དཔེར་ན། བརྡའ་སྤྲོད་གཞུང་བརྒྱ་སྨྲ་བའི་སློབ་དཔོན་འདི། །ལྷ་ཆེན་སྲས་པོ་གདོང་དྲུག་དང་མཚུངས་ཀྱང་། །གངས་ཅན་ལྗོངས་འདིར་ལེགས་སྦྱར་སྟོན་པའི་ཕྱིར། །པང་སྟོན་ལོ་ཆེན་བློ་གྲོས་བརྟན་པར་ངེས། །ཞེས་པ་ལྟ་བུ། བཅུ་བཞི་པ་སྦྱར་བའི་དཔེ་ནི། འདི་ནི་དོན་སྦྱར་བ་ཡིན་པས། སྦྱོར་ལུགས་དཔེ་ཅན་མཛེས་མའི་གདོང་གིས་མཛེས་པའི་(༤༠ན)
སྒོ་ནས་བསིལ་ཟེར་ཅན་གྱི་འགྲན་ཟླ་བྱེད་པ་དང་། དཔེ་པདྨས་ཉི་མའི་ཕྱོགས་ཡིན་པའི་སྒོ་ནས་འགྲན་ཟླ་བྱེད་པ་སྦྱར། དེ་བཞིན་དུ་དཔེ་ཅན་ལ་མཛེས་པའི་དཔལ་དང་། དཔེ་ལ་བུང་བའི་དཔལ་ལྡན་པ་སྦྱར། དཔེ་ཅན་མཛེས་མའི་ཁ་ལ་ཨུཏྤ་ལའི་དྲི་དང་། དཔེ་གསར་གྱི་དྲི་བཟང་པོ་གཉིས་སྦྱར་ནས། དཔེ་ཅན་ཁྱོད་ཀྱི་གདོང་ནི། དཔེ་ཆུ་སྐྱེས་བཞིན་ནོ། །ཞེས་མཚུངས་པའི་སྒྲ་དངོས་སུ་ཡོད་པའི་སྒོ་ནས་སྦྱོར་རྒྱུ་གཉིས་ལས་མི་ཉུང་བ་ནི་སྦྱར་བའི་དཔེ་རུ་བཤད་དོ། །དཔེར་ན། གང་ཞིག་བསྟེན་ན་ལེགས་པའི་དཔལ་སྟེར་ཞིང་། །མི་མཐུན་རྒུད་པའི་ཚོགས་ཀྱི་དགྲར་གྱུར་པ། །སྲིད་འདིར་ཤིན་ཏུ་རྙེད་དཀའ་ཟས་གཙང་སྲས། །ཡིད་བཞིན་དབང་གི་རྒྱལ་པོར་ཡང་དག་མཚུངས། །ཞེས་པ་ལྟ་བུ། བཅོ་ལྔ་པ་མཉམ་ཉིད་ཀྱི་དཔེ་ནི། མཚུངས་པར་ནུས་ཕྱིན། སྒྲ་གཅིག་ལ་གཅོད་མཚམས་མི་འདྲ་བ་གཉིས་སམ། མིང་གཅིག་ལ་དོན་མི་འདྲ་བ་གཉིས་སུ་བྱེད་པ་གང་རུང་གིས་དཔེ་དཔེ་ཅན་གཉིས་མཉམ་པ་ཉིད་དུ་བརྗོད་པར་ནུས་པར་བྱ་བའི་ཕྱིར་མཉམ་ཉིད་ཀྱི་དཔེ་སྟེ། ཇི་ལྟར་ན། དཔེ་ཅན་སྐྱེད་མོས་ཚལ་གྱི་ཕྲེང་བ་འདི། དཔེ་བུ་མོ་བཞིན་དུ་མཛེས་པ་དང་ལྡན་ནོ། །མཚུངས་ཆོས་སཱ་ལ་སྟེ་སྤོས་དཀར་གྱི་ཤིང་དང་། ཀཱ་ན་ན་ནགས་ཏེ། སྐྱེད་ཚལ་སྤོས་དཀར་ཤིང་གི་ནགས་ཀྱིས་མཛེས་སོ། །གཅོད་མཚམས་གཅིག་ལ། ས་བཅས་པ། ཨ་ལ་ཀ་ལན་བུ། ཨཱ་ན་ན་གདོང་པ། མཚུངས་འདྲ་བྱས་པས། བུ་མོ་གདོང་(༤༠བ)
ལན་བུ་དང་བཅས་པས་མཛེས་སོ། །ཡང་ན་མིང་གཅིག་པ་ལ་དོན་མི་འདྲ་བ། ཀུན་ལས་རྣམ་པར་རྒྱལ་བ་ལ་སངས་རྒྱས་དང་ཁྱབ་འཇུག་མཚུངས་ཀྱང་། རྒྱལ་ལུགས་མི་གཅིག་པ་སྟེ། དཔེར་ན། སྟོབས་བཅུ་མི་འཇིགས་བཞི་ཡི་རྩལ་རྣམས་ཀུན། །ཡོངས་སུ་རྫོགས་པའི་ཀུན་མཁྱེན་ཉི་མའི་གཉེན། །མཁར་ཉལ་གཙོ་བོ་ཐ་གུའི་ལྟོ་ཅན་བཞིན། །ཀུན་ལས་རྣམ་པར་རྒྱལ་བའི་དབང་ཕྱུག་ཐོབ། །ཅེས་པ་ལྟ་བུ། འདིའི་སྐབས་འཇམ་ཁ་དང་། བྱ་གཤོངས་ཀླུ་སྒྲུབ་པ་གཉིས་ཀྱིས་སྦྱར་བ་དང་མི་འདྲ་བའི་ཁྱད་པར་བཤད་པ་རྣམས་ནི་རྒྱུ་མཚན་མེད་པའི་རྟོག་བཏགས་ཁོ་ནར་འདུག་ཅིང་། སྣར་ཐང་པ་དང་། ཟུར་མཁར་བ་གཉིས་ཀྱིས་སྒྲ་རྐྱང་པར་སྦྱར་བ་ནི་ཧ་ཅང་གུ་དོག་གྲགས་ལ་རིན་སྤུངས་པས། འོག་གི་སྦྱར་རྒྱན་ཀུན་ལའང་ཞེས་གསུངས་ཀྱང་། འདིར་མཚུངས་པ་གསལ་བྱེད་ཀྱི་སྒྲ་དང་བཅས་དགོས་ཤིང་། འོག་མ་རྣམས་ལ་སྦྱོར་ཚུལ་ཡང་སྣ་ཚོགས་ཡོད་པས། འདིའི་རྩོད་སྤོང་ལ་གསུང་བ་ནི་ཉ་དང་ཉུང་མ་བསྲེས་པའོ། །དེས་ན་ཁོ་བོ་ནི། སློབ་དཔོན་མཁས་པའི་གསུང་རྒྱུན་ལ་བརྟེན་ནས་འདི་ལྟར་སྨྲ་སྟེ། སྦྱར་བའི་དཔེ་ལ་ནི་མཚུངས་པའི་ཡོན་ཏན་གཉིས་ལས་མི་ཉུང་བ་ཞིག་དགོས་པ་དང་། དོན་ལ་སྦྱར་བ་ཡིན་ལ། འདིར་ནི་མཚུངས་པའི་ཡོན་ཏན་གཅིག་གིས་ཆོག་ཅིང་། སྒྲ་དོན་གང་ལ་སྦྱར་ཡང་ཁྱད་པར་མེད་པས། ལེགས་བཤད་ཀྱི་སོར་མོས་འགྲེལ་བྱེད་མཁན་པོ་རྣམས་སྦུགས་ཐུམ་ཀྱི་སྒྲོག་ཏུ་ཚུད་པ་ལེགས་པར་བཀྲོལ་བ་ཡིན་ནོ། །(༤༡ན)
བཅུ་དྲུག་པ་མེད་པའི་དཔེ་ནི། དཔེ་པདྨ་དང་ཟླ་བ་གཉིས་རིམ་བཞིན་གེ་སར་གྱི་རྡུལ་མང་བ་དང་། ནག་ཕྱོགས་ལ་མཛད་པས། དེ་དག་ལས་ནི་དཔེ་ཅན་མཛེས་མ་ཁྱོད་ཀྱི་བཞིན་མཚུངས་པ་ལ་ཡང་ཁྱད་པར་དུ་འཕགས་པ་དང་བཅས་སོ་ཞེས་པ་མེད་པའི་དཔེ་རུ་འདོད་དོ། །དཔེར་ན། དཔལ་མོའི་གླུ་དབྱངས་ཡུལ་གྱིས་རྣམ་པར་སྐལ། །དབྱར་སྐྱེས་རྔ་གསང་དུས་ཀྱི་གཞན་དབང་གྱུར། །དེ་དག་ཚོགས་ལས་ཚངས་སྲས་ལྷ་མོའི་གསུང་། །མཚུངས་པ་ལས་ཀྱང་ཁྱད་པར་མང་དུ་མཆིས། །ཞེས་པ་ལྟ་བུ། བཅུ་བདུན་པ་བསྔགས་པའི་དཔེ་ནི། དཔེ་པདྨས་ཚངས་པ་མཆོག་ཏུ་བསྐྱེད་པ་དང་། ཟླ་བ་བདེ་འབྱུང་གི་གཙུག་གིས་འཛིན་ཞེས་བསྔགས་ཏེ། དེ་དག་དང་དཔེ་ཅན་མཛེས་མ་ཁྱོད་ཀྱི་གདོང་མཚུངས་ཞེས་པ། དེ་ནི་དཔེ་ལ་བསྔགས་པའི་དཔེར་བརྗོད་དོ། །དཔེར་ན། མི་བསྲུན་གླགས་ལྟའི་རྒོལ་ངན་རབ་འཇོམས་ཤིང་། །བློ་གསལ་ཚོགས་རྣམས་ཆོས་ཀྱིས་ཚིམ་བྱེད་པའི། །ཐོགས་མེད་སྐུ་མཆེད་ཇི་བཞིན་བཙོང་ཁ་པ། །ལྷར་བཅས་སྐྱེ་དགུའི་གཙུག་ན་མངོན་པར་མཛེས། །ཞེས་པ་ལྟ་བུ། བཅོ་བརྒྱད་པ་བརྗོད་འདོད་ཀྱི་དཔེ་ནི། དཀར་བའི་ཡོན་ཏན་དང་ལྡན་ནི། །རེ་རེའི་སྐྱོན་དང་ལྡན་པར་གྱུར་ཀྱང་། །དཔེ་ཟླ་བ་དང་། དཔེ་ཅན་མཛེས་མ་ཁྱོད་ཀྱི་གདོང་མཚུངས་ཞེས་པ་བརྗོད་འདོད་རྩོམ་པ་པོ་བདག་གི་ཡིད་ལ་ཡོད་དོ། །ཞེས་ཤུགས་ཀྱི་དཔེའི་ཡོན་ཏན་དང་མཚུངས་པར་གོ་བ་ནི་བརྗོད་འདོད་ཀྱི་དཔེ་ཞེས་རིག་གོ །དཔེར་ན། ལེགས་པའི་(༤༡བ)
ཡོན་ཏན་འབའ་ཞིག་ཉེར་སྟོན་པའི། །ཚངས་སྲས་ངག་གི་ལྷ་མོའི་སྙན་འགྱུར་གསུང་། །ཀ་ལ་པིང་ཀའི་དབྱངས་དང་མཚུངས་བརྗོད་ལ། །ཇི་ལྟར་གྱུར་ཀྱང་ཡིད་ཀྱི་ངོས་སུ་ཤར། །ཞེས་པ་ལྟ་བུ། བཅུ་དགུ་པ་འགལ་བའི་དཔེ་ནི། དཔེ་འདབ་བརྒྱ་པ་དང་སྟོན་ཟླ་གཉིས། དཔེ་ཅན་མཛེས་མ་ཁྱོད་ཀྱི་གདོང་དང་གསུམ་པོ་འདི་ནི་མཛེས་ཆོས་ལ་ཁྱད་པར་མེད་ཀྱང་། དེ་གསུམ་གནས་པའམ་རྟེན་ས་ཐ་དད་པའི་ངོས་ནས། ཕན་ཚུན་རྣམ་པར་འགལ་ཞེས་པ། དེ་ནི། ཤུགས་ལ་མཛེས་པ་སོགས་མཚུངས་པར་བསྟན་པས་འགལ་བའི་དཔེར་བརྗོད་དོ། །དཔེར་ན། སྨྲ་བའི་དབང་ཕྱུག་དྲང་སྲོང་མེ་བཞི་སྐྱེས། །ངག་གི་དཔལ་ཐོབ་སློབ་དཔོན་དཎྜཱིའི་ཞབས། །གནས་ལྔ་རིག་པ་ལོ་ཆེན་བློ་གྲོས་བརྟན། །འདི་གསུམ་ཕན་ཚུན་རྣམ་པར་འགལ་བ་ཉིད། །ཅེས་པ་ལྟ་བུ། ཉི་ཤུ་པ་དགག་པའི་དཔེ་ནི། འགོག་བྱེད་དྲི་མ་ལྡན་ཞིང་བླུན་པར་གྱུར་པས། དགག་བྱ་དཔེ་ཟླ་བ་ལ་ནི། དཔེ་ཅན་མཛེས་མ་ཁྱོད་ཀྱི་གདོང་དང་འགྲན་པའི་ནུས་པ་ནམ་ཡང་མེད་དོ། །ཞེས་པ་དཔེ་དམན་པས་མི་མཚུངས་པ་ལྟར་དངོས་སུ་བསྟན་པའི་ཤུགས་ལ་དཀར་བ་སོགས་འདྲ་བར་བསྟན་པ་ནི་དགག་པའི་དཔེ་ཉིད་དོ། །དཔེར་ན། བ་མོའི་རེག་པ་ཆུང་ངུས་རྙིངས་བྱེད་ཅིང་། །བུང་བའི་འཕུར་ལྡིང་འཕྲུལ་ཡང་ཕྱི་རོལ་གཟུགས། །མཐོང་མིན་འདམ་སྐྱེས་གཞོན་ནུས་དབྱངས་ཅན་མའི། །ཡིད་འོང་ཞལ་གྱི་ཁྱིམ་དང་ཅི་ཞིག་མཚུངས། །ཞེས་པ་ལྟ་བུ། ཉེར་གཅིག་པ་ངོ་བསྟོད་ཀྱི་དཔེ་ནི། དཔེ་ཅན་མཛེས་མ་ཁྱོད་གདོང་རི་དྭགས་ཀྱི་མིག་གིས་མཚན་ལ། དཔེ་ཟླ་བ་ནི་རི་དྭགས་ཉིད་ཀྱིས་མཚན་པ་(༤༢ན)
དེ་ལྟ་ན་དཔེ་ཅུང་ཟད་ལྷག་དགོས་རྒྱུ་ཡིན་ཀྱང་། འདི་གཉིས་མཚུངས་པ་ཉིད་ལས། དཔེ་ཁྱད་འཕགས་མིན་ཞེས་དཔེ་ཅན་ལ་ངོ་བསྟོད་ཀྱི་དཔེའོ། །དཔེར་ན། རྒྱལ་བའི་དབུ་སྐྱེས་དབང་སྔོན་མདངས་འཛིན་ཞིང་། །ཨིནྡྲ་ནཱི་ལའི་རྡུལ་རྩེགས་དབང་སྔོན་དངོས། །འོན་ཀྱང་སྣང་བྱེད་ཡུལ་དུ་མཐོན་མཐིང་འོད། །མངོན་པར་མཚེར་ལ་ཁྱད་པར་ཅི་ཞིག་མཆིས། །ཞེས་པ་ལྟ་བུ། ཉེར་གཉིས་པ་དེ་ཉིད་བརྗོད་པའི་དཔེ་ནི་འདི་ནི་དཔེ་ཅན་མཛེས་མའི་བཞིན་ཉིད་ཡིན་གྱི། དཔེ་པདྨ་ནི་མ་ཡིན་ནོ། །འདི་དག་ནི་དཔེ་བུང་བ་མ་ཡིན་གྱི། དཔེ་ཅན་མིག་གོ་ཞེས་པ་དཀར་མཛེས་སོགས་ཕན་ཚུན་རྣམ་པ་གསལ་བར་མཚུངས་པ་ལས། དཔེ་ཅན་དཔེ་རུ་མ་འཁྲུལ་བར་གནས་ལུགས་ངེས་པ་དེ་ནི་དེ་ཉིད་བརྗོད་པའི་དཔེའོ། །དཔེར་ན། ཁ་དོག་རྣམ་པར་བཀྲ་འདི་དབང་གཞུ་དང་། །མཚུངས་ཀྱང་འཇའ་མིན་འཆི་མེད་ལྷ་ཡི་གོས། །ཤིན་ཏུ་སྙན་འདི་བུང་བའི་སྐད་འདྲ་ཡང་། །མ་ཡིན་དབྱངས་ཅན་ཕྱག་གི་རྒྱུད་མང་སྒྲ། །ཞེས་པ་ལྟ་བུ། ཉེར་གསུམ་པ་ཐུན་མོང་མིན་པའི་དཔེ་ནི། དཔེ་ཟླ་བ་དང་པདྨ་དག་གི་ནི་མཛེས་པ་ལས་འདས་པའི་དཔེ་ཅན་མཛེས་མ་ཁྱོད་ཀྱི་གདོང་ལ་དཔེར་འོས་པ་གཞན་མེད་པས། བདག་སྟེ་རང་ཉིད་ཀྱི་དཔེར་རང་ཉིད་མཚུངས་པར་གྱུར་ཞེས་པ་ཐུན་མོང་མ་ཡིན་པའི་དཔེའོ། །དཔེར་ན། རབ་དཀར་ཆུ་ཤེལ་དབང་པོའི་དཀྱིལ་འཁོར་དང་། །ཨུཏྤལ་འདབ་མས་མཛེས་པའི་ཆ་ཙམ་དུ། །མཚུངས་པའི་གོ་སྐབས་བྲལ་བས་མཚར་བའི་དཔེར། །རང་ཉིད་(༤༢བ)
ལེགས་བསྟན་ཚངས་སྲས་ལུས་ཕྲ་མ། །ཞེས་པ་ལྟ་བུ། ཉེར་བཞི་པ་འབྱུང་མིན་གྱི་དཔེ་ནི། དཔེ་པདྨ་མཛེས་པའི་སྙིང་པོ་ཀུན་བྱེད་པོས་ཕྱོགས་འགའ་ཞིག་དག་ཏུ་བསྡུས་པ་ནི་མི་འབྱུང་ལ། གལ་སྟེ་བྱུང་ན་དེ་བཞིན་དུ་དཔེ་ཅན་མཛེས་མ་ཁྱོད་ཀྱི་ཞལ་རྣམ་པར་མཛེས་པའི་དཔེའོ་ཞེས་པ་དེ་ནི་འབྱུང་མིན་གྱི་དཔེ་ཞེས་རིག་གོ །དཔེར་ན། མང་ཐོས་ཡོན་ཏན་ཁུར་གྱིས་རབ་ལྕི་བའི། །གནས་ལྔའི་མཐར་སོན་རིན་ཆེན་ཆོས་སྐྱོང་བཟང་། །མཁས་གྲུབ་བྱེ་བའི་འཆད་རྩོད་རྩོམ་པ་ཡི། །བློ་གྲོས་མཐའ་དག་གཅིག་ཏུ་གྱུར་པ་འདྲ། །ཞེས་པ་ལྟ་བུ། ཉེར་ལྔ་པ་སྲིད་མིན་གྱི་དཔེ་ནི། དཔེ་ཟླ་བའི་གཟུགས་དང་ཙནྡན་ལས་ནི་རིམ་བཞིན་དུག་དང་མེ་མི་འབྱུང་བ་བཞིན་དུ། དཔེ་ཅན་དམ་པ་ཁྱོད་ཀྱི་ཞལ་འདི་ལས་ནི་རྩུབ་མོའི་ཚིག་མི་འབྱུང་ངོ་། །ཞེས་པ་སྲིད་པ་མིན་པའི་དཔེའོ། །དཔེར་ན། ཀུན་ཕན་ཟེར་གྱིས་བསྐྱེད་པའི་སྟུག་པོའི་མུན། །དཔག་བསམ་ཡོངས་འདུ་ལས་འོངས་དྲི་ངན་བཞིན། །ཟུར་ཕུད་ལྔ་པའི་མཁྱེན་པ་ལས་བརྒལ་བས། །ཇི་སྙེད་བརྟན་གཡོའི་ཆོས་དེ་གང་དུ་ཅི། །ཞེས་པ་ལྟ་བུ། ཉེར་དྲུག་པ་མང་བའི་དཔེ་ནི། དཔེ་ཙནྡན། གངས་ཆུ་དང་ཟླ་བའི་ཟེར། ཟླ་ཤེལ་སོགས་བཞིན་དུ་མཛེས་མ་ཁྱོད་ཀྱི་ལུས་ནི་རེག་པ་ཡང་བསིལ་ལོ་ཞེས་དཔེ་མང་པོ་ཞིག་གིས། དཔེ་ཅན་གཅིག་གི་ཁྱད་པར་དག་གསལ་བར་བྱེད་པ་མང་བའི་དཔེའོ། །དཔེར་ན། དབྱིག་འཛིན་རྡུལ་ཕྲན་གྲངས་དང་ཀུན་གསལ་མཐའ། །བསྐལ་པའི་ཆར་རྒྱུན་ན་ཀྲའི་གྲོང་(༤༣ན)
ཁྱེར་གཏིང་། །གསེར་མངལ་ཅན་གྱི་གྲངས་ཡས་ལེགས་བྱས་ཀྱི། །རྗེས་འགྲོ་རྣམ་འདྲེན་མཁྱེན་བརྩེའི་གཏིང་དཔག་དཀའ། །ཞེས་པ་ལྟ་བུའོ། །ཉེར་བདུན་པ་རྣམ་འགྱུར་གྱི་དཔེ་ནི། །དཔེ་ཅན་ལུས་ཕྲ་མ་ཁྱོད་ཀྱི་བཞིན་རས་ནི། དཔེ་ཟླ་བའི་དཀྱིལ་འཁོར་གྱི་དཀྱིལ་ནས་ཚུར་བཏོན་པ་བཞིན། དཔེ་པདྨའི་ནང་ནས་ཚུར་ཕྱུང་བ་བཞིན། ཞེས་པ་འདི་ནི་རྣམ་འགྱུར་གྱི་དཔེའོ། །དཔལ་སྒང་ལོ་ཙཱ་བས། ཨིནྡྲ་ནཱི་ལས་བྱུགས་པ་བཞིན་ཞེས་ཕར་བྱུགས་པར་བཤད་པ་ནི་གཞུང་དོན་དང་མ་འབྲེལ་ཞིང་། ཁྱེད་ཀྱི་གསུང་ཕལ་ཆེར་ལེགས་པར་བཤད་པར་འདུག་ནའང་། སྐབས་འགར་ཉེས་བཤད་མཛད་པ་བདེན་པར་མཆི་སྟེ། མ་མཛད་ན་ཁྱེད་དང་ཟུར་མཁར་བ་གཉིས་ཀརྨ་པའི་ཁྲོད་དུ་ཕོ་རོག་དཀར་པོ་བྱུང་གིས་དོགས་པའོ། །དཔེར་ན། གངས་ཅན་མཁས་པའི་དབང་པོ་ཤོང་སྟོན་རྗེ། །འཕགས་ཡུལ་པཎ་ཆེན་ཁྲོད་ནས་བྱོན་པ་བཞིན། །སྔོན་མེད་ལེགས་པར་བཤད་པའི་གསུང་གི་ཚོགས། །དྲང་སྲོང་ཕུར་བུའི་ངག་ལས་བླངས་པ་བཞིན། །ཞེས་པ་ལྟ་བུ། ཉེར་བརྒྱད་པ་ཕྲེང་བའི་དཔེ་ནི། དཔེ་ཉི་མའི་འོད་ཀྱིས་ཉི་མའི་དཀྱིལ་འཁོར་ལ་གཟི་བརྗིད་འཛིན་པ་བཞིན་དུ། དཔེ་ཅན་ཉི་མ་ཡིས་ཉིན་མོ་ལ་སྣང་བ་འཛིན། ཡང་དཔེ་ཅན་དེ་དཔེར་བྱས་པ་བཞིན་དུ། དཔེ་ཅན་ཉི་མོའི་སྣང་བ་དེས་ནམ་མཁའ་ལ་གསལ་བའི་དཔལ་འཛིན། དཔེ་ཅན་དེ་དཔེར་བྱས་པ་བཞིན་དུ། དཔེ་ཅན་གཞན་སྡེ་རྣམ་པར་གནོན་པའི་རྒྱལ་པོ་ཁྱོད་ཀྱི་དབང་ཕྱུག་དམ་(༤༣བ)
པའི་དཔལ་འཛིན་ཞེས་སྔ་མ་སྔ་མ་དཔེ་དང་། ཕྱི་མ་ཕྱི་མ་དཔེ་ཅན་དུ་བཀོད་པ་དེ་ནི་ཕྲེང་བའི་དཔེའོ། །དཔེར་ན། སྒྲ་གཅན་གྱིས་ནི་ཉི་མ་འཇོམས་པ་བཞིན། །རྟ་ལྗང་ཅན་གྱིས་ཟླ་བའི་འོད་ལ་བཞིན། །རི་དྭགས་མཚན་མས་པད་དཀར་འཇོམས་པ་ལྟར། །དབྱངས་ཅན་ལྷ་མོས་མི་ཤེས་རྨོངས་ཚོགས་འཇོམས། །ཞེས་པ་ལྟ་བུ། ཉེར་དགུ་པ་ངག་དོན་གྱི་དཔེ་ལ། མཚན་ཉིད། དབྱེ་བ་གཉིས་དང་པོ་ནི། གང་ཡང་ངག་གི་དོན་བྱེད་ཅན་དྲུག་ལས། གསུམ་པ་དང་གཉིས་པ་གཙོ་བོར་གྱུར་པ་ཉིད་ཀྱིས་གལ་ཏེ་ངག་དོན་གྱི་དཔེ་དཔེ་ཅན་གྱིས་ཁྱད་གཞི་ཁྱད་ཆོས་གོ་རིམ་བཞིན་དུ་ཉེ་བར་འཇལ་ནས་ངག་དོན་གྱི་དཔེ་སྟེ་དེ་ལ་བཞིན་སྒྲ་ནི་གཅིག་དང་དུ་མ་ཡོད་པ་དེ་རྣམ་པ་གཉིས་སོ། །གཉིས་པ་ལ་གཉིས་ལས། བཞིན་སྒྲ་གཅིག་པ་ནི། དཔེ་ཅན་གྱི་ཁྱད་གཞི་མཛེས་མ་ཁྱོད་ཀྱི་གདོང་། ཁྱད་ཆོས་མིག་ནི་མི་བརྟན་པ་སྟེ་གཡོ་ཞིང་། སོ་ཡི་འོད་ཟེར་རབ་ཏུ་གསལ་བ་འདི་ནི། དཔེ་ཁྱད་གཞི་འདམ་སྐྱེས་དང་། ཁྱད་ཆོས་བུང་བ་གཡོ་བ་དང་ལྡན་པ་དང་ནི། གེ་སར་དག་གིས་མཚོན་བཞིན་མཛེས་སོ། །དཔེ་གསུམ་གྱི་དཔེ་ཅན་གསུམ་གོ་རིམ་བཞིན་དུ་མཇལ་ཞིང་། གིས་ཞེས་གསུམ་པ་དང་། མཛེས་ཞེས་གཉིས་པ་དང་། བཞིན་སྒྲ་གཅིག་ཡོད་པའོ། །དཔེར་ན། འཇམ་དཀར་ཕྱག་སོར་རྩེ་ན་ཨུཏྤ་ལའི། །འཁྲི་ཤིང་སྟེང་ན་ཤེས་རབ་རལ་གྲི་ཅན། །གངས་རིའི་རྩེ་ན་སྤྲིན་དཀར་གཡོ་བ་ལ། །ཉི་འོད་ཀྱིས་ཁྱབ་བཞིན་དུ་རྣམ་པར་གསལ། །ཞེས་པ་ལྟ་བུ། གཉིས་པ་བཞིན་སྒྲ་དུ་མ་ཡོད་པ་ནི། དཔེ་པདྨ་ཅན་སྡོང་པོ་བཞིན་དུ། དཔེ་ཅན་ལུས་ཕྲ་མ་གཉིས་པོ་(༤༤ན)
ཁྱད་གཞི་དང་། ཁྱད་ཆོས་དཔེ་པདྨ་བཞིན་དུ་དཔེ་ཅན་དེའི་གདོང་པ། དཔེ་བུང་བས་སྦྲང་རྩི་སྤྱོད་པ་བཞིན་དུ་ནི་དཔེ་ཅན་བདག་གིས་འཐུང་ཞིང་འཐུང་ཞིང་སྟེ་དགའ་མགུར་རྩེས་སོ། །ཞེས་གྱིས་གསུང་པ་དང་། འཐུང་དང་རྩེ་གཉིས་པ་བཞིན་སྒྲ་མང་དུ་ཡོད་པ་སྟེ། དཔེར་ན། བཻཌཱུར་བརྩེགས་པའི་རི་བཞིན་ཐུབ་དབང་སྐུ། །གསེར་མདངས་མངོན་པར་བཀྲ་བཞིན་གང་གི་འོད། །རླུང་གིས་བསྒུལ་ནུས་མིན་བཞིན་སྒྲིབ་གཉིས་དགྲས། །ནམ་ཡང་གཡོ་མེད་སྤངས་དང་རྟོགས་པ་རྫོགས། །ཞེས་པ་ལྟ་བུ། སུམ་ཅུ་པ་ཟླ་བོའི་དངོས་དཔེ་ལ། མཚན་ཉིད་དང་། དཔེར་བརྗོད། དང་པོ་ནི། དཔེ་ཅན་གྱི་དངོས་པོ་འགའ་ཞིག་ཕྱེད་སྔ་མ་ལ་ཉེ་བར་བཀོད་ནས། ཕྱེད་ཕྱི་མ་ལ་དེའི་ཆོས་མཐུན་གྱི་དཔེ་རབ་ཏུ་བཀོད་པས། དཔེ་དཔེ་ཅན་གཉིས་དོན་མཉམ་པ་ཉིད་དུ་རྟོགས་པ་ཅན་དེ་ནི་ཟླ་བའི་དངོས་པོའི་དཔེ་ཡིན་ཏེ། དཔེར་ན། ཞེས་སོ། །གཉིས་པ་ནི། དཔེ་ཅན་འདིར་རྒྱལ་པོ་རྣམས་ནི་མང་དུ་སྐྱེས་པར་གྱུར་ཀྱང་། ད་ལྟ་ཁྱོད་དང་འདྲ་བ་ནི་གཅིག་ཀྱང་མེད་ལ། དེའི་ཟླ་བོ་སྟེ་དཔེ་ཡོངས་འདུའི་ཚལ་དག་ལ་དཔག་བསམ་གྱི་རྐང་འཐུང་ནི་གཉིས་པ་ངེས་པར་ཡོད་པ་མ་ཡིན་པས་གཅིག །ཁོ་ནའོ། །དཔེར་ན། སྒྲོན་མེའི་བསྐལ་པར་སངས་རྒྱས་མང་བྱོན་ཀྱང་། །ཤཱཀྱའི་སྐྱེས་མཆོག་ཁྱོད་ཀྱི་དོ་ཟླ་མེད། །ཆོས་བཟང་མདུན་སར་སྐབས་གསུམ་གྲངས་མེད་དབུས། །པུ་ལོ་མ་དགྲ་གཉིས་པ་སུ་ཞིག་མཆིས། །ཞེས་པ་ལྟ་བུ། སོ་གཅིག་པ་མཚུངས་སྦྱོར་ལ། མཚན་ཉིད་དང་། དཔེར་བརྗོད། (༤༤བ)
གཉིས། དང་པོ་ནི། དཔེ་ལྷག་པ་གཅིག་གིས་དཔེ་ཅན་དམན་པ་གཅིག་བྱ་བའི་ཆོ་ག་གཅིག་ལ་རབ་ཏུ་བསྡུས་ནས། གང་སྨྲས་པ་དེ་ནི་དཔེ་ཅན་མཚུངས་པར་སྟོན་པ་དག་སྦྱོར་བའི་དཔེ་རུ་བཤད་དེ། དཔེར་ན། གཉིས་པ་ནི། དཔེ་ལྷག་པ་པུ་ལོ་མ་དགྲ་དེ་དང་། དཔེ་ཅན་དམན་པ་མིའི་བདག་པོ་ཁྱོད་གཉིས་འདྲ་བའི་རྒྱུ་མཚན། དཔེ་དེ་ཡིས་མཐོ་རིས་བསྲུང་བ་དང་། དྲེགས་ལྡན་ལྷ་མིན་འཇོམས་པ་དང་། དཔེ་ཅན་ཁྱོད་ཀྱིས་ས་གཞི་སྐྱོང་བའི་མེལ་ཚེ་བྱེད་ཅིང་། འགལ་ཟླའི་མིའི་བདག་པོ་འཇོམས་པའི་བྱ་བའི་ཆོ་ག་གཅིག་ལ་བསྡུས་པ་སྟེ། དཔེར་ན། བུ་རམ་ཤིང་པ་ཐེག་གསུམ་གདུལ་བྱ་དང་། །དཔལ་མགྲིན་མུ་སྟེགས་ཚོགས་ཀྱི་སྟོན་པ་མཛད། །རྒྱལ་བས་མཐར་ཐུག་ངེས་ལེགས་ལམ་བསྟོན་བཞིན། །ལེགས་ལྡན་གནས་སྐབས་དགེ་བའི་གཙུག་ལག་འཆད། །ཅེས་པ་ལྟ་བུ། སོ་གཉིས་པ་རྒྱུའི་རྒྱན་ནི། །དཔེ་ཅན་རྒྱལ་པོ་ཁྱོད་མཛེས་པའི་རྒྱུས་དཔེ་ཟླ་བ་དང་། གཟི་བྱིན་གྱིས་རྒྱུས་དཔེ་ཉི་མ་དང་། བརྟན་པའི་རྒྱུས་དཔེ་རྒྱ་མཚོའི་རྗེས་སུ་བྱེད་ཅེས་པ་འདི་ནི་རྒྱུ་དཔེར་དྲན་པར་བྱའོ། །དཔེར་ན། ལུས་ཕྲའི་བཞིན་རས་དཀར་བས་བསིལ་སྦྱིན་མཁན། །ཡིད་དུ་འོང་བས་མཐོ་རིས་དབང་མོ་སྟེ། །འཇམ་ཞིང་མཉེན་པས་ཨུཏྤ་ལ་ཡི་འདབ། །མིག་དཀྱུས་བཀྲ་བས་དབང་པོའི་གཞུ་ཡི་ཟླ། །ཞེས་པ་ལྟ་བུ། གསུམ་པ་སྐྱོན་ཡོན་ལ། ཡོན་ཏན་དང་། སྐྱོན་གཉིས། དང་པོ་ལ་མཚམས་སྦྱར་བ། དཔེར་བརྗོད། དོན་བསྡུ་(༤༥ན)
བ་དང་གསུམ། དང་པོ་ནི། བློ་ལྡན་སྙན་ངག་ལ་མི་དགོས་པ་མེད་པ་གང་ལ། ངེས་པར་དཔེ་རྒྱན་གྱི་སྐྱོན་དག་ནི། ཕོ་མོ་མ་ནིང་གི་རྟགས་ཐ་དད་པ་འདྲེས་པ་དང་། གཅིག་ཚིག་དང་མང་ཚིག་སྦྱར་བ་དང་། མིག་དམན་པ་དང་ལྷག་པ་ཉིད་ལའང་སྐབས་ཐོབ་ཀྱིས་སྦྱོར་ཤེས་ན་སྐྱོན་མེད་དོ། །གཉིས་པ་ལ་རྟགས་ཚིག་ལ་སྐྱོན་མེད་པ་དང་། དཔེ་ལ་སྐྱོན་མེད་པ་གཉིས། དང་པོ་ནི། དཔེ་ཅན་མ་ནིང་འདི། དཔེ་བུད་མེད་བཞིན་དུ་འགྲོའོ་དཔེ་ཅན་བུད་མེད་འདི་དཔེ་སྐྱེས་པ་བཞིན་དུ་སྨྲའོ། །ཞེས་པ་རྟགས་འདྲེས་པ་དང་། དཔེ་ཅན་བདག་གི་གྲོགས་གཅིག་པུ་འདི་དཔེ་ཚེ་འདི་ཕྱི་མང་པོའི་སྲོག་རྣམས་བཞིན་ནོ། །དཔེ་ཅན་རིག་པའི་གནས་ལྔ་རྣམས་བསྒྲུབས་པ་དཔེ་ཡིད་བཞིན་གྱི་ནོར་བུ་གཅིག་བཞིན་ནོ། །ཞེས་ཚིག་མང་ཉུང་སྦྱར་བ་སྟེ། དཔེར་ན། འཇམ་དཔལ་དབྱངས་ནི་སྨྲ་ལ་མཚོ་བྱུང་བཞིན། །དབྱངས་ཅན་མ་ནི་མཐུ་སྟོབས་གསང་བདག་ལྟར། །མཛེས་མའི་གདོང་ནི་དཔེ་འདབ་ཚོགས་ཀུན་བཞིན། །མི་བདག་རྣམས་ལྟར་འཆི་མེད་གཙོ་བོ་འདི། །ཞེས་པ་ལྟ་བུ། གཉིས་པ་ནི། དཔེ་ས་གཞི་སྐྱོང་བ་ཁྱོད་བཞིན་དུ། དཔེ་ཅན་ལྷ་ཡི་རྒྱལ་པོ་རྣམ་པར་མཛེས་སོ། །ཞེས་དཔེ་དམན་པ་དང་། དཔེ་ཚ་ཟེར་ཅན་གྱི་ནུས་པ་ལ། དཔེ་ཅན་མི་བདག་གཟི་བརྗིད་ཀྱིས་འགོང་བར་ནུས་སོ། །ཞེས་དཔེ་ལྷག་པ་སྟེ། དཔེར་ན། གཡོན་མ་ཁྱོད་ཀྱི་མཛེས་སྡུག་རྣམ་འགྱུར་ལྟར། །ཚངས་པའི་སྲས་མོ་འདི་ནི་ཡིད་དུ་འོང་། །དྲི་ཟའི་པི་ཝང་སྙན་ཞིང་འཇེབས་པ་ཡིས། །(༤༥བ)
ཙ་ར་ཀ་ཡི་སྐད་ཀྱི་འགྲན་ཟླ་བྱས། །ཞེས་པ་ལྟ་བུ། གསུམ་པ་ནི། ཞེས་པ་དེ་ལྟ་བུ་ལ་སོགས་པའི་སྐལ་བ་བཟང་པོ་འདི་དག་ནམ་ཡང་གཏོང་བ་མིན་པ་ཉིད་དོ། །གཉིས་པ་སྐྱོན་ལ། མཚམས་སྦྱར་བ། དཔེར་བརྗོད། མཇུག་བསྡུ་བ་དང་། དང་པོ་ནི། རྟགས་ཚིག་དཔེ་དམན་ལྷག་སོགས་ཀྱི་སྦྱོར་བ་འགའ་ཞིག་ལ་ནི་སྙན་ངག་རིག་པའི་མཁས་པ་རྣམས་མི་དགས་པ་ཡོད་དེ། དེ་ཇི་ལྟར་ཡོད་ཅེ་ན། གཉིས་པ་ནི། དཔེ་དང་མོ་བཞིན་དུ། དཔེ་ཅན་ཕོ་རྟགས་ཟླ་བ་དཀར། དཔེ་མང་ཚིག་མཚོ་རྣམས་བཞིན་དུ། དཔེ་ཅན་མཁའ་གཅིག་པུ་དྲི་མ་མེད། དཔེ་དམན་པ་ཁྱི་བཞིན་དུ་དཔེ་ཅན་དཔའ་བོ་རྗེ་ལ་གུས། དཔེ་ལྷག་པ་ཉི་མ་བཞིན་དུ་དཔེ་ཅན་མེ་ཁྱེར་གསལ་ཞེས་པ་སྟེ། དཔེར་ན། དཔལ་མོའི་བཞིན་འདི་རྒྱལ་བའི་མཚན་བཟང་ཟླ། །རྒྱུ་སྐར་ཚོགས་བཞིན་ཀུནྡའི་འདབ་མ་དཀར། །གླང་པོའི་འགྲོས་ལྟར་རྟ་ལྗང་ལྷག་པར་མགྱོགས། །ཡོངས་འདུ་ཇི་བཞིན་སེང་ལྡེང་རྐང་འཐུང་དཀོན། །ཞེས་པ་ལྟ་བུ། གསུམ་པ་ནི། སྦྱོར་བ་ངན་པ་འདི་འདྲ་བ་སྤངས་ཏེ། མཁས་པ་རྣམས་ཀྱི་སྙན་ངག་གི་རྒྱུ་ཕུན་སུམ་ཚོགས་པ་ཡང་དག་པར་འདིར་ནི་བསམ་པར་བྱོས་ཤིག །
མཚུངས་པ་གསལ་བྱེད་ཀྱི་སྐོར་བཤད་པ།
མཚུངས་པ་གསལ་བྱེད་ཀྱི་སྐོར་བཤད་པ།བཞི་པ་མཚུངས་པ་གསལ་བྱེད་ལ། གཞུང་གིས་དངོས་སུ་ཟིན་པ་དྲུག་ཅུ་རྩ་གསུམ་བཤད། མ་ཟིན་པ་ངག་གི་དབང་ཕྱུག་གི་འགྲེལ་པ་ལས་བཅུ་གཅིག་བཤད་པ་གཉིས། དང་པོ་ལ་སྡེ་ཚན་བཞིར་ཕྱེ་བའི་དང་པོ་ནི། བཞིན་ནི། དམར་སེར་མདངས་ཅན་ཐུན་མཚམས་ཁ་དོག་བཞིན། །འཇམ་མགོན་ཞལ་(༤༦ན)
ཁྱིམ་མིག་གི་བདུད་རྩིའི་དཔྱིད། །ཅེས་པ་ལྟ་བུ། ལྟར་ནི། དྲི་ཟའི་རྒྱུད་མང་སྒྲ་ལྟར་དབྱངས་ཅན་མའི། །སྙན་འགྱུར་གསུང་འདི་རྣ་བའི་དཔལ་དུ་འཇེབས། །ཞེས་པ་ལྟ་བུ། ལྟ་བུ་ནི། བརྟན་གཡོའི་ཆོས་ཀུན་དབང་སྡུད་ལྷ་མོའི་ཕྱག །བྱུ་རུའི་ཁྲི་ཤིང་ལྟ་བུར་དམར་ཞིང་མཛེས། །ཞེས་པ་ལྟ་བུ། ཇི་ལྟར་སྒྲ་ནི། ཀ་ལ་པིང་ཀའི་སྒྲ་དབྱངས་ཇི་ལྟ་བ། རི་དྭགས་མིག་ཅན་ཀླུ་ཡི་ཐོས་འཛིན་སྤུད། །ཅེས་པ་ལྟ་བུ། མཐུན་པ་ནི། ཤོང་སྟོན་ཞལ་སྒོ་ལས་འོངས་ལེགས་བཤད་ཀུན། །མཁས་མཆོག་ཙནྡྲ་གོ་མིའི་གསུང་དང་མཐུན། །ཞེས་པ་ལྟ་བུ། མཚུངས་པ་ནི། གསེར་མངལ་བུ་མོའི་དབུ་སྐྱེས་ལན་བུ་འདི། །སྟང་ཟིལ་བརྩེགས་པའི་རི་བོའི་མདོག་དང་མཚུངས། །ཞེས་པ་ལྟ་བུ། ཡང་དག་མཚུངས་པ་ནི། ཡོན་པོར་ལྟ་བའི་འདྲེན་བྱེད་པད་ཚལ་དུ། །བུང་བའི་འཕུར་ལྡིང་བགྱིད་དང་ཡང་དག་མཚུངས། །ཞེས་པ་ལྟ་བུ། མཉམ་པ་ནི། མཚོ་ལྡན་སྐུ་སྟོད་འདོད་པའི་མྱོས་བུམ་གྱི། །མཛེས་པ་མཁའ་ལ་སྤྲིན་དཀར་གཡོ་དང་མཉམ། །ཞེས་པ་ལྟ་བུ་ཡང་དག་གསལ་ནི། རྒྱལ་བས་སྐྱེ་དགུའི་རེ་འདོད་སྐོང་བ་ཡིས། །དཔག་བསམ་ཡོངས་འདུའི་རང་བཞིན་ཡང་དག་གསལ། །ཞེས་པ་ལྟ་བུ། ངེས་པར་གསལ་ནི། གཞལ་བར་ཆེས་དཀའ་ཆོས་གཟུགས་སྐུ་གཉིས་ཀྱིས། །ཚོགས་གཉིས་ཕ་མཐའ་ངེས་པར་གསལ་བར་བྱས། །ཞེས་པ་ལྟ་བུ། རབ་གསལ་ནི། ཡན་ལག་དྲུག་ཅུའི་དབྱངས་སྙན་རབ་གསལ་བས། །གྲངས་མེད་ཆོས་འཁོར་བསྐོར་བའི་ངོ་མཚར་རྟོགས། །ཞེས་པ་ལྟ་བུ། གཟུགས་ཀྱི་ཟླ་བོ་ནི། (༤༦བ)
མཐོང་ན་མི་མཐུན་མེད་པའི་མཚན་དཔེའི་སྐུ། །འཛམ་བུའི་གསེར་སྦྱངས་རི་ཡི་གཟུགས་ཀྱི་ཟླ། ཞེས་པ་ལྟ་བུ། གཉེན་པོ་ནི། གཙུག་ན་ཟླ་བའི་རི་མོ་གསུམ་པའི་མདོག །ཨིནྡྲ་ནཱི་ལའི་ཕུང་པོའི་གཉེན་པོ་བྱས། །ཞེས་པ་ལྟ་བུ། དགྲ་ཟླ་ནི་དབྱངས་ཅན་ཞལ་གྱི་དྲི་བསུང་མངར་བ་ཡིས། །མ་ལ་ཡར་སྐྱེས་གང་གི་དགྲ་ཟླ་བྱེད། །ཅེས་པ་ལྟ་བུ། སོ་སོར་རྟོགས་པ་ནི། ཕྱག་སོར་རྩེ་ཡི་བཻཌྱཱུར་པི་ཝང་དང་། །རབ་སྙན་ཚངས་པའི་དབྱངས་གཉིས་སོ་སོར་རྟོགས། །ཞེས་པ་ལྟ་བུ། །མགྲིན་པ་ནི་ངག་གི་འདོད་པ་མཐའ་དག་ལེགས་འཇོ་བས། །ཡོངས་འདུའི་ཤིང་དང་ཡིད་བཞིན་ནོར་བུར་འགྲན། །ཞེས་པ་ལྟ་བུ། འདྲ་བ་ནི། ཐུགས་རྗེའི་མི་ཤེས་རྨོངས་པ་འཇོམས་པ་ལ། །མགྲིན་སྔོན་ཅན་གྱི་ལག་པའི་ཉག་ཕྲན་འདྲ། །ཞེས་པ་ལྟ་བུ། ལྟ་བ་ནི། འགྲོ་ལ་རྒྱུན་ཆད་མེད་པར་རྗེས་བརྩེ་བ། །ཛཧྣུ་ཡི་བུ་མོའི་རྒྱུན་ལ་ལྟ། །ཞེས་པ་ལྟ་བུ། བཅས་པ་ནི། ཉེ་རིང་མེད་པར་ཀུན་ཁྱབ་ཐུགས་རྗེ་འདི། །ནམ་མཁའི་ནོར་བུའི་འོད་ཀྱི་རང་བཞིན་བཅས། །ཞེས་པ་ལྟ་བུ། བསླུ་བ་ནི། ཕུལ་བྱུང་ཆུ་ཞེང་གབ་པའི་སྐུ་གཟུགས་ཀྱིས། །ལེགས་བྲིས་བུ་མོའི་ཚོགས་ཀྱི་མཛེས་པ་བསླུ། །ཞེས་པ་ལྟ་བུ། རིགས་མཐུན་ནི། རབ་དཀར་མཉེན་འཇམ་ཆུ་སྐྱེས་དབུས་བཞུགས་པས། །མེས་པོ་གསེར་མངལ་ཅན་དང་རིགས་སུ་མཐུན། །ཞེས་པ་ལྟ་བུ། རྗེས་སུ་སྨྲ་བ་ནི། ལང་ཚོའི་དཔལ་ཡོན་དར་ལ་བབ་པ་ཡིས། །མཐོ་རིས་དབང་མོ་དག་གི་རྗེས་སུ་སྨྲ། །ཞེས་པ་ལྟ་བུ། སྡེ་ཚན་གཉིས་པ་ལ། གཟུགས་བརྙན་ནི། རྗེ་བཙུན་བརྟན་པའི་འཁོར་ལོའི་(༤༧ན)
སྣང་བྱེད་དཀྱུས། །ཨུཏྤལ་སྔོན་པོའི་འདབ་མའི་གཟུགས་བརྙན་ཅན། །ཞེས་པ་ལྟ་བུ། སོ་སོར་སྡེབ་ནི། རབ་དམར་གཏམ་གྱི་འབྱུང་གནས་མཆུ་སྒྲོས་དང་། །བནྡྷུ་ཛི་ཝ་ཀ་གཉིས་སོ་སོར་སྡེབ། །ཅེས་པ་ལྟ་བུ། གཟུགས་མཚུངས་པ་ནི། འཇོ་སྒེག་འགྱིང་བག་སྐུ་ཡི་རྣམ་འགྱུར་འདི། །རྡོ་རྗེ་དབྱངས་ཀྱི་དབང་ཕྱུག་གཟུགས་མཚུངས་ཉིད། །ཅེས་པ་ལྟ་བུ། གཟུགས་མཉམ་པ་ནི། དབུ་སྐྲའི་ཐོར་ཚུགས་ཅུང་ཟད་གཡོན་ཕྱོགས་པ། །དྲི་ཟའི་བུ་མོའི་མཐོན་མཐིང་སྐྲའི་གཟུགས་མཉམ། །ཞེས་པ་ལྟ་བུ། གཟུགས་ཡང་དག་པར་གཞལ་བ་ནི། མི་ཤེས་དྲ་བ་གཅོད་པའི་རལ་གྲི་ཡིས། །མིག་སྟོང་ཅན་གྱི་ལག་ཉལ་ཡང་དག་གཞལ། །ཞེས་པ་ལྟ་བུ་མཚན་ཉིད་མཐུན་པ་ནི། ཤེས་རབ་སྣང་བ་མ་ལུས་སྐྱེད་པ་ལ། །ཚངས་སྲས་དབྱངས་ལྡན་མ་དང་མཚན་ཉིད་མཐུན། །ཞེས་པ་ལྟ་བུ། མཚན་ཉིད་འདྲ་བ་ནི། ལི་ཁྲིའི་མདངས་ཀྱི་མཛེས་པ་འཛིན་པ་ལ། །དབང་ཕྱོགས་ཐུན་མཚམས་གསར་པའི་མཚན་ཉིད་འདྲ། །ཞེས་པ་ལྟ་བུ། མཚན་ཉིད་མཚུངས་པ་ནི། ཞལ་ཁྱིམ་འཛུམ་གྱིས་འགྲོ་བའི་དབུགས་དབྱུང་བར། །ཀུན་མཁྱེན་ཉི་མའི་རྒྱུད་དང་མཚན་ཉིད་མཚུངས། །ཞེས་པ་ལྟ་བུ། དྲུག་པ་འདིའི་སྦྱོར་ལུགས་འགྲེལ་པ་རྣམས་ལ་མི་གསལ་ཡང་། སློབ་དཔོན་སྨོན་འགྲོ་པཎྜི་ཏའི་ལེགས་པར་བཤད་པའོ། །མཐུན་ཕྱོགས་ནི། སྣ་ཚོགས་རིན་ཆེན་རྒྱན་གྱིས་སྤུད་པ་དང་། །མཐུན་ཕྱོགས་མིག་སྐྱའི་གན་མཛོད་ནོར་གྱིས་དཔྱ། །ཞེས་པ་ལྟ་(༤༧བ)
བུ། དཔེར་བྱས་ནི། སྐུ་སྟོད་ལྷ་རྫས་དར་ཀྱི་ལྷབ་ལྷུབ་གོས། །རྣམ་བཀྲའི་དཔེ་རུ་རླུང་གི་རྒྱལ་མཚན་བྱས། །ཞེས་པ་ལྟ་བུ། །དཔེ་ནི། ཕྱག་སོར་རྩེ་ན་འདམ་སྐྱེས་གཡུར་ཟ་བའི། །དཔེ་རུ་འཁྲི་ཤིང་ཡལ་གར་མེ་ཏོག་ལྡེམ། །ཞེས་པ་ལྟ་བུ། རྟོག་ནི། མཐའ་བྲལ་ཟླ་བའི་མ་མའི་གཏིང་དཔག་གིས། །ཆོས་ཀུན་གཞལ་བའི་ཐུགས་ཀྱི་ཚད་ལ་རྟོག །ཅེས་པ་ལྟ་བུ། དམན་པ་ནི། གང་གི་རིགས་པ་སྨྲ་བའི་རྣམ་དཔྱོད་ལས། །ཕན་སེམས་ཞན་པས་ཕུར་བུའི་སྣང་ཚུལ་དམན། །ཞེས་པ་ལྟ་བུ། ཅུང་ཟད་དམན་པ་སོགས་ནི། གང་དང་མཁྱེན་བརྩེ་མཚུངས་པའི་དབྱངས་ཅན་ལྷ། །ཁྱོད་ལས་རྟེན་གྱི་སྒོ་ནས་ཅུང་ཟད་དམན། །ཞེས་པ་ལྟ་བུ། རབ་ཏུ་སྨྲ་བ་ནི། ཆོས་ཀུན་དབྱངས་སུ་ལེན་པའི་རྒྱལ་བའི་གསུང་། །ཟུར་ཕུད་ལྔ་པའི་ཞལ་ལས་རབ་ཏུ་སྨྲ། །ཞེས་པ་ལྟ་བུ། སོ་སོར་ཟློག་ནི། མཉེན་འཇམ་ལྗག་དང་ཚེམས་དཀར་བཞི་བཅུའི་ཕྲེང་། །པད་འདབ་མུ་ཏིག་བྱུག་རིས་སོ་སོར་ཟློག །ཅེས་པ་ལྟ་བུ། རིགས་མཐུན་མཉམ་བྱས་སྒྲ་དག་ནི། འགྲོ་ལ་རྗེས་སུ་ཆགས་པའི་ཟུར་མིག་གིས། །དབྱངས་ལྡན་སྣང་བྱེད་དག་དང་རིགས་སུ་མཐུན། །ཞེས་པ་ལྟ་བུ། གང་ཡང་དཔེ་དོན་གཉིས་ཀ་དམན་པ་མིན་པའི་དོན་ཅན་གྱི་ཚིག་ཆོས་མཐུན་པ་ནི། སྟོབས་བཅུ་མངའ་བ་ཁྱོད་ཀྱིས་གསུངས་པའི་ཆོས། །རྒྱུན་ཆད་མེད་པའི་ཡན་ལག་བརྒྱད་ལྡན་ཆབ། །ཅེས་པ་ལྟ་བུ། ཆོས་ཐུན་མོང་ནི། མཆོག་དམན་སྐྱེས་བུ་ཀུན་གྱི་ཐུན་མོང་དུ། །ལོངས་སུ་སྤྱོད་པའི་ཉི་འོད་(༤༨ན)
གསེར་ལྡན་གཞི། །ཞེས་པ་ལྟ་བུ། གྲིབ་མ་འདྲ་བ་ནི། ཆོས་ལྡན་ས་དབང་རྒྱལ་པོའི་བཀའ་ཁྲིམས་དང་། །ལྗོན་པའི་གྲིབ་མར་འགྲོ་རྣམས་བདེ་བར་འཚོ། །ཞེས་པ་ལྟ་བུ། སྡེ་ཚན་གསུམ་པ་ནི། གང་གི་གདོང་རི་བོང་གི་མཚན་མའི་གདོང་པ་ཅན་ཞེས་སོགས་གཞི་མཐུན་དུ་བསྡུས་པ་དང་། འབྲུ་མང་པོའི་ཚིག་སྡུད་ནི། ནམ་མཁའི་མཁྱེན་པ་ཆར་གྱི་ཐུགས་རྗེ་ཅན། །དྲི་ཟའི་སྒྲ་དབྱངས་གསུང་དང་བུང་བའི་སྒྲ། །མཚམས་སྤྲིན་བླ་གོས་གསེར་གྱི་རི་དབང་དཀྱུས། །འགྲོ་བ་ཀུན་གྱི་རེ་འདོད་རྣམ་པར་སྐོང་། །ཞེས་པ་ལྟ་བུ། འགྲན་པ་ནི། སྐྱེ་བོ་ཀུན་ལ་བདེ་བ་ཆེས་སྟེར་བས། །ཀར་ཤི་མཛེས་དགའི་ལུས་ལ་རྣམ་པར་འགྲན། །ཞེས་པ་ལྟ་བུ། རྒྱལ་བ་ནི། འོད་ཀྱི་ཕུང་པོའི་གཟི་ལྡན་ཞལ་གྱི་ཁྱིམ། །སྒྲ་ཅན་གྱིས་སྒྲིབ་རྟ་ལྗང་ཅན་ལས་རྒྱལ། །ཞེས་པ་ལྟ་བུ། སྡང་བ་ནི། བསིལ་ལྡན་ཁ་བའི་རི་ལ་ཆེས་སྡང་བའི། །རབ་དཀར་མཛོད་སྤུའི་མཛེས་པ་ངོ་མཚར་རྨད། །ཅེས་པ་ལྟ་བུ། འཁུ་བ་ནི། རྣམ་དཔྱོད་རྒྱ་གར་མཁས་ལ་འཁུ་བ་ཡི། །ཤོང་སྟོན་འཆད་རྩོད་རྩོམ་པའི་ཚུལ་འདི་དཔའ། །ཞེས་པ་ལྟ་བུ་མི་མཐུན་སྒྲོག་པ་ནི། བོད་ཡུལ་ཤེས་ལྡན་ཆོས་སྐྱོང་བཟང་པོ་དང་། །ལྷ་ཡི་བླ་མའི་སྣང་ཚུལ་མི་མཐུན་སྒྲོག །ཅེས་པ་ལྟ་བུ། འཐབ་པ་ནི། གཡོན་མིག་མཛེས་མའི་སྙིམ་པ་ཆུ་སྐྱེས་གཉིས། །དཀར་ཞིང་མཛེས་པའི་ཚུལ་ལ་རྣམ་པར་འཐབ། །ཅེས་པ་ལྟ་བུ། འཕྱ་བ་ནི། དཔང་སྟོན་བློ་གྲོས་བརྟན་པའི་ལེགས་བཤད་ཀྱིས། །པཎ་ཆེན་(༤༨བ)
དཎྜིའི་གསུང་ལ་རྣམ་པར་འཕྱ། །ཞེས་པ་ལྟ་བུ། སྨ་འབེབས་བྱེད་པ་ནི། འབྲུག་སྒྲ་མངལ་འཛིན་སྒྲོ་གཤོག་རབ་རྐྱོང་བས། །རྣམ་བཀྲ་དབང་པོའི་གཞུ་ཡི་དམའ་ཡང་འབེབས། །ཞེས་པ་ལྟ་བུ། སྨོད་པ་ནི། རཱ་མ་ཎ་ཡི་རྣོན་པོའི་ཉག་ཕྲན་གྱིས། །གྲོང་གསུམ་འཇོམས་པའི་མདའ་ལད་སྨོད་པར་བྱས། །ཞེས་པ་ལྟ་བུ། ཅོ་འདྲི་བ་ནི། འཇིགས་མེད་དཀའ་སྤྱད་བཟོད་པའི་སྙིང་སྟོབས་ཀྱིས། །གདོང་ལྔའི་དབང་པོའི་ཚུལ་ལ་ཅོ་འདྲིར་འོས། །ཞེས་པ་ལྟ་བུ། འགོག་པ་ནི་སི་ཏར་འདོད་མྱོས་སྒྲ་ཡིས་མགྲིན་ནག་གི །ཆགས་པས་དཀའ་ཐུབས་ཉམས་པའི་སྐད་གསང་འགོག །ཅེས་པ་ལྟ་བུ། རྒོད་པ་ནི། ལང་ཀའི་བདག་པོའི་ཡན་ལག་མཆོག་བཅད་པས། །ཁྱབ་འཇུག་ཚངས་མགོ་བྲེགས་པའི་དཔའ་ལ་རྒོད། །ཅེས་པ་ལྟ་བུ། ཕྲག་དོག་ནི། རྩིག་ངོས་འབོད་གྲོགས་ཤར་བས་ཟླ་བའི་གཟུགས། །བརྒྱ་ཕྲག་རྫིང་བུར་སྣང་ལ་ཕྲག་དོག་གོ ། ཅེས་པ་ལྟ་བུ། མི་བཟོད་པ་ནི། ལང་ཚོ་དར་བའི་སྐེད་མེད་སོར་མོ་ཡིས། །དབྱར་སྐྱེས་ལྕུག་ཕྲན་གཞོན་ནུ་མི་བཟོད་བྱེད། །ཅེས་པ་ལྟ་བུ། སྡེ་ཚན་བཞི་པ་ལ། དེ་ཡི་སྐལ་བཟང་ཕྲོག་པར་བྱེད་པ་ནི། །རྒྱལ་བས་ཕན་བདེའི་བསིལ་མངར་རབ་བྱིན་པས། །ལྷོ་ཕྱོགས་དྲི་བཞོན་སྐལ་བཟང་རྣམ་པར་ཕྲོག །ཞེས་པ་ལྟ་བུ། དེ་ཡི་མཛེས་པ་ཟུམ་པར་བྱེད་པ་ནི། །ཉེས་པའི་སྐྱོན་དང་དང་བྲལ་བའི་མཛད་པ་ཡིས། །མུ་སྟེགས་གཏམ་གྱི་མཛེས་པ་ཟུམ་པར་བྱེད། །ཅེས་པ་ལྟ་བུ། དེ་དང་འགྲན་ལས་ཚར་གཅོད་པ་ནི། མཁྱེན་དང་བརྩེ་བ་(༤༩ན)
ནམ་མཁའི་མཐར་སྙེག་པས། །ན་ཀྲའི་གྲོང་ཁྱེར་ཁ་ཞེང་ཚར་བཅད་དོ། །ཞེས་པ་ལྟ་བུའོ། །དེ་དང་མཚུངས་ལས་ལྷག་པར་མཛེས་པ་ནི། དབྱངས་ཅན་ཟུར་མིག་འཕྲུལ་འདི་པད་ནང་དུ་། །རྐང་དྲུག་འཕུར་དང་མཚུངས་ལས་ལྷག་པར་མཛེས། །ཞེས་པ་ལྟ་བུ། དེ་ཡི་རྗེས་སུ་རྐང་པ་འཇོག་པ་ནི། སྙན་འགྱུར་དབྱངས་ལ་ཀ་ལ་པིང་ཀའི་སྒྲ། །དྲི་ཟའི་པི་ཝཾ་རྗེས་སུ་རྐང་པ་འཇོག །ཅེས་པ་ལྟ་བུ། དེ་ཡི་ནུས་པ་ལ་འཇུག་པ་ནི། བརྡའ་སྤྲོད་ཚུལ་ལ་ཡིད་ནི་གསལ་བྱེད་པས། །མ་དྲུག་པ་དེར་ཉི་མའི་ནུས་པ་འཇུག །ཅེས་པ་ལྟ་བུ། དེ་ཡི་རྗེས་འགྲོ་རྗེས་སུ་འཆིང་བ་ནི། །ཟླ་གཞོན་ཞགས་པའི་རྗེས་སུ་སྙེག་པ་ཡི། །བདུད་རྩིའི་ཟེར་གྱི་བདེ་བས་རྗེས་སུ་འཆིང་། །ཞེས་པ་ལྟ་བུ། །དེ་ཡི་ངང་ཚུལ་དེ་འགོག་པ་ནི། དཔང་ལོ་རྒྱ་གར་མཁས་པའི་ངང་ཚུལ་གྱིས། །དབུས་འགྱུར་པཎ་ཆེན་མཁས་པའི་གྲགས་སྙན་འགོག །ཅེས་པ་ལྟ་བུ་དང་། དེ་ཡི་རྗེས་སུ་བྱེད་ཅེས་པ་ནི། མང་ཐོས་སྐད་གཉིས་སྨྲ་བའི་དབང་པོ་ཁྱོད། །རིག་བྱེད་སྨྲ་ལ་ཚངས་པའི་རྗེས་སུ་བྱེད། །ཅེས་པ་ལྟ་བུའི་སྡེ་ཚན་བཞི་པོ་སྡོམས་པའི་སྒྲ་དྲུག་ཅུ་རྩ་ལྔ་པོ་རྣམས་མཚུངས་པ་གསལ་བྱེད་ཡིན་ནོ། །མ་ཟིན་པ་ངག་གི་དབང་ཕྱུག་གི་འགྲེལ་པ་ལས་བཤད་པའི་དང་པོ་ཆ་ནི། འདྲེན་བྱེད་ཟུར་གྱིས་གཡོ་བའི་ཆ། །བྷྲ་མ་ར་ལ་ལོངས་སུ་སྤྱོད། །ཅེས་པ་ལྟ་བུ། གྲོགས་ནི། ཨིནྡྲ་ནཱི་ལའི་འཁྲི་ཤིང་དེ། །ཁྱོད་ཀྱི་སྨིན་མའི་གྲོགས་པོ་བྱེད། །ཅེས་པ་ལྟ་བུ། སྤུན་ཟླ་ནི། གང་གི་འཇམ་མཉེན་མཆུ་སྒྲོས་ཀྱིས། །ཨུཏྤལ་དམར་པོའི་(༤༩བ)
སྤུན་ཟླ་ཐོབ། །ཅེས་པ་ལྟ་བུ། མཐོང་བ་ནི། གངས་རིའི་དུམ་བུ་ལྟར་དཀར་བར། །སོ་ཡི་ཕྲེང་བ་བདག་གིས་མཐོང་། །ཞེས་པ་ལྟ་བུ། ཐོས་པ་ནི། བནྡྷ་བྷ་ཡི་གླིང་བུའི་སྐད། །ཁྱོད་ཀྱི་མགྲིན་པའི་དབྱངས་ལས་ཐོས། །ཞེས་པ་ལྟ་བུ། དྲན་པ་ནི། སྐྱེ་བ་ལྔ་པའི་རི་མོ་ཡིས། །གང་གི་མགྲིན་པ་གསལ་བར་དྲན། །ཞེས་པ་ལྟ་བུ། རེག་པ་ནི། འདོད་པའི་མྱོས་བུམ་ཟུང་གིས་ནི། །བལ་གྱི་གླང་པོའི་སྣར་རེག་བྱེད། །ཅེས་པ་ལྟ་བུ། ཕམ་པ་ནི། ཕྲ་ཞིང་ལྡེམ་པའི་སྐེད་སྐབས་ཀྱིས། །འཁྲི་ཤིང་གཞོན་ནུ་ཕམ་པར་བྱས། །ཞེས་པ་ལྟ་བུ། སྙེག་པ་ནི། སྣ་ཚོགས་ནོར་བུའི་དོ་ཤལ་གྱིས། །རྣམ་ཐོས་བུ་ཡི་ནོར་ལ་སྙེག །ཅེས་པ་ལྟ་བུ། འཇོག་པ་ནི། ཆུ་སྐྱེས་ཀྱིས་བརྟེན་ཞབས་པད་ཟུང་། །ལྷར་བཅས་འགྲོ་བའི་སྤྱི་བོར་འཛེག །ཅེས་པ་ལྟ་བུ། སེམས་པ་ནི། དྲན་པས་དོན་ཀུན་སྟེར་བྱེད་པ། །དབྱངས་ཅན་ལྷ་མོ་ཡིན་པས་སེམས། །ཞེས་པ་ལྟ་བུ། ཟུར་མཁར་བས། སྐབས་འདིར་སྣར་ཐང་པ་ལ་དགག་པ་མཛད་པ་ནི་མ་དག་པས་དག་པ་སུན་འབྱིན་པར་འདུག་ཅིང་། སྐབས་འདིའི་འདྲ་བ་ནི། ཟླ་བའི་དཀྱིལ་འཁོར་དང་དབྱངས་ཅན་མའི་ཞལ་གཉིས་མཚུངས་ཤིང་འདྲ་བ་ཡིན་ལ། རབ་བརྟགས་ཀྱི་འདྲ་བ་ནི། མི་འདིས་བྱ་བ་འདི་འདྲ་ཞིག་བྱེད་པར་འདྲ་ཞེས་ཐེ་ཚོམ་གྱི་འདྲ་བ་དེ་ཡིན་པས་དེས་མཚོན་ཏེ་ནོར་འཁྲུལ་འབྱུང་བའི་གནས་མེད་པས། མཁས་པ་ཟུར་མཁར་པ་ཡང་སྐབས་འདིར་འཁྲུལ་ན་དིང་སང་གི་སྙན་ངག་པ་བློ་ཆུང་རྣམས་མགོ་བོ་འཁོར་བ་བདེན་མོད། འོན་ཀྱང་ཐེ་ཚོམ་གྱི་མདུད་པ་བཀྲོལ་བ་ལ་རྗེས་སུ་(༥༠ན)
ཡི་རང་བར་བྱོས་ཤིག །དཔའ་བོ་གཙུག་ལག་པའི་བཤད་པ་རྣམས་ནི་ཕལ་ཆེར་ཉེས་བཤད་ཁོ་ནར་འདུག་པས་ལེགས་ཉེས་ཀྱི་རྟོག་དཔྱོད་བྱེད་མི་དགོས། འོན་ཀྱང་བློ་ལྡན་མི་དགེས་མེད་གང་ལ་ཞེས་པར་གང་ལ་མཁས་རྣམས་མི་དགོས་པའི། ཞེས་འདོན་པ་བསྒྱུར། མ་ནིང་འདི་འགྲོ་བུད་མེད་བཞིན། ཞེས་སོགས་ཀྱི་དམིགས་བསལ་སྐྱོན་མེད་པ་རྣམས་སྐྱོན་ཡོད་པར་བསྒྲུབས་ནས། འགྲེལ་པ་སྔ་མ་རྣམས་མ་དག་ཅེས་ཟེར་བ་འདི། དཔང་སྟོན་ཐམས་ཅད་མཁྱེན་པའི་འགྲེལ་པ་ཡང་མ་དག་པར་སྨྲ་རྒྱུ་ཡིན་འདུག་པ། རྒྱ་གར་བ་དང་མི་འདྲ་བའི་མཁས་བླུན་དབྱེ་བ་མེད་པའི་བོད་རྒན་རྣམས་ཀྱིས་མཛོ་རྟ་ཁྱི་གསུམ། ཡོལ་སྒོར་ཕྱི་ནང་། རྨོངས་པའི་འཁོར་གྱི་འདུ་འགོད་ལྷུར་བླངས་པའི་ཆོས་བརྒྱད་ཀྱི་གོང་བུ་རྣམས་ལ་སངས་རྒྱས་སུ་རྩི་བའི་སྟབས་ཀྱིས། ཁྱེད་ཅག་ཀརྨ་པའི་བླ་ཆེན། ལྷའི་སོབ་དར་ཟབ་ཀྱིས་དྲིལ་བ་རྣམས་ལང་ལ་ཤོར་ཏེ། ཁྱི་རྒན་ཐོག་ཁར་བཞག་ན་གནམ་གྱི་སྐར་མར་སྙེག་པའི་དཔེ་བྱེད་རྒྱུ་ཡིན་ནམ། ཡང་ན་སྙན་ངག་མེ་ལོང་གི་བསྟན་པ་བསྣུབ་པ་ལ་བདུད་སྡིག་ཅན་བསམ་བཞིན་དུ་རབ་ཏུ་བྱུང་བའི་རྟགས་བཟུང་ནས་འོངས་པར་གདོན་མི་ཟའོ། །