ལེའུ་བཅུ་དགུ་པའི་རྣམ་པར་བཤད་པ།

༈ སྤྱི་དོན་བཞི་པ་དམ་ཚིག་དང་ལྡན་པས་འགྲུབ་པ་དམ་ཚིག་གི་རིམ་པ་ལ་གསུམ་སྟེ། དོན་གྱི་འབྲེལ་དགོད་པ། ཚིག་གི་དོན་བཤད། སྐབས་ཀྱི་དོན་བསྡུ་བའོ། །

དང་པོ་ནི། མཆོད་སྦྱིན་བཤད་པ་དེ༵་ན༵ས་བཅོ༵མ་ལྡན༵་འད༵ས་དམ་ཚིག་ཆེན་པོའི་རང་བཞིན་ལ་དགྱེ༵ས་པ༵་ཆེ༵ན་པོ༵ས་གསང་སྔག༵ས་འཆ༵ང་བའི་རྣལ་འབྱོར་པ་རྣམ༵ས་འབྲས་བུ་མྱུར་དུ་འགྲུབ་ཅིང་ལོག་པར་མི་ལྟུང་བས་སྨོན་པ་དོན༵་ཡོ༵ད་པ༵ར་བྱ༵་བའི༵་ཕྱིར༵་གསང་ཆེན་རྒྱལ་པོའི་དམ༵་ཚི༵ག་ཆེ༵ན་པོ༵་འདི༵་ཆེ༵ད་དུ༵་བརྗོ༵ད་པར་མཛད་དོ༵། །

གཉིས་པ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གསུམ་སྟེ། བསྲུང་བྱ་དམ་ཚིག་གི་རང་བཞིན། དམ་ཚིག་དང་སྡོམ་པའི་ཁྱད་པར། བསླབ་གསུམ་མི་འགལ་བར་འདུས་ཚུལ་ལོ། །དང་པོ་ལ་ལྔ་སྟེ། ངེས་ཚིག །དབྱེ་བ། ཕན་ཡོན། ཉེས་དམིགས། གསོ་ཐབས་སོ། །

དང་པོ་ནི། ས་མ་ཡ་ཞེས་པའི་སྒྲ་ལས་དམ་ཚིག་ཏུ་བཤད་དེ། (༣༠༠)དེ་ལ་གསུམ་ལས། བསྲུངས་ན་ཕན་ཡོན་འཐོབ་པས་དམ་ཚིག་ཏུ་གཞག་པ་ནི། རྡོ་རྗེ་ལས། དམ་པ་རྣམས་ཀྱི་དགོངས་པ་ལ། །དབང་དང་བྱིན་རླབས་ཐོབ་པ་ཡིས། །དམ་པའི་ཚུལ་བཞི་ངེས་སྤྱད་ན། །མི་མཐུན་ཕྱོགས་རྣམས་ཚིག་པར་འགྱུར། །ཞེས་སོ། །ཉམས་ན་ཉེས་དམིགས་འཐོབ་པས་ཀྱང་དེ་སྐད་ཅེས་བྱ་སྟེ། ཡང་དེ་ཉིད་ལས། དམ་པ་རྣམས་ཀྱི་བཀའ་བཅག་ཅིང་། །བྱིན་རླབས་དམོད་བོར་རང་བཞིན་གྲུབ། །དམ་པ་འདི་ལས་གང་འདས་པ། །རྡོ་རྗེ་ཅན་ཡང་ཚིག་པར་འགྱུར། །ཞེས་སོ། །ཐུན་མོང་དམ་བཅའི་ཚུལ་གྱིས་ཀྱང་དེ་སྐད་ཅེས་བྱ་སྟེ། ཡེ་ཤེས་དམ་པ་ལས། རྒྱལ་བའི་གསང་ཆེན་རྨད་ཀྱི་ཆོས། །མ་ཉམས་དམ་དུ་འཛིན་པའི་ཕྱིར། །བླ་མས་ཇི་སྐད་བསྟན་པ་བཞིན། །དམ་བཅས་ཚིག་ནི་བརྟན་འཛིན་པ། །དམ་ཚིག་ཅེས་སུ་བཤད་པ་ཡིན། །ཞེས་སོ། །མདོར་ན་སྤང་བྱ་སྤོང་ཞིང་བསྒྲུབ་བྱ་སྒྲུབ་པར་དམ་བཅས་པ་ལས་མི་ཉམས་པར་བྱེད་པའི་སྒོ་གསུམ་གྱི་བརྩོན་པའི་རང་བཞིན་དགེ་བ་ཆ་དང་བཅས་པ་ལ་དེ་སྐད་ཅེས་བྱའོ། །

གཉིས་པ་དབྱེ་བ་ལ་གསུམ་སྟེ། ངོ་བོའི་དབྱེ་བ། ཡན་ལག་གི་དབྱེ་བ། བསམ་གྱིས་མི་ཁྱབ་པའི་དབྱེ་བའོ། །དང་པོ་ལ་གཉིས་ཏེ། ངོ་བོ་དངོས་དང་། དེའི་དབྱེ་བའོ། །

དང་པོ་ནི། རྩ་བ་དང་ཡན་ལག་གི་དམ་ཚིག་གཉིས་ཏེ། དེའང་ལྗོན་ཤིང་གི་རྩ་བ་ལྟར་བསྲུངས་ཤིང་བསྐྱེད་ན་ཡོན་ཏན་གྱི་འབྱུང་གནས་ཡིན་ཞིང་མ་བསྲུངས་ན་མི་འབྱུང་བས་རྩ་བའི་དམ་ཚིག་ཅེས་བྱ་ལ། དེ་བསྲུང་བའི་ཐབས་དང་གྲོགས་སུ་གྱུར་པའི་ཕྱིར་ཡན་ལག་གི་དམ་ཚིག་ཅེས་བྱའོ། །

གཉིས་པ་དེའི་དབྱེ་བ་ལ་བཅོ་ལྔ་སྟེ། རྩ་བའི་ལྔ་དང་། ཡན་ལག་གི་བཅུའོ། །རྩ་བ་ལྔ་ནི། བླ་མེད་མི་སྤང་བ། བླ་མ་བཀུར་བ། སྔགས་དང་ཕྱག་རྒྱ་རྒྱུན་མི་གཅད་པ། ཡང་དག་པའི་ལམ་དུ་ཞུགས་པ་ལ་བྱམས་པ། གསང་བའི་དོན་གཞན་དུ་མི་བསྒྲག་པའོ། །

དང་པོ་ནི། དཀོན་ཅོག་གསུམ་ནམ་ཡང་མི་སྤོང་བའོ། །དབྱེ་ན་གཞི་སེམས་ཅན་ཐམས་ཅད་ཡེ་ནས་དཀོན་ཅོག་གསུམ་དུ་གནས་པས་མི་སྤང་བ་དང་། ལམ་བསྐྱེད་རྫོགས་གཉིས་སུ་མེད་པའི་རང་བཞིན་དོན་དམ་པ་དང་ཀུན་རྫོབ་བྱང་ཆུབ་ཀྱི་སེམས་གཉིས་མི་སྤང་བ་དང་། འབྲས་བུ་བླ་ན་མེད་པའི་སངས་རྒྱས་སྐུ་གསུམ། དེའི་གསུང་མདོ་རྒྱུད་ལུང་དང་རྟོགས་པའི་ཆོས། དེའི་དོན་ལ་སློབ་པའི་དགེ་འདུན་དཀོན་ཅོག་གསུམ་མི་སྤོང་བའོ། །དེའང་སེམས་ཅན་གྱི་སེམས་ཉིད་ཡེ་ནས་དག་པའི་སངས་རྒྱས་སུ་བཤད་དེ། སེམས་ཉིད་རྫོགས་པའི་སངས་རྒྱས་པས། །སངས་རྒྱས་གཞན་དུ་མ་འཚོལ་ཅིག །ཅེས་སོ། །དེའི་ཡི་གེ་འཁོར་ལོ་ལས་བྱུང་བའི་ངག་ཀྱང་ཆོས་སུ་བཤད་དེ། རྡོ་རྗེ་ལས། ཨཱ་ལི་ཀཱ་ལི་ལས་བྱུང་བའི། །འགྲོ་བའི་སྒྲ་སྐད་དམ་པའི་(༣༠༡)ཆོས། །ཞེས་སོ། །བསོད་ནམས་དང་དགེ་བ་བསྒྲུབ་པའི་ཞིང་དུ་གྱུར་པས་དགེ་འདུན་དུའང་བཤད་དེ། ལེགས་པར་གྲུབ་པ་ལས། སྦྱིན་སོགས་བསོད་ནམས་རྣམ་འཕེལ་ཞིང་། །དེ་དགེའང་བསྒྲུབ་པར་རིགས་ཡོད་ཕྱིར། །རྣམ་པ་གཉིས་ཀྱིས་ཆོས་འགྲུབ་པས། །མ་ལུས་འགྲོ་ཀུན་དགེ་འདུན་ཉིད། །ཅེས་སོ། །ཡང་ཀུན་རྫོབ་དང་དོན་དམ་པའི་ངོ་བོ་སེམས་ཉིད་རང་བཞིན་གྱིས་དག་པའི་སངས་རྒྱས། བདེན་པ་གཉིས་དང་བསྐྱེད་རྫོགས་ཆོས། ཉམས་སུ་ལེན་པ་པོ་དགེ་འདུན་ཏེ་ཡེ་ཤེས་དྲྭ་བ་ལས། བདེན་དོན་བདེན་པའི་རང་བཞིན་དེ་ཉིད་འཛིན་། །རྣལ་འབྱོར་པ་དེ་དཀོན་མཆོག་གསུམ་དངོས་ཉིད། །ཅེས་སོ། །

འབྲས་བུའི་གསུམ་ཡང་རྒྱུད་བླ་མ་ལས། སྟོན་པ་བསྟན་པ་སློབ་དོན་གྱིས། །སྐྱབས་གསུམ་རྣམ་པར་གཞག་པ་ཡིན། །ཞེས་སོ། །ཁ་ཅིག་བླ་མེད་མི་སྤང་བ་ཕྱོགས་རེ་ཁོ་ནར་འཆད་པ་ནི་མི་འཐད་དེ། དཀོན་མཆོག་གི་རང་བཞིན་མ་ཤེས་པའི་ཕྱིར་རོ། །བླ་མ་བཀུར་ལའང་གཉིས་ཏེ། དབྱེ་བ་དང་། བཀུར་ཐབས་སོ། །

དང་པོ་ལ་ལྔ་སྟེ། འདྲེན་པའི་བླ་མ་ནི་ཆོས་ཀྱི་སྒོར་འདྲེན་པ་རབ་བྱུང་གི་མཁན་པོ་ལྟ་བུ་སྟེ། འདུལ་བ་ལས། མཁན་པོ་མཐོང་མ་ཐག་ཏུ་སྟན་ལས་ལྡང་བར་བྱའོ། །ཞེས་པ་དང་། ཀཱ་རི་ཀཱ་ལས། བླ་མ་གནས་པའི་སྒོ་གླེགས་ལ། །ལག་པས་དལ་གྱིས་བརྡུང་བར་བྱ། །ནང་ཞུགས་གུས་པས་བླ་མ་ལ། །ཁམས་བདེ་མི་བདེ་ལ་སོགས་དྲི། །ཞེས་སོ། །ཤེས་རྒྱུད་འགྲོལ་བའི་བླ་མ་ནི་ཆོས་འཆད་པའི་སློབ་དཔོན་ལྟ་བུ་སྟེ། མདོ་སྡེ་ཐར་པ་ཆེན་པོ་ལས། ཆོས་སྨྲ་བའི་དགེ་སློང་ལ་གུས་པས་བླ་མར་བྱ་སྟེ། ཞེས་པ་དང་། དཀོན་བརྩེགས་ལས། ཆོས་སྨྲ་བ་ནི་བླ་མའི་མཆོག་རབ་སྟེ། །རྒྱལ་བའི་མཆོད་སྡོང་ཆེན་པོ་དེ་བཀུར་རོ། །ཞེས་སོ། །མན་ངག་སྟོན་ཅིང་ལུང་འབོགས་པའི་བླ་མ་ནི་སེམས་བསྐྱེད་པའི་དགེ་བའི་བཤེས་གཉེན་ལྟ་བུ་སྟེ། སྡོང་པོ་བཀོད་པ་ལས། དེ་ནི་བདག་གིས་ཐོག་མ་མེད་པ་ནས་སེམས་བསྐྱེད་པའི་དགེ་བའི་བཤེས་གཉེན་ཡིན་ཏེ། ཞེས་སོ། །ཉམས་ཆག་སྐོང་བའི་སློབ་དཔོན་ནི་སྡིག་པ་བཤགས་པའི་ཡུལ་དུ་གྱུར་པ་སྟེ། སུ་སི་ཏི་ཀ་རའི་རྒྱུད་ལས། བཤགས་པའི་ཡུལ་དུ་གང་གྱུར་པ། །དེ་ཡང་དེ་ཡི་བླ་མ་ཡིན། །ཞེས་སོ། །དམ་ཚིག་དབང་གི་བླ་མ་ནི། རྒྱ་མཚོ་ལས། དབང་བསྐུར་མཆོག་ཐོབ་རྡོ་རྗེ་ཡི། །བླ་མ་ལ་ནི་དེ་བཞིན་གཤེགས། །ཞེས་སོ། །དེ་དག་གི་སྟེང་དུ་ཀུན་གྱིས་དམ་པར་བཀུར་ཞིང་། བཀའ་དྲིན་ཅུང་ཟད་ཐོབ་པའི་སྤྱིའི་བླ་མ་དང་དྲུག་ཏུའང་བཤད་དེ། གསལ་བཀྲ་ལས། སྤྱི་དང་འདྲེན་དང་དམ་ཚིག་དང་། །ཆག་ཉམས་སྐོང་དང་ཤེས་རྒྱུད་འགྲོལ། །མན་ངག་ལུང་གི་སློབ་དཔོན་རྣམས། །ཞེས་སོ། །

གཉིས་པ་(༣༠༢)བཀུར་ཐབས་ནི་ཐུན་མོང་གི་བླ་མ་རྣམས་བསོད་ནམས་དང་མཆོད་པའི་ཞིང་ལ་སོགས་པ་དམ་པའི་ཡུལ་དུ་བལྟ་བས་བདག་ཉིད་ནད་པ། གདམས་པ་སྨན། ཉམས་སུ་ལེན་པ་དེ་རྒྱུད་ལ་བསྟེན་པ། དགེ་བའི་བཤེས་གཉེན་སྨན་པ་མཁས་པའི་ཚུལ་གྱིས་བསྟེན་ཏེ། སྡོང་པོ་བཀོད་པ་ལས། རིགས་ཀྱི་བུ་ཁྱོད་ཀྱིས་བདག་ཉིད་ལ་ནད་པའི་འདུ་ཤེས་དང་། ཆོས་ལ་སྨན་དང་། ཉམས་སུ་ལེན་པ་ལ་ནད་ཉེ་བར་འཚོ་བ་དང་། དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་རབ་ཏུ་བསྐྱེད་པར་བྱའོ། །ཞེས་པའི་ཚུལ་གྱིས་སོ། །ཁྱད་པར་དུ་གསང་སྔགས་རྡོ་རྗེའི་སློབ་དཔོན་ལ་ཚུལ་གསུམ་གྱིས་བཀུར་ཏེ། དེའང་དཀོན་ཅོག་བཞི་པར་གསུངས་པ་ནི། རྡོ་རྗེ་རྩེ་མོ་ལས། སངས་རྒྱས་ཆོས་དང་དགེ་འདུན་དང་། །སློབ་དཔོན་ཡང་ནི་བཞི་པ་ཡིན། །ཞེས་སོ། །སངས་རྒྱས་དང་མཉམ་པར་ཡང་རྣམ་སྣང་སྒྱུ་འཕྲུལ་དྲྭ་བ་ལས། སངས་རྒྱས་ཀུན་དང་བླ་མ་མཉམ། །ཞེས་སོ། །ལྷག་པར་ཡང་ཐུགས་ཀྱི་རྒྱུད་དཔལ་གསང་བ་འདུས་པ་ལས། ཕྱོགས་བཅུའི་སངས་རྒྱས་ཐམས་ཅད་པས། །བླ་མའི་བ་སྤུ་ཁུང་གཅིག་མཆོག །ཅེས་པའི་ཚུལ་གྱིས་ཇི་ལྟར་མཉེས་པའི་རིམ་པས་བཀུར་བར་བྱའོ། །སྔགས་དང་ཕྱག་རྒྱ་རྒྱུན་མི་གཅད་པ་ལའང་གཉིས་ལས། སྔགས་ནི་ལྷ་སོ་སོའི་དངོས་གྲུབ་སྒྲུབ་པའི་ཐབས་ཀྱི་རིམ་པ་སྟེ་ལྷའི་དེ་ཁོ་ན་ཉིད་ལ་སོགས་པ་ལྔས་བཟླས་པ་དང་། ཕྱག་རྒྱ་ནི་དངོས་གྲུབ་བསྒྲུབ་པའི་གྲོགས་ཀྱི་ཡན་ལག་སྟེ། བསམ་པ་ཆོས་ཀྱི་ཕྱག་རྒྱ། བརྗོད་པ་དམ་ཚིག་གི་ཕྱག་རྒྱ། བསྒྱུར་བ་ལས་ཀྱི་ཕྱག་རྒྱ། ལྷའི་སྐུ་ཕྱག་རྒྱ་ཆེན་པོའོ། །རྒྱུན་མི་གཅད་པ་རབ་ཆུ་བོའི་རྒྱུན་ལྟ་བུ། འབྲིང་ཉིན་མཚན་གྱི་ཐུན་ལ་གནས་པ། ཐ་མའང་ཉ་སྟོང་བརྒྱད་ལ་སོགས་པ་ཟླ་བ་དང་ལོའི་དུས་སུ་མ་ཆག་པར་བྱེད་པ་སྟེ། རྔམ་གློག་ལས། རབ་གྱིས་ཆུ་བོའི་རྒྱུན་བཞིན་ནམ། །ཉིན་གསུམ་མཚན་གསུམ་ཉིན་མཚན་དུ། །མ་ཡེངས་པ་ཡི་ངང་གིས་བཟླ། །འབྲིང་གིས་ཟླ་གཅིག་དུས་དྲུག་དང་། །དུས་བཞི་བར་དུ་མི་གཅད་ཅིང་། །ཐ་མར་བརྩོན་པའི་རྣལ་འབྱོར་པས། །ཟླ་རེའམ་ར་བའི་དུས་དག་ཏུ། །བརྩོན་པར་འབད་དེ་མི་བྱེད་པ། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མའང་དེ་བཞིན་ཏེ། །ཐ་མས་ལོ་ཟླ་མི་འདའ་འོ། །ཞེས་སོ། །ཡང་དག་པའི་ལམ་དུ་ཞུགས་པ་ལ་བྱམས་པ་ནི་མཆེད་ལ་བརྩེ་གདུང་བྱ་བ་སྟེ། སྤྱིར་མཆེད་ལྕམ་རྣམ་པ་དྲུག་སྟེ། སེམས་ཅན་ཐམས་ཅད་ཡེ་གདོད་མ་ནས་བདག་གི་སྤུན་ཡིན་པའི་ཕྱིར་སྤྱིའི་མཆེད་དོ། །སངས་རྒྱས་ཀྱི་ཆོས་ལ་ཞུགས་སོ་ཅོག་ནི་བསྟན་པ་གཅིག་པའི་མཆེད་དོ། །ལྟ་སྤྱོད་གཅིག་པ་ནི་མཐུན་པའི་མཆེད་དོ། །བླ་མ་(༣༠༣)གཅིག་པ་ནི་མཛེས་པའི་མཆེད་དོ། །ཆོས་ལྷན་ཅིག་ཏུ་ཉན་པ་ནི་ཉེ་བའི་མཆེད་དོ། །དབང་ལྷན་ཅིག་ཏུ་ཞུས་པ་ནི་འདྲེས་པའི་མཆེད་དེ་རྡོ་རྗེའི་སྤུན་ནོ། །འདིར་ནི་སྤྱིར་ཐར་པའི་ལམ་དང་ཐེག་པ་ཆེན་པོར་ཞུགས་པ་ལ་བརྩེ་བ་སྟེ། དཔལ་འཕྲེང་གི་མདོ་ལས། བྱང་ཆུབ་སེམས་བརྟན་ཐེག་ཆེན་ཞུགས་ལ་བྱམས། །ཞེས་སོ། །ཁྱད་པར་དུ་རྡོ་རྗེའི་སྤུན་ལ་བརྩེ་གདུང་བྱ་བ་སྟེ། རྔམ་གློག་ལས། རྡོ་རྗེའི་སྤུན་ལ་གདུང་སེམས་ཀྱང་། །འདྲེས་དང་མ་འདྲེས་ཡོངས་ཀྱི་སྤུན། །ཡང་དག་ལམ་དུ་ཞུགས་པ་ལ། །རྔན་དང་བཅས་ཀྱི་སེམས་ཙམ་ཡང་། །རྟག་ཏུ་སྤང་བར་བྱ་བ་ཡིན། །བརྩེ་ཞིང་གདུང་བའི་ཤུགས་ཕྱུང་ལ། །གཅིག་ལ་གཅིག་ནི་མིག་བཞིན་བལྟ། །མདོར་ན་སྲོག་ལའང་མི་ཆགས་པར། །སྤུན་དང་མིང་སྲིང་དགོས་པ་སྒྲུབ། །ཅི་ཕྱིར་རྡོ་རྗེ་སྤུན་རྣམས་ནི། །འདི་ནས་བྱང་ཆུབ་བར་དག་ཏུ། །མི་འབྲལ་འགྲོགས་པའི་གྲོགས་མཆོག་སྟེ། །མེ་མར་འོད་དང་སྡོང་བུ་འདྲའོ། །ཞེས་སོ། །གསང་བ་མི་བསྒྲགས་པའི་དམ་ཚིག་ཀྱང་གསང་སྔགས་ཀྱི་ལྟ་སྒོམ་སྤྱོད་འབྲས་ཟབ་མོ་རྣམས་སྣོད་མ་ཡིན་པའི་འགྲོ་བ་ལ་ཤིན་ཏུ་གསང་བ་སྟེ། ཕྲ་རྒྱས་ལས། སྤྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །ལྟ་ཟབ་སྤྱོད་པ་བརླང་པོ་དང་། །ལྷ་མིང་གཟུངས་དང་གྲུབ་རྟགས་རྣམས། །སྤྱིར་གསང་རྣམ་པ་བཞིར་བཤད་དོ། །སྒྲུབ་པའི་གནས་དུས་གྲོགས་དང་རྫས། །བར་དུ་གསང་ནས་བསྒྲུབ་པར་བྱ། །གསང་བར་འོས་པའི་དམ་ཚིག་ནི། །ཕུད་དང་གཏོར་མ་ཚོགས་དག་དང་། །བནྡྷ་ཕུར་པ་མར་མེའི་སྣོད། །རྫས་དང་ལག་ཆ་དཀྱིལ་འཁོར་རྣམས། །སྐྱེ་བོས་མཐོང་བར་ཡོངས་མི་བྱ། །དྲིལ་བུ་རྔེའུ་ཆུང་ལ་སོགས་སྒྲ། །སྐྱེ་བོས་ཐོས་པར་ཡོངས་མི་བརྡུང་། །གྲོགས་ཀྱི་སྐྱོན་དང་མཚང་རྣམས་དང་། །སེམས་ཅན་ཀུན་གྱི་ངན་སྤྱོད་རྣམས། །ཀུན་ལ་གནོད་པའི་སྤྱོད་པ་རྣམས། །ཤིན་ཏུ་གསང་ན་བྱང་ཆུབ་རྒྱུ། །གཉེར་གཏད་པ་ནི་གདམས་པ་སྟེ། །སྔར་བཤད་སློབ་དཔོན་མཆེད་ཀྱིས་སོ། །ཞེས་སོ། །དེའང་ལྟ་བ་ཟབ་མོ། སྤྱོད་པ་བརླང་པོ། ལྷའི་མིང་གཟུངས། གྲུབ་པའི་རྟགས་ཏེ་སྤྱིར་གསང་བཞི། སྒྲུབ་པའི་གནས། དུས། གྲོགས། རྫས་ཏེ་བར་གསང་བཞི། ཕུད་དང་གཏོར་མ་ལ་སོགས་པ་མཐོང་དུ་མི་རུང་བའི་དམ་རྫས་རྣམས་གསང་བར་འོས་པ། བླ་མ་དང་མཆེད་ལྕམ་གྱིས་འདི་ལྟར་གྱིས་ཤིག་ལ་སོགས་པ་གཉེར་དུ་གཏད་པ་སྟེ་བཅུ་པོ་འདི་དག་གང་ལ་གསང་ན། དེ་ཉིད་ལས། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ་། །ཞེས་པ་དང་། རྔམ་གློག་ལས། སྣོད་མ་ཡིན་པའི་གང་ཟག་ལ། །(༣༠༤)དུས་དང་གནས་སྐབས་ཀུན་ཏུ་གསང་། །སྣོད་དང་ལྡན་པ་རྣམས་ལ་ཡང་། །དབང་མ་ཐོབ་པར་བཤད་པ་མིན། །ཞེས་སོ། །ཇི་ལྟར་གསང་ན་དེ་ལས། སེམས་ཀྱི་བསྟན་པར་མི་བསམ་ཞིང་། །ལུས་ཀྱིས་ཐམས་ཅད་སྦས་ལ་སྤྱད། །ངག་གིས་རྡོ་རྗེའི་ལྕེ་ཡོད་ཀྱང་། །བརྗོད་པར་བྱ་བ་མ་ཡིན་ནོ། །ཞེས་སོ། །དེ་ལྟར་རྩ་བའི་དམ་ཚིག་གི་ལྷ་མི་སྤང་བ་དང་། དངོས་གྲུབ་ཀྱི་འབྱུང་གནས་བླ་མ་བཀུར་བ་དང་། སྔགས་དང་ཕྱག་རྒྱ་རྒྱུན་མི་གཅད་པ་ནི་ཡོན་ཏན་ཁྱད་པར་ཅན་བསྒྲུབ་པའི་དམ་ཚིག་ཡིན་ལ། དེའི་ཡན་ལག་ཏུ་ཡང་དག་པའི་ལམ་དུ་ཞུགས་པ་དང་། མཆེད་ལྕམ་ལ་གུས་པ་ནི་བླ་མའི་ཐུགས་དང་འགལ་བ་བསྲུང་ཞིང་། གསང་བ་གཞན་ལ་མི་སྨྲ་བ་ནི་ལྷ་དང་སྔགས་དང་ཕྱག་རྒྱའི་དེ་ཉིད་དང་འགལ་བ་བསྲུང་བ་ཡིན་ནོ། །ཁ་ཅིག་ལྷ་དང་སྔགས་ཕྱག་རྒྱ་གཉིས་སྒྲུབ་པ། དེ་དག་གི་ཐུགས་དང་འགལ་བ་བསྲུང་བའི་ཕྱིར་བླ་མ་དང་མཆེད་ལ་གུས་པ། གསང་བ་མི་སྨྲ་བ་གསུམ་སྲུང་བའོ་ཞེས་པ་ནི་མ་ཡིན་ཏེ། མཉམ་སྦྱོར་ལས། སྒྲུབ་པའི་དམ་ཚིག་ཆེན་པོ་ནི། །ལྷ་དང་བླ་མ་མི་སྤང་ཞིང་། །སྔགས་དང་ཕྱག་རྒྱ་རྒྱུན་མི་གཅད། །ཅེས་པ་སྟེ། དངོས་གྲུབ་བསྒྲུབ་པའི་རྩ་བ་བླ་མ་ཡིན་ལ། དེ་མཉེས་ན་དངོས་གྲུབ་འབྱུང་བ་དེ་ལས། མཆོད་པ་ཐམས་ཅད་ཡོངས་སྤང་ལ། །བླ་མ་མཆོད་པ་ཡང་དག་བརྩམ། །དེ་མཉེས་པ་ལས་ཀུན་མཁྱེན་གྱི། །ཡོན་ཏན་མཆོག་ནི་མ་ལུས་འབྱུང་། །ཞེས་པ་དང་། རྡོ་རྗེ་ལས། དཀྱིལ་འཁོར་དབང་ཕྱུག་བླ་མ་ཉིད། །ཅེས་པས་ལྷའི་དཀྱིལ་འཁོར་གྱི་གཙོ་བོ་བླ་མར་གསུངས་པའི་ཕྱིར་ཏེ། དེ་མཉེས་པ་འབའ་ཞིག་བསྒྲུབ་དགོས་པས། སྒྲུབ་པའི་དམ་ཚིག་ཁོ་ནར་བཤད་པའི་ལུང་དང་འགལ་ལོ། །དེ་ལྟར་ལྔ་པོ་ཡང་སྐུ་གསུང་ཐུགས་ཀྱི་རང་བཞིན་གསུམ་གསུམ་ལས་མ་འདས་པས། སྐུ་གསུང་ཐུགས་ཀྱི་དམ་ཚིག་གསུམ་དུ་གནས་ཏེ། དཔེར་ན་བླ་མེད་མི་སྤང་བའང་ལུས་ཀྱིས་བཀུར་ཞིང་། ངག་གིས་བསྟོད་ལ། སེམས་ཀྱིས་གུས་པར་བྱ་བ་དང་། བླ་མའང་ཚུལ་དེ་དང་མཆེད་ལའང་སྒོ་གསུམ་གུས་པ་དང་། སྔགས་དང་ཕྱག་རྒྱའི་དམ་ཚིག་ལའང་སྒོ་གསུམ་ཚང་བ་དང་། གསང་བ་ཡང་སྒོ་གསུམ་གྱི་བྱ་བས་གསང་ཞིང་སྦེད་པའོ། །ཁ་ཅིག་བླ་མ་དང་མཆེད་ལྕམ་ལ་གུས་པ་ནི་གཞི་མ་ལུས་ཀྱི་བྱ་བ་ཡིན་པས་སྐུའི་དམ་ཚིག་ལྷ་མི་སྤང་ཞིང་སྔགས་དང་ཕྱག་རྒྱ་རྒྱུན་མི་གཅད་པ་ནི་བཟླས་བརྗོད་ཀྱི་ཡན་ལག་སྟེ་གསུང་གི་དམ་ཚིག །གསང་བ་མི་སྨྲ་བ་ནི་ཡིད་ལ་བརྣག་པར་བྱ་བ་ཡིན་པས་ཐུགས་ཀྱི་དམ་ཚིག་གོ་ཟེར་བ་དེ་ཡང་རིགས་པར་མ་མཐོང་སྟེ། འདོན་པ་བསྒྱུར་ན་མཚུངས་པའི་ཕྱིར་རོ། །

གཉིས་པ་ཡན་ལག་གི་དམ་ཚིག་བཅུ་ལ། མི་སྤང་བ་ལྔ་དང་། དང་(༣༠༥)དུ་བླང་བ་ལྔའོ། །

དང་པོ་ནི། ཉོན་མོངས་པ་ལྔ་སྟེ། དེའང་རང་བཞིན་ཤེས་པས་མི་སྤང་བ། ཐབས་ཀྱིས་ཟིན་ན་ལམ་གྱི་གྲོགས་ཡིན་པས་མི་སྤང་བ། སྐུ་དང་ཡེ་ཤེས་ཡིན་པས་མི་སྤང་བའོ། །

དང་པོ་ལ་གཉིས་ལས། སངས་རྒྱས་ཀྱི་རིགས་སམ་གདུང་ཡིན་པས་མི་སྤང་བ་ནི། མདོ་ལས། རྨོངས་པའི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །ཞེས་པ་དང་། དྲི་མ་མེད་པར་གྲགས་པ་ལས་ཀྱང་། ཉོན་མོངས་པ་ནི་དེ་བཞིན་གཤེགས་པའི་གདུང་ངོ་། །ཞེས་པ་ལ་སོགས་པ་གསུངས་སོ། །རང་བཞིན་གྱིས་རྣམ་པར་དག་པ་ཡིན་པས་སྤང་བླང་མེད་པའི་ཕྱིར་མི་སྤང་བ་ལའང་ཀུན་རྫོབ་ཏུ་ཉོན་མོངས་པ་སྨིག་རྒྱུ་དང་འདྲ་སྟེ། སྐད་ཅིག་གིས་མི་རྟག་པས་རང་གིས་རང་སྤངས་ཤིང་། དེའང་སྣང་ལ་ངེས་གཟུང་གི་དངོས་པོ་དང་ངོ་བོ་བདེན་པའི་ཆོས་སུ་མ་གྲུབ་པའི་ཕྱིར་སྤང་བྱར་མེད་དེ། རྡོ་རྗེ་ལས། ཉོན་མོངས་རྣམས་ནི་སྒྱུ་འདྲ་ངོ་བོས་སྟོང་། །རང་གིས་མི་རྟག་རང་བཞིན་ཤེས་པས་གྲོལ། །ཞེས་སོ། །དོན་དམ་པར་གང་གི་དངོས་པོར་ཡང་མ་གྲུབ་ཅིང་ཀུན་ཏུ་བཙལ་ན་མི་རྙེད་པས་ཀྱང་སྤང་དུ་མེད་དེ། ཕྱིར་མི་ལྡོག་པ་འཁོར་ལོའི་མདོ་ལས། མ་རིག་ནམ་མཁའ་ཇི་བཞིན་ཏེ། །ཆོས་རྣམས་ཐམས་ཅད་མཚན་ཉིད་མེད། །འདོད་ཆགས་མེད་ཀྱང་ཞེ་སྡང་མེད། །ང་རྒྱལ་དང་ནི་ཕྲག་དོག་ཀུན། །སྒྱུ་འདྲ་ངོ་བོ་ཉིད་མེད་དེ། །ཡོད་མེད་མི་དམིགས་རྟེན་དང་བྲལ། །ཞེས་པ་དང་། སྤྱོད་འཇུག་ལས། ཉོན་མོངས་རྣམས་ནི་ཡུལ་ན་མི་གནས་ཕྱོགས་ན་མི་གནས་དབང་སོགས་ལ་མིན་དེ་དག་བར་ནའང་མིན། །ཞེས་པ་དང་། ཡེ་ནས་སྟོང་པའི་དངོས་འདི་ལ། །ཐོབ་པ་ཅི་ཡོད་ཤོར་ཅི་ཡོད། །མི་དགར་ཅི་ཡོད་དགར་ཅི་ཡོད། །ཐམས་ཅད་ནམ་མཁའ་འདྲ་བར་ནི། །བདག་འདྲས་ཡོངས་སུ་གཟུང་བར་གྱིས། །ཞེས་སོ། །

གཉིས་པ་ཐབས་ཀྱིས་ཟིན་ན་ལམ་གྱི་གྲོགས་ཡིན་པས་མི་སྤང་བ་ནི། ཉོན་མོངས་པ་ལྔ་ཡེ་ཤེས་ལྔའི་རང་བཞིན་ཡིན་ལ། དེ་ཉིད་མན་ངག་གིས་ཉམས་སུ་བླངས་པས་ཉེ་ལམ་དུ་འགྱུར་ཏེ། རྒྱ་མཚོ་ལས། ཉོན་མོངས་ལམ་ནི་དག་པ་ཆེ། །ཐབས་ཀྱི་འདོད་ཡོན་རྒྱན་གྱི་མཆོག །ཐམས་ཅད་ཐམས་ཅད་རོལ་པ་ཡིས། །མྱུར་དུ་ཧེ་རུ་ཀ་དཔལ་འགྱུར། །ཞེས་སོ། །ཚུལ་འདི་མདོ་སྡེ་ལས་ཀྱང་གསུངས་ཏེ། དཀོན་མཆོག་བརྩེགས་པ་ལས། ཇི་ལྟར་གྲོང་ཁྱེར་རྣམས་ཀྱི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོངས་ལུད། །དེ་ནི་རྒྱལ་བའི་ཆོས་ཀྱི་ཞིང་ལ་ཕན། །ཞེས་པ་དང་། ཐེག་བསྡུས་ལས། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །(༣༠༦)ཞེས་གསུངས་སོ། །གཞན་ཡང་སྤང་བྱ་ཉོན་མོངས་པ་མེད་ན་སྤོང་བྱེད་གཉེན་པོ་མི་འབྱུང་བས་ཀྱང་སྤོང་བར་མི་རིགས་པ་དང་། ཉོན་མོངས་པའི་ཆོས་ཅན་ཡོད་ན་དེ་རང་གིས་ངོ་བོས་སྟོང་པའི་ཆོས་ཉིད་ཡོད་པས་ཀྱང་ཆོས་ཉིད་མངོན་དུ་བྱ་བའི་ཕྱིར་མི་སྤང་བ་དང་། ཉོན་མོངས་པ་ལ་བརྟེན་ནས་སེམས་ཅན་གྱི་དོན་འགྲུབ་པའི་ཡན་ལག་ཏུ་འགྱུར་བས་ཀྱང་མི་སྤང་བ་ཡིན་ནོ། །འོ་ན་ཉོན་མོངས་པ་མ་སྤངས་ན་ཡོན་ཏན་མི་སྐྱེ་ཞིང་སངས་རྒྱས་མི་འཐོབ་བོ་ཞེ་ན། ལམ་དང་འབྲས་བུའི་ཡོན་ཏན་ནི་ཉོན་མོངས་པའི་རྒྱུ་ཁོ་ན་ལས་འཐོབ་སྟེ། ཡེ་ཤེས་ཡིན་ཞིང་དེ་གོམས་པར་བྱས་པའི་ཕྱིར་རོ། །ངན་འགྲོ་ལ་སོགས་པར་བརྒྱུད་ཅིང་འཆིང་བ་མ་ཡིན་ནམ་ཞེ་ན། ཉོན་མོངས་པའི་རང་བཞིན་ཤེས་ནས་གོམས་ན་དེའི་ཉེས་པས་མི་གོས་ཤིང་བདེ་འགྲོའི་ལུས་དང་འབྲས་བུ་འཛིན་པ་ཁོ་ནའོ། །ཁ་ཅིག་ན་རེ་ཉོན་མོངས་པ་ལམ་དུ་བྱེད་པ་ན་ཐབས་ཀྱིས་ཟིན་དགོས་སམ་མི་དགོས། དགོས་ན་ཉོན་མོངས་པ་ལམ་དུ་བྱས་པ་མ་ཡིན་ཏེ། ཐབས་ལམ་དུ་བྱས་པའི་ཕྱིར། མི་དགོས་ན་ཐ་མལ་པ་དང་ཁྱད་མེད་པར་ཐལ་ལོ་ཞེ་ན། བཤད་པ། ནས་ལ་ཟན་བྱེད་པར་འདོད་མོད། རྔོ་བ་དང་བཏགས་པར་བྱས་ན་ནས་ཀྱིས་ཟན་དུའང་མི་འགྱུར་ཏེ། ཕྱེའི་ཟན་ཡིན་པའི་ཕྱིར་དང་། མ་བྱས་ན་ཟན་དུའང་མི་འགྲུབ་པོ་ཞེས་པ་འདི་ལ་ལན་ཅི་ཡོད། དེའང་རྒྱུ་ནས་ལ་རྐྱེན་རྔོ་བ་དང་བཏགས་པས་ཟན་དུ་འགྱུར་རོ་ཞེ་ན། འདིར་ཡང་རྒྱུ་ཉོན་མོངས་པ་ལ་རྐྱེན་ཐབས་ཀྱིས་ལམ་དུ་བྱེད་པ་ཁོ་ནའོ། །འདི་ལྟར་ཉོན་མོངས་པའི་དངོས་པོ་གཅིག་ལ་ཉན་རང་གི་སྤང་བྱར་མཐོང་བ་དང་བྱང་ཆུབ་སེམས་དཔས་སྤྱད་བྱར་མཐོང་བ་དང་། གསང་སྔགས་ཐུན་མོང་བས་དག་བྱར་མཐོང་བ་དང་། ཐུན་མོང་མ་ཡིན་པས་བླང་བྱར་མཐོང་བ་ནི་དཔེར་ན་གསེར་ལས་བྱས་བའི་རང་བཞིན་གཅིག་ལ། ཆོལ་ཟངས་སུ་བྱས་པའི་ཚེ་བཙོག་པ་དང་། གཞོང་པར་བྱས་པའི་ཚེ་གཙང་བ་དང་། གདུ་བུར་བྱས་པའི་ཚེ་རྒྱན་དང་། ལྷའི་སྐུ་གཟུགས་སུ་བྱས་པའི་ཚེ་མཆོད་པའི་རྟེན་དུ་བྱེད་པ་བཞིན་དུ། རྐྱེན་གྱིས་ཐེག་པ་སོ་སོས་དེ་ལྟར་མཐོང་ཡང་ངོ་བོ་ཡེ་ནས་དག་པའི་ཡེ་ཤེས་ཡིན་པས། གཞི་ལམ་འབྲས་བུའི་ཆོས་སུ་ཉོན་མོངས་པ་དེ་ཉིད་འགྱུར་བས་སྤང་བར་བྱ་བ་མ་ཡིན་པའི་རྒྱུ་མཚན་འཐད་པ་དང་བཅས་པའོ། །

གསུམ་པ་སྐུ་དང་ཡེ་ཤེས་ཡིན་པས་མི་སྤང་བ་ནི། དམ་ཚིག་ཉེར་བརྒྱད་པ་ལས། ཕྲག་དོག་ལ་སོགས་ཉོན་མོངས་ལྔ་རྣམས་ནི། །ཡེ་ནས་རིགས་ལྔའི་རང་བཞིན་ཡིན་པའི་ཕྱིར། །ཞེས་པས། གཏི་མུག་ཆོས་ཀྱི་དབྱིངས་ཀྱི་ཡེ་ཤེས་དེ་བཞིན་གཤེགས་པའི་རིགས་ཏེ་རྣམ་པར་སྣང་མཛད་ཀྱི་དམ་ཚིག་གོ། །ཞེ་སྡང་མེ་ལོང་ལྟ་བུའི་ཡེ་ཤེས་རྡོ་རྗེའི་རིགས་ཏེ་(༣༠༧)མི་བསྐྱོད་པའི་དམ་ཚིག་གོ། །ང་རྒྱལ་མཉམ་པ་ཉིད་ཀྱི་ཡེ་ཤེས་རིན་པོ་ཆེའི་རིགས་ཏེ་རིན་ཅེན་འབྱུང་ལྡན་གྱི་དམ་ཚིག་གོ། །འདོད་ཆགས་སོ་སོར་རྟོག་པའི་ཡེ་ཤེས་པདྨའི་རིགས་ཏེ་སྣང་བ་མཐའ་ཡས་ཀྱི་དམ་ཚིག་གོ། །ཕྲག་དོག་བྱ་བ་གྲུབ་པའི་ཡེ་ཤེས་ལས་ཀྱི་རིགས་ཏེ་དོན་ཡོད་གྲུབ་པའི་དམ་ཚིག་གོ། །དེས་ན་འགྲོ་བའི་སེམས་སོ་ཅོག་ཏུ་འཆར་བ་ཉོན་མོངས་པ་ལྔར་སྣང་དུས་ནས་སྐུ་དང་ཡེ་ཤེས་སུ་གྲུབ་པའི་ཕྱིར་མི་སྤངས་བར་གདམས་སོ། །

གཉིས་པ་དང་དུ་བླང་བའི་དམ་ཚིག་ལྔ་ནི་བདུད་རྩི་ལྔ་སྟེ། དེའང་ཡེ་ནས་བླང་དོར་མེད་པའི་ཆོས་ཉིད་ཀྱི་རོལ་པ་ཡིན་པས་ཀྱང་དང་དུ་བླང་སྟེ། ལེ་ལག་ལས། བདུད་རྩི་ཡེ་ནས་དག་པའི་ཆོས་། །བླང་དོར་མེད་པ་ཀུན་ལས་འདས། །ཡེ་བསྲུང་ཆེན་པོའི་དམ་ཚིག་ཏུ། །མཁས་པས་དང་དུ་བླང་བར་བྱ། །ཞེས་སོ། །རིགས་ལྔའི་རང་བཞིན་ཡིན་པས་ཀྱང་དང་དུ་བླང་དགོས་ཏེ། ཐལ་བ་ལས། བདུད་རྩི་ལྔ་ནི་རིགས་ལྔའི་དངོས། །དྲི་ཆེན་དྲི་ཆུ་བྱང་ཆུབ་སེམས་། །ཞེས་སོ། །དངོས་གྲུབ་སྒྲུབ་པའི་རྫས་ཡིན་པས་ཀྱང་དང་དུ་བླང་སྟེ། གསང་འདུས་ལས། ཤ་ཆེན་དམ་ཚིག་ཆེན་པོ་ནི། །རྡོ་རྗེ་གསུམ་མཆོག་འགྲུབ་པར་འགྱུར། །ཞེས་པ་ལ་སོགས་པ་གསུངས་སོ། །ཡང་བདུད་རྩི་ལྔ་དང་ཤ་ལྔ་བརྟེན་ན་མཁའ་འགྲོ་འདུ་ཞིང་དངོས་གྲུབ་ཉེ་བས་ཀྱང་དང་དུ་བླང་སྟེ། མདོ་ལས། བ་ལང་ཁྱི་དང་རྟ་ཤ་དང་། །མི་ཤ་གླང་ཆེན་ཤ་ལ་སོགས། །ཟོས་ན་ཡོན་ཏན་ཐམས་ཅད་འགྲུབ། །བདག་ཅག་རྣམས་ཀྱི་དམ་ཚིག་ལགས། །ཞེས་པ་དང་། སྔོན་གྱི་རྒྱལ་བ་གྲངས་མེད་ཀྱིས། །བརྟུལ་ཞུགས་འདི་ལྔ་གཙོར་སྤྱད་ན། །དམ་ཚིག་དམ་པར་གཟུང་བས་ན། །སྔོན་གྱི་དམ་ཚིག་ཡིན་པར་གྲགས། །ཞེས་པས་བརྟུལ་ཞུགས་སྤྱོད་པའི་གྲོགས་སུ་གྱུར་པས་ཀྱང་དང་དུ་བླང་བར་བྱ་བ་ཡིན་ནོ། །

གཉིས་པ་ཡན་ལག་གི་དབྱེ་བ་ནི་སུམ་བརྒྱ་དྲུག་ཅུ་སྟེ། དེའང་དམ་ཚིག་ཐམས་ཅད་ནི་ལྷའི་རང་བཞིན་ཡིན་ལ། ལྷ་ཐམས་ཅད་ཀྱི་རྩ་བ་ནི་ཐབས་དང་ཤེས་རབ་ཡིན་པས་རྩ་བའི་བླ་མེད་མི་སྤང་ལ་སོགས་པ་ལྔ་པོའི་གང་རུང་གཅིག་ལའང་རྩ་བ་ཐབས་དང་ཤེས་རབ། དེ་གཉིས་ལ་སྐུ་གསུང་ཐུགས་སུ་ཕྱེ་བས་དྲུག །དེ་དག་ལའང་སྐུ་གསུང་ཐུགས་ཡོན་ཏན་འཕྲིན་ལས་ལྔ་ལྔ་སྟེ་སུམ་ཅུ། རྩ་བའི་ཐབས་ཤེས་གཉིས་བསྣན་པས་སུམ་ཅུ་རྩ་གཉིས་སོ། །དེ་ལྟར་ལྔ་ག་ལས་ཕྱེ་བས་བརྒྱ་དྲུག་ཅུའོ། །

ཡན་ལག་གི་དམ་ཚིག་ཉིས་བརྒྱ་ནི་ཡན་ལག་གི་བཅུའི་འདོད་ཆགས་མི་སྤང་བ་ལྟ་བུ་གཅིག་ལའང་ཐབས་དང་ཤེས་རབ་གཉིས་ལས། ཐབས་ལ་ཡེ་ཤེས་ལྔ་དང་ཡུལ་ལྔ་སྟེ་བཅུ། ཤེས་རབ་ལའང་ཡེ་ཤེས་ལྔ་དང་ཡུལ་ལྔ་སྟེ་བཅུ་ཕྲག་གཉིས་ལ་ཉི་ཤུའོ། །དེ་ལྟར་(༣༠༨)ཉི་ཤུ་ཚན་པ་བཅུ་ལ་ཉིས་བརྒྱའོ། །རོང་པ་ནི་ཡན་ལག་གི་དམ་ཚིག་ནི་ཡན་ལག་ནས་དབྱེ་བར་བྱ་སྟེ། གཅིག་ལའང་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཡན་ལག་རྣམ་པ་ལྔ་དང་། སྐུ་གསུང་ཐུགས་ཀྱི་དངོས་གཞི་གསུམ་ཡང་དེ་ཉིད་དུ་ཞིག་སྟེ་ཡན་ལག་གི་གཞི་མེད། རྩ་བ་ཐབས་དང་ཤེས་རབ་གཉིས་ཀྱང་ཐབས་ཤེས་རབ་དང་ལྡན། ཤེས་རབ་ཐབས་དང་ལྡན་པས་རྩ་བ་གཉིས་པོ་ཞིག་སྟེ་ཡན་ལག་བཞིར་འགྱུར་བས། དེ་ཡང་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ཆ་ཤས་སུ་འགྱུར་བས་ན་། རྩ་བའི་འཕྲོ་གཞི་མེད་དེ་ཡན་ལག་དང་ཆ་ཤས་ཉི་ཤུ་ཉི་ཤུར་འགྱུར་རོ་ཞེས་དཀོན་ཅོག་འགྲེལ་དུ་བཞེད་དོ། །དམ་ཚིག་འདི་དག་ནི་ཡོན་ཏན་གྱི་ཆ་ཤས་དབྱེ་བ་ཡིན་གྱི། མཚན་ཉིད་ཐ་དད་པའི་རྣམ་གྲངས་ནི་སོ་སོར་བཤད་པ་མེད་ཅེས་གསུངས་སོ། །

གསུམ་པ་བསམ་གྱིས་མི་ཁྱབ་པར་དབྱེ་བ་ནི་སེམས་ཅན་གྱི་རྟོག་ཚོགས་ཇི་སྙེད་པའི་གཉེན་པོར་དམ་ཚིག་གི་དབྱེ་བའང་དེ་སྙེད་ཡིན་པས་གྲངས་འདི་ཁོ་ནའོ་ཞེས་གཅིག་ཏུ་འཆད་པ་མེད་དེ། གསལ་བཀྲ་ལས། དམ་ཚིག་རྣམ་པའི་གྲངས་དག་ནི། །སེམས་ཅན་གྲངས་དང་ལོག་རྟོག་གྲངས། །རྟོག་འདུལ་གཉེན་པོར་དམ་ཚིག་གྲངས། །རྒྱལ་བ་ཉིད་ཀྱིས་བརྗོད་ལས་འདས། །ཞེས་སོ། །

གསུམ་པ་དམ་ཚིག་བསྲུང་བའི་ཕན་ཡོན་ནི། གནས་སྐབས་དང་མཐར་ཐུག་གི་དོན་ཐམས་ཅད་འགྲུབ་པ་སྟེ། དམ་ཚིག་གསུམ་བཀོད་ལས། གསང་སྔགས་རྡོ་རྗེའི་དམ་ལ་གནས། །དེ་ཡིས་སྨོན་པ་ཀུན་འགྲུབ་ཅིང་། །ལྷ་རྣམས་ཀྱིས་ཀྱང་རྟག་ཏུ་བསྲུང་། །རྒྱལ་བ་རྒྱལ་མཆོག་སྲས་བཅས་ཀྱིས། །བུ་བཞིན་དགོངས་པ་དམ་པ་མཛད། །ཏིང་འཛིན་ཡོན་ཏན་དཔག་ཡས་ཤིང་། །ཀུན་བཟང་རིགས་ཀྱི་དམ་པ་འགྲུབ། །ཅེས་སོ། །

བཞི་པ་མ་བསྲུངས་པའི་ཉེས་དམིགས་ནི། རང་ཉིད་ཀྱི་ལེགས་པ་ལས་ཉམས་ཤིང་གཞན་ལ་ཉེས་པ་ངང་གིས་སྦྱིན་པ་སྟེ། དེ་ལས། དམ་ཚིག་ལས་ནི་འདས་གྱུར་ན། །འདི་ཕྱིར་བདེ་ལེགས་ཉམས་པ་དང་། །ཡིད་དུ་མི་འོང་སྣ་ཚོགས་མྱོང་། །ས་སྤྱོད་མེ་ཡི་སྡུག་བསྔལ་ལ། །བསྐལ་པ་བྱེ་བ་གྲངས་མེད་གནས། །ཞེས་པ་དང་། ཀུན་འདུས་ལས། ཇི་ལྟར་འོ་མ་རུལ་པ་དག །རུལ་པས་འོ་མ་ཀུན་རུལ་ལྟར། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུངས་བྱེད། །ཅེས་སོ། །

ལྔ་པ་གསོ་ཐབས་ནི། དེའང་ཉན་ཐོས་ལྟར་མ་ཡིན་གྱི། གསང་སྔགས་ནི་གསོ་རུང་བའི་ཐབས་ཡོད་དེ། རྔམ་གློག་ལས། དམ་ཚིག་ཉམས་པར་གྱུར་པ་ན། །མགོན་བཙུན་མཉེས་པའི་དོན་རྟོགས་ན། །དེ་ཉིད་བསྐོང་བའི་གནས་སུ་འགྱུར། །བླ་མ་སྤུན་ལ་སྨད་གྱུར་ན། །ཚེ་འདི་ཉིད་ལ་མཉེས་(༣༠༩)བྱས་ཏེ། །མཐོལ་བཤགས་དྲག་པོས་འགྱོད་བྱས་ན། །དེ་ནི་བསྐོང་བའི་མཆོག་ཏུ་འགྱུར། །གལ་ཏེ་བདག་གམ་བླ་མ་སྤུན། །མ་བསྐང་བར་དུ་ཚེ་འཕོས་ན། །དེ་ནི་བསྐང་བའི་ཚད་ལས་འདས། །གསུང་གི་ཐ་ཚིག་རལ་གྱུར་ན། །རྡོ་རྗེ་ཆོས་སུ་བདག་བསྒོམ་སྟེ། །ཐ་ཚིག་གང་བརླག་འབུམ་འབུམ་འདོན། །ཐུགས་ཀྱི་ཐ་ཚིག་རལ་གྱུར་ན། །རྡོ་རྗེ་སེམས་དཔར་བདག་བསྒོམ་ལ། །ལོ་གསུམ་བར་དུ་མི་སྨྲ་བར། །བསམ་གཏན་སྦྱོར་བ་རབ་ཏུ་བྱ། །ཡན་ལག་ཐ་ཚིག་རལ་གྱུར་ན། །སོ་སོ་རང་རང་རིགས་ཀྱིས་བསྐང་། །ཞེས་པས་སྐུ་གསུང་ཐུགས་ཀྱི་ཉམས་ཆག་གི་གཙོ་བོ་སྒོ་གསུམ་དང་སྦྱར་ལ་བརྩོན་པས་བསྐང་བཤགས་བྱས་ན་དག་པར་འགྱུར་རོ། །འདི་ནི་ཐབས་ཀྱི་དམ་པ་སྟེ་འོག་མ་དག་ལས་འཕགས་སོ། །དེའང་ཉན་ཐོས་ཀྱི་སྡོམ་ཁྲིམས་ནི་འཆབ་སེམས་མ་སྐྱེས་ན་ལན་བདུན་གསོ་བར་སྣང་ཞིང་སྐྱེས་ན་ལན་གཅིག་ལའང་གསོར་མི་རུང་བས་རྫ་བེའུ་ཆག་པ་དང་འདྲའོ། །བྱང་ཆུབ་སེམས་དཔའ་ནི་རིན་པོ་ཆེ་སྣོད་ཆག་པ་དང་འདྲ་སྟེ་དགེ་བའི་བཤེས་གཉེན་ལ་བརྟེན་ནས་ཉམས་པ་གསོ་བར་རུང་སྟེ་། མགར་བ་མཁས་པས་སྔ་མ་ལས་ལྷག་པའི་སྣོད་བྱར་རུང་བ་བཞིན་ནོ། །གསང་སྔགས་ནི་རིན་པོ་ཆེའི་སྣོད་ཞོམ་པ་དང་འདྲ་སྟེ་རང་གི་སྟོབས་ཀྱིས་གསོར་རུང་བས་ན། མགར་བ་མི་དགོས་པར་རང་གི་རྩོལ་བས་ཞོམ་པ་བསྲང་དུ་ཡོད་པ་དང་འདྲའོ། །

གཉིས་པ་དམ་ཚིག་དང་སྡོམ་པའི་ཁྱད་པར་ནི། དེའང་རང་གི་རྒྱུད་སྡོམ་པའི་ཆ་ནས་སྡོམ་པའང་ཡིན་ལ། སངས་རྒྱས་ཀྱི་གསང་བའི་རྡོ་རྗེ་གསུམ་འཛིན་ཞིང་མི་ཉམས་པར་བྱེད་པས་དམ་ཚིག་ཀྱང་ཡིན་ཏེ། བུམ་པ་གཅིག་ཉིད་བྱས་པའང་ཡིན་ལ་མི་རྟག་པའང་ཡིན་པ་བཞིན་ནོ། །དེས་ན་ངོ་བོ་གཅིག་ལ་ལྡོག་པ་ཐ་དད་དེ། ཕྲ་རྒྱས་ལས། དེ་ལྟར་སུམ་བརྒྱ་དྲུག་ཅུ་རྣམས། །བདག་གི་རྡོ་རྗེ་མཆོག་གསུམ་པོས། །ལོག་པར་མི་ལྟུང་སྡོམ་པའི་དངོས། །ས་གཞི་ལྟ་བུར་གསུངས་པ་ཡིན། །ཞེས་པ་དང་། རྔམ་གློག་ལས། ཆོས་ཀུན་ཡེ་ནས་དག་པའི་ཕྱིར། །ལོག་རྟོག་ཡེ་ནས་རྣམ་པར་དག །དེ་བས་སྡོམ་པ་རྣམ་པར་དག །དམ་ཚིག་འདི་ནི་རྨད་པོ་ཆེ། །ཞེས་སོ། །དེའང་སྡོམ་པའི་ངོས་ནས་གཞལ་ན་གསུམ་སྟེ། སོ་སོ་ཐར་པ། བྱང་ཆུབ་སེམས་དཔའ། རིག་པ་འཛིན་པའི་སྡོམ་པ་སྟེ། རྡོ་རྗེ་རྩེ་མོ་ལས། སོ་སོ་ཐར་དང་བྱང་ཆུབ་སེམས། །རིག་འཛིན་སྔགས་ཀྱི་སྡོམ་པའོ། །ཞེས་པ་དང་། རྔམ་གློག་ལས། དགེ་སློང་བྱང་ཆུབ་སེམས་དཔའ་དང་། །རྣལ་འབྱོར་རྣལ་འབྱོར་ཆེན་པོ་ཡིན། །ཞེས་སོ། །དེའང་སོ་སོ་ཐར་པའི་སྡོམ་པ་ནི་རང་ཉིད་གཅིག་པུ་ཞི་བདེ་འདོད་པས་ཇི་སྲིད་འཚོའི་བར་དུ་རིགས་བདུན་གང་ཡང་རུང་བ་བསྲུང་ཞིང་། (༣༡༠)བྱང་ཆུབ་སེམས་དཔའི་སྡོམ་པ་གཉིས་དོན་དུ་སྡོམ་པའི་ཚུལ་ཁྲིམས་ཀྱིས་རྒྱུད་སྡོམས། དགེ་བ་ཆོས་སྡུད་ཀྱིས་རྟོགས་པ་དང་ཡོན་ཏན་ཁྱད་པར་ཅན་རྣམས་བསྒྲུབ། སེམས་ཅན་དོན་བྱེད་ཀྱིས་གཞན་ལ་ཕན་འདོགས་པའོ། །རིག་པ་འཛིན་པའི་སྡོམ་པས་གཞན་དོན་རླབས་པོ་ཆེ་སྒྲུབ་ཅིང་ཉོན་མོངས་ཡེ་ཤེས་སུ་བསྒྱུར་བ་སྟེ། ཀུན་འདུས་ལས། དེ་ལྟར་སྡོམ་པ་གསུམ་པོ་ཡང་། །རང་དང་གཞན་དོན་ཕན་པ་ཆེ། །ཞེས་སོ། །དམ་ཚིག་ནི་རྡོ་རྗེ་གསུམ་གྱི་རང་བཞིན་ཉམས་པ་མེད་པར་བསྲུངས་པས་གཞན་ལ་ཕན་པ་འབའ་ཞིག་ལྷུར་ལེན་པ་ཡིན་ནོ། །

གསུམ་པ་བསླབ་གསུམ་མི་འགལ་བར་འདུས་ཚུལ་བསྟན་པ་ལ་གཉིས་ཏེ། མི་འགལ་བ་དང་། འདུས་ཚུལ་ལོ། །དང་པོ་ནི། འདི་ལྟར་ཉན་ཐོས་ཀྱི་ཕས་ཕམ་པ་བཞི་བསྲུང་བྱའི་རྩ་བ་དང་། དེའི་ཡན་ལག་ཆང་མི་འཐུང་བ་ལ་སོགས་པ་ཡིན་ཞིང་། བྱང་ཆུབ་སེམས་དཔའི་སེམས་ཅན་ལ་འཚེ་བ་ཆ་དང་བཅས་པ་ལས་ལྡོག་པ་ལྟར་སྣང་བས་སྡོམ་པ་གསུམ་ཚང་བ་དང་འགལ་ལོ་སྙམ་ན། མི་འགལ་བར་སྟོན་པ་ལ་གཉིས་ལས། དང་པོ་ཉན་ཐོས་ཀྱི་སོ་སོ་ཐར་པའི་སྡོམ་པ་དང་མི་འགལ་བའི་ཚུལ་ནི། དེའང་སྲོག་གཅོད་པའི་ཕམ་པར་གྱུར་པ་ལ། གཞི་མི་ཡིན་པ་བསམ་པ་དེ་ཉིད་ལས་གཞན་དུ་མ་འཁྲུལ་པར་ཞེ་སྡང་རང་ག་མས་གསོད་པར་རྩམ་པ། དངོས་གཞི་མཚོན་ལ་སོགས་པས་སྲོག་གི་དབང་པོ་འགག་པ། རྗེས་ཡི་རང་བ་སྟེ་ཆོས་བཞི་ཚང་དགོས་པ་ལ། འདིར་སྒྲོལ་བའི་སྐབས་སུ་རྣམ་པ་ཧཱུྃ་དུ་གསལ་ཞིང་ངོ་བོ་མ་སྐྱེས་པ་ཡིན་པས་མི་དང་མི་ལས་གཞན་དུད་འགྲོ་ལ་སོགས་པའི་འགྲོ་བ་ཕལ་མ་ཡིན་པས་གཞིའི་ཡན་ལག་མ་ཚང་ངོ་། །དེའི་སྡུག་བསྔལ་དང་བྲལ་འདོད་ཀྱི་སྙིང་རྗེ་ཡོད་ཀྱི་གསོད་སེམས་རང་ག་མ་མེད་པས་བསམ་པའི་ཡན་ལག་ཀྱང་མ་ཚང་ངོ་། །གསད་བྱ་དང་གསོད་བྱེད་དུ་འཛིན་པ་མེད་པས་སྲོག་ཀྱང་མེད་ཅིང་དེ་གཅད་པའང་མེད་པས་དངོས་གཞིའི་ཡན་ལག་ཀྱང་མ་ཚང་ངོ་། །རྗེས་ཞེ་སྡང་གིས་ཀུན་ནས་བསླང་བའི་ཡི་རང་མེད་པས་ཡོངས་སུ་རྫོགས་པའི་ཡན་ལག་ཀྱང་མ་ཚང་བས་ཉེས་པ་གང་ཡང་མེད་དོ། །དེ་བཞིན་དུ་མ་བྱིན་པར་ལེན་པའི་ཚེའང་གཞི་མིས་བདག་ཏུ་བཟུང་བའི་རྫས་དགོས་པ་ལ། འདིར་བདག་གཞན་གཉིས་སུ་མེད་པའི་དོན་རྟོགས་པས་རང་སྣང་གི་རྫས་རྨི་ལམ་ལྟ་བུ་ལེན་པའི་ཕྱིར་དང་། བསམ་པ་རྐུ་བའི་སེམས་དགོས་པ་ལས། འདིར་རང་སེམས་ཀྱི་སྣང་བ་ཙམ་ལ་རང་སྣང་རོལ་གྱིས་བརྐུ་སེམས་མེད་པ་དང་། དངོས་གཞི་རིན་ཐང་ཚང་བ་སྤོས་ཏེ་བདག་གིར་བྱེད་པ་ལས། དེ་ཡང་མ་ཚང་སྟེ་སྒྱུ་མ་དང་རྨི་ལམ་ལྟར་གཉིས་སུ་མེད་པས་སྤྲོས་པ་མེད་པ་དང་། རྗེས་ཐོབ་(༣༡༡)བློ་དགོས་པ་ལས། ཐོབ་བྱ་དང་ཐོབ་བྱེད་དུ་ཞེན་པ་མེད་པའི་ཕྱིར་རོ། །མི་ཚངས་པར་སྤྱོད་པའི་ཕམ་པར་གྱུར་པ་ལ་ཡང་། གཞི་མིའི་བུད་མེད་ལ་སོགས་པ་དགོས་པ་ལས། འདི་ལྷར་བསྐྱེད་པ་དང་། དངོས་པོ་ཟག་བྱེད་དུ་ནོར་བུ་བཅུག་ནས་པགས་རིམ་འདས་པ་དགོས་པ་ལས། རྡོ་རྗེ་དང་པདྨར་གསལ་བས་དེ་གཉིས་རང་མཚན་པ་མ་ཚང་བ་དང་། བསམ་པ་མ་འཁྲུལ་པས་བདེ་བ་མྱོང་བར་འདོད་པ་ཡང་། དཀྱིལ་འཁོར་གསུམ་དུ་ཤེས་པས་བསམ་པའི་ཡན་ལག་མ་ཚང་བའི་ཕྱིར་ཉེས་པ་མེད་དེ། བརྫུན་དུ་སྨྲ་བ་ཡང་ཕ་རོལ་པོའི་འགྲོ་བ་ལ་འདུ་ཤེས་གཞན་དུ་བསྒྱུར་བས་ལྷ་ལ་སོགས་པ་མ་མཐོང་བཞིན་དུ་མཐོང་ངོ་ཞེས་པ་ལ་སོགས་པ་དགོས་པ་ལས། ཆོས་ཐམས་ཅད་རྫུན་མཉམ་དུ་ཤེས་ནས་གཞན་ལ་ཕན་པའི་ཡན་ལག་ཏུ་སྨྲས་པའི་ཕྱིར་ན་ཉེས་པ་མེད་དོ། །དེ་བཞིན་དུ་ཆང་བཏུང་བའང་བདུད་རྩིར་བསྒྱུར་བའི་ཕྱིར་ན་ལོངས་སྤྱོད་དུ་མི་རུང་བར་བཤད་པ་དང་མི་འགལ་ལོ། །དེ་ཐམས་ཅད་ཀྱི་སྐབས་སུ་བདག་ཉིད་དགེ་སློང་ཡིན་པ། ཡུལ་མ་འཁྲུལ་པ། འདུ་ཤེས་གཞན་དུ་མ་གྱུར་པ་རྣམས་དགོས་པ་ལས། འདིར་ལྷའི་དཀྱིལ་འཁོར་དུ་གནས་གྱུར་པའི་ཕྱིར་ཉན་ཐོས་ཀྱི་སོ་སོ་ཐར་པའི་སྡོམ་པ་དང་འགལ་བ་མེད་དོ། །

གཉིས་པ་བྱང་ཆུབ་སེམས་དཔའི་སྡོམ་པ་དང་ཡང་འགལ་བ་མེད་དེ། གཞན་ལ་ཕན་འདོད་ཀྱི་སྙིང་རྗེ་དང་ཐབས་ཁྱད་པར་ཅན་གྱིས་ཟིན་པའི་ཕྱིར་རོ། །དེ་གཉིས་དང་ལྡན་པ་ནི་སེམས་དཔའ་རྣམས་ལའང་གནང་བ་ཡིན་ཏེ། ཕལ་པོ་ཆེ་ལས། ཡང་དག་སེམས་ཅན་དོན་འགྱུར་བའི། །ཐབས་དེ་རྒྱལ་སྲས་བསླབ་པའི་མཆོག །སྤྲིན་ལས་ཆར་ཆེན་འབབ་པ་ཡིས། །ལོ་ཏོག་ཕུན་སུམ་ཚོགས་པར་བྱེད། །ཅེས་སོ། །

གཉིས་པ་འདུས་ཚུལ་ལའང་གཉིས་ལས། ཉན་ཐོས་ཀྱི་ཚུལ་ནི་གཙོ་བོར་རང་དོན་སྒྲུབ་པའི་སྡོམ་པ་དེ་ཡང་འདིར་རྣལ་འབྱོར་པས་རང་གི་སྡུག་བསྔལ་ལས་ཐར་པའི་ཕྱིར་རྒྱུད་སྡོམ་པར་འདུས་ཏེ། སྲོག་གཅོད་དུས་ཉིད་ན་སེམས་ཀྱི་ཞེ་སྡང་ལ་སོགས་པའི་མི་དགེ་བ་མེད་པས་རང་གི་ཟག་པ་རང་མཚན་པ་བསྡམ་པའི་ཕྱིར་སྲོག་གཅོད་པ་སྤོང་བའི་སྡོམ་པའང་བསྡུས་སོ། །དེ་བཞིན་དུ་ལྷག་མ་རྣམས་ལའང་སྦྱར་ཏེ་ཟག་པ་རང་མཚན་པ་བསྡམས་པས་ན་ཐབས་ཀྱི་སྤྱོད་པ་བརླང་པོ་ལྟར་སྣང་ཡང་ངོ་བོ་ཉན་ཐོས་ཀྱི་སྡོམ་པ་འདུས་པ་ཁོ་ནའོ། །དཔེར་ན་སྨན་པ་ཁ་ཅིག་ཚ་བའི་ནད་ལ་བསིལ་སྨན་བྱེད་པ་ན། ལ་ལས་ལྡོག་སྟེ་བཅོས་པས་མྱུར་དུ་ཕན་པ་གཉིས་འགལ་བ་ལྟར་སྣང་ཡང་དོན་ལ་འགལ་བ་མེད་པ་ལྟར། ལམ་གྱི་ཐབས་འགལ་བར་སྣང་ཡང་། དོན་ལ་རང་རྒྱུད་ཀྱི་ཉོན་མོངས་པ་སྤོང་ཞིང་དགེ་བ་བསྒྲུབ་པར་དོན་(༣༡༢)མཐུན་པ་ཁོ་ནའོ། །

གཉིས་པ་བྱང་ཆུབ་སེམས་དཔའི་སྡོམ་པའི་འདུས་ཚུལ་ནི། སྤྱོད་པ་གང་ལ་སྦྱོར་བ་དེའི་ཚེ་ཐ་མལ་གྱི་ཉོན་མོངས་རང་ག་མའི་འཇུག་པ་སྡོམ་པས་སྡོམ་པའི་ཚུལ་ཁྲིམས་སོ། །དེ་ལ་བརྟེན་ནས་ལམ་གྱི་ཡོན་ཏན་གོང་དུ་འཕེལ་བས་དགེ་བ་ཆོས་སྡུད་ཀྱི་ཚུལ་ཁྲིམས་སོ། །ཐབས་དེས་གཞན་ལ་ཕན་འདོགས་ཤིང་རྗེས་སུ་འཛིན་པས་སེམས་ཅན་དོན་བྱེད་ཀྱི་ཚུལ་ཁྲིམས་སོ། །དེ་བཞིན་དུ་གསང་སྔགས་ཀྱི་སྡོམ་པའང་ཇི་སྙེད་ཐམས་ཅད་འདིར་འདུས་ཏེ། རྒྱུད་སྡོམ་ཞིང་ཉོན་མོངས་པ་དག་པར་ཚུལ་མཚུངས་པའི་ཕྱིར་རོ། །

གཉིས་པ་གཞུང་གི་དོན་ལ་གཉིས་ཏེ། དམ་ཚིག་ཆེན་པོའི་ངོ་བོ་སྤྱིར་བསྟན་པ་དང་། སྒྲུབ་བསྲུང་གི་རྣམ་གཞག་བྱེ་བྲག་ཏུ་བཤད་པའོ། །

དང་པོ་ལ་གསུམ་ལས། དང་པོ་གསང་བའི་དམ་ཚིག་གཞན་ལས་འཕགས་པའི་ཚུལ་ནི་གང་ཟག་གང་ཞིག་གསང་ཆེན་བླ༵་ན་མེད༵་པའི་ཐེག༵་པ་འདིར་ཞུགས་ཏེ་དོན་ཕྱིན་ཅི་མ་ལོག་པ༵ར་ར༵བ་ཏུ་ངེས༵་པ་སྟེ་ཉམས་སུ་བླངས་ན༵་འདོད་ཆགས་ལ་སོགས་པའི་ཉོན༵་མོང༵ས་པ་དུག་ལྔ་དང་དེས་བསྐྱེད་པའི་ལ༵ས་རྣམ༵ས་ཀུན༵་ལ་སྤྱད༵་ཀྱང༵་། སྒྱུ་མའི་སྤྲུལ་པས་སྤྱད་པ་ལྟར་ལས་དེ་ཉིད་བྱས༵་པར་སྣང་ལ༵་དེའི་སྒྲིབ་པ་དང་བག་ཆགས་མི༵་སོག༵་པའི་སྟེང་དུ་བསོད་ནམས་དང་ཡེ་ཤེས་ཀྱི་ཚོག༵ས་གཉིས་རྫོགས་པར་འགྱུར༵་ཏེ༵། སྤྱོད་པ་དེ་ཉིད་ཀྱི་ངོ་བོ་ལ་སོ་སོར་ཐར་པའི་ཚུལ༵་ཁྲིམ༵ས་དང་བྱང་ཆུབ་སེམས་དཔའི་སྡོམ༵་པ༵་དང་གསང་སྔགས་ཀྱི་དམ་ཚིག་རྣམས་ཕུན༵་སུམ༵་ཚོ༵གས་པའི་དོན་ཚང་ཞིང་རྫོགས་པའི་ཕྱིར་རོ། །

གཉིས་པ་གསང་བའི་དམ་ཚིག་ཏུ་འདུལ་སྡོམ་ཐམས་ཅད་འདུས་པར་བསྟན་པ་ནི་གསང་ཆེན་བླ༵་ན་མེ༵ད་པའི་མཆོ༵ག་གི༵་དམ༵་ཚི༵ག་ཏུ༵་ཉེས་སྤྱོད་འདུལ༵་བ༵འི་དབ༵ང་གི༵ས་རྣམ་པར་བཞག་པའི་ཚུལ༵་ཁྲིམ༵ས་སོ་སོ་ཐར་བའི་སྡོམ་པ་དང༵་། དེས་མཚོན་ནས་བྱང་ཆུབ་སེམས་དཔའི་སྡོམ་པ་དང་། སྔགས་ཕྱི་པ་གསུམ་ནང་པ་དང་བཅས་པ་ཇི༵་སྙེད༵་པའི་སྡོམ༵་པ༵་བས༵མ་ཡ༵ས་ཡོད་པ༵་མ༵་ལུས༵་པའི་ཡོན་ཏན་ཀུན༵་ཡར་ལྡན་དུ་འདུས༵་ཤིང་འོག་མའི་སྐྱོན་གྱིས་ཕྱོགས་ཕྲ་མོ་ཙམ་ཡང་རྣམ༵་པ༵ར་ད༵ག་པའོ། །

གསུམ་པ་རྩ་བའི་དམ་ཚིག་ཆེན་པོའི་རྣམ་པར་བཞག་པ་ལ་བཞི་ལས། དང་པོ་སྲོག་གཅད་པ་ནི་དོན་དམ་པར་ཆོས་ཡོ༵ད་པ་རྟག་པའི་མཐའ་དང་མེ༵ད་པ་ཆད་པའི་མཐའ་དང་མཐའ་གཉིས་དང་བྲལ་བའི་དབུ༵་མ༵འ༵ང་མི༵་དམི༵གས་ཤི༵ང་། ཀུན་རྫོབ་ཏུ་བདག་ཉིད་སྒྱུ༵་མ༵་དང་སེམས་ཅན་མི༵ག་ཡོ༵ར་ལྟ༵་བུའི༵་ཚུལ༵་གྱིས་སྒྲོལ་བ་ལྟར་སྣང་ཡང་། སྣང་དུས་དེ་ཉིད་ན་སེམས་ཅན་རང་མཚན་དུ་མ་གྲུབ་པས་སྲོག༵་བདེན་པ་བ་མེ༵ད་ཅིང་སྲོག༵་རང་བཞིན་མ་གྲུབ་པས་སྲོག་ཀྱང༵་གཅོ༵ད་དུ༵་མེ༵ད་དེ་རྨི་ལམ་བཞིན་ནོ། །སྲོག༵་ད༵ང་སྲོག་ལྡན་(༣༡༣)གྱི་སྐྱེས༵་བུར༵་སྣང་བའང་རང་སེམས་འཁྲུལ་པའི་ལོ༵ག་རྟོག༵་ཙ༵མ་ལས་དོན་ལ་གཉིས་སུ་གྲུབ་པ་མེད་དེ། ཡུལ་འཁོར་སྐྱོང་གིས་ཞུས་པའི་མདོ་ལས། བདག་དང་གཞན་དང་སྲོག་དང་སྐྱེས་བུ་རྣམས། །མེད་པར་སྣང་ལ་རང་བཞིན་གཉིས་སུ་མེད། །ཕྱིན་ཅི་ལོག་ཙམ་ཉིད་ལས་གཞན་མེད་དེ། །ཡང་དག་མ་ཡིན་ཀུན་བརྟགས་སྒྱུ་མའི་ཚུལ། །ཞེས་པ་དང་། དཀོན་མཆོག་བརྩེགས་པའི་ཉེ་བ་འཁོར་གྱིས་ཞུས་པའི་མདོ་ལས། ཇི་ལྟར་སྒྱུ་མ་མཁན་གྱི་འཇིག་རྟེན་ན། །སེམས་ཅན་བརྒྱ་ཕྲག་མང་པོ་སྤྲུལ་བྱས་ཏེ། །སྤྲུལ་པ་དེ་དག་ཐམས་ཅད་བསལ་གྱུར་ཀྱང་། །སྒྱུ་མ་དེ་དག་གསོད་པ་ཡོད་མིན་ལྟར། །འགྲོ་བ་འདི་དག་སྒྱུ་མའི་རང་བཞིན་ཏེ། །འདི་ལ་མཐའ་ནི་ནམ་ཡང་དམིགས་སུ་མེད། །གང་དག་དེ་ལྟར་མཐའ་ཡས་མོས་བྱེད་པ། །དེ་དག་འཇིག་རྟེན་ན་ནི་ཚོར་བ་མེད། །གང་དག་རང་བཞིན་མེད་ཆོས་འདི་ཤེས་པ། །དཔའ་བོ་དེ་དག་འཇིག་རྟེན་མྱ་ངན་འདའ། །འདོད་པའི་ཡོན་ཏན་སྤྱོད་ཀྱང་ཆགས་མེད་ཅིང་། །ཆགས་པ་རྣམ་སྤངས་སེམས་ཅན་འདུལ་བར་བྱེད། །མི་དབང་རྣམས་ནི་སེམས་ཅན་ཕན་པར་མཛད། །ཅེས་གསུངས་པ་བཞིན་ནོ། །

དགོས་པ་ནི་ངེས་བརྗོད་ལས། སངས་རྒྱས་བསྟན་ལ་གནོད་བྱེད་དང་། །བླ་མར་སྨོད་བརྩོན་མ་རུངས་དང་། །རྟག་ཏུ་སེམས་ཅན་གནོད་བརྩོན་པ། །མཁས་པས་བསྒྲིམས་ཏེ་གསོད་པར་བྱ། །ཞེས་པ་དང་། དེ་ལྟར་བསྒྲལ་པའི་དགོས་ཆེད་ཀྱང་། །བྱང་ཆུབ་སྤྱོད་འཕེལ་སེམས་ཅན་བདེ། །ལྷ་མཉེས་བདག་གི་དམ་སྐོང་ཞིང་། །ལས་ངན་བར་ཆད་སྡུག་ཡུན་ཐུང་། །ཞེས་པ་དང་། ཡ་མཱ་རི་ལས་ཀྱང་། ཨེ་མ་ཧོ་གསོད་པ་འདི་ནི་བཟང་། །གསོད་པ་གསོད་པ་མ་ཡིན་ཏེ། །ཞེས་སོ། །

གཉིས་པ་མ་བྱིན་པར་བླང་བ་ནི་ཆོས་ཐམས་ཅད་དོན་དམ་པ་དང་ཀུན་རྫོབ་ཀྱི་བདེ༵ན་པ༵་གཉིས༵་ཀ༵ར་རང་བཞིན་དབྱེར༵་མེ༵ད་པ༵ས་དོན་ལ་མ་གྲུབ་ཅིང་། ཐ་སྙད་དུའང་མ་གྲུབ་སྟེ་འཕྲུལ༵་དག༵འི་ལྷ་རྣམས་རང་གི་སྤྲུལ་པའི་ལོངས་སྤྱོད་ལ་ལེན་པའི་ཚུལ༵་ཏེ༵་གཞན་དུ་སྣང་བའི་རྫས་དང་ལེན་པ་པོ་བདག་ཉིད་དོན་ལ་ཐ༵་དད༵་མི༵ན་པའི་རང་བཞིན་དུ་ཤེས་ནས། རང་སྣང་གི་རྫས་ལ་རང་སྣང་ལེན་པའི་ཚུལ་གྱིས་མ་བྱིན་པར་ལེན་དུས་དེ་ཉིད་ནའང་བླང་བྱའི་ཡུལ་སེམས་ཅན་གཞ༵ན་ད༵ང་དེས་བདག་ཏུ་བཟུང་བའི་རྫས་རང་མཚན་པ་མ༵་བྱིན༵་པར་བླང་རྒྱུ་མེད༵་པ༵འི་ཕྱིར༵་མ་བྱིན་པར་བླང༵ས་པ་ཡང་མེ༵ད་དེ། བླང་བྱའི་ཡུལ་བླང་རྒྱུའི་རྫས་ལེན་པ་པོ་བདག་ཉིད་ཀྱིས་མཚོན་པའི་ཆོས་ཐམ༵ས་ཅ༵ད་ཡེ་ནས་རྣམ་པར་དག་པ་ནམ་མཁའ་ལྟ་བུའི་དེ་བཞིན་ཉིད༵་ཀྱི༵་དབྱི༵ངས་ཡིན་པའི་ཕྱིར་རོ། །ཇི་སྐད་དུ་དཀོན་ཅོག་བརྩེགས་པ་ལས། ཇི་ལྟར་སྒྱུ་མས་སྒྱུ་མའི་(༣༡༤)ནོར་བླངས་ཏེ། །རྨི་ལམ་ནང་བཞིན་དགོས་པ་དེ་སྤྱད་ཅིང་། །དེ་ལ་ལས་མེད་རྣམ་པར་སྨིན་པ་མེད། །དེ་བཞིན་ཆགས་མེད་ཡེ་ཤེས་འདི་བསླབས་ཏེ། །མྱ་ངན་འདས་པ་དམ་པ་མཆོག་ཞིར་འགྲོ། །ཞེས་སོ། །བླང་བའི་དགོས་པ་ཡང་ཕྱུག་པོ་དེ་དག་གི་ཚོགས་རྫོགས་ལ་བཀྲེན་པ་དག་གི་འདོད་པ་འགྲུབ་པ་སྟེ། རྡོ་རྗེ་ལས། འཇུངས་པ་རྣམས་ལ་ནོར་བླངས་ལ། །སེམས་ཅན་བཀྲེན་ལ་སྦྱིན་པར་བྱ། །དེ་ཕྱིར་མི་ཡི་བདག་པོ་དང་། །ཕྱུག་པོ་རྣམས་ཀྱི་ནོར་འཕྲོག་གོ། །ཞེས་སོ། །

གསུམ་པ་རྫུན་དུ་སྨྲ་བ་ནི་གཞན་དོན་དུ་འགྱུར་བའི་དགོས་པ་ཁྱད་པར་ཅན་ཡོད་ན་ཇི་ལྟར་ཕན་པ་དེ་ལྟར་སྨྲས་ཀྱང་ཉེས་པ་མེད་དེ། འདི་ལྟར་འཁོར་འདས་ཀྱིས་བསྡུས་པའི་ཆོས༵་རྣམ༵ས་ཀྱི་རང་བཞིན་སྒྱུ༵་མ༵་ལྟ༵་བུ༵་དང༵་རྨི་ལམ་ལྟ་བུ་ལ་སོགས་པ་ཡིན་ལ། དེ་དག་སོ་སོའི་མིང༵་ད༵ང་ཚི༵ག་ཏུ༵་བཏག༵ས་པ༵་དེ་ཡང་སོ་སོའི་རྟོག་པས་གློ་བུར་དུ་བཏགས་པའི་ཕྱིར་བརྫུན༵་པ་ཉིད་དེ། ཡུམ་བར་མ་ལས། རབ་འབྱོར་ཆོས་ཐམས་ཅད་ནི་རང་བཞིན་གྱིས་དངོས་པོ་མེད་པ་སྟེ། གང་བརྗོད་ཅིང་སྣང་ལ་བཏགས་པ་དེ་དག་ནི་གློ་བུར་བ་ཡིན་པའི་ཕྱིར་བརྫུན་པའོ། །ཞེས་སོ། །དེ་ལྟར་རྟོགས་ན་གཏོང་བྱའི་ཡུལ་བརྫུན༵་པ་ཉིད༵་ལ༵་གཏོང་བྱེད་བདག་གི༵་བརྫུན་པས་ངག་ཏུ་ཡོད་མེད་ལ་སོགས་པའི་བརྫུན༵་སྤྱོད༵་ཅིང་གཏོང་བ༵་དེའི་ཚེ། གཏོང་དུས་དེ་ཉིད་ནས་བརྫུན༵་ཞེ༵ས་བྱ་བའི་ཆོས་སུ་གྲུབ་གྲུབ་པོ་མིང་ཙམ་བཏག༵ས་པ་ཙམ༵་དུའང་ཡོད༵་པ་མ༵་ཡི༵ན་ཏེ། སྒྲ་དེ་ཉིད་ཕྱི་ནང་གང་ནའང་མེད་པ་དང་དེའི་ངོ་བོ་གྲག་སྟོང་སྐྱེ་མེད་ཡིན་པའི་ཕྱིར་རོ། །དེ་སྐད་དུའང་ཉེ་བ་འཁོར་གྱིས་ཞུས་པའི་མདོ་ལས། ཇི་ལྟར་འཆང་བ་བཅངས་ཏེ་བྱིས་པ་ལ། །སྟོན་ཞེས་ངག་ཏུ་ཡོད་ཅེས་བརྗོད་བྱས་ནས། །དེ་ཡིས་འཆང་བ་སྟོང་པ་མཐོང་ནས་ནི། །བྱིས་པ་དེ་ནི་ཆོ་ངེས་ངུ་བ་ལྟར། །དེ་བཞིན་སངས་རྒྱས་བསམ་གྱིས་མི་ཁྱབ་པར། །སེམས་ཅན་ཚུལ་ལ་མཁས་ཤིང་མཁྱེན་པ་རྣམས། །ཆོས་རྣམས་འདི་ཀུན་གསོག་གསོབ་མཁྱེན་གྱུར་ནས། །འཇིག་རྟེན་དག་ལ་ཡོད་དང་མེད་ཅེས་སྟོན། །ཞེས་པ་ལྟར་རོ། །དགོས་པ་ནི་ཅིའི་ཕྱིར་ཞེ་ན། སྔ་མ་ལས། སེམས་ཅན་རྣམས་ལ་ཕན་སྤྱོད་པས། །རྟག་ཏུ་དམ་ཚིག་བླ་མའི་ནོར། །སེམས་ཅན་སྲོག་ནི་བསྲུང་བའི་ཕྱིར། །བརྫུན་དུ་ཡང་ནི་སྨྲ་བར་བྱ། །ཞེས་སོ། །

བཞི་པ་མི་ཚངས་པར་སྤྱོད་པ་ནི། ཆོས་ཐམས་ཅད་ཀྱི་རང་བཞིན་གང་དུའང་མ༵་ཆག༵ས་པ༵་དངོས་པོ་དང་མཚན་མར་གྲུབ་པ་ཅུང་ཟད་ཀྱང་མེད་པའི་གནས་ལུགས་སྟོང་པ༵་ཉིད་ལ༵་བློས་དེ་ལྟར་རྟོགས་པ་ནི་ཆ༵གས་པ༵་ད༵ང་སྟེ་ཤེས་རབ་ཀྱི་མཐའ་གཉིས་ལ་མི་གནས་པའི་ངང་ནས་ཡབ་ཡུམ་སྙོམས་པར་ཞུགས་པའི་ཡེ་ཤེས་ལ་ཆག༵ས་པ༵་ཉིད༵་ན༵ས་ཐ་མལ་གྱི་འདོད་ཆག༵ས་མེ༵ད་པ༵་དེ༵་ནི༵་ཐབས་སྙིང་རྗེ་ཆེན་(༣༡༥)པོའི་རང་བཞིན་ཏེ། ཐ་མལ་རང་གི་འདོད་ཆགས་ལས་མཆོ༵ག་ཏུ་གྱུར་པ་བདེ་སྟོང་གཉིས་སུ་མེད་པའི་ཡེ་ཤེས་ཀྱི་རྒྱལ༵་པོ༵་སྟེ༵་ཚངས་པར་སྤྱོད་པའི་དམ་པ་ཤིན༵་ཏུ༵་རྣམ་པར་དག་པའི་ཆག༵ས་པ༵་ཆེ༵ན་པོ༵་པདྨའི་རིགས་སེམས་ཅན་ལ་ཐུགས་རྗེ་འབྱུང་བའི་ངང་ཚུལ་ཡི༵ན་ནོ། །ཇི་སྐད་དུ་དཀོན་མཆོག་བརྩེགས་པ་ལས། ཇི་ལྟར་རྨི་ལམ་སྒྱུ་མའི་རང་བཞིན་དུ། །སྐྱེས་བུ་འདོད་བསྟེན་དེ་ཡང་དེ་འདྲ་སྟེ། །ངོ་བོ་ཉིད་ཀྱིས་སྟོང་ལ་དངོས་པོ་མེད། །ལས་མེད་རྣམ་པར་སྨིན་པ་དེ་ཡོད་མིན། །ཞེས་སོ། །དགོས་པ་ནི། སྔ་མ་ལས། སངས་རྒྱས་རྣམས་ནི་མཉེས་བྱ་དང་། །དམ་ཚིག་རྣམས་ནི་བསྲུང་བ་དང་། །གསང་སྔགས་རིག་པས་བསྒྲུབ་པའི་ཕྱིར། །གཞན་གྱི་བུད་མེད་བསྟེན་པར་བྱ། །ཞེས་སོ། །

གཉིས་པ་སྒྲུབ་བསྲུང་གི་རྣམ་གཞག་བྱེ་བྲག་ཏུ་བཤད་པ་ལ་བཞི་སྟེ། ངོ་བོ་ངེས་ཚིག་དང་བཅས་པ། ཕན་ཡོན་ཉེས་དམིགས་དང་བཅས་པ། རང་བཞིན་དབྱེ་བ་དང་བཅས་པ། །ཕན་ཡོན་ཆེན་པོ་བཤད་པའོ། །དང་པོ་ལ་གཉིས་ཏེ། ངོ་བོ་དང་ངེས་ཚིག་གོ། །

དང་པོ་ལའང་གཉིས་ལས། རྩ་བའི་དམ་ཚིག་ནི་གཞི་ལམ་འབྲས་བུ་གསུམ་གྱི་བླ༵་ན་མེད༵་པའི་དཀོན་མཆོག་གསུམ་མི༵་སྤང༵་བ་དང་པོའོ། །ཆོས་དང་དམ་ཚིག་གིས་འབྲེལ་བའི་བླ་མ་རྣམས་དང་ཁྱད་པར་དུ་གསང་སྔགས་རྡོ་རྗེའི་བླ༵་མ༵་བཀུར༵་བ་གཉིས་པའོ། །དེའང་དབང་བསྐུར་བ་རྒྱུད་བཤད་པ་གདམས་པ་བསྟན་པ་ནི་གསུམ་ལྡན་ཏེ་དེ་ལས་གཉན་པའི་བླ་མ་མེད་དོ། །དབང་བསྐུར་བ་ལ་སོགས་པ་གང་རུང་གཉིས་ནི་གཉིས་ལྡན་ཏེ་བར་མའོ། །གང་རུང་རེ་རེ་ནི་གཅིག་ལྡན་ཏེ་ཅུང་ཟད་མི་གཉན་ནོ། །བཀུར་བའི་རིམ་པའང་དེ་བཞིན་དུ་བྱ་ཞིང་། རེ་རེའམ་གཉིས་ལྡན་ལྟ་བུ་ལ། དབང་དང་བཤད་པ་དང་མན་ངག་གསུམ་ནི་སྔ་མ་སྔ་མ་ལས་གཉན་ནོ། །དབང་ལའང་རིམ་པ་གོང་མ་གོང་མ་གཉན་པས་བླ་མ་ཡང་དེ་བཞིན་དུ་ཤེས་པར་བྱའོ། །དཀྱིལ་འཁོར་གང་དུ་ཞུགས་པའི་ལྷ་རྣམས་ཀྱི་རྒྱུ་མ་ནོར་བ་རྩ་བའི་སྔ༵གས་ལ་སོགས་པ་ཡན་ལག་ལྔའི་སྒོ་ནས་བཟླས་ཤིང་དམ་ཚིག་ཆོས་ལས་ཕྱག་རྒྱ་ཆེན་པོ་དང༵་བཞིའི་སྒོ་ནས་ལྷ་སོ་སོའི་ཕྱག༵་རྒྱ༵་འཆང་བ་རྣམས་རྒྱུན༵་མི༵་གཅོད༵་པར་དུས་དང་བརྩོན་པའི་རིམ་པས་བྱེད་པ་ནི་གསུམ་པའོ། །ཡང༵་ད༵ག་པའི་ལམ༵་དུ༵་སྟེ་ཐེག་པ་ཆེན་པོར་ཞུག༵ས་པའི་གང་ཟག་རྣམས་ལ༵་བྱམ༵ས་པ་ནི་བཞི་པའོ། །གབ་པ་དང་སྦས་པའི་ལྟ་སྤྱོད་གས༵ང་བ༵འི་དོ༵ན་རྣམས་ཕྱི༵་རོལ་སྣོད་དུ་མ་གྱུར་པ་ལ་སྨྲ༵་བར་མི༵་བྱ༵་བ་ནི་ལྔ་པའོ། །དོན་དེ༵་དག་རྣམས་ནི༵་དམ་ཚིག་གི་རྩ༵་བ༵་ལྔ༵་པོ་རྣམ༵ས་ཡིན་ཏེ༵། དང་པོ་གསུམ་སྒྲུབ༵་པའི་དམ་ཚིག་དང༵་ཕྱི་མ་གཉིས་དེ་དག་གི་ཐུགས་དང་འགལ་བ་བསྲུང༵་བའི༵་དམ༵་ཚི༵ག་གི་མཆོ༵ག་ཡིན་ནོ། །

གཉིས་པ་(༣༡༦)ཡན་ལག་གི་དམ་ཚིག་ལའང་གཉིས་ལས། མི་སྤང་བའི་དམ་ཚིག་ལྔ་ནི་གཏི༵་མུག༵་གང་དུ་མི་རྟོག་པ་དང་འདོད་ཆག༵ས་བདེ་བ་ཆེན་པོ་དང༵་ཞེ༵་སྡང༵་གསལ་བ་ཆེན་པོ་ད༵ང་ང༵་རྒྱལ༵་དྲེགས་པ་ཆེན་པོ་དང་ཕྲ༵ག་དོ༵ག་ཁྲོ་བོ་ཆེན་པོ་རྣམས་ནི་གཞི་ཡེ་ནས་དག་ཅིང་ཐབས་ཀྱིས་ལམ་དུ་གྱུར་པ་ལ་འབྲས་བུ་སྐུ་དང་ཡེ་ཤེས་སུ་འཆར་བའི་རང་བཞིན་ཡིན་པས་ནམ་ཡང་མི༵་སྤང༵་ངོ༵་། །དང་དུ་བླང་བའི་དམ་ཚིག་ལྔ་ནི་དཀ༵ར་རྩི༵་བྱང་ཆུབ་ཀྱི་སེམས་དང་དམ༵ར་རྩི༵་པདྨ་རཀྟ་དང་དྲི༵་ཆེན་དྲི་ཆུ་དང་ཤ༵་ཆེ༵ན་ལྔའི་དྭངས་མ་རྣམས་ནི། ཁ་ཅིག་གིས་བཙོག་པར་འཛིན་པས་དེ་དང་མཐུན་པའི་བློ་སྤང་བྱར་ཤེས་པ་ནི་དམ་རྫས་ཀྱིས་དག༵་ཅིང་དབེན་པ༵འི་སྣོད༵་ཡིན་པས་དེ་ཉིད་དུ༵་མི༵་འདོ༵ར་རོ༵། །འདི་ལ་ཁ་ཅིག་ཡེ་ནས་དག་པའི་སྣོད་བཅུད་དུ་གནས་པས་མི་དོར་ཞེས་པ་དང་། ལ་ལ་དམ་རྫས་དག་པ་དང་དེའི་སྣོད་ཀ་པཱ་ལ་མི་དོར་ཞེས་ཟེར་བས་མ་ཤེས་པར་སྣང་སྟེ་གཞུང་དེ་ཉིད་བཀླགས་པས་ཤེས་སོ། །དེ་དག་ནི་རྩ་བའི་གྲོགས་སམ་ཐབས་སུ་བྱུང་བས་ན་ཡ༵ན་ལ༵ག་རྣམ་པ་བཅུ༵་ཡི༵་དམ༵་ཚི༵ག་སྟེ༵་རང་དགར་སྤྱད་ན་ཐ་མལ་པ་བཞིན་འགྱུར་བས། ཡེ༵་ནས༵་ད༵ག་པ་གསུམ་དང་མཉམ༵་པ་བཞིར་གནས་པའི་དོན་རྟོག༵ས་པ༵ས་རང་བཞིན་ཤེས་པར་བྱས་ལ་རང་རང་གི་ཐབས་ཀྱིས་ཟིན་པའི་ཚུལ་གྱིས་སྤྱད༵་པར་བྱའོ། །

གཉིས་པ་ངེས་ཚིག་ལའང་གཉིས་ལས། རྩ་བའི་ངེས་ཚིག་ནི་བསྲུང༵་ཞི༵ང་བསྒྲུབ༵་པ༵འི་དམ༵་ཚི༵ག་རྣམ་པ་ལྔ༵་ནི་གསང་སྔགས་བསྒྲུབ་པའི་རྩ༵་བའི་དམ་ཚིག་ཡི༵ན་ཏེ༵། ལྗོན་ཤིང་གི་རྩ་བ་ལྟར་བསྲུངས་ན་དངོས་གྲུབ་འབྱུང་ཞིང་ཉམས་ན་ཐེག་པ་ཆེན་པོའི་རིག༵ས་ཏེ་མངོན་པར་བྱང་ཆུབ་པའི་སྐལ་བ་མེད༵་པར་འགྱུར༵་རོ། །དེའང་གནས་སྐབས་རྒྱང་བསྲིངས་པ་ཙམ་ལ་དེ་སྐད་བྱ་ཡི་གཏན་དུ་རིགས་སམ་སྐལ་བ་མེད་པ་མ་ཡིན་ཏེ། ཐར་པའི་ས་བོན་བསྐྲུན་པའི་ཕྱིར་དང་། རིགས་ཆད་མི་སྲིད་པའི་ཕྱིར་རོ། །རིགས་ཞེས་པ་ནི་མཚན་ཉིད་ཀྱི་ཐེག་པས་ཐོག་མ་མེད་པའི་ཆོས་ཁམས་དགེ་བ་ས་བོན་གྱི་ཚུལ་ཏུ་འདོད་དེ། སྙིང་པོ་བསྟན་པའི་མདོ་ལས། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ན་འགྲོ་བ་ཀུན། །མྱ་ངན་འདས་པ་ཐོབ་པར་འགྱུར། །ཞེས་སོ། །ཡོད་ལུགས་གཉིས་ཏེ། ཆོས་ཉིད་དང་། ཆོས་ཅན་ནོ། །དེའང་རྒྱུད་བླ་མ་ལས། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླངས་པས་མཆོག་ཉིད་དོ། །ཞེས་སོ། །དང་པོ་འདི་ནི་སེམས་ཉིད་དོན་གྱི་ཀུན་གཞི་ཡེ་ནས་རང་བཞིན་གྱིས་དག་ཅིང་འོད་གསལ་བ་སྟེ། རྒྱུད་བླ་མ་ལས། དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བསལ་དང་གཞག་མེད་ཆོས་ཉིད་(༣༡༧)ཀྱང་། །ཞེས་སོ། །ཆོས་ཅན་ནི་དོན་གྱི་ཀུན་གཞིའི་སྟེང་ན་ལྗོན་པའི་ས་བོན་ལྟར་སངས་རྒྱས་ཀྱི་མཚན་དཔེ་འོད་ཟེར་དང་བཅས་པ་འབྱུང་རུང་གི་དངོས་པོ་ཤིན་ཏུ་ཕྲ་བའི་རང་བཞིན་དུ་ཐོག་མ་མེད་པ་ནས་ཡོད་པ་སྦྱངས་པ་ལས་གཟུགས་སྐུ་འབྱུང་བར་འདོད་དེ། དེ་ཉིད་ལས། ཇི་ལྟར་ཨ་མྲ་ལ་སོགས་ཤིང་འབྲས་ལ། །ཡོད་པའི་ས་བོན་མྱུ་གུ་འཇིག་མེད་ཆོས། །ས་རྨོས་ཆུ་སོགས་ལྡན་པས་ལྗོན་ཤིང་གི། །རྒྱལ་པོའི་དངོས་པོར་རིམ་གྱིས་འགྲུབ་པ་ལྟར། །སེམས་ཅན་རྣམས་ཀྱི་མ་རིག་སོགས་འབྲས་ཀྱི། །པགས་སྦུབས་ནང་ཆུད་ཆོས་ཁམས་དགེ་བ་ཡང་། །དེ་བཞིན་དགེ་བ་དེ་ལ་དེ་བརྟེན་ནས། །རིམ་གྱིས་ཐུབ་པའི་རྒྱལ་པོའི་ངོ་བོར་འགྱུར། །ཞེས་སོ། །དེའང་རིགས་དང་པོས་ཆོས་སྐུ་དང་། གཉིས་པས་གཟུགས་སྐུ་བསྐྱེད་པར། དེ་ཉིད་ལས། རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་ཡིན། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་སོ། །དེ་ལྟར་གཞི་ལ་ཡོད་པའི་རིགས་སད་པ་ན་སེམས་བསྐྱེད་དང་ལམ་བསྒྲུབ་པའི་སྐལ་བ་ཡོད་པས་རིགས་དང་པོ་སད་པའི་རྟགས་སུ། འཇུག་པ་ལས། སོ་སོ་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ཞིང་། །ལུས་ཀྱི་བ་སྤུ་ལྡང་བར་འགྱུར་བ་གང་ཡིན་པ། །དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད། །དེ་ཉིད་ཉེ་བར་བསྟན་པའི་སྣོད་ནི་དེ་ཡིན་ཏེ། །དེ་ལ་དམ་པའི་དོན་གྱི་བདེན་པ་བསྟན་པར་བྱ། །ཞེས་སོ། །གཉིས་པ་སད་པའི་རྟགས་ནི། སྔ་མ་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་བ་ཡང་དག་སྤྱོད་པ་ནི། །རིགས་ཀྱི་རྟགས་སུ་ཡང་དག་བཤད། །ཅེས་སོ། །དེ་ལྟ་བུའི་རིགས་དེ་ཉིད་གསང་སྔགས་པ་ལྟར་ན། ཉི་མ་སྤྲིན་གྱིས་བསྒྲིབས་པའམ་འདམ་གྱིས་གོས་པའི་ནོར་བུ་ལྟར་སྐུ་དང་ཡེ་ཤེས་དང་ཞིང་ཁམས་ཡེ་ནས་ལྷུན་གྲུབ་ཏུ་ཡོད་པར་འདོད་ཅིང་ཆོས་ཐམས་ཅད་ཡེ་ནས་སངས་མ་རྒྱས་པ་མེད་པར་འདོད་དེ། རྡོ་རྗེ་ཕུང་པོའི་ཡན་ལག་ནི། །ཞེས་པ་ལ་སོགས་པ་དང་། སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་སོ། །དེ་ལྟ་ནའང་གློ་བུར་ཀུན་ཏུ་བརྟགས་པའི་དྲི་མ་ཉིད་ཆབ་རོམ་ཆུ་རུ་ཞུ་བ་ལྟར་ཡེ་ཤེས་སུ་གྲོལ་བར་འདོད་དེ། (༣༡༨)ཉོན་མོངས་ལྔ་ནི་ཡེ་ཤེས་ལྔ། །སྲིད་པ་གསུམ་ནི་བདེ་ལྡན་ཞིང་། །ཞེས་རྡོ་རྗེ་ལས་བཤད་པ་བཞིན་ནོ། །ཚུལ་འདི་ཉིད་བཀའ་ཐ་མ་ངེས་པ་དོན་གྱི་མདོ་སྡེ་ལས་ཀྱང་གསུངས་ཏེ། དེ་བཞིན་གཤེགས་པའི་སྙིང་པོའི་མདོ་ལས། ཇི་ལྟར་མི་ཡི་གསེར་གྱི་གར་བུ་ནི། །ཉལ་ཉིལ་རྣམ་པའི་ནང་དུ་ལྷུང་གྱུར་ལ། །དེར་དེ་ལོ་ནི་མི་ཉུང་བ་ཞིག་ཏུ། །དེ་ལྟར་གནས་ཀྱང་མི་འཇིག་ཆོས་ཅན་ནོ། །ལྷ་ཡིས་ལྷ་ཡི་མིག་གིས་དེ་མཐོང་ནས། །རྣམ་པར་སྦྱང་ཕྱིར་གཞན་ལ་སྨྲས་པ་ནི། །འདི་ན་རིན་ཅེན་མཆོག་གི་གསེར་ཡོད་ལ། །རྣམ་པར་སྦྱོངས་ལ་དེ་ཉིད་བྱ་བ་གྱིས། །དེ་བཞིན་ངས་ནི་སེམས་ཅན་ཐམས་ཅད་ཀྱང་། །ཉོན་མོངས་རྣམས་ཀྱིས་ཡུན་རིང་རྟག་ནོན་མཐོང་། །དེ་དག་གིས་ནི་གློ་བུར་ཉོན་མོངས་ཤེས། །རང་བཞིན་སྦྱངས་ཕྱིར་ཐབས་ཀྱི་ཆོས་སྟོན་ཏོ། །ཞེས་པ་ལ་སོགས་པ་གསུངས་སོ། །དེས་ན་དེ་ལྟ་བུའི་རིགས་ལས་ཉམས་པ་མ་ཡིན་ཀྱང་། རྣལ་འབྱོར་སེམས་ཙམ་པ་ལྟར་རེ་ཤིག་ལམ་སྒྲུབ་པའི་རིགས་ལས་ཉམས་པར་འགྱུར་བས་དེ་སྐད་ཅེས་བྱའོ། །ཡན་ལག་གི་ངེས་ཚིག་ནི་མི༵་སྤང༵་བ་དང་མི༵་དོ༵ར་བའི་དམ་ཚིག་ལྔ༵་ཚན་གཉི༵ས་ནི༵་རྩ་བ་སྒྲུབ་པའི་གྲོགས་སུ་དགོས་པས་ཡན༵་ལ༵ག་གི་དམ༵་ཚི༵ག་ཅེས་བྱ་སྟེ། དེ་དག་ཀྱང་རྩ་བ་དང་གཉན་མི་གཉན་དགོས་པའི་དབང་གིས་མཉམ་པས་ན་དེ་ལས་ཤིན་ཏུ་འད༵འ་དཀའ༵་བ་ཡིན་ཏེ། ར་བ་མཚམས་ཀྱི་འོབས་དང་འདྲ་བས་སོ༵། །

གཉིས་པ་ཕན་ཡོན་ཉེས་དམིགས་དང་བཅས་ལ་འང་གཉིས་ལས། དམ་ཚིག་ལ་གནས་པའི་ཕན་ཡོན་ནི་ཆོས་ཐམས་ཅད་ཡེ་ནས་སྐུ་དང་ཡེ་ཤེས་སུ་སངས་རྒྱས་པར་མཉམ༵་ཉིད་ཀྱི་དོན་ལ༵་ལམ་ཐབས་དང་ཤེས་རབ་ཟབ་མོས་མཉམ༵་པར༵་སྦྱོར༵་བ༵་ཡི༵་རང་བཞིན་ནི་མཉམ༵་པ༵འི་དམ༵་ཚི༵ག་ཆེན་པོ་དེ་ཉིད་ལ༵་གན༵ས་ན༵་འབྲས་བུ་སྐུ་གསུམ་འདུ་འབྲལ་མེད་པར་མཉ༵མ་པ་ཉིད་ཀྱི་ཡོན་ཏན་ལྷུན་རྫོག༵ས་ཆེ༵ན་པོ༵་སངས་རྒྱས་ཐོབ༵་པར་འགྱུར༵་བ༵ས་ན་དམ་ཚིག་བསྲུང་བར་བྱའོ། །དམ་ཚིག་ལས་འད༵ས་ན༵་སང༵ས་རྒྱས༵་ཐོབ་པ་མ༵་ཡི༵ན་པས་འདའ་བར་མི་བྱ་སྟེ། རྒྱལ་པོའི་ཁྲིམས་ལ་གནས་པས་བདེ་བ་འབྱུང་ཞིང་འདས་པས་ཆད་པ་འབྱུང་བ་བཞིན་ནོ༵། །

གཉིས་པ་ཉམས་པའི་ཉེས་དམིགས་ལ་གཉིས་ལས། རྩ་བའི་དམ་ཚིག་ཉམས་པའི་ཉེས་པ་ལའང་ཉམས་གྲིབ་གཞན་ལ་གནོད་པ་ནི་རྩ༵་བའི༵་དམ་ཚིག་ཉམ༵ས་པ༵འི་གང་ཟག་བསླབ་སྡོམ་ཕྱལ༵་བར་དོར་བ༵་དག༵་དམ་ཚིག་གསོ༵་བའི་ཐབས་ལ༵་ཉེ༵་བ༵ར་མི༵་བརྩོན༵་ན་དེ་དང༵་སྐད༵་ཅི༵ག་ཙ༵མ་ཡང་མི་འགྲོགས་ཤིང་ཡུད་ཙམ་གཅིག་ཏུའང་ཕན་ཚུན་གཏམ་སྨྲ་བར་མ༵་བྱེད༵་ཅིག །ཅིའི་ཕྱིར་ཞེ་ན་ཚེ་འདིར་ནད་དང་གནོད་པ་ལ་སོགས་(༣༡༩)པ་མི་འདོད་པའི་རྐྱེན་སྣ་ཚོགས་འབྱུང་ཞིང་ཕྱི་མར་དེ་དང་མཉམ་དུ་དམྱལ་བར་འགྲོ་དགོས་པས་དམ་ཚིག་ཉམ༵ས་པ་ལས་གྱུར༵་པའི་ཉེས༵་པ་བརྗོ༵ད་ཀྱིས་མི༵་ལང༵་བ་འབྱུང་བའི་ཕྱིར་རོ། །དེའང་ཟླས་ཉམས་པ་ཞེས་བྱའོ། །ཁ་ཅིག་དེ་དང་ལུང་པ་གཅིག་གི་ཆུ་ལའང་མི་བཏུང་ཟེར་བ་ནི་དགོངས་པ་མ་ཡིན་ཏེ། འདི་ལྟར་གསང་སྔགས་འོག་མ་འོག་མ་རྣམས་དོག་ཅིང་གོང་མ་གོང་མ་དེ་ལས་ཡངས་པས་དམ་ཚིག་བསྲུངས་མཚམས་ཀྱང་དེ་བཞིན་ཏེ་ཀྲཱི་ཡ་བས་ལུང་པ་གཅིག་གི་ཆུ་ལའང་མི་བཏུང་བར་བཤད་དེ། དམ་ཚིག་བཀོད་པ་ལས། ཀྲཱི་ཡ་རྣམས་ལས་ཁྱད་པར་དུ། །ལུང་གཅིག་ཆུ་ལ་མི་བཏུང་དང་། །ཞེས་སོ། །ཨུ་པས་ལུང་པ་གཅིག་ཏུ་གནས་ཀྱང་མཐོང་བར་མི་བྱ་བ་དང་། ཡོ་ག་བས་མཐོང་ཡང་ཕྲད་པར་མི་བྱ་བ་དང་། མཧཱ་དང་ཨ་ནུ་ཨ་ཏི་གསུམ་གྱིས་ཕྲད་ཀྱང་གཏམ་མི་སྨྲ་བར་བྱ་ཡི། གནས་གཅིག་ཏུ་འདུག་པ་ཙམ་ལ་ཉེས་པ་དེ་ཙམ་མ་གསུངས་སོ། །གཉིས་པ་ཉམས་པའི་ཉེས་པ་རང་ལ་འབྱུང་བ་ནི་རྩ༵་བའི༵་དམ༵་ཚི༵ག་ཉམ༵ས་པར་གྱུར༵་ན༵་ཆར་ཕབ་ན་ཐན་པ་འབྱུང་བའམ་མཐུ་བཏང་ན་རང་ལ་ལོག་པ་ལྟར་གང་སྒྲུབ༵་པ༵་ཐམ༵ས་ཅད༵་དེ་ལས་ལོ༵ག་པ༵ར་འགྱུར༵་ཞིང་། ཀུན་གྱི་ཡིད༵་དུ༵་མི༵་འོ༵ང་བ་དང་། ཚེ་འདིར་ཕོངས་པ་དང་ནད་དང་གདོན་དང་འཚེ་བ་དང་ཚེ་ཐུང་བ་ལ་སོགས་པ་མི་འདོད་པ་ཐམས་ཅད་འབྱུང་ཞིང་། ཕྱི་མར་དམྱལ་བར་ལྟུང་ཞིང་བསྐལ་པ་དུ་མར་སྡུག་བསྔལ་བ་ལ་སོགས་པ་རང་གི་ཡིད་དུ་མི་འོང་བ་རྣམ་པ་སྣ༵་ཚོ༵གས་པ༵འི་རང་བཞིན་རྒྱུ་དམ་ཚིག་ཉམས་པས་བསྐྱེད་པའི་གནས་སྐབས་དང་མཐར་ཐུག་གི་འབྲ༵ས་བུ༵་སྡུག་བསྔལ་དུ་མ་མི༵་འདོ༵ད་བཞི༵ན་དུ༵་རང་དབང་མེད་པར་འདུ༵་བར་བྱེད་དོ། །

གཉིས་པ་ཡན་ལག་གི་དམ་ཚིག་ཉམས་པའི་ཉེས་པ་ནི། ཡ༵ན་ལ༵ག་གི་དམ༵་ཚི༵ག་ཉམས༵་པར་གྱུར༵་ན༵་ཚེ་འདིར་སྒྲུབ་པའི་འབྲ༵ས་བུ༵་མཆོག་དང་ཐུན་མོང་གི་དངོས་གྲུབ་གང་ཡང་མེད༵་ཅི༵ང་ཕྱི་མ་ང༵ན་སོང༵་གསུམ་དུ་ལྟུང༵་སྟེ། རྡོ་རྗེ་ལས། དམ་ཚིག་ཉམས་པས་ཐུར་དུ་འགྲོ། །འདིར་ཡང་ལེགས་པའི་འབྲས་བུ་མེད། །ཅེས་པ་ལྟར་རོ། །

གསུམ་པ་རང་བཞིན་དང་དབྱེ་བ་བཤད་པ་ལ་གཉིས་ལས། དམ་ཚིག་གི་རང་བཞིན་ནི་རྩ་བ་དང་ཡན་ལག་གི་དམ༵་ཚི༵ག་རྣམ༵ས་ནི༵་སྐུ་གསུང་ཐུགས་ཀྱི་རྡོ༵་རྗེ༵་ཆེ༵ན་པོའི་ངོ་བོ་སང༵ས་རྒྱ༵ས་ཀུན༵་གྱི༵་བད༵ག་ཉིད༵་དམ་པ་ཡི༵ན་ནོ། །དེའི་ཕྱིར་བསྲུངས་ན་ཕན་ཡོན་དང་ཉམས་ན་ཉེས་དམིགས་ཆེན་པོ་འབྱུང་བ་འཐད་པ་དང་བཅས་པའོ། །

གཉིས་པ་དབྱེ་བ་ལ་གཉིས་ཏེ། རྣམ་གྲངས་ཀྱི་དབྱེ་བ་དང་། བསམ་གྱིས་མི་ཁྱབ་པའི་དབྱེ་བའོ། །

དང་པོ་ལའང་གཉིས་ལས། རྩ་བའི་དབྱེ་བ་ནི་རྩ༵་བའི༵་དམ༵་ཚིག༵་ལྔ༵་པོ་ལ༵་ནི༵་བླ་མེད་མི་སྤང་བ་ལྟ་བུ་གཅི༵ག་ལ༵འང༵་རྩ་བ་ཐབས་(༣༢༠)དང་། ཤེས་རབ་གཉིས༵་ད༵ང་དེ་གཉིས་ལ་སྐུ་གསུང་ཐུགས་གསུམ་གསུམ་སྟེ་དྲུག་དང་དེ་རེ་རེའང་ཡོན་ཏན་ཕྲིན་ལས་སྐུ་གསུང་ཐུགས་ལྔ་ལྔ་སྟེ་བསྡོམས་པས་བཅུ༵་ཕྲ༵ག་གསུ༵མ་ཡོད་དོ། །ཡན་ལག་གི་དབྱེ་བ་ནི་ཡ༵ན་ལ༵ག་གི་ད༵མ་ཚིག༵་ལྔ༵་གཉིས༵་ཏེ་བཅུ་ལ༵་འདོད་ཆགས་མི་སྤོང་བ་ལྟ་བུ་གཅི༵ག་ལ༵འ༵ང་ཐབས་དང་ཤེས་རབ་ལས། ཐབས་ལ་ཡེ་ཤེས་ལྔ་དང་ཡུལ་ལྔ། ཤེས་རབ་ལ་ཡེ་ཤེས་ལྔ་དང་ཡུལ་ལྔ་སྟེ་བཅུ༵་ཕྲ༵ག་གཉིས༵་སུ༵་དབྱེ༵་བ༵ས་ཉི་ཤུ་ཡོད་དོ། །

གཉིས་པ་བསམ་གྱིས་མི་ཁྱབ་པའི་དབྱེ་བ་ལ་གཉིས་ལས། ཆོས་ཅན་བསམ་གྱིས་མི་ཁྱབ་པས་དམ་ཚིག་བསམ་གྱིས་མི་ཁྱབ་པ་ནི། རྩ་བ་དང་ཡན་ལག་གི་དམ༵་ཚི༵ག་དེ༵་དག་ནི༵་ངོ་མཚར་རྨད༵་པོ༵་ཆེ༵་ཡིན་ཏེ། འགྲོ་བའི་ཁམས་རྣམས་ཡེ་ཤེས་ཆེན་པོར་འདུལ་བའི་ཕྱིར་རོ། །དེའང་སེམས་ཅན་མཐའ་ཡས་པ་ལྟར་དེ་རེ་རེ་ལ་ལྟོས་པའི་དམ་ཚིག་སུམ་བརྒྱ་དྲུག་ཅུའང་དེ་སྙེད་དུ་འགྱུར་བས་མཐའ་ཡས་སོ་ཞེས་བསྟན་པ་ནི། འཇི༵ག་རྟེན༵་དྲུག༵་གི༵་ཕྱོ༵གས་བཅུ༵་ན༵་སྲིད༵་པ་གསུ༵མ་གྱིས་བསྡུས་པའི་འགྲོ༵་བ༵་ཇི༵་སྙེད༵་ཡོད་པ༵་དེ་དག་གི་རྣམ་པར་རྟོག༵་པ་དེ་སྙེད་ཡོད་པ་འདུལ༵་བའི་ཕྱིར་རྩ་བ་དང་ཡན་ལག་གི་དམ༵་ཚི༵ག་ཀྱང་དེ༵་སྙེད༵་དུ་སྤྲོ༵་བས་ནམ་མཁའི་དབྱིངས་དང་ཆོས་ཀྱི་དབྱིངས་ལྟར་བསམ་གྱིས་མི་ཁྱབ་པའོ། །ཁ་ཅིག་སེམས་ཅན་གྱི་རྟོག་པ་མང་བ་བཞིན་དམ་ཚིག་ཀྱང་རིགས་མི་འདྲ་སྟེ་དེ་སྙེད་དུ་འཆད་པ་ནི་དགོངས་པ་མ་ཡིན་ཏེ། དམ་ཚིག་དེ་ནི་ཞེས་རྩ་བ་དང་ཡན་ལག་གི་དམ་ཚིག་བཤད་མ་ཐག་པ་དེ་ལ་སྙེགས་པ་དང་འགལ་ལོ། །

གཉིས་པ་ཆོས་ཉིད་བསམ་གྱིས་མི་ཁྱབ་པས། དམ་ཚིག་བསམ་གྱིས་མི་ཁྱབ་པ་ནི། དེ་ལྟར་ཆོས་ཅན་རྣམ་གྲངས་ཀྱི་དམ་ཚིག་བསྟན་པ་ལས་གཞན༵་ཡ༵ང་སྣང་སྲིད་འཁོར་འདས་ཀྱི་ཆོས་ཐམས་ཅད་ཡེ་ནས་བླང་དོར་མེད་པས་སྤང་བླང་བསྲུང་འཚམས་ལས་འདས་པས་རྒྱལ༵་མཆོ༵ག་ཀུན༵་ཏུ་བཟ༵ང་པོ་བྱ་རྩོལ་མེད་པའི་མཆོག་གི་རོལ་པར་ཆོས་ཐ༵མས་ཅ༵ད་མ༵་ལུས༵་པར་འདུས་ཤིང་གཉིས་སུ་མེད་པའི་ཕྱག༵་རྒྱ༵་ནམ་མཁའ་ལྟ་བུ་ཡི༵ན་པས་ན། གང་གིས་ཀྱང་བཅོས་ཤིང་རྩོལ་སྒྲུབ༵་རེ་དོགས་མེ༵ད་པའི་རང་བཞིན་ཏེ། དམ་ཚིག་ཐམས་ཅད་ཀྱི་སྙིང་པོའི་མཆོག་དམ་པ་མ༵་ལུས༵་པ་ཀུན་དེ་ཡིན་པས་ན་དེ་བཞིན་ཉིད་ལ་བཅོས་སླད་དང་རེ་དོགས་མེད་པའི་གནས་ལུགས་རྫོགས་པ་ཆེན་པོའི་ངང་དུ་ཤེས་པར་བྱའོ། །དེ་སྐད་དུའང་ཀུན་བྱེད་ལས། ཀྱེ། སྟོན་པའི་སྟོན་པ་ཀུན་བྱེད་རྒྱལ་པོ་ང་། །རྩ་བ་བྱང་ཆུབ་སེམས་སུ་ཀུན་གཅིག་པས། །ཀུན་ཀྱང་སྙིང་པོའི་དམ་ཚིག་གཅིག་ཡིན་ཏེ། །བསྲུང་དང་མི་བསྲུང་དོན་ལས་འདས་པར་རྟོགས། །ཀྱེ། ཀུན་བྱེད་རྒྱལ་པོ་ལྟ་བའི་དམ་ཚིག་ནི། །སྐྱེ་མེད་ནམ་མཁའ་(༣༢༡)ལྟ་བུར་ཕྱོགས་འདས་པས། །གང་གིས་དེ་དག་ལེགས་པར་རྟོགས་པ་དེ། །ཀུན་བྱེད་རྒྱལ་པོའི་དམ་ཚིག་རྟོགས་པ་ཡིན། །ཀྱེ། ཆོས་རྣམས་རྩ་བ་སེམས་སུ་གཅིག་པ་ལྟར། །དམ་ཚིག་རྩ་བ་བསྲུང་དུ་མེད་པར་གཅིག །ཀྱེ། ཀུན་བྱེད་ང་ཡི་དགོངས་པའི་དམ་ཚིག་ནི། །མ་ཡེངས་དྲན་པས་དངོས་པོ་ཡེ་ཤེས་སུ། །མ་བཅོས་སུས་ཀྱང་མ་བྱས་རང་བྱུང་སྟེ། །རིག་པས་དབང་སྒྱུར་བསྲུང་དང་མི་བསྲུང་མེད། །ཇི་ལྟར་སྣང་བའི་ཆོས་རྣམས་ཐམས་ཅད་ཀུན། །རང་བྱུང་སྙིང་པོར་གསལ་བས་དབང་བསྒྱུར་ནས། །ཀུན་བྱེད་རྒྱལ་པོས་བྱས་པའི་ཆོས་རྣམས་ལ། །རིག་དང་མ་རིག་གཉིས་ཀའི་ཡུལ་ལས་འདས། །འདའ་ཉམས་བསྲུང་མཚམས་མེད་པའི་དམ་ཚིག་ཡིན། །ཞེས་སོ། །དེས་ན་གནས་ལུགས་དོན་གྱི་དམ་ཚིག་ནི་བརྗོད་དུ་མེད་པ་དང་བསྟན་དུ་མེད་པ་དང་མཚན་མ་མེད་པ་དང་ཡེ་ཇི་བཞིན་པའི་ཆོས་ཉིད་དུས་གསུམ་འཕོ་འགྱུར་མེད་པའི་ཏིང་ངེ་འཛིན་ཏེ། དེ༵་ལ༵་སོ༵གས་པ༵་བསམ་བརྗོད་དམིགས་པའི་ཡུལ་ལས་འདས་པས་དམ་ཚིག་གི་ངོ་བོ་མཐ༵འ་ཡ༵ས་པའི་མཆོ༵ག་རྫོགས་པ་ཆེན་པོ་དོན་གྱི་གནས་ལུགས་སུ་གནས་པའོ། །དེ་ལྟ་བུའི་དམ་ཚིག་ཏུ་དམ་ཚིག་ཐམས་ཅད་མ་བསྒྲུབས་ཀྱང་ངང་གིས་འདུ་བའི་ཡོན་ཏན་ནི། ནམ་མཁའ་ཀློང་ཡངས་ཀྱི་རྒྱུད་ལས། ནོར་བུ་རིན་ཅེན་རྙེད་པའི་མིས། །འཇིག་རྟེན་སོ་ནམ་མི་དགོས་བཞིན། །མ་བསྒོམས་སེམས་ཀྱི་དོན་རྟོགས་ན། །ཡོན་ཏན་མ་ལུས་ལྷུན་གྱིས་གྲུབ། །དེ་ལས་མི་འདའ་དམ་ཚིག་ཡིན། །ཞེས་སོ། །

བཞི་པ་ཕན་ཡོན་ཆེན་པོ་རྒྱ་ཆེར་བཤད་པ་ལ་ལྔ་ལས། དང་པོ་འཇིག་རྟེན་པས་བསྟོད་ཅིང་བཀུར་བ་ནི། རྒྱལ༵་བ༵འི་རིག༵ས་ཀྱི་མཆོ༵ག་གསང་སྔགས་འཛི༵ན་ཅིང་དམ་ཚིག་ལ་གནས་པ༵་དེ༵་ལ་ཚངས་པ་དང་བརྒྱ་བྱིན་ལ་སོགས་པ་འཇི༵ག་རྟེན༵་པའི་གཙོ༵་བོ་དང༵་དེའི་འཁོ༵ར་གྱི༵ས་བསྟོད་ཅིང་བཀུར༵་སྟི་དང་ཕུ་དུད་བྱེད་པར་འགྱུར་རོ། །

གཉིས་པ་འཕགས་པས་བྱིན་གྱིས་རློབ་པ་ནི། ལྷ་དང་མིའི་སྐྱེ་རྒུ་རྣམས་ཀྱི་ནང་ནས་དམ༵་པ༵་མཆོ༵ག་གཙོ་བོ་སངས་རྒྱས་རྣམས་ད༵ང་། དེའི་སྲས་དམ༵་པ༵་སར་གནས་ཀྱི་བྱང་ཆུབ་སེམས་དཔའ་ཡི༵ས་རིམ་པ་བཞིན་སྲས༵་ཀྱི་ཐུ་བོ་དང༵་སྤུན༵་གྱི་དངས་མར་དགོང༵ས་ཤིང་། སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པས་བྱི༵ན་གྱི༵ས་རློབ༵་པའོ། །

གསུམ་པ་རྒྱལ་བའི་སྤྱོད་ཡུལ་ཐོབ་པའི་ཕན་ཡོན་ནི། དམ་ཚིག་ལ་གནས་པ་དེ་ཉིད་བདེ༵་བར་གཤེ༵གས་པ་ཉིད༵་ཀྱི་སྤྱོད་ཡུལ༵་སར་ཆུད་པ་ས་ལ་གནས་པས་ཡོངས་སུ་སྨིན་པའི་རིག་འཛིན་གསུམ་ལ་ཞུག༵ས་པ༵འི་མཐར་ཆོས་ཐམས་ཅད་འཇི༵གས་པ་མེ༵ད་པའི་མཆོག་ཀུན༵་ཏུ༵་བཟ༵ང་པོར༵་སྦྱོར༵་ཞིང་འཐོབ་པར་བྱེད་དོ། །(༣༢༣)དེའང་སྒྲིབ་པ་གཉིས་དང་། བདུད་བཞི་དང་། འཁོར་འདས་གཉིས་དང་། ཤེས་བྱ་གང་ལའང་འཇིགས་པ་མེད་པས་འཇིགས་མེད་ཀུན་ཏུ་བཟང་པོའི་འབྲས་བུའི་སངས་རྒྱས་སུ་བཤད་དོ། །སར་ཆུད་པའི་རིག་འཛིན་ནི་དཀྱིལ་འཁོར་དུ་ཞུགས་ཏེ་བསྐྱེད་རྫོགས་དང་པོར་མནོས་པ་དག་གོ། །ས་ལ་གནས་པའི་རིག་འཛིན་ནི་རྟོགས་པ་དང་ཏིང་ངེ་འཛིན་ཐོབ་ནས་དེ་ལ་རྒྱུན་དུ་གནས་པའོ། །སར་སྨིན་པའི་རིག་འཛིན་ནི་ཐོབ་པ་དེ་ལས་ཀྱང་སྟོབས་ཆེར་གྱུར་ཏེ། རྣམ་སྨིན་ཚེ་དབང་ཕྱག་རྒྱ་ཐོབ་ནས་ལྷུན་གྱིས་གྲུབ་པའི་རིག་འཛིན་ལ་སྦྱོར་ཞིང་ཐོབ་པར་བྱེད་པའོ། །

བཞི་པ་སྡོམ་པ་དང་དམ་ཚིག་གི་ཡོན་ཏན་འདུས་པའི་ཕན་ཡོན་ནི། བླ་ན་མེད་པའི་དམ་ཚིག་གི་ནང་དུ་ཆོས་ཐམས་ཅད་ཀྱི་གནས་ལུགས་ཇི༵་བཞི༵ན་པའི་ཆོས་ཉིད༵་ནམ་མཁའ་ལྟ་བུ་དང༵་། སེམས་ཅན་འདུལ༵་བ༵འི་ཐབ༵ས་ཐེག་པ་མཐའ་དག་གི་དོན་དང་། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་དང་རིག་པ་འཛིན་པ་ལ་སོགས་ཇི༵་སྙེད༵་པ་དེ་དག་གི་སྡོམ༵་པ༵་བས༵མ་ཡ༵ས་ཀྱི་རིགས་གང་ཡིན་པ༵་མ༵་ལུས༵་པ་ཀུན་ཡར་ལྡན་གྱི་ཚུལ་བྲེ་མིག་ཏུ་ཕུལ་ལྟར་འདུས་ཤིང་དེ་དག་གི་ཡོན་ཏན་མ་ལུས་པ་ལྷུན༵་གྱིས༵་གྲུབ༵་པ་ཡིན་ནོ། །

ལྔ་པ་ཉམས་ཀྱང་གསོར་རུང་བའི་ཕན་ཡོན་ནི་རྩ་བ་དང་ཡན་ལག་གི་དམ་ཚིག་ཉམ༵ས་པ་ན༵་ཉན་ཐོས་ཀྱི་འདུལ་ཁྲིམས་རྫ་བེའུ་ཆག་པ་ལྟར་གསོར་མི་རུང་བ་མ་ཡིན་གྱི་དབང་ནོད་པ་དང་བཤགས་པ་ལ་སོགས་པའི་ཆོ་གས་བསྐ༵ངས་པས༵། སྔ་མ་བཞིན་སོར་ཆུད་ཅིང་རྫོག༵ས་པ༵ར་འགྱུར་བ་ད༵ང་དེ༵་ལ༵་སོག༵ས་པའི༵་ཕན་ཡོན་མཐ༵འ་ཡ༵ས་པའི་མཆོ༵ག་གསང་སྔགས་ལ་ཡོད་དོ། །

གསུམ་པ་སྐབས་ཀྱི་དོན་བསྡུ་བ་ནི། དེ་སྐད་ཅེ༵ས་བརྗོད༵་པ༵ས་རང་སྣང་གི་དེ༵་བཞི༵ན་གཤེག༵ས་པ༵འི་ཚོགས་ཉིད༵་དེ༵་བཞི༵ན་གཤེ༵གས་པ༵་ཀུན་ཏུ་བཟང་པོའི་དཀྱིལ་འཁོར་གྱི་མངའ་བདག་དེ་ཉིད༵་ལ༵་འདུད༵་པ༵ར་གྱུར༵་ཏོ༵། །དམ་ཚིག་གས༵ང་བའི༵་སྙིང༵་པོ༵་དེ༵་ཁོ༵་ན༵་ཉིད༵་ངེ༵ས་པ༵་ལ༵ས། རྩ་བ་དང་ཡན་ལག་གི་དམ༵་ཚི༵ག་གི༵་དོན་བསྟན་པའི་ལེ༵འུ༵་སྟེ༵་བཅུ༵་དགུ༵་པའི་རྣམ་པར་བཤད་པ༵འོ༵།། །།