ཚོམས་དང་པོ། རྒྱན་རྣམས་ཀྱི་རྣམ་གྲངས་བརྗོད་པ།
༄༅། །ཚིགས་སུ་བཅད་པའི་བསྟན་བཅོས་མེ་ཏོག་གི་རྒྱན་ཞེས་བྱ་བ་བཞུགས་སོ། །
༄༅། །རྒྱ་གར་སྐད་དུ། ཡ་ག་ཐ་ཤ་ར་མ་ལི་ཀ་ཨ་ལང་ཀ་ར་ན་མ། བོད་སྐད་དུ། ཚིགས་སུ་བཅད་པའི་བསྟན་བཅོས་མེ་ཏོག་གི་རྒྱན་ཞེས་བྱ་བ། ངག་གི་ལྷ་མོ་ལ་ཕྱག་འཚལ་ལོ། །གང་གི་ཞབས་ཀྱི་པདྨོ་དེ་ལ་ལྷ་བརྒྱའི་ཅོད་པཎ་གྱིས་གཏུགས་ཤིང་། །ཀནྡཱའི་གཉེན་གྱི་དཔལ་ལ་འཁྲུལ་སྐྱེད་ཆེས་དཀར་འོད་ཀྱི་ཕྲེང་བ་ཅན། །ཆ་ཤས་མཚོན་མིན་འཇིག་རྟེན་མཛེས་བྱེད་ཀུན་གྱི་དཔལ་རྣམས་སྤུངས་འདྲ་བའི། །ལྷ་མོ་སྔོན་མེད་སྙན་ངག་མཁན་དེས་བདག་བློའི་པད་མཚོ་སྐྱོང་བར་མཛོད། །གང་ལ་བརྟེན་ནས་གྲགས་པ་ཆེར་འཕེལ་ཞིང་། །ལྷག་པའི་ལྷས་ཀྱང་རྗེས་སུ་འཛིན་འགྱུར་ལ། །མཁས་པའི་འདུན་སར་དབང་བྱེད་སྙན་ངག་སྟེ། །དེ་ཡི་རྣམ་པར་དབྱེ་བ་མདོར་བསྡུས་(༢)བྱ། །
རང་བཞིན་བརྗོད་དང་དཔེ་དང་ནི། །གཟུགས་ཅན་གསལ་བྱེད་བསྐོར་བ་དང་། །འགོག་དང་དོན་གཞན་བཀོད་པ་དང་། །ལྡོག་པ་ཅན་དང་སྲིད་པ་ཅན། །བསྡུས་དང་ཕུལ་བྱུང་རབ་བརྟགས་དང་། །རྒྱུ་དང་ཕྲ་མོ་ཆ་དང་རིམ། །དགའ་དང་ཉམས་ལྡན་གཟི་བརྗིད་ཅན། །རྣམ་གྲངས་བརྗོད་པ་ཀུན་ཏུ་ཕན། །རྒྱ་ཆེ་བསྙོན་དོར་སྦྱར་བ་དང་། །ཁྱད་པར་མཚུངས་པ་སྦྱོར་བ་དང་། །འགལ་དང་སྐབས་མིན་བསྟོད་པ་དང་། །ཟོལ་བསྟོད་ངེས་པར་བསྟན་པ་དང་། །ལྷག་ཅིག་བརྗོད་དང་ཡོངས་བརྗེས་ཤིས། །རབ་སྤེལ་དེ་ནས་དགོངས་པ་ཅན། །འདི་དག་ཚིག་རྣམས་དག་གི་ནི། །རྒྱན་དུ་སྔོན་གྱི་མཁས་རྣམས་བཞེད། །ཚིགས་སུ་བཅད་པའི་བསྟན་བཅོས་མེ་ཏོག་གི་རྒྱན་ལས། རྒྱན་རྣམས་ཀྱི་རྣམ་གྲངས་བརྗོད་པ་སྟེ་ཚོམས་དང་པོའོ།། །།