སྒྲུབ་ཐབས་མཆོག་གི་ནོར་བུ།
ཕག་མོ་སེར་མོའི་ཟབ་ཐིག་ལས༔ སྒྲུབ་ཐབས་མཆོག་གི་ནོར་བུ་བཞུགས༔ ཡེ་ཤེས་ཕག་མོ་མཁའ་འགྲོའི་ཚོགས་ལ་འདུད༔ བདག་ཉིད་པདྨ་དྷཀྐིའི་རྒྱུ་འཕྲུལ་གར༔ རྡོ་རྗེ་ཕག་མོ་ལུས་དང་གྲིབ་བཞིན་འགྲོགས༔ མཁའ་འགྲོའི་གསང་མཛོད་མན་ངག་ཐམས་ཅད་རྡོལ༔ དུས་གསུམ་འགྲོ་བ་སྐལ་ལྡན་ཕོ་མོ་རྣམས༔ བླ་མེད་ཆོས་ཀྱིས་སྨིན་གྲོལ་ལམ་ལ་བཀོད༔ གསང་ཆེན་ཐེག་པའི་ཡང་བཅུད་སྙིང་གི་ནོར༔ མ་འོངས་དོན་དུ་གཏེར་ཁ་དཔག་མེད་སྦས༔ ཀུན་གྱི་ཡང་ཏིག་ཟབ་མོའི་གདམས་པ་འདི༔ འདི་ནས་རིང་འདས་མ་འོངས་བསྐལ་པའི་མཐར༔ ལས་ལྡན་འགྲོ་བ་འགའ་ཡི་དོན་དུ་བཞག༔ ཉམས་སུ་ལོངས་ཤིག་སྐལ་ལྡན་ཕོ་མོ་རྣམས༔ ས་མ་ཡཱ༔ རྒྱ་རྒྱ་རྒྱ༔ དབེན་ཞིང་དངས་ལ་མཁའ་འགྲོ་འདུ་བའི་གནས༔ མི་རྒོད་ཇག་ཆོམ་འཚེ་བ་མེད་པའི་སར༔ སྟེགས་བུ་དྲི་བཟང་སྨན་གྱིས་ལེགས་པར་བྱུག༔ ཆོས་འབྱུང་ཐོད་ར་སྣ་ཚོགས་པདྨ་དང་༔ རྡོ་རྗེའི་ཕྲེང་བ་མེ་ཡི་ར་བས་བསྐོར༔ དབུས་སུ་མཁའ་འགྲོའི་གཏོར་མ་སྐུ་ཡིས་བརྒྱན༔ དར་སེར་གུར་ཕུབ་སྨན་རག་བླ་རྡོ་འགོད༔ དཀར་ཕྱོགས་མཆོད་ཅིང་ནག་ཕྱོགས་གདོན་བགེགས་སྦྱངས༔ སྐྱབས་སེམས་ཡན་ལག་སྡོམ་བཟུང་སྔོན་དུ་འགྲོ༔ ཚད་མེད་བཞི་ལྡན་སྣང་སྟོང་འཇའ་གུར་ཀློང་༔ ཆོས་ཀྱི་འབྱུང་གནས་ཨེ་ཡི་ཕོ་བྲང་དབུས༔ ཏི་ར་ཉི་ཟླ་པདྨ་འབར་བའི་སྟེང་༔ སྐྱེ་མེད་རིག་པའི་རྩལ་སྣང་ཡི་གེ་རི༔ འོད་ལྔའི་འཕྲོ་འདུ་བསྒྱུར་བའི་ཆོ་འཕྲུལ་ལས༔ ཕག་མོ་སེར་མོ་བདེ་ཆེན་མཁའ་འགྲོ་མ༔ ཐབས་ཀྱི་ཌཱ་རུ་ཤེས་རབ་དྲིལ་བུ་འཁྲོལ༔ གར་སྟབས་རུས་རྒྱན་དར་དཔྱངས་འོད་ལྔ་འབར༔ བཞིན་འཛུམ་མདངས་ལྡན་སྤྱན་གསུམ་མཁའ་ལ་གཟིགས༔ དབུ་སྐྲ་སིལ་མ་རིགས་ལྔའི་རྒྱན་གྱིས་སྤྲས༔ ཕག་ཞལ་སེར་མོའི་སྒྲ་ཡིས་སྲིད་གསུམ་གཡོ༔ རྡོ་རྗེ་ཁ་ཊྲཱཾ་བདེ་བའི་ཡབ་དང་འཁྲིལ༔ དོན་གྲུབ་སེར་མོ་བདེ་ཆེན་སྒྱུ་འཕྲུལ་མ༔ འདོད་པའི་དབང་མོ་མ་གཅིག་མཁའ་འགྲོའི་གཙོ༔ གཏེར་འབྱུང་ཡེ་ཤེས་དག་པའི་ཕོ་བྲང་ནས༔ བཞེངས་ཤིག་སྐུ་སྐྱོད་སྒྲུབ་པའི་གནས་འདིར་བྱོན༔ སེར་མོ་འབུམ་གྱི་འཁོར་ཚོགས་སྤུངས་སེ་སྤུང་༔ གནས་ཡུལ་དུར་ཁྲོད་མཁའ་འགྲོ་ཐིབས་སེ་ཐིབ༔ གར་གྱི་སྟངས་སྟབས་ཕྱག་མཚན་ཁྲོལ་ལོ་ལོ༔ འོད་ཕུང་ཐིབས་ཐིབས་གཟི་མདངས་ཡ་ལ་ལ༔ བརྡ་སྐད་དིར་དིར་གད་བརྒྱངས་སངས་སེ་སང་༔ བྱིན་གྱིས་བརླབ་ཕྱིར་གནས་འདིར་སྤྱན་འདྲེན་གཤེགས༔ མོས་པའི་བུ་ལ་མཆོག་ཐུན་དངོས་གྲུབ་སྩོལ༔ བསྐྱེད་པའི་གཞལ་ཡས་འདི་ལ་བརྟན་པར་བཞུགས༔ འདུ་འབྲལ་མེད་པའི་དབྱིངས་སུ་ཕྱག་གིས་མཆོད༔ སྨན་གཏོར་རཀྟ་དགའ་བཞིའི་བདེ་སྟོང་བཞེས༔ རི་རཏྣ་སརྦ་དྷཀྐི་ནི་ས་མ་ཡཱ་ཧྲིང་ཧྲིང་ཕེམ་ཕེམ་ཛཿཛཿ ཨ་ཝེ་ཤ་ཡ་པུ་རུ་ཙ་ཏིཥྛ་ཛྙ་ན་ཛཿཧཱུྃ་བཾ་ཧོ༔ རང་རིག་སྟོང་པའི་རང་མདངས་རོལ་བ་ལས༔ ཟུང་འཇུག་སྐྱེ་མེད་དབྱིངས་ཀྱི་མཁའ་འགྲོ་ཤར༔ ཐུགས་དཀར་ཉི་སྟེང་ས་བོན་སྔགས་འཁོར་བསྒྱུར༔ ཕྱོགས་བཅུ་དུས་བཞིའི་རྒྱལ་བ་རྒྱ་མཚོ་དང་༔ རྩ་གསུམ་མཁའ་འགྲོ་ཆོས་སྐྱོང་སྲུང་མའི་ཚོགས༔ སྲིད་གསུམ་ཀུན་གྱི་ཚེ་དཔལ་འབྱོར་བའི་སྟོབས༔ འོད་ལྔའི་རྣམ་པར་བསྒྱུར་ནས་དབང་དུ་བསྡུས༔ བསྐྱེད་པའི་ལྷ་སྐུ་བཟླས་པའི་སྔགས་འབྲུར་ཐིམ༔ བདེ་སྟོང་རབ་རྒྱས་གཟི་བརྗིད་ཆེས་ཆེས་འབར༔ སྐུ་བཞིའི་ཡེ་ཤེས་མངོན་གྱུར་ཨེ་མ་ཧོ༔ རི་རཏྣ་དྷཀྐི་ནི་བྷ་ར་ཧི་མ་མ་པུཥྟིང་ཀུ་རུ་སརྦ་སིདྡྷི་ཧཱུྃ་སྭཱ་ཧཱ༔ མ་ཡེངས་ཏིང་འཛིན་ངང་ནས་ཡང་སྙིང་འདི༔ འབུམ་ཚོ་བཟླས་པས་མཁའ་འགྲོའི་བྱིན་རླབས་འཐོབ༔ ཞལ་མཇལ་གསུང་ཐོས་ཞིང་ཁམས་མཐོང་བ་དང་༔ དྲི་བཟད་འཐུལ་ལ་ཉམས་རྒྱས་བདེ་སྟོང་འབར༔ ཐོད་ཆང་འཐུངས་དང་ཅང་ཏེའུ་ཁ་ཊྲཱཾ་རྙེད༔ དངོས་གྲུབ་ཐོབ་པའི་ཡ་མཚན་རྟགས་རྣམས་འབྱུང་༔ ཐུན་སྐབས་རྣམས་སུ་མཆོད་ཅིང་བསྟོད་པ་ནི༔ ཧཱུྃ༔ མཆོད་པའི་མཁའ་འགྲོ་སྤྲུལ་པའི་དྷཀྐི་མ༔ སྟོང་གསུམ་གང་བར་སྤྲུལ་ནས་ཕྱག་རྒྱ་སྒྱུར༔ འདབ་ལྡན་ཡིད་འོང་མེ་ཏོག་སྣ་ཚོགས་དང་༔ དྲི་ཞིམ་བདུག་སྤོས་སྣང་གསལ་ཨཱ་ལོ་ཀེ༔ དྲི་ཡི་ཆབ་བཟང་ཞལ་ཟས་རོལ་མོའི་སྒྲ༔ བདེ་གསལ་མི་རྟོག་ཉམས་མྱོང་རྡོ་རྗེའི་གླུ༔ སྣང་བའི་ཕྱག་རྒྱ་སྟོང་པའི་ཡེ་ཤེས་བརྒྱན༔ དགའ་བཞིའི་འགྲོས་ཀྱིས་ཡེ་ཤེས་མཁའ་འགྲོ་མཆོད༔ སྲིད་གསུམ་གཏོར་གཞོང་འགྲོ་དྲུག་གཏོར་མས་སྤྲས༔ དབང་ཤེས་ལང་ཚོའི་འདབ་སྟོང་རྒྱན་གྱིས་བརྒྱན༔ མུ་མཐའ་མེད་པར་ཡོངས་སུ་བཀོད་པ་འདི༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་མཆོད༔ རྣམ་དག་མཁའ་ལ་འཁྱིལ་བ་ཟིལ་པའི་བཅུད༔ རང་བྱུང་བདུད་རྩི་པཉྩ་ཨ་མྲྀ་ཏ༔ གཙང་དམེ་ཡོངས་གྲོལ་བྷནྡྷར་བསྐྱིལ་བ་འདི༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་མཆོད༔ གཟུང་འཛིན་མ་རིག་བག་ཆགས་སྣང་པའི་བདུད༔ རང་གྲོལ་སྐུ་གསུམ་ཆོས་དབྱིངས་ཀཱི་ལཱ་ཡས༔ བདག་མེད་སྟོང་པའི་དབྱིངས་སུ་བསྒྲལ་བའི་ཁྲག༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་མཆོད༔ གཟུགས་སྒྲ་དྲི་རོ་རེག་བྱ་ལ་སོགས་པ༔ མདོར་ན་མཆོད་པའི་སྤྲིན་གྱི་ཕུང་པོ་རྣམས༔ ཡོངས་སུ་བཀོད་ནས་སྤྲུལ་སྟེ་མཆོད་པའི་ཚོགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འབུལ༔ ཨཱོཾ་ཨཱཿཧཱུྃ་རཏྣ་དྷཀྐི་ནི་སརྦ་གྷྲི་ཧ་ན་མ་ཧཱ་པཱུ་ཙ་ཁཱ་ཧི་ཁཱ་ཧི༔ ཧཱུྃ༔ རྒྱས་པའི་མཁའ་འགྲོ་དྷཀྐིའི་གཙོ་མོ་ཆེ༔ མཆོག་གི་མངའ་བདག་སིདྡྷིའི་དཔལ་ལྡན་མ༔ གྲགས་པའི་དཔལ་འབར་དབང་གི་གཟི་བརྗིད་འཕྲོ༔ ནུས་མཐུའི་སྟོབས་རྒྱས་འབྱོན་དྲུག་འབྲས་བུས་ཕྱུག༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ རྨད་བྱུང་ཐུགས་རྗེས་རྣལ་འབྱོར་བུ་བཞིན་སྐྱོང་༔ ལས་བཞིའི་ཆར་འབེབས་འདོད་པའི་འབྲས་བུ་སྩོལ༔ ལེགས་ཉེས་སྟངས་འཛིན་བླ་མེད་བྱ་ར་བྱེད༔ སེར་མོ་དོན་གྲུབ་སེར་མོ་འབུམ་གྱི་གཙོ༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ ཆོས་ཀྱི་དབྱིངས་ལས་རྟོག་བྲལ་མཁའ་འགྲོའི་སྐུ༔ ལོངས་སྤྱོད་རྫོགས་པའི་དཔལ་ལྡན་དབང་མོ་ཆེ༔ གང་འདུལ་སྤྲུལ་པའི་གར་མཁན་རྗེས་ཆགས་ཞལ༔ སྐུ་གསུམ་དཔལ་དང་ལྡན་པའི་དོན་གྲུབ་མ༔ ཡེ་ཤེས་མཁའ་འགྲོ་འཁོར་དང་བཅས་ལ་བསྟོད༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་མཆོད་བསྟོད་བསྙེན་ཅིང་བསྒྲུབས་པའི་མཐར༔ ཏིང་འཛིན་དབང་ལེན་སྒྲུབ་རྫས་དམ་མེད་སྦ༔ བླ་རྡོ་འཆང་ཞིང་མཁའ་འགྲོའི་དམ་ཚིག་བསྲུང་༔ ཀུནྡ་སྤེལ་ཞིང་དགའ་བཞིའི་དབབ་ལྡོག་སྦྱང་༔ གནས་ཡུལ་དུར་ཁྲོད་ཉུལ་ཞིང་འདུ་འཛི་སྤང་༔ རེ་དོགས་ཁུ་འཕྲིག་གཅོད་ཅིང་ཟབ་དོན་སྦྱང་༔ མ་དང་མཁའ་འགྲོ་སྤྲིན་བཞིན་འདུ་བ་དང་༔ དངོས་གྲུབ་རྣམ་གཉིས་དཔལ་རྒྱས་མཆོག་ལ་སྤྱོད༔ ཨེ་མ་ཟབ་པའི་སྙིང་པོ་བསྡུས་པའི་བཅུད༔ ཁྱད་པར་འཕགས་པའི་སྙིང་གི་གདམས་པ་འདི༔ གྲོགས་ཀྱི་མཆོག་གྱུར་མཚོ་རྒྱལ་ཁྱོད་ལ་གདམས༔ བརྡ་ཡི་དཔེར་བྲིས་བཀའ་རྒྱས་སྲུང་མར་བཅོལ༔ རྒྱས་པའི་གནས་མཆོག་དོན་གྲུབ་དྷཀྐིའི་གནས༔ གཡུང་དྲུང་རིས་ཀྱི་རྟགས་ཀྱིས་མཚན་པའི་ཟུར༔ གླང་ཆེན་འདྲ་བའི་བྲག་གི་མཁལ་ཁུང་དུ༔ བཀའ་རྒྱས་ཐོབ་དང་མ་འོངས་བསྐལ་པ་ལ༔ ང་ཡི་ཐུགས་སྤྲུལ་ཉི་མའི་མིང་ཅན་ཞིག༔ ཁམས་ནས་འབྱུང་ཞིང་ང་ཡི་ཟབ་གཏེར་སྤྱོད༔ སྐལ་ལྡན་མང་པོ་ཐར་པའི་ལམ་ལ་འཁྲིད༔ ད་ལྟའི་ཟབ་གཏེར་སྦས་པ་དོན་ཡོད་འབྱུང་༔ མཆོག་ཐུན་འབྱུང་གནས་ཚེ་འདི་བློ་ཡིས་ཐོང་༔ བར་ཆད་རྩ་བ་གྲྭ་སློབ་དགོན་གནས་སྤོངས༔ གཅིག་ཏུ་མ་སྡོད་གར་སོང་ཆ་མེད་གྱིས༔ མཐུན་རྐྱེན་ཀུན་དང་འབྲེལ་བ་བཙན་ཐག་ཆོད༔ འགལ་རྐྱེན་མེད་པའི་གནས་སུ་སྒྲུབ་པ་གྱིས༔ པདྨའི་ཞལ་གདམས་སྙིང་ལ་ཆོངས་ཤིག་རྒྱ༔ སྐལ་བར་ལྡན་པའི་ཚོགས་བསགས་ཕོ་མོ་དང་༔ ཁྱད་པར་རྩ་བ་ཡན་ལག་ཆོས་བདག་ལ༔ གསང་སྔགས་སྦྲུལ་མཇུག་བཞིན་དུ་སྟོན་མཁས་གྱིས༔ བཀའ་ཡི་སྲུང་མས་མེལ་ཚེ་གྱིས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིགས་འཛིན་ཆེན་པོ་ཉི་མ་གྲགས་པས་མེ་མོ་ཡོས་ལ་ཆགས་རུ་ཕུག་སེར་ནས་གདན་དྲངས་ཤིང་ཕུག་ནག་བདེ་བ་ཆེན་པོས་ཤོག་སེར་ལས་ཞལ་བཤུས་པའོ། །མངྒལཾ། །