གཞུང་གི་དོན།

གཉིས་པ་གཞུང་དོན་ལ། བསྟན་བཅོས་རྩོམ་པ་ལ་འཇུག་པ་དང༌། བརྩམ་པའི་བསྟན་བཅོས་ཀྱི་ལུས་དངོས། བསྟན་བཅོས་བརྩམས་པའི་མཇུག་སྨོན་དང་གསུམ། དང་པོ་ལ་མཆོད་པར་བརྗོད་པ་དང༌། རྩོམ་པར་དམ་བཅའ་བ་དང་གཉིས། དང་པོ་ལ་བླ་མ་སངས་རྒྱས་བྱང་སེམས་རྣམས་ལ་མཆོད་པར་བརྗོད་པ་དང༌། དོན་དམ་པའི་སངས་རྒྱས་དེ་བཞིན་ཉིད་ལ་མཆོད་པར་བརྗོད་པ་དང་གཉིས། དང་པོ་ནི། ཨོཾ་གུ་རུ་བུདྡྷབྷོ་དྷི་ས་ཏྭ་བྷྱོཿན་མོ་ན་མཿ ཞེས་བྱུང༌། དེའི་ཚིག་དོན་ནི་ཨོཾ༷་ཞེས་པའི་དོན་ཕྱག་འཚལ་ཞེས་པའི་དོན་དུ་སྒྲ་བ་དག་གིས་འཆད་པ་ལ་བརྟེན་ནས་ཙ་མི་ལོ་ཙྭ་བས་དུས་འཁོར་འགྲེལ་ཆེན་དུ་ཕྱག་འཚལ་ཞེས་པར་བསྒྱུར་བར་སྣང༌། གཞན་དུ་བཤད་པ་ཡོད་མོད་འདིར་ཡང་ཕྱག་འཚལ་བའི་དོན་དུ་རུང་ཡང༌། ངེས་དོན་ལ་སྦྱར་ན། གསང་འདུས་སྒྲོན་གསལ་ལས། ཡི་གེ་ཨོཾ་ནི་དེ་བཞིན་གཤེགས་པའི་སྙིང་པོ་སྟེ། ཞེས་གསུངས་པ་ལྟར་རྒྱུད་སྡེ་མང་པོ་ལས་གསུངས་པས་ཡི་གེ་ཨོཾ་སྔགས་ཐམས་ཅད་ཀྱི་མགོར་སྦྱར་ནས་བདེ་གཤེགས་སྙིང་པོས་ལུས་ཅན་ཐམས་ཅད་ལ་ཁྱབ་པར་སྟོན་པའོ། །ཡང་ན་རྒྱུད་སཾ་པུ་ཊ་ལས། །ཡི་གེ་ཨ་ནི་གསུང་ཞེས་བྱ། །ཡི་གེ་ཨུ་ནི་སྐུུ་རུ་བརྗོད། །མ་ཡིག་ཐུགས་ཀྱི་རྡོ་རྗེ་སྟེ། །རྡོར་གསུམ་གཅིག་གི་རང་བཞིན་ཨོཾ། །ཞེས་གསུངས་པ་ལྟར་བྱས་ན་རུང་སྙམ། གུ༵་རུ་༵ཞེས་པ་ལྕི་བའི་དོན་དེ་ཐུགས་རྒྱུད་ཡོན་ཏན་གྱི་ཚོགས་ཀྱིས་གང་བས་གུ་རུ་ཞེས་པ་སྟེ། མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་བརྩོན་བཅས་ལྷག་པར་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བསྟེན། ཞེས་པ་ལྟར་རོ། །ཡང་ཆེད་དུ་བརྗོད་པའི་ཚོམས་ལས། སྲེད་པའི་ཟུག་རྔུ་གཅོད་མཛད་ཅིང༌། །ཐེ་ཚོམ་ཐམས་ཅད་སེལ་བ་ཡི། །ལམ་འདི་ཁྱོད་ལ་ངས་བསྟན་བྱ། །ཁྱོད་ཉིད་ཀྱིས་ནི་བསྒྲུབ་བྱ་སྟེ། །དེ་བཞིན་གཤེགས་པ་སྟོན་མཛད་ཡིན། །ཞེས་དང༌། དེའི་འགྲེལ་བར། ཐུབ་རྣམས་སྡིག་པ་ཆུ་ཡིས་བཀྲུ་བར་མི་མཛད་ཅིང༌། འགྲོ་བའི་སྡུག་བསྔལ་ཕྱག་གིས་ཀྱང་ནི་སེལ་མི་མཛད། །ཉིད་ཀྱི་རྟོགས་པ་གཞན་ལ་སྤོས་པ་མ་ཡིན་ཏེ། །ཆོས་ཉིད་ཞི་བ་བསྟན་པས་གྲོལ་བར་མཛད་པ་ཡིན། །ཞེས་མདོ་ལུང་དྲངས་ནས་གསུངས་པ་ལྟར། འཁོར་བ་ལས་ཐར་བའི་རྒྱུའི་གཙོ་བོ་དམ་པའི་ཆོས་བསྒྲུབ་པ་ཡིན་ལ། སངས་རྒྱས་འཇིག་རྟེན་བྱོན་པ་ཡང་གདུལ་བྱ་འདྲེན་པའི་ཕྱིར་ཏེ། འཕྲིན་ལས་ཀྱི་གཙོ་བོ་དམ་པའི་ཆོས་སྟོན་པ་ཡིན་པའི་ཕྱིར། རང་ལ་དངོས་སུ་ཆོས་སྟོན་པ་ལ་སོགས་པ་སངས་རྒྱས་ཀྱི་མཛད་པ་བསྒྲུབས་པས་ཤིན་ཏུ་བཀའ་དྲིན་ལྕི་བས་ན་གུ་རུ་སྟེ། དེ་སྔོན་གྱིས་བརྡ་རྙིང་དག་ལས་བླ་མ་ཞེས་འབྱུང་ཞིང༌། མཚན་བརྒྱ་ལས། བླ་མ་ཞེས་པ་སྟེ། གོང་མ་ཞེས་རང་བས་མཐོ་བར་བཟུང་བར་བྱ་བ་མཆོད་ཅིང་བཀུར་བའི་གནས་སོ། །བུ༵དྡྷ༵་ཞེས་པ་གཉིད་སངས་པ་དང༌། པད་འདབ་རྒྱས་པ་གཉིས་ཀ་ལ་འཇུག་ཀྱང༌། དོན་འགྱུར་དུ་གཉིས་ཀ་བསྡོམས་པས། སངས་རྒྱས་ཞེས་པ་སྟེ། ཇི་སྐད་དུ། མ་རིག་གཉིད་ལས་སངས་ཕྱིར་དང༌། །ཤེས་བྱ་ལ་ཡང་བློ་རྒྱས་ཕྱིར། །སངས་རྒྱས་པདྨ་ལྟར་སངས་རྒྱས། །དེ་ཕྱིར་སངས་རྒྱས་མཚན་གསོལ་ཏེ། །ཞེས་པ་དང༌། དཔལ་ལྡན་ཟླ་བ་གྲགས་པས། མ་རིག་གཉིད་ནི་རྒྱུན་ཆད་ཅིང༌། །ཡང་དག་ཡེ་ཤེས་ངེས་འབྱུང་བས། །གང་ཞིག་རྣམ་སད་དེ་སངས་རྒྱས། །སྐྱེས་བུ་གཉིད་སངས་ཇི་བཞིན་ནོ། །ཞེས་གསུངས་པ་ལྟར་རོ། །བོ༵་དྷི༵་ས༵་ཏྭ༵་ཞེས་པ་བྱང་ཆུབ་སེམས་དཔའ་ཞེས་པ་ཡིན་ཏེ། བྱང་ཆུབ་ནི། དོན་དམ་ཆོས་སྐུ་སྟེ་དེ་ཐོབ་པའི་ཆེད་དུ་སེམས་པས་ན་བྱང་ཆུབ་སེམས་དཔའ་ཞེས་ཤེར་འབྱུང་བློ་གྲོས་ཀྱིས་གསུངས་ཤིང༌། ཡང་མཐར་ཐུག་རྫོགས་བྱང་ནི་བྱང་ཆུབ་ཡིན་ལ། དེ་སེམས་ཤིང་སྒྲུབ་པ་ལ་དཔའ་བས་བྱང་ཆུབ་སེམས་དཔའ་ཞེས་པ་སོགས༌། རྒྱ་གར་མཁས་པས་བཤད་ཚུལ་མང་ངོ༌། །བྷྱོ༵་ནི་རྣམ་དབྱེ་བཞི་བའི་མང་ཚིག་རྣམས་ཞེས་པའོ། །ན༵་མོ༵་ཕྱག་འཚལ་པ། ན༵་མ༵་ཞེས་པ་མཆོད་པ་ཞེས་པ་ཡིན་ནོ། །གཉིས་པ་ནི། དོན་དམ་རྫོགས་པའི་སངས་རྒྱས་བཅོམ་ལྡན་འདས། །གཙང་བདག་བདེ་ཆེན་རྟག་པའི་མཐར་ཐུག་པ། །དེ་བཞིན་ཉིད་ལ་གུས་པས་ཕྱག་འཚལ་ནས། །དོན་དམ་རྫོགས་པའི་སངས་རྒྱས་ཞེས་པ་ནས་ཕྱག་འཚལ་ཞེས་པའི་བར་བྱུང༌། དེའི་ཚིག་དོན་ནི། དོ༵ན་ད༵མ་པའི་སྤངས་རྟོགས་ཡོངས་སུ་རྫོ༵གས་པ༵འི་སང༵ས་རྒྱས༵་བཅོ༵མ་ལྡ༵ན་འ༵དས་ཆོས་ཀྱི་སྐུ་དེ་ཉིད་གཙ༷ང་བའི་ཕ་རོལ་ཏུ་ཕྱིན་པ་དང༌། བད༵ག་དམ་པའི་ཕ་རོལ་ཏུ་ཕྱིན་པ་དང༌། བ༵དེ་བ་ཆེ༵ན་པོའི་ཕ་རོལ་ཏུ་ཕྱིན་པ་དང༌། རྟ༵ག་པ༵འི་ཕ་རོལ་ཏུ་ཕྱིན་པ་མཐ༵ར་ཐུ༵ག་པའི་རང་བཞིན་དུ་གྲུབ་པ༵་ཡིན་ཏེ། མདོ་ལས། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་ཉིད་ནི། རྟག་པའི་ཕ་རོལ་ཏུ་ཕྱིན་པ། བདེ་བའི་ཕ་རོལ་ཏུ་ཕྱིན་པ་ཞེས་སོགས་གསུངས་བའི་ཕྱིར། དེ་ལྟ་བུའི་གཙང་བདེ་རྟག་བདག་གི་ཕར་ཕྱིན་བཞི་ནི། ཕྱིན་ཅི་ལོག་བཞི་ལས་བཟློག་པའི་གཉེན་པོ་བཞིའི་བྲལ་འབྲས་ཡིན་ཏེ། རྒྱུད་བླ་མ་ལས། གཙང་བདག་བདེ་དང་རྟག་ཉིད་ཀྱི། །ཡོན་ཏན་ཕ་རོལ་ཕྱིན་པ་འབྲས། །སྡུག་བསྔལ་ཡིད་འབྱུང་ཞི་ཐོབ་པར། །འདུན་དང་སྨོན་པའི་ལས་ཅན་ནོ། །འདི་དག་འབྲས་ནི་མདོར་བསྡུས་ན། །ཆོས་ཀྱི་སྐུ་ལ་ཕྱིན་ཅི་ལོག །རྣམ་པ་བཞི་ལས་བཟློག་པ་ཡི། །གཉེན་པོའི་རབ་དུ་ཕྱེ་བ་ཉིད། །ཅེས་གསུངས་བའི་ཕྱིར། དེ་ཡང་རྒྱུ་གཉིས་གཉིས་ཀྱིས་འབྲས་བུུ་རེ་རེ་ཐོབ་སྟེ། རྒྱུད་བླ་མ་ལས། དེ་ནི་རང་བཞིན་དག་ཕྱིར་དང༌། །བག་ཆགས་སྤངས་ཕྱིར་གཙང་བ་ཡིན། །བདག་དང་བདག་མེད་སྤྲོས་པ་དག །ཉེ་བར་ཞི་བས་དམ་པའི་བདག །ཡིད་ཀྱི་རང་བཞིན་ཕུང་པོ་དང༌། །དེ་རྒྱུ་ལོག་ཕྱིར་བདེ་བ་ཉིད། །འཁོར་བ་དང་ནི་མྱ་ངན་འདས། །མཉམ་པ་ཉིད་དུ་རྟོགས་ཕྱིར་རྟག །ཞེས་གསུངས་པ་སོགས་རྒྱས་པར་རྒྱུད་བླ་རྩ་འགྲེལ་ལས་ཤེས་པར་བྱའོ། །དེ་འདྲའི་ཡོན་ཏན་དང་ལྡན་པའི་ཆོས་དབྱིངས་དེ༵་བཞི༵ན་ཉི༵ད་ལ༵་སྒོ་གསུམ་གུས༵་པས༵་ཕྱག༵་འཚ༵ལ་ཞེས་པས་མཐར་ཐུག་གི་སངས་རྒྱས་རང་བྱུང་དེ་བཞིན་ཉིད་ལ་མཆོད་པར་བརྗོད་པའོ། །