གསུམ་པ་དེ་ལ་རྩོད་སྤོང་ལ།
གསུམ་པ་དེ་ལ་རྩོད་སྤོང་ལ།
ཁ་ཅིག་ན་རེ། འདས་པའི་དངོས་པོ་ཡོད་པར་ཐལ། འདས་པའི་དུས་ཡོད་པའི་ཕྱིར་ན་མ་ཁྱབ། ཁོ་ན་རེ་ཁྱབ་པ་ཡོད་པར་ཐལ། དུས་ཡིན་ན་དངོས་པོ་ཡིན་དགོས་པའི་ཕྱིར་ན་མ་ཁྱབ། ཁ་ཅིག་ན་རེ། འདས་པའི་དུས་ཆོས་ཅན། འདས་པའི་དུས་མ་ཡིན་པར་ཐལ། ད་ལྟ་བའི་དུས་ཡིན་པའི་ཕྱིར། མ་གྲུབ་ན། འདས་པའི་དུས་ཆོས་ཅན། ད་ལྟ་བའི་དུས་ཡིན་པར་ཐལ། ད་ལྟ་བ་དང་དུས་གཉིས་ཀ་ཡིན་པའི་ཕྱིར་ན་མ་ཁྱབ། རྟགས་གྲུབ་སྟེ། དུས་ཡིན་པའི་ཕྱིར།ཁ་ཅིག་ན་རེ། འདས་པའི་སངས་རྒྱས་མེད་པར་ཐལ། སངས་རྒྱས་མར་མེ་མཛད་དེ་མ་ཡིན་པའི་ཕྱིར། མ་གྲུབ་ན། སངས་རྒྱས་མར་མེ་མཛད་ཆོས་ཅན། འདས་པའི་སངས་རྒྱས་མ་ཡིན་པར་ཐལ། ད་ལྟ་བའི་སངས་རྒྱས་ཡིན་པའི་ཕྱིར། མ་གྲུབ་ན། སངས་རྒྱས་མར་མེ་མཛད་ཆོས་ཅན། ད་ལྟ་བའི་སངས་རྒྱས་ཡིན་པར་ཐལ། ད་ལྟ་བ་དང་སངས་རྒྱས་གཉིས་ཀ་ཡིན་པའི་ཕྱིར་ན་མ་ཁྱབ། ད་ལྟར་གྱི་དུས་ལ་འདས་པའི་སངས་རྒྱས་ཡིན་པས་འདས་པའི་སངས་རྒྱས་ལ་བཞག་པའི་ཕྱིར། འོ་ན་འདས་པའི་དངོས་པོ་ཡོད་པར་ཐལ། ད་ལྟར་གྱི་དུས་ལ་འདས་པའི་དངོས་པོ་ཡོད་པའི་ཕྱིར་ན་མ་ཁྱབ་པ་ཡིན་ནོ།། །།