གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

གདམས་ངག་ལ་འདོམས་བྱེད་ཀྱི་རྗོད་བྱེད་དགོས་ན་ཉ་ཊཱིཀ་ལས། གཉིས་པ་དེ་སྨིན་ཅིང་དག་པར་བྱེད་པའི་གདམས་ངག་གི་མཚན་ཉིད། ཐེག་ཆེན་སེམས་བསྐྱེད་ཀྱིས་དོན་དུ་གཉེར་བའི་དོན་རྟོགས་ཤིང་ཐོབ་པའི་ཐབས་སངས་རྒྱས་ལ་སོགས་པས་འདོམས་པའི་ངག་གི་རིག་བྱེད་དམ། དེ་ལྟར་གདམས་པ་ལྟར་ཉམས་སུ་ལེན་པའི་བློ་གང་རུང་ངོ༌། །ཞེས་དང༌། བྱེད་པ་པོ་དང་ལས་ལ་ཡོད་པའི་གདམས་ངག་གཉིས་ཡོད་པས་ཕྱི་མ་ལེགས་སོ། །ཞིབ་པར་འཆད་ཚེ་རྟོགས་དགོས་སོ། །ཞེས་སོགས་ཀྱིས་གདམས་པ་ལྟར་ཉམས་སུ་ལེན་པའི་བློ་གདམས་ངག་ཏུ་གསུངས་པ་མ་ཡིན་ནམ་ཞེ་ན།མ་ཡིན་པར་སྣང་སྟེ། གདམས་ངག་གི་འབྲས་བུའི་ལམ་དང་བརྗོད་དོན་གྱི་ལམ་ལ་གདམས་ངག་ཅེས་བཏགས་ནས་བཤད་པའི་ཚུལ་ཞིག་ཡོད་པར་སྣང་སྟེ། སྔོན་མེད་ལེགས་བཤད་ལས། གདམས་ངག་ཅེས་བྱ་བ་དངོས་བསྟན་ལྟར་ན་འདོམས་པའི་ངག་ཚིག་ལ་ཟེར་ཡང་འབྲས་བུ་ལ་རྒྱུའི་མིང་གིས་བཏགས་ནས་དེའི་དངོས་ཀྱི་གྲུབ་འབྲས་སློབ་མའི་རྒྱུད་ལ་སྐྱེས་པ་ལ་བྱའོ། །ཞེས་གསུངས་སོ། །གདམས་ངག་ལ་གཟུགས་དང་ལྡན་མིན་གཉིས་ཡོད་པར་སྣང་སྟེ། གཞུང་ཤེར་ཕྱིན་ལ་གཟུགས་དང་ལྡན་མིན་གཉིས་ཡོད་པའི་ཕྱིར་ཏེ། སྔོན་མེད་ལེགས་བཤད་ལས། གཞུང་དེ་ཡང་རྣམ་པ་གསུམ་ཡོད་དེ། ཞེས་པ་ནས། གཞན་འཕགས་པ་དང་སོ་སོ་སྐྱེ་བོ་རྣམས་ཀྱི་ཡིད་ལ་སྒྲ་སྤྱིའི་རྣམ་པར་ཤར་བའི་མིང་ཚིག་ཡི་གེའི་ཚོགས་པ་ཐེག་ཆེན་གྱི་མདོ་སྡེ་ནི་གཞུང་གཉིས་པའོ། །དེ་དང་མཐུན་པར་ངག་ཏུ་བརྗོད་པའི་སྒྲ་ནི་གཞུང་ཤེར་ཕྱིན་གསུམ་པ་སྟེ། ཞེས་གསུངས་པ་དང༌། རང་ལུགས་ལ་ཐེག་མཆོག་དབུ་མར། དེ་ལ་བླ་དྭགས་ཚིག་སྤྱི་མིང་དུ་བརྗོད། །ཅེས་དང༌། ཐེག་མཆོག་ཊཱི་ཀ་ལས། མིང་ཚིག་ཡེ་གེ་ལ་སོགས་པ་ཡང་སྒྲ་སྤྱི་ཙམ་བློ་ལ་ཤར་བ་ལ་དེར་བཏགས་པའི་ཕྱིར། ཞེས་སོགས་སྐབས་དུ་མར་མིང་ཚིག་ཡི་གེ་ལྡན་མིན་ཡིན་པར་གསུངས་པ་རྣམས་ཀྱིས་གྲུབ་པའི་ཕྱིར་རོ། །གདམས་ངག་ལ་ཤེས་པ་ཡོད་མེད་ཅུང་ཟད་དཔྱད་རྒྱུ་ཡོད་དེ། གཞུང་ཤེར་ཕྱིན་ལ་དོན་དམ་པའི་གཞུང་ཤེར་ཕྱིན་ཡོད་པ་ལྟ་བུར་གསུངས་པ་དང༌། ཉ་ཊཱིཀ་ལས་གདམས་ངག་ལ་བློ་ཡོད་པའི་གསུངས་ཟིན་ཡོད་པའི་ཕྱིར་ཟེར་ན་དཔྱད་པར་བྱའོ། །ཡང་གདམས་ངག་ལ་ངག་ཞིག་དགོས་པར་ཐལ། སྔར་བཀོད་པའི་མདོ་ལུགས་མའི་ཐེག་ཆེན་གདམས་ངག་གི་མཚན་ཉིད་ཀྱི་ཟུར་ལ་ངག་ཅེས་སྦྱར་བ་དང་མདོ་སྡེ་རྒྱན་གྱི་རྣམ་བཤད་ཀྱི་སྐབས་སུ་གདམས་པ་དང་རྗེས་བསྟན་གྱི་དོན་བཞག་པའི་ཟུར་ལ་ངག་ཅེས་སྦྱར་བ་དང༌། དོན་བསྡུས་སྒྲོན་མེ་ལས། གདམས་ངག་རྣམ་པ་བཅུ་ཡིན་ཏེ། །ངོ་བོ་ངག་གི་འཁོར་ལོ་ཡིན། །ཞེས་གསུངས་པའི་ཕྱིར་ཟེར་ན། འདོད་མི་རིགས་པར་ཐལ། གདམས་ངག་ལ་སྐྱེས་བུའི་ལྕེ་རྐན་ལས་བྱུང་བས་མ་ཁྱབ་པའི་ཕྱིར། ཁྱབ་སྟེ། མཛོད་ལས། ངག་རྣམ་རིག་བྱེད་ནི་ངག་སྒྲ། །ཞེས་གསུངས་པའི་ཕྱིར་ཟེར་ན་དཔྱད། གཞན་ཡང་གདམས་ངག་ལ་ངག་གིས་ཁྱབ་ན། མི་རྟག་པ་ཞེས་བརྗོད་པའི་གདམས་ངག་ཆོས་ཅན། ཚིག་ཚོགས་པ་ཡིན་པར་ཐལ། ངག་ཡིན་པའི་ཕྱིར། ཁྱབ་སྟེ། ཉ་ཊཱིཀ་ལས། ཡི་གེ་དུ་མ་འདུས་པས་དོན་གྱི་ངོ་བོ་ཙམ་སྟོན་པའི་སྒྲ་མིང༌། དེ་དུ་མ་འདུས་པས་དོན་གྱི་ཁྱད་པར་ཙམ་སྟོན་པའི་ཚིག དེ་འདུས་པས་འཇུག་ལྡོག་བྱ་བའི་དོན་གཅིག་སྟོན་པས་ངག ཅེས་པ་ནས། བཅོམ་རལ་ལྟར་ལེགས་པར་གནས་སོ། །ཞེས་དང༌། གཏན་ཚིགས་རིགས་པའི་བསྡུས་དོན་ལས། ངག་གི་ཚོགས། ཞེས་པ་ནས། ཁྱད་པར་དུ་མའང་གཞི་དུ་མ་དང་སྦྱར་ཏེ་རྗོད་བྱེད་དུ་གྲུབ་པའོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །གདམས་ངག་ཡིན་ན་རང་གདམས་པ་པོས་གདམས་དོན་དེ་རྟོགས་པས་ཁྱབ་པར་ཐལ། ཉ་ཊཱིཀ་ལས། ཐེག་ཆེན་སེམས་བསྐྱེད་ཀྱིས་དོན་དུ་གཉེར་བའི་དོན་རྟོགས་ཤིང༌། ཞེས་སོགས་དང༌། ཇི་སྐད་དུ། རང་གི་ངེས་ནས་གཞན་དག་ལ། །ངེས་པར་བསྐྱེད་པར་འདོད་པ་ཡིན། །ཞེས་དང༌། གཞན་དོན་རྗེས་དཔག་གི་སྐབས་སུ་ཚད་མ་མདོ་ལས། རང་གི་མཐོང་དོན་རབ་གསལ་བྱེད། །ཞེས་གསུངས་པའི་ཕྱིར་རོ། །འདོད་ན། བསྟན་བཅོས་མངོན་རྟོགས་རྒྱན་གྱི་དོན་མ་རྟོགས་པའི་གང་ཟག་གི་ངག་ཏུ་གྱུར་པའི་བསྟན་བཅོས་མངོན་རྟོགས་རྒྱན་ཆོས་ཅན། གདམས་ངག་མ་ཡིན་པར་ཐལ། རང་གདམས་པ་པོའི་གདམས་དོན་མ་རྟོགས་པའི་ཕྱིར་ཏེ། ཆོས་ཅན་དེའི་ཕྱིར་ཟེར་ན་བརྟག་པར་བྱའོ། །གདམས་ངག་ཉན་པའི་རྟེན་ལ་ཚོགས་ལམ་ཆེན་པོ་ཆོས་རྒྱུན་གྱི་ཏིང་ངེ་འཛིན་ཐོབ་དགོས་པར་ཐལ། ཉ་ཊཱིཀ་ལས། རྒྱན་ལྟར་ན་སྟོན་པ་པོ་སངས་རྒྱས། ཉན་པ་པོ་ཆོས་མཆོག་པ་ལ་བཤད་སྦྱར་དུ་བཤད་ཅིང་འགྲེལ་ཆེན་ལས་ཚོགས་ལམ་པ་ལ་བཤད་དེ་ཚོགས་ལམ་ཆེན་པོ་ནས་སོ། །རྒྱུ་ཆོས་རྒྱུན་ཏིང་ངེ་འཛིན་ཏེ་དེའི་མཚན་ཉིད་བརྟགས་པའི་དངོས་པོ་ལ་སེམས་རྩེ་གཅིག་པ་གང་ཞིག དམ་པའི་ཆོས་འཛིན་པའི་དྲན་པ་དང་མཚུངས་པར་ལྡན་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ། དེ་ལྟར་གསུངས་པ་ནི་གདམས་ངག་རྒྱ་ཆེན་ཉན་པའི་རྟེན་ལ་དགོངས་པ་ཡིན་ཏེ། མདོ་སྡེ་རྒྱན་ལས། དེ་ཚེ་ཆོས་ཀྱི་རྒྱུན་ལ་ནི། །སངས་རྒྱས་རྣམས་ལ་ཞི་གནས་དང༌། །ཡེ་ཤེས་ཡངས་པ་ཐོབ་བྱའི་ཕྱིར། །གདམས་ངག་རྒྱ་ཆེན་རྙེད་པར་འགྱུར། །ཞེས་དང༌། དེའི་ཐད་ཀྱི་ས་འགྲེལ་ལས། ཚོགས་ལམ་ཆེན་པོ་ཐོབ་པ་དེའི་ཚེ། ཆོས་ཀྱི་རྒྱུན་གྱི་ཏིང་འཛིན་སྐྱེས་པ་ལ་ཞེས་སོགས་གསུངས་པའི་ཕྱིར་ཟེར་ན། དེ་མི་འཐད་པར་ཐལ། ཆོས་རྒྱུན་གྱི་ཏིང་ངེ་འཛིན་ས་གསུམ་པ་ནས་གསར་དུ་ཐོབ་དགོས་པའི་ཕྱིར་ཏེ། འཕགས་པ་ཐོགས་མེད་ཀྱིས་བྱམས་པ་ལོ་བཅུ་གཉིས་སུ་བསྒྲུབས་ནས་གསར་དུ་ཆོས་རྒྱུན་གྱི་ཏིང་ངེ་འཛིན་ཐོབ་པའི་ཕྱིར། དེར་ཐལ། རྒྱ་གར་ཆོས་འབྱུང་ལས། དུས་དེ་ཉིད་དུ་སློབ་དཔོན་གྱིས་ཆོས་རྒྱུན་གྱི་ཏིང་ངེ་འཛིན་ཐོབ། ཅེས་གསུངས་པའི་ཕྱིར་ཞེ་ན་དཔྱད། ཡང་གདམས་ངག་ཉན་པ་ལ་སེམས་བསྐྱེད་རྒྱུད་ལ་སྐྱེ་དགོས་པར་ཐལ། མདོ་ལུགས་མ་ལས། གདུལ་བྱའི་གང་ཟག་ནི་སེམས་དང་པོ་བསྐྱེད་པ་ནས་བཟུང་པའི་བྱང་ཆུབ་སེམས་དཔའ་རྣམས་སོ། །ཞེས་དང༌། ཉ་ཊཱིཀ་ལས། སེམས་བསྐྱེད་ནས་གདམས་ངག་ཉན་དགོས་ཤིང༌། ཞེས་གསུངས་པའི་ཕྱིར་ཟེར་ན། འོ་ན་ལམ་མ་ཞུགས་ན་ཐེག་ཆེན་གདམས་ངག་ཉན་པ་མེད་པར་ཐལ་ལོ། །ཞེས་ཟེར་ན་བརྟག་དགོས་སོ། །ངག་ཏུ་མ་ཐོན་པའི་ཐུགས་ཡུལ་ལ་ཡོད་པའི་བསྟན་བཅོས་ཆོས་ཅན། གདམས་ངག་ཡིན་པར་ཐལ། བསྟན་བཅོས་རྣམ་དག་ཡིན་པའི་ཕྱིར། མ་གྲུབ་ན། དེར་ཐལ། དེ་འདྲ་ཡོད་པའི་ཕྱིར་ཏེ། སྤྱོད་འཇུག་ལས། རང་གི་ཡིད་ལ་བསྒོམ་ཕྱིར་ངས་འདི་བརྩམས། །ཞེས་དང༌། དེའི་ཐད་ཀྱི་སྤྱོད་འཇུག་ས་འགྲེལ་ལས། ངས་གཞུང་འདི་བརྩམས་ཞེས་ཐུགས་ཡུལ་ལ་བརྩམས་ཟིན་པའོ། །ཞེས་པས་སོ། །གོང་དུ་འདོད་ན་དེ་གདམས་ཡུལ་དང་དེ་ཐོས་བསམ་བྱས་པའི་གང་ཟག་ཡོད་མེད་དཔྱད་དོ། །རང་རྒྱལ་གྱི་ལུས་ཀྱི་རྣམ་འགྱུར་གྱིས་གདམས་ངག་བསྟན་མ་བསྟན་བརྟག་པར་བྱའོ། །