རྩ་བའི་ས་བཅད་གཉིས་པ་ས་བཤད་པ།
རྩ་བའི་ས་བཅད་གཉིས་པ་ས་བཤད་པ་ལ།
ཡོན་ཏན་དུ་མའི་རྟེན་དུ་གྱུར་བའི་མངོན་རྟོགས་དེ། ས་ལམ་གཉིས་སུ་ཕྱེ་བའི་སའི་མཚན་ཉིད། མཚན་གཞི་ནི། ཚོགས་ལམ་ལྟ་བུའོ། །དེ་ལ་དབྱེ་ན་ཐེག་པ་གསུམ་གྱི་ས་གསུམ་ཡོད། ཡང་བསམ་གཏན་ས་དྲུག་ཡོད་དེ། བསམ་གཏན་དང་ཉེར་་བསྡོགས་མི་ལྕོགས་མེད་དང༌། དང་བོའི་དངོས་གཞི་ཙམ་པོ་བ་དང་ཁྱད་པར་གྱི་དངོས་གཞི། གཉིས་པའི་དངོས་གཞི། གསུམ་པའི་དངོས་གཞི། བཞི་བའི་དངོས་གཞི་རྣམས་སོ། །ཁམས་གསུམ་ས་དགུ་ནི་འདོད་སེམས་དང་བསམ་གཏན་བཞི་དང་གཟུགས་མེད་བཞིའོ། །ཟག་མེད་ས་དགུ་ཡོད་དེ། ཟག་མེད་ཀྱི་བསམ་གཏན་ས་དྲུག་དང༌། གཟུགས་མེད་དང་བོ་གསུམ་གྱིདངོས་གཞི་ཟག་མེད་རྣམས་སོ། །ངེས་ཚིག་ནི་འཇིག་རྟེན་ན་སའི་རྒྱུ་བ་སེམས་ཅན་དང་མི་རྒྱུ་བ་རྩི་ཤིང་ནགས་ཚལ་གྱི་རྟེན་བྱེད་པ་བཞིན་དུ་ཡོན་ཏན་ཐམས་ཅད་སྐྱེ་བའི་རྟེན་བྱེད་པས་ན་ས་ཞེས་བྱའོ། །ས་ལམ་གཉིས་སུ་ཕྱེ་བའི་ས་ནི་ས་བཏགས་བ་ཡིན་ལ། ས་མཚན་ཉིད་པ་ནི་འབྱུང་བ་བཞིའི་ནང་ཚན་དུ་གྱུར་བའི་ས་ཡིན་ལ། དེའི་མཚན་ཉིད་ནི་སྲ་ཞིང་འཐས་པའི་འབྱུང་བ་དེའོ། །གཞན་ཡང་ཐེག་དམན་གྱི་ས་དང་ཐེག་ཆེན་གྱི་ས་དང་གཉིས་ཡོད། ཐེག་དམན་གྱི་ས་ལ་དམན་པ་ས་བརྒྱད་ཡོད་དེ། དཀར་བོ་རྣམ་པར་མཐོང་བའི་ས། རིགས་ཀྱི་ས། བརྒྱད་པའི་ས། མཐོང་བའི་ས། བསྲབས་པའི་ས། འདོད་ཆགས་དང་བྲལ་བའི་ས། བྱས་པ་རྟོགས་པའི་ས། རང་སངས་རྒྱས་ཀྱི་ས་དང་བརྒྱད་ཡོད་པའི་ཕྱིར་རོ། །ཐེག་ཆེན་གྱི་ས་ལ། བྱང་སེམས་སོ་སྐྱེས་ཀྱི་ས་དང་ཐེག་ཆེན་འཕགས་པའི་ས་དང་གཉིས་ཡོད། དང་པོ་ལ་རང་ཡིན་གྱི་ཚོགས་ཀྱི་ས་དང་སྦྱོར་ལམ་གྱི་ས་དང་གཉིས། ཐེག་ཆེན་གྱི་འཕགས་པའི་སའི་མཚན་ཉིད་ནི། ཐེག་ཆེན་འཕགས་པའི་སྙིང་རྗེ་ཆེན་པོ་སོགས་ཀྱིས་ཟིན་པའི་ཟག་མེད་ཡེ་ཤེས་གང་ཞིག ཐེག་ཆེན་གྱི་སྤངས་རྟོགས་ཡོན་ཏན་གྱི་རྟེན་དུ་གྱུར་པའོ། །དེ་ལ་དབྱེ་ན་བྱང་འཕགས་ཀྱི་ས་དང་སངས་རྒྱས་ཀྱི་ས་དང་གཉིས།