བཅུ་བཞི་པ་རང་རྒྱལ་ཀྱིས་ཆོས་སྟོན་ཚུལ་དང་རང་རྒྱལ་གསུམ་གྱིས་ཚོགས་བསགས་ཚུལ་ཀྱི་ཁྱད་པར་ཡོད་དམ་ཅི་ཞེས་པའི་ལན།
བཅུ་བཞི་པ་རང་རྒྱལ་ཀྱིས་ཆོས་སྟོན་ཚུལ་དང་རང་རྒྱལ་གསུམ་གྱིས་ཚོགས་བསགས་ཚུལ་ཀྱི་ཁྱད་པར་ཡོད་དམ་ཅི་ཞེས་པའི་ལན།
རང་རྒྱལ་ཀྱིས་ཆོས་སྟོན་ཚུལ་དང་རང་རྒྱལ་གསུམ་གྱིས་ཚོགས་བསགས་ཚུལ་ཀྱི་ཁྱད་པར་ཡོད་དམ་ཅི་ཞེས་པའོ། །གཉིས་པ་ལན་ནི། ཡང་རང་རྒྱལ་དགྲ་བཅོམ་པ་དག་གིས་ངག་གིས་ཆོས་མི་སྟོན་པར་ལུས་ཀྱིས་ཆོས་སྟོན་པ་ཡིན་པར་ཐལ། ཉ་ཊཱིཀ་ལས། རང་སངས་རྒྱས་དགྲ་བཅོམ་དེ་དག་ནི་ཆོས་ཅན། ཁྱོད་ཀྱིས་ངག་གི་སྒྲར་བརྗོད་པའི་ཆོས་སྟོན་པའི་ཚིག་གི་འབྲས་རྟགས་ལས་དེ་དག་གི་ཡེ་ཤེས་མི་རྟོགས་ཏེ། ངག་གི་སྒྲ་མེད་ལུས་ཀྱིས་ཆོས་སྟོན་པ་དེའི་ཕྱིར། རྟགས་གྲུབ་སྟེ། རང་རྒྱལ་དགྲ་བཅོམ་རང་གིས་ཐོབ་པའི་བདག་མེད་ཕྱེད་དང་གཉིས་རྟོགས་པའི་ཡེ་ཤེས་དང་སྔར་བཤད་སྨོན་ལམ་ལ་སོགས་པའི་མཐུས་ངག་གི་སྒྲ་མེད་པའི་ལུས་ཀྱིས་ཆོས་བསྟན་ནས་གདུལ་བྱ་གཞན་དག་དགེ་བ་བཅུ་དང་ཐོས་བསམ་བསྒོམ་པ་ལ་སོགས་པ་ལ་འཇུག་པར་བྱེད་པ་དེའི་ཕྱིར། རང་རྒྱལ་གྱིས་ཆོས་བསྟན་པས་དྲོད་ཡན་གྱི་རྟོགས་པ་བསྐྱེད་མི་སྲིད་པར་མྱང་འདས་ཆེན་པོར་གསུངས་སོ། །ཞེས་དང༌། མ་དག་པའི་རྟོག་དཔྱོད་ཀྱིས་ཀུན་ནས་བསླང་ནས་ཚིག་བརྗོད་པ་ནི་རྣམ་གཡེང་ཡིན་ལ། དེ་ཡང་ཏིང་ངེ་འཛིན་ཅན་གྱི་སེམས་རྒྱུད་འཁྲུག་པར་བྱེད་པ་ཡིན་པས་ཏིང་ངེ་འཛིན་གྱི་གེགས་ཡིན་པའི་ཕྱིར་རོ། །ཞེས་གསུངས་པའི་ཕྱིར། འདོད་མི་ནུས་ཏེ། རང་རྒྱལ་དེ་དག་གི་ངག་གིས་ཆོས་བསྟན་ན་ཀུན་སློང་ལ་རྟོག་དཔྱོད་ཀྱི་གཡེང་བ་འགྲོ་དགོས་པ་ལྟར་ལུས་ཀྱིས་ཆོས་བསྟན་ན་ཡང་དེ་སྔོན་དུ་འགྲོ་དགོས་པ་གང་ཞིག་མདོ་ལུགས་མ་ལས་ཀྱང་ལུས་ཀྱིས་ཆོས་སྟོན་པར་མ་གསུངས་པའི་ཕྱིར། དང་པོ་གྲུབ་སྟེ། མཛོད་ལས། རྟོག་དང་དཔྱོད་དང་བཅས་པ་ནི། །རྣམ་པར་ཤེས་པའི་ཁམས་ལྔ་ཡིན། །ཞེས་གསུངས་པའི་ཕྱིར། རྟགས་ཕྱི་མ་གྲུབ་སྟེ། མདོ་ལུགས་མ་ལས། དྲན་པ་ཉེར་བཞག་ལ་སོགས་བ་གང་དང་གང་ཡིན་པའི་ཆོས་ཀྱི་དོན་ནི། རྨི་ལམ་བཞིན་དུ་སྟོན་པ་པོ་སྣང་བའི་གང་ཟག་གང་དང་གང་ལ། དཔེ་ཇི་ལྟ་ཇི་ལྟ་བུར་ཉན་པ་པོའི་གང་ཟག་ཏུ་འདོད་པར་བྱ་བ་ནི། སྟོན་པ་པོར་སྣང་བའི་གང་ཟག་དེ་དང་དེ་ལ་ཆོས་ཀྱི་དོན་དེ་དང༌། དེ་སྟོན་པའི་སྒྲའི་དངོས་པོ་མེད་ཀྱང་སྟོན་པ་དང་ཉན་པར་སྣང་པ་དེ་སྒྱུ་མའི་སྐྱེས་བུ་དང་སྤྲུལ་པ་དེ་ལྟ་བུར་བསེ་རུ་ལྟ་བུའི་ཡེ་ཤེས་ལ་སྣང་བའི་ཚུལ་གྱིས་རྟོགས་སོ། །ཞེས་པ་ལས་ལུས་ཀྱིས་བསྟན་པར་མ་བཤད་པའི་ཕྱིར་ཟེར་ན་དཔྱད་པར་བྱའོ། །རང་རྒྱལ་གསུམ་ལས་བསེ་རུ་རང་རྒྱལ་གྱིས་བསྐལ་བ་བརྒྱར་ཚོགས་བསགས་པ་ལས་གཞན་གཉིས་ཀྱིས་བསྐལ་བ་བརྒྱར་ཚོགས་བསགས་མི་དགོས་པ་མི་རིགས་ཏེ། དེ་གསུམ་གས་བསྐལ་བ་བརྒྱར་ཚོགས་བསགས་དགོས་པའི་ཕྱིར། དེར་ཐལ། ཉ་ཊཱིཀ་ལས། དེ་གསུམ་ཅར་ཡང་བསྐལ་བ་བརྒྱར་ཚོགས་བསགས་དགོས་ཏེ། མདོ་དྲིན་ལན་བསབ་པར། རང་སངས་རྒྱས་རྣམས་ནི་བསྐལ་བ་ཆེན་པོ་བརྒྱས་ཚར་ཕྱིན་པར་འགྱུར་རོ། །ཞེས་ཏེ། བར་བསྐལ་བརྒྱད་བཅུ་ལ་བསྐལ་བ་ཆེན་པོར་མཛོད་དུ་བཤད་ལ། བསེ་རུ་བསྐལ་བ་བརྒྱ་ཡི་རྒྱུས། །ཞེས་སོ། །ཆོས་བཤེས་ཀྱིས་ཀྱང༌། སྔོན་ཞེས་བྱ་བ་ནི་བསྐལ་བ་བརྒྱའི་བར་དུ་སྟེ། ཞེས་སོ། །ས་སྡེའི་རང་སངས་རྒྱས་ཀྱི་སར། བསྐལ་བ་བརྒྱར་སངས་རྒྱས་འབྱུང་བ་མཉེས་པར་བྱེད་པ། ཞེས་དང༌། རང་སངས་རྒྱས་ཀྱི་ལམ་དང་པོ་བསྐལ་བ་བརྒྱ་ཚང་བར་ཚོགས་བསགས་ནས་བསྐལ་བ་བརྒྱ་འདས་པའི་འོག་ཏུ་སངས་རྒྱས་འབྱུང་བ་མེད་པ་ན་སློབ་དཔོན་མེད་པར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་བསྒོམས། རང་བྱང་ཆུབ་མངོན་པར་རྫོགས་པར་སངས་རྒྱས་ཏེ་ཉོན་མོངས་པ་ཐམས་ཅད་སྤོང་བའི་དགྲ་བཅོམ་པ་ཉིད་མངོན་དུ་བྱེད་དོ། །ཞེས་ཏེ། གསུམ་ག་འདྲ་བར་བཤད་དོ། །ཞེས་གསུངས་པའི་ཕྱིར་ཟེར་ན་ཅུང་ཟད་བརྟག་པར་བྱ་བ་འདི་ཡོད་དེ། ཉ་ཊཱིཀ་དགེ་འདུན་ཉི་ཤུའི་སྐབས་སུ། འདི་སངས་རྒྱས་དང་མ་ཕྲད་ན་རང་རྒྱལ་དགྲ་བཅོམ་ཚོགས་སྤྱོད་དུ་འགྱུར་བར་སློབ་དཔོན་ཐོགས་མེད་ཀྱིས་དགོངས་འགྲེལ་འགྲེལ་བར་གསུངས་སོ། །ཞེས་དང༌། ཀུན་བཏུས་སུ། ཅིག་ཅར་ངེས་པར་འབྱིན་པ་ནི་གང་བདེན་པ་རྣམས་མངོན་པར་རྟོགས་པར་བྱས་ནས་མི་ལྕོགས་པ་མེད་པ་ལ་བརྟེན་ཏེ། འཇིག་རྟེན་ལས་འདས་པའི་ལམ་གྱིས་ཁམས་གསུམ་ན་སྤྱོད་པའི་ཉོན་མོངས་པ་རྣམས་རྣམ་པས་གཅིག་ཅར་སྤོང་སྟེ། འདི་ནི་རྒྱུན་དུ་ཞུགས་པའི་འབྲས་བུ་དང་དགྲ་བཅོམ་པའི་འབྲས་བུ་སྟེ་འབྲས་བུ་གཉིས་ལ་གདགས་སོ། །ཕལ་ཆེར་ནི་མཐོང་བའི་ཆོས་སམ། འཆི་བའི་ཚེ་ཀུན་ཤེས་པ་ཐོབ་པར་བྱེད་དོ། །གལ་ཏེ་མི་བྱེད་ན་ཡང་དེ་སྨོན་ལམ་གྱི་སྟོབས་ཅན་ཡིན་ཏེ། སྨོན་ལམ་གྱི་དབང་གིས་འདོད་པའི་ཁམས་ཉིད་དུ་སྐྱེས་ཏེ། སངས་རྒྱས་འབྱུང་བ་མེད་པ་ན་རང་རྒྱལ་ཚོགས་སྤྱོད་པར་འགྱུར་རོ། །ཞེས་སོགས་ཀྱིས་རྒྱུན་ཞུགས་སྲིད་པ་ལན་བདུན་པ་དང་ཅིག་ཆར་བ་སོགས་སྲིད་པ་ཐ་མའི་ཚེ་སློབ་དཔོན་གཞན་དང་མ་ཕྲད་ན་རང་རྒྱལ་གྱི་བྱང་ཆུབ་མངོན་དུ་བྱེད་པར་གསུངས་པ་དང་འགལ་བས་སོ་ཞེ་ན་དཔྱད།