བཞི་བ་བརྩོན་འགྲུས་ཀྱི་མི་མཐུན་ཕྱོགས་ལ།
བཞི་བ་བརྩོན་འགྲུས་ཀྱི་མི་མཐུན་ཕྱོགས་ལ།
༢༡ ཁྲུས་སོགས་རིམ་གྲོ་དང༌། ལས་སུ་མི་བསྐོ་བ་སོགས་བསྙེན་བཀུར། རྫས་འབུལ་དུ་རེ་བ་སོགས་ཟང་ཟིང་གི་སེམས་ཀྱིས་འཁོར་སྡུད་ན་བསྙེན་བཀུར་འདོད་ཕྱིར་འཁོར་བསྡུ་བའི་ཉེས་བྱས་ཉོན་མོངས་ཅན་ནོ། །ཟང་ཟིང་མེད་པའི་བསམ་པས་བསྡུས་ཏེ་རིམ་གྲོ་སོགས་བྱུང་ན་ཉེས་མེད་དོ། །༢༢ སྙོམས་ལས་དང་ལེ་ལོའི་དབང་གིས་ཉིན་མོ་དང་མཚན་གྱི་གུང་ཐུན་མ་གཏོགས་ནམ་ཆ་སྟོད་སྨད་ལ་གཉིད་ཀྱི་བདེ་བ་དང་གློས་འབེབས་པ་དང་མལ་དུ་ཉལ་བའི་བདེ་བ་སོགས་དང་དུ་ལེན་ཅིང་སེལ་བར་མི་བྱེད་ན་ལེ་ལོ་ལ་སོགས་མི་སེལ་བའི་ཉེས་བྱས་ཉོན་མོངས་ཅན་ནོ། །ཉེས་མེད་ན་སྟེ་མི་ནུས་པ། ལམ་གྱིས་དུབ་པ། དེ་སྤང་བའི་འདུན་པ་བསྐྱེད་པ་གསུམ། ༢༣ རྒྱལ་བློན་ཆོམ་རྐུན་བུད་མེད་འདོད་པ་ལ་སོགས་པའི་འདུ་འཛིའི་གཏམ་ལ། ཆགས་སེམས་དང་བརྗེད་པ་གང་རུང་གིས་ཉན་པ་དང་སྨྲ་བ་གང་རུང་གིས་དུས་ཡོལ་བ་སྔ་དྲོ་ལས་ཕྱི་དྲོ་དང་དེ་ལས་སྲོད་ཐལ་བ་སོགས་བྱེད་ན་ཆགས་པས་བྲེ་མོའི་གཏམ་ལ་བརྟེན་པའི་ཉེས་བྱས། ཉེས་མེད་དྲན་པ་ལ་གནས་བཞིན་དུ་ཕ་རོལ་པོའི་ངོར་སྐད་ཅིག་ཙམ་དང༌། མཚར་གཏམ་འདྲི་བ་དང་ཉན་པ་ཙམ་མོ། །འདི་གསུམ་ནི་བརྩོན་འགྲུས་ཀྱི་མི་མཐུན་ཕྱོགས་སོ། །