མདོར་བསྡུས་ཀྱི་ལྟུང་བ་སྡེ་ལྔ།

མདོར་བསྡུས་ཀྱི་ལྟུང་བ་སྡེ་ལྔ་ནི།

དགེ་སློང་གནས་ནས་བྱུང་བ་དགེ་སློང་མས་ཕྱག་མི་བྱ་བའི་སྡོམ་པ་བྱིན་པ་ལ་དགེ་སློང་མ་ཞིག་གིས་ཤེས་བཞིན་དུ་ཆོས་དང་ཟང་ཟིང་ལྷན་ཅིག་སྤྱད་པ་ལ་མའི་དགེ་འདུན་གྱིས་བཟློག་པ་ལྔས་བཟློག་ཀྱང་མ་བཏང་ན་ཕམ་པ་ཡིན་ཏེ། ལུང་ལས་ཕྱག་མི་བྱ་བའི་སྡོམ་པ་བྱིན་པ་བཟོད་པ་གསོལ་བར་ངེས་པ་ལ་དགེ་སློང་མ་ཞིག་གིས་བཟོད་པ་མ་གསོལ་ཞེས་སྨྲས་པ་མའི་དགེ་འདུན་གྱི་བཟློག་པ་ལྔས་བཟློག་ཀྱང་མ་བཏང་ན་ཕམ་པ་ཡིན་པར་དངོས་སུ་གསུངས་པ་དང་དགག་བྱ་དང་རིགས་འདྲ་བའི་ཕྱིར་ཏེ། མཚོ་ཊཱིཀ་ལས། བཟོད་པ་གསོལ་བར་ངེས་པ་དང༌། དེ་ལས་བཟློག་པ་ཉིད་དོ། །ཞེས་པ་གླེང་གཞིའི་དབང་གིས་མཚོན་པ་ཙམ་སྟེ། ཆོས་དང་ཟང་ཟིང་གིས་ལོངས་སྤྱོད་བྱེད་ན་ཡང་ངོ༌། །ཞེས་གསུངས་པའི་ཕྱིར། ཞེས་སོ། །ལྷག་མའི་ལྟུང་བ་ལ་མདོར་བསྡུས་གང་ཞེ་ན། རང་ལ་བསྐྲད་པ་ནན་ཏུར་ཚུལ་བཞིན་བྱས་པའི་དགེ་འདུན་ལ་འགྲོ་བ་བཞིས་སྐུར་བ་འདེབས་པ་བཟློག་པ་ལྔས་བཟློག་ཀྱང་མ་བཏང་ན་ལྷག་མ་འབྱུང་བར་དངོས་བཅས་ལས་བཤད་པས། བསྡིགས་པ་ནན་ཏུར་དང༌། སྨད་པ་ནན་ཏུར་དང༌། ཕྱིར་འགྱེད་ནན་ཏུར་གསུམ་ཅི་རིགས་ཚུལ་བཞིན་དུ་བྱས་པའི་དགེ་འདུན་ལ་སྐུར་བ་འདེབས་པ་བཟློག་པ་ལྔས་བཟློག་ཀྱང་མི་གཏོང་ན་ལྷག་མ་འབྱུང་བ་མདོར་བསྡུས་ཡིན་ནོ། །བལ་ནག་པོ་དཀོན་པའི་ས་ཕྱོགས་སུ་བལ་ནག་འབའ་ཞིག་གིས་སྟན་བྱས་པས་སྤང་ལྟུང་དང་མཐུན་པར། བལ་དཀར་བོ་དཀོན་པའི་ས་ཕྱོགས་སུ་དཀར་བོ་འབའ་ཞིག་གིས་སྟན་བྱེད་པའི་སྤང་ལྟུང་ལྟ་བུ་མདོར་བསྡུས་ཀྱི་སྤང་ལྟུང་དང༌། ས་རྐོ་བའི་ལྟུང་བྱེད་དངོས་སུ་བཅས་པ་ལས། བྱེ་མ་སྲོག་ཆགས་ཅན་རྐོ་བའི་ལྟུང་བྱེད་ལྟ་བུ་མདོར་བསྡུས་ཀྱི་ལྟུང་བྱེད་འབའ་ཞིག་པ་དང༌། རྩ་བར་དངོས་སུ་གསུངས་པའི་ཞོ་དང་མར་དང་ཞུན་མར་དང་འབྲུ་མར་དང་སྦྲང་རྩི་དང་བུ་རམ་གྱི་དབུ་བ་དང་ཉ་ཤ་དང་ཤ་དང་ཤ་སྐམ་རྣམས་ཀྱང་ངོ༌། །ཞེས་གསུངས་པ་ལྟར་གྱི་དགུ་སྔར་གསུངས་པའི་འོ་མ་དང་བཅུར་མ་འདུས་པའི་ཟས་བསོད་པ་རོ་བརྒྱ་བ་ལྟ་བུ་དགེ་སློང་བས་བསླང་ན་སོར་བཤགས་ཀྱི་མདོར་བསྡུས་དང༌། དགེ་ཚུལ་གྱི་གསོ་སྦྱོང་མ་བྱས་པ་ལྟ་བུ་མདོར་བསྡུས་ཀྱི་ཉེས་བྱས་ཡིན་པར་གསུངས་པ་ཡོད་དོ། །