རེ་བཞི་བ་ཆུ་ལ་རྩེ་བའི་ལྟུང་བྱེད་འཆད་པ།

རེ་བཞི་བ་ཆུ་ལ་རྩེ་བའི་ལྟུང་བྱེད་འཆད་པ་ལ།

རྩ་བར། ཆུའི་ཡུལ་ལ་རྩེ་བ་རྗེས་སུསྒྲུབ་ནའོ། །ཞེས་སོགས་བྱུང༌། འདིའི་དོན་ལ་བཞི་ལས། དང་པོ་གླེང་གཞི་ནི་མཉན་ཡོད་དུབཅུ་བདུན་སྡེས་ཆུ་ལ་རྩེ་བ་ལས་ལྟུང་བྱེད་དུ་བཅས་སོ། །གཉིས་པ་དགག་བྱ་ནི་རྒོད་བག་ལཆགས་པ་འཕེལ་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་འཇིག་རྟེན་ལ་གྲགས་པའིཆུ་ལྟེ་བ་ནུབ་པའི་ཚད་དུ་ཆོག་པ་ལ་རྩེའམ་རྩེར་འཇུག་པ་ལས་གྱུར་པའི་ལྟུང་བ་དངོས་གཞིའོ། །

བཞི་བ་ཡན་ལག་ལ་བཞི་ལས། དང་པོ་གཞིའི་ཡན་ལག་ལ། འཇིག་རྟེན་ལ་གྲགས་པའི་ཆུ་ཡིནཔ་དང༌། ལྟེ་བ་ནུབ་པའི་ཚད་དུ་ཆོག་པ་དང་གཉིས་ཡོད་དེ། ཊཱི་ཀ་ལས། ཆུའི་ནང་དུ་ལྟེ་བ་མནཆད་ཙམ་ནུབ་པར་ཞུགས་ཤིང༌། ཞེས་གསུངས་པས་སོ། །གཉིས་པ་བསམ་པའི་ཡན་ལག་ལགཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རྒོད་པས་དགའ་བ་ཉམས་སུམྱོང་བར་བྱ་བའི་འདུན་པས་རྩེ་བར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་རང་ངམབསྐོས་པས་རྩེ་བར་ཞུགས་པའོ། །བཞི་བ་མཐར་ཐུག་ནི་རྩེ་བ་རྫོགས་པའོ། །

རེ་ལྔ་བ་བུད་མེད་དང་ལྷན་ཅིག་ཉལ་བའི་ལྟུང་བྱེད་འཆད་པ་ལ། རྩ་བར། བུད་མེདདང་ལྷན་གཅིག་གནས་གཅིག་ཏུ་གཉིད་ལོག་ནའོ། །ཞེས་སོགས་བྱུང༌། འདིའི་དོན་ལ་བཞི་ལས།

དང་པོ་གླེང་གཞི་ནི་སངས་རྒྱས་མཉན་ཡོད་ན་བཞུགས་ཚེ་མ་འགགས་པ་ལྗོངས་གྱུར་སོང་སྟེ། རི་བྲག་གི་གྲོང་དུ་བུད་མེད་དང་གནས་གཅིག་ཏུ་ཉལ་བ་ལས་ལྟུང་བྱེད་དུ་བཅས་སོ། །གཉིསཔ་དགག་བྱ་ནི་ཆགས་པའི་རྒྱུར་འགྱུར་བའོ། །གསུམ་པ་ངོ་བོ་ནི་བཅས་ལྡན་དགེ་སློང་གིས་བུདམེད་དང་གནས་གཅིག་ཏུ་གཉིས་ཀ་ཉལ་བའི་སྤྱོད་ལམ་གྱིས་གཉིད་ལོག་ཅིང་མཚན་མོ་འདསཔ་ལས་གྱུར་པའི་ལྟུང་བ་དངོས་གཞིའོ། །

བཞི་བ་ཡན་ལག་ལ་བཞི་ལས། གཞིའི་ཡན་ལག་ལ།

གང་དང་ཉལ་བའི་ཡུལ་དང༌། གང་དུ་ཉལ་བའི་གནས་དང༌། གང་གི་ཚེ་ཉལ་བའི་དུས་དང༌། གང་གིས་ཉལ་བའི་རྟེན་དང་བཞི། །དང་པོ་ནི་སྔར་འཁྲིག་ཚིག་གི་སྐབས་སུ་བཤད་པའི་བུད་མེད་ཆོས་ལྔ་ལྡན་གྱི་སྟེང་དུ་བསྲུང་མ་དང་མི་ལྡན་པའོ། །གཉིས་པ་ནི་གནས་ཆོས་གསུམ་ལྡནཏེ། གཞན་ནི་སྔར་ནུབ་ལྷག་གི་སྐབས་དང་འདྲ་བ་ལས། བྱ་གག་འཕུར་ནས་བབས་པའི་ལམ་ནིབར་དུ་ཆོད་པར་གྱུར་པ་ཉིད་ཡིན་ནོ་ཞེས་གསུངས་པ་ནི་འདིར་ཁྱད་པར་རོ། །གསུམ་པ་ནི་དུསམཚན་མོ་ཡིན་པའོ། །བཞི་པ་ནི་རྟེན་ཁྲིམས་གྲོགས་དང་མི་ལྡན་པ་སྟེ། ལྟུང་བ་འབྱིན་པར་བྱེདཔ་དགེ་སློང་གིས་བསྲུངས་པ་ཉིད་དང༌། ཞེས་གསུངས་པས་སོ། །གཉིས་པ་བསམ་པའི་ཡནལག་ལ་གཉིས་ལས། འདུ་ཤེས་ནི་གཞི་ལ་མ་འཁྲུལ་བའོ། །ཀུན་སློང་ནི་རང་གར་བུད་མེད་དངལྷན་ཅིག་གནས་གཅིག་ཏུ་ཉལ་བར་འདོད་པ་རྒྱུན་མ་ཆད་པའོ། །གསུམ་པ་སྦྱོར་བ་ནི་ཉལ་ཞིངགཉིད་ལོག་པའོ། །བཞི་བ་མཐར་ཐུག་ནི་མཚན་མོའི་མཐའི་སྐད་ཅིག་སྟེ། མཐར་རོ། །ཞེསགསུངས་སོ། ། དགེ་སློང་གིས་ཁྲིམས་གྲོགས་མེད་པར་ཉེ་དུ་མོ་དང་ལྷན་ཅིག་ཉལ་བ་གནང་ངོ་ཞེས་གཞུང་གང་ལས་ཀྱང་མ་གསུངས་ཏེ། ལུང་ཕྲན་ཚེགས་ལས། དགེ་སློང་མས་རང་གི་བུདེ་ཆེན་པོར་གྱུར་པ་དེའི་ཚེ་དེ་དང་ལྷན་ཅིག་ཁང་པ་གཅིག་ཏུ་ཉལ་བར་མི་རུང་སྟེ། ཇི་ལྟར་བསླབཔ་བཅས་པ་བཞིན་སློབས་ཤིག ཅེས་གསུངས་སོ། །