དཔེ་བསྐྲུན་གསལ་བཤད་ངོ་མཚར་མེ་ལོང་།
རྒྱལ་བ་ཉི་མ་ཡེ་ཤེས་དཔག་མེད་མཛོད།།
ཡོན་ཏན་འོད་སྣང་རོལ་བ་མི་ཟད་པས།།
རྡུལ་སྙེད་རྡུལ་གཅིག་གིས་བསྡམས་གདུལ་བྱའི་ཞིང་།།
མ་ལུས་སྣང་བའི་འཕྲིན་ལས་ཚད་མཐའ་ཡས།།
གང་དུ་ཆོ་འཕྲུལ་ཡོངས་ཤར་གངས་ཆེན་མཚོའི།།
ཕྱག་མཐིལ་སྤོས་ཆུའི་པདྨའི་ཟེའུ་འབྲུའི་ཆར།།
ཞིང་ཁམས་རྣམ་བཀོད་མི་མཇེད་འཇིག་རྟེན་འདིར།།
སྒྲོན་མའི་བསྐལ་པ་བཟང་པོའི་དགེ་མཚན་ཤར།།
འདྲེན་པ་ཐུབ་མཆོག་རྒྱལ་རིགས་ཤཱཀྱའི་ཏོག།
གང་དུ་མངོན་སངས་རྒྱས་པའི་དེ་མ་ཐག།
སྐུ་གསུམ་སྟོན་པར་སྣང་བའི་ངོ་མཚར་འབུམ།།
དེ་བཞིན་ཉིད་དབྱིངས་གཡོ་བ་མེད་ལས་སྣང་།།
སྣ་ཚོགས་མོས་པ་ཐ་དད་རྗེས་ཕྱོགས་པའི།།
འགྲོ་མང་ཁམས་ལ་གང་འདུལ་དེར་སྟོན་གྱིས།།
རིམ་དང་རིམ་མིན་གཅིག་ཅར་གྲོལ་བ་ཡི།།
མདོ་སྔགས་དམ་ཆོས་བདུད་རྩིའི་ཆར་ཆེན་ཕབས།།
དེ་ལྟར་རྒྱལ་བས་ཐེག་གསུམ་ཆོས་འཁོར་བསྐོར།།
བཀའ་བསྡུས་པཎ་གྲུབ་རིམ་པར་བྱོན་པའི་ཚུལ།།
སོ་བྱང་སྔགས་ཀྱི་རབ་ཏུ་དབྱེ་བ་བཅས།།
ཆོས་འབྱུང་གཏམ་གྱི་རོལ་མོ་འདི་རུ་འཁྲོལ།།
ཐུབ་པས་ལུང་བསྟན་བསིལ་ལྡན་བོད་ལྗོངས་སུ།།
མཁན་སློབ་ཆོས་རྒྱལ་འཛོམས་པའི་རྟེན་འབྲེལ་ལས།།
མདོ་སྔགས་ལམ་བཟང་ཟུང་དུ་འབྲེལ་བ་ཡི།།
ཡ་མཚན་སྲིད་པའི་ཁམས་སུ་མངོན་པར་མཐོ།།
ཁྱད་ཆོས་ཆེ་བ་དྲུག་གིས་ཁྱད་འཕགས་ཤིང་།།
མཁས་བཙུན་གྲུབ་པའི་ཁྱུ་མཆོག་རྨད་བྱུང་པ།།
རྒྱལ་བསྟན་ཡོངས་ཀྱི་ཕྱི་མོ་སྔ་འགྱུར་པའི།།
བསྟན་པའི་བབ་སོ་གཏེར་གྱི་བྱུང་བའི་ཚུལ།།
མཆོག་ཏུ་རྒྱ་ཆེའི་རིང་བརྒྱུད་བཀའ་མ་དང་།།
ཤིན་ཏུ་ཟབ་པ་ཉེ་བརྒྱུད་གཏེར་མའི་ཆོས།།
བྱིན་རླབས་མ་ཉམས་དག་སྣང་བརྒྱུད་པར་བཅས།།
ཇི་བཞིན་མ་འདྲེས་བཀྲ་བའི་མེ་ལོང་འདིར།།
ཁྱད་པར་རྒྱལ་བའི་དབང་པོ་མཚོ་སྐྱེས་རྗེ།།
སྐལ་ལྡན་སྙིང་གི་བུ་དགུ་རྗེ་འབངས་གྲོགས།།
ཟབ་གཏེར་མངའ་བདག་གཏེར་སྟོན་བརྒྱ་རྩ་ཡི།།
ངོ་མཚར་ཕྱི་ནང་གསང་བའི་རྣམ་ཐར་གསལ།།
ཕྱི་མའི་དུས་འདིར་སྔ་འགྱུར་རྒྱལ་བའི་བསྟན།།
ངེས་དོན་སྙིང་པོ་ལུང་དང་རྟོགས་པའི་ཆོས།།
བཤད་དང་སྒྲུབ་པས་འཛིན་སྲུང་སྤེལ་བ་ཡི།།
སྔ་འགྱུར་གདན་ས་དྲུག་གི་བྱུང་བ་བརྗིད།།
ཚེ་གཅིག་འོད་སྐུར་གྲོལ་བའི་མན་ངག་དང་།།
འཇའ་ལུས་འཕོ་བ་ཆེན་པོའི་གདམས་པ་ཡི།།
མ་སྒོམ་མངོན་འཚང་རྒྱ་བའི་མྱུར་ལམ་གྱིས།།
སྲིད་རྩ་ཧྲུལ་པོར་བགྱིས་པའི་གཏམ་འདི་སྙན།།
ངག་ལས་ངག་གི་འདོད་འཇོ་བློ་གྲོས་གཟི།།
ཐོག་མེད་དུས་རིང་གོམས་པའི་བག་ཆགས་མཐུ།།
སད་ལས་ཇི་བཞིན་སྨྲ་ལ་སྤོབས་པའི་དབང་།།
མཚུངས་མེད་སྨྲ་བའི་རྒྱལ་པོས་བྱིན་པར་ངེས།
ཞེས་རྒྱལ་མོ་རོང་གཡུ་སྒྲ་སྙིང་པོ་པཎ་ཆེན་ཉེར་ལྔའི་སྐྱེ་བ་བསྟུད་མར་བཞེས་པའི་ཕྱི་མའི་མཐར། རུ་དམ་གངས་ཀྱི་ར་བར་ཨ་གྲོའི་མཁན་ཆེན་ཡེ་ཤེས་རྒྱ་མཚོར་རྣམ་པར་འཕྲུལ་བའི་ཡང་སྲིད་དཔལ་ཡུལ་གྱི་མཁན་པོ་དཀོན་མཆོག་བསྟན་འཛིན་ནམ་རྫོགས་ཆེན་གྱི་སྤྲུལ་སྐུ་པདྨ་ངོ་མཚར་རང་བྱུང་གྲུབ་པའི་རྡོ་རྗེས་དཔལ་ཆེ་བ་དྲུག་ལྡན་གསང་ཆེན་སྔ་འགྱུར་རྙིང་མའི་ཆོས་འབྱུང་ངོ་མཚར་ཚད་མ་སུམ་ལྡན་ཞེས་པ་འདི་ཉིད་བརྩམས་ནས་དཔེ་བསྐྲུན་གནང་བའི་གསལ་བཤད་དུ། ཤར་ཟླ་རླུང་སྔོན་མོ་དལ་གྱིས་འབབ་པའི་གཡས་འགྲམ་དུ་སྐྱེ་བའི་སྲིད་པ་བླངས་པ་རྫོགས་ཆེན་པདྨ་སྐལ་བཟང་ངམ་ཐུབ་བསྟན་ལུང་རྟོགས་བསྟན་པའི་རྒྱལ་མཚན་དེས་དང་བའི་བློས་བྲིས་པའོ།།