༤ བཀའ་བརྒྱུད་པ།
བཞི་པ་མངའ་བདག་མར་པ་བཀའ་བརྒྱུད་པའི་ཟབ་ལམ་ཕྱག་རྒྱ་ཆེན་པོ་དང་བཅས་པ་ནི། དགྱེས་མཛད་རྡོ་རྗེ་དངོས་བྱོན་མར་པ་ཆོས་ཀྱི་བློ་གྲོས་འཕགས་ཡུལ་དུ་ལན་གསུམ་བྱོན། རྡོ་རྗེ་འཆང་ནས་རིམ་པ་བརྒྱུད་པའི་གདམས་ཟབ་ཀྱི་བཀའ་སྲོལ་ཀླུ་སྒྲུབ་དང་། ཊོམྦྷི་པ། ལུ་ཧི་པ། སུ་ཁ་སིདྡྷི་རྣམས་ལས་ཏེ་ལོ་པས་གསན་ནས་བཀའ་བབས་བཞིའི་གདམས་བཅུད་མཐའ་དག་པཎ་ཆེན་ན་རོ་པ་དང་། མཻ་ཏྲི་པ་གཙོས་པའི་མཁས་གྲུབ་དུ་མ་ལས་གསན་ཅིང་བདེ་ཀྱེ་གསང་གསུམ་སོགས་གདམས་ངག་མང་པོའི་མངའ་བདག་ཏུ་གྱུར་ནས་གྲུབ་པའི་གོ་འཕང་བརྙེས། དགུང་ལོ་གྱ་བཞི་བར་བསྟན་པ་བསྐྱངས་ནས་སྐུ་གཤེགས། སློབ་མ་ཀ་ཆེན་བཞིར་གྲགས་པ། དོལ་གྱི་མཚུར་སྟོན་དབང་ངེ་། གཞུང་གི་རྔོག་སྟོན་ཆོས་རྡོར། གཙང་རོང་གི་མེས་སྟོན་ཚོན་པོ་བཅས་ལ་རིམ་བཞིན། འཕོ་བ། རྒྱུད། གཞུང་བཤད། འོད་གསལ་བཅས་ཀྱི་བཀའ་བབས་ནས་བཤད་བརྒྱུད་ཀྱི་བསྟན་པ་བསྐྱངས། སློབ་དཔོན་འཇམ་དཔལ་བཤེས་གཉེན་གྱི་རྣམ་འཕྲུལ་རྗེ་བཙུན་མི་ལ་བཞད་པའི་རྡོ་རྗེ་ལ་གཏུམ་མོ་བདེ་དྲོད་དང་སྒྲུབ་བརྒྱུད་ཀྱི་བཀའ་བབས། འགྲན་ཟླ་དང་བྲལ་བའི་དཀའ་སྤྱད་དཔག་ཏུ་མེད་པ་མཛད་པས་གྲུབ་པའི་གོ་འཕང་མངོན་དུ་བརྙེས། ཀུན་སྤངས་རས་པའི་བརྟུལ་ཞུགས་ཀྱིས་སྒྲུབ་བརྒྱུད་ཀྱི་བསྟན་པ་བསྐྱངས་ཤིང་མཐར་དགུང་གྲངས་གྱ་བཞི་པར་མངོན་དགའི་ཞིང་ཁམས་སུ་གཤེགས་སོ། སློབ་མ་མཁའ་སྤྱོད་དུ་གཤེགས་པ་བདུན། རས་པ་མཆེད་བརྒྱད་སོགས་མང་དུ་བྱོན་པའི་ཐུགས་སྲས་ཟླ་བ་ལྟ་བུ་རས་ཆུང་རྡོ་རྗེ་གྲགས་པ་ནི་སྐུ་ལུས་མ་སྤངས་པར་ལྕང་ལོ་ཅན་དུ་གཤེགས་པ་དེའི་སློབ་མ་ཁྱུང་ཚང་རས་པ་དང་། རྒྱལ་བ་ལོ་སོགས་ལས་བརྒྱུད། ཕྱིས་རས་ཆུང་ཉིད་ཀྱི་སྤྲུལ་པར་གྲགས་པ་གཙང་སྨྱོན་ཧེ་རུ་ཀ་སོགས་ཀྱིས་སྲོལ་ཕྱེས་པའི་རས་ཆུང་སྙན་བརྒྱུད་དུ་གྲགས་པ་བྱུང་། རྒྱུ་སྐར་ལྟ་བུ་ངམ་རྫོང་རས་པ་བྷོ་དྷི་རཱ་ཛ་ལས་ངམ་རྫོང་སྙན་བརྒྱུད་བྱུང་། ཉི་མ་ལྟ་བུ་མཉམ་མེད་དྭགས་པོ་ཟླ་འོད་གཞོན་ནུ་ཞེས་རྒྱལ་བས་ལུང་བསྟན་པའི་སྐྱེས་བུ་ཆེན་པོ་དེའི་སློབ་མ་སྒོམ་ཆེན་བརྒྱད་བརྒྱར་གྲགས་པའི་གཙོ་བོར་གྱུར་པ་ཁམས་པ་མི་གསུམ་ནས་ཆོས་བརྒྱུད་དར་རྒྱས་བྱུང་ཞིང་། དེ་ལ་བཀའ་བརྒྱུད་ཆེ་བཞི་ཆུང་བརྒྱད་དུ་གྲགས་པ་ནི། དབོན་སྒོམ་ཚུལ་ཁྲིམས་སྙིང་པོ་ནས་བཟུང་དྭགས་པོའི་གདན་རབས་རིམ་བྱོན་དྭགས་པོ་རྩ་བའི་བཀའ་བརྒྱུད་ཡིན་ལ། དབོན་སྒོམ་སློབ་མ་ཞང་གཡུ་བྲག་པ་འགྲོ་མགོན་བསོད་ནམས་གྲགས་པའི་ཆོས་བརྒྱུད་ལ་ཚལ་པ་བཀའ་བརྒྱུད་ཟུར་དུ་བྱུང་། ཁམས་པ་དབུ་སེའམ་དཔལ་དུས་གསུམ་མཁྱེན་པའི་ཆོས་བརྒྱུད་ལ་ཀརྨ་བཀའ་བརྒྱུད་བྱུང་། སངས་རྒྱས་འཁོར་བ་འཇིག་དངོས་ཁམས་པ་རྡོ་རྗེ་རྒྱལ་པོའམ་དཔལ་ལྡན་ཕག་མོ་གྲུབ་པ་ལས་ཕག་གྲུ་བཀའ་བརྒྱུད་བྱུང་། འབའ་རམ་དར་མ་དབང་ཕྱུག་གི་བརྒྱུད་པ་ཏི་ཤི་རས་པ་ནས་བརྒྱུད་ནང་ཚན་སྒོམ་སྡེ་རི་ཁག་བཅོ་བརྒྱད་སོགས་འབའ་རམ་བཀའ་བརྒྱུད་བྱུང་བ་ལ་བཀའ་བརྒྱུད་ཆེ་བཞི་དང་། དྭགས་པོའི་སློབ་མ་ཁམས་པ་གསལ་སྟོང་ཤོ་སྒོམ་པ་གྲུབ་པའི་དབང་ཕྱུག་ཆེན་པོར་གྱུར་ཅིང་མི་དང་མི་མིན་འདུལ་བའི་ཕྲིན་ལས་ཅན་དུ་ལུང་བསྟན་པ་ལྟར་འགྲོ་དོན་རྒྱ་ཆེར་བྱུང་ཡང་ཆོས་བརྒྱུད་ཁ་ཡར་ལས་མ་བྱུང་། རྗེ་ཕག་མོ་གྲུབ་པས་དྭགས་པོ་མཇལ་ཙམ་གྱིས་ཆོས་ཉིད་ཀྱི་བདེན་པ་གཟིགས། སློབ་མ་བརྒྱད་བརྒྱ་ལས་གདུགས་ཐོག་ལྔ་བརྒྱ་བྱུང་བའི་གྲལ་ནས་གདན་ས་ཟུར་སྐྱོང་གི་བུ་ཆེན་བརྒྱད་ལས་བཀའ་བརྒྱུད་ཆུང་བརྒྱད་བྱུང་བ་སྟེ། དང་པོ་འབྲི་གུང་བཀའ་བརྒྱུད་ནི། རྟེན་འབྲེལ་མཐར་ཕྱིན་སྐྱོབ་པ་འཇིག་རྟེན་གསུམ་མགོན་གྱིས་འབྲི་གུང་གདན་ས་བཏབ། སློབ་མ་ལྔ་ཁྲི་ལྔ་སྟོང་བརྒྱ་ཉེར་ལྔ་བྱུང་། དེ་ནས་གྲུབ་ཐོབ་གཉོས་འགར་ཆོས་གསུམ་སོགས་བྱུང་། ཐུགས་སྲས་སྤྱན་སྔ་བ་གྲགས་པ་འབྱུང་གནས་ཀྱིས་གདན་ས་མཐིལ་དང་འབྲི་གུང་གཉིས་ཀ་བསྐྱངས། རྗེ་འདིའི་རིང་ལ་འདུས་པ་ཁྲི་བཅོ་བརྒྱད་བྱུང་བར་གྲགས། ཕྱིས་ཆོས་རྒྱལ་རིན་ཆེན་ཕུན་ཚོགས་ཡབ་སྲས་སྐུ་རིང་ནས་གཏེར་ཁ་གསར་རྙིང་གི་སྲོལ་ཚུགས་ནས་བཀའ་རྙིང་འདྲེས་མར་གྱུར། གཉིས་པ་སྟག་ལུང་བཀའ་བརྒྱུད་ནི། མོས་གུས་མཐར་ཕྱིན་སྟག་ལུང་ཐང་པ་བཀྲ་ཤིས་དཔལ་གྱིས་སྟག་ལུང་གི་གདན་ས་བཏབ། སངས་རྒྱས་དབོན་གྱིས་སྟག་ལུང་མར་ཐང་གི་གདན་ས་མཛད་ཅིང་། ཆོས་སྐུ་ཨོ་རྒྱན་མགོན་པོ་སོགས་སྐྱེས་ཆེན་མང་དུ་བྱོན། ཕྱིས་མཁར་དྲུང་མཚོ་སྐྱེས་རྡོ་རྗེའི་སྐུ་རིང་ནས་བཀའ་དགོངས་ཕུར་གསུམ་དང་། རཏ་གླིང་སྐོར་སོགས་རྙིང་མ་བཀའ་གཏེར་གྱི་རྒྱུན་བཙུགས་ནས་འདྲེས་མར་གྱུར། གསུམ་པ་ཁྲོ་ཕུ་བཀའ་བརྒྱུད་ནི། རྒྱལ་ཚབ་ཀུན་ལྡན་རབ་པས་ཁྲོ་ཕུའི་གདན་ས་བཏབ། དེའི་ཚ་བོ་ཁྲོ་ཕུ་ལོ་ཙཱ་བ་བྱམས་པ་དཔལ་གྱིས་མིི་ཏྲ་ཛོ་ཀི་དང་། བུདྡྷ་ཤྲཱི། ཁ་ཆེ་པཎ་ཆེན་གསུམ་སྤྱན་དྲངས་ཤིང་བྱམས་ཆེན་མཐོང་གྲོལ་ཆེན་པོ་བཞེངས། དེའི་དབོན་བརྒྱུད་བཞི་ལྔའི་མཚམས་སུ་ཀུན་མཁྱེན་བུ་སྟོན་འཁྲུངས། རྒྱུད་སྡེ་སྤྱི་དང་ཁྱད་པར་ཡོ་གའི་བཤད་སྒྲུབ་རྩལ་བཏོན་མཛད་པས་བུ་ལུགས་ཞེས་པའི་ཆོས་བརྒྱུད་བྱུང་། བཞི་པ་གླིང་རས་བཀའ་བརྒྱུད་ནི། རྒྱ་གར་ཆུ་བོ་གངྒ་ཚུན་ལ་རྟོགས་པ་མཐོ་བར་གྲགས་པའི་གྲུབ་ཐོབ་གླིང་རྗེ་རས་པས་རྣ་ཕུའི་གདན་ས་བཏབ་ཚེ་འབྲུག་མ་བུ་བདུན་ནམ་མཁར་སོང་བས་ཆོས་བརྒྱུད་ལ་འབྲུག་པ་ཞེས་གྲགས། གདན་སའི་མཚན་ལས་རྣ་ཕུ་རས་པ་ཡང་ཟེར། དེའི་སློབ་མ་འགྲོ་མགོན་གཙང་པ་རྒྱ་རས་ཡེ་ཤེས་རྡོ་རྗེ་ལ་བུ་སློབ་བསམ་གྱིས་མི་ཁྱབ་པ་འདུས་ཤིང་འབྲུག་ར་ལུང་གི་གདན་ས་བཏབ། འཁོར་འགྱེད་ལན་གསུམ་མཛད་པས་འབྲུག་བསྟན་གྱིས་བྱ་རྒོད་པོའི་ཉིན་ལམ་བཅོ་བརྒྱད་ཚུན་ཁྱབ་པར་གྲགས། དེའི་སློབ་མའི་གཙོ་བོ། རྒོད་ཚང་པ་མགོན་པོ་རྡོ་རྗེ་ལས་སྟོད་འབྲུག་གནམ་གྱི་སྐར་མ། ལོ་རས་དར་མ་དབང་ཕྱུག་ལས་སྨད་འབྲུག་ས་ཡི་དྲེག་པ། རྒྱ་རས་ཀྱི་དབོན་བརྒྱུད་སེང་གེ་དགུ་ཚར་ལས་འབྲུག་པ་བཅས་བྱུང་། ལྔ་པ་སྨར་ཚང་བཀའ་བརྒྱུད་ནི། མདོ་ཁམས་སྨར་པ་གྲུབ་ཐོབ་ཤེས་རབ་ཡེ་ཤེས་སློབ་བརྒྱུད་ལས། རྒྱལ་བ་ཡང་དགོན་པ་ཡེ་ཤེས་རྒྱལ་མཚན། རིན་ཆེན་གླིང་པ། སྤང་མཁན་ཆེན་འོད་ཟེར་བླ་མ། འགྲོ་མགོན་ཤིང་མགོ་རས་པ་སོགས་སྐྱེས་ཆེན་མང་དུ་བྱོན། ཕྱིས་སྟག་བླ་རྣམས་ཀྱིས་ཆོས་བརྒྱུད་བཟུང་བ་དཔལ་ཡུལ་བ་ལ་བྱིན་བརྒྱུད་འདྲེས་པའོ། དྲུག་པ་ཡེལ་པ་བཀའ་བརྒྱུད་ནི། ཁམས་ཡེལ་པ་གྲུབ་ཐོབ་ཡེ་ཤེས་བརྩེགས་པ་དེས། ལྷོ་ཡེལ་ཕུག་ཏུ་བྱང་རྟ་རྣ་སོགས་ཕྱག་བཏབ། གླིང་རྗེ་རྣམས་ཀྱིས་བླ་མར་བཀུར་ནས་ཕ་ཟོག་མང་པོ་ཕུལ། ཆོས་བརྒྱུད་སྔར་དར་རྒྱས་བྱུང་། དེང་དུས་བྱང་རྟ་རྣ་ཀཾ་ཚང་ལུགས་སུ་གྱུར་ཏོ། བདུན་པ་གཡའ་བཟང་བཀའ་བརྒྱུད་ནི། ཟར་པ་སྐལ་ལྡན་ཡེ་ཤེས་སེང་གེའི་ཆོས་བརྒྱུད་གྲུབ་ཐོབ་དང་། གཡའ་བཟང་སྡེ་སྲིད་དུ་གྲགས་པ་སྟོབས་འབྱོར་ཅན་ཡར་སྟོད་ཕྱོགས་སུ་བརྒྱུད་མར་བྱུང་ཡང་དེང་སང་ཤུལ་ཙམ་དུ་ཟད། བརྒྱད་པ་ཤུག་གསེབ་བཀའ་བརྒྱུད་ནི། མཉམ་མེད་གྱེར་སྒོམ་ཆེན་པོས་སྙེ་ཕུ་ཤུག་གསེབ་བཏབ་པའི་ཆོས་བརྒྱུད་སྔར་མང་དུ་བྱུང་ཡང་དེང་དུས་བཙུན་མ་སྒར་རྙིང་ལུགས་སུ་གྱུར། དེ་ཐམས་ཅད་ལས་ཆོས་བརྒྱུད་དང་སྤྲུལ་བརྒྱུད་ཁྱད་པར་འཕགས་པ་ཀརྨ་ཀཾ་ཚང་ནི། རྗེ་དུས་གསུམ་མཁྱེན་པའི་སྤྲུལ་སྐུ་གཉིས་པ་གྲུབ་ཆེན་ཆོས་ཀྱི་བླ་མ་ཧོར་རྒྱལ་པོས་ཏི་ཤྲཱིར་བཀུར། གནས་ཀྱི་མིང་ལས་མཚན་ཀརྨ་པ་པཀྴིར་གྲགས་པ་ནས་ཞྭ་ནག་པའི་སྤྲུལ་བརྒྱུད། གསུམ་པ་རང་བྱུང་རྡོ་རྗེ། བཞི་པ་རོལ་པའི་རྡོ་རྗེ། ལྔ་པ་དེ་བཞིན་གཤེགས་པ། དྲུག་པ་མཐོང་བ་དོན་ལྡན། བདུན་པ་ཆོས་གྲགས་རྒྱ་མཚོ། བརྒྱད་པ་མི་བསྐྱོད་རྡོ་རྗེ། དགུ་པ་དབང་ཕྱུག་རྡོ་རྗེ། བཅུ་པ་ཆོས་དབྱིངས་རྡོ་རྗེ། བཅུ་གཅིག་པ་ཡེ་ཤེས་རྡོ་རྗེ། བཅུ་གཉིས་པ་བྱང་ཆུབ་རྡོ་རྗེ། བཅུ་གསུམ་པ་བདུད་འདུལ་རྡོ་རྗེ། བཅུ་བཞི་པ་ཐེག་མཆོག་རྡོ་རྗེ། བཅོ་ལྔ་པ་མཁའ་ཁྱབ་རྡོ་རྗེ། བཅུ་དྲུག་པ་རང་བྱུང་རིག་པའི་རྡོ་རྗེ་བཅས་བྱོན་པ་དང་། ཀརྨ་པཀྴིའི་སློབ་མ་ཞྭ་སེར་ཅན་དང་། ཞྭ་ཁྲ་ཅན་རྣམས་དང་། ཞྭ་དམར་བ་ཚུལ་ཁྲིམས་དཔལ་ནས་ཞྭ་ནག་སྐུ་ཕྲེང་རྣམས་ཀྱི་སློབ་མའི་ཚུལ་འཛིན་ཞྭ་དམར་སྐུ་ཕྲེང་བཅུ། རྒྱལ་ཚབ་སྐུ་ཕྲེང་ལྔ། གཞན་ཡང་དཔའ་བོ་དང་། ཏྲེའོ་རིམ་བྱོན། ཕྱིས་ཞྭ་དམར་གྱི་གོ་གནས་འཛིན་པ་བྱམས་མགོན་ཏའི་སི་ཏུ་རིམ་བྱོན་སོགས་བྱུང་ངོ་། །རྗེ་ལྔ་པ་དེ་བཞིན་གཤེགས་པས་སྙན་བརྒྱུད་ནོར་བུ་སྐོར་གསུམ་ཀྱི་བདག་པོར་མངའ་གསོལ་བ་དྲུང་རྨ་སེ་བ་བློ་གྲོས་རིན་ཆེན་ལས་ཟུར་མང་བཀའ་བརྒྱུད་དང་། ཞྭ་དམར་དྲུག་པ་ཆོས་ཀྱི་དབང་ཕྱུག་གི་ཞལ་སློབ་མཁས་གྲུབ་ཀརྨ་ཆགས་མེད་ལས་གནས་མདོ་བཀའ་བརྒྱུད་ཀྱང་བྱུང་ངོ་། །བཀའ་བརྒྱུད་ཆེ་བཞི་ཆུང་བརྒྱད་ལས་དེང་སང་ཀར་འབྲུག་འབྲི་སྟག་བཞིའི་ཆོས་བརྒྱུད་རྐང་ཚུགས་པ་བཞུགས་པའི་འཕྲིན་ལས་ཕྱོགས་མཐར་རྒྱས་བཞིན་པའོ། །