གཤིན་རྗེ་ཁྲོ་ཆུའི་མན་ངག་བསད་པ་རྒྱུན་ཁྱེར་སྙན་བརྒྱུད་རྫོགས་རིམ་རླུང་དང་བསྲེ་བ་སོགས་འགའ་ཞིག་གི་ཟིན་བྲིས།
གཤིན་རྗེ་ཁྲོ་ཆུའི་མན་ངག་བསད་པ་རྒྱུན་ཁྱེར་སྙན་བརྒྱུད་རྫོགས་རིམ་རླུང་དང་བསྲེ་བ་སོགས་འགའ་ཞིག་གི་ཟིན་བྲིས་བཞུགས་སོ༔
འཇམ་དཔལ་དུག་གདོང་ནག་པོ་ལ་ཕྱག་འཚལ་ལོ༔ སྐྱེས་བུ་དམ་པ་བསྐྱེད་རྫོགས་ལ་བརྟན་པ་ཐོབ་ཀྱང་སྤྲོས་བཅས་ཀྱི་ཕྱག་ལེན་ལ་བསྡུས་པའམ༔ ཕྱག་ལེན་མཁས་ཀྱང་ཡོ་བྱད་མེད་པའམ༔ སྤྲོས་པ་ལ་མི་དགའ་བའི་གང་ཟག་ལ་བྱེད་མ་དགྲར་ལང་ན། ཏིང་ངེ་འཛིན་དང་སྔགས་ཀྱིས་བསྒྲལ་བའི་མན་ངག་སྙན་བརྒྱུད་ནི༔ རང་ཉིད་ལས་ཀྱི་གཤིན་རྗེར་གསལ་བའི་འོག་ཏུ ལྕགས་ཁང་གྲུ་གསུམ་གྱི་ནང་དུ་བྱད་མ་མགོ་འཇུག་ལྡོག་པའི་རྩ་དབུ་མ་རོ་མ་རྐྱང་མ་གསུམ་པོ་དེ་ཧ་རེ་ཡོད་པར་བསམ༔ རང་གི་སྐེད་པ་མན་ཆད་གནམ་ལྕགས་ཀྱི་ཕུར་བུ་ཟུར་གསུམ་པ༔ རྣོ་བའི་ངར་དང་ལྡན་པ་གསུམ་དུ་གྱུར་ནས་རྩ་གསུམ་པོ་
འཛེར༔ ཕུར་བུའི་ཕྱི་རོལ་ཁོ་ཡི་ལུས་ཀྱི་ནང་དུ་གནམ་ལྕགས་ཀྱི་འཁོར་ལོ་རྩིབས་བརྒྱད་པ་ཞིག་དྲག་ཏུ་འཁོར་བས༔ ཁོ་ཡི་ལུས་ངག་ཡིད་གསུམ་དམར་མྱ་ལ་ལ་གཏུབས་པར་བསྒོམ༔ ཡང་རེས་འགའ་རིང་ཉིད་གཤིན་རྗེའི་གཤེད་ཀྱི་སྐུ་སྨད་ཕུར་པ་ཟུར་གསུམ་པ་གཅིག་ཏུ་བསམ༔ དགྲ་བོ་བྱད་མ་མགོ་མཇུག་ལོག་པའི་རྩ་གསུམ་སྦུ་གུ་རུགས་སེ་ཡོད་པ་ལ་བཏབ་པས༔ གསེར་གྱི་ས་གཞི་ལ་ཐུག་པར་འཛེར༔ ཕུར་བུའི་དབལ་ཁར་གནམ་ལྕགས་ཀྱི་འཁོར་ལོ་རྩིབས་བརྒྱད་པ་དྲག་ཏུ་འཁོར་བས༔ ཁོ་ཡི་ལུས་ངག་ཡིད་གསུམ་མྱལ་མྱལ་གཏུབས་ནས༔ ཤ་ཁྲག་དམར་དཔུང་ངེ་སོང་
བ་རྣམས་ཀྱང་༔ གཤིན་རྗེ་མགོ་བརྙན་ཅན་དཔག་ཏུ་མེད་པ་དང་ཁོ་རང་གི་དུག་གསུམ་གྱི་ངོ་བོ་ལས་གྲུབ་པའི་ལས་ཀྱི་གཤིན་རྗེ༔ ཨ་ཝ་གླང་གི་གདོང་༔ སྟག་མགོ་ཅན་དང་༔ འུག་མགོ་ཅན་གྱི་ཚོགས་དང་༔ ཁོ་རང་གི་ལྷ་སྲུང་རྣམས་ཀྱང་གཤིན་རྗེའི་དམགས་ཚོགས་སུ་གྱུར་ནས་ཕོ་ཉ་དཔག་ཏུ་མེད་པ་དང་བཅས་མཚོན་ཆ་སྣ་ཚོགས་ཐོགས་པས༔ དགྲ་བོའི་ལུས་ངག་ཡིད་གསུམ་བཤའ་གཏུབ་བརྡུང་༔ ནད་ཡམས་དང་མཚོན་ཆ་སྣ་ཚོགས་ཀྱིས་ཆར་ཕབ་ནས་རྡུལ་དུ་བརླག༔ ཤ་ཟོས་ཁྲག་འཐུང་རུས་པ་མུར་རང་གཤེད་རང་ལ་ཕབ༔ ཁོ་རང་གི་ལྷ་སྲུང་ཁོ་རང་གི་གཤེད་དུ་ཕབ་ནས༔ མིང་ཡང་མེད་པར་བརླག༔ རང་གི་ཕྱོགས་མཚམས་ཐམས་ཅད་ལྕགས་སྲེག་གི་ས་གཞི་མེ་འབར་བར་གྱུར་པས༔ བྱད་མ་ལྷ་སྲུང་དང་བཅས་པ་བྱ་སྒོ་མེ་ལ་སྲེག་པ་བཞིན་དུ་གཞོབ་ཐུལ་ཐུལ་བསྲེགས་ནས་རྡུལ་ཙམ་མེད་པར་བསྒོམ༔ གྲི་ལྕགས་ཀྱི་ཕུར་པ་ཡོད་ན་ཟན་ལིང་ལ་བཏབ་པའམ་ཡང་ན་དགྲ་ཕྱོགས་སུ་གཟིར་རོ༔ ཡང་ལྕགས་ཁང་ཟུར་གསུམ་པའི་ནང་དུ་དགྲ་བོ་གན་རྐྱལ་དུ་འགྱེལ་བའི་སྙིང་ཁར་ཁྲག་གི་སྦལ་པ་བྱིའུ་མཆིལ་པའི་མགོ་ཙམ་གྱི་ནང་དུ་ནི་ལྗང་ཁུ་བུག་པ་དོད་པ་གཅིག་བསམ༔ དེའི་སྟེང་དུ་རང་ཉིད་གཤིན་རྗེའི་སྐུ་
སྨད་ཁྲོ་ཆུའི་ཕུར་པ་རྩེ་མོ་རྣོ་ངར་དང་ལྡན་ཞིང་མེ་འབར་བ། རྗེའི་བུག་པའི་ནང་དུ་བཙུགས་ནས༔ རང་ཉིད་ཀྱིས་རླུང་ནང་དུ་ཚུར་རྔུབ་པའི་དུས༔ ཁོ་ཡི་བཀྲག་མདངས་གཟི་བརྗིད་ཚེ་བསོད་སྟོབས་རྩལ་ཐམས་ཅད༔ འོད་ཀྱི་རྣམ་པས་རང་ཉིད་ལ་ཐིམ་པས༔ རང་ཉིད་སྟོབས་དང་གཟི་བརྗིད་ཐམས་ཅད་སྔར་བས་ཆེ་བར་བསྒོམ་ཞིང་རླུང་བཟུང་༔ ཁོ་མགོན་སྐྱབས་དཔུང་གཉེན་བཀྲག་གཟི་བརྗིད་དང་བྲལ་ནས༔ སྔོ་ལ་ཧམ་པ་ཐལ་བའི་མདོག་འདྲ་བར་གྱུར༔ རླུང་ཕྱིར་བཏང་དུས་ཁོའི་སྙིང་ནང་དུ་ཁྲག་གི་སྦལ་པ་ཞུ་ནས་ཁ་ནས་ཁྲག་རུལ་དང་ཆུ་སེར་སྐྱུག་པར་བསམ༔ དེ་ལྟར་རླུང་ལ་བསྐྱོན་ཅིང་བསྒོམ༔ ཡང་ཕུར་པའི་རྩེས་ནིའི་བུག་པ་རྦད་ཀྱིས་བཅད་པ་དང་ཁོ་ཡི་སྲོག་ཁྲོག་གི་ཆད་པ་དུས་མཉམ་དུ་སོང་བར་བསམ༔ བསད་རྟགས་རྫོགས་ནས་གནས་སྤར་བ་ནི༔ རྣམ་ཤེས་རྩྭ་ལྗང་ཁུ་ཞུ་ནས་ཨ་དཀར་པོ་ཞིག་ཏུ་གྱུར་ཏེ༔ ཕུར་བུའི་ཁོང་གསེང་ནས་ཡར་རིགས་གསུམ་མགོན་པོའི་ཐུགས་ཀར་ཐིམ་པར་བསམས་ལ་མི་དམིགས་པར་བཞག་གོ༔ ས་མ་ཡ༔ རྒྱ་རྒྱ་རྒྱ༔ ཨྠྀི༔ ༈ ཡང་དགོང་མོ་ལྟ་བུ་ལ་བསད་པའི་རྡེབ་ཆོག་ནི༔ རང་གི་རྐང་པ་གཡས་པའི་རྟིང་པས་སྲིན་པོའི་སྒོ་བཀག༔ གཡོན་ཅུང་ཟད་བརྐྱངས་
ལ་ཕྱེད་སྐྱིལ་བྱ༔ མདུན་གྱི་འོག་གཞི་དུག་མཚོ་ནག་པོ་འཇིགས་སུ་རུང་བའི་སྟེང་དུ༔ མ་ཧེ་ནག་པོ་ཁྲོ་གཉེར་ཅན་འཇིགས་སུ་རུང་བའི་ལག་གཉིས་བརྐྱངས་བའི་སྟེང་དུ་མཆུ་བཞག་པ༔ དེའི་སྟེང་དུ་གཤིན་རྗེ་བེ་བྷ་སྭ་ཏ་གཤིན་རྗེའི་ཕྲུ་གུ་སྟོང་གིས་བསྐོར་བ༔ དེའི་འཁོར་དུ་གཤིན་རྗེ་འབུམ་གྱིས་བསྐོར་བ༔ དེའི་སྟེང་གི་ཐད་དུ་རང་གི་ལག་པ་གཡོན་པ་དེ༔ ལྕགས་སྲེག་གི་ཁང་སྒྲོམ་འབར་བའི་ནང་དུ་མུན་པ་འཐིབ་པ༔ དེའི་ནང་དུ་མཛུབ་མོ་ཁྲོ་ལྕགས་ཀྱི་གཏན་པ་ཡངས་ཤིང་རྒྱ་ཆེ་བའི་སྟེང་དུ༔ རང་གི་ཐུགས་ཀའི་འོད་ཟེར་ལྕགས་ཀྱུ་ལྟ་བུས༔ དགྲ་བོ་དངོས་སུ་བཀུག་ལ་བཞག ཡང་འོད་ཟེར་འཕྲོས་ཁོའི་ལྷ་སྲུང་བཀུག་ལ་བསྟིམ༔ དེ་ནས་རང་གི་མཐེ་བོང་དེ་དགྲ་སྟ་རྣོ་ངར་དང་ལྡན་པས་དགྲ་བོ་གཏུབས་པར་བསམ་ལ་ཕྲེང་བ་ཕྱིར་འདྲེན་ཅིང་བསད་སྔགས་ཟློག་གི་སྔགས་བཟླ༔ གཤིན་རྗེའི་ལས་མཁན་མང་པོས་དགྲ་སྟས་བྱད་མ་ལྷ་དང་བཅས་པ་གཏུབས་ནས་གཏོན་པའི་སྟེང་དུ་ཤ་ཁྲག་གི་ཕུང་པོ་ཆེན་པོ་ཡོད་པ་དེ༔ ལྕགས་སྲེག་གི་ཁང་སྒྲོམ་དུ་ལྷུང་བས་ཐུལ་གྱིས་ཚིག་སྟེ་ཐལ་བའི་ཕུང་པོ་གཅིག་ཏུ་གྱུར་ནས་ཡོད་པར་བསམ༔ དེ་ནས་རང་གི་དབུགས་ཐུབ་ཚད་ཀྱིས་བསྡམས་ལ་ཡིད་ཀྱིས་ཀི་ཡ་
ཀིས་ཞེས་མང་དུ་བསྒང་མི་ཐུབ་པ་དང་རླུང་འབུད་པ་དང་མཉམ་དུ་ཐལ་མོ་བརྡབ་པས༔ ཐལ་བ་དེ་རྣམས་ཐམས་ཅད་བེ་བྷ་སྭ་ཏ་འཁོར་བཅས་དང་མ་ཧེ་ལ་སོགས་པའི་ཞལ་དུ་སོང་༔ དེ་ཐམས་ཅད་་རིམ་པ་དགུའི་འོག་ཏུ་སོང་བར་བསམ་མོ༔ ས་མ་ཡ་རྒྱ་རྒྱ་རྒྱ༔ གུ་ཧྱ༔ ༈་ཡང་དགོང་མོ་ཉི་མ་མདུང་གང་ཙམ་ནས་ལ་ལས་ཐལ་ཁའི་ཚུན་ལ༔ གཤིན་རྗེ་མོ་འཇིགས་སུ་རུང་བ་ལག་ན་བཤའ་གྲི་དང་༔ རྒྱབ་ན་ཤ་སྐྱེ་ནག་པོ་ཁུར་བ་གཅིག་གིས་བཤའ་གྲིས་དགྲ་བོ་བཤས་ཤིང་བཅད་ནས་ཤ་སྐྱེར་བཅུག་སྟེ༔ ཉི་མ་དང་འགྲོགས་ནས་མཐའི་མུན་པའི་གླིང་དུ་སོང་བར་བསམ༔ བསད་སྔགས་དང་ཐལ་མོ་བརྡབ་པར་བྱའོ༔ ཐལ་མོ་བརྡབས་དམིགས་པས་འགྲུབ་བོ༔ ༈ ཨེ་མ་གནམ་ལྕགས་འབར་བའི་ཡིད་ཀྱི་སྤུ་གྲི་འདི༔ བསྐྱེད་རྫོགས་མཐར་ཕྱིན་སྐྱེས་བུའི་མཚོན་ཆ་ཡིན༔ རིམ་གཉིས་མི་ལྡན་གནོད་སེམས་ཞེ་སྡང་ཅན༔་དེ་འདྲས་བྱས་ཀྱང་བསྐྱེད་རིམ་མི་བརྟན་ཕྱི་ར༔ གཞན་ལ་གནོད་པར་མི་ནུས་རང་ཉིད་ལ༔ དམིགས་ངན་དེ་འདྲས་དམྱལ་བར་རང་ཉིད་སྐྱེ དེ་ཕྱིར་འདི་ནི་དབང་པོ་ཡ་རབ་ལས༔ དམ་མེད་ཕལ་པའི་སྤྱོད་ཡུལ་མ་ཡིན་ནོ༔ འོན་ཀྱང་བྱིས་པས་ལས་ངན་བསགས་དོགས་པས༔ དམིགས་པའི་མན་ངག་འགའ་ཞིག་ཞལ་ལས་ཤེས༔ འདི་བྲིས་བརྩེ་བ་བྲལ་བའི་བསྟན་ཆོས་དག༔ བརྩམས་པའི་
ཉེས་པ་འཇམ་དབྱངས་ཉིད་ལ་བཤགས༔ དགེ་བས་རྒྱལ་བའི་བསྟན་དགྲ་རྩད་བཅད་ནས༔ བཤད་སྒྲུབ་བསྟན་པ་ཡུན་རིང་འབར་བར་ཤོག༔ ས་མ་ཡ་ཁ་ཐཾ་རྒྱ་རྒྱ་རྒྱ༔ ཞེས་སྔགས་ནག་བསྐྱེད་རིམ་གྱི་ང་རྒྱལ་ཅན༔ རྫོགས་རིམ་ལ་མོས་པ་ལམ་དུ་བྱེད་པ་ཀརྨ་ཨ་རཱ་གས་བཀོད་པའོ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།