བླ་མའི་ཞལ་གསུང་ཟིན་བྲིས་སུ་བཏབ་པ་མདོར་བསྡུས།
བཟང་ལྡན་སྐབས་ཀྱི་ཤོག་དྲིལ་ནི། གཞི་དུས་ཀྱི་དྲེགས་པ་རྒྱུད་གསུམ་ལ། ཕྱིའི་རྒྱུད་གསུམ་ནི་སོགས་ནས། སྤྱོད་པས་སློབ་པ། རྒྱལ་བ་དགྱེས་པའི་ལམ་སྲོལ་བླ་ན་མེད་པའོ་གསུངས། ༈ ཁྱོད་ལ་ལས་འཕྲོ་ཡོད་པར་འདུག །དེ་སད་པ་ལ་ངས་བརྟག་པ་བྱས་དང་བྱས་ཚད་འདི་གནད་ཆེ་བར་འདུག་གསུངས། ༈ ཁྱོད་ཀྱིས་བླ་མ་ལ་ཕྱག་ཕྱི་སྒྲུབ་ལུགས་ཀྱིས་བླ་མ་བསྟེན་ལུགས་འདི་ཤིན་ཏུ་ལེགས་པས། ཁྱོད་ཚེ་མཇུག་ལ་རྐྱེན་ངན་བར་ཆད་ཀྱི་དབང་དུ་མི་འགྲོ་སྙམ་གསུངས། ༈ དྲག་པོ་སྔགས་རྒོད་ཀྱི་ལུས་ལ་དྲོད་ཀྱང་སྐྱེ། ཁྱོད་གསང་ཁྲིད་ཀྱི་མཚམས་ལ་སྡོད་པ་ལ། དང་པོ་ཕྱི་ཁྲིད་གྱི་བསྙེན་པ་མ་ཧཱ་ཀཱ་ལ་འབུམ་ཕྲག་དྲུག་ཅུ་རྩ་བཞི་ཅན་ཞིག་ཕུད། དེ་ནས་ཡིག་བརྒྱ་འབུམ་ཕྲག་གཅིག་འགྲོ་ངེས། དེ་ཡང་བདུད་རྩི་འབེབས་སྦྱང་གི་སྐབས་རྩ་གསུམ་འཁོར་ལོ་ལྔ་གསལ་བཏབ་ནས། འབེབས་སྦྱང་ཡང་ཡང་། དངོས་གཞིའི་རྫོགས་རིམ་ལམ་དུ་འགྲོ་བ་ལ་ངེས་པར་ཕན། དེའི་དུས་སུ་དངོས་གཞི་ལ་སྲུང་སྡོམ་དང་། སེམས་ཅན་ལ་བྱམས་སྙིང་རྗེ། བླ་མ་ལ་མོས་གུས་རྣམས་གལ་ཆེ། རྩུབ་ཉམས་ཆེན་པོའང་འབྱུང་ཉེན་ཆེ་ཡང་། དེ་ལ་འཇིག་སྐྲག་མི་བྱེད་པར་གང་ཤར་རང་སེམས་ཀྱི་ཆོ་འཕྲུལ། དེ་ཡང་བློ་འདས་བརྗོད་བྲལ་གྱི་ངང་ལ་བཞག་ནས། ལྟ་བའི་ངང་ལས་མ་གཡོས་པར་གནམ་ས་མགོ་འཇུག་ལོག་ཡོང་ཡང་། ཉམས་ང་བག་ཚ་སྤུ་ཙམ་འཆོར་མི་ཉན། ཆོས་སྐྱོང་འགྲུབ་པའི་ལྔ་ལྟས་ལ་རྩུབ་ཉམས་འོང་། ལྟ་བ་ལ་ཡིད་ཆེས་གཏིང་ནས་བསྐྱེད། ༈ ནང་རྩ་འཁོར་ཐམས་ཅད་དྭངས་གསལ། འཇའ་ཚོན་འདྲ་བ། དེའི་ནང་ཁམས་དཀར་དམར་གྱིས་གང་བ་དེ་ཡང་གདོས་བཅས་མ་ཡིན་པ་གསལ་ལ་ཐོགས་པ་མེད་པ། རྩ་གནས་ལ་བཀོད་པའི་ལྷ་རྣམས་ཀྱང་ནག་པོ་ཆེན་པོའི་ཡེ་ཤེས་ཀྱི་རོལ་བ། དེ་ཡང་རང་སེམས་གསལ་སྟོང་ཟུང་འཇུག་གི་རང་མདངས། ཆོས་ཉིིད་བརྗོད་པའི་མཐའ་ཐམས་ཅད་དང་བྲལ་བར་ཤེས་ནས། དེའི་སྟེང་ལ་མཉམ་པར་འཇོག་ཐུབ་དགོས། འདིའི་གེགས་སེལ་བོགས་འདོན་ཐམས་ཅད་བླ་མའི་རྣལ་འབྱོར་འདི་ཉིད་ཟབ་གསུངས། ༈ བསྙེན་མཚམས་སྐབས་ཀུན་སྤྱོད་རྩང་མི་རུང་། འཆལ་བར་སྤྱོད་ན་སྤུ་གྲི་རུམ་བཅུག་འདྲ་གསུངས་བ་ལྟ་བུ་ཡིན་གསུངས། ༈ ཆོས་ཀྱི་མཐུན་རྐྱེན་དཀོར་གདུལ་བྱ་བྱེད་པ་ལས། ནོར་སྒྲུབ་འདི་བཟང་། དེ་ལ་དམ་ཚིག་དང་བྱང་སེམས་གཉིས་མེད་ན་མི་འགྲུབ། ༈ ཁོང་གིས་བདེན་སྟོབས་བརྗོད་པའི་ཚེ་དེ་འདྲའི་སྣང་བ་དང་རྐྱེན་བར་ཆད་ཐམས་ཅད་རང་སེམས་སྐད་ཅིག་མའི་ཆོ་འཕྲུལ། དེ་ཡང་སྤྲོས་བྲལ་གྱི་ལྟ་བའི་ངང་ལ་བཞག་པ་གཡོ་འགུལ་མེད་པའི་ཁྲིགས་སེ་འགྲིགས་པ་ཞིག་འོང་གིན་འདུག ༈ །དེ་ཡང་རྗེ་ས་ཆེན་གྱིས། ཞིང་དང་དངོས་པོ་སོགས་གསུངས་བའི་གནད་འདི་འདྲ་ལ་གོ་བ་ཡིན་གསུངས། ༈ ཁྱོད་ལ་མགོན་པོའི་གསང་སྒྲུབ་སྐོར། དེ་སྔ་སྨྲས་པ་བརྗེད་མི་ཉན། ཚེ་རབས་སྔ་མ་ནས་ལྷ་འདི་ལ་ལས་འབྲེེལ་ཆེན་པོ་ཡོད་པར་འདུག་པ་ལ་འབད་རྩོལ་བསྐྱེད་ལ་རེམ་དགོས། དེ་ཡང་ལྟ་བའི་ངང་ནས་སྣང་བ་འདྲ་མི་འདྲ་ཤར་བ་ལ་སྐྲག་སྣང་གཏན་ནས་མི་སྐྱེ་བའོ། །ཅུང་ཟད་སྐྱེ་ཀྱང་རྟོགས་པའི་བོགས་འདོན་དུ་གྱུར་ནས། ཕྱིའི་སྣང་བ་རྣམས་ནང་རྩ་ཁམས་ཀྱི་རྟེན་འབྲེལ། དེ་སེམས་གསལ་སྟོང་ཟུང་འཇུག་གི་རོལ་པ། དེ་རིག་སྟོང་གཉིས་སུ་མེད་པའི་ཡེ་ཤེས་ལས་ནམ་ཡང་གཡོ་བ་མེད་པའི་ངང་ལས། གཡོ་འགུལ་མེད་པར་སྡོད་ཚུགས་པ་ཞིག་ཅི་ནས་རེམས་གསུངས། ༈ ཁོང་གིས་ད་ལྟ་མཉམ་པར་བཞག་མ་ཐག །རིག་པའི་ཡེ་ཤེས་རྗེན་ལ་བུད་ནས་དེའི་ངང་ལ་རྒྱུན་དུ་གནས་པ་ཞིག་རེད་འདུག་གསུངས། ༈ སྔོན་དུས་ལྷས་ཞལ་གཟིགས་པ་སོགས་པ་ངོ་མཚར་ཆེན་པོ་མེད། བལ་པོ་བྷ་རོའི་ཕྱག་ཆད་པ་འཇིགས་བྱེད་ཀྱིས་ཞལ་གཟིགས་ནས། ཁོང་ལ་ཐིམ་པའི་སྣང་བ་ཤར་ནས་ཕྱག་ཞབས་གསར་དུ་སྐྱེས་པ་དང་། དགེ་སློང་མ་དཔལ་མོའི་ཕྱག་ཆད་པ་སྤྱན་རས་གཟིགས་ཀྱིས་ཞལ་གཟིགས་ནས་སོར་ཆུད་པ་དང་། བྲམ་ཟེ་མཆོག་སྲེད་ཀྱི་སྦྱིན་བསྲེག་གི་མེའི་ནང་ནས་ཐུགས་རྗེ་ཆེན་པོའི་ཞལ་གཟིགས་པ་ལས། གྲུབ་པ་ཆེན་པོ་བརྒྱད་ཀྱི་སྒོ་ནས་འགྲོ་དོན་འབྱུང་བའི་དངོས་གྲུབ་ཞུས་པས་གནང་བ་ལྟར། སྔར་ལྷའི་ཞལ་མཐོང་བ་ལ་དངོས་གྲུབ་ཆེན་པོ་ཐོབ་པའི་ལོ་རྒྱུས་ཡོད། དེང་སང་ནི་དེ་འདྲ་མ་རེད་གསུངས། ༈ ཁྱོད་ལ་ནག་པོ་ཆེན་པོས་ཞལ་གཟིགས་འོང་ན་དངོས་གྲུབ་ཞུ་བ་ཆུང་མི་རུང་། ཀླུ་ཆེན་བརྒྱད་བྲན་དུ་འཁོར་བའི་དངོས་གྲུབ་སྩོལ་ནུས་ནའང་དོན་ཆེ་གསུངས། ༈ ཡང་ཁྱོད་ཀྱིས་སྣང་གསུམ་འདི་ལ་རེམས་ཞེས་གསུངས་པ་དེ། ཚེ་འདིར་ཞེན་པ་ཆོད་གསུངས་པ་ཡི་ནམ་སྙམ་པ་དང་། ༈ མི་ལ་རས་པས་རས་ཆུང་པའི་ང་རྒྱལ་བཅགས་ཚུལ་གསུངས་པ་དེས། ང་རྒྱལ་ཆུང་དགོས་གསུངས་པ་ཡིན་ནམ་སྙམ་པ་ཞིག་ཀྱང་གསུངས། ༈ དང་པོ་བླ་མ་དཀོན་མཆོག་ལ་ཕྱག་མཆོད་གསོལ་འདེབས་སོགས་མོས་གུས་དྲག་པོ་བསྒོམ། དེ་ནས་ཞིང་དང་བསམ་པ་དངོས་པོ་གསུམ་སོགས་གསུངས་པ་ལྟར་མཉམ་པར་ཞོགས། དེ་ནས་དབྱིངས་རིག་བསྲེས་ནས་མཉམ་པར་འཇོག་པ་རིམ་གྱིས་བྱེད་པ་ལས། དང་པོ་ཉིད་ནས་ཐམས་ཅད་ཆབས་གཅིག་ལ་འོང་བ་དཀའ་མོ་ཡིན་གསུངས། ༈ ཁྱོད་ཀྱིས་ཡུན་རིང་སྦྱངས་པའི་མདོ་སྔགས་ཀྱི་གཞུང་རྩ་བ་རྣམས་བརྗེད་དུ་མ་འཇུག་པར་བློ་གསོས་གྱིས་ལ་ལྟོས། ཐོས་བསམ་བསྒོམ་གསུམ་དཀྲུགས་མར་ཉམས་སུ་ལེན་པ་ཁེ་ཆེ་གསུངས། ༈ རྡོར་སེམས་བསྒོམ་བཟླས་སྐབས་རྩ་འཁོར་གསལ་བཏབ་དབང་བཞི་ལེན་པའི་དམིགས་པ་ནན་ཏན་བྱེད་དགོས། ༈ འཇོ་བེར་གསེར་མ་གར་གོས་ཏེ་བེར་རེད་གསུངས། སག་ཏིའི་ལྷམ་འཇའ་རིས་མ་རེད། ཁྱེད་ཀྱིས་གསང་ཁྲིད་བསྒོམ་དུས་བདེ་བ་སྒྲུབ་པའི་དམིགས་པ་བསྒོམ་ཞིང་། འཛར་འཛག་སྐྲ་བཤད་འཛངས་པ་ལྟ་བུ་ལ་སེམས་གཏད་ནས་སྐབས་སུ་མ་ཧཱ་ཀཱ་ལ་བཟླས། སྐབས་སུ་བསྒོམ་ན་ལུས་ལ་བདེ་དྲོད་སྐྱེས། དེས་ཁམས་སྙིགས་མ་ཟད་ནས་དྭངས་མ་འཕེལ། དེས་ལུས་ཟག་མེད་འཇའ་ལུས་དང་སེམས་རྟོག་མེད་ཆོས་སྐུ་འགྲུབ་པ་ཡིན་གསུངས། ༈ བདག་བསྐྱེད་རྒྱས་པ་འདོན་ལུགས་མ་བྱུང་ན་སྐད་ཅིག་གིས་རང་ལྷར་བསྐྱེད། རྩ་གསུམ་འཁོར་ལོ་ལྔ་གསལ་བཏབ་པས་རྫོགས་རིམ་བསྒོམ་ན་ཆོག་སྟེ། བ་རི་བི་ར་ཚར་གཅིག་ལས་དམིགས་པ་གསལ་བ་དེ་འདྲ་བཟང་བ་གསུངས་སོ། །དགེའོ། །འདི་ཡང་ཞལ་རྒྱུན་རྒྱས་པ་ལ་ཕལ་ཆེར་འབྱུང་མོད་དེ་ལས་མི་གསལ་བ་རེ་ཟུང་རེ་འདུག་པས་ཕྱོགས་གཅིག་ཏུ་བསྒྲིགས་པ་ལགས། གསུང་ངག་རིན་པོ་ཆེ་ལས་འཕྲོས་པའི་ཟབ་མོའི་ཟིན་བྲིས།