༈ ཞལ་གདམས་སྙིང་པོ།
༄༅། །ཞལ་གདམས་སྙིང་པོ་བཞུགས་སོ། །
༈ ཨོཾ་སྭཱསྟི། མཚན་ཙམ་བརྗོད་ཀྱང་དུཿཁའི་འཁྲུལ་འཁོར་འཇིག །གསོལ་འདེབས་ཐར་པའི་ལམ་ལ་ཡོངས་སྦྱོང་མཛད། །མཚུངས་མེད་བླ་མ་པད་འབྱུང་བདེ་བ་ཆེ། །བདག་གི་བླ་མ་ཡིན་ནོ་གུས་ཕྱག་འཚལ། །སྐལ་ལྡན་ཐར་འདོད་བདག་དང་ལས་མཐུན་པ། །ཡོད་ན་ཁོ་བོའི་སྙིང་གི་གཏམ་འདི་ཉོན། །དལ་འབྱོར་འདི་ནི་ཤིན་ཏུ་རྙེད་དཀའ་བ། །ཨུ་དུམྺ་ར་ལྟ་བུར་རབ་ཏུ་དཀོན། །ནམ་མཆི་ཆ་མེད་ཚེ་ལ་ངེས་མེད་པ། །བར་སྣང་གློག་ལྟར་སྐད་ཅིག་འགྱུར་ནས་འགྲོ། །རྒྱུ་འབྲས་ལས་འདི་ནམ་ཡང་མི་བསླུ་བས། །དགེ་སྡིག་སྤང་བླང་ལས་ལ་མཁས་པར་བྱོས། །ཐར་པའི་མཐུན་འཇུག་སངས་རྒྱས་གོ་འཕང་སྟེ། །དེ་ཡི་མཐུན་འཇུག་སྔགས་ཀྱི་ལམ་ཡིན་ལ། །དམ་ཚིག་ཆོས་ཀྱི་སྲོག་རྩ་དམར་པོས་གྲགས། །འདི་དག་ཀུན་ལ་གཅེས་པའི་ཞལ་གདམས་ཡིན། །ཉམས་ལེན་སྙིང་པོ་གནས་ལུགས་ཕྱག་རྫོགས་ཀྱང་། །རང་གི་སེམས་ཀྱི་ངོ་བོ་རིག་པ་ཉིད། །རང་ངོ་རང་གི་ཤེས་ལས་གཞན་པ་མེད། །དེ་ཡང་སེམས་ཉིད་ངོ་བོ་འདི་ལྟ་ཞེས། །དཔེ་གཟུགས་མཚན་ཉིད་བརྗོད་པའི་ཡུལ་མ་གྲུབ། །མེད་དོ་ཞེས་ན་འཁོར་འདས་ཐམས་ཅད་འཆར། །ཡོད་དོ་ཞེས་ནི་མཛུབ་ཏུ་འཛུགས་པ་མེད། །དེ་ནི་སེམས་ཉིད་གདོད་མའི་གཤིས་ལུགས་ཏེ། །གཤིས་ལུགས་དེ་ལས་ཚོལ་རྒྱུ་གཞན་ནི་མེད། །དེ་ཀ་མ་ཡེངས་རང་ངོ་ཤེས་བཞིན་སྐྱོང་། །ཡང་དག་དོན་ལ་བསྐྱང་བྱ་སྐྱོང་བྱེད་མེད། །འོན་ཀྱང་གཞི་ལམ་འོད་གསལ་མ་འདྲེས་བར། །མ་ཡེངས་དྲན་པས་སངས་རྒྱས་ཀུན་གྱི་ལམ། །ཡིན་ནོ་ཡིན་ངེས་དེས་ན་དྲན་པ་སྐྱོང་། །དེ་ཡང་བློ་འདས་ལྟ་བའི་མཐར་ཐུག་ཡིན། །དམིགས་གཏད་མེད་པ་བསྒོམ་པའི་མཐུན་འཇུག་ཡིན། །མ་ཡེངས་དྲན་པ་སྤྱོད་པའི་མཐུན་འཇུག་ཡིན། །རེ་དོགས་མེད་པ་འབྲས་བུའི་ངོ་བོ་ལགས། །མང་པོ་བརྗོད་ན་ཟད་པའི་མཐའ་མེད་ཀྱང་། །མདོར་བསྡུས་སྙིང་གཏམ་དེས་ཀྱང་ཕན་ཐོགས་འགྱུར། །དེ་སྐད་ལྷོ་ཡི་གཏེར་སྟོན་ལས་འཕྲོ་གླིང་། །གང་གི་གདུང་རིགས་དྲི་མ་མེད་པ་ལས། །འཁྲུངས་པའི་སྔགས་འཆང་པདྨ་ཚངས་དབྱངས་དང་། །དབུས་གྱུར་ལྷོ་རྒྱུད་རྒྱལ་རིགས་བྱ་བ་ཡི། །བློན་གྱུར་དད་གུས་བློ་གྲོས་ལང་ཚོ་ཅན། །ཚེ་རིང་རྣམ་རྒྱལ་ཞེས་པར་ཕན་སླད་དུ། །རྒྱལ་དབང་པདྨ་ཀ་རའི་ཕོ་ཉ་བ། །རིག་པ་འཛིན་པ་ཚེ་དབང་ནོར་བུ་ཞེས། །གངས་ཅན་རི་བོའི་ཁྲོད་དུ་གྲགས་པ་དེས། །གཉལ་ཡུལ་ས་ཡི་ཐིག་ལེ་བྲ་གོར་དུ། །སྐད་ཅིག་མ་ལ་བརྗོད་པར་བྱས་པ་སྟེ། །ཚིག་འདི་མ་བརྗེད་རྟག་ཏུ་དྲན་བྱས་ན། །ཐར་པ་མཆོག་གི་ལམ་ལ་འཛེག་པ་དང་། །ཀུན་ཏུ་དགེ་ལེགས་དཔལ་ལ་སྤྱོད་པར་ཤོག །མངྒ་ལཾ།