གཉིས་པ། ཇི་ལྟར་བསྲུང་བའི་ཐབས།
དོན་(༥༩)གཉིས་པ་ཇི་ལྟར་བསྲུང་བའི་ཐབས་ལ་བཞི་སྟེ། ཇི་ལྟར་བསྲུང་བའི་ཚུལ། བསྲུངས་པའི་ཕན་ཡོན། མ་བསྲུངས་པའི་ཉེས་དམིགས། ཉམས་ན་གསོ་ཐབས་སོ། །
དང་པོ་ནི་དྲན་པ་ཤེས་བཞིན་བག་ཡོད་གསུམ་གྱིས་བསྲུང་སྟེ། དམ་ཚིག་གི་སྤང་བྱ་མངོན་དུ་གྱུར་དུས་གཉེན་པོ་དྲན་པ་དང་། ཉམས་པའི་ཉེས་པ་དང་། བསྲུང་བའི་ཕན་ཡོན་ཤེས་བཞིན་དང་། སྒོ་གསུམ་བག་ཡོད་དང་ལྡན་པས་བག་མ་ཁྱོ་ཁྱིམ་དུ་ཞུགས་པ་ལྟར། དུས་རྟག་ཏུ་བཅའ་ཁྲིམས་ཀྱིས་མི་དགེ་བའི་ཕྱོགས་ལས་སེམས་བསྲུང་དགོས་ཏེ། དེ་ཉིད་ལས། དེས་ན་སྔགས་པས་འབད་པར་ཡང་། །ཤེས་བཞིན་གྱིས་ནི་ཟིན་པར་བྱ། །ཞེས་སོ། །
གཉིས་པ་ནི་ཚེ་འདིར་ཡིད་ལ་བསམ་པ་ཐམས་ཅད་འགྲུབ་ཅིང་། ཕྱི་མར་སངས་རྒྱས་ཐོབ་པ་སྟེ། དེ་ཉིད་ལས། དམ་ཚིག་མཆོག་དང་ལྡན་གྱུར་ན། །ཚེ་རིང་ནད་མེད་ལོངས་སྤྱོད་འཕེལ། །མཁའ་འགྲོས་སྟོང་གྲོགས་བྱེད་པ་དང་། །གྲུབ་པ་བརྒྱད་རྣམས་དབང་བསྒྱུར་ཞིང་། །ཐར་པའི་བདག་པོ་མཆོག་ལ་རེག །ཅེས་སོ། །
གསུམ་པ་ནི། འཁོར་ལོ་རིན་པོ་ཆེ་རྣམ་པར་བརྩེགས་པའི་རྒྱུད་ལས། སྐུ་ཡི་དམ་ཚིག་ལས་འདས་ན། །སངས་རྒྱས་སྐུ་ཞེས་ཚིག་དང་བྲལ། །འདི་ལྟར་ཁམས་གསུམ་སེམས་ཅན་རྣམས། །སྲོག་ནི་དུས་གཅིག་བཅད་པ་བས། །ཕས་ཕམ་པ་ནི་སྡིག་མཐའ་ཡས། །དེ་བཞིན་གསུང་གི་ཞིག་པ་ན། །སངས་རྒྱས་གསུང་གི་ཚིག་མི་གནས། །ཁམས་གསུམ་སེམས་ཅན་ཐམས་ཅད་ཀྱི། །ལྕེ་ཡི་དབང་པོ་དུས་གཅིག་ལ། །བཅད་པའི་སྡིག་པས་འདི་མཐའ་ཡས། །གལ་ཏེ་ཐུགས་ཉམས་གྱུར་པ་ན། །ཁམས་གསུམ་གང་བའི་བསམ་གཏན་པའི། །དོན་ལ་གནས་པའི་དགེ་སློང་རྣམས། །དུས་གཅིག་སེམས་དཀྲུགས་སེམས་སུན་ཕྱུང་། །སྡིག་པ་འདི་ནི་ཕ་མཐའ་ཡས། །ཞེས་པ་དང་། གསང་སྙིང་ལས། རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པ་དང་། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཞེས་སོ། །
བཞི་པ་ནི། དུག་ནད་ཅན་དུག་སོས་པ་བཞིན་དུ་སྔོན་བྱས་འགྱོད། ཕྱིན་ཆད་མི་བྱེད། ད་ལྟ་སྡོམ་བློ་དང་ལྡན་པས་བླ་མ་དང་རྡོ་རྗེ་སྤུན་སྲིང་གི་ཉེས་པ་ནི། དེ་དག་ཡོད་ན་མདུན་དུ་ཚོགས་དང་ཡོ་བྱད་ཀྱིས་མཉེས་པར་བྱས་ལ་(༦༠)བཤགས། མེད་ན་སྐུ་གཟུགས་ལ་སོགས་པའི་མདུན་དུ་བཤགས་ཤིང་ཡི་གེ་བརྒྱ་པ་བཟླས་པ་དང་། སྐོང་བཤགས་བྱ་བ་དང་། ཚོགས་བརྒྱ་རྩ་བརྒྱད་ལ་སོགས་པས་སོར་ཆུད་པའི་རྟགས་མ་ཕྱུང་གི་བར་བཤགས་སོ། །རྟགས་ནི་རྨི་ལམ་དུ་བླ་མ་དང་མཁའ་འགྲོས་ལེགས་སོ་བྱིན་པ་དང་། སྡིག་པ་དག་པའི་རྟགས་རྨི་ལམ་དུ་གོས་དཀར་པོ་གྱོན་པ་དང་། ཉི་ཟླ་ཤར་བ་དང་། མེ་ཏོག་གི་ཚལ་ན་འདུག་པ་ལ་སོགས་པའོ། །དེ་ཡང་ཞག་གིས་བར་མ་ཆོད་པའི་ཉེས་པ་ནི་དམ་ལས་འགལ་བ་སྟེ། དེ་མ་ཐག་ཏུ་བཤགས་པས་འདག་གོ། །ཟླ་བས་བར་མ་ཆོད་པ་ནི་ཉམས་པ་སྟེ། སྐོང་བཤགས་ལ་སོགས་པས་ལན་བདུན་གྱི་བར་དུ་བཤགས་པས་འདག་གོ། །ལོས་མ་ཆོད་པ་ནི་འདས་པ་སྟེ། ཚོགས་དང་བུ་དང་བདོག་པ་ཐམས་ཅད་ཀྱིས་བསྐངས་ན་སོས་སོ། །ལོ་གསུམ་ཚུན་ཆད་ནི་རལ་པ་སྟེ། སྲོག་གིས་བསྐངས་ན་སོས་སོ། །དེ་ཕན་ཆད་གསོར་མི་རུང་སྟེ། རྡོ་རྗེ་ཉི་མ་ལས། སྤྱིར་ནི་དམ་ཚིག་ཁྱད་པར་ལས། །དུས་ལས་ཁྱད་པར་ངེས་ཕྱེ་བ། དམ་ལས་འགལ་ཞེས་ཉེས་བྱས་གང་། །ཞག་གིས་བར་མ་ཆོད་པ་ནི། །དམིགས་པའི་ཡུལ་ལ་བཤགས་བྱས་ན། །དེས་ནི་སོར་ཡང་ཆུད་པའོ། །ཉམས་ཞེས་ཟླ་བས་མ་ཆོད་པར། །འགྱོད་པ་དྲག་པོས་བཤགས་པས་སོས། །དམ་ལས་འདས་ན་ལོ་དག་གིས། །བར་དུ་མ་ཆོད་བཤགས་པས་སོས། །ལོ་ནི་གཉིས་དང་གསུམ་དག་ལ། །དམ་ཚིག་རལ་པ་ཞེས་བྱ་བ། །མཆོག་ཏུ་དྲག་ན་གསོ་རུ་རུང་། །ལོ་གསུམ་དག་ལས་འདས་པ་ནི། །ནམ་ཡང་གསོ་བར་མི་རུང་སྟེ། །གལ་ཏེ་བླངས་ན་གཉིས་ཀ་འཚིག །ངེས་པར་ས་སྤྱོད་སྡུག་བསྔལ་ལས། །རྒྱུན་དུ་སྤྱོད་པ་ཁོ་ནའོ། །འགལ་ན་ཚོགས་ཀྱི་འཁོར་ལོས་བཤགས། །ཉམས་ན་རང་གི་བདོག་པས་བསྐང་། །འདས་ན་བུ་དང་ཆུང་མ་དང་། །ཉེ་འཁོར་ལུས་དང་ངག་དག་དང་། །ཡིད་དང་བདོག་པར་བཅས་པས་བསྐང་། །རལ་པ་རང་གི་སྲོག་གིས་བསྐང་། །ཞེས་སོ། །དེ་ཡང་དམ་ཚིག་གི་ཉེས་པ་རྨི་ལམ་དུ་བྱུང་ཡང་སད་མ་ཐག་མ་བཤགས་ན་ངན་སོང་དུ་སྐྱེ་ན། དངོས་སུ་བྱུང་བ་ལྟ་སྨོས་ཀྱང་ཅི་དགོས་པས་གསོ་བའི་ཐབས་ལ་བརྩོན་དགོས་ཏེ། བཀོད་པ་ཆེན་པོ་ལས། བླ་མ་དང་ནི་ཉེ་བའི་འཁོར། །དེ་བཞིན་རྡོ་རྗེ་སྤུན་སྲིང་ལ། །ངན་སྨྲས་ཚིག་གི་ཟུར་ཙམ་ཡང་། །བརྡའམ་དངོས་པོར་(༦༡)བརྗོད་མི་བྱ། །གལ་ཏེ་རྨི་ལམ་དག་ཏུ་ཡང་། །བྱུང་ན་ཡིད་ཀྱིས་བཤགས་པར་བྱ། །དངོས་དང་ཡིད་ཀྱིས་བྱས་པ་དག །གལ་ཏེ་དྲན་པས་མ་ཟིན་པར། །ཐལ་བར་གྱུར་ཀྱང་མ་བཤགས་ན། །ཐུར་དུ་བལྟས་ཏེ་དམྱལ་བར་འགྲོ། །ཞེས་སོ། །དེའང་སྐུའི་ཉམས་ན་རང་གི་ལུས་ཀྱི་ཆོས་སྤྱོད་ཕྱག་དང་བསྐོར་བ་མཆོད་བསྟོད་ལ་སོགས་པས་བཤགས་སོ། །གསུང་གི་ཉམས་ན་སྔགས་དང་ཁ་ཏོན་གཞན་གྱི་ཡོན་ཏན་བརྗོད་པ་གསུང་རབ་ཀློག་པ་ལ་སོགས་པ་བྱའོ། །ཐུགས་ཀྱི་ཉམས་ན་སྒོམ་སྒྲུབ་ལྟ་བ་ཏིང་ངེ་འཛིན་མོས་གུས་དག་སྣང་བྱ་བ་ལ་སོགས་པས་བཤགས་སོ། །དངོས་གྲུབ་ཐམས་ཅད་ཀྱི་རྩ་བ་དམ་ཚིག་སྐྱོན་མེད་པ་ཡིན་ལ། མ་མོ་མཁའ་འགྲོ་འདུ་བ་ཡང་དམ་ཚིག་གཙང་བ་ལས་འབྱུང་གི་ཉམས་ན་དེ་ཡི་གྲིབ་ཀྱིས་མི་འདུ་ཞིང་། གང་ཡང་མི་འགྲུབ་པས་དམ་ཚིག་སྐྱོན་མེད་ཁོ་ན་ལ་འབད་པར་བྱ་བ་ནི་གསང་སྔགས་ཀྱི་ཁྱད་ཆོས་ཡིན་ནོ། །