རྐང་ལོངས་དག་པར་བྱེད་ཚུལ།

ཟླ་རྐང་ལ་བརྟེན་ནས་གཟའ་ཚེས་ཕྱེད་དག་ཏུ་བསྒྲུབ་པ།

---

^{[མ་དཔེ་གཟིགས་ན་འདིར་གནོན།]}

གཉིས་པ་རྐང་ལོངས་དག་པར་བྱེད་ཚུལ་ལ། ཟླ་རྐང་ལ་བརྟེན་ནས་གཟའ་ཚེས་ཕྱེད་དག་ཏུ་བསྒྲུབ་པ། ཉི་རྐང་ལ་བརྟེན་ནས་གཟའ་ཉི་རྣམ་དག་ཏུ་བསྒྲུབ་པ། ཉི་མ་དང་ཚེས་ལ་བརྟེན་ནས་རེས་འགྲོགས་ཀྱི་ཟླ་སྐར་བསྒྲུབ་པ། ཟླ་ཉི་ལ་བརྟེན་ནས་སྦྱོར་བ་བསྒྲུབ་པ། ཕྱི་ཆའི་བྱེད་པ་བརྩི་བའོ། །དང་པོ་ནི། རིལ་པོའི་ངེས་པ་ད་ལྟར་བ་དེ་ལ། ༡༤བཅུ་བཞིས་བགོ་དགོས་ཏེ། ཟླ་རྐང་གི་རིམ་རིམ་མིན་གང་རུང་རེ་ལ་རྐང་གནས་ཀྱི་གྲངས་བཅུ་བཞི་རེ་ངེས་པའི་ཕྱིར། ཐོབ་ནོར་ཟུར་དུ་འཇོག་པ་ནི། བསྣོན་འབྲིད་བྱེད་པའི་མཚན་མ་སྟེ། འོག་ཏུ་རྐང་ལོངས་རྣམས་གཟའ་བར་པ་ལ་ནོར་མཉམ་ན་བསྣན་ཞིང་། མི་མཉམ་ན་དབྲི་དགོས་པའི་ཕྱིར། ལྷག་མས་རྐང་པ་འཛིན་པའི་བྱ་བ་བྱེད་པ་སྟེ། ཟོས་མ་ཟོས་ཀྱི་རྐང་མཚམས་ཡིན་པའི་ཕྱིར། གཟུང་བྱའི་རྐང་གནས་ནི་བཅུ་བཞིར་ངེས་ཏེ། མདའ་དབང་འབྱུང་མཚོ་མེ་མིག་གཟུགས་ཏེ་བདུན་པོ་ལུགས་འབྱུང་ལྡོག་ཏུ་གནས་པའི་ཕྱིར། འཛིན་ཚུལ་ནི། འཛིན་བྱེད་སྟོང་ན་རྐང་སྡོམ་དུ་ཐིག་ལེ་བྲི་སྟེ། རྐང་པ་མ་ཟོས་པ་ཡིན་པའི་ཕྱིར། གལ་ཏེ་འཛིན་བྱེད་གཅིག་ནས་བཅུ་གསུམ་གྱི་བར་གང་བྱུང་ཡང་། སྔ་རྐང་ལ་ཟོས་ཟིན་དང་། ཕྱི་རྐང་ལ་ཟ་རྒྱུ་སྡོམ་སྟེ། དཔེར་ན། བཅུ་བཞིས་བགོས་པའི་ལྷག་མར་བཅུ་གསུམ་བྱུང་ན། མ་ཟོས་པའི་རྐང་པ་ལྔ་པ་དང་། གཅིག་བྱུང་ན་ཟོས་པའི་རྐང་པ་ལྔ་པ་བསྡོམས་པ་བཞིན་ནོ། །ཆོ་
ག་དེས་ནི་རིལ་ཆ་གཉིས་སྡོམ་པའི་ལོངས་སྤྱོད་ཚེ་རེ་ལ་སུམ་སྟོང་བདུན་བརྒྱ་བརྒྱད་ཅུ་རྩ་གཅིག་རེ་སྤྱོད་པ་ལས། སུམ་སྟོང་བདུན་བརྒྱ་བརྒྱད་ཅུ་སྤྱོད་པ་དེ་རྟོགས་མོད་ཀྱི། འོན་ཀྱང་ད་དུང་ཆ་གཅིག་པོ་མ་ཚང་བ་དེ་ཤེས་པའི་ཕྱིར་ཆ་ཤས་སོ་སོར་བརྩི་དགོས་ཏེ། ཆ་ཤས་ཀྱི་གནས་ན་གང་འདུག་རྐང་བཟུང་མདུན་མས་བསྒྱུར་ལ། དུས་ཉིས་ཐོབ་པ་ཡང་དག་རྒྱུ་བའི་ཆུ་ཚོད་དང་། ལྷག་རྣམས་སྲང་དབུགས་རི་མཁའ་རིར་བྱས་ཏེ། ཐོབ་ནོར་རྣམས་ཀྱིས་སྔར་གྱི་རྐང་སྡོམ་ཆུ་ཚོད་ལ་སྔ་རྐང་ལ་ནོར་དང་ཕྱི་རྐང་ལ་བུ་ལོན་དུ་བྱས་པའི་ཚོགས་ནི་ཟླ་རྐང་གི་ལོངས་སྤྱོད་དོ། །དེས་གཟའ་བར་པའི་ལོངས་སྤྱོད་ལ་སྔར་གྱི་ནོར་མཉམ་མི་མཉམ་གྱིས་བསྲེ་སྦྱངས་བྱ་བ་ཡིན་ནོ། །འདིར་ཆ་ཤས་ཀྱི་འཁོར་ལོ་དུས་ཉིས་མཛད་པ་ནི་རགས་པ་སྟེ། ཞག་གི་ཆ་ཤས་སུམ་ཅུའི་བར་ཆད་པས་ཉེས་པ་ཆེར་མི་བསྐྱེད་ཅིང་། སུམ་ཅུར་ལོངས་ནས་དུས་ཉིའི་ཆ་རེ་བསྲེས་པས། ཆ་ཤས་སུམ་ཅུ་པོ་བསྲེས་པར་འགྱུར་བའི་ཕྱིར། རྒྱུན་ལ་བརྟེན་པའི་ཉེས་པ་ནི་དེ་བས་ཀྱང་མེད་དོ། །དེ་ལྟར་ནའང་། བློ་ལྡན་དག་ཞིབ་རྩིས་བྱ་བར་འདོད་ན། དྷྲཱུ་བའི་ཆ་ཤས་ཀྱི་གནས་ན་གང་འདུག་སུམ་ཅུས་བསྒྱུར་ལ། གང་རྩིའི་ཚེས་བསྲེས་ཏེ། རྐང་བཟུང་མདུན་མས་བསྒྱུར། དེ་ལ་ཆ་ཤས་ཀྱི་ཞག་གི་འཁོར་ལོ་སུམ་སྟོང་བདུན་བརྒྱ་བརྒྱད་ཅུས་བགོ་བ་སོགས་ཀྱིས་རྐང་ལོངས་བརྟག་པར་བྱ་བ་ཡིན་ནོ། །དཔེར་ན། ནག་དྷྲཱུ་སྟོང་པའི་ཚེས་གཅིག་གི་རྩིས་བྱེད་པ་ན། རིལ་ཆ་གཉིས་ཀའི་གནས་སུ་ཚེས་གྲངས་གཅིག་རེ་སྦྱིན་པས། རིལ་པོ་གཅིག་གིས་རིམ་རྐང་དང་པོ་ཆུ་ཚོད་ལྔ་པ་ཟིན་ཅིང་། ཆ་ཤས་གཅིག་གིས་རྐང་བཟུང་མདུན་མ་ཆུ་ཚོད་ལྔ་པ་དེའི་སུམ་སྟོང་བདུན་བརྒྱ་བརྒྱད་ཅུའི་ཆ་གཅིག་ལ། དབུགས་ཀྱི་ཉེར་གཅིག་ཆ་བཅུ་བྱུང་བ་གཉིས་མཉམ་དུ་བྱས་ཏེ། གཟའ་དྷྲཱུ་སྟོང་པའི་གནས་སུ་ཚེས་གཅིག་གི་རྟག་ལོངས་༠བསྣན་པ་ལ་རིམ་པའི་སྔ་རྐང་ཡིན་པའི་ཕྱིར་སྦྱིན་པས། ཆུ་ཚོད་དྲུག་ཅུ་རྩ་བཞི། སྲང་གསུམ། དབུགས་བཞི། ཉེར་གཅིག་ཆ་བཅུ། རི་མཁའ་རི་ཆ་སུམ་བརྒྱ་སོ་དྲུག་རྣམས་འབྱུང་བ་ཡིན་ནོ། །དེ་དག་གི་ལག་ལེན་ཡང་། གཟའ་དྷྲཱུར་གང་རྩིའི་རྟག་ལོངས་སྦྱིན། །རིལ་པོར་ཚེས་བསྲེས་མ་ནུས་བགོ། ཐོབ་པ་གཟུགས་མེ་
མི་མཉམ་ཞིང་། །མིག་མཚོ་ཐིག་ལེ་མཉམ་པ་ཡིན། །ལྷག་མས་ཟླ་བའི་རྐང་པ་བཟུང་། །མདའ་དབང་འབྱུང་མཚོ་མེ་མིག་གཟུགས། །ལྡོག་པ་དང་བཅས་ཡིད་ཀྱི་གནས། །སྔ་ཕྱི་ཟོས་དང་མ་ཟོས་སྡོམ། །རྐང་བཟུང་མདུན་མས་ཆ་ཤས་བསྒྱུར། །མ་ཟིན་རྐང་པ་དང་པོ་དང་། །མཁའ་རོ་དུས་དང་རི་མཁའ་རིས། །བསྒྱུར་ལ་དུས་ཉིས་རིམ་ཐོབ་ནོར། །རྒྱུ་བའི་དབྱུག་སྲང་དབུགས་ཆ་སྟེ། །དེ་ཡིས་རྐང་སྡོམ་ཆུ་ཚོད་ལ། །སྔ་རྐང་བསྲེ་ཞིང་ཕྱི་རྐང་དམན། །ཚོགས་དེ་གཟའ་ཡི་ལོངས་སྤྱོད་དུ། །ནོར་མཉམ་བསྣན་ལ་མི་མཉམ་དབྲི། །གལ་ཏེ་ཞིབ་མོར་རྩི་འདོད་ན། །དྷྲཱུ་བའི་ཆ་ཤས་མཁའ་མེ་ཡིས། །བསྒྱུར་ལ་གང་རྩིའི་ཚེས་གྲངས་བསྲེ། །དེ་ཉིད་རྐང་བཟུང་མདུན་མས་བསྒྱུར། །མཁའ་ཀླུ་རི་མེས་བགོས་ཐོབ་པ། །ཡང་རྒྱུའོ་ལྷག་རྣམས་མཁའ་རོ་དུས། །གཟུགས་མིག་གིས་བསྒྱུར་ཐོབ་པའི་ཚོགས། །སྔ་ཕྱི་རྐང་དང་གཟའ་ལོངས་ལ། །མཉམ་དང་མི་མཉམ་དབྲི་བསྣན་རྣམས། །སྔར་བཞིན་བྱས་པས་གཟའ་ཕྱེད་དག །ཅེས་སོ། །

ཉི་རྐང་ལ་བརྟེན་ནས་གཟའ་ཉི་རྣམ་དག་ཏུ་བསྒྲུབ་པ།

ཉི་མའི་རྒྱུན་བཅས་ཀྱི་ལོངས་སྤྱོད།

---

^{[མ་དཔེ་གཟིགས་ན་འདིར་གནོན།]}

གཉིས་པ་ཉི་རྐང་ལ་བརྟེན་ནས་གཟའ་ཉི་རྣམ་དག་ཏུ་བསྒྲུབ་པ་ལ། ཉི་མའི་རྒྱུན་བཅས་ཀྱི་ལོངས་སྤྱོད་དང་། ཞག་རེའི་ལོངས་སྤྱོད་དག་པར་བྱེད་པའི་ཚུལ་གཉིས། དང་པོ་ནི། ཉི་མའི་ངེས་པ་ད་ལྟར་བ་དེ་གནས་གཉིས་སུ་བཀོད་པའི་ཕྱོགས་གཅིག་ལ་སྐྱེས་ཁྱིམ་སྦྱང་དགོས་ཏེ། དུས་ཀྱི་ཐོག་མ་ལུག་ཁྱིམ་ནས་རྩོམ་ལ། ཉི་མ་ནི་ཀརྐ་ཊ་ཡི་ཁྱིམ་གྱི་ཐོག་མར་སྐྱེས་པས། རང་མ་སྐྱེས་གོང་གི་ཁྱིམ་ལུག་གླང་འཁྲིག་གསུམ་གྱི་རྒྱུ་སྐར་སྒང་པོ་དྲུག་དང་། རྐང་པ་གསུམ་གྱི་ཆུ་ཚོད་ཞེ་ལྔ་པོ་སྦྱངས་དགོས་པའི་ཕྱིར་ཏེ། རང་སྐྱེས་པ་ན་རྐང་ལོངས་ཀྱི་ཐོག་མ་རྩོམ་པ་རྟེན་འབྲེལ་གྱི་ཆོས་ཉིད་ཡིན་པས། ཁྱིམ་གྱི་ཐོག་མ་ལུག་ཁྱིམ་ནས་རང་མ་སྐྱེས་གོང་གི་ཁྱིམ་གསུམ་མ་སྦྱངས་ན་རང་གི་རྐང་མཚམས་མི་རྟོགས་པའི་ཕྱིར་རོ། །གལ་ཏེ་སྐྱེས་ཁྱིམ་སྦྱོང་དུ་མ་ལྡང་ན་ནི་སྐར་གནས་སུ་རྒྱུ་སྐར་གྱི་འཁོར་ལོ་བསྲེས་ནས་གོང་བཞིན་སྦྱངས་དགོས་ཏེ། འཁོར་ལོ་ནི་བགྲོད་བྱའི་ཡུལ་ཡིན་པ་གང་ཞིག །རང་གི་དང་པོར་གང་བསྐྱེད་དྷྲཱུ་བའི་སྐབས་སུ་འཁོར་ལོ་དོར་བ་དེའི་སྟེང་ནས་སྦྱངས་པས། རྐང་རྒྱུན་རྟོགས་པའི་ཆེད་ཡིན་པའི་

---

^{[མ་དཔེ་གཟིགས་ན་འདིར་གནོན།]}

ཕྱིར། སྦྱངས་རྗེས་འཁོར་ལོ་ཕྱེད་ལྷག་ན་དོར་བས་ཆོག་སྟེ། རང་སྐྱེས་པའི་ཁྱིམ་ནས་འགོ་བཟུང་བའི་ཀརྐ་ཊ་སེང་གེ་བུ་མོ་གསུམ་དུ་རིམ་པའི་སྔ་རྐང་ལ་སྤྱད་པའི་གུན། སྲང་སྡིག་གཞུ་གསུམ་དུ་རིམ་པའི་ཕྱི་རྐང་ལ་སྤྱད་པ་དེས་བསབས་པས་ནོར་བུ་ལོན་ཁ་དག་ནས་རྟག་པའི་ལོངས་སྤྱོད་ལ་བྲི་གང་མེད་པར་གནས་པའི་ཕྱིར། དེ་བས་ན་འཁོར་ལོ་མ་བསྣན་པར་འཁོར་ཕྱེད་དོར་ན་རིམ་མིན་གྱི་སྔ་རྐང་ཆུ་བུམ་ཉ་གསུམ་དང་། བསྣན་ནས་དོར་ན་རིམ་མིན་གྱི་ཕྱི་རྐང་ལུག་གླང་འཁྲིག་གསུམ་གང་རུང་ལ་གནས་ཤིང་། གལ་ཏེ་འཁོར་ཕྱེད་མ་དོར་ན་རིམ་པའི་སྔ་རྐང་ཀར་སེང་བུ་མོ་གསུམ་དང་། དེའི་ཕྱི་རྐང་སྲང་སྡིག་གཞུ་གསུམ་གང་རུང་ལ་གནས་པ་ཡིན་ནོ། །དེ་ལྟར་སྐྱེས་ཁྱིམ་སྦྱངས་པ་སོགས་བྱས་པའི་ལྷག་མ་ནི་རྐང་འཛིན་དག་པ་སྟེ། དེའི་སྐར་གནས་ཆུ་ཚོད་ཀྱི་གནས་སུ་གསིལ་བ་ལ་ཁྱིམ་རེའི་ཆུ་ཚོད་ཀྱི་གྲངས་བརྒྱ་སོ་ལྔས་བགོད་དགོས་ཏེ། རྐང་མཚམས་ནས་བགྲངས་པའི་ཁྱིམ་ཇི་ཙམ་འདས་བརྟག་དགོས་པའི་ཕྱིར། དེའང་འཁོར་ཕྱེད་དོར་ནས་ཆུ་སྲིན་དང་། མ་དོར་ན་ཀརྐ་ཊ་ནས་རྐང་མཚམས་འཛིན་དགོས་པས། འདིར་དོར་བའི་དབང་དུ་བྱས་ཏེ། ཐོབ་པ་ལ་བཞི་ལྟ་བུ་བྱུང་བའི་ཚེ། དེ་བཞི་ནི་ཆུ་བུམ་ཉ་ལུག་བཞི་ཡིན་ལ། ཐོབ་པ་དེས་རྐང་པ་འཛིན་པའི་ཚེ། མ་འོངས་པ་ན་སྤྱོད་རྒྱུའི་གླང་གི་ཆུ་ཚོད་བཞི་དང་། འཁྲིག་པའི་དྲུག་སྡོམ་པའི་ཆུ་ཚོད་བཅུ་སྡོམ་པ་ཡིན་ཏེ། སྔ་རྐང་ལ་སྤྱད་ཟིན་དང་། ཕྱི་རྐང་ལ་སྤྱོད་འགྱུར་སྡོམ་དགོས་པ་གང་ཞིག །འདིར་དོར་བ་རིམ་མིན་གྱི་ཕྱི་རྐང་ཡིན་པའི་ཕྱིར། དེའི་རྗེས་སུ་ལྷག་མ་རྣམས་རྐང་བཟུང་མདུན་མས་བསྒྱུར་ནས་རང་རང་གི་འཁོར་ལོས་ཆུ་ཚོད་དུ་དྲིལ་བ་ལ། བརྒྱ་སོ་ལྔས་བགོས་པས་ཐོབ་པ་ནི་ཡང་དག་རྒྱུ་བའི་ཆུ་ཚོད་དེ། རང་ཟ་བཞིན་པའི་རྐང་པ་དེའི་སྟེང་དུ་ཉི་མས་སླེབ་ནས་གང་རྩིས་ཚེས་དེ་རྫོགས་པ་ཡན་ལ་སྤྱད་པའི་རྐང་པའི་ཆུ་ཚོད་དོ། །ལྷག་མ་དྲུག་ཅུ་དང་། དྲུག་དང་། རི་རོས་བསྒྱུར་ནས་རང་རང་གི་ཆ་བཅུག་ལ་བརྒྱ་སོ་ལྔས་བགོས་པའི་ཐོབ་པ་རྣམས་ནི་ཡང་དག་རྒྱུ་བའི་ཆུ་སྲང་ལ་སོགས་པའོ། །དེ་ནས་ཡང་དག་རྒྱུ་བའི་ལོངས་སྤྱོད་དེ་རྣམས་ཀྱིས་སྔ་རྐང་ཡིན་ན་རྐང་སྡོམ་ལ་བསྣན་ཅིང་། ཕྱི་རྐང་ཡིན་

---

^{[མ་དཔེ་གཟིགས་ན་འདིར་གནོན།]}

ན་རྐང་སྡོམ་ནས་དབྲི་དགོས་ཏེ། རྐང་སྡོམ་ནི་སྔ་རྐང་ལ་སྤྱད་ཟིན་དང་། ཕྱི་རྐང་ལ་སྤྱོད་འགྱུར་ཡིན་པས། སྔ་རྐང་དུ་ནོར་རམ་བུ་ལོན་འཕེལ་བ་དེ། ཕྱི་རྐང་དུ་དབྲི་བས་དག་ཚད་ཡིན་པའི་ཕྱིར། དེ་ལྟར་བྱས་པའི་རྐང་རྒྱུན་རྣམས་རེས་གཟའ་ཕྱེད་དག་དང་། ཉི་བར་ཅིག་ཤོས་ལ་འཁོར་ཕྱེད་དོར་ན་བྱིན་ཞིང་། མ་དོར་ན་དབྲི་དགོས་ཏེ། ཀརྐ་ཊ་ནས་གཞུའི་བར་རིམ་པའི་ཁྱིམ་དྲུག་ལ་རྐང་ལོངས་རྣམས་རྟག་ལོངས་ལ་བུ་ལོན་དང་། ཆུ་སྲིན་ནས་འཁྲིག་པའི་བར་རིམ་མིན་གྱི་ཁྱིམ་དྲུག་ལ་ནོར་དུ་འགྲོ་བའི་ཕྱིར། འོ་ན་འདིར་གཟུང་བྱའི་རྐང་པ་ལ་དུས་མཚོ་ཟླ་བ་འོང་བའི་རྒྱུ་མཚན་གང་ཞེ་ན། ཚེས་ཞག་སོ་གཅིག་ཅུང་མེད་རེ་ལ་ཉི་ཁྱིམ་ལོངས་པའི་དོན་གྱིས་ཡིན་ཏེ། ཚེས་ཞག་གཅིག་༠གི། ཟླ་༠ཆུ་༠དུས་༠འབྲས་རྣམས་སུམ་ཅུས་བསྒྱུར་བའི་སྟེང་དུ། ཚེས་ཞག་གཅིག་གི་བཅུ་གསུམ་ཆ་བཅུ་གཉིས་པའི། ཟླ་༠ཆུ་༠དུས་༠འབྲས་སོ་སོར་བསྣན་པས་ཆུ་ཚོད་ཀྱི་སར་རང་རང་གི་རྐང་པའི་ཆུ་ཚོད་ཀྱི་གྲངས་གསལ་པོར་སྟོན་པའི་ཕྱིར། དེ་དག་གི་ལག་ལེན་ཡང་། ཉི་བར་གནས་གཉིས་གཅིག་ལ་ནི། །སྐར་དྲུག་ཆུ་ཚོད་ཞེ་ལྔས་སྦྱངས། །མ་ལྡང་འཁོར་ལོ་བསྣན་ལ་སྦྱངས། །སྦྱངས་ཤུལ་འཁོར་ཕྱེད་ལྷག་ན་དོར། ༡༣། ལྷག་མའི་སྐར་མ་མཁའ་རོས་བསྒྱུར། །ཆུ་ཚོད་བཅུག་ལ་མདའ་ཡོན་ཟླས། །བགོས་ཐོབ་ནོར་གྱིས་ཉི་རྐང་བཟུང་། །དུས་མཚོ་ཟླ་བ་སྔ་རྐང་སྟེ། །ཕྱི་རྐང་དེ་ལྡོག་རོ་ཡི་གནས། །སྔ་ཕྱི་ཟོས་དང་མ་ཟོས་སྡོམ། །རྐང་བཟུང་མདུན་མས་ལྷག་རྣམས་བསྒྱུར། །མ་ཟིན་དང་བཟུང་རང་འཁོར་དྲིལ། །མདའ་ཡོན་ཟླས་ཐོབ་ཡང་རྒྱུའི་དབྱུག །ལྷག་མ་མཁའ་རོ་དུས་རི་རོས། །བསྒྱུར་བཅུག་ཐོབ་པ་སྲང་དབུགས་ཆ། །སྔ་རྐང་ཆུ་ཚོད་གཉིས་བསྲེ་ཤིང་། །ཕྱི་རྐང་རྒྱུ་བས་སྦྱངས་ལྷག་རྣམས། །གཟའ་ཉི་ཕྱེད་དག་ལོངས་སྤྱོད་དུ། །འཁོར་ཕྱེད་དོར་བསྣན་མ་དོར་ཕྲི། །དེ་ཡིས་གཟའ་ཉི་རྣམ་པར་དག །རེས་གཟའ་གང་ཤར་ཉིན་ཞག་རེར། །སྤྱད་པས་སང་གི་ནམ་ལངས་འཕོ། །དེ་ལོངས་གནས་སུ་གང་ཤར་བ། །རྫོགས་ཚེ་ཕྱི་མའི་ཚེས་ཞག་འཇུག །གཟའ་གཅིག་ལན་གཉིས་ལྡབ་གྱུར་ན། །ཆུ་ུཚོད་མང་བའི་ཚེས་དེ་ཆད། །མཆོངས་ན་ཆུ་ཚོད་ཉུང་བ་ལྷག །ཉི་མའི་ལོངས་སྤྱོད་
རང་ཉིད་ཀྱིས། །སྐར་གནས་དེ་སྟེང་སླེབ་པ་ན། །དེ་ཉིད་ཚེས་ལོངས་རྫོགས་རྫོགས་ཡན། །སྤྱད་ཟིན་འདས་པའི་ལོངས་སྤྱོད་འཆར། །ཞེས་སོ། །

ཞག་རེའི་ལོངས་སྤྱོད་དག་པར་བྱེད་པའི་ཚུལ།

---

^{[མ་དཔེ་གཟིགས་ན་འདིར་གནོན།]}

གཉིས་པ་ཁྱིམ་རང་རང་གི་ཞག་རེའི་ཉི་མའི་རྐང་ལོངས་དག་པར་བྱེད་པའི་ཚུལ་ནི། ཉི་མའི་ཚེས་ཞག་རེའི་ཡུལ་ལོངས། ༠རྣམས་གནས་གསུམ་དུ་བྱས་པའི། གཅིག་གི་གནས་ཐམས་ཅད་རྐང་པ་དྲུག་པས་བསྒྱུར་ནས་ཆུ་ཚོད་དུ་དྲིལ་བ་ལ་བརྒྱ་སོ་ལྔས་རིམ་པར་བགོས་པའི་རྐང་ལོངས་༠རྣམས། རྟག་ལོངས་གནས་གཉིས་མ་ལ་སྦྱིན་པས། ཉི་བར་གཞུ་ཆུ་སྲིན་གྱི་ཁྱིམ་ན་གནས་པའི་ཚེ་ཚེས་ཞག་རེ་ལ་སྤྱོད་པའི་ལོངས་སྤྱོད་༠དང་གནས་གསུམ་པ་ལ་ཕྲི་བས་འཁྲིག་ཀར་གཉིས་ཀྱི་ལོངས་སྤྱོད་༠དེ་རྐང་པ་དྲུག་པའི་བྱ་བའོ། །ཡང་རྟག་ལོངས་གནས་གསུམ་གྱི་དང་པོ་རྐང་པ་བཞི་པས་བསྒྱུར་ནས་བརྒྱ་སོ་ལྔས་བགོ་བ་སོགས་སྔར་བཞིན་བྱས་པའི་རྐང་ལོངས་༠རྣམས། གནས་གཉིས་པ་ལ་སྦྱིན་པས་སྡིག་བུམ་གྱི་ལོངས་སྤྱོད་༠དང་། གསུམ་པ་ལ་ཕྲི་བས་གླང་སེང་གི་ལོངས་སྤྱོད་༠དེ་རྐང་པ་གཉིས་པའི་བྱ་བའོ། །ཡང་རྟག་ལོངས་གནས་གསུམ་གྱི་དང་པོ་རྐང་པ་གཅིག་པས་བསྒྱུར་ལ་བརྒྱ་སོ་ལྔས་བགོ་བ་སོགས་བྱས་པའི་རྐང་ལོངས་༠རྣམས། གནས་གཉིས་པ་ལ་སྦྱིན་པས་སྲང་དང་ཉ་ཁྱིམ་གྱི་ལོངས་སྤྱོད་༠དང་། གསུམ་པ་ལ་ཕྲི་བས་ལུག་དང་བུ་མོའི་ལོངས་སྤྱོད་༠དེ་རྐང་པ་གཅིག་པའི་བྱ་བའོ། །དེ་དག་གི་སྡོམ་ཡང་། རྐང་པ་དྲུག་པའི་ལོངས་སྤྱོད་དག །ཆུ་སྲིན་གཞུར་སྦྱིན་འཁྲིག་ཀར་དམན། །བཞི་པའི་ལོངས་སྤྱོད་བུམ་སྡིག་ལ། །བསྣན་ཅིང་གླང་སེང་གཉིས་ལ་ཕྲི། །གཅིག་པའི་རྐང་ལོངས་ཉ་སྲང་ལ། །སྟེར་ཞིང་ལུག་དང་བུ་མོར་དམན། །ཞེས་སོ། །

ཉི་མ་དང་ཚེས་ལ་བརྟེན་ནས་རེས་འགྲོགས་ཀྱི་ཟླ་སྐར་བསྒྲུབ་པ། #div6 ཟླ་ཉི་ལ་བརྟེན་ནས་སྦྱོར་བ་བསྒྲུབ་པ།

---

^{[མ་དཔེ་གཟིགས་ན་འདིར་གནོན།]}

གསུམ་པ་ཉི་མ་དང་ཚེས་ལ་བརྟེན་ནས་རེས་འགྲོགས་ཟླ་སྐར་བསྒྲུབ་པ་ནི། ཉི་དག་གནས་གཉིས་སུ་བྱས་པའི་གནས་གཅིག་ལ་ཆུ་ཚོད་ང་བཞི་གང་བརྩིའི་ཚེས་ཀྱིས་བསྒྱུར་ནས་སྟེར་དགོས་ཏེ། ཉི་མས་ཡུལ་སྟེང་ནས་ཞག་རེ་ཞིང་སྤྱོད་པའི་ཆུ་ཚོད་བཞི། སྲང་ཉེར་གཅིག་སོགས་ཟླ་བས་ཀྱང་སྤྱོད་པ་གང་ཞིག །དེའི་སྟེང་དུ་རང་གི་ཐུན་མོང་མ་ཡིན་པའི་རྟག་ལོངས་ཆུ་ཚོད་ང་བཞི་རེས་ཉི་མ་ལས་ལྷག་པོར་སྤྱོད་པའི་ཕྱིར། དེས་ན་རང་གི་ཐུན་མིན་
རྟག་ལོངས་ནི་ཆད་ལྷག་མེད་པར་རྣམ་པ་ཐམས་ཅད་དུ་སྤྱོད་ལ། ཐུན་མོང་པའི་རྟག་ལོངས། ཆུ་ཚོད་བཞི། སྲང་ཉེར་གཅིག་སོགས་ནི་རྒྱུན་ལ་ལྟོས་ནས་གཅིག་གུན་གཅིག་གིས་བསབས་པས། སྤྱད་པ་ལྟར་སྣང་བ་མ་གཏོགས་ཉི་རྐང་འཕེལ་འགྲིབ་ཀྱི་དབང་གིས་རྟག་ཏུ་ཆད་ལྷག་མེད་པར་སྤྱོད་པ་མ་ཡིན་ཏེ། ཟླ་ཉི་གཉིས་གནམ་སྟོང་ལ་གཞི་གཅིག་ཏུ་གནས་ནས་ཉི་འོད་ཀྱིས་ཟླ་འོད་ཐམས་ཅད་ཟིལ་གྱིས་མནན་པ་ལས། ཚེས་གཅིག་ནས་ཉི་མ་ལས་དཀར་ཆ་གཅིག་འཆར་བའི་འགོ་རྩོམ་པའི་ཚེ། ཉི་རྐང་གི་འཕེལ་འགྲིབ་དང་བཅས་པའི་རྟག་ལོངས་ཉི་མ་དང་ཐུན་མོང་དུ་སྤྱད་པའི་སྟེང་དུ་རང་གི་ཐུན་མིན་རྟག་ལོངས་ཆུ་ཚོད་ང་བཞི། ཉིན་རེ་བཞིན་སྤྱད་པས་ཚེས་བཅོ་ལྔའི་རང་གི་རྟག་ལོངས་སྤྱད་མཐར་དཀར་ཆ་རྫོགས་ནས་ཉ་གང་བར་སྣང་བ་གང་ཞིག །ཡང་ཚེས་བཅུ་དྲུག་ནས་ཐུན་མིན་ལོངས་སྤྱོད་ཀྱི་དབང་གིས་ཉི་མ་དང་ཅུང་ཟད་ཉེ་བའི་འགོ་རྩོམ་པས་ནག་ཆ་རེ་འཕེལ་བར་སྣང་བའི་ཕྱིར་རོ། །དེ་ལྟར་ཡང་དབང་མདོར་བསྟན་ལས། ཇི་ལྟར་ཟླ་ཤར་རིམ་པ་ཡིས། །ཆ་རྣམས་ཀྱིས་ནི་རྫོགས་པར་འགྱུར། །གྲིབ་མ་མཉམ་པ་རྫོགས་པ་སྟེ། །ཟླ་བ་ཆད་དང་རྫོགས་པ་མིན། །ཞེས་དང་། མཛོད་ལས་ཀྱང་། ཉི་མ་དང་ནི་ཉེ་བ་ལས། །རང་གི་གྲིབ་མས་འགྲིབ་པར་སྣང་། །ཞེས་སོ། །རྒྱུ་མཚན་དེའི་ཕྱིར་ཟླ་བ་ལ་རང་སྟོབས་ཀྱི་རྐང་པ་མེད་ཀྱང་། ཉི་རྐང་གི་ནོར་བུ་ལོན་ལ་བརྟེན་ནས་འཕེལ་འགྲིབ་ཡོད་པར་འདོད་དགོས་ཏེ། དཔེར་ན་ཉི་རྐང་གིས་ཚེས་ལ་ནོར་བུ་ལོན་དུ་འགྱུར་བ་བཞིན་ནོ། །དེ་ལྟར་ཉི་དག་ལ་རང་གི་ཐུན་མིན་གྱི་རྟག་ལོངས་བསྣན་པ་ནི་ཚེས་འཁྱུད་ཟླ་སྐར་ཞེས་བྱ་སྟེ། ཚེས་དེ་ཟད་ཚུན་ཆད་ཀྱི་ལོངས་སྤྱོད་ཡིན་ཞིང་། ཉིན་ཞག་སྔ་ཕྱི་གཉིས་ཀའི་རེས་གཟའ་དང་འགྲོགས་པའི་ཆ་ཡོད་དོ། །དེའི་སྟེང་ནས་གང་བརྩིའི་ཚེས་ཀྱི་ལོངས་སྤྱོད་མན་ཆད་ཀྱིས་སྦྱངས་པས། ཞག་དེའི་ནམ་ལངས་ཕན་ལ་སྤྱད་ཟིན་ལོངས་སྤྱོད་འཆར་བའི་ཕྱིར། ལྷག་དེས་བརྩི་བཞིན་པའི་ཉིན་ཞག་དེའི་ཚད་དྲུག་ཅུ་ལ་སྦྱངས་ལྷག་རྣམས་ནི་རི་མོར་ཤར་བའི་སྐར་མ་དེའི་སྟེང་དུ་ཟླ་བས་སྤྱད་ནས་འཕོ་བ་ཡ ིན་པས་རེས་འགྲོགས་ཟླ་སྐར་ཞེས་བྱའོ། །དེ་ལྟ་ནའང་ཚེས་ཀྱི་དུས་ལོངས་དང་ཟླ་བའི་ཡུལ་
ལོངས་གཉིས་སྟོབས་མི་མཚུངས་པའི་སྐྱོན་ཡོད་དོ་ཞེ་ན། ཟླ་བ་རང་གི་དཀར་ཆ་འཕེལ་འགྲིབ་རེ་བཞག་པའི་ལོངས་སྤྱོད་ལ་ཡུལ་དུས་གཉིས་ལས། དུས་ཀྱི་ཚེས་ལོངས་ང་དགུ་སོགས་ཀྱི་ཡུན་ཚད་དང་། ཡུལ་སྟེང་ནས་བགྲོད་པའི་ལོངས་སྤྱོད་ང་བརྒྱད་སོགས་རགས་རྩིས་ལ་སྟོབས་མཚུངས་པས་སྐྱོན་མེད་དེ། ཞིབ་མོར་འདོད་ན་ཡུལ་དུས་ཀྱི་ཆ་རྩིས་ནས་བརྟགས་པས་ཤེས་པར་འགྱུར་རོ། །དེ་དག་གི་ལག་ལེན་ནི། ཉི་དག་གནས་གཉིས་གཅིག་ལ་ནི། །ཆུ་ཚོད་མཚོ་དབང་ཚེས་བསྒྱུར་སྦྱིན། །འཁོར་དྲིལ་ཚེས་འཁྱུད་ཟླ་སྐར་ཏེ། །དེ་ལ་ཚེས་ཀྱི་ལོངས་སྤྱོད་ཀྱིས། །སྦྱངས་ལྷག་རེས་འགྲོགས་ཟླ་སྐར་ཡིན། །ལྷག་དེས་དྲུག་ཅུ་ལ་ཕྲི་ལྷག །ཟད་ཚེ་ཕྱི་མའི་སྐར་མས་སླེབས། །ཞེས་སོ། །

ཟླ་ཉི་ལ་བརྟེན་ནས་སྦྱོར་བ་བསྒྲུབ་པ།

---

^{[མ་དཔེ་གཟིགས་ན་འདིར་གནོན།]}

བཞི་པ་ཟླ་ཉི་ལ་བརྟེན་ནས་སྦྱོར་བ་བསྒྲུབ་པ་ནི། ཉི་དག་དང་རེས་འགྲོགས་ཟླ་སྐར་གཉིས་གནས་མཚུངས་སུ་བསྲེས་ནས་རང་འཁོར་དྲིལ་ལ། སྟེང་མ་ཉེར་བདུན་གྱིས་དོར་ལྷག་ནི་སྦྱོར་བ་དག་པ་སྟེ། ཉི་ཟླ་གཉིས་ཀྱི་རྟག་ལོངས་བསྲེས་པའི་ཆུ་ཚོད་རེ་གཉིས་རྗེས་འབྲང་དང་བཅས་པ་ནི་སྦྱོར་བའི་༠རྟག་ལོངས་ཡིན་པ་གང་ཞིག་དེ་ཉི་རྐང་གིས་ཉི་ཟླའི་ལོངས་སྤྱོད་གཉིས་ཀ་ལ་ནོར་བུ་ལོན་དུ་བྱས་པས་དེ་ཙམ་ཞིག་སྦྱོར་བའི་རྟག་ལོངས་དེའི་སྟེང་ནས་ཀྱང་འཕེལ་འགྲིབ་བྱེད་པས་རྒྱུན་ལ་ལྟོས་ནས་སྤྱོད་པའི་རྟག་ལོངས་ཡིན་པའི་ཕྱིར་ཏེ། ཚེས་ཞག་རེ་ལ་ཉི་མ་དང་ཟླ་བས་གང་སྤྱད་སྡོམ་པའི་གྲངས་དེ་ཙམ་ཞིག་སྤྱོད་པར་སྣང་བའི་ཕྱིར། དེ་ཡང་ཆུ་ཚོད་མན་ཆད་ནས་ནམ་ལངས་ཕན་ལ་འདས་པའི་གྲངས་ཏེ། རེས་འགྲོགས་ཟླ་སྐར་དང་ཉི་དག་བསྲེས་པའི་གནད་ཀྱིས་སོ། །ལག་ལེན་ནི། ཉི་དག་རེས་འགྲོགས་ཟླ་སྐར་དག །བསྲེས་ནས་སྟེང་དྲིལ་འཁོར་ལོས་དོར། །སྦྱོར་བའི་རི་མོ་རྣམ་པར་དག །ཅེས་སོ། །འདིར་སྦྱོར་བ་ཉེར་བདུན་གྱི་མིང་གང་ཞེ་ན། དེའི་སྡོམ་ནི། སེལ་མཛའ་ཚེ་ལྡན་སྐལ་བཟང་བཟང་། །ཤིན་སྐྲངས་དུས་ལས་བཟང་འཛིན་ཟུག་རྔུ། །སྐྲངས་འཕེལ་ངེས་པ་ཀུན་འཇོམས་དགའ། །རྡོ་རྗེ་གྲུབ་དང་ཤིན་ཏུ་ལྟུང་། །མཆོག་ཅན་ཡོངས་འཇོམས་ཞི་གྲུབ་པ། །བསྒྲུབ་བྱ་དགེ་དཀར་ཚངས་དབང་པོ། །འཁོར་འཛིན་རྣམས་ཏེ་ཉི་ཤུ་བདུན། །ཞེས་སོ། །

ཕྱི་ཆའི་བྱེད་པ་བརྩི་བ།

---

^{[མ་དཔེ་གཟིགས་ན་འདིར་གནོན།]}

ལྔ་པ་ཕྱི་ཆའི་བྱེད་པ་བརྩི་བ་ནི། གང་བརྩིའི་དུས་ཀྱི་ཚེས་གྲངས་གང་ཡིན་གཉིས་ཀྱིས་བསྒྱུར་དགོས་ཏེ། བྱེད་པ་བཅུ་གཅིག་པོ་ཐམས་ཅད་ཚེས་ཀྱི་ཆ་སྔ་ཕྱི་ལ་སྤྱོད་པའི་ཚེས་རེ་ལ་བྱེད་པ་གཉིས་གཉིས་འཆར་བའི་ཕྱིར་རོ། །དེ་ལས་རྟག་བྱེད་བཞི་པོ་ལ་རྟོགས་བྱེད་ཀྱི་རི་མོ་བྱ་མི་དགོས་ཏེ། ཉེར་དགུའི་ཕྱི་ཆ་ནས་ཚེས་གཅིག་གི་སྔ་ཆའི་བར་ཚེས་ཞག་ཕྱེད་ཆ་བཞི་ལ་ལོངས་སྤྱོད་པ་ལས་གཞན་དུ་མི་འཕོ་བའི་ཕྱིར། དེ་ཡང་རྟག་བྱེད་བཞི་ནི། བཀྲ་ཤིས་རྐང་བཞི་ཀླུ་མི་སྡུག །ཅེས་སོ། །གཉིས་ཀྱིས་བསྒྱུར་རྗེས་སུ་གཅིག་གིས་འབྲིད་དགོས་ཏེ། དེ་ལྷག་གིས་ཚེས་ཀྱི་སྔ་ཆ་ཕྱི་ཆ་ལ་འཕོ་བྱེད་བདུན་ལན་གྲངས་བརྒྱད་འཁོར་བའི་ཐོག་མ་ཚེས་གཅིག་གི་ཕྱི་ཆ་ནས་འཆར་བའི་ཕྱིར་སྔ་ཆའི་བྱེད་པ་ཕྲི་བའོ། །དེ་ལ་བདུན་གྱིས་བགོད་དགོས་ཏེ། འཕོ་བྱེད་ལ་བདུན་དུ་གྲངས་ངེས་པའི་ཕྱིར་ཏེ། གདབ་བྱིས་རིགས་ཅན་ཏིལ་བརྡུང་དང་། །ཁྱིམ་སྐྱེས་ཚོང་པ་བིཥྚིའོ། །དེ་དག་གི་ལག་ལེན་ནི། ཚེས་གྲངས་མིག་བསྒྱུར་གཟུགས་ཀྱིས་དམན། །ཐུབ་པས་དོར་ལྷག་ཕྱི་བྱེད་དེ། །སྔ་བྱེད་ཤུགས་ལས་རྟོགས་པར་འགྱུར། །དེ་ཡང་རྐང་པར་བཅས་པ་ཡི། །གང་བརྩིའི་ཚེས་ལོངས་དེ་དང་དེའི། །ཕྱེད་མར་བཅས་པའི་ཆ་རེ་ནི། །བྱེད་པ་རེ་ཡི་ལོངས་སྤྱོད་དེ། །བརྟགས་ཐབས་ཚེས་ལོངས་སྔ་མ་ཡིས། །མཁའ་རོར་ཕྲི་བའི་ལྷག་མ་དེ། །ཉིན་ཞག་སྔ་མར་འདས་པ་ཡིན། །ལྷག་དེ་དེ་རིང་ཚེས་ལོངས་སྟེང་། །བསྣན་ལ་མིག་གིས་བགོས་པའི་ནོར། །དུས་དེའི་བྱེད་པའི་ལོངས་སྤྱོད་དེ། །སྔ་ཆར་སྔ་མའི་ཚེས་ལོངས་དག །རྫོགས་ནས་དེ་ཡི་ཡུན་དུ་སྤྱོད། །ཕྱི་ཆར་ཚད་དེ་རྫོགས་པ་ནས། །བྱེད་པ་འཆར་བར་ཤེས་པར་བྱ། །ཞེས་སོ། །