དྲི་བ་བདུན་པ་རང་ལུགས་ལ་གཞི་གྲུབ་ན་བདེན་བཞི་གང་རུང་ཡིན་པའི་ཨེ་ཁྱབ་ཅེས་པ།
དྲི་བ་བདུན་པ་རང་ལུགས་ལ་གཞི་གྲུབ་ན་བདེན་བཞི་གང་རུང་ཡིན་པའི་ཨེ་ཁྱབ་ཅེས་པའི་ལན།
རང་ལུགས་ལ་གཞི་གྲུབ་ན་བདེན་བཞི་གང་རུང་ཡིན་པས་ཨེ་ཁྱབ་ཅེས་པའོ། །དེའི་ལན་ལ་བདེན་བཞི་ངོ་བོ་དབྱེ་བ་བཤད་པ་དང༌། ལན་དངོས་དང་གཉིས། དང་པོ་ལ་བདེན་པ་བཞི་ལས། དང་པོ་སྡུག་བདེན་གྱི་མཚན་ཉིད་དང་དབྱེ་བ་ནི། ཉོན་མོངས་པའི་ཟག་པ་དང་བཅས་པའི་རང་རྒྱུ་ལས་ཉོན་གྱི་འབྲས་བུས་བསྡུས་པ་ནི། སྡུག་བདེན་གྱི་མཚན་ཉིད། མཚན་གཞི་དང་དབྱེ་བ་ནི། ལས་ཉོན་གྱིས་བསྐྱེད་པའི་སྣོད་བཅུད་གཉིས་ཡིན་ཏེ། ཀུན་བཏུས་ལས། སྡུག་བསྔལ་གྱི་བདེན་པ་གང་ཞེ་ན། སེམས་ཅན་སྐྱེ་བ་དང་སྐྱེ་བའི་གནས་ཀྱིས་ཀྱང་རིག་པར་བྱའོ། །ཞེས་གསུངས་པའི་ཕྱིར་རོ། །གཉིས་པ་ཀུན་འབྱུང་བདེན་པའི་མཚན་ཉིད་དང་དབྱེ་བ་ནི། ཉོན་མོངས་པའི་ཟག་པ་དང་བཅས་པའི་རང་འབྲས་སྡུག་བདེན་གྱི་རྒྱུས་བསྡུས་པ་དེ། ཀུན་འབྱུང་བདེན་པའི་མཚན་ཉིད། མཚན་གཞི་དང་དབྱེ་བ་ནི། ཟག་བཅས་ཀྱི་ལས་དང་ཉོན་མོངས་པ་གཉིས་ཡིན་ཏེ།མངོན་པ་ཀུན་བཏུས་ལས། ཀུན་འབྱུང་བའི་བདེན་པ་གང་ཞེ་ན། ཉོན་མོངས་པ་དང་ཉོན་མོངས་པའི་དབང་གིས་བྱུང་བའི་ལས་སོ། །ཞེས་གསུངས་སོ། །གསུམ་པ་འགོག་བདེན་གྱི་མཚན་ཉིད་དང་དབྱེ་བ་ནི། ཐུན་མོང་གི་དབང་དུ་བྱས་ནས་ཉ་ཊཱིཀ་ལས། འགོག་བདེན་གྱི་མཚན་ཉིད་ནི། འདུས་མ་བྱས་གང་ཞིག རང་རྒྱུ་ལམ་བདེན་གྱི་བྲལ་འབྲས་ཡིན་པའོ། །དབྱེ་ན། རྗེས་མཐུན་པ་དང་མཚན་ཉིད་པ་གཉིས་དང༌། སློབ་མི་སློབ་དང༌། དགྲ་བཅོམ་རྒྱན་བཅས་རྒྱན་མེད་དང༌། ལྷག་བཅས་ལྷག་མེད་གཉིས་དང༌། སངས་རྒྱས་བྱང་སེམས་ཀྱི་མྱང་འདས་གཉིས་ཏེ་ཚན་པ་ལྔའོ། །ཞེས་སོ། །རྣམ་པར་མ་བཞག་པའམ་ཐུན་མོང་མ་ཡིན་པའི་འགོག་བདེན་གྱི་མཚན་ཉིད་སོགས་ནི། ཆོས་ཀྱི་དབྱིངས་གདོད་ནས་རང་བཞིན་གྱིས་རྣམ་པར་དག་པའི་དེ་བཞིན་ཉིད་དེ། འགོག་བདེན་གྱི་མཚན་ཉིད། མཚན་གཞི་དང་དབྱེ་བ་ནི། རང་བཞིན་རྣམ་དག་དང༌། གློ་བུར་རྣམ་དག་གི་དེ་བཞིན་ཉིད་དོ། །བཞི་བ་ལམ་བདེན་གྱི་མཚན་ཉིད་དང་དབྱེ་བ་ནི། ཉ་ཊཱིཀ་ལྟར་ཟག་མེད་འདུས་བྱས་གང་ཞིག འགོག་བདེན་གྱི་བྲལ་རྒྱུ་དེ། ལམ་བདེན་གྱི་མཚན་ཉིད། མཚན་གཞི་དང་དབྱེ་བ་ནི།ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ་རྣམས་ཡིན་ཏེ། ཀུན་བཏུས་ལས། ལམ་རྣམ་པ་ལྔ་སྟེ། ཚོགས་ཀྱི་ལམ་དང༌། སྦྱོར་བའི་ལམ་དང༌། མཐོང་བའི་ལམ་དང༌། སྒོམ་པའི་ལམ་དང༌། མཐར་ཕྱིན་པའི་ལམ་མོ། །ཞེས་གསུངས་པའི་ཕྱིར་རོ། །གཞན་ཡང་བསྟན་བཅོས་རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རེག་པར་བྱ་ཞིང་བསྟེན་པར་བྱ། །ཞེས་པ་སྟེ། དཔེར་ན་ནད་ཀྱི་སྡུག་བསྔལ་དང་བྲལ་ནས་ནད་མེད་པའི་བདེ་བ་ཐོབ་པར་འདོད་པའི་ཤེས་ལྡན་དག་གིས་ནད་ཀྱི་ངོ་བོ་གང་ཡིན་པའི་ཚུལ་ནི་ཤེས་པར་བྱས་ནས་ནད་དེ་སྐྱེད་བྱེད་ཀྱི་རྒྱུ་མི་འཕྲོད་པའི་ཟས་ལ་སོགས་པ་ནི་སྤང་བར་བྱ་བ་ཡིན་ལ། ནད་མེད་པའི་བདེ་བར་གནས་པ་ནི་ཐོབ་པར་བྱ་བ་ཡིན་ཞིང༌། དེའི་ཐབས་སྨན་བཟང་པོ་བསྟེན་པར་བྱ་བ་ཡིན་པ་ལྟར།དེ་བཞིན་དུ་འཁོར་བའི་སྡུག་བསྔལ་དང་བྲལ་ནས་མྱ་ངན་ལས་འདས་པའི་བདེ་བ་ཐོབ་པར་འདོད་པའི་བློ་དང་ལྡན་པ་དག་གིས་ཀྱང་ཟག་པ་དང་བཅས་པ་སྡུག་བསྔལ་གྱི་བདེན་པ་དང༌། དེའི་རྒྱུ་ཀུན་འབྱུང་གི་བདེན་པ་དང༌། དེ་དག་འགགས་པ་འགོག་པའི་བདེན་པ་དང༌། དེ་བཞིན་དུ་འགོག་པ་མངོན་དུ་འགྱུར་བར་བྱེད་པ་ལམ་གྱི་བདེན་པ་སྟེ་འཕགས་པའི་བདེན་པ་བཞི་པོ་དག་ལ། རིམ་པ་ལྟར་ཟག་པ་དང་བཅས་པ་འབྲས་བུས་བསྡུས་པའི་འཁོར་བ་ཐམས་ཅད་སྡུག་བསྔལ་དུ་ཡོངས་སུ་ཤེས་པར་བྱས་ནས་དེའི་རྒྱུ་ལས་དང་ཉོན་མོངས་པས་བསྡུས་པའི་ཀུན་འབྱུང་མཐའ་དག་སྤང་བར་བྱ་བ་ཡིན་ལ། དེ་དག་གི་དྲི་མ་དང་བྲལ་བའི་འགོག་པ་མྱ་ངན་ལས་འདས་པའི་བདེ་བ་ནི་མངོན་སུམ་དུ་རེག་ཅིང་ཐོབ་པར་བྱ་བ་ཡིན་ཞིང༌། དེའི་ཐབས་སུ་ཟག་པ་མེད་པའི་ལམ་རྣམ་པ་ལྔ་པོ་རིམ་གྱིས་རྒྱུད་ལ་བསྟེན་པར་བྱ་བ་ཡིན་ནོ་ཞེས་པའི་དོན་ནོ། །གཉིས་པ་ལན་དངོས་ལ་གཞི་གྲུབ་ན་བདེན་པ་བཞི་བོ་གང་རུང་ཡིན་པས་མ་ཁྱབ་སྟེ། ནམ་མཁའ་དང༌། སོ་སོར་བརྟགས་མིན་གྱི་འགོག་པ་དང༌། ཡོངས་སུ་དག་པའི་འཇིག་རྟེན་གྱི་ཁམས་དང༌། ལམ་མ་ཞུགས་ཀྱི་རྒྱུད་ཀྱི་གཞན་དོན་ཁུར་དུ་ཁྱེར་བའི་སྙིང་རྗེ་དང༌། སྟོང་ཉིད་རྟོགས་པའི་རིགས་ཤེས་རྗེས་དཔག་སོགས་དེ་བཞི་གང་ཡང་མ་ཡིན་ཏེ། ས་བཟང་གི་ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ལས། ཤེས་བྱ་ཐམས་ཅད་བདེན་བཞིར་འདུ་བ་ནི་མ་ཡིན་ཏེ། ནམ་མཁའ་དང༌། སོ་སོར་བརྟགས་མིན་གྱི་འགོག་པ་དང༌། མ་དག་པའི་དེ་བཞིན་ཉིད་དང༌། ཡོངས་སུ་དག་པའི་འཇིག་རྟེན་གྱི་ཁམས་ལ་སོགས་པ་རྣམས་བཞི་པོ་གང་དུའང་མ་འདུས་པའི་ཕྱིར་རོ། །ཞེས་གསུངས་སོ། །གཞན་ཡང་དེ་དག་བདེན་བཞི་གང་རུང་མ་ཡིན་ཏེ། ལས་ཉོན་གྱི་དབང་གིས་བྱུང་བའི་སྡུག་བདེན་དང༌། ལས་ཉོན་གྱིས་བསྡུས་པའི་ཀུན་འབྱུང་གཉིས་མིན་ལ། གཞན་གཉིས་ལ་དོགས་པ་མེད་པའི་ཕྱིར། ལམ་ཞུགས་ཀྱི་རྒྱུད་ཀྱི་ལམ་གྱིས་བཞག་པའི་བག་ཆགས་ཡང་དེ་བཞི་གང་ཡང་མ་ཡིན་ཏེ། དེ་ལམ་བདེན་ཡིན་ན་དགེ་བ་ཡིན་དགོས་ཀྱང་འཇོག་བྱེད་དགེ་སོགས་གང་ཡིན་ཀྱང་དེས་བཞག་པའི་བག་ཆགས་ལུང་མ་བསྟན་ཡིན་པའི་ཕྱིར་ཏེ། ས་བཟང་གི་ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ལས། རང་ལུགས་ནི་འཇོག་བྱེད་དགེ་མི་དགེ་ལུང་མ་བསྟན་གང་གིས་བཞག་ཀྱང་བག་ཆགས་ནི་ལུང་མ་བསྟན་ཉིད་ཡིན་ཏེ། ཀུན་གཞི་ལུང་མ་བསྟན་དང་རྫས་གཅིག་པའི་ཕྱིར་རོ། །ཞེས་གསུངས་སོ། །ཡང་ས་མཐོན་པོ་ལ་གནས་པའི་བྱང་སེམས་ཀྱི་རྒྱུད་ཀྱི་ཟག་མེད་ཀྱི་ལས་དང༌། ཡིད་ལུས་རྣམས་བདེན་པ་བཞི་པོ་གང་ཡང་མ་ཡིན་སྙམ་སྟེ། བྱང་སེམས་ས་མཐོན་པོ་ལ་གནས་པ་རྣམས་ཀྱིས་སྡུག་ཀུན་སྤངས་ཟིན་པ་དང༌། འགོག་ལམ་ཡང་མ་ཡིན་པའི་ཕྱིར་རོ། །ཐེག་མཆོག་དབུ་མའི་ཟིན་བྲིས་ལས། དེས་ན་ཡིད་ལུས་དང་དབང་བསྒྱུར་གྱི་སྐྱེ་བ་དང༌། བསམ་གྱིས་མི་ཁྱབ་ཀྱི་འཆི་འཕོ་བ་དང༌། དག་པའི་ཞིང་ཁམས་རྣམས་ནི་རྣམ་པར་བྱང་བའི་ལམ་གྱིས་བསྡུས་ཤིང་སྡུག་བསྔལ་ཕྲ་མོ་ཞེས་བརྗོད་དོ། །ཞེས་གསུངས་པས་དེ་རྣམས་ལམ་བདེན་ཡིན་མིན་ལ་ཅུང་ཟད་དཔྱད་རྒྱུ་སྣང༌། ཡང་ཐེག་མཆོག་དབུ་མ་ལས། མིང་ནི་སྡུག་བསྔལ་བདེན་པ་ཁོ་ནས་བསྡུས། །ཞེས་དང༌། དེའི་ཟིན་བྲིས་ལས། མིང་ནི་སྡུག་བསྔལ་བདེན་པ་ཁོ་ནས་བསྡུས་པས་མིང་ཡིན་ན་སྡུག་བསྔལ་བདེན་པ་ཡིན་པས་ཁྱབ་ཀྱང་སྡུག་བདེན་ཡིན་ན་མིང་ཡིན་པས་ནི་མ་ཁྱབ་པོ། །ཞེས་གསུངས་པས་མིང་སྡུག་བདེན་ཡིན་ཀྱང༌། ནམ་མཁའ་བཏགས་ཡོད་འབའ་ཞིག་གམ་དངོས་མེད་ཡིན་པས་སྡུག་བདེན་མ་ཡིན་པར་འཇོག་དགོས་སམ་སྙམ། མིང་ལ་ཐེག་མཆོག་དབུ་མ་ལས། རྒྱུ་མཚན་ཕལ་དང་མིང་ནི་ཀུན་བརྟགས་ཡིན། །ཞེས་དང༌། དེའི་ཟིན་བྲིས་ལས། མིང་ནི་ཀུན་བརྟགས་ཡིན་ལ། ཞེས་དང༌། མིང་ཚིག་ཡི་གེ་ལ་སོགས་པ་ཡང་སྒྲ་སྤྱི་ཙམ་བློ་ལ་ཤར་བ་ལ་དེར་བཏགས་པའི་ཕྱིར་རོ། །ཞེས་གསུངས་པས་མིང་ཀུན་བརྟགས་ཡིན་པར་གསུངས་ལ། མིང་ཀུན་བརྟགས་ཡིན་ཞིང་སྒྲ་རང་མཚན་པ་མ་ཡིན་ན། ཐེག་མཆོག་དབུ་མའི་ཟིན་བྲིས་ལས། དེ་ལྟ་ན་མེ་ཞེས་བརྗོད་པ་ན་ཚ་ཞིང་སྲེག་པའི་དངོས་པོ་དེ་དང་གཅིག་ཡིན་པས་ཁ་འཚིག་པར་ཐལ་བ་དང༌། ཞེས་སྐྱོན་བརྗོད་ཚུལ་རྣམས་ལ་དཔྱད་པར་བྱ་དགོས་སོ། །ལམ་བདེན་ལ་ཤེས་པ་ཡིན་དགོས་མིན་ལ་དཔྱད་པར་བྱ་བ་འདི་ཡོད་དེ། རི་ཆོས་ངེས་དོན་རྒྱ་མཚོ་ལས། དེས་ན་ཀུན་རྫོབ་བདེན་པར་གཏོགས་པའི་སྤངས་རྟོགས་དང་ཚོགས་གཉིས་ནི་ལམ་བདེན་ཡིན་ལ། ཞེས་དང༌། བསྟན་བཅོས་སྙིང་པོ་ངེས་པ་ལས། ཀུན་རྫོབ་སངས་རྒྱས་དུས་གསུམ་བྱུང་བ་རྣམས། །ལམ་བདེན་ཉིད་ཡིན། ཞེས་དང༌། ཐེག་མཆོག་དབུ་མའི་ཟིན་བྲིས་ལས། དེ་ལ་གཞན་སྣང་གི་སྐུ་དང་མཛད་པ་དང་ཞིང་ཁམས་སོགས་ནི་ལམ་བདེན་དངོས་ཡིན་ནོ། །ཞེས་གསུངས་པ་དེ་དག་ཤེས་པར་འཇོག་དཀའ་བས་ལམ་བདེན་མཚན་ཉིད་པ་ཡིན་ན་ལམ་བདེན་ལ་ཤེས་པས་མ་ཁྱབ་པོ། །དེ་ལྟར་ན་སོ་སོར་བརྟགས་འགོག་ལམ་བདེན་ཡིན་མིན་བརྟགས་དགོས་ཏེ། དེ་རང་ལུགས་ཐུན་མོང་མ་ཡིན་པའི་ལུགས་ལ་འགོག་བདེན་མཚན་ཉིད་པ་མ་ཡིན་པ་གང་ཞིག་ལམ་བདེན་ལ་ཤེས་པས་མ་ཁྱབ་ན་གཞན་དེ་ལམ་བདེན་མ་ཡིན་པའི་རྒྱུ་མཚན་དཀའ་བའི་ཕྱིར་ཟེར་ན་རྟགས་ཕྱི་མ་ལ་དཔྱད། རྟགས་དང་པོ་གྲུབ་སྟེ། ཟབ་དོན་ཉེར་གཅིག་ལས། གཞན་བདེན་པ་གསུམ་དང༌། སོ་སོར་བརྟགས་འགོག་ལ་ཀུན་རྫོབ་ཀྱིས་ཁྱབ་པར་དོན་ལ་གནས་པས། ལམ་བདེན་མཚན་ཉིད་པ་ལ་ཀུན་རྫོབ་ཀྱིས་ཁྱབ། འགོག་བདེན་མཚན་ཉིད་པ་ལ་དོན་དམ་གྱིས་ཁྱབ། དོན་དམ་པའི་ལམ་བདེན་ནི་གདོད་མ་དང་གཅིག་པའི་ཕྱིར། འགོག་བདེན་ཉིད་ཡིན་པས། ལམ་བདེན་བཏགས་པ་བ་ཡིན་གསུང༌། ཞེས་གསུངས་པའི་ཕྱིར་རོ། །ཡང་ལམ་བདེན་ལ་ཟག་མེད་དགོས་ན་ཟག་བཅས་ཟག་མེད་ཀྱི་དོན་ཅི་ཞེ་ན། དེ་ལ་མཛོད་ལས། ལམ་མ་གཏོགས་པའི་འདུས་བྱས་རྣམས། །ཟག་བཅས་གང་ཕྱིར་དེ་དག་ལ། །ཟག་རྣམས་ཀུན་ཏུ་རྒྱས་པར་འགྱུར། །ཞེས་གང་ལ་དམིགས་ནས་ཟག་པ་རྒྱས་པར་འགྱུར་བས་ཟག་བཅས་སུ་འཇོག་མོད། སྐབས་འདིར་ཟག་པ་དང་སྒོ་དྲུག་གིས་འབྲེལ་བས་ཟག་བཅས་ཏེ། ཟག་པའི་སྒོ་དྲུག་ནི། ཀུན་བཏུས་ལས། ཅིའི་ཕྱིར་ཟག་པ་དང་བཅས་པར་བརྟག་ཅེ་ན། ཟག་པ་དེའི་བདག་ཉིད་དང༌། ཟག་པ་དང་འབྲེལ་བ་དང༌། ཟག་པས་བཅིངས་པ་དང༌། ཟག་པའི་རྗེས་སུ་འབྲེལ་པ་དང༌། ཟག་པའི་རྗེས་སུ་མཐུན་པ་དང༌། ཟག་པའི་རྒྱུ་ལས་བྱུང་བའི་ཕྱིར་ཟག་པ་དང་བཅས་པར་བལྟའོ། །ཞེས་གསུངས་ལ། དེའང་ཉོན་མོངས་པ་དང་ཉེ་བའི་ཉོན་མོངས་པ་རྣམས་ནི་ཟག་པ་དེའི་བདག་ཉིད་དམ་རང་བཞིན་ཡིན་པས་ཟག་པ་དང་བཅས་པར་བལྟའོ། །ཉོན་མོངས་པ་དང་མཚུངས་པར་ལྡན་པའི་སེམས་སེམས་བྱུང་དང༌། དེ་དག་གི་གནས་མིག་ལ་སོགས་པ་ནི་ཟག་པ་དང་འབྲེལ་བ་དང༌། དགེ་བ་ཟག་བཅས་དེ་རྣམས་ཀྱང་ཡང་སྲིད་འགྲུབ་བྱེད་དུ་འགྱུར་བའི་ཆ་ནས་ཟག་པས་བཅིངས་པ་དང༌། ས་གཞན་གྱི་ཀུན་གཞི་ལའང་ས་གཞན་གྱི་ཉོན་མོངས་པའི་གནས་ངན་ལེན་ལྡན་པ་ཟག་པའི་རྗེས་སུ་འབྲེལ་བ་དང༌། ངེས་འབྱེད་ཆ་མཐུན་ནི་ཉོན་མོངས་པའི་ས་བོན་དང་ལྡན་ཡང་༌། སྲིད་པ་ལ་རྒྱབ་ཀྱིས་ཕྱོགས་ཤིང་གཉེན་པོ་བྱེད་པས་ཟག་མེད་དུ་འཇོག་ལ། དེ་ལས་གཞན་པའི་ཉོན་མོངས་པའི་ས་བོན་ཐམས་ཅད་དམ་ཡང་ན་ལམ་ལས་གཞན་པའི་འདུས་བྱས་ཐམས་ཅད་ཉོན་མོངས་པ་འཕེལ་བའི་རྐྱེན་བྱེད་པས་ཟག་པའི་རྗེས་སུ་མཐུན་པ་དང༌། སོ་སོའི་སྐྱེ་བོ་དང་འཕགས་པ་སློབ་པའི་ཕུང་པོ་ཟག་པའི་རྒྱུ་ལས་བྱུང་བར་མ་ཟད་ཐ་ན་དགྲ་བཅོམ་པའི་ཕུང་པོའང་སྔར་གྱི་ཉོན་མོངས་ཀྱིས་འཕངས་ཤིང་ཉིང་མཚམས་སྦྱོར་བའི་རྒྱུ་ཡིན་པས་ཟག་པའི་རྒྱུ་ལས་བྱུང་བའི་ཕྱིར་ཟག་པ་དང་བཅས་པར་བལྟའོ། །ཟག་མེད་ནི། ཀུན་བཏུས་ལས། ཅིའི་ཕྱིར་ཟག་པ་མེད་པར་བརྟག་ཅེ་ན། ཟག་པ་དང་བཅས་པ་ལས་བཟློག་པ་ནི་ཟག་པ་མེད་པར་བལྟའོ། །ཞེས་གསུངས་པ་ལྟར་སྤང་བྱ་ཟག་པ་དང་བཅས་པ་ལས་ལྡོག་པ། ཟག་པའི་སྒོ་དྲུག་དང་མ་འབྲེལ་བ་ནི་ཟག་པ་མེད་པའོ། །ཞེས་ས་བཟང་གི་ཀུན་བཏུས་ཀྱི་འགྲེལ་བར་བཤད་པའི་ཚིག་དོན་ཇི་ལྟ་བ་བཞིན་བྲིས་པའོ། །གཞན་ཡང་ས་བཟང་གི་ཀུན་བཏུས་འགྲེལ་བ་ལས། སྔར་ངེས་འབྱེད་ཆ་མཐུན་ཟག་མེད་དང་རྗེས་སུ་མཐུན་པས་ཟག་མེད་དུ་བཤད་ཀྱང༌། འདིར་ནི་ཟག་པའི་ས་བོན་རྗེས་སུ་འབྲེལ་བའི་ཆ་ནས་ཟག་བཅས་སུ་བསྡུའོ། །ཞེས་གསུངས་པ་དང་སྔར་ཟག་མེད་གསུངས་པ་གཉིས་གང་ལྟར་ཁས་ལེན་དགོས་དཔྱད་པར་བྱའོ། །