བཅོ་ལྔ་པ་མཐོང་ལམ་གྱི་མཚན་ཉིད།མཐོང་ལམ་སྐད་ཅིག་མ་བཅུ་དྲུག་གི་སྐྱེ་རིམ།དེ་དག་གི་སྤང་བྱའི་ཁྱད་པར།དམིགས་རྣམ་གྱི་ཁྱད་པར་རྣམས་ཇི་ལྟར་ཡིན་ཞེས་པའི་ལན།

བཅོ་ལྔ་པ་མཐོང་ལམ་གྱི་མཚན་ཉིད།མཐོང་ལམ་སྐད་ཅིག་མ་བཅུ་དྲུག་གི་སྐྱེ་རིམ།དེ་དག་གི་སྤང་བྱའི་ཁྱད་པར།དམིགས་རྣམ་གྱི་ཁྱད་པར་རྣམས་ཇི་ལྟར་ཡིན་ཞེས་པའི་ལན།

མཐོང་ལམ་གྱི་མཚན་ཉིད། མཐོང་ལམ་སྐད་ཅིག་མ་བཅུ་དྲུག་གི་སྐྱེ་རིམ། དེ་དག་གི་སྤང་བྱའི་ཁྱད་པར། དམིགས་རྣམ་གྱི་ཁྱད་པར་རྣམས་ཇི་ལྟར་ཡིན་ཞེས་པའོ། །གཉིས་པ་ལན་ནི། བདེན་པ་མངོན་རྟོགས། མཐོང་ལམ་གྱི་མཚན་ཉིད། ཡང་ན་བདེན་པ་མངོན་པར་རྟོགས་པའི་གནས་སྐབས་ཀྱིས་བསྡུས་པའི་མྱ་ངན་ལས་འདས་པར་བགྲོད་པའི་ཡེ་ཤེས། མཐོང་ལམ་གྱི་མཚན་ཉིད། ཐེག་ཆེན་གྱི་བདེན་པ་མངོན་རྟོགས། ཐེག་ཆེན་མཐོང་ལམ་གྱི་མཚན་ཉིད། ཐེག་ཆེན་གྱི་བདེན་པ་མངོན་པར་རྟོགས་པའི་གནས་སྐབས་ཀྱིས་བསྡུས་པའི་མྱ་ངན་ལས་འདས་པར་བགྲོད་པའི་ཡེ་ཤེས། ཐེག་ཆེན་མཐོང་ལམ་གྱི་མཚན་ཉིད་ཡིན་ཏེ། ཀུན་བཏུས་ས་འགྲེལ་ལས། མཚན་ཉིད་ནི་མྱ་ངན་ལས་འདས་པར་བགྲོད་པའི་གཞི་གང་ཞིག་དེ་ཁོ་ན་མངོན་པར་རྟོགས་པའི་གནས་སྐབས་ཀྱིས་བསྡུས་པའོ། །ཞེས་དང༌། རྒྱན་གྱི་ས་འགྲེལ་ལས། མཐོང་ལམ་གྱི་མཚན་ཉིད་ནི། ཆོས་མཆོག་རྫོགས་ནས་སྒོམ་ལམ་མ་སྐྱེས་པར་གྱི་དགེ་བ་གང་ཞིག མྱ་ངན་ལས་འདས་པར་ཕྱིན་པར་བྱེད་པའི་ཐབས་སུ་གྱུར་པའོ། །ཞེས་དང༌། ཉ་ཊཱིཀ་ལས། སྦྱོར་ལམ་ཆོས་མཆོག་གི་མཇུག་ཏུ་སྐྱེས་པའི་ཅིར་ཡང་མི་དམིགས་པའི་ཏིང་ངེ་འཛིན་དང་མཚུངས་ལྡན་ཅན་གྱི་འཇིག་རྟེན་ལས་འདས་པའི་ཡེ་ཤེས་གང་ཞིག ཟག་མེད་ཀྱི་ལམ་གསུམ་གྱི་ཐོག་མར་གྱུར་པའོ། །དེ་ནས་དེ་ནི་འཇིག་རྟེན་ལས། །འདས་པའི་ཡེ་ཤེས་བླ་མེད་པ། །རྣམ་པར་མི་རྟོག་དྲི་མ་མེད། །འཛིན་པ་གཉིས་དང་བྲལ་བ་ཐོབ། །ཅེས་དང༌། ཀུན་བཏུས་སུ། མདོར་བསྡུ་ན་འཇིག་རྟེན་པའི་ཆོས་ཀྱི་མཆོག་གི་མཇུག་ཐོགས་སུ་མི་དམིགས་པའི་ཏིང་ངེ་འཛིན་དང་ཤེས་རབ་མཚུངས་པར་ལྡན་པ་དང་བཅས་པ་སྟེ། ཞེས་སོགས་བཤད་དོ། །གང་ཞིག་ཆོས་ཉིད་མཐོང་བ་དང་ཆོས་ཅན་མཐོང་བ་རིམ་བཞིན་ཇི་ལྟ་ཇི་སྙེད་མཁྱེན་པའི་བྱང་སེའི་མཐོང་ལམ་གྱི་མཚན་ཉིད་དོ། །ཞེས་གསུངས་པའི་ཕྱིར་རོ། །ཡང་ཐེག་ཆེན་མཐོང་ལམ་གྱི་མཚན་ཉིད་ལ། ཉ་ཊཱིཀ་ལས། མཚན། མཚོན། གཞི་གསུམ་ལས། དང་པོ་ནི། སྦྱོར་ལམ་ཆོས་མཆོག་གི་མཇུག་ཏུ་སྐྱེས་པའི་ཅིར་ཡང་མི་དམིགས་པའི་ཏིང་ངེ་འཛིན་དང་མཚུངས་ལྡན་ཅན་གྱི་འཇིག་རྟེན་ལས་འདས་པའི་ཡེ་ཤེས་གང་ཞིག ཟག་མེད་ཀྱི་ལམ་གསུམ་གྱི་ཐོག་མར་གྱུར་པའོ། །ཞེས་གསུངས་པ་ལ། ཐེག་ཆེན་མཐོང་ལམ་ལ་སྦྱོར་ལམ་ཆོས་མཆོག་གི་མཇུག་ཏུ་སྐྱེས་པའི་ཁྱབ་བར་ཐལ། མཚན་ཉིད་དེའི་ཕྱིར། འདོད་ན། ཐེག་ཆེན་སྦྱོར་ལམ་གྱི་རྒྱུར་གྱུར་བའི་ཐེག་ཆེན་མཐོང་ལམ་ཆོས་ཅན། དེར་ཐལ། དེའི་ཕྱིར། དེར་ཐལ།དེ་ཡོད་པའི་ཕྱིར་ཟེར་ན་དཔྱད། ཡང་མཐོང་ལམ་སྐྱེ་བའི་ལུས་རྟེན་ལ་འདོད་པ་ཁོ་ནས་ཁྱབ་པར་ཐལ། ཉ་ཊཱིཀ་ལས། འདོད་པའི་རྟེན་ཁོ་ན་ལ་དང་པོ་སྐྱེའོ། །ཞེས་གསུངས་པའི་ཕྱིར་ཟེར་ན་འདོད་མི་ནུས་ཏེ། ལྷའི་བུ་བློ་གྲོས་རབ་གནོན་གྱིས་ཞུས་པའི་མདོ་ལས།འདོད་པ་དང་གཟུགས་ན་སྤྱོད་པའི་ལྷའི་བུ་བྱེ་བ་ཕྲག་བརྒྱས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་ཐོབ་བོ། །ཞེས་གསུངས་པའི་ཕྱིར། ཁྱབ་སྟེ། ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་ཅེས་པ་མཐོང་ལམ་ཆོས་བཟོད་ཆོས་ཤེས་ལ་བཤད་དགོས་པའི་ཕྱིར། ཀུན་བཏུས་ལས། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །ཞེས་དང༌། དེའི་ས་འགྲེལ་ལས། གདུལ་བྱ་མང་བོས་མཐོང་ལམ་ཐོབ་པའི་དུས་སུ་ཆོས་བདེན་པ་བཞི་བོ་རྣམས་ཀྱི་དེ་བཞིན་ཉིད་ལ་ལྟ་བའི་ཆོས་ཀྱི་མིག་འཕགས་པའི་ཤེས་རབ་ཀྱི་རང་བཞིན་ཉོན་མོངས་པའི་རྡུལ་མེད་ཅིང་གཟུང་འཛིན་གྱི་དྲི་མ་དང་བྲལ་བ་སྐྱེས་སོ་ཞེས་བཅོམ་ལྡན་འདས་ཀྱིས་གང་གསུངས་པ་དེ་ནི་མཐོང་བའི་ལམ་གྱི་ངེས་ཚིག་གི་དབང་དུ་མཛད་ནས་གསུངས་པ་སྟེ། ཆོས་ལ་བཟོད་པ་བཞི་བོ་རྣམས་ཀྱིས་ནི་མཐོང་སྤང་ཉོན་མོངས་པའི་སྒྲིབ་པ་སྤངས་པས་རྡུལ་མེད་པའོ། །ཆོས་ཤེས་པ་བཞི་བོ་རྣམས་ཀྱིས་ནི་སྤངས་པའི་གནས་གྱུར་ཉམས་སུ་མྱོང་བས་དྲི་མ་དང་བྲལ་བའོ། །ཡང་བཟོད་པ་བཞིས་བདེན་བཞིའི་ཆོས་ཉིད་མངོན་སུམ་དུ་ཡོངས་སུ་ཤེས་པ་དང༌། ཤེས་པ་བཞིས་རྣམ་གྲོལ་ཉམས་སུ་མྱོང་ཞིང་སྤང་བྱ་ཐག་བསྲིངས་ཏེ་སྤང་བས་ཀྱང་མཐོང་ལམ་རྣམ་པར་དག་པའི་ཕྱིར། རྡུལ་མེད་ཅིང་དྲི་མ་དང་བྲལ་བར་འགྱུར་རོ། །ཞེས་གསུངས་པའི་ཕྱིར་རོ། །ཡང་ཐེག་ཆེན་མཐོང་ལམ་གྱི་སེམས་བརྟེན་ལ་བསམ་གཏན་བཞི་བའི་དངོས་གཞིའི་ཁྱབ་པར་ཐལ། ཉ་ཊཱིཀ་ལས། འདིར་བསམ་གཏན་བཞི་བའི་རབ་མཐའ་ཞེས་པ་འདོད་པ་ནས་སྲིད་རྩེའི་བར་ཕྱིན་ནས་སྲིད་རྩེ་ནས་འདོད་པའི་བར་དུ་ལོག་སྟེ་ཡང་བསམ་གཏན་བཞི་བའི་བར་རྫོགས་པར་བྱས་པ་སྟེ་དེ་ལ་བརྟེན་ནོ་ཞེས་སོ། །ཞེས་གསུངས་པའི་ཕྱིར་ཟེར་ན། དེ་མི་འཐད་པར་ཐལ། དེའི་སེམས་རྟེན་ལ་བསམ་གཏན་ས་དྲུག་ཡོད་པའི་ཕྱིར་ཏེ། རྒྱུད་བླའི་འགྲེལ་བ་བཀའ་འཁོར་ལོ་ཐ་མའི་གསལ་བྱེད་ལས།སེམས་ཀྱི་རྟེན་ནི། ཚོགས་ལམ་ཐོས་བསམ་གཙོ་ཆེ་བས་འདོད་སེམས་ལ་བརྟེན་པ་གཙོ་ཆེ་ཞིང༌། སྦྱོར་མཐོང་གཉིས་ནི་སྒོམ་བྱུང་ཡིན་པས་བསམ་གཏན་དང་པོའི་ཉེར་བསྡོགས་དང་དངོས་གཞི་ཙམ་པོ་དང་དངོས་གཞི་ཁྱད་པར་ཅན་དང་བསམ་གཏན་ལྷག་མ་གསུམ་སྟེ་དྲུག་ལ་རྟེན་ནོ། །འདོད་སེམས་རྣམ་གཡེང་ཆེ་བ་དང་གཟུགས་མེད་ལྷག་མཐོང་ཆུང་བས་མི་རྟེན་ནོ། །སྒོམ་ལམ་ནི་བསམ་གཏན་ས་དྲུག་དང་གཟུགས་མེད་དང་པོ་གསུམ་ལ་རྟེན་གྱི། འདོད་པ་དང་སྲིད་རྩེ་ལ་མི་རྟེན་པར་འཕགས་པ་གྲོལ་སྡེ་བཞེད་པ་འཐད་པར་མངོན་ནོ། །རྟེན་འདི་དག་ནི་ཐེག་པ་གཉིས་ཀྱི་ལུགས་བསྡོམས་ནས་འཐད་པ་རྣམས་བཀོད་དོ། །ཞེས་གསུངས་པའི་ཕྱིར་རོ། །སྒྲ་བཤད་པ་ནི། བདེན་པ་སྔར་མ་མཐོང་གསར་དུ་མངོན་སུམ་དུ་མཐོང་བས་མཐོང༌། བྱང་ཆུབ་ཏུ་བགྲོད་པར་བྱེད་པས་ན་ལམ་མོ། །མ་མཐོང་མཐོང་ཕྱིར་མཐོང་བའི་ལམ། །ཞེས་མཛོད་ལས་སོ། །མཐོང་ལམ་སྐད་ཅིག་བཅུ་དྲུག་སྐྱེ་རིམ་ནི། ཉ་ཊཱིཀ་ལས། དེ་ལ་སྐད་ཅིག་བཅུ་དྲུག་ནི། ཆོས་མཆོག་གི་མཇུག་ཐོགས་སུ་སྡུག་བདེན་མངོན་སུམ་དུ་གྱུར་པའི་ཟག་མེད་ཀྱི་ཤེས་རབ་སྡུག་བསྔལ་མཐོང་སྤང་སྤོང་བའི་བར་ཆད་མེད་ལམ་དེ་སྡུག་བསྔལ་ཆོས་བཟོད། དེའི་མཇུག་ཐོགས་སུ་སྡུག་བསྔལ་མཐོང་སྤང་གིས་རྣམ་གྲོལ་མངོན་དུ་བྱེད་པའི་ཟག་མེད་ཀྱི་ཡེ་ཤེས་ཆོས་ཤེས། དེའི་མཇུག་ཐོགས་སུ་དེ་གཉིས་འཕགས་ཆོས་རྣམས་ཀྱི་རྒྱུར་རྟོགས་པའི་ཟག་མེད་ཡེ་ཤེས་རྗེས་བཟོད།དེའི་མཇུག་ཐོགས་སུ་དེ་ངེས་པར་འཛིན་པ་རྗེས་ཤེས་ཏེ། བདེན་པ་གཞན་གསུམ་ལ་དེ་བཞིན་ནོ། །ཞེས་དང༌། ཀུན་བཏུས་ས་འགྲེལ་ལས། གཞུང་འདིའི་དགོངས་པས་ནི། སྐད་ཅིག་མ་བཅུ་དྲུག་རིམ་པ་བཞིན་བར་མ་ཆད་དུ་སྐྱེ་བར་གསལ་ཏེ། ཞེས་དང༌། རྒྱན་གྱི་ས་འགྲེལ་ལས། སྐད་ཅིག་མ་བཅུ་དྲུག་སྟན་ཐོག་གཅིག་ཏུ་མཉམ་བཞག་གི་རྒྱུན་གཅིག་ལ་རིམ་པ་བཞིན་བར་མ་ཆད་པར་སྐྱེ་སྟེ། ཞེས་དང༌། ཐེག་མཆོག་དབུ་མ་ལས། མཐོང་ལམ་ངོ་བོ་མཉམ་བཞག་རིགས་གཅིག་མོད། །ཅེས་གསུངས་པའི་ཕྱིར་རོ། །རང་ལུགས་ལ་མཐོང་ལམ་ཤེས་བཟོད་སྐད་ཅིག་བཅུ་དྲུག་རིམ་གྱིས་སྐྱེ་བར་འདོད་པ་ལ། ཐེག་མཆོག་དབུ་མ་ལས། མཐོང་ལམ་ངོ་བོ་མཉམ་བཞག་རིགས་གཅིག་མོད། །ལྡོག་ཆའི་སྒོ་ནས་སྐད་ཅིག་ཐ་དད་འདོད། །སྒོམ་སྤང་མི་སྤོང་བར་ཏུ་དེ་ཡིན་ཞིང༌། །ཞེས་པས་བརྟག་པར་བྱའོ། །ཡང་མཐོང་ལམ་སྐད་ཅིག་བཅུ་དྲུག་གིས་སྤང་བྱ་སྤོང་ཚུལ་ལ། གོང་དུ་དྲིས་ལན་དགུ་བའི་སྐབས་སུ་བཤད་ཟིན་པ་ལྟར་རོ། །ཡང་མཐོང་ལམ་ལ་རྗེས་ཐོབ་ཡེ་ཤེས་མེད་པར་ཐལ། མཐོང་ལམ་སྐད་ཅིག་བཅུ་དྲུག་རྫོགས་ནས་སྒོམ་ལམ་དུ་འཕོ་བ་ཡིན་པའི་ཕྱིར་ཏེ། ཀུན་བཏུས་ས་འགྲེལ་ལས། རང་རང་གི་བྱང་ཆུབ་ཏུ་སེམས་བསྐྱེད་ནས་དྲོད་མ་ཐོབ་ཀྱི་བར་དུ་ཚོགས་གཉིས་སོག་པ་ཚོགས་ཀྱི་ལམ་དང༌། དེ་བཞིན་དྲོད་ཐོབ་ནས་བདེན་བཞིའི་ཆོས་ཉིད་མངོན་སུམ་དུ་མ་མཐོང་བའི་བར་སྦྱོར་བའི་ལམ་དང༌། དེ་མཐོང་ནས་སྐད་ཅིག་རྣམས་ཡོངས་སུ་མ་རྫོགས་ཀྱི་བར་མཐོང་བའི་ལམ་དང༌། ཡོངས་སུ་རྫོགས་ནས་རྡོ་རྗེ་ལྟ་བུའི་ཏིང་ངེ་འཛིན་གྱི་བར་སྒོམ་པའི་ལམ་དང༌། རང་རང་གི་བསླབ་པ་ཡོངས་སུ་རྫོགས་པ་མཐར་ཕྱིན་པའི་ལམ་མོ། །ཞེས་གསུངས་པའི་ཕྱིར་ཟེར་ན་དེ་ཡང་བརྟག་དགོས་ཏེ། ཉ་ཊཱིཀ་ལས། བྱེ་བྲག་སྨྲ་བ། མཐོང་ལམ་ལ་རྗེས་ཐོབ་མེད་པར་འདོད་ཀྱང༌། ཐེག་པ་ཐུན་མོང་བའམ་ཆེན་པོ་ལྟར་ན། རྗེས་ཐོབ་ཡོད་པར་བཤད་དེ་གཞུང་དུ་སྟོན་ནོ། །འོ་ན་དུས་ཇི་ཙམ་ཞེ་ན། ངེས་པ་མེད་དེ། འཕགས་པ་ཀླུ་སྒྲུབ་ས་དང་པོ་བསྒྲུབས་ནས་བདེ་བ་ཅན་དུ་གཤེགས་པར་བཤད་པས་ལོ་མང་བོར་ཡང་བཞུགས་པའི་ཕྱིར་དང༌། མྱུར་བར་དེ་ལས་འདས་ནས་ས་གོང་མར་འཇུག་པའང་ཡོད་དེ། ཞེས་དང༌། རྩབར། དེར་གནས་གཟུགས་ལ་སོགས་པ་ལ། །སངས་རྒྱས་ཉིད་དུ་ངེས་འཛིན་དང༌། །ཞེས་པའི་ཀུན་འབྱུང་ཆོས་ཤེས་ཀྱི་སྐབས་སུ་ཉ་ཊཱིཀ་ལས། མདོར་ཤེར་ཕྱིན་འདི་དང་བྲལ་བར་མ་གྱུར་བ་ནི་དེ་པ་ཉིད་དུ་གཟུང་བར་བགྱིའོ། །ཞེས་སོགས་ཏེ། འདོད་གཟུགས་ཀྱི་ལྷས་ཡུམ་དང་མ་བྲལ་བའི་བྱང་སེའི་དེ་པར་འཛིན་པར་བཤད་དེ་དེ་ནི་ཕན་ཡོན་གྱི་རྣམ་པའོ། །གཞུང་ཚིག་ལྟར་ན་རྗེས་ཐོབ་ཀྱི་རྣམ་པར་འོང་ངོ༌། །ཞེས་གསུངས་པའི་ཕྱིར། ཡང་ཉ་ཊཱིཀ་ལས།ཨ་བྷ་ཡས། འཇིག་རྟེན་ལས་འདས་པའི་ཡེ་ཤེས་ཀྱི་རྗེས་ལ་ཐོབ་པ་རང་གི་རྟོགས་པ་གཅོད་པ། ཞེས་ཆོས་ཤེས་རྣམས་རྗེས་ཐོབ་ཏུ་བཤད་ཅིང༌། ཀུན་བཏུས་དང་མི་འགལ་ཏེ། ཆོས་བཟོད་རྟོགས་པའི་ཆ་ནས་རྗེས་ཐོབ་དང་སྡུག་བསྔལ་མཐོང་སྤང་སོགས་ཀྱི་རྣམ་པར་གྲོལ་བའི་དེ་བཞིན་ཉིད་དག་པ་རྟོགས་པའི་ཆ་ནས་མཚན་མ་མེད་པའི་རྣལ་འབྱོར་ཅན་དུ་གསུངས་པ་ཡིན་ནོ། །ཞེས་ཆོས་ཤེས་རྣམས་རྗེས་ཐོབ་ཏུ་བཤད་པ་ཀུན་བཏུས་དང་མི་འགལ་གསུངས་པའི་དགོངས་པ་ཚོལ་དགོས་སོ། །ཡང་མཐོང་ལམ་སྐད་ཅིག་བཅུ་དྲུག་གི་དམིགས་རྣམ་ལ། ཐེག་ཆེན་མཐོང་ལམ་ཤེས་བཟོད་སྐད་ཅིག་བཅུ་དྲུག་པོ་ཆོས་ཉིད་ལ་རྩེ་གཅིག་པའི་མཉམ་བཞག་ཐུན་གཅིག་པ་ཡིན་ཏེ། ཐེག་མཆོག་དབུ་མ་ལས། མཐོང་ལམ་ངོ་བོ་མཉམ་བཞག་རིགས་གཅིག་མོད། །ཅེས་དང༌། རྒྱན་གྱི་ས་འགྲེལ་ལས། སྐད་ཅིག་མ་བཅུ་དྲུག་སྟན་ཐོག་གཅིག་ཏུ་མཉམ་བཞག་གི་རྒྱུན་གཅིག་ལ་རིམ་པ་བཞིན་བར་མ་ཆད་པར་སྐྱེ་སྟེ། མདོ་ལས་ཀྱང༌། གང་བརྒྱད་པ་འབྲས་བུ་མ་ཐོབ་པར་ལྡང་བ་་འདི་ནི་གནས་མེད་དོ། །ཞེས་གསུངས་པའི་ཕྱིར་རོ། །དེ་མ་ཡིན་པར་ཐལ། རྗེས་བཟོད་དང་རྗེས་ཤེས་ཀྱིས་འཛིན་པ་རྟོགས་པ་ཡིན་པའི་ཕྱིར། དེར་ཐལ། ཀུན་བཏུས་ལས། དེ་ལ་ཆོས་ཤེས་པའི་བཟོད་པ་དང་ཆོས་ཤེས་པ་རྣམས་ཀྱིས་ནི་གཟུང་བ་རྟོགས་སོ། །རྗེས་སུ་རྟོགས་པའི་བཟོད་པ་དང་ཤེས་པ་རྣམས་ཀྱིས་ནི་འཛིན་པ་རྟོགས་སོ། །བཟོད་པ་དང་ཤེས་པ་ཐམས་ཅད་ལ་ཡང་མཚན་མ་མེད་པར་གནས་པའི་རྣལ་འབྱོར་ཅན་དུ་རིག་པར་བྱའོ། །སེམས་ཀྱི་སྐད་ཅིག་མ་བཅུ་དྲུག་པོ་འདི་དག་ནི་མཐོང་བའི་ལམ་མོ། །ཞེས་གསུངས་པའི་ཕྱིར་ཟེར་དེའི་ཚིག་ཟིན་ལ་དེ་ལྟར་ཡིན་ཀྱང་རྗེས་ཐོབ་ཀྱི་སྐབས་སུ་ངེས་ཤེས་འདྲེན་ཚུལ་གྱི་ཁྱད་ཡིན་པར་སྣང་སྟེ། ཉ་ཊཱིཀ་ལས། དེ་ལྟ་བུའི་ཆོས་ཉིད་བཞི་བོ་ནི་སྡུག་བསྔལ་གྱི་བདེན་པའི་རྣམ་པ་ཡིན་ཅིང༌། དེ་རྟོགས་བཞི་སྡུག་བདེན་གྱི་ཤེས་བཟོད་བཞི་དག་ཡིན་ནོ། །ཞེས་གསུངས་པའི་ཕྱིར་རོ། །ཡང་ཀུན་བཏུས་ས་འགྲེལ་ལས། དེས་རང་གི་ཡུལ་རྟོགས་ཚུལ་ནི། འཇིག་རྟེན་ལས་འདས་པའི་ལམ་གྱི་ཡུལ་ནི་དེ་བཞིན་ཉིད་དང་ཡང་དག་པའི་ཡེ་ཤེས་གཉིས་ཡིན་པས། སེམས་བཅུ་དྲུག་པོ་དེ་ལ་ཆོས་ཤེས་པའི་བཟོད་པ་བཞི་དང་ཆོས་ཤེས་པ་བཞི་བོ་རྣམས་ཀྱི་གཟུང་བ་གནས་གྱུར་པ་བདེན་པའི་ཆོས་ཉིད་དེ་བཞིན་ཉིད་མཐོང་སྤང་ལས་གྲོལ་བ་མངོན་སུམ་དུ་རྟོགས་སོ། །རྗེས་སུ་རྟོགས་པའི་བཟོད་པ་བཞི་དང་རྗེས་སུ་ཤེས་པ་བཞི་པོ་རྣམས་ཀྱིས་ནི་འཛིན་པ་གནས་གྱུར་པ་ཡང་དག་པའི་ཡེ་ཤེས་ཀྱི་གནས་ལུགས་རང་རིག་པའི་ཚུལ་གྱིས་ཇི་ལྟ་བ་རྟོགས་སོ། །དེ་དག་གཟུང་འཛིན་རང་བཞིན་མེད་པ་ལ་སྦྱོར་བ་ནི་མི་འཐད་དེ། ཐམས་ཅད་ཀྱིས་དེ་ལྟར་རྟོགས་པའི་ཕྱིར་རོ། །གནས་གྱུར་པའི་གཟུང་འཛིན་རྟོགས་ཀྱང་མཚན་འཛིན་དུ་མི་འགྱུར་ཏེ། བཟོད་པ་དང་ཤེས་པའི་ཡེ་ཤེས་བཅུ་དྲུག་པོ་ཐམས་ཅད་ལ་ཡང་གཟུགས་སོགས་སྤྲོས་པའི་མཚན་མ་ཐམས་ཅད་མི་དམིགས་པས། དེ་དག་ལ་གནས་པའི་གང་ཟག་ནི་མཚན་མ་མེད་པར་གནས་པའི་རྣལ་འབྱོར་ཅན་དུ་རིག་པར་བྱའོ། །ཞེས་གསུངས་པ་ལ་ཞིབ་ཏུ་དཔྱད་པར་བྱའོ། །