གཉིས་པ་རྟོག་མེད་ཀྱི་མཐའ་དཔྱད་པ།

གཉིས་པ་རྟོག་མེད་ཀྱི་མཐའ་དཔྱད་པ་ནི།

རང་ཡུལ་གསལ་བར་སྣང་བའི་བློ་ཡིན་ན་རྟོག་མེད་ཡིན་པས་ཁྱབ་པར་ཐལ། གཏན་ཚིགས་དོན་བསྡུས་ལས། རང་ཡུལ་གྱི་རྣམ་པ་གསལ་བར་སྣང་བའི་བློའོ། །ཞེས་དང༌། རྣམ་འགྲེལ་མངོན་སུམ་ལེའུ་ལས། གསལ་བར་སྣང་བ་ཅན་བློ་གང། །དེ་ནི་རྟོག་མེད་གཉི་གར་ཡང། །དེ་ལྟ་མིན་ན་རྟོག་པ་ཡིན། །ཞེས་དང༌། འགྲེལ་བ་རིན་འཕྲེང་༣༡༦ལས། གཉིད་ལོག་པའམ་སད་པ་ན། གསལ་བར་སྣང་བ་ཅན་གྱི་བློ་གང་ཡིན་པ་དེ་ནི་རྟོག་མེད་ཡིན་པས་ཁྱབ། སྔོ་འཛིན་མིག་ཤེས་བཞིན། སད་ལོག་གཉིས་ཀར་ཡང་གསལ་བ་དེ་ལྟ་མིན་པར། མི་གསལ་ལ་འདྲེས་པར་སྣང་ན། རྟོག་པ་ཡིན་པས་ཁྱབ། དྲན་ཤེས་བཞིན། ཞེས་དང༌། རྣམ་འགྲེལ་ལས། རྟོག་པའི་དྲ་བ་རྣམ་བསལ་བས། །གསལ་བ་ཉིད་དུ་སྣང་བ་ཡིན། །ཞེས་དང༌། འགྲེལ་བ་རིན་འཕྲེང་༣༡༢ལས། རྣལ་འབྱོར་མངོན་སུམ་ཆོས་ཅན། སྒྲ་དོན་འཛིན་པའི་རྟོག་པའི་དྲྭ་བ་རྣམ་པ་བསལ་བ་ཡིན་ཏེ། སྒོམ་ཡུལ་བསལ་བ་ཉིད་དུ་སྣང་བས་སོ། །ཞེས་གསུངས་སོ། འདོད་ན། རྟོག་པ་ཀུན་ཆོས་ཅན། རྟོག་མེད་ཡིན་པར་ཐལ། རང་ཡུལ་གསལ་བར་སྣང་བའི་བློ་ཡིན་པའི་ཕྱིར་ཏེ། ཤེས་པ་ཡིན་པའི་ཕྱིར། ཁྱབ་སྟེ། བསྡུས་གྲྭའི་སྤྱི་དོན་༢༠༥ལས། རང་ཡུལ་གསལ་བའི་བེམ་མིན་ཤེས་པའི་མཚན་ཉིད། ཅེས་གསུངས་པའི་ཕྱིར། ཟེར་ན་གོང་བློའི་མཚན་ཉིད་ཀྱི་སྐབས་ལྟར་དཔྱད། ཡང་ཀུན་གཞི་རྣམ་ཤེས་ཆོས་ཅན། རང་ཡུལ་གསལ་བར་སྣང་བར་ཐལ། རྟོག་མེད་ཀྱི་ཤེས་པ་ཡིན་པའི་ཕྱིར། རྟགས་དེར་ཐལ། འབའ་མདའི་སྦྱོར་ཊིཀ་སྤྱི་དོན་༥༠ལས། རིག་པ་གསལ་དེང་ངེ་བའི་རྟོག་མེད་ཅིག་མངོན་དུ་གྱུར་ཏེ། དེ་ནི་འདིར་ཀུན་གཞི་རྣམ་ཤེས་དང༌། ཞེས་གསུངས་པའི་ཕྱིར། འདོད་ན། ཀུན་གཞི་རྣམ་ཤེས་ཆོས་ཅན། རང་ཡུལ་གསལ་བར་སྣང་བར་ཐལ། རྟོག་མེད་ཀྱི་ཤེས་པ་ཡིན་པའི་ཕྱིར། རྟགས་ཁྱབ་ཁས། འདོད་མི་ནུས་ཏེ། ཀུན་གཞི་རྣམ་ཤེས་དེ་ངོ་བོ་གསལ་ལ་ཡུལ་གྱི་རྣམ་པ་མི་གསལ་བ་ཡིན་པའི་ཕྱིར་ཏེ། སུམཅུ་པ་ལས། རྣམ་པར་རིག་པ་མི་རིག་པ། །ཞེས་དང༌། ཐེག་ཟིན་༧༣ལས། རྣམ་པར་རིག་པ་ནི་ཤེས་པ་རང་གི་ངོ་བོ་ཤིན་ཏུ་གསལ་བ་ཡིན་ལ། འོན་ཀྱང་ཡུལ་གྱི་རྣམ་པ་མི་གསལ་བས་ན་མ་རིག་པའོ། །ཞེས་གསུངས་པའི་ཕྱིར། ཟེར་ན་དེ་ནི་འདི་དང་འདིའོ་ཞེས་མི་རིག་པ་ལ་དགོངས་པར་སྣང་སྟེ། སུམ་ཅུ་པའི་བཤད་པ་༡༥༩ལས། ལེན་པ་དེ་ལ་འདིའོ་ཞེས་རིག་པར་མི་ནུས་པས་དེའི་ཕྱིར་མི་རིག་པ་ཞེས་བྱའོ། །གནས་ཀྱི་རྣམ་པར་རིག་པ་སྣོད་ཀྱི་འཇིག་རྟེན་གནས་པར་རྣམ་པར་རིག་པ་སྟེ། དེ་ཡང་དམིགས་པ་དང་རྣམ་པ་ཡོངས་སུ་མ་ཆད་པར་འབྱུང་བས་མི་རིག་པ་ཞེས་བྱའོ། །ཞེས་གསུངས་སོ། །ཡང་གཏན་ཚིགས་དོན་བསྡུས་ལས། རང་ཡུལ་གྱི་རྣམ་པ་གསལ་བར་སྣང་བའི་བློའོ། །ཞེས་གསུངས་པ་ལ། རྟོག་མེད་ཀྱི་ཤེས་པ་ཡོད་ན། རང་ཡུལ་གྱི་རྣམ་པ་གསལ་བར་སྣང་བའི་བློ་ཡོད་པའི་ཁྱབ་པར་ཐལ། དེ་དེའི་མཚན་ཉིད་ཡིན་པའི་ཕྱིར། འདོད་ན། སྤྱིར་ཆོས་ཅན། རང་ཡུལ་གྱི་རྣམ་པ་གསལ་བར་སྣང་བའི་བློ་ཡོད་པར་ཐལ། རྟོག་མེད་ཀྱི་ཤེས་པ་ཡོད་པའི་ཕྱིར། འདོད་ན། སྤྱིར་ཆོས་ཅན། རང་ཡུལ་ཡོད་པར་ཐལ། རང་ཡུལ་གྱི་རྣམ་པ་གསལ་བར་སྣང་བའི་བློ་ཡོད་པའི་ཕྱིར། འདོད་ན། སྤྱིར་ཆོས་ཅན། ཡུལ་ཅན་ཡིན་པར་ཐལ། རང་ཡུལ་ཡོད་པའི་ཕྱིར། འདོད་ན། གཟུགས་སུ་གྱུར་བའི་ཡུལ་ཅན་དང༌། གཟུགས་མ་ཡིན་པའི་ཡུལ་ཅན་གང་ཡིན་དང༌། གཟུགས་མ་ཡིན་པའི་ཡུལ་ཅན་ཡིན་ཟེར་ན་བློ་དང་གང་ཟག་གང་རུང་དུ་ཐལ་མིན་སོགས་ཀྱིས་དཔྱད་དོ། །