རྒྱལ་དབང་མཚོ་སྐྱེས་རྡོ་རྗེ་དང་ལྷག་ལྷ་འཇམ་དཔལ་དཔའ་བོ་དབྱེར་མེད་ལ་གསོལ་བ་འདེབས་པ་བྱིན་རླབས་ཐུགས་རྗེའི་གློག་ཞགས།
དཔལ་ལྡན་རྫོགས་པའི་སངས་རྒྱས་མཚོ་སྐྱེས་རྗེ།།
རྒྱལ་ཀུན་མཁྱེན་རབ་དབང་ཕྱུག་འཇམ་དཔལ་དབྱངས།།
དབྱེར་མེད་རིག་སྟོང་མཉམ་ཉིད་བདེ་བ་ཆེར།།
རང་ངོ་ཤེས་པའི་ངང་ནས་གསོལ་བ་འདེབས།།
སྣང་སྲིད་དབང་དུ་འདུས་པའི་མཐུ་སྟོབས་དང་།།
ཐོགས་མེད་ཤེས་རབ་འབར་བའི་རྩལ་རྒྱས་ཏེ།།
སྣང་སྟོང་མཆོག་ཏུ་མི་ཕྱེད་རྡོ་རྗེའི་ཐུགས།།
ནང་གི་དེ་ཉིད་རྟོགས་པར་བྱིན་གྱིས་རློབས།།
ཞེས་པའང་ལྷོ་གླིང་པ་མཁན་སྡེ་སྣོད་འཛིན་པ་ད་ལྟའི་རས་པ་པདྨ་བསྟན་འཛིན་གྱི་ངོར་རྒྱལ་ཁམས་པ་པདྨའི་མིང་ཅན་གྱིས་བྲིས།།