ཟངས་མདོག་དཔལ་རིའི་སྨོན་ལམ། གཏེར་ཆེན་འགྱུར་མེད་རྡོ་རྗེ།
༄༅། །ཟངས་མདོག་དཔལ་རིའི་སྨོན་ལམ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། །དབང་བཞིས་རྒྱུད་སྨིན་དམ་ཚིག་རྣམ་པར་དག །སྣང་སྲིད་དག་མཉམ་ཆེན་པོའི་གནས་ལུགས་རྟོགས། །སྐུ་གསུམ་ཞིང་ཁམས་སྤྲོས་བྲལ་ལྷུན་རྫོགས་པའི། །པདྨ་འོད་ཀྱི་ཞིང་དེར་སྐྱེ་བར་ཤོག །གདོད་མའི་མགོན་པོ་ཀུན་བཟང་སྤྱན་རས་གཟིགས། །རྩ་གསུམ་ཀུན་འདུས་པདྨ་འབྱུང་གནས་ཀྱི། །ཞལ་མཇལ་གསུངས་ཐོས་ཟབ་མོའི་གདམས་ངག་ཐོབ། །པདྨ་འོད་ཀྱི་ཞིང་དེར་སྐྱེ་བར་ཤོག །ཞིང་མཆོག་དེ་རུ་རིག་འཛིན་རྣམ་བཞི་དང་། །འོད་གསལ་སྣང་བ་རྣམ་བཞི་མཐར་ཕྱིན་ནས། །སྤྲོས་བྲལ་ལྷུན་རྫོགས་ཆོས་ཀྱི་རྒྱལ་ས་ཟིན། །པདྨ་འོད་ཀྱི་ཞིང་དེར་སྐྱེ་བར་ཤོག །དེ་ལྟར་རྩེ་གཅིག་གསོལ་བ་བཏབ་པའི་མཐུས། །བསླུ་མེད་རྗེ་བཙུན་གུ་རུའི་ཐུགས་རྗེ་ཡིས། །བདག་སོགས་མཁའ་ཁྱབ་འགྲོ་བ་ཐམས་ཅད་ཀུན། །པདྨ་འོད་ཀྱི་ཞིང་དེར་སྐྱེ་བར་ཤོག །ཅེས་གོ་འཇོ་རྡོ་རྫོང་གྲྭ་ཆོས་དཔལ་ནས་ཕྱག་འབུམ་ཐེར། ཚིག་བདུན་གསོལ་འདེབས་འབུམ་ཐེར་སིདྡྷི་བྱེ་ཆུང་བཅས་སྒྲུབ་རྒྱུ་ཁས་ལེན་བྱས་པས། ཟངས་མདོག་དཔལ་རིའི་སྨོན་ལམ་ཉུང་བསྡུས་བྲི་རོག་ཟེར་ངོར་འགྱུར་མེད་རྡོ་རྗེས་སྨྲས་པས་འགྲོ་ཀུན་པདྨ་འོད་དུ་སྐྱེ་བའི་རྒྱུར་གྱུར་ཅིག
༈ རྔ་ཡབ་པདྨ་འོད་ཀྱི་ཕོ་བྲང་དུ། །སློབ་དཔོན་པད་འབྱུང་སློབ་མ་གཏེར་བདག་གླིང་། །རྩ་གསུམ་དཀྱིལ་འཁོར་རྒྱ་མཚོའི་ཞལ་ཕྱེས་ནས། །འདུས་པ་དང་པོའི་འཁོར་དུ་སྐྱེ་བར་ཤོག །
༈ འགྲོ་བའི་མགོན་པོ་ཨོ་རྒྱན་རིན་པོ་ཆེ། །ཞིང་ཁམས་གནས་མཆོག་གང་ན་བཞུགས་གྱུར་ཀྱང་། །ཐུགས་རྗེ་མྱུར་མགྱོགས་ལྡན་པའི་ལྕགས་ཀྱུ་ཡིས། །བདག་སོགས་ཁྱེད་ཀྱི་གདུལ་བྱར་གྱུར་བ་རྣམས། །འཁོར་བའི་ཆུ་བོ་ཆེ་ལས་བསྒྲལ་ནས་ཀྱང་། །ཨོ་རྒྱན་མཁའ་སྤྱོད་གནས་སུ་དྲང་དུ་གསོལ། །
༈ སངས་རྒྱས་ཀུན་འདུས་པདྨ་ཐོད་ཕྲེང་རྩལ། །བདག་སོགས་རྗེས་བཟུང་ཚེ་རབས་ཐམས་ཅད་དུ། །འགལ་རྐྱེན་ཀུན་ཞི་བསམ་དོན་མྱུར་འགྲུབ་ནས། །མཐར་ཐུག་པདྨ་འོད་དུ་ཁྲིད་པར་ཤོག །
༈ གུ་རུ་ཡིད་བཞིན་ནོར་བུའི་ཐུགས་བསྐྱེད་དང་། །མཛད་པ་སྨོན་ལམ་མཁྱེན་བརྩེ་ནུས་པའི་མཐུས། །བླ་མེད་ཡེ་ཤེས་སྒྱུ་འཕྲུལ་ཅི་འདྲ་བ། །དེ་འདྲ་ཁོ་ན་བདག་ཀྱང་འགྱུར་བར་ཤོག །