གསུང་ངག་རིན་པོ་ཆེ་ལས་འཕྲོས་པའི་ཟབ་མོའི་དེ་ཁོ་ན་ཉིད་ཀྱི་ཡེ་ཤེས་མདོ་ཙམ་སྟོན་པའི་ཟིན་བྲིས་བླ་མའི་ཞལ་ལུང་།
བླ་མ་ལ་ཕྱག་འཚལ་ལོ། །འདིར་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་སྒོ་ནས་གདུལ་བྱ་རྣམས་དཀྲི་བ་ལ། ཐོག་མར་སྣང་བ་གསུམ་ལམ་གྱི་གཞི་བཅའ་ལྟར་ཁྲིད་སྦྱོང་བྱས། དེ་ནས་དབང་གིས་རྒྱུད་སྨིན་པར་བྱས། དམ་ཚིག་སྡོམ་པའི་རྣམ་དབྱེ་ཁོང་དུ་ཆུད་དེ་བསྙེན་བསྒྲུབ་ལ་འབད། བླ་མ་ལས་འཁོར་འདས་དབྱེར་མེད་ཀྱི་ཁྲིད་ཞུས་ཏེ། འཁོར་འདས་གཉིས་ཀྱི་སྣང་བ་སེམས་སུ་ཐག་ཆོད། དེ་ཡང་གཅིག་དང་ཐ་དད་ལྷན་ཅིག་དམིགས་ངེས་ཀྱི་རྟགས་སོགས་ཐུན་མོང་གི་རིག་པ་ལ་མ་ལྟོས་པར་རང་གི་ཉམས་མྱོང་གི་རྣམ་རྟོག་ཁ་ཡན་དུ་མ་ཤོར་བ་བསྐྱང་ཚེ་འཁྲུལ་སྣང་གདུགས་ནམ་མཁའ་ལ་འཕྱར་བའི་གྲིབ་མ་དང་འདྲ་བའི་འཁྲུལ་རྟོག་ཐམས་ཅད་སེམས་སྣང་སུ་ཤེས་ཐག་ཆོད་པར་འགྱུར་བ་སྟེེ། རྗེ་དཀོན་མཆོག་ལྷུན་གྲུབ་ཀྱིས། གཟུགས་བརྙན་ལ་བྱད་བཞིན་དུ་ཞེན་པ་ལྟར་སྡུག་པ་ལ་འདོད་ཆགས་སྐྱེ། གྲིབ་མ་ལ་འདྲེར་འཛིན་པ་བཞིན་མི་སྡུག་པ་ལ་ཞེ་སྡང་སྐྱེ། ཞེས་གསུངས་པ་ལྟར་ཤེས་དགོས། སེམས་དེའང་སྒྱུ་མ་རང་བཞིན་མེད་པར་ཡིད་ཆེས་རྙེད་པར་བྱ། ཐོས་བསམ་གོ་ཡུལ་གྱི་ལྟ་བའི་རྩི་དང་མ་བྲལ་བ་རིམ་གཉིས་སྒོམ་པ་ལ་ཞུགས། དེའང་བཀའ་སྲོལ་འདིའི་དབང་ལམ་དུ་བྱ་བ་ལུས་དཀྱིལ་གསལ་བཏབ་ནས་ཐུན་བཞིར་དབང་བཞི་བླང་ནས་བསྒོམ་པ་འདི་ཡིན། དེའང་དབང་བཞི་ངོ་སྤྲོད་ལས། བསྐྱེད་པའི་རིམ་པའི་ཡེ་ཤེས་ཀྱིས། །སྣང་བའི་དངོས་པོ་བྱིན་གྱིས་རློབས། །རང་བྱུང་ཡེ་ཤེས་བྱིན་རླབས་ཀྱི། །སེམས་ཉིད་རིག་པར་བྱིན་གྱིས་བརླབས། །ལྷན་ཅིག་སྐྱེས་པའི་ཡེ་ཤེས་ཀྱིས། །ལུས་ལ་བདེ་བར་བྱིན་གྱིས་བརླབས། །དག་པ་བདེ་སྟོང་ཆེན་པོ་ཡི། །ཐམས་ཅད་བྱིན་གྱིས་བརླབས་པ་ཡིན། །ཞེས་གསུངས་པ་ལྟར། སྟན་ཐོག་གཅིག་ཏུ་དབང་བཞིའི་ལམ་བཞི་བསྒོམས་པས་ལྟ་བ་བཞི་རྒྱུད་ལ་སྐྱེས་ནས། རིམ་གྱིས་དབང་བཞི་པའི་ཡེ་ཤེས་ངོ་འཕྲོད་དེ། གྲུབ་མཐའ་སྙོགས་པ་ཡིན་ལ། དེའང་བུམ་དབང་སྣང་སྟོང་ཟུང་འཇུག་ལ་ངོ་བོ་ཉིད་གསུམ་དང་། གསང་དབང་གསལ་སྟོང་ཟུང་འཇུག་ལ་རང་བྱུང་བཞི་དང་། གསུམ་པ་ལ་བདེ་སྟོང་ཟུང་འཇུག་ལ་དགའ་བ་བཞི། བཞི་པ་ལའང་དེ་བཞིན་དུ་ཡོད་དེ་ལས། རྣལ་འབྱོར་པའི་རྒྱུད་ལ་ཐ་མ་ལ་འཕྲོ་རྒོད་དུག་ལྔའི་རྟོག་པ་དང་། སྣང་སྟོང་གསལ་སྟོང་བདེ་སྟོང་ཟུང་འཇུག་གསུམ་ལ་སོགས་ཉམས་བཟང་ངན་གང་ཤར་ཡང་བྱུང་རྒྱལ་དུ་གཏོང་གསུངས་པ། ཉམས་གང་བྱུང་ལ་རེ་དོག་དང་རྩིས་གདབ་མི་བྱེད་པར་རྒྱུ་དུས་ཀྱི་ལྟ་བའི་ངང་མ་ཤོར་བར་བསྐྱངས་ཐུབ་དགོས། སྤྱིར་དབང་བཞི་པའི་ཡེ་ཤེས་ངོ་སྤྲོད་དམ་ཚེ་འདིར་གྲུབ་མཐའ་སྙོགས་པ་ལ་སྔོན་གྱི་ལས་འཕྲོ་དང་། བླ་མ་ལ་སངས་རྒྱས་སུ་མཐོང་བའི་མོས་གུས་དང་། དྲག་ལ་རྒྱུན་མི་འཆད་པའི་བརྩོན་འགྲུས་གསུམ་ཀ་འཛོམ་དགོས་པར་གསུངས་པས། བླ་མ་ལ་མོས་གུས་བསྐྱེད་པ་གལ་ཆེ། བླ་མ་ལ་སངས་རྒྱས་དངོས་ཀྱི་འདུ་ཤེས་སྐྱེ་ན་བླ་མ་དང་ཡི་དམ་ཐམས་ཅད་དུ་མི་འཆོར། དེའང་ལྟ་བའི་དབང་གི་རང་སེམས་ལས་ལོགས་ན་མེད་པར་གོ་ན་རང་སེམས་སངས་རྒྱས་སུ་ངོ་ཤེས་པའོ། །དེའི་ངང་ནས་དགེ་སྦྱོར་བྱས་ཚེ་ལམ་ཐམས་ཅད་བླ་མའི་རྣལ་འབྱོར་དང་། སྣང་སྲིད་ཐམས་ཅད་བླ་མའི་རོལ་པར་འཆར་བ་ཞིག་འབྱུང་བ་ཡིན་པས། དེ་ལྟ་བུའི་མོས་གུས་ཀྱི་རྒྱུ་བྱས་ནས་བླ་མ་དང་ཐུགས་ཡིད་དབྱེར་མེད་དུ་འདྲེས་ཏེ་ཕྱག་རྒྱ་ཆེན་པོ་དབང་བཞིའི་ཡེ་ཤེས་མངོན་དུ་གྱུར་པ་ཡིན་ཏེ། ཁོ་བོས་བྱས་པའི་ལམ་རིམ་སྨོན་ལམ་ལས། དྲི་མེད་སེམས་ཀྱི་ཆོས་ཉིད་བྱང་ཆུབ་སེམས། །བློ་དང་ཚིག་གིས་མ་བཅོས་གདོད་མའི་གཤིས། །སྟོང་གསལ་ཕྱོགས་རིས་བྲལ་བའི་བླ་མ་ལས། །ནམ་ཡང་གཡོ་བ་མེད་པར་བྱིན་གྱིས་རློབས། །ཞེས་པ་ལྟར་རྣམ་ཐར་སྒོ་གསུམ་འདུས་མ་བྱས་པའི་དབྱིངས་མངོན་དུ་གྱུར་ནས་གྲུབ་མཐའ་སྙོགས་པ་ཡིན་ནོ། །དེ་ལྟ་བུའི་ཆོས་སྐུ་མངོན་དུ་གྱུར་ན་ཆོས་རྗེ་ས་པཎ་གྱིས། ཆོས་ཀྱི་དབྱིངས་ཀྱི་ཕོ་བྲང་དུ། །རྒྱལ་བ་རྣམས་ལ་ཆོས་སྐུར་སྣང་། །ཞེས་གསུངས་པ་ལྟར་སངས་རྒྱས་རྣམས་དང་དགོངས་པ་དབྱེར་མེད་དུ་གྱུར། སྟུག་པོ་བཀོད་པའི་ཞིང་ཁམས་སུ། །རྒྱལ་སྲས་རྣམས་ལ་ལོངས་སྐུར་སྣང་། །ཞེས་གསུངས་པ་ལྟར་གདུལ་བྱ་མཆོག་དམན་རྣམས་ལ་གཟུགས་སྐུའི་སྣང་བ་འཁོར་བ་མ་སྟོངས་ཀྱི་བར་རྒྱུན་མི་འཆད་པར་སྣང་ནས་འགྲོ་བའི་དོན་མཛད་པ་ཡིན་ནོ། །དབང་བཞི་པའི་ཡེ་ཤེས་ཀྱི་ངོ་བོ་སྟོན་བྱེད་རྒྱུད་ལས་གསུངས་པ་ཤིན་ཏུ་མང་ཞིང་། རྗེ་ས་པཎ་གྱི་ཕྱག་ཆེན་མིག་ཐུར་ལས། ཡོད་དང་མེད་པ་ལ་སོགས་པ། །དངོས་པོའི་གནས་ལུགས་དེ་ལ་མེད། །བསྒོམ་བྱ་སྒོམ་བྱེད་ལ་སོགས་པ། །བསྒོམ་པར་བྱ་བ་ཡོད་མ་ཡིན། །སེམས་ལ་ངོ་བོ་མ་གྲུབ་པའི། །སེམས་ཀྱི་ངོ་སྤྲོད་ག་ལ་ཡོད། །ཅེས་སོགས་དང་། རྟོགས་རྒྱུ་མེད་པའི་དོན་རྟོགས་ན། །གྲོལ་རྒྱུ་མེད་པའི་སེམས་ཉིད་གྲོལ། །ཞེས་དང་། རྗེ་བཙུན་གྱིས། དབུ་མ་སེམས་ཙམ་ལ་སོགས་པ། །ཚིག་ཏུ་བརྗོད་པ་སྤྲོས་པ་ཡིན། །ཡིད་ལ་བསམ་པ་རྣམ་རྟོག་ཡིན། །རང་བཞིན་བརྗོད་མེད་བསམ་མེད་ཡིད། །ཞེས་སོགས་ཤིན་ཏུ་མང་ངོ་། །དེའི་བླ་མ་ལ་སྐྱབས་གནས་ཀུན་འདུས་སུ་ཤེས་ནས་མོས་གུས་ཀྱི་གསོལ་བ་འདེབས་པ་སངས་རྒྱས་ཀུན་འདུས་ཕྱི་ཡི་བླ་མ་དང་། བླ་མ་ལ་མོས་གུས་ཀྱིས་དྲན་བཞིན་པའི་སེམས་ཀྱི་གསལ་ཆ་དེ་སེམས་ཉིད་འོད་གསལ་ནང་གི་བླ་མ་ཡིན། སེམས་ཀྱི་གསལ་ཆ་དེ་བཅས་བཅོས་དགག་སྒྲུབ་མ་ཤོར་བར་དབྱིངས་རིག་བསྲེས་ནས་མཉམ་པར་འཇོག་ཐུབ་ན་ཐུགས་ཡིད་དབྱེར་མེད་འདྲེས་ནས་རྟོག་པ་ནང་ནས་འཆར་བ་ཡིན་ནོ། །ལམ་དུས་ཀྱི་དབང་བཞི་པའི་སྐུ་བཞི་ངོ་སྤྲོད། སེམས་ཀྱི་གཤིས་ཅི་ཡང་མ་གྲུབ་པ་ཆོས་སྐུ། གདངས་བདེ་ཆེན་སུ་མ་འགགས་པ་ལ་ལོངས་སྐུ། རྩལ་ལྷ་སྐུར་འཆར་བ་སྤྲུལ་སྐུ། དེ་གསུམ་དབྱེར་མི་ཕྱེད་པ་བསྒོམ་བྱ་སྒོམ་བྱེད་དང་བྲལ་བ་ངོ་བོ་ཉིད་ཀྱི་སྐུར་ངོ་སྤྲད་པ་ཡིན། བླ་མ་དང་ཐུགས་ཡིད་དབྱེར་མེད་བསྲེས་ནས་མཉམ་པར་འཇོག་ཚེ། གཤིས་ཅིར་ཡང་མ་གྲུབ་པའི་སྟོང་ཉིད་ཆོས་སྐུ། གདངས་གང་དུའང་མ་འགགས་པ་ཕྱོགས་རིས་དང་བྲལ་བའི་གསལ་ཆ་ལོངས་སྐུ། རྩལ་མོས་གུས་སུ་དུང་ངེ་བ་སྤྲུལ་སྐུ། བསྒོམ་བྱ་སྒོམ་བྱེད་དང་བྲལ་བ་ངོ་བོ་ཉིད་སྐུར་འཇོག་པ་ཡིན་པས་སྔ་མ་ལ་བདེ་བ་ལམ་དུ་འཁྱེར་བ་དང་། ཕྱི་མ་ལ་མོས་གུས་ལམ་དུ་ཁྱེར་བ་ཡིན་ཅིང་། མདོར་ན་བླ་མའི་བྱིན་རླབས་ཞུགས་ན་ཆོས་ཅན་གྱི་སྣང་བ་གང་སྣང་ཐམས་ཅད་ལམ་དུ་ཁྱེར་ཤེས་ན་ཕྱག་རྒྱ་ཆེན་པོ་རྟོགས་པའི་ཉེ་རྒྱུར་འགྲོ་བ་ཡིན་ནོ། །ཅེས་པའང་སྡེ་གཞུང་མཆོག་སྤྲུལ་རིན་པོ་ཆེར་ནན་གྱིས་ཞུས་ཏེ། རྗེ་དེ་ཉིད་ཀྱིས་གསུང་རིམ་བཞིན་དུ་རྒྱལ་བ་ལྷ་ལས་བབས་པའི་དུས་བཟང་པོར་ཆོས་ཀྱི་བློ་གྲོས་པས་བྲིས་པ་འདིས་ཀྱང་སྙན་བརྒྱུད་ཟབ་མོའི་བསྟན་པ་རྒྱས་པའི་རྒྱུར་གྱུར་ཅིག །སརྦ་མངྒལཾ།