ཟབ་མོ་ཡང་ཏིག་ལས། ཟབ་མོ་བཅུད་བསྡུས།
༄༅། །ཟབ་མོ་ཡང་ཏིག་ལས། ཟབ་མོ་བཅུད་བསྡུས་བཞུགས་སོ། །
༄༅། ཟབ་མོ་བཅུད་བསྡུས་ཞེས་བྱ་བ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གདོད་ནས་རང་བྱུང་སུས་ཀྱང་འདུས་མ་བྱས། །འཁོར་འདས་ཀུན་འབྱུང་རིག་པ་བྱང་ཆུབ་སེམས། །རང་བྱུང་ཡེ་ཤེས་རྫོགས་པ་ཆེན་པོ་ལ། །དུས་གསུམ་འདུ་འབྲལ་མེད་པས་ཕྱག་འཚལ་ལོ། །ཐེག་པའི་མཐར་ཐུག་རྡོ་རྗེ་སྙིང་པོའི་ལུང་། །གང་ཡང་མ་སྤངས་ཀུན་ལས་འདས་པའི་དོན། །ཟབ་ཡངས་ངོ་མཚར་རྨད་དུ་བྱུང་བའི་དོན། །ཇི་ལྟར་བདག་གིས་རྟོགས་བཞིན་བཤད་ཀྱིས་ཉོན། །གདོད་མའི་ངང་ནི་བརྗོད་འདས་གཞི་རྩ་བྲལ། །སྤང་བླང་རྩོལ་སྒྲུབ་རེ་དོགས་ཕྱོགས་རིས་མེད། །མི་འགྱུར་ལྷུན་གྲུབ་ཆོས་སྐུ་བྱང་ཆུབ་ཀློང་། །ཀུན་བཟང་ཡངས་པ་ཆེན་པོའི་རང་བཞིན་ནོ། །གནས་དེར་གནས་ན་ཀུན་ཀྱང་ཆོས་ཀྱི་སྐུ། །རང་བཞག་བདེ་བ་ཆེན་པོར་ལྷུན་གྲུབ་པས། །བཅས་བཅོས་མ་བྱེད་ཇི་བཞིན་ལྷུག་པར་ཞོག །རེ་དང་དོགས་མེད་གདོད་མའི་གཞི་དབྱིངས་ལགས། །སྒོམ་དུ་མེད་དོ་རྣམ་ཀུན་སྟོང་པའི་གཟུགས། །གང་ཤར་རྒྱལ་པོ་ལྷུན་རྫོགས་ངང་ལ་རོལ། །ཅོག་བཞག་རང་གྲོལ་འབད་མེད་གང་དགའི་ཡུལ། །ཤར་གྲོལ་(༡༤༤)རིས་མེད་ཆོས་སྐུར་ཕྱམ་གདལ་ལོ། །ཡེ་ནས་གཉིས་མེད་རང་བྱུང་ཡེ་ཤེས་ལ། །དམིགས་འཛིན་ཞེན་པའི་བསམ་གཏན་ཅི་ཞིག་བྱ། །གང་བབས་རང་སྟོང་ཟང་ཀ་རྗེན་པ་ཉིད། །ཆུ་བོའི་གཞུང་བཞིན་རྟག་ཏུ་འདུ་འབྲལ་མེད། །འདི་ཉིད་ལྷུན་གྲུབ་རྒྱལ་པོའི་དགོངས་པ་སྟེ། །རང་བཞིན་གཞི་ཡི་བསམ་གཏན་ངོས་ཟིན་པས། །སྒོམ་མེད་ངང་དྭངས་འབྲལ་མེད་ཆེན་པོར་གནས། །ཐུན་མཚམས་རིས་མེད་རྫོགས་པ་ཆེན་པོར་གྲུབ། །ཀ་དག་ཆོས་ཟད་ཡིད་ལ་བྱར་མེད་པས། །ཕྱལ་པ་བར་མེད་སྣང་བ་བདེ་ཡངས་པ། །ཐམས་ཅད་ཕྱམ་ཕྱམ་ནམ་མཁའ་ཡངས་པ་བཞིན། །ཆོས་ཟད་ངང་ན་བློ་ཟད་ཉམས་རེ་དགའ། །ཕྱི་རོལ་དངོས་ཀུན་སྒྱུ་མ་རྨི་ལམ་དང་། །ཆུ་ཟླ་མིག་ཡོར་དྲི་ཟའི་གྲོང་ཁྱེར་བཞིན། །མེད་པ་གསལ་སྣང་སྟོང་པའི་རང་གཟུགས་སུ། །དེ་རིང་ཉིད་ནས་མཐོང་བས་བློ་བདེའོ། །ནང་གི་རིག་པ་སྟོང་གསལ་ཆོས་ཀྱི་སྐུ། །ཟང་ཐལ་ཕྱལ་པ་བར་སྣང་དག་པ་བཞིན། །འགྱུ་བ་དངོས་མེད་རང་ཡལ་རྗེས་མེད་པས། །སྤང་གཉེན་རང་གྲོལ་ཆོས་ཟད་མཚར་རེ་ཆེ། །གནས་ལུགས་མཐོང་ལ་གཞི་རྩ་དངོས་པོ་མེད། །ཆོས་ཉིད་མཐོང་ལ་སྒོམ་པ་རྡུལ་ཙམ་མེད། །སྙེམས་དང་བྲལ་ལ་སྤྱོད་པ་གཟའ་གཏད་མེད། །རེ་དོགས་བྲལ་ལ་འབྲས་བུ་བསྒྲུབ་བྱ་མེད། །དེ་ཉིད་ཤེས་ན་རྣལ་འབྱོར་མཁས་པ་ཡིན། །དགེ་བ་དེ་ཡིས་འགྲོ་ཀུན་གྲོལ་བར་ཤོག །ཟབ་མོ་བཅུད་བསྡུས་ཞེས་བྱ་བ། ཐེག་པ་མཆོག་གི་རྣལ་འབྱོར་པ་སྣ་ཚོགས་རང་གྲོལ་གྱིས། གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།