ཞེས་པ་ནས། བཀའ་སྲུང་དམ་ཅན་རྒྱ་མཚོར་ཕྱག་འཚལ་བསྟོད༔ ཅེས་པའི་བར་ལས་བྱང་བཞིན་བསྟོད། དེ་ནས་དངོས་གྲུབ་བླང་བ་ནི། ཟས་སྣ་འདོད་ཡོན་བཏེགས་སྟེ། ཧཱུྃ། ཆོས་དབྱིངས་ནམ་མཁའ་ཡངས་པའི་ཀློང་རུམ་ནས། །འཕགས་མཆོག་རྟ་མགྲིན་དཀྱིལ་འཁོར་ལྷ་ཡི་ལྷ། །བླ་མ་ཡི་དམ་དྲང་སྲོང་མེ་ལྷའི་ཚོགས། །བུམ་པ་བཟང་དང་དཔག་བསམ་ནོར་བུའི་ཚུལ། །འཕྲིན་ལས་རྣམ་པ་བཞི་ཡི་དངོས་གྲུབ་སྩོལ། །འོད་དཔག་མེད་མགོན་བཀའ་བརྒྱུད་བླ་མའི་ཚོགས། །སྤྲོས་བྲལ་ཆོས་སྐུ་མངོན་གྱུར་དངོས་གྲུབ་སྩོལ། །འཕགས་པ་སྤྱན་རས་གཟིགས་དབང་ལོངས་སྐུའི་ཚོགས། །ཕྱག་རྒྱ་ཆེན་པོའི་དངོས་གྲུབ་སྩལ་དུ་གསོལ། །གུ་རུ་པདྨ་འབྱུང་གནས་སྤྲུལ་པའི་སྐུ། །འཆི་མེད་ཚེ་ཡི་དངོས་གྲུབ་སྩལ་དུ་གསོལ། །ཡེ་ཤེས་མེ་ལྷ་འཕྲིན་ལས་ཀུན་གྱི་བདག །ནད་གདོན་ཞི་བའི་དངོས་གྲུབ་སྩལ་དུ་གསོལ། །མཆོག་དང་ཐུན་མོང་དངོས་གྲུབ་མ་ལུས་པ། །མྱུར་བ་ཉིད་དུ་བདག་ལ་སྩལ་དུ་གསོལ༔ ཨཱོཾ་ཨཱ་ཧཱུྃ་བཛྲ་གུ་རུ་དེ་ཝ་དྷཀྐི་ནི་མ་མ་སརྦ་སིདྡྷི་པུཥྟིང་ཀུ་རུ་ཡེ་སྭཱ་ཧཱ༔ ཞེས་དངོས་གྲུབ་བླང་ཞིང་ལོངས་སྤྱོད། བཟོད་གསོལ་ནི༔ ཡེ་ཤེས་མེ་ལྷ་དྲང་སྲོང་བདག་ལ་དགོངས། །བདག་གིས་འཕྲིན་ལས་མེ་མཆོད་ཆོ་ག་འདི། །ཚུལ་བཞིན་བགྱིད་པར་སེམས་ཀྱང་ནོར་དང་འཁྲུལ། །ལྷག་གམ་ཆད་དམ་སྒྲ་ཉམས་རྫས་མ་འཛོམ། །ཏིང་འཛིན་ཀློང་དུ་མ་གྱུར་ཉེས་བྱས་ཚོགས། །ཉམས་ཆག་ཉེས་ལྟུང་སྡིག་སྒྲིབ་མཐོལ་ལོ་བཤགས། །ཚངས་པ་མཆོག་གི་དངོས་གྲུབ་སྩལ་དུ་གསོལ། །ཞེས་ཡི་གེ་བརྒྱ་པས་ལྷག་ཆད་བསྐང་། ཨཱོཾ་ཁྱེད་ཀྱིས་སེམས་ཅན་དོན་ཀུན་མཛོད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས། །སླར་ཡང་འབྱོན་པར་མཛད་དུ་གསལ། །ཨཱོཾ་བཛྲ་མུཿ ཞེས་ཡེ་ཤེས་པ་གཤེགས། དམ་ཚིག་པ་རང་ལ་བསྡུ༔ སླར་ཡང་འཇིག་རྟེན་པའི་མེ་ལྷ་དཔང་པོར་བཞུགས་པ་བཛྲ་ས་མ་ཛ༔ དམ་ཚིག་པ་དང་གཉིས་སུ་མེད་པར་གྱུར་པ་ལ་གཏང་རག་གི་མཆོད་བསྟོད་དང་སྲེག་རྫས་རྣམས་སྔར་མེ་ལྷ་མཆོད་པའི་སྐབས་ལྟར་ཕུལ་རྗེས་གཏོར་མ་ལ་ཡང་། ཨཱོཾ་ཨགྣཱེ་ཡེ་ས་པ་རི་ཝཱ་ར་ཨི་དམ་བྷ་ལིངྟ་པཱུ་ཙ་ཁཱ་ཧི། གསུམ་གྱིས་ཕུལ་ལ་འདོད་དོན་ལ་གསོལ་བ་གདབ། སླར། ཨཱོཾ་ཨགྣཱེ་ཡེ་ས་པ་རི་ཝཱ་ར་ཨརྒྷཾ་ནས། ཤཔྟའི་བར་གྱིས་མཆོད། ཧཱུྃ། དྲང་སྲོང་ཆེན་པོ་མེ་ཡི་ལྷ། །གཟི་བརྗིད་འབར་བ་ལྟ་ན་སྡུག །འཕྲིན་ལས་ཀུན་བདག་ཐུགས་རྗེ་ཅན། །གུས་པའི་ཡིད་ཀྱིས་ཕྱག་འཚལ་བསྟོད། །ཅེས་བསྟོད། གཤེགས་གསོལ་ནི། ཧཱུྃ། དྲང་སྲོང་ཆེན་པོ་མེ་ཡི་ལྷ། །འབར་བའི་འཕྲིན་ལས་བསྒྲུབ་མཛད་ནས། །རང་བཞིན་གནས་སུ་གཤེགས་ནས་ཀྱང་། །སླར་ཡང་རྗེས་མཐུན་དངོས་གྲུབ་སྩོལ། །ཨཱོཾ་ཨགྣཱེ་ཡེ་དྷེ་ཝ་བྷྱཿབཛྲ་མུ༔ ཞེས་བརྗོད། ཤིས་བརྗོད་ནི། ཧཱུྃ་ཧྲཱི༔ ཆོས་དབྱིངས་ཀུན་ཁྱབ་ཡངས་པ་ཐུགས་རྗེའི་ལྷ༔ གནས་ལུགས་སྙིང་པོ་རྟོགས་པའི་བཀྲ་ཤིས་ཤོག༔ ཅེས་པ་ནས། དབང་བཅུའི་དཔལ་ལ་སྤྱོད་པའི་བཀྲ་ཤིས་ཤོག༔ ཅེས་པའི་བར་དང་། བསྔོ་བ་ནི། ཧཱུྃ། རྟ་མཆོག་དབང་གི་ལྷ་ཚོགས་རྣམས། སྦྱིན་སྲེག་མཆོད་བསྟོད་ཕུལ་བའི་མཐུས། །ཐུགས་དམ་གཉན་པོ་སྐོང་གྱུར་ཅིག །འཕྲིན་ལས་རྣམ་བཞི་ཐོག་མེད་སྒྲུབས། །བདག་སོགས་འགྲོ་བ་སེམས་ཅན་མ་ལུས་པ། །རྩ་གསུམ་ལྷ་ཚོགས་གོ་འཕང་ཐོབ་པར་ཤོག །སྨོན་ལམ་ནི། ཧོ༔ ཕྲིན་ལས་མེ་ཡིས་ཏིང་འཛིན་བསྒོམ་བསྒྲུབ་མཐུས། །དེང་ནས་བཟུང་སྟེ་ཚེ་རབས་ཐམས་ཅད་དུ། །ལས་བཞིའི་འཕྲིན་ལས་གང་བརྩམས་ལྷུན་གྲུབ་ནས། །མ་འབད་བཞིན་དུ་མཆོག་ཐུན་ཡོངས་གྲུབ་སྟེ། །དངོས་གྲུབ་རྒྱ་མཚོའི་དཔལ་ལ་སྤྱོད་པར་ཤོག །ཅེས་བརྗོད། དཔལ་རྟ་མགྲིན་དྲེགས་པ་ཟིལ་གནོན་གྱི་ཞི་བའི་སྦྱིན་སྲེག་འདི་ཡང་ཧོར་པཎ་ཆེན་ངག་དབང་འཇམ་དབྱངས་བློ་ལྡན་གྱིས་མཛད་པའི་མ་རིག་མུན་སེལ་གྱི་ཞི་བའི་སྦྱིན་སྲེག་ལྟར་དུ་གཏེར་སྒྲོམ་འདིའི་མ་ཚང་བའི་ཁ་སྐོང་གི་སྐོར་ལ་གཅིག་ཤེས་ཀུན་གྲོལ་གྱི་ཆིངས་ལྟར་སྦྱར་ན་ལག་ལེན་བདེ་བར་སེམས་ཏེ་ཁོ་བོ་ཉི་མ་གྲགས་པས་དཔལ་ལྡན་སྟག་མོ་སྒང་དུ་སྦྱར་བ་འདིས་ཀྱང་བསྟན་འགྲོའི་དོན་རྒྱ་ཆེན་པོ་འབྱུང་བར་གྱུར་ཅིག །མངྒ་ལཾ།། །།
