དུས་བཞི་ཆུང་བའི་ངོས་འཛིན་བྱེ་བྲག་ཏུ་བསྟན་པ།

གསུམ་པ་དུས་བཞི་ཆུང་བའི་ངོས་འཛིན་བྱེ་བྲག་ཏུ་བསྟན་པ་ནི། སྐྱོན་མེད་ཡོན་ཏན་ཚང་བ་རྫོགས་ལྡན་ཆོས། །དེ་ནས་བཞི་ཆ་ཉམས་པ་གསུམ་ལྡན་སྟོད། །ཕྱེད་ཉམས་གྱུར་ན་གསུམ་ལྡན་སྨད་དུ་འགྱུར། །བཞི་གསུམ་ཉམས་པའི་ལྷག་མ་གཉིས་ལྡན་ཡིན། །བཞི་ཆ་གཅིག་ཀྱང་མེད་ན་རྩོད་ལྡན་ཏེ། །ལྷ་མིན་ཀླ་ཀློ་ནག་པོའི་ཆོས་སུ་གསུངས། །རྩ་བར། སྐྱོན་མེད་ཡོན་ཏན་ཚང་པ་རྫོགས་ལྡན་ཆོས། །ཞེས་པ་ནས། ཆོས་སུ་གསུངས་ཞེས་པའི་བར་ཤོ་ལོ་ཀ་གཅིག་དང་རྐང་བ་གཉིས་བྱུང༌། དེའི་དོན་ནི།

བསྟན་པར་བསྲེ་བསླད་ཀྱིས་སྐྱོན༵་མེ༵ད་ཅིང་ཡོ༵ན་ཏ༵ན་ཐམས་ཅད་ཚང༵་བ༵་ནི་སངས་རྒྱས་ཀྱི་བསྟན་པ་རབ་འབྲིང་མཐའ་གསུམ་ལས་རབ་རྫོ༵གས་ལྡ༵ན་གྱི་ཆོ༵ས་དང༌། དེ༵འི་རྗེས་ན༵ས་བཞི༵་ཆ༵་གཅིག་ཉམ༵ས་པ༵་ནི་གསུམ་༵ལྡ༷ན་སྟོ༵ད་ཀྱི་ཆོས་དང༌། བཞི་ཆ་གཉིས་ཉམས་པའམ་ཕྱེ༵ད་ཉམ༵ས་པར་གྱུ༵ར་བ་དེའི་ཚེ་ན༵་གསུ༵མ་ལྡ༵ན་སྨད༵་དུ༵་འགྱུར༵་བ་དང༌། གསུམ་ལྡན་གྱི་ཆོས་ནི་སངས་རྒྱས་ཀྱི་བསྟན་པ་འབྲིང་ཞེས་བྱའོ། །དེ་ནས་བཞི༵་ཆ་གསུམ༵་ཉམ༵ས་པ༵འི་ལྷ༵ག་མ༵་གཉི༵ས་ལྡན༵་གྱི་ཆོས་ཡི༵ན་ལ་དེ་ནི་སངས་རྒྱས་ཀྱི་བསྟན་པ་མཐའ་མ་ཞེས་བྱའོ། །བཞི༵་ཆ༵་བཞི་ཀ་ཉམས་ནས་བཞི་ཆ་གཅི༵ག་ཀྱ༵ང་མེ༵ད་པར་གྱུར་བའི་ཚེ་ན༵་རྩོད༵་ལྡན༵་གྱི་ཆོས་ཏེ༵། དེ་ནི་ལྷ༵་མིན༵་ཀླ༵་ཀློའི༵་ནག༵་པོའི༵་ཆོས༵་སུ༵་གསུ༵ངས་པ་ཡིན་ཏེ། རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་ལས། ལྷུན་པོ་རྒྱབ་ཀྱི་ཕྱོགས་རྣམས་སུ་ནི་ས་གཞི་དག་ལ་ལྷ་མིན་རྣམས་ཀྱིས་རྒྱལ་བར་དཀའ་བ་འཁོར། །གང་དུ་ཆོས་ནི་རྣམ་པར་ཉམས་ཤིང་རྩོད་དུས་འཇུག་པ་དེ་དང་དེར་ནི་རབ་ཏུ་བགྲོད་པར་བྱེད། །ཀླ་ཀློ་རྣམས་ཀྱང་གཡུལ་དུ་བཅོམ་སྟེ་རང་གི་ཆོས་ལ་འགོད་པ་བྱས་ནས་མདུན་དུ་རྣམ་པར་རྒྱུ། །རྫོགས་ལྡན་གསུམ་ལྡན་གཉིས་ལྡན་དག་དང་རྩོད་དུས་གཞན་ནི་དུས་ཀྱི་སྦྱོར་བ་དག་གིས་འབྱུང་བར་བྱ། །དུམ་བུ་གང་དུ་སྟོབས་ལྡན་འཁོར་ལོ་ཅན་དེ་རབ་ཏུ་ཞུགས་པ་དེར་ནི་རྫོགས་ལྡན་དུས་བགྲོད་དེ། །རྒྱལ་པོའི་རྒྱབ་ཏུ་གསུམ་ལྡན་རྩོད་པའི་དུས་ཀྱང་མདུན་དག་ཏུ་སྟེ་གཉིས་ཀྱི་བར་དུ་གཉིས་ལྡན་ནོ། །ཞེས་དང༌། དཔལ་མཆོག་དང་པོའི་རྒྱུད་འགྲེལ་དྲི་མེད་འོད་ལས།

སའི་དུམ་བུ་གང་དུ་དེ་བཞིན་གཤེགས་པའི་ཆོས་ནི་རྣམ་པར་ཉམས་ཤིང་དེ་དག་ལས་བཟློག་པའི་ཆོས་འཇུག་པའི་ས་གཞི་དེར་འཁོར་ལོ་ཅན་ཏེ། རྩོད་དུས་ལ་ཆོས་མིན་རབ་ཏུ་འཇུག་པ་དེ་ཉིད་རྩོད་དུས་འཇུག་པ་ཞེས་པའི་དོན་ཏོ། །ཆོས་མ་ཡིན་པའི་བདག་ཉིད་རྩོད་པའི་དུས་སོ། །དུམ་བུ་གང་དང་གང་དུ་ཀླ་ཀློའི་ཆོས་ཞུགས་པའི་དུམ་བུ་དེ་དང་དེ་ཉིད་དུ་རབ་ཏུ་གྱུར་བས་བགྲོད་པར་བྱེད་པ་ནི་རབ་ཏུ་བགྲོད་པར་བྱེད་པའོ། །ཞེས་དང༌། རྫོགས་ལྡན་གསུམ་ལྡན་གཉིས་ལྡན་དག་དང་རྩོད་དུས་གཞན་ནི་དུས་ཀྱི་སྦྱོར་བ་དག་གིས་འབྱུང་བར་འགྱུར་ཞེས་པས་ནི་འདིར་རྫོགས་ལྡན་ལ་སོགས་པ་དུས་བཞི་གཞན་ཏེ། རྫོགས་ལྡན་ཆེན་པོ་ལ་སོགས་པ་མ་ཡིན་ནོ་ཞེས་པའི་དོན་ཏོ། །དུས་བཞི་འདི་ནི་དུས་ཀྱིས་སྦྱོར་བས་འབྱུང་བར་འགྱུར་ཏེ་དུས་ནི་ཁྱིམ་གྱི་འཁོར་ལོ་རྩིབས་བཅུ་གཉིས་པའོ། །དེའི་སྦྱོར་བ་ནི་དུས་ཀྱི་སྦྱོར་བ་སྟེ་ མཚམས་བཞིའི་དབྱེ་བས་འབྱུང་བར་འགྱུར་རོ། །དུམ་བུ་གང་དུ་སྟོབས་ལྡན་འཁོར་ལོ་ཅན་ཏེ་རབ་ཏུ་ཞུགས་པ་དེར་ནི་རྫོགས་ལྡན་དུས་བགྲོད་དེ། རྫོགས་ལྡན་དུས་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་ཀྱི་ཆོས་བགྲོད་དོ་ཞེས་པའི་དོན་ཏེ། རྒྱལ་པོའི་རྒྱབ་ཏུ་གསུམ་ལྡན་ཞེས་པ་ནི་རྒྱལ་པོའི་རྒྱབ་ཏུ་རྫོགས་ལྡན་གྱི་མཐར་ཆོས་ཀྱི་རྐང་བ་གཅིག་མེད་པ་དང༌། གསུམ་ལྡན་གྱི་མཐར་རྐང་བ་གཉིས་མེད་པ་ནི་གསུམ་ལྡན་དུ་འགྱུར་རོ། །རྩོད་པའི་དུས་ཀྱང་རྒྱལ་པོའི་མདུན་དག་ཏུ་སྟེ་བསྐལ་བའི་མཐར་ཆོས་ཀྱི་རྐང་པ་བཞི་མེད་པའོ། །གཉིས་ཀྱི་བར་དུ་གཉིས་ལྡན་ནོ། །ཞེས་པ་ནི། རྩོད་དུས་དང་གསུམ་ལྡན་གཉིས་ཀྱི་བར་དུ་ཆོས་ཀྱི་རྐང་བ་གསུམ་མེད་པའི་གཉིས་ལྡན་ནོ། །ཞེས་གསུངས་པའི་ཕྱིར་རོ། །