གཉིས་པ་རང་ལུགས་གཞག་པ།

གཉིས་པ་རང་ལུགས་གཞག་པ་ནི།

མཚོ་ཊཱིཀ་ལས། འདུལ་པ་མདོར་བསྡུས་ཐམས་ཅད་རྗེས་བཅས་ཡིན་ཏེ། དངོས་བཅས་རྣམས་མཛད་ཟིན་པའི་རྗེས་སུ་སངས་རྒྱས་མྱ་ངན་ལས་འདའ་ཁའི་ཚེ་ཞལ་ཆེམས་ཀྱི་ཚུལ་དུ་བཅས་པའི་ཕྱིར་ཏེ། སྔར་དྲངས་པའི་ལུང་དེས་གྲུབ་བོ། །ཞེས་གསུངས་སོ། ། གསུམ་པ་རྩོད་པ་སྤོང་བ་ནི། ཁ་ཅིག་ན་རེ། རྒྱུ་ཚོགས་དང་བཅས་པའི་མདོར་བསྡུས་རྗེས་བཅས་ཡིན་ཡང༌། ཡན་ལག་གི་མདོར་བསྡུས་སྔར་བཅས་ཡིན་ཏེ། དེ་ལྟར་མ་ཡིན་ན་སྐྱོན་ཡོད་དེ། དངོས་བཅས་མཛད་ནས་མདོར་བསྡུས་མ་གསུངས་པའི་བར་སྐབས་དེར་ལྟུང་བ་འདིའི་ཡན་ལག་གཞན་ཚང་གི་དབང་དུ་བྱས་ཏེ། འཆར་ཀ་ལྟ་བུ་དགེ་སློང་གཅིག་གིས་བུད་མེད་རྫུ་འཕྲུལ་གྱི་ཆོས་ཅན་དང་དབེན་པ་ན་འདུག་འགྲེང་བྱས་པ་ལ་དབེན་པ་ན་འདུག་འགྲེང་གི་ལྟུང་བྱེད་རྫོགས་པར་བསྐྱེད་དམ་མི་བསྐྱེད་བརྟག བསྐྱེད་ན་དགེ་སློང་གིས་བུད་མེད་རྫུ་འཕྲུལ་ཅན་དང་དབེན་པར་འདུག་འགྲེང་བྱས་པ་ཆོས་ཅན། དགག་བྱ་མ་རྫོགས་པ་ལ་བཅས་པ་རྫོགས་པར་ཐལ། བུད་མེད་རྫུ་འཕྲུལ་གྱི་ཆོས་ཅན་དང་དབེན་པར་འདུག་འགྲེང་བྱས་པ་ལ་ཆགས་པ་རྒྱུར་འགྱུར་གྱི་དགག་བྱ་མ་རྫོགས་ཀྱང་ལྟུང་བྱེད་རྫོགས་པར་བསྐྱེད་པའི་ཕྱིར་ཞེས་པའི་སྐྱོན་ཡོད་ལ། ལྟུང་བྱེད་མི་བསྐྱེད་ན་ཡན་ལག་ཚང་ཡང་མི་བསྐྱེད་དམ་མ་ཚང་ནས་མི་བསྐྱེད། སྔ་མ་ལྟར་ན་དབེན་པར་འདུག་འགྲེང་གི་ལྟུང་བྱེད་བསྐྱེད་པ་མི་སྲིད་པར་ཐལ། རང་གི་ཡན་ལག་མ་ཚང་ན་དབེན་པར་འདུག་འགྲེང་གི་ལྟུང་བྱེད་མི་བསྐྱེད་ཅིང་ཡན་ལག་ཚང་ཡང་དབེན་པར་འདུག་འགྲེང་གི་ལྟུང་བྱེད་མི་བསྐྱེད་པའི་ཕྱིར་ཏེ། རྟགས་ཟུར་ཕྱི་མ་ཁས་བླངས་སོ། །ཕྱི་མ་ལྟར་ན་ཡན་ལག་གང་མ་ཚང༌། ཡུལ་བུད་མེད་རྫུ་འཕྲུལ་གྱི་ཆོས་ཅན་མ་ཡིན་པ་དགོས་པ་ལ་དེ་མ་ཚང་ངོ་ཞེ་ན། དབེན་པར་འདུག་འགྲེང་གི་ལྟུང་བྱེད་བསྐྱེད་པ་ལ། ཡུལ་བུད་མེད་རྫུ་འཕྲུལ་གྱི་ཆོས་ཅན་མ་ཡིན་པ་ཡན་ལག་ཏུ་དགོས་པར་དངོས་སུ་ནི་མ་གསུངས་ལ། དེའི་ཚེ་ན་ཁྱེད་ལྟར་ན་ཡན་ལག་མདོར་བསྡུས་སྦྱར་དུ་མེད་དེ། དེའི་ཚེ་ན་ཁྱེད་ལྟར་ན་ཡན་ལག་མདོར་བསྡུས་མ་བཅས་པའི་ཕྱིར་རོ་ཞེ་ན། དེའི་སྐྱོན་མེད་དེ། སྔར་གཞིར་བཞག་པ་དེ་ལ་དབེན་པར་འདུག་འགྲེང་གི་ལྟུང་བྱེད་འདི་གཉིས་ཀྱི་ཡན་ལག་མ་ཚང་བ་ཅུང་ཟད་ཀྱང་མེད་པས་དབེན་པར་འདུག་འགྲེང་གི་ལྟུང་བྱེད་རྫོགས་པར་བསྐྱེད་དོ་ཞེས་བརྗོད་དོ། །ཁྱེད་ཀྱི་སྔར་གྱི་ཐལ་འགྱུར་དེ་ལ་བརྟགས་ཏེ། བཅས་པ་རྣམ་འཇོག་གི་དགག་བྱ་མ་རྫོགས་པ་ལ་བཅས་པ་རྫོགས་པར་ཐལ་ཟེར་རམ། བྱ་བ་དེ་འབྲེལ་གྱི་དགག་བྱ་མ་རྫོགས་པ་ལ་བཅས་པ་རྫོགས་པར་ཐལ་ཞེས་གང་ཟེར། སྔ་མ་ལྟར་ན་སྔར་གྱི་རྟགས་དེ་ལ་ཁྱབ་པ་མེད་དོ། །ཕྱི་མ་ལྟར་ན་འདོད་པ་ཡིན་ཏེ། བྱ་བ་དེ་འབྲེལ་གྱི་དགག་བྱ་མ་རྫོགས་པ་ལ་བཅས་པ་རྫོགས་པར་སྲིད་ལ། བྱ་བ་དེ་འབྲེལ་གྱི་དགག་བྱ་གཏན་ནས་མེད་ཀྱང་བཅས་པ་རྫོགས་པར་སྲིད་དེ། དགེ་སློང་གིས་དགེ་སློང་ལ་རྩྭ་ཉག་མ་གཅིག་གིས་བརྡེག་ན་ལུས་སྲོག་ལ་གནོད་པའི་དགག་བྱ་མ་རྫོགས་ཀྱང་ལྟུང་བྱེད་རྫོགས་པར་བསྐྱེད་པ་དང༌། སྐྱོན་ནས་སྨྲ་བ་ལ་མི་དགའ་བའི་བསམ་པ་གཏན་ནས་མ་སྐྱེས་ཀྱང་ལྟུང་བྱེད་རྫོགས་པར་བསྐྱེད་པ་བཞིན་ནོ། །རྩོད་སྤོང་གི་རྣམ་གྲངས་གཞན་ཡང་དངོས་བཅས་མཛད་ནས་མདོར་བསྡུས་པ་མ་གསུངས་པའི་བར་སྐབས་དེར་བཅས་ལྡན་དགེ་སློང་གིས་ས་རྐོ་ན་ལྟུང་བྱེད་བསྐྱེད་པ་ལྟར་དགེ་སློང་གིས་དགག་བྱ་དང་ལྡན་པའི་བྱེ་མ་བརྐོས་ན་ལྟུང་བ་བསྐྱེད་པའི་བཅས་པ་ཡོད་མེད་ཅེས་འདྲི་ན་མེད་ཅེས་ལན་གདབ་ཏུ་རུང་ངོ༌། །རྩོད་པ་གཞན་ཡང་བར་སྐབས་དེར་ཕམ་པ་དང་པོ་མ་གཏོགས་པའི་ལྟུང་བ་བསྐྱེད་པ་ལ་བསླབ་པའི་ཡན་ལག་མི་དགོས་པར་ཐལ། བསླབ་པའི་ཡན་ལག་གསལ་ཀ་བཏོད་དེ་མ་གསུངས་ཤིང་ཡན་ལག་མདོར་བསྡུས་སྔར་བཅས་མ་ཡིན་པའི་ཕྱིར་ཞེ་ན་གསལ་ཀ་བཏོད་དེ་མ་གསུངས་པ་རྟགས་མ་གྲུབ་སྟེ། སོ་སོར་ཐར་པ་ལས་ཡང༌། དགེ་སློང་གང་ཞེས་དགེ་སློང་གི་ལྟུང་བ་སྡེ་ལྔ་ལ་སྤྱིར་གསུངས་པའི་ཕྱིར་རོ། །ཞུ་བ་ལས་ཀྱང་ལྟུང་བ་རྣམས་ཀྱི་སྐབས་སུ། བསླབ་པའི་ཡན་ལག་མ་ཚང་ན་རང་རང་གི་ལྟུང་བ་མི་རྫོགས་པར་དངོས་སུ་གསུངས་སོ། །མདོར་བསྡུས་གསུངས་རྗེས་སུ་ཡན་ལག་གཞན་ཚང་གི་དབང་དུ་བྱས་ན་ཡུལ་བུད་མེད་རྫུ་འཕྲུལ་གྱི་ཆོས་ཅན་དང་དབེན་པར་འདུག་ན་འདུག་པའི་ལྟུང་བྱེད་འབྱུང་བར་ཐལ།ཡན་ལག་ཚང་བའི་ཕྱིར་ཏེ། མཚོ་ཊཱིཀ་ལས། ངོ་ཏི་ནི། བཅས་ལྡན་དགེ་སློང་གིས་ཁྲིམས་གྲོགས་མེད་པར་བུད་མེད་དང་ལྷན་ཅིག་དབེན་པར་སྐྱབས་ཡོད་པ་ན་གཉིས་ཀ་འདུག་པ་ལས་ལྟུང་བ་དངོས་གཞིའོ། །ཞེས་གསུངས་པའི་ཕྱིར་ཟེར་ན། རྫུ་འཕྲུལ་གྱི་ཆོས་ཅན་མ་ཡིན་པ་མ་ཚང་བས་ཡན་ལག་མ་ཚང་ཟེར་ན་མདོར་བསྡུས་མ་གསུངས་པའི་སྔར་ཡང་རྫུ་འཕྲུལ་གྱི་ཆོས་ཅན་དང་དབེན་པར་འདུག་པ་ལས་འདུག་པའི་ལྟུང་བྱེད་བསྐྱེད་པ་མེད་པར་ཐལ། ཡན་ལག་མ་ཚང་པའི་ཕྱིར་ཏེ། རྫུ་འཕྲུལ་གྱི་ཆོས་ཅན་མ་ཡིན་པ་མ་ཚང་བའི་ཕྱིར། ཁྱབ་པ་ཁས་ཟེར་བ་དང༌། དངོས་བཅས་ཀྱི་སྐབས་སུ་རྫུ་འཕྲུལ་གྱི་ཆོས་ཅན་མ་ཡིན་པ་ཡན་ལག་ཏུ་མ་གསུངས་པའི་རྒྱུ་མཚན་ལ་དཔྱད་པར་བྱའོ། །

གཉིས་པ་གཞུང་གི་དངོས་ཀྱི་དོན་བསྟན་པ་ལ་སྡོམ་པ་མ་ཐོབ་པ་ཐོབ་པར་བྱེད་པའི་ཐབས་དང༌། ཐོབ་པ་མི་ཉམས་པར་བསྲུང་བའི་ཐབས་གཉིས་ལས། དང་པོ་ནི། ལུང་གཞི་ལས། རབ་བྱུང་གསོ་སྦྱོང་གཞི་དང་ནི། །དགག་དབྱེ་དབྱར་དང་ཀོ་ལྤགས་གཞི། །སྨན་དང་གོས་དང་སྲ་བརྐྱང་དང༌། །ཀོའུ་ཤམ་བྷི་དང་ལས་ཀྱི་གཞི། །དམར་སེར་ཅན་དང་གང་ཟག་དང༌། །སྤོ་དང་གསོ་སྦྱོང་བཞག་པ་དང༌། །གནས་མལ་དང་ནི་རྩོད་པ་དང༌། །དགེ་འདུན་དབྱེན་རྣམས་བསྡུས་པ་ཡིན། །ཞེས་པའི་རབ་བྱུང་གི་གཞི་དང་པོར་གསུངས་པ་དང༌། ཊཱི་ཀ་ལས་ཀྱང༌། བསླབ་པའི་གཞི་རྣམ་པར་བཞག་པ་མཐའ་དག་ནི་རབ་ཏུ་བྱུང་བ་རྣམས་ཁོ་ནའི་ཡིན་པར་གསུངས་ཀྱི་ཁྱིམ་པ་རྣམས་ཀྱི་མ་ཡིན་པའི་ཕྱིར་རོ། །ཞེས་སོ། །འདི་ལ་སྔོན་ཆོག་དང་ད་ཆོག་གཉིས་ལས།དང་པོ་ནི། རྩ་བར། དགེ་འདུན་ཐམས་ཅད་འདུས་པ་ན་ཆ་ལུགས་འདི་བཞིན་བྱས་རྒན་རིམ་ལ་ཕྱག་འཚལ་ཏེ། ཐལ་མོ་སྦྱར་ཙོག་ཙོག་པུར་འདུག་ཅིང་གསོལ་བ་བཏབ་པར་གྱུར་བ་གསུམ་དང༌། གསོལ་བ་དང་བཞིའི་ལས་ཀྱིས་ཅིག་ཆར་རབ་ཏུ་བྱུང་བ་དང་བསྙེན་པར་རྫོགས་པ་ཉེ་བར་བསྒྲུབས་པར་གྱུར་བ་ལྟ་བུ་ནི་སྔོན་གྱི་ཆོ་གའོ། །ཞེས་པས་བསྟན་ཏོ། །འདིའི་དོན་འཆད་པ་ལ། བསྙེན་པར་རྫོགས་པ་བཅུར་དབྱེ་བ་དང༌། སྔོན་གྱི་ཆོ་ག་བྱེ་བྲག་ཏུ་བསྟན་པ་དང་གཉིས།དང་པོ་ནི། འདུལ་བ་ཚིག་ལེའུར་བྱས་པ་ལས། འདྲེན་པ་རང་རྒྱལ་རང་བྱུང་གིའོ། །འཕགས་པ་ཀོའུ་དི་ནྱ་སོགས། །ལྔ་སྡེ་རྣམས་ནི་ངེས་པ་ལས། །གང་ཞིག་སློབ་མ་བཟང་སྡེ་རྣམས། །ཐམས་ཅད་སྐྱབས་སུ་འགྲོ་བས་ཐོབ། །ཕོ་ཉ་ཡིས་ནི་ཆོས་སྦྱིན་མ། །ཚུར་ཤོག་དགེ་སློང་ཞེས་བྱས་ཀྱང༌། །སྟོན་པར་ཁས་བླངས་པ་ལས་ནི། །དགེ་སློང་འོད་སྲུང་བདག་ཉིད་ཆེ། །དྲི་བ་མཉེས་པ་ཉིད་ཀྱིས་ནི། །སློབ་མ་ལེགས་སྦྱིན་དེ་བཞིན་ནོ། །དབུས་དང་མཐའ་འཁོབ་པ་དག་ལ། །བསྙེན་རྫོགས་ཡང་དག་བསྟན་པ་ནི། བཅུ་དང་ལྔ་ཡི་ཚོགས་ཀྱིས་སམ། །དེ་བས་ལྷག་པས་ཀྱང་ནི་རུང༌། །དེ་བཞིན་འཁོར་ཚོགས་བཅས་པ་ཡི། །གོའུ་ཏ་མ་ལྕི་ཆོས་ཀྱིས། །ཞེས་དང༌། མཛོད་འགྲེལ་ལས། སངས་རྒྱས་དང་རང་སངས་རྒྱས་རང་བྱུང་གིས་བསྙེན་པར་རྫོགས་པ་དང༌། ལྔ་སྡེ་བཟང་པོ་ཡེ་ཤེས་ཁོང་དུ་ཆུད་པས་དང༌། གྲགས་པའམ་མཆོག་ཟུང་གཅིག་ལྟ་བུ་ཚུར་ཤོག་གིས་དང༌། སྡེ་བཟང་དྲུག་ཅུའི་ཚོགས་སྐྱབས་འགྲོ་ལན་གསུམ་བཟླས་པས་དང༌། འོད་སྲུངས་ཆེན་པོ་སྟོན་པར་ཁས་བླངས་པས་དང༌། བྲམ་ཟེ་སོད་ཡ་ལེགས་སྦྱིན་དྲི་བས་མཉེས་པས་དང༌། སྐྱེ་དགུའི་བདག་མོ་ཆེན་མོ་ལ་སོགས་པ་ཤཱཀྱའི་བུད་མེད་ལྔ་བརྒྱ་ལྕི་བའི་ཆོས་བརྒྱད་སྤོང་བར་ཁས་བླངས་པས་དང༌། བུ་མོ་ཆོས་སྦྱིན་མ་འཕྲིན་གྱིས་དང༌། ཡུལ་དབུས་ཀྱི་མི་རྣམས་བཅུའི་ཚོགས་ཀྱིས་དང༌། མཐའ་འཁོབ་ཀྱི་མི་རྣམས་ལྔའི་ཚོགས་ཀྱིས་བསྙེན་པར་རྫོགས་པ་དང་བཅུའོ། །བཅུར་འབྱེད་ལུགས་དེ་ཁོ་ན་ལྟར་མེ་ཏོག་ཕྲེང་རྒྱུད་དང་འདུལ་བ་བསྡུས་པ་ལས་ཀྱང་བཤད་དོ། །བཅུར་འབྱེད་ལུགས་གཞན་ཡང་ལུང་གཅིག་ལས་འཕྲོས་པ་ལས་ནི་བསྙེན་པར་རྫོགས་པ་བཅུ་སྟེ་ཞེས་གསུངས་ནས་སྐྱབས་འགྲོ་ཁས་བླངས་མ་བགྲངས་པར་གསོལ་བཞིའི་སྔོན་ཆོག་བགྲངས་ཏེ་སྤྱིར་ན་བསྙེན་པར་རྫོགས་པའི་ཚུལ་བཅུ་བས་མང་བ་ཡོད་ཀྱང༌། གདུལ་བྱ་བཅུ་ཚན་ལ་དགའ་བའི་ངོར་བཅུ་ཚན་དུ་མཛད་པ་ཡིན་པར་གསུངས་སོ། །འདུལ་བ་བདུད་རྩི་ཉིང་ཁུ་ལས། སྔོན་གྱི་ཆོ་ག་དང༌། ད་ལྟར་གྱི་ཆོ་ག་ཞེས་པ་སྡོམ་པ་བསྒྲུབ་ལུགས་གཉིས་ལས། །དང་པོ་ནི། འདུལ་བ་ཚིག་ལེའུར་བྱས་པ་ལས། འདྲེན་པ་རང་རྒྱལ། ཞེས་པ་ནས། གོའུ་ཏ་མ་ལྕི་ཆོས་ཀྱིས། ཞེས་པ་ལྟར་རོ། །དེ་ལ་སྟོན་པ་སངས་རྒྱས་ནས་ལོ་དྲུག་གི་བར་དུ་སྔོན་ཆོག་ཉིད་མཛད་ལ། དྲུག་ནས་ད་ལྟར་གྱི་ཆོ་ག་གནང་ངོ༌། །ཚུར་ཤོག་ནི་མྱ་ངན་ལས་འདའ་ཁར་ཡང་མཛད་ཅིང༌། ཕྲིན་ནི་ད་ལྟར་གྱི་ཆོ་ག་ལ་ཡང་རུང༌། ཞེས་བསྙེན་རྫོགས་བཅུ་ལ་སྔོན་ཆོག་ཡོད་པར་གསུངས་སོ། །