བཞི་པ་ཐེག་པ་གཅིག་ཏུ་སྒྲུབ་པ།
བཞི་པ་ཐེག་པ་གཅིག་ཏུ་སྒྲུབ་པ་ནི།
རྩ་བར། གང་ཕྱིར་འདི་ནི་དེ་ཉིད་ཤེས་ལས་དྲི་མ་མཐའ་དག་སེལ་བ་ནི། །
ལྷུར་བྱེད་གཞན་མེད་ཆོས་རྣམས་དེ་ཉིད་རྣམ་འགྱུར་དབྱེ་བའང་བསྟེན་མིན་ཞིང༌། །
དེ་ཉིད་ཡུལ་ཅན་བློ་གྲོས་འདི་ཡང་ཐ་དད་འགྱུར་བ་མ་ཡིན་པ། །
དེ་ཡི་ཕྱིར་ན་ཁྱོད་ཀྱིས་འགྲོ་ལ་ཐེག་པ་མི་མཉམ་དབྱེར་མེད་བསྟན། །
ཞེས་རྒྱུ་མཚན་ག༷ང་གི་ཕྱི༷ར་ན་ཐེག་པ་གསུམ་གྱི་གང་ཟག་གིས་སྒྲིབ་པ་སྤོང་བར་བྱེད་པའི་སྐབས་འདི༷་ནི༷་ཆོས་རྣམས་ཀྱི་དེ༷་ཁོ་ན་ཉི༷ད་ཤེ༷ས་པ་སྟེ་རྟོགས་པའི་ཡེ་ཤེས་དེ་ལ༷ས། གཞན་པའི་སྒྲིབ་གཉིས་ཀྱི་དྲི༷་མ༷་མཐ༷འ་ད༷ག་སེ༷ལ་བ༷ར་བྱེད་པ་ལ་ནི༷། ལྷུ༷ར་བྱེ༷ད་པ་སྟེ་གཙོར་བོར་གྱུར་པའི་ལམ་གཞ༷ན་མེ༷ད་པར་བསྟན་ལ། ཐེག་པ་གསུམ་གས་རང་རང་གི་སྤང་བྱ་སྤོང་བའི་ཐབས་སུ་ངེས་པར་སྒོམ་དགོས་པའི་ཆོ༷ས་རྣ༷མས་ཀྱི་དེ༷་ཁོ་ན་ཉི༷ད་ཀྱང་མི་འདྲ་བའི་རྣ༷མ་འགྱུ༷ར་གྱི་དབྱེ༷་བ༷་བསྟེ༷ན་པ་སྟེ་མི་འདྲ་བའི་ཁྱད་པར་གྱི་ངོ་བོ་ཅུང་ཟད་ཀྱང་ཡོད་པ་མི༷ན་ཞི༷ང་ཐེག་པ་གསུམ་གས་བསྒོམ་བྱའི་ཆོས་རྣམས་ཀྱི་དེ༷་ཁོ་ན་ཉི༷ད་ནི་ཆོས་རྣམས་བདེན་གྲུབ་བཀག་པ་ཙམ་དེ་ཉིད་ཁོ་ན་ཡིན་པས་ན། ཉན་རང་བྱང་སེམས་གསུམ་གའི་རྒྱུད་ཀྱི་དེ་ཁོ་ན་ཉིད་ཀྱི་ཡུ༷ལ་ཅ༷ན་གྱི་བློ༷་གྲོ༷ས་སམ་ཡུལ་ཅན་གྱི་ཡེ་ཤེས་གསུམ་པོ་འདི༷་ཡ༷ང་འཛིན་སྟངས་མི་འདྲ་བའི་ཐ༷་ད༷ད་པར་འགྱུ༷ར་བ༷་ཡང་མ༷་ཡི༷ན་པ༷་དེ༷་ཡི༷་ཕྱི༷ར་ན༷་ཁྱོ༷ད་ཀྱི༷ས་གདུལ་བྱའི་འགྲོ༷་བ་ཉན་རང་སོགས་ཐམས་ཅད་ལ༷་ཐེ༷ག་པ༷་གཞན་དང་མི༷་མཉ༷མ་པའི་དབྱེ༷ར་མེ༷ད་པ་སྟེ་རྟོགས་པའི་རིགས་གཅིག་པའི་ཐེག་པ་གཅིག་བསྟ༷ན་པ་ཡིན་ནོ། །ཐོག་མ་ནས་གདུལ་བྱ་ཐམས་ཅད་ཐེག་པ་ཆེན་པོ་ལ་འཇུག་པར་མི་མཛད་པར་ཐེག་པ་གསུམ་བསྟན་པའི་རྒྱུ་མཚན་ཅི་ཞེ་ན། བསྟན་པ་འདི་དགོངས་པ་ཅན་ཉིད་དུ་བཤད་པ། རྩ་བར། གང་ཕྱིར་འགྲོ་ལ་ཉེས་པ་སྐྱེད་བྱེད་སྙིགས་མ་འདི་དག་ཡོད་གྱུར་པ། །དེ་ཕྱིར་འཇིག་རྟེན་སངས་རྒྱས་སྤྱོད་ཡུལ་གཏིང་ཟབ་ལ་འཇུག་མི་འགྱུར་ཞིང༌། །བདེ་གཤེགས་གང་ཕྱིར་ཁྱོད་ལ་མཁྱེན་རབ་ཐུགས་རྗེའི་ཐབས་དང་ལྷན་ཅིག་པ། །མངའ་དང་གང་ཕྱིར་བདག་གིས་སེམས་ཅན་དགྲོལ་ཞེས་ཁྱོད་ཀྱིས་ཞལ་བཞེས་ཏེ། །ཞེས་ག༷ང་གི་ཕྱི༷ར་འགྲོ༷་བ་རྣམས་ལ༷་ཉེ༷ས་པ༷་སྟེ་ཉོན་མོངས་པ་ཤས་ཆེན་པོ་སྐྱེ༷ད་བྱེ༷ད་ཀྱི་རྒྱུར་གྱུར་པའི་སྙི༷གས་མ༷་ལྔ་པོ་འདི༷་ད༷ག་ཡོ༷ད་པར་གྱུ༷ར་པ༷་ཡི་སྙིགས་མ་ལྔ་པོ་དེ་དག་གིས་ནི་སངས་རྒྱས་ལ་དོན་གཉེར་གྱི་བསམ་པ་རྒྱུད་ལ་མི་སྐྱེ་བར་བྱེད་པ་དེ༷་ཡི་ཕྱི༷ར་ན། འཇི༷ག་རྟེ༷ན་དེ་གདུལ་བྱ་ཁ་ཅིག་ས༷ངས་རྒྱ༷ས་ཀྱིས་སྤྱོ༷ད་ཡུ༷ལ་ཏེ་སངས་རྒྱས་ཀྱི་ཡོན་ཏན་གཏི༷ང་ཟ༷བ་པ་ལ༷་དོན་གཉེར་བསྐྱེད་དེ་ཐེག་ཆེན་གྱི་ལམ་ལ་བརྟེན་ནས་འཇུ༷ག་པར་མི༷་འགྱུ༷ར་བས་ན། དེ་དག་ལ་རེ་ཞིག་ཐེག་ཆེན་མ་བསྟན་པ་ཡིན་ཞི༷ང༌། བདེ༷་བར་གཤེ༷གས་པ་ག༷ང་ཕྱི༷ར་ཁྱོ༷ད་ལ༷་གདུལ་བྱ་འདུལ་བའི་ཐབས་མཁྱེན་པའི་མཁྱེ༷ན་ར༷བ་དང༌། གདུལ་བྱའི་དོན་སྒྲུབ་པ་ལ་བསྙེལ་བ་མི་མངའ་བའི་ཐུ༷གས་རྗེ༷འི་ཐ༷བས་ད༷ང༌། གཉིས་ཀ་ལྷ༷ན་ཅི༷ག་པ༷་མང༷འ་བ་ད༷ང༌། ག༷ང་གི་ཕྱི༷ར་སྔོན་བྱང་སེམས་ཀྱི་དུས་སུ་བད༷ག་གི༷ས་སེ༷མས་ཅ༷ན་ཐམས་ཅད་དགྲོ༷ལ་བར་བྱའོ་ཞེ༷ས་ཁྱོ༷ད་ཀྱི༷ས་ཞ༷ལ་གྱིས་བཞེ༷ས་པ་དེ་ཉིད་བསྒྲུབ་དགོས་པ་དེ༷་ཡིན་ནོ། །རྩ་བར། དེ་ཕྱིར་མཁས་པས་རིན་པོ་ཆེ་ཡི་གླིང་དུ་ཆས་པའི་སྐྱེ་ཚོགས་ཀྱི། །ངལ་བ་ཉེར་སེལ་གྲོང་ཁྱེར་ཡིད་འོང་བར་དུ་རྣམ་པར་བཀོད་པ་ལྟར། །
ཁྱོད་ཀྱིས་ཐེག་པ་འདི་ནི་སློབ་མ་ཉེ་བར་ཞི་བའི་ཚུལ་ལ་ཡིད། །སྦྱར་བར་མཛད་ཅིང་རྣམ་པར་དབེན་ལ་བློ་སྦྱངས་རྣམས་ལ་ལོགས་སུ་གསུངས། །ཞེས་རྒྱུ་མཚན་དེ༷་ཡི་ཕྱི༷ར་འགྲོ་བ་རྣམས་ཐེག་པ་ཆེན་པོ་ལ་འཇུག་པ་ལ་གེགས་བྱེད་པའི་རྐྱེན་མང་པོ་འདི་དག་ཡོད་ཅིང་འཇིག་རྟེན་རྣམས་ཀྱང་གདོན་མི་ཟ་བར་མྱ་ངན་ལས་འདས་པ་ལ་འགོད་པར་བྱ་དགོས་པ་ནི། དཔེར་ན་དེད་དཔོན་ཐབས་ལ་མཁ༷ས་པ༷ས་རྒྱ་མཚོའི་ནང་ནས་རི༷ན་པོ༷་ཆེ༷་ཡི་གླི༷ང་དུ༷་ཆ༷ས་པ༷འི་སྟེ་འགྲོ་བའི་ཚེ། འགྲོ་མཁན་གྱི་སྐྱེ༷་བོའི་ཚོ༷གས་རྣམས་ཀྱི༷་ཡུན་རིང་པོར་བགྲོད་པའི་ང༷ལ་བ༷་ཉེ༷ར་སེ༷ལ་བའི་ཕྱིར་དུ་རིན་པོ་ཆེའི་གླིང་དུ་གྲོ༷ང་ཁྱེ༷ར་ཡི༷ད་དུ་འོ༷ང་བ་རྒྱ་མཚོའི་རིན་པོ་ཆེའི་གླིང་དུ་མ་སླེབས་པའི་བ༷ར་དུ༷་རྣ༷མ་པ༷ར་བཀོ༷ད་པ་སྟེ་རྣམ་པར་སྤྲུལ་པ་ལྟ༷ར་དུ། བཅོམ་ལྡན་འདས་ཁྱོ༷ད་ཀྱི༷ས་ཐེ༷ག་པ༷་ཆེན་པོ་ཐོབ་བྱེད་ཀྱི་ཐབས་སུ་གྱུར་པའི་ཉན་རང་གི་ཐེག་པ་འདི༷་ནི༷། སློ༷བ་མ༷་ཉན་ཐོས་དང༌། དེས་མཚོན་པའི་རང་རྒྱལ་གྱི་རིགས་ཅན་རྣམས་ནི། སྡུག་བསྔལ་ཉེ༷་བ༷ར་ཞི༷་བ༷འི་ཚུ༷ལ་ལམ་ཐར་བའི་བདེ་བ་ལ༷་ཡི༷ད་སྦྱོ༷ར་བར་མཛད་པ་ཡིན་པར་གྱུར་ཅི༷ང༌། དེས་ན་ཉན་རང་གི་རིགས་ཅན་རྣམས་ཀྱིས་རང་རང་གི་ལམ་སྒོམ་པའི་སྟོབས་ཀྱིས་སེམས་རྒྱུད་འཁོར་བའི་ཉོན་མོངས་པ་རྣ༷མ་པ༷ར་དབེ༷ན་པ་ལའང་ཉོན་མོངས་པ་ལས་བློ༷་སྦྱ༷ངས་ཟིན་པ་རྣ༷མས་ལ༷། ལོ༷གས་སུ༷་སྟེ་ཕྱིས་ནསཐེག་པ་ཆེན་པོ་གསུ༷ངས་པ་ཡིན་པའོ། །