ལྔ་བ་འཁྲུལ་ཤེས་དང་མ་འཁྲུལ་བའི་ཤེས་པ་གཉིས་སུ་དབྱེ་བའི་མཐའ་དཔྱད་པ།
ལྔ་བ་འཁྲུལ་ཤེས་དང་མ་འཁྲུལ་བའི་ཤེས་པ་གཉིས་སུ་དབྱེ་བའི་མཐའ་དཔྱད་པ་ལ།
རང་གི་སྣང་ཡུལ་ལ་འཁྲུལ་བའི་རིག་པ་ཡིན་ན། འཁྲུལ་ཤེས་ཡིན་པས་ཁྱབ་པར་ཐལ། སྤྱི་དོན་༤༨༡ལས། རང་གི་སྣང་ཡུལ་ལ་འཁྲུལ་བའི་རིག་པ། འཁྲུལ་ཤེས་ཀྱི་མཚན་ཉིད། ཅེས་གསུངས་པའི་ཕྱིར། འདོད་ན། རྒྱང་རིང་བོའི་གཟུགས་སོགས་རང་གི་ཚད་ལས་ཆུང་བར་སྣང་བའི་མིག་ཤེས་ཀུན་ཆོས་ཅན། འཁྲུལ་ཤེས་ཡིན་པར་ཐལ། རང་གི་སྣང་ཡུལ་ལ་འཁྲུལ་བའི་ཕྱིར། རྟགས་དེར་ཐལ། དེའི་ཚད་ལ་འཁྲུལ་བའི་ཕྱིར། ཁྱབ་སྟེ། རང་གི་སྣང་ཡུལ་ལ་འཁྲུལ་བ་ལ། སྣང་ཡུལ་གྱི་ཆ་ཐམས་ཅད་ལ་འཁྲུལ་མི་དགོས་པའི་ཕྱིར། དེར་ཐལ། སྤྱི་དོན་༤༨༢ ལས། འཁྲུལ་ཤེས་ཡིན་ན་རང་གི་སྣང་ཡུལ་གྱི་ཆ་ཐམས་ཅད་ལ་འཁྲུལ་མི་དགོས་པའི་ཕྱིར། ཞེས་གསུངས་པའི་ཕྱིར། དེ་དག་གི་སྐོར་གོང་མངོན་སུམ་གྱི་སྐབས་སུ་དཔྱད་ཟིན་པ་ལྟར་རོ། །ཡང་རང་ལུགས་ལ་བདེན་སྣང་ཅན་གྱི་བློ་ཡིན་ན་འཁྲུལ་ཤེས་ཡིན་དགོས་པར་ཐལ། སྤྱོད་པ་ལ་འཇུག་པའི་རྣམ་པར་བཤད་པ་གཞུང་དོན་རབ་གསལ་ལས། དེ་ལྟར་རྣམ་པར་དཔྱད་ན་བདེན་པར་གྲུབ་པ་མེད་ཀྱང་འཁྲུལ་ཤེས་ལ་སྣ་ཚོགས་སུ་སྣང་བ་རྨི་ལམ་ལྟ་བུའི་གཟུགས་སམ་ལུས་འདི་ལ་རྟོག་དཔྱོད་དང་ལྡན་པའི་མཁས་པ་སུ་ཞིག་ཆགས་པར་བྱེད་དེ་ཆགས་ཤིང་ཞེན་པར་ནི་རིགས་པ་མ་ཡིན་ནོ། །ཞེས་དང༌། མདོ་སྡེའི་རྒྱན་གྱི་རྣམ་པར་བཤད་པ་ཐེག་ཆེན་རབ་གསལ་སྣང་བ་ལས། ཡང་དག་པ་མ་ཡིན་པའི་ཀུན་ཏུ་རྟོག་པ་གཞན་དབང་རྣམ་པར་ཤེས་པ་དེ་ལ་དཔྱད་ན་རྣམ་པ་ཀུན་ཏུ་གཟུང་བ་དང་འཛིན་པ་གཉིས་པོ་དུས་རྟག་ཏུ་མེད་ཀྱང་འཁྲུལ་ཤེས་ལ་གཟུང་འཛིན་གཉིས་སུ་སྣང་བར་འགྱུར་བ་མི་འགལ་བས་དོན་དམ་པར་ཆོས་ཐམས་ཅད་ངོ་བོ་ཉིད་མེད་པར་གསུངས་པ་དང། ཞེས་གསུངས་པའི་ཕྱིར། འདོད་ན། དབང་ཤེས་རྟོག་མེད་ཚད་མ་རྣམས་དང༌། བདེན་སྣང་ཅན་གྱི་ཉན་རང་འཕགས་པའི་ལམ་རྟོག་མེད་དག་ཆོས་ཅན། འཁྲུལ་བར་ཐལ། བདེན་སྣང་དང་བཅས་པའི་ཕྱིར། འདོད་མི་ནུས་ཏེ། མངོན་སུམ་ཡིན་པའི་ཕྱིར། ཁྱབ་སྟེ། ཐུབ་པའི་དགོངས་རྒྱན་ལས། ཐ་སྙད་དུ་རྨི་ལམ་ལ་སོགས་པ་བཞིན་ཇི་ལྟར་གྲགས་པའི་དོན་ལ་མི་སླུ་བ་ཙམ་ལ་དེ་མ་འཁྲུལ་པར་བརྗོད་པ་འབའ་ཞིག་གོ། །ཞེས་དང༌། ཡང་ཐུབ་པའི་དགོངས་རྒྱན་ལས། ཉན་ཐོས་ལ་སོགས་པའི་རྣལ་འབྱོར་པའི་མངོན་སུམ་དེ་ནི་གང་ཟག་ལ་བདག་མེད་པ་ཉིད་ཙམ་མངོན་དུ་བྱེད་པར་ཞུགས་པ་ཉིད་ཀྱི་ཕྱིར། དེ་ལ་མི་སླུ་བ་ཉིད་ཀྱིས་མངོན་སུམ་ཚད་མ་སྟེ། ཞེས་དང༌། རྣམ་འགྲེལ་ལས། མངོན་སུམ་རྟོག་བྲལ་མ་འཁྲུལ་བ། །ཞེས་དང༌། ཀ་མ་ལ་ཤཱི་ལའི་དེ་ཁོ་ན་ཉིད་བསྡུས་པའི་དཀའ་འགྲེལ་ལས། དེའི་ཕྱིར་མངོན་སུམ་ནི་ཡོད་པའི་རང་གི་མཚན་ཉིད་ནི་ཡུལ་ཅན་ཉིད་ཡིན་པའི་ཕྱིར་གདོན་མི་ཟ་བར་རྟོག་པ་དང་བྲལ་བ་དང༌། ཚད་མ་ཡིན་པའི་ཕྱིར་མ་འཁྲུལ་པར་འགྱུར་བར་བྱ་དགོས་སོ། །ཞེས་གསུངས་པའི་ཕྱིར་རོ། །ཡང་རང་ལུགས་ལ་ཀུན་རྫོབ་ཀྱི་སྣང་བ་ཡོད་པའི་བློ་མཐའ་དག་འཁྲུལ་ཤེས་ཡིན་པརཐལ། སྤྱོད་པ་ལ་འཇུག་པའི་རྣམ་པར་བཤད་པ་གཞུང་དོན་རབ་གསལ་ལས། ཀུན་རྫོབ་ནི། མ་བརྟགས་ན་ཉམས་དགའ་ཞིང་སྐྱེ་འཇིག་དང་བཅས་པའི་ཆོས་ཅན་འཁྲུལ་ཤེས་མ་འགགས་ཀྱི་བར་དུ་དོན་བྱེད་ནུས་པར་སྣང་བ་སྟེ། ཞེས་དང༌། བླང་དོར་རབ་གསལ་ལས། ཀུན་རྫོབ་འཁྲུལ་ཤེས་ཇི་སྲིད་གནས་ཀྱིས་བར། །རྒྱུ་འབྲས་བསླུ་བ་མེད་པར་བདེན་པ་སྟེ། །ཞེས་དང༌། རྒྱུད་བླ་མའི་བསྟན་བཅོས་ཀྱི་རྣམ་པར་བཤད་པ་ངེས་དོན་རབ་གསལ་ལས། ཀུན་རྫོབ་འཁྲུལ་ཤེས་ལ་སྣང་ཙམ་དུ་ཡོད་པ་དང། དོན་དམ་ཡེ་ཤེས་ཀྱི་སྤྱོད་ཡུལ་དུ་ཡོད་པ་འགོག་པ་ནི་མ་ཡིན་ཏེ། ཞེས་གསུངས་པའི་ཕྱིར། འདོད་ན། ཐེག་ཆེན་འཕགས་པའི་རྗེས་སུ་ཡི་རངས་དང་བསྔོ་བ་སྒོམ་ལམ་དག་དང༌། ཀུན་རྫོབ་གསར་བྱུང་གི་རྣམ་མཁྱེན་ཉམས་མྱོང་གི་རང་རིག་སོགས་ཀྱིས་དཔྱད་དོ། །