བཀོད་པ་རྣམ་པར་འགྲེལ་པའི་ལེའུ་སྟེ་བཞི་བཅུ་ལྔ་པ།
བམ་པོ་བདུན་པར་ཟུག་པ། དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་སྔོན་བྱུང་བའི་ཚིག་བཅུ་གཉིས་པའི་ཐ་མ་དགོངས་པ་རྣམ་པར་བགྲོ་བ་ན་ཡང་བྱུང་ཞེས་སྣང་བའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ་དགོངས་པ་རྣམ་པར་བགྲོ་བ་ན་ཡང་བྱུང་ཞེས་བཀོད་པ་དེ་ལྟ་ཞིག་ཏུ་བགྲོས་ཏེ་གྲགས་པ་ལགས། སྨྲས་པ། ལང་ཀའི་བདག་པོ་གང་ཡོངས་སུ་དྲི་བ་དེ་ནི་འདི་ལྟར་ཟབ་པ། ཆེས་ཟབ་པ། འདི་ལྟར་དཀའ་བ། ཆེས་དཀའ་བ། རྟོག་གེའི་སྤྱོད་ཡུལ་མ་ཡིན་པ། བརྟག་པར་རབ་ཏུ་དཀའ་བ། དཔག་པ་ལས་འདས་པ་སྟེ། གང་རྒྱུད་ཡོངས་སུ་དག་པའི་སངས་རྒྱས་དང་། གང་ས་ལ་གནས་པ་རྣམས་ཀྱིས་ཀྱང་རབ་ཏུ་བགྲོ་བར་མི་ནུས་པ་ཡིན་ན་བདག་གིས་ཡོངས་སུ་བགྲོ་བར་ལྟ་ཅི་སྨོས་ཏེ། གང་གི་སྤྱོད་ཡུལ་ཡང་མ་ཡིན་ནོ། །དེ་སྐད་ཅེས་སྨྲས་པས། ལང་ཀའི་བདག་པོ་དེས་འདི་སྐད་ཅེས་སྨྲས་སོ། །ཀྱེ་སྐྱེས་བུ་ཆེན་པོ་གསང་བའི་བདག་པོ་ཉོན་མོངས་པར་སྣང་བའི་འགྲོ་བ་རྣམས་ལ་ཕན་པ་དང་སྙིང་བརྩེ་བ་ཉིད་དུ་བགྱི་བའི་སླད་དུ་མི་ཆེན་པོ་རྣམས་ཀྱི་སྤྱོད་ཡུལ། ཆོས་ཐམས་ཅད་མངོན་པར་རྫོགས་པར་སངས་རྒྱས་པ། གང་དུ་མ་བཀག་པའི་ཆོས་ཉིད་དུ་ལོངས་སྤྱོད་པ། ཐབས་ཀྱི་ཐེག་པ་ཆེན་པོ་དགོངས་པ་དམ་པ་དེ་ཁོ་ན་ཉིད་དེ་རྣམ་པར་བགྲོ་ཞིང་སྨྲ་བའི་སེང་གེ་ཁྱོད་ཀྱིས་ཕྱིན་ཅི་མ་ལོག་པར་བགྲོ་བའི་དུས་ལ་བབ་བོ། །སྐྱེས་བུ་ཆེན་པོ་ཤིན་ཏུ་རབ་ཏུ་དུས་ལ་བབ་བོ། །ངེས་པ་དམ་པར་བགྲོ་བའི་དུས་ལ་བབ་བོ། །དེ་ཅིའི་སླད་དུ་ཞེ་ན། སྐྱེས་བུ་ཆེན་པོ་ཁྱོད་ནི་དེ་བཞིན་གཤེགས་པ་ཐམས་ཅད་ཀྱི་བཀའ་གསང་བ་ཆེན་པོའི་བདག་པོར་དབང་གིས་དབང་བསྐུར་བ་ལགས་ཏེ། གང་རྨོངས་པ་རྣམས་གོ་འབྱེད་པ་དང་། གང་འཐོམས་པ་དྲང་བའི་ཐབས་སྤྲིན་ཕུང་གི་དྲ་བས་ཐམས་ཅད་བདེ་བླག་ཏུ་དྲང་བའི་སླད་དུ་དགོངས་པ་དམ་པའི་ལུས་དགྲོལ་དུ་གསོལ་ཞེས་བསྐུལ་བ་ལས། གསང་བ་པའི་བདག་པོ་དེས་འདི་སྐད་ཅེས་སྨྲས་སོ། །བསྐུལ་བའི་གོ་ཆ་ཆེན་པོ་ཁྱོད། །ཀུན་ལ་རབ་ཏུ་བརྩེ་བའི་ཕྱིར། །གང་ལ་བསྐུལ་བར་ཁྱོད་བརྩོན་ན། །བགྲོ་བ་གླེང་བསླང་ལེགས་སོ་ལེགས། །འདི་ལྟར་འདི་སྐད་བདག་ཉིད་ཀྱིས། །ངེས་པའི་དོན་དེ་ཁོ་ན་ཉིད། །ཐོས་པ་སྣང་བའི་དུས་གཅིག་ན། །ཐམས་ཅད་ནམ་མཁའ་ལྟ་བུ་ལས། །རབ་བྱུང་རང་སྣང་ཉིད་དུ་ཐོས། །གསང་བའི་ཚིག་ནི་འདི་སྐད་དུ། །ཐོས་པར་གྱུར་པའི་དུས་གཅིག་ན། །མཐུ་འཇུག་ཐབས་ཀྱི་ཆ་མཐུན་དང་། །བསྟན་ནས་དྲང་བའི་ཐབས་སུ་ཐོས། །ལུང་གི་གཏན་ཚིགས་འདི་སྐད་དུ། །བདག་གིས་ཐོས་པའི་དུས་གཅིག་ན། །ལྡེམ་དགོངས་སྦྱོར་བའི་ཚུལ་ཉིད་ཀྱིས། །བསྟན་ནས་བཀྲི་བའི་ཐབས་སུ་ཐོས། །འདོད་རྐྱེན་ཚིག་ནི་འདི་སྐད་དུ། །རྟོགས་པར་གྱུར་པའི་དུས་གཅིག་ན། །འདོད་ཆེན་པ་ལ་འདོད་པ་ནི། །ཐབས་ཀྱིས་དྲང་བ་ཉིད་དུ་ཐོས། །གསང་སྔགས་རྡོ་རྗེ་ནམ་མཁའ་ཆེ། །ཚིག་གི་སྤྱོད་ཡུལ་མ་ཡིན་པས། །བརྗོད་པས་རྟོགས་པར་མི་ནུས་ཏེ། །བདག་གིས་བགྲོ་བར་རབ་ཏུ་དཀའ། །དཔེའམ་ཚད་མའམ་གཏན་ཚིགས་སམ། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ཏེ། །དམུས་ལོང་མཁའ་ལ་མཐོས་འཇལ་འདྲ། །འོན་ཀྱང་བཀའ་ཡི་གཉེར་གཏད་ཅིང་། །ལོག་ཞེན་ཐབས་ཀྱིས་དྲང་བ་དང་། །བསྐུལ་བ་ཁྱོད་ཀྱི་དམ་ཚིག་ཀྱང་། །སྔོན་གྱི་གོ་ཆ་གྱོན་པའི་མཐུས། །མ་རྟོགས་པ་རྣམས་ཚིག་ཙམ་གྱིས། །མཚོན་ནས་རྣམ་གྲོལ་ས་དག་ལ། བརྒྱུད་དེ་དྲང་བའི་ཐབས་ཉིད་དུ། །ཅི་རིགས་ཙམ་དུ་བགྲོ་བར་བྱ། །རང་བཞིན་ཡེ་ནས་སངས་རྒྱས་པ། །མཐོང་དང་མ་མཐོང་རྣམ་གཉིས་ལ། །དམན་པའི་སྐབས་ན་དེ་མཐོང་མིན། །མཐོང་བ་དམ་པའི་སྐབས་ནའོ། །མཐོང་བ་མངོན་ཐོས་རྣམ་གཉིས་ལ། །མཐར་ཕྱིན་དམ་པ་མངོན་སུམ་པ། །བློ་གྲོས་རྣལ་འབྱོར་སྤྱོད་ཡོན་ཅན། །ཐོས་པས་མཐོང་བར་འགྱུར་ཕྱིར་རོ། །སྟུག་པོ་བཀོད་པའི་རྒྱལ་བ་ཡང་། །ཆོས་སྐུ་སྙིང་པོར་གྱུར་པས་ན། །དེ་ཡི་འགྲོ་བ་མི་སྨིན་ཕྱིར། །གཟུགས་སྐུ་བསྟན་ནས་ཚིག་ལམ་བརྗོད། །འདས་དང་མ་འོངས་ད་ལྟར་གྱི། །དཔག་ཏུ་མེད་པའི་དུས་རྣམས་སུ། །རྒྱལ་བ་རྣམས་ཀྱི་དགོངས་པ་གང་། །ཇི་ལྟར་རྣམ་པར་བགྲོས་པ་ཉོན། །ལང་ཀའི་བདག་པོ་འདི་ལྟ་སྟེ། །དམ་པ་རྣམས་ཀྱི་དགོངས་པ་ལ་འཇུག་པར་འདོད་ན་མཛོད་དུ་འཇུག་པར་བྱའོ། །རང་བཞིན་མ་བཅོས་པར་བྱའོ། །ལྗོན་ཤིང་བསྐྱེད་པར་བྱའོ། །དམ་པར་འཇུག་པར་བྱའོ། །སྒྲོན་མ་བསྲེལ་བར་བྱའོ། །ཁྱད་པར་དུ་འགྲོ་བར་བྱའོ། །ཡུལ་ལ་འཇུག་པར་བྱའོ། །མེ་ལོང་བརྟག་པར་བྱའོ། །མཐུན་པར་འཇུག་པར་བྱའོ། །ནད་གསོ་བར་བྱའོ། །སྨྲས་པ། གསང་བ་པའི་བདག་པོ་ཆོས་ཀྱི་རྣམ་གྲངས་བཅུ་པོ་དེ་དག་ཇི་ལྟར་ཡོངས་སུ་ཤེས་པར་བགྱི། སྨྲས་པ། ལང་ཀའི་བདག་པོ་ཆོས་ཀྱི་རྣམ་གྲངས་བཅུ་པོ་དེ་དག་ལས་དང་པོ་དམ་པ་རྣམས་ཀྱི་མཛོད་དུ་འཇུག་པར་བྱ་ན་སྒོ་གསུམ་ནས་ཞུགས་པས་གང་མེད་ལ་མི་ཟད་པའི་མཛོད་དུ་འཇུག་པ་ཉིད་དོ། །སྨྲས་པ། གསང་བ་པའི་བདག་པོ་སྒོ་གསུམ་གང་ལགས། སྨྲས་པ། ལང་ཀའི་བདག་པོ་སྒོ་གསུམ་འདི་ལྟ་སྟེ། སྤྱོད་པས་འདྲེན་པའི་སྒོ་དང་། ཐབས་ཀྱི་སྦྱོར་སྒོ་དང་། ངེས་པའི་གསང་སྒོ་དང་གསུམ་མོ། །སྨྲས་པ། གསང་བ་པའི་བདག་པོ་སྒོ་དེ་དག་གང་གིས་འབྱེད་པ་ལགས། སྨྲས་པ། ལང་ཀའི་བདག་པོ་སྒོ་དེ་དག་ནི་ལྡེ་མིག་གསུམ་གྱིས་འབྱེད་པར་རིག་པར་བྱ་སྟེ། གསུམ་གང་ཞེ་ན། འདི་ལྟ་སྟེ། འབྱེད་པ་དང་། འགྲོལ་བ་དང་། འབྱིན་པའོ། །ལང་ཀའི་བདག་པོ་དེ་ཡང་འདི་ལྟ་སྟེ། ཡན་ལག་དྲུག་དང་། མདོ་བཞི་དང་། རྩ་བ་གསུམ་གྱི་ལྡེ་མིག་གིས། །རྒྱལ་བ་ཀུན་གྱི་དགོངས་པའི་མཛོད། །ངེས་པར་འབྱེད་ཅེས་རྒྱལ་བས་བཤད། །ལང་ཀའི་བདག་པོ་དེ་ལ་སྤྱོད་པའི་འདྲེན་སྒོ་ལྡེ་མིག་གསུམ་གྱིས་འབྱེད་པ་ནི་འདི་ལྟ་སྟེ། ཡན་ལག་དྲུག་དང་། མདོ་བཞི་དང་། རྩ་བ་གསུམ་མོ། །དེ་ལ་ཡན་ལག་དྲུག་གང་ཞེ་ན། རྒྱུའི་ཡན་ལག་དང་། སྦྱོར་བའི་ཡན་ལག་དང་། འབྲས་བུའི་ཡན་ལག་དང་། དངོས་གཞིའི་ཡན་ལག་དང་། བཟུང་བའི་ཡན་ལག་དང་། མཚན་ཉིད་ཀྱི་ཡན་ལག་གོ། །དེ་ལ་རྒྱུའི་ཡན་ལག་གང་ཞེ་ན། འདི་ལྟ་སྟེ། འབྱུང་བའི་ཡན་ལག་དང་། སྨིན་པའི་ཡན་ལག་གོ། །ལང་ཀའི་བདག་པོ་དེ་ལ་འབྱུང་བའི་ཡན་ལག་གང་ཞེ་ན། གང་ཡོངས་སུ་ཚོགས་ན་བརྗོད་པ་འབྱུང་བ་ཉིད་ལ་བྱ་སྟེ། ཚད་མ་དང་། བློ་གྲོས་དང་། འཛིན་པ་དང་། མཆོད་རྟེན་དང་། འདུས་པ་དང་། ངེས་པའོ། །སྨིན་པའི་ཡན་ལག་ནི་གང་དམ་པར་སྨིན་པའི་རྒྱུ་སྟེ། གང་ཞེ་ན་འདི་ལྟ་སྟེ། བྱང་ཆུབ་ཀྱི་ཡན་ལག་དང་། ལམ་གྱི་ཡན་ལག་གོ། །ལང་ཀའི་བདག་པོ་སྦྱོོར་བའི་ཡན་ལག་ནི་ཡུལ་ལ་སྦྱོར་བ་སྟེ། གང་བློའི་ཡུལ་ལ་སྦྱོར་བ་དང་། སྙིང་རྗེའི་ཡུལ་ལ་སྦྱོར་བའོ། །ལང་ཀའི་བདག་པོ་དེ་ལ་བློའི་ཡུལ་ལ་སྦྱོར་བ་ནི་གང་བློ་གྲོས་འབྱུང་བའི་རྩ་བ་གླེང་སློང་བ་ལ་སྦྱོར་བ་དང་། བློ་གྲོས་རྙེད་པའི་རྩ་བ་སའི་ཁྱད་པར་ལ་སྦྱོར་བ་དང་། བློ་གྲོས་ངེས་པའི་རྩ་བ་རྣམ་པར་ཐར་པ་ལ་སྦྱོར་བ་དང་། བློ་གྲོས་གཞག་པའི་རྩ་བ་དེ་ཁོ་ན་ཉིད་ལ་སྦྱོར་བའོ། །ལང་ཀའི་བདག་པོ་སྙིང་རྗེའི་ཡུལ་ལ་སྦྱོར་བ་ཡང་འདི་ལྟ་སྟེ། གང་གི་རྒྱུ་ལ་སྦྱོར་བ་དང་། འབྲས་བུ་ལ་སྦྱོར་བ་དང་། དེ་དག་རང་བཞིན་ལ་སྦྱོར་བའོ། །ལང་ཀའི་བདག་པོ་དེ་ལ་འབྲས་བུའི་ཡན་ལག་ནི་གང་དང་འབྲེལ་པའི་དགོས་ཆེད་དམ་པ་འབྱུང་བ་སྟེ། ཐོབ་པ་དམ་པ་དེ་ཁོ་ན་ཉིད་དོ། །ལང་ཀའི་བདག་པོ་དེ་ལ་དངོས་གཞིའི་ཡན་ལག་ནི་གང་གི་དགོས་པ་ངེས་པར་འགྲེལ་བ་སྟེ། གང་ཞེ་ན། འདི་ལྟ་སྟེ། གང་ལ་ཆོས་རྣམས་ཀྱི་དངོས་གཞི་གསུམ་དུ་བསྡུ་བ་སྟེ། གསུམ་གང་ཞེ་ན། རང་བཞིན་གྱི་དངོས་གཞི་དང་། རྩ་བའི་དངོས་གཞི་དང་། ཐམས་ཅད་ཀྱི་དངོས་གཞིའོ། །ལང་ཀའི་བདག་པོ་དེ་ལ་རང་བཞིན་གྱི་དངོས་གཞི་གང་ཞེ་ན། འདི་ལྟ་སྟེ། ཐོས་པ་དང་། དོང་བ་དང་། གཟུང་བ་དང་། ཆུབ་པའོ། །ལང་ཀའི་བདག་པོ་རྩ་བའི་དངོས་གཞི་གང་ཞེ་ན། འདི་ལྟ་སྟེ། གདགས་པ་དང་། སྤྱོད་པ་དང་། སྐྱེ་བ་དང་། གནས་པ་དང་། བདེ་བ་དང་། ཉོན་མོངས་པ་དང་། ཡོངས་སུ་བྱང་བ་དང་། སྣ་ཚོགས་དང་། བྱེད་པ་དང་། བྱ་བ་དང་། རྒྱན་ནོ། །ལང་ཀའི་བདག་པོ་ཐམས་ཅད་ཀྱི་དངོས་གཞི་གང་ཞེ་ན། ཀུན་ནས་ཉོན་མོངས་པ་ལ་སྣང་བ་འདི་ལྟ་སྟེ། བསྡུ་བ་དང་། འཇུག་པ་དང་། གང་ཟག་དང་། ཆོས་སོ། །ཡོངས་སུ་དག་པ་ལས་སྣང་བ་ནི་འདི་ལྟར་འདོགས་པ་དང་། རྩོལ་བ་དང་། གནས་དང་། བདེ་བ་དང་། ཐབས་དང་། ཤེས་པ་དང་། ཤེས་པའི་གནས་དང་། ནན་ཏན་དང་། ང་རྒྱལ་མེད་པ་དང་། བག་ཆགས་དང་། མངོན་དུ་བྱ་བ་དང་། བསྒོམ་པ་དང་། སྙིང་པོ་དང་། རྣམ་པ་དང་། དམིགས་པ་དང་། དཔྱོད་པ་དང་། གཡེང་བ་དང་། མི་གཡེང་བ་དང་། བཙལ་བ་དང་། ཡོན་ཏན་དང་། བརྟན་པ་དང་། བསྡུ་བ་དང་། ཕྱོགས་བསྡུ་བ་དང་། རྟོགས་པ་དང་། ཐོབ་པར་བྱ་བ་དང་། སྤྱིར་ཕྱིན་པ་དང་། ཡོངས་སུ་བྲི་བའོ། །ལང་ཀའི་བདག་པོ་དེ་དག་ནི་དངོས་གཞིའི་ཡན་ལག་ཅེས་བྱའོ། །ལང་ཀའི་བདག་པོ་དེ་ལ་གཟུང་བའི་ཡན་ལག་གང་ཞེ་ན། འདི་ལྟ་སྟེ། བླང་བ་དང་། ཕམ་པ་དང་། ལྟུང་བ་དང་། རང་བཞིན་དང་། མེད་པའི་རང་བཞིན་དང་། འབྱུང་བ་དང་། ཡོངས་སུ་གཏང་བ་ཁོ་ནར་ཤེས་པར་བྱ་སྟེ། ལང་ཀའི་བདག་པོ་དེ་དག་ནི་གཟུང་བའི་ཡན་ལག་ཅེས་བྱའོ། །ལང་ཀའི་བདག་པོ་དེ་ལ་མཚན་ཉིད་ཀྱི་ཡན་ལག་གང་ཞེ་ན། འདི་ལྟ་སྟེ། ཀུན་རྫོབ་དང་། དམ་པ་དང་། དམིགས་པ་དང་། རྣམ་པ་དང་། རང་བཞིན་དང་། འབྲས་བུ་དང་། བསྙན་པ་དང་། བར་དུ་གཅོད་པ་དང་། མཐུན་པ་དང་། ཉེས་དམིགས་དང་། ཡོན་ཏན་ནོ། །ལང་ཀའི་བདག་པོ་དེ་ལ་ཀུན་རྫོབ་གང་ཞེ་ན། འདི་ལྟ་སྟེ། གང་ཟག་དང་། བརྟགས་པ་དང་། ལས་སུ་བསྟན་པའོ། །ལང་ཀའི་བདག་པོ་དེ་ལ་དམ་པ་གང་ཞེ་ན། འདི་ལྟ་སྟེ། བྲལ་བ་དང་། བརྟན་པ་དང་། རྫོགས་པའོ། །དམིགས་པ་ནི་ཐམས་ཅད་དུ་བསྟན་པའོ། །རྣམ་པ་ནི་ཐམས་ཅད་དུ་བརྟགས་པ་སྟེ། བདེན་པ་དང་། གཞག་པ་དང་། ཉེས་པ་དང་། ཡོན་ཏན་དང་། ཚུལ་དང་། འཇུག་པ་དང་། རིགས་པ་དང་། བསྡུས་པ་དང་། རྣམ་པར་སྤྲོས་པའོ། །ལང་ཀའི་བདག་པོ་དེ་ལ་བདེན་པ་ནི་གང་ཞེ་ན། དེ་ཁོ་ན་ཉིད་གང་ཡིན་པའོ། །གཞག་པ་ནི་གང་ཟག་དང་། བརྟགས་པ་དང་། གཅིག་པ་དང་། དབྱེ་བ་དང་། དྲི་བ་དང་། གཞག་པ་དང་། རྣམ་པར་གཞག་པ་དང་། གསང་བ་དང་། བསྙད་པ་དང་། ལུང་བསྟན་པ་གཞག་པའོ། །ལང་ཀའི་བདག་པོ་ཉེས་པ་གང་ཞེ་ན། ཀུན་ནས་ཉོན་མོངས་པའི་རྣམ་གྲངས་སོ། །ཡོན་ཏན་གང་ཞེ་ན། ཡོངས་སུ་བྱང་བའི་རྣམ་གྲངས་སོ། །ལང་ཀའི་བདག་པོ་ཚུལ་གང་ཞེ་ན། དོན་དང་། ཐོབ་པ་དང་། བཤད་པ་དང་། མཐའ་སྤོང་བ་དང་། བསམ་གྱིས་མི་ཁྱབ་པ་དང་། དགོངས་པའོ། །ལང་ཀའི་བདག་པོ་འཇུག་པ་གང་ཞེ་ན། དུས་དང་། འདུས་པ་དང་། རྐྱེན་རྣམས་སོ། །ལང་ཀའི་བདག་པོ་རིགས་པ་གང་ཞེ་ན། འདི་ལྟ་སྟེ། ལྟོས་པ་དང་། བྱ་བ་བྱེད་པ་དང་། བསྒྲུབ་པ་དང་། ཆོས་ཉིད་དོ། །ལང་ཀའི་བདག་པོ་དེ་ལ་ལྟོས་པ་གང་ཞེ་ན། གང་འདུས་པ་དག་སྐྱེ་བ་དང་། ཐ་སྙད་ཀྱི་ཕྱིར་རྒྱུ་དང་རྐྱེན་དུ་གྱུར་པའོ། །བྱ་བ་བྱེད་པ་གང་ཞེ་ན། དེ་ལ་ཆོས་གང་ཐོབ་པའི་ཕྱིར་རམ། གྲགས་པ་འམ། སྐྱེས་ནས་ལས་སུ་བྱ་བའི་ཕྱིར་རྒྱུ་དང་རྐྱེན་དུ་གྱུར་པའོ། །བསྒྲུབ་པ་གང་ཞེ་ན། དེ་ལ་གང་གོ་ཆ་བགོས་པ་སྟེ། གང་སྨྲ་བ་དང་། གང་ངེས་པར་ཤེས་པར་བྱ་བའི་ཕྱིར་རྒྱུ་དང་རྐྱེན་དུ་གྱུར་པ་རྣམས་སོ། །ལང་ཀའི་བདག་པོ་དེ་ཡང་འདི་ལྟར་དག་པ་དང་། མ་དག་པ་ལ་གང་དག་པ་ནི་དམིགས་པ་དང་། གནས་པ་དང་། དཔེ་དང་། གྲགས་པ་དང་། ངེས་པའོ། །ལང་ཀའི་བདག་པོ་དེ་ལ་ཐམས་ཅད་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ནི་དམིགས་པའོ། །ཐམས་ཅད་སྐད་ཅིག་མ་དང་། གཞན་ཡོད་པ་དང་། ལས་རྣམས་མི་རྟག་པ་དང་། ལས་ལ་གནས་པ་དང་། དེའི་འབྲས་བུ་ལ་གནས་པ་ནི་གནས་པའོ། །ཐམས་ཅད་ལ་གྲགས་པ་ནི་གྲགས་པ་ཉེ་བར་སྦྱོར་ཞིང་དམིགས་པ་ཉེ་བར་སྦྱར་བ་ནི་དཔེའོ། །དེ་དག་གྲགས་པ་ནི་གྲགས་པའོ། །གང་གི་ཚད་མས་ཚད་མ་ཉིད་དུ་སྣང་བ་ནི་ངེས་པའོ། །ལང་ཀའི་བདག་པོ་དེ་ཡང་འདི་ལྟར་བྱུང་བ་དང་། བརྟགས་པ་དང་། གཅོད་པ་དང་། བྲལ་བ་དང་། སྣང་བས་ན་ཚད་མར་ངེས་པའོ། །དེ་ནི་མངོན་སུམ་དང་། དཔག་པ་དང་། ཚད་མས་དག་པའོ། །ལང་ཀའི་བདག་པོ་མ་དག་པ་ནི་འདི་ལྟར་གཞན་དང་མཐུན་པ་དང་། མི་མཐུན་པ་དང་། ཐམས་ཅད་དང་མཐུན་པ་དང་མི་མཐུན་པ་དང་། གཞན་གྱི་དཔེ་ཉེ་བར་སྦྱར་བ་དང་། མ་གྲགས་པ་དང་། མ་ངེས་པ་དག་གོ། །ལང་ཀའི་བདག་པོ་དེ་ལ་ཡོངས་སུ་དག་པའི་མཚན་ཉིད་ལྔ་པ་མ་ཡིན་པའི་ཚད་མ་གཞན་དང་མཐུན་པར་དམིགས་པ་དང་། འདུས་བྱས་ཀྱི་མཚན་ཉིད་མི་རྟག་པ་ལ་སོགས་པ་ཇི་ལྟ་བ་ལ་རྟག་པ་དང་། བདག་ལ་སོགས་པ་གཞན་དུ་དམིགས་ཏེ་ཕྱིན་ཅི་ལོག་བཞིར་ལྟ་བས་འདུས་མ་བྱས་ཀྱི་མཚན་ཉིད་དང་མཐུན་པར་དམིགས་པ་འདི་ནི་མཐུན་པའོ། །ཚད་མ་གཞན་དང་མི་མཐུན་པ་དང་། ཡུལ་གྱི་མཚན་ཉིད་གཞན་དང་མི་མཐུན་པ་འདི་ནི་གཞན་དང་མི་མཐུན་པའོ། །ཐམས་ཅད་ཡིད་ཀྱི་བྱ་བ་དག་གོ་ཞེས་བྱ་བ་ནི་ཐམས་ཅད་དང་མཐུན་པའོ། །མི་མཐུན་པ་གང་གཅིག་གི་མི་མཐུན་པས་ཕན་ཚུན་མི་མཐུན་པ་ཞེས་བྱ་བ་འདི་ནི་མི་མཐུན་པའོ། །ལང་ཀའི་བདག་པོ་གཞན་ཡང་མཐུན་པ་དཔེ་དང་སྦྱར་བ་ལ་མི་མཐུན་པ་ཡོད་པས་དེ་ནི་མ་ངེས་པའོ་ཞེས་བྱ་བ་ནི་མ་གྲགས་པའོ། །མི་མཐུན་པ་དཔེ་དང་སྦྱར་བ་ལ་མཐུན་པ་ཡོད་པས་དེ་ནི་མ་ངེས་པའོ་ཞེས་བྱ་བ་ནི་དེ་ཡང་མ་གྲགས་པའོ། །གང་མ་གྲགས་པས་གང་གིས་བརྟགས་པ་མ་དག་པའོ། །གང་རང་བཞིན་གྱིས་མ་དག་པ་ནི་མ་ངེས་པའོ། །ལང་ཀའི་བདག་པོ་དེ་དག་ནི་བསྒྲུབ་པའོ། །ལང་ཀའི་བདག་པོ་ཆོས་ཉིད་གང་ཞེ་ན། གང་དུ་མ་བཅོས་པ་ཉིད་དོ། །ལང་ཀའི་བདག་པོ་གང་དུ་བསྡུས་པ་དང་། རྣམ་པར་སྤྲོས་པས་ནི་ཐམས་ཅད་ཀྱང་བསྡུས་ཏེ། གཅིག་ལ་ཁྱད་པར་གྱིས་ཕྱེ་སྟེ་མཐར་ཕྱིན་པའོ། །ལང་ཀའི་བདག་པོ་དམིགས་པ་ནི་འཛིན་པའོ། །རྣམ་པ་ནི་དབྱེ་བའོ། །བྱང་ཆུབ་ནི་རང་བཞིན་ནོ། །གང་སྤངས་པས་གང་ཐོབ་པ་ནི་འབྲས་བུའོ། །གང་ཆུབ་ཅིང་གང་ལ་བརྗོད་པ་ནི་བསྙད་པའོ། །གང་གི་ཕྱོགས་དང་མི་མཐུན་པ་ནི་བར་དུ་གཅོད་པའོ། །གང་གི་ཕྱོགས་ལ་ནན་ཏན་དུ་བྱེད་པ་ནི་མཐུན་པའོ། །གང་དང་མི་མཐུན་པའི་དབང་དུ་ཇེན་པ་ནི་ཉེས་དམིགས་སོ། །གང་དུ་མཐུན་པར་ཇེན་པ་ནི་ཡོན་ཏན་ནོ། །ལང་ཀའི་བདག་པོ་དེ་དག་ནི་མཚན་ཉིད་ཀྱི་ཡན་ལག་སྟེ། ཡན་ལག་དྲུག་པ་དེ་དག་ནི་འབྱེད་པའི་ལྡེ་མིག་སྟེ། གང་སྤྱོད་པས་འདྲེན་པའི་སྒོ་གང་ཡིན་པ་དེ་ནི་དེས་འབྱེད་ཅིང་གང་དེ་ཉིད་དུ་དགོངས་པ་ངེས་པར་འགྲེལ་ཏོ། །ལང་ཀའི་བདག་པོ་དེ་ལ་མདོ་བཞི་གང་ཞེ་ན། འདི་ལྟ་སྟེ། དགོངས་པ་གཞན་གྱི་མདོ་དང་། ལྡེམ་པོ་དག་གི་མདོ་དང་། མཐུན་འཇུག་སྦྱོར་བའི་མདོ་དང་། དོན་དམ་ངེས་པའི་མདོའོ། །ལང་ཀའི་བདག་པོ་དེ་ལ་དགོངས་པ་གཞན་པའི་མདོ་འདི་ལྟ་སྟེ། རང་བཞིན་དང་། དུས་དང་། དོན་དང་། ཡུལ་ལ་དགོངས་པའི་ལང་ཀའི་བདག་པོ་དེ་ལ་རང་བཞིན་ནི་འདི་ལྟར། ཇི་ག་ཁྱད་པར་དུ་སྣང་བ་ལ་གང་དེ་ལྟར་རྟོག་པ་ཞེན་པ་དག་བསལ་བའི་ཕྱིར་རང་བཞིན་ལ་དགོངས་ཏེ། དེ་གང་ཡིན་པ་ནི་འདི་ཉིད་དོ་ཞེས་གཅིག་ཏུ་ཞལ་གྱིས་རྩལ་བའོ། །ལང་ཀའི་བདག་པོ་དུས་ནི་འདི་ལྟར་སྒྱིད་ལུག་པ་གང་དག་མངོན་པར་སྤྲོ་བ་བསྐྱེད་པའི་ཕྱིར་གང་གི་རྒྱུ་འབྲས་མི་སླུ་བ་ལ་དགོངས་ཏེ། གྱི་ནད་ཙམ་འདིས། མྱུར་བ་ཉིད་དུ་འགྱུར་རོ་ཞེས་སྟོན་པའོ། །ལང་ཀའི་བདག་པོ་དོན་འདི་ལྟར། གང་གིས་གང་ལ་རློམ་སེམས་པ། །དེ་ཡི་མུན་པ་བསལ་བའི་ཕྱིར། །གང་གིས་མཐོང་ལམ་མ་ཐོབ་པར། །དེ་ཉིད་མི་མཐོང་ལ་དགོངས་ཏེ། །འདི་དག་ནི་དཔག་ཏུ་མེད་པའི་དམ་པས་མ་བསྙད་པར་ཤེས་པར་མི་ནུས་སོ་ཞེས་སྒོའོ། །ལང་ཀའི་བདག་པོ་ཡུལ་ལ་དགོངས་པ་ནི་འདི་ལྟར་གང་ཕྱོགས་གཅིག་ཙམ་གྱིས་ཆོག་པར་འཛིན་པ་དག་བློ་སྐྱེ་བའི་ཕྱིར་གང་གི་ཕྱོགས་ཀུན་བཀོད་དེ་ཡོངས་སུ་བསྔགས་པ་བརྗོད་ཅིང་ཕྱོགས་གཅིག་གིས་མི་ཆོག་པ་ལ་དགོངས་ཏེ། སྔོན་དུ་གོམས་པའི་ཕྱོགས་ལ་སྨོད་པའོ། །ལང་ཀའི་བདག་པོ་དེ་ལ་ལྡེམ་པོ་དག་གི་མདོ་ནི་འདི་ལྟ་སྟེ། སྦྱོར་བ་དང་། དབྱེ་བ་དང་། ཟིལ་གྱིས་གནོན་པ་དང་། སླུ་བའོ། །ལང་ཀའི་བདག་པོ་དེ་ལ་སྦྱོར་བ་ནི་གང་འདི་ལྟར་གང་སྐྲག་ཅིང་དངངས་པ་དང་། ཚི་ཆད་པར་རྩོལ་བ་དང་། གང་མངོན་པར་ཞེན་པ་དག་ཅི་ལ་ཡང་མི་འཇུག་པ་དེ་དག་གང་གི་དོན་ལ་ངེས་པར་གཞུག་པའི་ཕྱིར་གང་དང་གང་གི་འབྲས་བུ་ཡོད་པ་དང་། ཀུན་ཀྱང་རང་བཞིན་མེད་པ་ལ་དགོངས་ཏེ། ཐམས་ཅད་ཡོད་དོ་ཞེས་བྱ་བ་དང་། སྟོང་པ་ཉིད་དོ་ཞེས་གང་གི་འདུ་ཤེས་གཞུག་པའི་ཕྱིར་རོ། །ལང་ཀའི་བདག་པོ་དབྱེ་བ་ནི་འདི་ལྟར་གང་དང་གང་ལ་མོས་པ་དེ་ལྟར་ཀུན་བརྟགས་པ་དངོས་པོ་མེད་པར་བཤད་པ་དང་། གཞན་གྱི་དབང་རྟེན་ཅིང་འབྲེལ་པར་འབྱུང་བ་བཤད་པ་དང་། ཡོངས་སུ་གྲུབ་པ་མི་འགྱུར་བ་ཕྱིན་ཅི་མ་ལོག་པར་བཤད་པ་གསུམ་ལ་དགོངས་ཏེ་གསུམ་བསྟན་པའོ། །ལང་ཀའི་བདག་པོ་ཟིལ་གྱིས་གནོན་པ་ནི་འདི་ལྟར་གང་ཕུན་སུམ་ཚོགས་པའི་གྲགས་པ་དག །རྫོགས་ལོངས་སྤྱོད་པ་དག་བསྟན་པས་ཟིལ་གྱིས་གནོན་པའི་ཕྱིར་གཉེན་པོར་གྱུར་པས་འདུལ་བར་དགོངས་ཏེ་རྒྱ་ཆེན་པོ་དག་སྟོན་པའོ། །ལང་ཀའི་བདག་པོ་སླུ་བ་ནི་འདི་ལྟར་གང་འདུ་ཤེས་ལོག་པ་དག་སྦས་པའི་ཐབས་ཀྱིས་ངེས་པར་བསྒྱུར་བའི་ཕྱིར་དོན་མི་འགྱུར་བ་ལ་དགོངས་ཏེ། རྒྱུ་གཞན་དུ་སྟོན་པའོ། །ལང་ཀའི་བདག་པོ་དེ་ལ་མཐུན་འཇུག་སྦྱོར་བའི་ལུང་འདི་ལྟ་སྟེ། རང་རྐྱེན་གཉེར་གྱི་ལུང་དང་། ཐབས་འཛུད་བསྲེ་བའི་ལུང་དང་། ཆ་མཐུན་སྦྱོར་བའི་ལུང་དང་། གདམས་ངག་ནན་ཏན་གྱི་ལུང་ངོ་། །ལང་ཀའི་བདག་པོ་འདི་ལ་རང་རྐྱེན་གཉེར་གྱི་ལུང་ནི་འདི་ལྟར་གང་ལ་གང་ལྟར་རྐྱེན་དུ་འཚམ་པ་དེ་ལ་དེ་ལྟར་ཉིད་སྟོན་པའོ། །ཐབས་འཛུད་བསྲེ་བའི་ལུང་ནི་འདི་ལྟར་གང་བསྡུ་བའི་ཐབས་ཀྱིས་གང་གི་ཆ་དང་འདྲེན་མས་དེ་དག་བསྒྱུར་བའོ། །ཆ་མཐུན་སྦྱོར་བ་ནི་འདི་ལྟར་གང་གི་ཆ་བཞིན་སྤྱོད་པས་འདི་ལྟར་སྦྱོར་བའོ། །གདམས་ངག་ནན་ཏན་གྱི་ལུང་ནི་འདི་ལྟར་གང་ལ་གང་གཅེས་སྤྲས་བྱས་ཏེ་འཇོག་པའོ། །ལང་ཀའི་བདག་པོ་དེ་ལ་དོན་དམ་ངེས་པའི་ལུང་ནི་འདི་ལྟ་སྟེ། དོགས་པ་དང་། ངེས་པ་དང་། ངོ་བོ་དང་། གལ་པོའོ། །ལང་ཀའི་བདག་པོ་དེ་ལ་དོགས་པ་གང་ཞེ་ན། འདི་ལྟ་སྟེ། གང་བྱུང་བ་དག་གང་གི་ཕྱིར་བརྟགས་ཏེ། དེ་ལྟར་དེའི་ཕྱིར་ངོས་ཟིན་པའོ། །ངེས་པ་ནི་འདི་ལྟར་གང་ལ་གཏན་ལ་ཕབ་པ་དེའི་ངེས་པ་རྙེས་པའོ། །རང་གི་ངོ་བོ་ནི་འདི་ལྟར་གང་བརྟགས་པ་བརྗོད་པའི་དངོས་གཞིའོ། །གལ་པོ་ནི་འདི་ལྟར་གང་ལ་གང་གིས་གལ་དུ་གཏོང་བ་ཉིད་དོ། །ལང་ཀའི་བདག་པོ་དེ་དག་ནི་ངེས་པ་དམ་པའི་ལུང་སྟེ། མདོ་བཞི་པོ་དེ་དག་ནི་དགྲོལ་བའི་ལྡེ་མིག་སྟེ། གང་སྤྱོད་པས་འདྲེན་པའི་སྒོ་གང་ཡིན་པ་དེ་ནི་དེས་དགྲོལ་ཞིང་གང་དེ་ཉིད་དུ་གསལ་བར་བྱེད་པའོ། །ལང་ཀའི་བདག་པོ་དེ་ལ་རྩ་བ་གསུམ་གང་ཞེ་ན། འདི་ལྟ་སྟེ། བློའི་རྩ་བ་དང་། གྲོས་ཀྱི་རྩ་བ་དང་། ཐབས་ཀྱི་རྩ་བའོ། །ལང་ཀའི་བདག་པོ་དེ་ལ་བློའི་རྩ་བ་ནི་འདི་ལྟར་ཇི་བཞིན་པའི་དེ་བཞིན་ཉིད་དུ་མི་རྟོག་རྣམ་པར་མི་རྟོག་ལྷན་ནི་བའོ། །ལང་ཀའི་བདག་པོ་གྲོས་ཀྱི་རྩ་བ་ནི་འདི་ལྟར་གང་ཐམས་ཅད་ནས་ཐམས་ཅད་དུ་མ་འདྲེས་པ་ལ་མ་རྨོངས་པ་ཉིད་ས་ལེ་བའོ། །ལང་ཀའི་བདག་པོ་ཐབས་ཀྱི་རྩ་བ་ནི་འདི་ལྟར་གང་ཡོངས་སུ་རྫོགས་པ་ལ་རྣམ་པར་དག་པ་ཉིད་དོ། །ལང་ཀའི་བདག་པོ་དེ་དག་ནི་རྩ་བ་སྟེ། རྩ་བ་གསུམ་པོ་འདི་དག་ནི་འབྱེད་པའི་ལྡེ་མིག་ཅེས་བྱ་སྟེ། གང་སྤྱོད་པས་འདྲེན་པའི་སྒོ་གང་ཡིན་པ་དེ་ནི་ངེས་འབྱེད་ཅིང་དེ་ཉིད་དུ་གསལ་བར་བྱེད་དོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་བཀོད་པ་རྣམ་པར་འགྲེལ་པའི་ལེའུ་སྟེ་བཞི་བཅུ་ལྔ་པའོ།། །།