ལེའུ་ཉེར་གཉིས་པའི་རྣམ་པར་བཤད་པ།

༈ སྤྱི་དོན་གསུམ་པ་རྒྱུད་དམ་པར་གདམས་ནས་རྗེས་འཇུག་ལ་གཏད་པའི་ཚུལ་ལ་གསུམ་སྟེ། དོན་གྱི་འབྲེལ་དགོད་པ། ཚིག་གི་དོན་བཤད་པ། སྐབས་ཀྱི་དོན་བསྡུ་བའོ། །

དང་པོ་ནི། སྒྱུ་འཕྲུལ་རྩ་བའི་དཀྱིལ་འཁོར་རྫོགས་པར་བསྟན་པ་དེ༵་ན༵ས་བཅོ༵མ་ལྡན༵་འད༵ས་དགྱེ༵ས་པ༵་ཆེ༵ན་པོ༵་དཔལ་ཀུན་ཏུ་བཟང་པོ་སྟེ། དེའི་མཚན་གྱི་རྣམ་གྲངས་ལ། བདེ་བ་ཆེན་པོ་། རྡོ་རྗེ་སྙིང་པོ། དམ་པ་དང་པོ། གདོད་མའི་མགོན་པོ། (༣༣༡)རྡོ་རྗེ་འཆང་ཆེན་པོ་ལ་སོགས་པའོ། །སྟོན་པ་དེས་རང་སྣང་ལྷུན་སྟུག་པོ་བཀོད་པའི་རིགས་ལྔ་སེམས་དཔའ་བརྒྱད་ལ་སོགས་པའི་དེ༵་བཞི༵ན་གཤེ༵གས་པ༵་ཉིད༵་ལ༵་གས༵ང་སྔག༵ས་ཀྱི༵་རྒྱལ༵་པོ༵་འདི་ཉིད་མི་ནུབ་ཅིང་འགྲོ་བ་ལ་ཕན་གདགས་པའི་ཕྱིར་བརྟན༵་པ༵ར་ཟུང༵ས་ཤིག་ཅེས་པ༵་འདི༵་ཆེ༵ད་དུ༵་བརྗོ༵ད་ཅིང་ཁྱད་པར་དུ་རིག་པའི་སེམས་དཔའ་གསང་བདག་ལ་གདམས་པར་མཛད་དོ༵། །ཁ་ཅིག་ནི་གསང་བདག་འཆད་པའི་སྐྱེས་བུ་ཡིན་གྱི། རྡོ་རྗེ་ལས་དང་། ཆོས་དང་། ཀུན་ནས་སྣང་བའི་དཔལ་ལ་གདམས་པའོ། །ཞེས་པའང་རིགས་པར་མ་མཐོང་སྟེ། འདི་ལྟར་ཕྱག་ན་རྡོ་རྗེ་ལ་གདམས་པས་གཞན་ལ་མ་གདམས་པར་མི་འགྱུར་བ་དང་། འོག་མིན་དུ་ཀུན་བཟང་ཉིད་རིགས་ལྔའི་གཙོ་བོ་རྣམ་པར་སྣང་མཛད་དུ་སྣང་བས་སྟོན་ཅིང་འཆད་པའི་སྐྱེས་བུ་ཡིན་ལ། གསང་བདག་འཁོར་དུ་སྣང་བས་འཛིན་པ་པོ་ཡིན་པའི་ཕྱིར་རོ། །

གཉིས་པ་ལ་གཉིས་ཏེ། ལམ་ཀུན་གྱི་འབྲས་བུར་གདམས་པ་དང་། གསང་བ་ཀུན་གྱི་མཆོག་ཏུ་གདམས་པའོ། །དང་པོ་ལ་གཉིས་ཏེ། གདམས་བྱ་རྒྱུད་ཀྱི་རང་བཞིན་དང་། གང་ལ་གདམས་པ་སྣོད་ཀྱི་ཆེ་བའོ། །

དང་པོ་ལ་གསུམ་ལས། འབྲས་བུ་རྒྱུད་དངོས་བསྟན་པ་ནི། རང་སྣང་གི་འཁོར་ཐབས་དང་ཤེས་རབ་གཉིས་སུ་མེད་པའི་རང་བཞིན་ཡབ་ཡུམ་དུ་སྣང་བ་རྣམས་ལ་ཀྱེ༵་ཀྱེ༵་ཞེས་བོས་ནས་སྣང་སྲིད་འཁོར་འདས་ཀྱི་ཆོས་ཕྱོག༵ས་བཅུ༵་དང་དུས༵་བཞི༵ས་བསྡུས་པའི་ར༵ང་བཞི༵ན་འདི༵་དག་ཐམས་ཅད་དེ༵་བཞི༵ན་གཤེ༵གས་པ་རིགས་ལྔ་ཡབ་ཡུམ་དང་སེམས་དཔར་བཅས་པ་སྟེ་ཞི་ཁྲོ་གཉིས་ཀྱི་དཀྱིལ་འཁོར་དུ་ཡེ་ནས་སངས་རྒྱས་པ༵འི་ངོ༵་བོ༵་ཉིད༵་དུ་གནས་པ་ནི་གཞི་གསང་བའི་སྙིང་པོ་སྟེ། དེས་མཚོན་ནས་ལམ་དང་འབྲས་བུ་གསང་བའི་སྙིང་པོ་ནི་རྒྱུད་ཀྱི་ངོ་བོའོ། །

གཉིས་པ་ལམ་གཞན་དེའི་རྐང་སྟེགས་སུ་བསྟན་པ་ནི། ཕྱི་གཟུ༵ང་བའི་ཡུལ་དང་ནང་འཛིན༵་པའི་སེམས་ཀྱི་སྤྲོས་པ་ལ༵་བློ་འཆེ༵ལ་ནས་སྲིད་པ་གསུམ་པོར་འཁྱམས་པའི་འགྲོ་བ༵་ཡི༵ས་ཕྱི་ནང་གཞན་ལ་སོགས་པའི་རྣམ༵་པར་རྟོག༵་པ་མི་བཟད་པའི་ཞག༵ས་པ༵ས་སོ༵་སོ༵ར་ཟི༵ན་ཏེ་སྡུག་བསྔལ་བ་ནི། སློབ་དཔོན་ཕྱོགས་ཀྱི་གླང་པོས་འཇམ་དཔལ་ལ་བསྟོད་པ་ལས། རྣམ་པར་རྟོག་ལས་མ་གཏོགས་པའི། །འཁོར་བ་ཞེས་བྱ་ཅི་ཡང་མེད། །ཅེས་པ་དང་། འཇུག་པ་ལས། དང་པོར་ང་ཞེས་བདག་ལ་ཞེན་གྱུར་ཅིང་། །བདག་གི་འདི་ཞེས་དངོས་ལ་ཆགས་པ་སྐྱེས། །ཟོ་ཆུན་འཕྱན་ལྟར་རང་དབང་མེད་པ་ཡི། །འགྲོ་ལ་སྙིང་རྗེ་གྱུར་གང་དེ་ལ་འདུད། །ཅེས་པའི་ཚུལ་གྱིས་འཁོར་བར་འཁྱམས་པའི་སེམས་ཅན་གྱི་དབང་པོའི་རིམ་པ་དང་སྦྱར་ཏེ་ཐེག་པ་སོ་སོའི་ས༵་རྣམ༵ས་དང་ལམ་གྱི་ཁྱད༵་པར༵་(༣༣༢)གོང་འོག་ཏུ་བཀོ༵ད་པ༵་ཡང༵་རང་བཞིན་གས༵ང་བ༵འི་སྙིང༵་པོ༵་འགྲོ༵་བའི༵་ལ༵མ་སྟེགས་ཡིན་གྱི་ལམ་ཚང་ལ་མ་ནོར་བ་དངོས་མ་ཡིན་ཏེ། དེ་དག་གི་མཐར་འདིར་འཇུག་དགོས་པའི་ཕྱིར་རོ། །

གསུམ་པ་རྣམ་གྲངས་དུ་མ་གསུངས་པའི་དགོས་པ་ནི། དེ་ལྟ་ན་གསང་བའི་སྙིང་པོ་གཅིག་པུ་གསུངས་པས་ཆོག་མོད། ཐེག་པའི་རྣམ་གྲངས་མཐོ་དམན་མང་པོ་བསྟན་ཅི་དགོས་ཤེ་ན། སེམས་ཅན་རྣམས་ནི་དབང་པོའི་རིམ་པ་སྣ་ཚོགས་སུ་གནས་སྐབས་གནས་པས་གང་ལ་གང་འཚམས་ཀྱིས་སོ་སོར་བསྟན་ཏེ། འདི་ཉིད་དང་པོ་ནས་གོ་བའམ་ཕྲད་པ་ཤིན་ཏུ་དཀའ་བས་སྔོན་འགྲོའམ་སྟེགས་སུ་བསྟན་ཏེ། ཕྱིས་འདི་དང་ཕྲད་ཅིང་སྤྱད་པར་བྱ་བའི་ཕྱིར་སྤངས་པ་དང་རྟོགས་པའི་ཡེ༵་ཤེ༵ས་ངོ༵་མཚ༵ར་བ་རབ༵་འབྱ༵མས་མངའ་བའི་སྟོན་པ་ཀུན་ཏུ་བཟང་པོ་ཉིད་ཀྱི་རང་བྱུང་གི་ཐུགས་རྗེ་སྤྲུལ་པའི་སྐུ་འཇིག་རྟེན་དུ་སྣང་བས་གསུངས་པའི་ཆོས་ཐམས་ཅད་ཀྱང༵་སེམས་ཅན་གྱི་དོ༵ན་དུ༵་མི༵་འགྱུ༵ར་ཞེས་བྱ་བ་ནི་གང་ཅུང་ཟད་ཅིག་ཀྱང་ཡོང༵་སྟེ་དུས་རྣམ་པ་ཐམས་ཅད་དུ་མ༵་གསུང༵ས་པ་ཡིན་ནོ། །དེ་སྐད་དུའང་ལེགས་བྱིན་གྱིས་ཞུས་པའི་མདོ་ལས། འཇིག་རྟེན་རྣམས་ལ་ཕན་པ་མཛད་པའི་ཕྱིར། །རྒྱལ་བ་རྣམ་འདྲེན་དེ་ཡིས་ཆོས་གསུངས་ཏེ། །འདོད་ཆགས་ཞེ་སྡང་གཏི་མུག་ཞི་མཛད་ཅིང་། །མྱ་ངན་འདས་པའི་ལམ་ལ་འགོད་པར་མཛད། །ནམ་ཡང་དོན་དུ་མི་འགྱུར་མི་མངའ་སྟེ། །ཉེས་ཟད་རྫུན་གྱི་ཚིག་སྤངས་དྲང་སྲོང་ཆེ། །ཞེས་སོ། །དེས་བསྟན་པའི་ཆོས་ནི་ཤེས་བྱ་མ་ལུས་པ་མངོན་སུམ་གྱིས་གཟིགས་ཤིང་སྒྲིབ་པ་མཐའ་དག་སྤངས་པ་སངས་རྒྱས་ཀྱི་གསུང་ཡིན་པའི་ཕྱིར་ན་དོན་དུ་འགྱུར་བ་ཁོ་ནའོ། །དེ་ལ་ཡེ་ཤེས་ཀྱི་གཟིགས་པ་ནི། རྒྱུད་བླ་མ་ལས། མཁྱེན་པའི་སྐད་ཅིག་གཅིག་གིས་ཀྱང་། །ཤེས་བྱའི་དཀྱིལ་འཁོར་ཀུན་ཁྱབ་ཅན། །ཞེས་སོ། །སྒྲིབ་པ་མཐའ་དག་དང་བྲལ་བ་ནི་སངས་རྒྱས་ཏེ་རྫུན་སྤངས་པའི་སྐྱེས་བུ་ཚད་མར་གྱུར་པ་ནི། རྣམ་འགྲེལ་ལས། ཉེས་པ་སྤངས་པས་བརྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ཤེས་པར་བྱ། །ཞེས་སོ། །དེ་ལྟར་སངས་རྒྱས་ཀྱིས་གསུངས་པ་དོན་དུ་འགྱུར་བ་བཞིན་དུ་དེའི་སྲས་དང་སློབ་མ་དག་གིས་རྒྱལ་བའི་བཀའི་རྗེས་སུ་འབྲངས་ཏེ་རྣམ་བཤད་མཛད་པའང་བཀའ་བཞིན་འགྱུར་བ་ནི། རྒྱུད་བླ་མ་ལས། གང་ཞིག་རྒྱལ་བའི་བསྟན་པ་འབའ་ཞིག་གི། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླངས། །ཞེས་སོ། །

གཉིས་པ་གང་ལ་གདམས་པ་སྣོད་ཀྱི་ཆེ་བ་ནི། ཕྱོགས་བཅུ་དུས་བཞིའི་དེ༵་བཞི༵ན་གཤེ༵གས་པ༵་ཐམ༵ས་ཅད༵་ཀྱི༵་སྐུ་གསུང་(༣༣༣)ཐུགས་ཡོན་ཏན་ཕྲིན་ལས་ཕུན་སུམ་ཚོགས་པའི་ཕྱག༵་རྒྱ༵་དམ་པ་ནི་གཞི་ལམ་འབྲས་བུའི་གས༵ང་ཆེ༵ན་ཆོས་ཐམས་ཅད་ཀྱི་སྙིང༵་པོ༵་འདི༵་ཡིན་ནོ། །དེའང་བརྗོད་བྱ་དོན་དང་རྗོད་བྱེད་རྒྱུད་ཀྱི་གཞུང་གཉིས་ཀ་དེ་བཞིན་གཤེགས་པའི་ཕྱག་རྒྱས་བཏབ་པའི་ཕྱིར་དེ་ལས་འདའ་བར་དཀའ་བས་ཕྱག་རྒྱར་བཤད་དེ་དཔེར་ན་རྒྱལ་པོའི་བཀའ་རྟགས་ཀྱི་ཕྱག་རྒྱས་བཏབ་པ་བཞིན་ཏེ། མཉམ་སྦྱོར་ལས། འདའ་དཀའ་དེ་བཞིན་མི་ཤིགས་པ། །རྒྱལ་པོའི་ཕྱག་རྒྱ་མཆོག་གི་རྟགས། །བདག་ཉིད་ཆེན་པོའི་མཚན་མའི་གཟུགས། །དེ་བས་ཕྱག་རྒྱ་ཞེས་བྱའོ། །ཞེས་སོ། །དེ་ལྟ་བུའི་ཚུལ་ནི་རྒྱ་དུ་མས་བཏབ་ཅིང་རང་བཞིན་དང་གནས་སྐབས་ཀྱི་གསང་བའི་དོན་དེ་ཉིད་ཕྱིན་ཅི་མ་ལོག་པར་རང་གིས་རྟོག༵ས་ན༵ས་སྐལ་བ་དང་ལྡན་པ་གཞན་ལ་སྨྲ༵་བར༵་གང༵་བྱེ༵ད་པ༵འི་གང་ཟག་དེ༵་ཉིད༵་རྒྱུད་ཀྱི་སྟོན་པ་ཕུན་སུམ་ཚོགས་པ་ང༵་ཀུན་ཏུ་བཟང་པོ་ཡི༵ན་ཞིང་། ཕན་པ་དང་ནུས་པའི་དབ༵ང་ཡ༵ང་ཡེ་ནས་ངང་ངམ་ལྷུན་གྱིས་རྫོ༵གས་པ་ཡིན་ནོ། །ཚིག་འདིའི་རྒྱུད་འཆད་པ་དེ་ལ་སྟོན་པས་ཐོག་མ་མེད་པའི་དུས་སུ་དབང་བསྐུར་ཟིན་པས་ཚེ་འདི་ལ་མ་མནོས་ཀྱང་རྒྱུད་ལ་དབང་བས་བདག་དོན་དང་གཞན་དོན་བྱོས་ཤིག །ང་ཀུན་ཏུ་བཟང་པོ་དངོས་ཀྱིས་བྱིན་གྱིས་བརླབས་ཤིང་ཡེ་ནས་སངས་རྒྱས་པ་དང་གསང་བ་ཟབ་མོའི་དོན་ལ་མོས་ཤིང་མི་སྐྲག་པར་གྱུར་པའི་ཕྱིར་རོ་ཞེས་བྱ་བར་བསྟན་ཏོ། །

གཉིས་པ་གསང་བ་ཀུན་གྱི་མཆོག་ཏུ་གདམས་པ་ལ་གཉིས་ཏེ། གསང་དོན་དངོས་དང་། དེ་འཛིན་པའི་གང་ཟག་དམ་པར་ལུང་བསྟན་པའོ། །

དང་པོ་ནི། ཕྱོགས་བཅུ་དུས་བཞིའི་དེ༵་བཞི༵ན་གཤེ༵གས་པ༵་ཐམ༵ས་ཅ༵ད་ལ༵་སྐུ་དང་གསུང་དང་ཐུགས་ཀྱི་གས༵ང་བ༵་མཐར་ཐུག་པ་རྒྱུད་ཀྱི་དམ་པ་འདི༵་ལ༵ས་གཞ༵ན་ཅུང་ཟད་ཀྱང་མི༵་མང༵འ་བ་ཡིན་པས་མཆོག་དམ་པར་ཟུངས་ཤིག་ཅེས་པའོ། །དེའི་དོན་ཡང་ཆོས་ཐམས་ཅད་ཡེ་ནས་མཉམ་པ་ཉིད་གསང་བའི་སྙིང་པོར་སངས་རྒྱས་པ་ནི་གཞིའི་རྒྱུད་དེ། རྒྱལ་བ་ཐམས་ཅད་ཀྱིས་གཏན་ལ་དབབ་བྱའི་དོན་མཐར་ཐུག་པའོ། །དེ་ཉིད་སྟོན་པ་གཞུང་གི་ཚོགས་ལའང་དོན་ཟབ་མོ་ཡོད་པ་རྟག་པའི་མཐར་སྒྲོ༵་འདོགས་པ་དང༵་མེད་པ་ཆད་པའི་མཐར་སྐུར༵་པ༵་འདེབས་པ་དང་། ཡོད་མེད་གཉིས་ཡིན་པ་དང་མིན་པ་ལ་སོགས་པའི་སྤྲོས་པ་ཐམས་ཅད་ཉེ་བར་ཞི༵་བ༵་ཡི༵་རང་བཞིན་ཡེ་ནས་སྟོང་ཞིང་བདག་མེད་པས་བློ་ཡི་ཡུལ་ལས་འདས་པ་ནི། གས༵ང་བ༵འི་སྙིང༵་པོ༵་ཆོས་ཐམས་ཅད་ཀྱི་དེ༵་ཁོ༵་ན༵་ཉིད༵་དེ༵་ཆོས་ཉིད་བསམ་བརྗོད་མེད་པ་ངེས༵་པ༵འི་དབྱིང༵ས་ན༵ས་བརྗོད་པའི་དོན་དུ་སྟོན་པས་བྱུང༵་བའོ། །དེ་སྐད་དུའང་མངོན་རྟོགས་རྒྱན་ལས། ཟབ་པ་ཉིད་དེ་སྒྲོ་འདོགས་དང་། །སྐུར་པའི་(༣༣༤)མཐའ་ལས་གྲོལ་བ་ཉིད། །ཅེས་པ་དང་། རྩ་བ་ཤེས་རབ་ལས། གཞན་ལས་ཤེས་མིན་ཞི་བ་དང་། །རྣམ་རྟོག་མེད་དོན་ཐ་དད་མེད། །སྤྲོས་པ་རྣམས་ཀྱིས་མ་སྤྲོས་པ། །དེ་ནི་དེ་ཡི་མཚན་ཉིད་དོ། །ཞེས་པ་དང་། ཡེ་ཤེས་སྣང་བ་རྒྱན་གྱི་མདོ་ལས། ཆོས་རྣམས་མ་སྐྱེས་མཁའ་ལྟར་རབ་ཞི་བ། །དོན་དམ་གཟིགས་པ་རྣམས་ཀྱི་སྤྱོད་ཡུལ་ཏེ། །རྒྱལ་བ་རྣམ་འདྲེན་ཟག་པ་མེད་ཞི་བ། །དེ་བཞིན་ཉིད་དབྱིངས་ནས་ནི་བསྟན་པར་མཛད། །ཅེས་སོ། །རྗོད་བྱེད་ཀྱི་ཚིག་ལེའུ་ཉི་ཤུ་རྩ་གཉིས་པོ་འདི་དག་ཀྱང་དེ་བཞིན་ཉིད་ཀྱི་རང་བཞིན་སྒྲོ་འདོགས་དང་སྐུར་པ་ཞི་བ་ཡི་དོན་གྱི་ལྟ་བ་ཟབ་མོ་དང་སྤྱོད་པ་བརླང་པོ་རྣམས་སྣོད་མིན་ལ་གསང་ཞིང་སྣོད་ལྡན་ལ་བསྟན་པའི་རང་བཞིན་ཆོས་ཐམས་ཅད་ཀྱི་སྙིང་པོ་གཞི་ལམ་འབྲས་བུའི་དེ་ཁོ་ན་ཉིད་དེ་ནི། ཀུན་ཏུ་བཟང་པོའི་ཐུགས་ཀྱི་དབྱིངས་རུམ་ངེས་པའི་དབྱིངས་ནས་ཕྱུང་སྟེ་ལྷན་ཅིག་པའི་འཁོར་ལ་སྐལ་ལྡན་གྱི་གདུལ་བྱའི་དོན་དུ་གསུངས་པའོ། །

གཉིས་པ་དེ་འཛིན་པའི་གང་ཟག་དམ་པར་ལུང་བསྟན་པ་ནི། རྒྱུད་འདི་འཛིན་ཅིང་སྟོན་པའི་གང་ཟག་དེ༵་ནི༵་ངེ༵ས་པ༵་ཁོ་ནར༷་གཞན་ལ་སྟོན་པ་རིག་པའི་སྐྱེས་བུ་དང་རང་ཉིད་གྲོལ་བ་སྐྱེ་བ་གཅིག་གིས་མི་ཐོགས་པར་སངས་རྒྱས་སུ་ལུང༵་བསྟན༵་ཏེ༵། དེ་ནི་ང་ཡིན་དབང་ཡང་རྫོགས། །ཞེས་པ་དང་། རྡོ་རྗེ་ལས། ཆོས་ཚུལ་འདི་ལ་གང་སྤྱོད་པ། །དེ་ནི་ཚེ་འདིར་རྫོགས་སངས་རྒྱ། །ཞེས་པ་དང་། རྡོ་རྗེ་མེ་ལོང་ལས། རང་རིག་ཡེ་ཤེས་དོན་སྟོན་ཕྱིར། །རང་སྣང་རིག་པས་མངོན་བྱས་ལ། །རིག་འཛིན་མཆོག་སྟེ་ལྷུན་གྲུབ་པའི། །ཏིང་འཛིན་ནུས་པའི་མཐུ་མེད་ཀྱང་། །ས་སྦྱོང་སེམས་དཔས་བསྐྱོད་དུ་མེད་། །བདེ་གཤེགས་ཉིད་དང་སྤྱོད་ཡུལ་གཅིག །རིག་པའི་སྐྱེས་བུའི་ལུང་ཐོབ་པའོ། །ཞེས་སོ། །དེ་ལྟ་བུའི་གང་ཟག་དེ་ནི་སངས་རྒྱས་ཐམས་ཅད་ཀྱི་སྲས༵་པོ་ནི༵་དམ་པ་ཡིན་ཏེ། ཐུག༵ས་ཀྱི་གསང་བ་རྨད་དུ་བྱུང་བ་འདི་ལྟ་བུ་ལ༵ས་སྐྱེས༵་པ༵་ཡི༵ན་པའི་ཕྱིར། དཔེར་ན་འཁོར་ལོས་སྒྱུར་བའི་བུ་ཐུ་བོ་རྒྱལ་ཚབ་ཏུ་སྐྱེས་པ་བཞིན་ནོ། །དེ་ཉིད་གནས་སྐབས་སུ་སར༵་ཆུད་པ། ས་ལ་གནས་པ། སར་སྨིན་པ་གསུམ་ལ་གནས་ཤིང་། མཐར་ཐུག་འབྲས་བུའི་ས་རབ༵་མཆོག་ཏུ་གྱུར་པ། རྡོ་རྗེ་འཛིན་པའི་ས་ཞེས་བྱ། ཐབས་དང་ཤེས་རབ་མཆོག་གི་ས་ཞེས་བྱ། རིག་པ་འཛིན་པའི་ས་ཞེས་ཀྱང་བྱ། མཐར་ཐུག་པ་དེ་ལ་གནས་པར་འགྱུར་རོ། །དེ་ནི་ང་ཡིན་ཞེས་པ་དང་སྦྱར་ན་ད་ལྟ་ཉིད་ནས་རི༵ག་པ༵་འཛི༵ན་པའི་ས་ལ༵་གན༵ས་པར་བསྟན་ཏེ། འཆད་པའི་སྟོན་པ་ཀུན་བཟང་དངོས་སུ་གསུངས་པའི་ཕྱིར་རོ། །དེའི་ཡོན་ཏན་ཡོངས་སུ་མ་རྫོགས་པར་སྣང་ཡང་དོན་ལ་རྫོགས་པར་ཡོད་དེ། སངས་རྒྱས་ཀྱི་དཀྱིལ་འཁོར་དུ་ཡེ་ནས་སངས་(༣༣༥)རྒྱས་པའི་ཕྱིར་རོ། །དཔེར་ན་མི་དབུལ་པོའི་ས་འོག་གམ་ཁྱིམ་ན་རིན་པོ་ཆེའི་གཏེར་ཡོད་པ་འབྱིན་པའི་རྩོལ་བ་ལ་གནས་པའི་ཚེ། དུས་དེ་ནས་ལོངས་སྤྱོད་མིག་ལམ་མ་གྱུར་པས་དབུལ་པོ་བརྗོད་ཀྱང་གཏེར་ཆེན་དངོས་སུ་དབང་བར་ཐག་ཆོད་པས་འབྱོར་པ་ཅན་ཡིན་པ་བཞིན་དུ། ས༵་ར༵བ་རི༵ག་པ༵་འཛི༵ན་པ༵་རང་ལ༵་གན༵ས་པ་དེ་ཉིད་མངོན་དུ་བྱེད་པའི་རྩོལ་བ་ལ་ཞུགས་པས་ན་ས་རབ་རིག་པ་འཛིན་ལ་གནས་ཞེས་ཀྱང་བཤད་པར་བྱ་སྟེ། འདི་ཁོ་ནར་ངེས་སོ་ཞེས་ཕྱོགས་གཅིག་ཏུ་རྟག་པ་མཐའ་བཟུང་གིས་རྒྱུད་སྡེ་ཆེན་པོ་བཤད་པར་མི་བྱ་སྟེ། རྡོ་རྗེ་ཚིག་བརླིང་ཞིང་གང་དུའང་སྦྱར་དུ་ཡོད་པའི་ཕྱིར་རོ། །

གསུམ་པ་སྐབས་ཀྱི་དོན་བསྡུ་བ་ནི། རྒྱུད་ཀྱི་སྟོན་པས་མཛད་པ་ཆེན་པོའི་བཤད་པ་རྫོགས་ནས་ཇི་ལྟར་བཞུགས་ཚུལ་སྟོན་པ་སྟེ། དེའང་མདོ་དང་རྒྱུད་སྡེ་ཁ་ཅིག་གིས་ནི་བཤད་པ་རྫོགས་ནས་འཁོར་རྣམས་རྗེས་སུ་ཡི་རང་ཞིང་མངོན་པར་བསྟོད་པ་ཙམ་སྟོན་ཞིང་། དེ་ནས་སྤྱོད་ལམ་གཞན་གྱིས་བཞུགས་པར་མངོན་པས་དུས་རེས་འགའ་བར་བསྟན་ལ། ཐབས་ཀྱི་ཞགས་པ་ལས། ཉིད་ཀྱི་ཐུགས་ཀར་ཞུགས་ནས་མི་སྣང་བར་གྱུར་ཏོ། །ཞེས་དཀྱིལ་འཁོར་བསྡུ་བས་མི་སྣང་བར་གསུངས་ཤིང་། དེ་དག་ཏུ་སྟོན་པ། བསྟན་པ། འཁོར། དུས། གནས་རྣམས་རེ་འགའ་བ་དང་། སྟོན་པ་ཉིད་ལས་གཞན་དུ་གྱུར་པས་དམན་པ་དང་། ཆོས་ཀྱང་སྣ་ཚོགས་པ་དང་། གནས་ཀྱང་གདུལ་བྱའི་སྣང་བས་བསྡུས་པ་སྟེ། ཐུན་མོང་དུ་གྱུར་པ་རྣམས་ལས་ཆེས་གསང་ཞིང་ཁྱད་པར་དུ་འཕགས་པར་བསྟན་པའི་ཕྱིར་རྒྱུད་ཀྱི་དོན་དེ་སྐད་ཅེ༵ས་བརྗོ༵ད་པ༵ས་རང་སྣང་འོད་གསལ་དུ་བཀོད་པའི་དེ༵་བཞི༵ན་གཤེ༵གས་པ༵་རིགས་ལྔ་ཏིལ་གྱི་གོང་བུ་ཇི་སྙེད་ཀྱིས་ནམ་མཁའི་དབྱིངས་ཀྱི་མཐའ་དབུས་ཁྱབ་པ་དེ་དག་ཐམ༵ས་ཅད༵་གཉིས་སུ་མི་དམིགས་ཤིང་། ངོ་བོ་དབྱེ༵ར་མེ༵ད་པ༵ར་དགྱེ༵ས་ན༵ས་དུས་གསུམ་འཕོ་འགྱུར་མེད་པའི་ངང་གཞིར་རྫོགས་ལྷུན་གྱིས་གྲུབ་པའི་རང་བཞིན་དུས༵་བཞི༵་ཆོས་ཉིད་ཀྱི་འཁོར་ལོ་མཉ༵མ་པ༵་ཉིད༵་ཀྱི༵་དབྱི༵ངས་མཐའ་དབུས་མེད་པའི་ཞིང་ཁམས། སྣང་ཞིང་བཀོད་པ་ཐམས་ཅད་སྟོན་པ་ཉིད་ཀྱི་སྐུ༵་དང་གསུ༵ང་དང་ཐུག༵ས་མི་ཟད་པ་རྒྱན་གྱི་འཁོར་ལོའི་རང་བཞིན་ལས་ལྷུན༵་སྟུག༵་པོ༵་བཀོ༵ད་པ༵འི་རྒྱན༵་ཉིད༵་དུ༵་སྔོན་ཇི་ལྟ་བར་ཕྱིས་ཀྱང་དེ་བཞིན་ཉིད་དེ། ནམ་མཁའ་བཞིན་དུ་རང་བཞིན་འཕོ་འགྱུར་དང་འཕེལ་འགྲིབ་མེད་པའི་ཚུལ་གྱིས་བཞུག༵ས་སོ༵། །ཞིང་ཁམས་གས༵ང་བའི༵་སྙིང༵་པོ༵་ཡེ་ཤེས་ཀྱི་རང་སྣང་དེ༵་ཁོ༵་ན༵་ཉིད༵་ངེ༵ས་པ༵་ལ༵ས། མཛད་པ་རྫོགས་ནས་དགོངས་པ་ལ་བཞུགས་པས་མཉེས༵་པ༵་དང༵་རྒྱུད་མི་ནུབ་པར་གཏད་པས་འཁོར་གྱིས་ཡོང༵ས་སུ༵་གཟུང༵་བ༵འི་(༣༣༦)ལེ༵འུ༵་སྟེ༵་ཉི༵་ཤུ༵་རྩ༵་གཉི༵ས་པའི་རྣམ་པར་བཤད་པ༵འོ༵།། །།

༈ སྤྱི་དོན་གསུམ་པ་ཡོངས་སུ་རྫོགས་པ་མཇུག་གི་དོན་ལ་གསུམ་ལས། དང་པོ་རྒྱུད་གང་གི་ཁོངས་སུ་གཏོགས་པ་ནི། བརྗོད་བྱ་གཞན་ལས་ཁྱད་པར་དུ་འཕགས་པ་བདེན་པ་དབྱེར་མེད་ཀྱི་དོན་ཡེ་ནས་སངས་རྒྱས་པར་སྟོན་པས་རྗོད་བྱེད་ཚིག་གི་རྒྱུད་ལའང་འཕ༵གས་པ༵་ཞེས་བརྗོད་དོ། །འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་སྒྲུབ་པའི་ཐབས་ཀྱི་རྒྱུད་ཐམས་ཅད་ལ་རྟོག་པ་ཟེར་ལ། འདི་ནི་དེ་དག་ཐམས་ཅད་ཀྱི་མཆོག་ཏུ་གྱུར་པའི་ཕྱིར་རྟོག༵་པའི༵་རྒྱལ༵་པོ༵་རྡོ་རྗེ་སེམས་དཔའ་སྒྱུ༵་འཕྲུལ༵་དྲྭ༵་བ༵འི་རྒྱུད་ཆེན་པོ་ལེ༵འུ༵་སྟོང༵་ཕྲ༵ག་བརྒྱ༵་ཡོད་པ༵་ལ༵ས་དེའི་ཁོངས་སུ་གཏོགས་སོ། །

གཉིས་པ་ལེ་ལག་གང་ཡིན་པ་དེ་ནི། དེའི་ནང་ནས་འདི་ནི་རྒྱུ་མཚན༵་ཉིད༵་ཀྱི་ཐེག་པ་དང༵་འབྲས་བུ་གསང་སྔགས་ཀྱི་རྒྱུད༵་ཐམ༵ས་ཅ༵ད་ཀྱི༵་འཕྲོ་གཞིའམ་འབྱུང་ཁུངས་ཡིན་པས་ལུང༵་གི༵་སྤྱི༵་ཞེས་བྱའོ། །དེ་ཉིད་ཕྱོགས་བཅུ་དུས་བཞིའི་དེ༵་བཞི༵ན་གཤེ༵གས་པ༵་ཐམ༵ས་ཅ༵ད་ཀྱི༵་སྐུ་གསུང་ཐུགས་རྡོ་རྗེའི་གས༵ང་བ༵་ཡིན་ལ། མཆོག་ཏུ་འཕགས་ཤིང་རབ་ཏུ་ཟབ་ལ་རྒྱ་ཆེ་བའི་གནས་སྟོན་པའི་ཕྱིར་གས༵ང་བ༵འི་སྙིང༵་པོ༵་གཞི་ལམ་འབྲས་བུའི་དེ༵་ཁོ༵་ན༵་ཉིད༵་རྣམ་པར་ངེ༵ས་པ༵འི་ལེའུ་ཞེས་བྱ་བ་ཡིན་ཏེ། འདི་ལས༵་ཐེག་པ་བསམ་གྱིས་མི་ཁྱབ་པ་ཐམ༵ས་ཅ༵ད་མ༵་ལུས༵་པ༵ར་འཕྲོས༵་ཏེ༵་བསྟན་པས་ན་ཀུན་གྱི་རྩ་བར་གྱུར་པ་ཡིན་ནོ། །

གསུམ་པ་འབྲས་བུ་མཆོག་ཏུ་བསྟན་པ་ནི། རྒྱལ་བ་རྣམས་ཀྱིས་འགྲོ་བའི་དོན་དུ་སྒྱུ་འཕྲུལ་སྟོང་ཕྲག་བརྒྱ་པ་ལ་སོགས་པ་ཆོས་ཀྱི་འཁོ༵ར་ལོ༵་དཔག་ཏུ་མེད་པ་བསྐོ༵ར་བ༵་དེ༵་དག༵་གི་ནང་ནས་འབྲ༵ས་བུ༵་གསང་སྔགས་བླ་ན་མེད་པའི༷་མཆོ༵ག་རྩ༵་བ༵འི་རྒྱུད༵་ཆེ༵ན་པོ༵་རྫོ༵གས་སོ༵། །ཞེས་ལེགས་པར་གཏན་ལ་ཕབ་ཟིན་ཏོ།། །།

དེ་ལྟར་རྒྱུད་དོན་ཟབ་ཅིང་རྒྱ་ཆེ་འཕགས་བློའི་སྤྱོད་ཡུལ་གངས་ཅན་མཚོ། །མཁའ་ལྟར་རབ་ཞི་རྙོག་པ་ཀུན་བྲལ་གདོད་ནས་འོད་གསལ་འདུས་མ་བྱས། །ཇི་སྙེད་ཇི་བཞིན་གཟིགས་པའི་གསང་ཆེན་ཤིན་ཏུ་རྨད་བྱུང་མཐའ་ཡས་གང་། །རྒྱལ་བའི་ཐུགས་རྗེས་འགྲོ་ལ་སྣང་བྱས་གངས་རིའི་ཁྲོད་འདིར་ཅུང་ཟད་གསལ། །དེ་དོན་མཁས་རྣམས་རིམ་པར་ལེགས་བཤད་གསེར་གྱི་དྲྭ་བས་མཛེས་བྱས་ནའང་། །ཚིག་དོན་བརྒལ་དཀའི་ཆོས་ཚུལ་རྒྱ་མཚོ་ད་དུང་ཅུང་ཟད་ཡོངས་མི་གསལ། །འདི་ནི་ཤིན་ཏུ་རྟོགས་དཀའ་རླབས་ཆེན་གསང་བའི་མཛོད་ཡིན་ཕྱིར། །ཀུན་གྱི་ཡུལ་མིན་མཆོག་གསང་རབ་ནི་རིགས་ལྡན་འགྲོ་བའི་ཐུགས་ལ་གནས། །གང་འདིར་བདག་བློའི་མཚོ་སྐྱེས་ཚལ་དུ་ཚིག་དོན་རྣམ་བཀྲའི་གཟུགས་སྣང་བ། །ཀུན་དགའི་ཆ་ཤས་ཟླ་བའི་གཟུགས་(༣༣༧)བརྙན་དྭངས་པའི་རྫིང་བུར་ཤར་བ་བཞིན། །གསལ་ཞིང་ཡོངས་དག་དཀྱིལ་འཁོར་གང་བས་ཆུ་ནང་ཀུན་ཏུ་མཛེས་པ་ནི། །ལྷ་ཡི་ཐུགས་རྗེ་ཤིན་ཏུ་རྨད་བྱུང་ཆེས་དཀར་རོ་པའི་ཟུང་གིས་བརྒྱན། །ཚུལ་འདི་སྐལ་བཟང་སློབ་མའི་མཆོག་གྱུར་པ། །བློ་བཟང་དགེ་བའི་འབྱུང་གནས་དམ་པ་དང་། །དད་ལྡན་གཏོང་ཕོད་སྲི་ཞུའི་མཆོག་གྱུར་པ། །ཤཱཀྱ་ཡེ་ཤེས་བཟང་པོས་བསྐུལ་བའི་ངོར། །ཇི་བཞིན་དོན་ཉིད་སྤྱོད་པའི་རྣལ་འབྱོར་པས། །རྒྱུད་དོན་ཟབ་མོའི་རང་བཞིན་མངོན་ཕྱུངས་ནས། །གངས་རི་ཐོད་དཀར་རིན་ཅེན་སྙིང་པོའི་མགུལ། །ཨོ་རྒྱན་རྫོང་ཞེས་བྱ་བའི་གནས་སུ་བཀོད། །ཇི་བཞིན་དོན་ཉིད་དེ་ལྟར་ཕྱེ་ཡང་རྒྱུད་དོན་རྡོ་རྗེའི་ཚིག་བརླིང་བས། །འགལ་འཁྲུལ་ནོར་བའི་རང་བཞིན་མཆིས་སྲིད་འཕགས་པའི་གོ་འཕང་མ་ཐོབ་ཕྱིར། །རྒྱལ་དང་རྒྱལ་སྲས་བླ་མའི་ཚོགས་དང་བློ་མཆོག་མངའ་བ་ཇི་སྙེད་དང་། །ཡེ་ཤེས་ལས་གྲུབ་མཁའ་འགྲོའི་སྤྲིན་ཕུང་དམ་ཅན་རྒྱ་མཚོས་བཟོད་པར་མཛོད། །སྔོན་རབས་སྐྱེ་བར་ཀྃ་རུའི་ཤར་ཕྱོགས་བྷེ་ལ་ཧེ་ཏའི་ནགས་ཁྲོད་དུ། །མཧཱ་མི་ཏྲ་པདྨའི་རྗེས་སློབ་ཕྱི་ནང་གྲུབ་པའི་དོན་ཀུན་ཤེས། །དེ་ལས་འདིར་འོངས་མདོ་རྒྱུད་གསལ་བའི་བློ་གྲོས་དམ་པ་ངང་གིས་གྲུབ། །ཟབ་དོན་སྙིང་པོའི་བདུད་རྩིས་རབ་བརླན་ངེས་གསང་སྙིང་པོའི་ཚུལ་འདིར་མོས། །ད་ནི་རྒྱལ་བའི་བསྟན་པ་རིན་ཆེན་གཏེར། །ཕན་བདེའི་འོད་སྟོང་མངའ་བའང་ནུབ་ཏུ་ཉེ། །ལེགས་ལྡན་འགྲོ་བའི་མིག་ཀྱང་ཕལ་ཆེར་ཟུམ། །གང་ནའང་ཆོས་ཚུལ་འདི་འདྲ་དཀོན་པས་ན། །ཐོས་བསམ་སྙིང་པོའི་དོན་ལ་ནན་ཏན་བསྐྱེད། །ནམ་ཡང་མི་རྟག་སྐྱེས་བུའི་ཚེ་འགྲོ་སྟེ། །ཝུ་བ་བརྡོལ་འདྲ་སོ་སོར་འཇིག་གྱུར་ཅིང་། །སྲིད་པའི་བདེ་སྡུག་འཁོར་མོར་འཁྱམས་པ་ན། །འཁོར་བའི་གྲོང་ལས་ཞི་བདེའི་ནགས་ཁྲོད་དུ། །རང་བཞིན་འདའ་བས་བརྩོན་པའི་གོ་བགོས་ཤོག །དེ་བས་རབ་ཏུ་ཐར་པའི་ལམ་ཞུགས་ཏེ། །དེ་རིང་ཉིད་ནས་སྲིད་ལ་སྐྱོ་བ་ཡིས། །དོ་མོད་ཙམ་ཡང་གནས་པའི་མཐུ་མེད་ཅེས། །ད་ལྟ་ཉིད་ནས་ངེས་པར་བསམ་འཚལ་ལོ། །མཛོད་ལྡན་རྣམས་ཀྱི་ཡེ་ཤེས་གང་ཅན་མཚོ། །མཚོ་གཏེར་ཟབ་མོ་ཤིན་ཏུ་རྨད་བྱུང་དྭངས། །དྭངས་པའི་འོད་ཀྱིས་ཡོན་ཏན་ཕུན་ཚོགས་ཀུན། །ཀུན་ནས་བརྩོན་པས་ལེགས་གྲུབ་འབད་པར་མཛོད། །དུས་རྣམས་ཀུན་ཏུ་དུས་གསུམ་རྒྱལ་བའི་མཛད་པ་ཅན། །བླ་ན་མེད་པའི་བླ་མ་དམ་པ་མཉེས་བྱ་ཞིང་། །དམ་ལས་མི་འདའ་དམ་ཚིག་སྡོམ་པ་ཚུལ་བཞིན་བསྲུང་། །ལྷག་བསམ་རྣམ་དག་ལྷག་པའི་ཏིང་འཛིན་ཟབ་མོ་བསྒོམ། །དེ་ལྟར་ལེགས་གསུངས་ཞི་བའི་ཆོས་ཚུལ་ཚངས་པའི་རྔ་སྒྲ་སྙན་པོ་ཡིས། །མ་རིག་གཉིད་མྱོས་འཇིག་རྟེན་གསུམ་རྣམས་སྐད་ཅིག་དེ་ལས་རབ་སད་དེ། །ཡེ་ཤེས་དམ་པའི་གོ་(༣༣༨)འཕང་ལ་གནས་གདོད་མའི་གཞི་ལ་མཐར་ཕྱིན་ནས། །ཆོས་སྐུའི་མཁའ་དབྱིངས་དྲི་མ་མེད་ལ་གཟུགས་སྐུའི་དཀྱིལ་འཁོར་སྣང་བར་ཤོག །ཕྱི་ནང་སྣོད་བཅུད་རིགས་ལྔའི་ཞིང་དུ་མ་ལུས་རང་བཞིན་རྣམ་དག་ཅིང་། །ཉོན་མོངས་ཡེ་ཤེས་དྲི་མ་མེད་ལ་དྲན་རིགས་ཐུགས་ཀྱི་དཀྱིལ་འཁོར་མཆོག །ཡེ་ནས་ཡིན་ལ་དེ་ལྟར་གསལ་བའི་གློ་བུར་སྒྲིབ་གཉིས་རྣམ་དག་ཅིང་། །གང་ནའང་སྲིད་ཅེས་མིང་ཙམ་མེད་ལ་ཐམས་ཅད་ཀུན་བཟང་ཉིད་གྱུར་ཅིག །ཕྱོགས་བཅུ་དུས་བཞིའི་རང་བཞིན་གཉིས་མེད་དཔལ་ལྡན་དགའ་བའི་སྐྱེད་མོས་ཚལ། །གདོད་ནས་མངོན་པར་བྱང་ཆུབ་ཚུལ་འདི་གསལ་བར་བཀོད་པའི་ལེགས་བྱས་དེས། །འགྲོ་བས་རང་བཞིན་འབད་པ་མེད་པར་ཞི་བའི་དབྱིངས་སུ་ལེགས་གཞོལ་ཏེ། །སྐུ་དང་ཡེ་ཤེས་འདུ་འབྲལ་མེད་པས་སངས་རྒྱས་པདྨ་འཛུམ་པར་ཤོག །དཔལ་ལྡན་ཡོན་ཏན་སྤྲིན་གྱི་བཞོན་པའི་བླ་རེ་ཤིན་ཏུ་གསལ་བ་ཅན། །མཛད་པའི་རྣམ་འགྲོས་ནམ་མཁའི་འཁོར་ཁྱབ་ཕན་བདེའི་ཆར་གྱི་ཚོགས་མང་བ། །ལེགས་གསུང་རང་བཞིན་གསང་བའི་སྙིང་པོ་རྒྱ་ཆེར་བཤད་པའི་བསོད་ནམས་དེས། །ནམ་མཁའི་མཐའ་ཀླས་སྐྱེ་རྒུ་ཡོངས་ཀྱི་ཀུན་ཏུ་བཟང་པོའི་གནས་ཐོབ་ཤོག །ལས་དང་ཉོན་མོངས་སྲིད་པའི་མཚོ་ལས་བརྒལ་བར་ཤོག །ས་དང་ལམ་དང་གཟུངས་དང་ཏིང་འཛིན་འགྲུབ་པར་ཤོག །གནས་སྐབས་མཐར་ཐུག་རེ་བ་ཐམས་ཅད་རྫོགས་པར་ཤོག །དག་པའི་ཞིང་རྣམས་རྒྱལ་བའི་ཡོངས་གང་མཐོང་བར་ཤོག །བགེགས་དང་སྲིན་པོ་མཁའ་འགྲོའི་གདོན་གྱི་ཚོགས་ཞི་ཞིང་། །ཚེ་དང་དཔལ་དང་སྐལ་བ་བཟང་པོས་ལེགས་འབྱོར་ཏེ། །ཞི་དང་རྒྱས་དང་དབང་དང་མངོན་སྤྱོད་འགྲུབ་པ་ཡིས། །འགྲོ་བའི་དོན་གཉིས་རིན་ཅེན་མཆོག་ལེགས་འབྱུང་བར་ཤོག །ཆོས་ཚུལ་འདི་ཡང་ཇི་སྲིད་ནམ་མཁའ་གནས་ཀྱི་བར། །འགྲོ་བའི་དོན་དུ་དེ་སྲིད་གནས་པའི་དོན་བྱེད་ཅིང་། །ཉི་ཟླའི་མཆོག་དང་ནོར་བུ་དཔག་བསམ་བུམ་མཆོག་བཞིན། །ལྷུན་གྱིས་གྲུབ་པའི་མཛད་པ་ཆེན་པོས་ཕྱོགས་རྣམས་ཀུན་ཏུ་ཁྱབ་པར་ཤོག །གངྒཱའི་ཆུ་བོ་རྒྱུན་རིང་ཇི་བཞིན་འདིས་ཀྱང་གཞན་ཕན་རྒྱུན་རིང་ཞིང་། །འོད་ལྡན་རྣམས་ཀྱི་བདུད་རྩིའི་མཆོག་བཞིན་ཉོན་མོངས་གདུང་བ་སེལ་བ་དང་། །ཡིད་བཞིན་རིན་ཅེན་སྤྲིན་གྱི་ཚོགས་བཞིན་འདོད་དགུའི་རེ་བ་རྣམས་སྐོང་ཞིང་། །ས་ཆེན་གླིང་བཞི་སྣང་བྱེད་མཆོག་བཞིན་ཡིད་མཁའི་མུན་པ་སེལ་བར་ཤོག །ཆོས་ཚུལ་སྟོན་ཀའི་རི་བོང་འཛིན་གཟུགས་ལེགས་བཤད་རྒྱུ་སྐར་ཕྲེང་བ་ཅན། །དོན་རྣམས་གསལ་བའི་འོད་དཀར་གྱིས་མཛེས་བློ་གསལ་ཀུནྡའི་ཁ་འབྱེད་པ། །ཉེས་པའི་ཆ་ཤས་སྒྲིབ་པ་མེད་ཅན་མ་རིག་མུན་(༣༣༩)པ་སེལ་བའི་དཔལ། །བློ་གྲོས་རྟ་ལྔའི་བཞོན་པས་རབ་བསྐྱོད་སྐལ་ལྡན་འགྲོ་བའི་སྣང་བྱེད་ཡིན། །གང་རྣམས་ཕྱི་ནང་དོན་རྣམས་ཤེས་འདོད་གཞུང་ལུགས་རྒྱ་མཚོར་གནས་བཅས་ཏེ། །ཇི་བཞིན་དོན་ཉིད་རྣམ་དཔྱོད་མིག་གིས་དེ་བཞིན་ལེགས་པར་བལྟ་འདོད་པ། །དེ་དག་གིས་ཀྱང་ཚུལ་འདི་མཐོང་ན་དགའ་བའི་བློ་གྲོས་ཆེར་འཕེལ་ཅིང་། །གྲགས་དང་མ་གྲགས་ཚིག་དོན་རྣམ་བཀྲའི་ཚུལ་ལ་ཤིན་ཏུ་མཁས་པར་འགྱུར། །རྒྱུད་དོན་རྒྱ་མཚོའི་ཕ་རོལ་བརྒལ་འདོད་པས། །ལེགས་བཤད་རིན་ཅེན་གྲུ་བོ་འདིར་ཞུགས་ཏེ། །དོན་ཟབ་བ་དན་ཕྱོགས་ཡངས་བརྐྱང་བྱས་ནས། །ཚིག་དོན་ཇི་བཞིན་དོན་གཉིས་བླང་བར་རིགས། །འདིར་ནི་རྒྱུད་དོན་འོ་མའི་ཆུ་གཏེར་མཆོག །བདག་བློའི་རྣམ་དཔྱོད་བཟང་པོས་ལེགས་བསྲུབས་ཏེ། །སྙིང་པོའི་རང་བཞིན་བཅུད་དུ་རབ་བསྡུས་ནས། །ཕྱི་རབས་འགྲོ་བ་རྣམས་ལ་སྣང་བར་བྱས། །ཕྱོགས་ཙམ་མ་ཡིན་དོན་ཀུན་གསལ་བ་ཡིན། །གྲགས་ཕྱིར་མ་ཡིན་གཞན་ཕན་བརྩེ་བ་ཡིན། །རྙེད་ཕྱིར་མ་ཡིན་ཆོས་དོན་མཐོང་ཕྱིན་ཡིན། །ཉེས་བཤད་མ་ཡིན་ལེགས་བཤད་རྒྱ་མཚོ་ཡིན། །ཡེ་ཤེས་རྣམ་བཀྲ་ནོར་བུའི་ཁང་བཟང་དབང་པོའི་གཞི་དང་དུས་མཚན་དང་། །ཉི་མ་རྣམ་བཀྲ་དཀར་བའི་མཆོག་དང་ཟླ་ཟེར་བདུད་རྩིའི་སྐྱེད་མོས་ཚལ། །གཞི་ལམ་འབྲས་བུའི་དེ་ཉིད་ལེགས་མཚོན་མཆོག་གསང་རྫོགས་པ་ཆེན་པོའི་དོན། །མ་ལུས་རང་བཞིན་གཅིག་ཏུ་བསྟན་པ་གསང་བའི་སྙིང་པོ་དམ་པ་ཡིན། །འོད་ལྡན་རྣམས་ཀྱི་སྙིང་པོ་ལ་རེག་པདྨའི་དྲྭ་བས་ཆེར་མཛེས་ཤིང་། །བདུད་རྩིའི་ལྷ་དང་མིའམ་ཅིས་མཆོད་ཤིན་ཏུ་གསང་བའི་མཛོད་མངའ་བ། །རྒྱལ་བའི་ཡུམ་གྱུར་ཀུན་གྱི་འབྲས་བུ་གསང་བའི་སྙིང་པོར་འགྲོ་བའི་ལམ། །དེ་ཉིད་ལེགས་གསུངས་རྒྱ་ཆེའི་ཚུལ་ལ་ཆེན་པོ་རྣམས་ཀྱིས་མཆོག་ཏུ་བསྔགས། །ལམ་འདིར་ཞུགས་རྣམས་ཀུན་ལས་མཆོག་གྱུར་ས་རབ་རིག་པ་འཛིན་ལ་གནས། །ལྷ་མིའི་འཇིག་རྟེན་མཆོག་གི་གཙོ་དང་དྲང་སྲོང་གྲུབ་པས་ཕྱག་བྱས་ཤིང་། །དོན་གཉིས་འབྲས་བུ་ཚེ་འདིར་འབྱོར་པས་ཞིང་གི་དམ་པ་རྒྱ་ཆེ་བ། །དེ་ཕྱིར་དེ་དག་འབྱུང་བའི་མཛོད་ནི་རྣམ་བཤད་རྒྱ་མཚོ་འདི་ཡིན་པས། །ཐར་འདོད་རྣམས་ཀྱིས་ཆོས་ཚུལ་མཆོག་འདི་གཙུག་གི་རྒྱན་དུ་གུས་པས་གཟུང་། །དགེ་ལེགས་ཡིད་བཞིན་སྟོན་ཀའི་སྤྲིན་ནི་འཇིག་པའི་སྣང་བ་རྒྱ་ཆེ་བ། །འོད་ཟེར་སྣ་ཚོགས་ཀུན་ནས་འཁྲུག་ཅིང་ཞིང་རྣམས་བྱེ་བ་གསལ་བར་བྱེད། །མ་ལུས་དེ་དག་ལམ་ལྡན་འདིར་བརྟེན་ལེགས་པའི་འབྲས་བུ་མཆོག་འགྲུབ་སྟེ། །ཕྱོགས་བཅུའི་མགོན་པོས་རབ་ཏུ་དགོངས་ཤིང་ཀུན་ནས་བསྔགས་པར་མཛད་པ་ཡིན། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ། སྒྱུ་འཕྲུལ་དྲྭ་བའི་རྣམ་བཤད་ཉི་ཟླའི་སྤྲིན་གྱི་སྣང་བ་ཆེན་པོས་ཕྱོགས་བཅུའི་མུན་པ་ཐམས་ཅད་ངེས་པར་སེལ་བ་ཞེས་བྱ་བ། སྔགས་(༣༤༠)དང་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ལ་མང་དུ་ཐོས་ཤིང་ལེགས་པར་སྦྱངས་པའི་མེ་ཏོག་རྒྱུན་ཆགས་པས་བློའི་པད་མཚོ་གང་བར་བྱས་པའི་རང་བཞིན། ཐེག་པ་མཆོག་གི་རྣལ་འབྱོར་པ་རྡོ་རྗེ་གཟི་བརྗིད་ཀྱིས་སྔོན་གྱི་འགྲེལ་ཆེན་དུ་མ་དང་། བླ་མ་རྣམས་ཀྱི་ལེགས་བཤད་མངོན་པར་སྣང་བའི་ཚོགས་དང་། རྒྱུད་ལུང་མན་ངག་དུ་མའི་སྙིང་པོ་བསྡུས་ཏེ་གཞན་ལ་ཕན་པའི་བློས་ཤིན་ཏུ་གསལ་བར་ཕྱེ་ནས། འབྲུག་གི་ལོ་སྟོན་ཟླ་ར་བའི་ཚེས་བཅོ་ལྔ་བཀྲ་ཤིས་ཀྱི་ཉི་མ་ཤར་བ་ལ་གངས་རི་ཐོད་དཀར་གྱི་མགུལ་དུ་ལེགས་པར་སྦྱར་བ་འདི་ཡོངས་སུ་རྫོགས་སོ།། །།