གསུམ་པ་འདིར་ནི་གོང་མའི་ཚིག་རེ་རེ་ལ་ཡང་ངོ་བོ་ཉིད་མེད་པ་ཉིད་ཅེས་བརྗོད་པ།
གསུམ་པ་འདིར་ནི་གོང་མའི་ཚིག་རེ་རེ་ལ་ཡང་ངོ་བོ་ཉིད་མེད་པ་ཉིད་ཅེས་བརྗོད་པར་བྱ་སྟེ།
ངོ་བོ་ཉིད་མེད་པ་ཉིད་གང་ཡིན་པ་དེ་ནི་ངོ་བོ་ཉིད་མེད་པ་ཉིད་རྣམ་པ་གསུམ་ཡིན་ཏེ། སྔར་བཤད་པ་བཞིན་ནོ། །འདི་ལྟར་ངོ་བོ་ཉིད་མེད་པ་ཉིད་རྣམ་པ་གསུམ་གང་ཡིན་པ་དེ་ཉིད་ནི་ངོ་བོ་ཉིད་རྣམ་པ་གསུམ་ཡིན་པས་རིགས་པ་དེས་ན་ངོ་བོ་ཉིད་མེད་པ་ཉིད་ཀྱིས་ནི་ངོ་བོ་ཉིད་ཡོད་པ་དང་ངོ་བོ་ཉིད་མེད་པ་ཉིད་རབ་ཏུ་སྟོན་པས་ན་དེའི་ཕྱིར་འདི་ལྟར་རབ་ཏུ་ཕྱེ་བའི་རྣམ་པས་ཡང་དག་པའི་ཆོས་ཀྱི་འཁོར་ལོ་བསྐོར་བ་ཞེས་གསུངས་པ་ཡིན་ནོ། །འདི་ནི་ཤིན་ཏུ་ངོ་མཚར་རྨད་དུ་བྱུང་བ་ལགས་པས་དེང་འདིར་བཅོམ་ལྡན་འདས་ཀྱིས་ཡོངས་སུ་བསྐོར་བའི་ཆོས་ཀྱི་འཁོར་ལོ་འདི་ནི་བླ་ན་མ་མཆིས་པ་སྐབས་མ་མཆིས་པ་ངེས་པའི་དོན་ལགས་ཏེ། རྩོད་པ་རྣམས་ཀྱི་གཞིའི་གནས་སུ་གྱུར་པ་མ་ལགས་སོ་ཞེས་བྱ་བ་ནི་གཉིས་པ་ངེས་པའི་དོན་གྱི་མཚན་ཉིད་རབ་ཏུ་བསྟན་པའོ། །ཆོས་ཀྱི་འཁོར་ལོ་བསྐོར་བ་དེ་མཆོག་ཏུ་རྨད་དུ་བྱུང་ཞིང་དེ་ལས་ལྷག་པའི་མཆོག་གཞན་མེད་པའི་ཕྱིར་བླ་ན་མེད་པ་ཞེས་བྱའོ། །ཕྱིས་མཆོག་ཏུ་འགྱུར་བའི་སྐབས་མེད་ཅིང་ཕྱིས་གཞིག་པའི་སྐབས་མེད་པའི་ཕྱིར་སྐབས་མེད་པ་ཞེས་བྱའོ། །ཡོད་པ་དང་མེད་པ་ཡོངས་སུ་རྫོགས་པར་བསྟན་པའི་ཕྱིར་ངེས་པའི་དོན་ཡིན་ཞིང་རྩོད་པར་སྨྲ་བ་རྣམས་ཀྱི་གཞིའི་གནས་མ་ཡིན་པའོ། །ཞེས་གསུངས་སོ། །ཡང་བཤད་པའི་རྣམ་གྲངས་ཀྱི་དབང་དུ་བྱས་ན་ངོ་མཚར་རྨད་དུ་བྱུང་བའི་དོན་འཁོར་ལོ་དང་པོ་སོགས་ནི། ངོ་མཚར་རྨད་དུ་བྱུང་བ་ཡིན་ཏེ། སྔོན་ཆད་དེ་འདྲ་མ་མཐོང་བས་ངོ་མཚར་བ་དང༌། དེ་འདྲ་མ་ཐོས་པས་རྨད་དུ་བྱུང་བ་ཡིན་པའི་ཕྱིར།ཡང་ན་བརྒྱད་སྟོང་འགྲེལ་ཆེན་ལྟར་ན་རྒྱུ་ཚོགས་གཉིས་དང་མཁྱེན་བརྩེ་ནུས་པ་མཐར་ཕྱིན་པ་ལས་བྱུང་བ་ཡིན་པས་ན་ངོ་མཚར་བ་དང༌། ཆོས་འཁོར་གྱི་བྱེད་ལས་ལ་བརྟེན་ནས་གདུལ་བྱ་རྣམས་རང་རང་གི་སྐལ་བ་བཞིན་དུ་རྣམ་གྲོལ་གསུམ་ལ་བཀོད་ནས་དེ་ལས་ལྷག་པར་བྱར་མེད་པས་ན་རྨད་དུ་བྱུང་བ་ཡིན་ཏེ། བརྒྱད་སྟོང་འགྲེལ་ཆེན་ལས། རྒྱུ་ཁྱད་པར་དུ་འཕགས་པས་ངོ་མཚར་རོ། །འབྲས་བུ་ཕུལ་དུ་བྱུང་བ་རྨད་དུ་བྱུང་བའོ། །ཞེས་སོ། །ཡང་ན་ཀུན་རྫོབ་བདེན་པ་བསྟན་པས་ངོ་མཚར་བ་དང༌། དོན་དམ་བདེན་པ་བསྟན་པས་རྨད་དུ་བྱུང་བ་ཡིན་ཏེ། སྒྲོན་གསལ་ལས། ངོ་མཚར་དུ་གྱུར་པ་ནི་ཀུན་རྫོབ་བདེན་པས་སོ། །རྨད་དུ་གྱུར་པ་ནི་དོན་དམ་པའི་བདེན་པས་སོ། །ཞེས་གསུངས་སོ། །འགྲེལ་ཆེན་དེར་སྐབས་དུ་མར་འཁོར་ལོ་གསུམ་སངས་རྒྱས་ཀྱི་སྐུ་ཚེའི་དུས་ཐོག་མཐའ་ལ་སྦྱར་མོད་རང་ལུགས་ལ་གོང་དུ་བཤད་པ་ལྟར་འཁོར་ལོ་གསུམ་སངས་རྒྱས་སངས་རྒྱས་པའི་རྗེས་ཀྱི་དུས་ཐོག་མཐའ་ནི་མ་ཡིན་ཏེ། ཚུལ་གཉིས་རྣམ་འབྱེད་ལས། གཞན་སྟོང་སྨྲ་བ་རྣམས་ནི། འཁོར་ལོ་རིམ་པ་གསུམ་པོ་འདི་ཡང་དུས་ཐོག་མཐའ་ནི་མ་ཡིན་ཏེ། འཁོར་ལོ་ཐ་མའི་མདོ་ཕལ་པོ་ཆེའི་ལེའུ་ཤས་ཆེ་བ་ཞིག་བདེན་བཞིའི་ཆོས་འཁོར་མ་བསྐོར་བའི་སྔོན་རྡོ་རྗེ་གདན་དུ་སངས་རྒྱས་མ་ཐག་ཏུ་ལྷའི་རྒྱལ་པོ་དབང་སྒྱུར་གྱི་གནས་སུ་གསུངས་པ་ཡང་ཡོད་ལ། མདོ་སྡེ་མྱང་འདས་ལྟ་བུ་མྱ་ངན་ལས་འདའ་ཁར་གསུངས་པ་ཡང་ཡོད། དེ་བཞིན་དུ་མི་རྟག་པ་ཉིད་ཀྱི་མདོ་ལ་སོགས་པ་འཁོར་ལོ་དང་པོའི་མདོ་ལ་ལ་མྱ་ངན་ལས་འདའ་ཁར་གསུངས་པ་ཡང་ཡོད་པས་སོ། །དེས་ན་འདི་ནི་བརྗོད་བྱའི་དོན་གྱི་གོ་རིམ་མམ། གདུལ་བྱའི་རྒྱུད་སྦྱོང་ཚུལ་གྱི་རིམ་པ་གསུམ་ཡིན་པས་དེ་ལྟ་བུའི་རིམ་པ་ཐ་མ་ཡིན་པའི་ཕྱིར། འཁོར་ལོ་ཐ་མ་ངེས་དོན་དུ་གྲུབ་སྟེ། བརྗོད་བྱའི་དོན་གྱི་མཐར་ཐུག་དྲང་དོན་ཡིན་པ་མི་རུང་ཞིང༌། གདུལ་བྱ་ངེས་དོན་ལ་ཁྲིད་ཟིན་པའི་འོག་ཏུ་སླར་ཡང་དྲང་དོན་ལ་ཁྲིད་པ་མི་རུང་བའི་ཕྱིར། ཞེས་དང༌། ཞིང་སྟོན་པའི་རྒྱུད་བླ་མའི་འགྲེལ་བ་ལས། འཁོར་ལོ་བར་བ་དང་ཐ་མ་གཉིས་ཀ་བརྗོད་བྱ་འདྲ་བས་བརྗོད་བྱའི་སྒོ་ནས་དྲང་དོན་དུ་མི་སྟོན་གྱི། ལེགས་པར་རྣམ་པར་ཕྱེ་བ་མ་ཡིན་པས་བརྗོད་ཚུལ་གྱི་དྲང་དོན་དུ་གསུངས་པར་གོ་བར་བྱའོ། །ཞེས་གསུངས་སོ། །འཁོར་ལོ་བར་བ་ལས་གསུངས་པའི་དེ་བཞིན་ཉིད་མེད་དགག་སྟོང་རྐྱང་ཙམ་མ་ཡིན་ཏེ། བཀའ་བསྡུ་བཞི་བ་ལས། ཆོས་འཁོར་གཉིས་པའི་གསུངས་པའི་དེ་བཞིན་ཉིད། །ཡོན་ཏན་དཔག་ཡས་ཚང་བ་ཡིན་པའི་ཕྱིར། །མེད་དགག་མ་ཡིན་དེ་ཕྱིར་རང་སྟོང་དང༌། །ཅང་མེད་སྟོང་བ་ཆད་པའི་སྟོང་བ་མིན། །རྣམ་ཀུན་མཆོག་ལྡན་སྟོང་གཞི་ཡིན་ཕྱིར་དང༌། །ཞེས་གསུངས་སོ། །ཐེག་པ་མཐའ་དག་ལ་ཞུགས་ཞེས་པའི་དོན་རྒྱ་ནག་འགྲེལ་ཆེན་སོགས་སུ་འཁོར་ལོ་ཐ་མའི་གདུལ་བྱ་ལ་ཐེག་པ་གསུམ་ལ་གནས་པའི་གང་ཟག་ཡོད་པ་ལྟ་བུར་གསུངས་མོད་རང་ལུགས་ལ་ཐེག་པ་ཐམས་ཅད་ཀྱི་རྗོད་བྱེད་ཚིག་གི་ཐེག་པའམ་འཁོར་ལོ་དང་པོ་གཉིས་ཀྱིས་རྒྱུད་སྦྱངས་ཟིན་པའི་གདུལ་བྱ་ལ་བྱེད་དགོས་ཏེ། ཚུལ་གཉིས་རྣམ་འབྱེད་ལས། དེས་ན་ཐེག་པ་མཐའ་དག་ལ་ཡང་དག་པར་ཞུགས་པའི་དོན་ཐེག་པ་མཐའ་དག་ལ་ཞུགས་པས་རྒྱུད་སྦྱངས་ཟིན་པའི་ཕྱིར། བྱང་ཆུབ་སེམས་དཔའ་དབང་རྣོན་གདུལ་བྱ་ཤིན་ཏུ་སྨིན་པ་རྣམས་ལ་གསུངས་པ་ཡིན་པའི་ཕྱིར་འདི་ཉིད་ངེས་དོན་དུ་གྲུབ། ཅེས་གསུངས་སོ། །བཤད་ཚུལ་གཞན་ཡང་ཐུབ་བསྟན་དགེ་ལེགས་རྒྱ་མཚོའི་ཆོས་འཁོར་ཐོར་བུ་ལས། སྐབས་འདིའི་ཐེག་པ་གསུམ་ནི་འདིར་བསྟན་འཁོར་ལོ་གསུམ་དེ་ཡིན་ཞིང༌། འཁོར་ལོ་ཐ་མའི་གདུལ་བྱ་དེས་འདིར་བསྟན་འཁོར་ལོ་ཐ་མ་ལ་བརྟེན་ནས་འཁོར་ལོ་དང་པོའི་དགོངས་དོན་གང་ཟག་གི་བདག་མེད་དང༌། བར་བའི་དགོངས་དོན་ཆོས་ཀྱི་བདག་མེད་དང༌། ཐ་མའི་དགོངས་དོན་ཆོས་ཀྱི་བདག་མེད་དང༌། འཁོར་ལོ་དང་པོ་གཉིས་དྲང་དོན་ཡིན་པ་དང༌། ཐ་མ་ངེས་དོན་ཡིན་པ་སོགས་རྟོགས་ནུས་ལ། དེ་ལྟར་རྟོགས་པ་དེ་འདིར་ཐེག་པ་ཐམས་ཅད་ལ་ཞུགས་པའི་དོན་ཡིན་པའི་ཕྱིར་ཏེ། དགོངས་འགྲེལ་ནི་འཁོར་ལོ་བར་བའི་དགོངས་པ་གཙོ་བོར་འགྲེལ་བྱེད་དང༌། དང་པོའི་དགོངས་པ་ཞར་བྱུང་དུ་འགྲེལ་བའི་མདོ་ཡིན་པའི་ཕྱིར། ཞེས་གསུངས་སོ། །རྒྱ་ནག་འགྲེལ་ཆེན་ལས། གཞན་ཡང་སློབ་དཔོན་ཡང་དག་བདེན་པའི་བརྗེད་བྱང་ལས་ཀྱང་དེ་སྐད་དུ་འབྱུང་བས་དེའི་ཕྱིར་ཚིག་ངེས་པར་འགྲེལ་བའི་མདོ་ལས། དང་པོ་ནི་ཉན་ཐོས་ཀྱི་གང་ཟག་གི་ཆེད་དུའོ། །གཉིས་པ་ནི་ཐེག་པ་ཆེན་པོའི་གང་ཟག་གི་ཆེད་དུའོ། །གསུམ་པ་ནི་ཐེག་པ་གསུམ་གྱི་གང་ཟག་གི་ཆེད་དུའོ་ཞེས་བསྟན་པ་ཡིན་ནོ། །ཞེས་གསུངས་པའི་དོན་ཡང་འཁོར་ལོ་ཐ་མའི་ཆེད་དུ་བྱ་བའི་གདུལ་བྱ་ལ་ཉན་ཐོས་ཀྱི་ཐེག་པ་ལ་གནས་པ་མེད་མོད་གདུལ་བྱ་ཙམ་ཡོད་པ་ལ་བཤད་ཚུལ་ཞིག་ཡོད་སྙམ་མོ། །འཁོར་ལོ་དང་པོས་སྟོང་ཉིད་སྦས་པ་དང༌། བར་བས་དོན་དམ་བདེན་པ་གནས་ལུགས་སུ་གྲུབ་པའམ་བདེན་པ་ཡིན་པ་སྦས་ནས་གསུངས་ཏེ། རྒྱ་ནག་འགྲེལ་ཆེན་ལས། ཆོས་ཀྱི་འཁོར་ལོ་དང་པོ་ནི་སྟོང་པ་ཉིད་མཁྱུད་ནས་ཡོད་པ་ཉིད་དུ་སྟོན་པ་དང༌། ཆོས་ཀྱི་འཁོར་ལོ་གཉིས་པ་ནི་ཡོད་པ་མཁྱུད་ནས་སྟོང་པ་ཉིད་དུ་སྟོན་པ་ཡིན་ལ་ཆོས་ཀྱི་འཁོར་ལོ་གསུམ་པ་ནི་སྟོང་པ་དང་ཡོད་པའི་རིགས་པ་ཡོངས་སུ་རྫོགས་པར་སྟོན་པའི་ཕྱིར་ངེས་པའི་དོན་ཞེས་བསྟན་གྱི། ཞེས་གསུངས་སོ། ། འཁོར་ལོ་གསུམ་གའི་བསྟན་ཚུལ་དང་གོ་རིམ་ཐུན་མོང་དུ་ཅུང་ཟད་བརྗོད་ན། བླང་དོར་རབ་གསལ་རྩ་འགྲེལ་ལས། ཐུན་མོང་དུ་བསྟན་པ་ནི། འཁོར་ལོ་གསུམ་ལས་དང་པོར་ཉན་ཐོས་ཀྱི། །གྲུབ་མཐའ་གཙོ་བོར་སྟོན་ཅིང་ཕྱི་མ་གཉིས། སེམས་ཙམ་དབུ་མ་གཉིས་ཀ་སྟོན་པ་ལ། བར་བས་སྣང་མེད་དབུ་མ་གཙོ་བོར་སྟོན། །བཅོམ་ལྡན་འདས་ཀྱིས་ཆོས་ཀྱི་འཁོར་ལོ་རིམ་པ་གསུམ་བསྐོར་བའི་དང་པོར་སྔར་བསྟན་པ་ལྟར་ཉན་ཐོས་སྡེ་གཉིས་ཀྱི་གྲུབ་མཐའ་གཙོ་བོར་སྟོན་ཅིང༌། བར་པ་དང་ཐ་མ་གཉིས་ཀྱིས་གནས་སྐབས་སེམས་ཙམ་དང་མཐར་ཐུག་དབུ་མ་གཉིས་ཀ་སྟོན་པ་ལ། བར་བར་ཀུན་རྫོབ་ཀྱི་ཆོས་ཐམས་ཅད་བརྟགས་ན་བདེན་པར་མེད་པ་ལ་དགོངས་ནས་མེད་ཅིང་མི་དམིགས་པ་དང་རྨི་ལམ་སྒྱུ་མ་ལྟ་བུ་གཙོ་བོ་སྟོན་ཅིང༌།ཕྱི་མར་སྟོང་ཉིད་ཟབ་མོ་ངེས་པའི་དོན། །ཆོས་ཅན་དོན་ལ་མེད་ཅིང་མི་སྣང་ཡང༌། །ཆོས་ཉིད་སོ་སོ་རང་རིག་ཡེ་ཤེས་ལ། །སྣང་བཅས་དབུ་མ་ཆེན་པོ་གསལ་བར་སྟོན། །ཆོས་ཅན་ཀུན་རྫོབ་གཟུང་འཛིན་གྱི་ཆ་ཐམས་ཅད་མེད་ཅིང་མི་སྣང་ཡང༌། ཆོས་ཉིད་དོན་དམ་སོ་སོ་རང་རིག་ལ་སྣང་བ་དང་བཅས་པ་གསལ་བར་སྟོན་པ་སྟེ། རྒྱན་ལས་ཀྱང༌། སེམས་ལས་གཞན་མེད་པར་ཡང་བློས་རིག་ནས། །དེ་ནས་སེམས་ཀྱང་མེད་པ་ཉིད་དུ་རིག །བློ་དང་ལྡན་པས་ཕྱི་ནང་གཉིས་པོ་མེད་རིག་ནས། ། གཟུང་འཛིན་་དེ་མི་ལྡན་པ༼སྟེ་དེས་སྟོང༽འི་ཆོས་ཀྱི་དབྱིངས་ལ་གནས་༼པར་བྱེད༽། ཞེས་གསུངས་པ་ལྟར་རོ། །འཁོར་ལོ་དང་པོར་སྲིད་པ་གསུམ་པོ་འདི། །མི་རྟག་སྡུག་བསྔལ་སྟོང་པ་བདག་མེད་ཅེས། །འཁོར་བའི་ཉེས་དམིགས་བཤད་ནས་ཉན་རང་གི། །ཞི་བདེ་ལ་ཡང་རིམ་གྱིས་འགོད་པར་མཛད། ། བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་བསྐོར་བ་ན། ཁམས་གསུམ་པོ་འདི་དག་ནི་མི་རྟག་པ་དང་སྡུག་བསྔལ་བ་དང༌། སྟོང་པ་དང་བདག་མེད་པའོ། །ཞེས་པ་ལ་སོགས་པ་འཁོར་བ་དང་ངན་སོང་གི་ཉེས་དམིགས་དང༌། མྱ་ངན་ལས་འདས་པ་ནི་ཞི་ཞིང་བདེ་བའོ་ཞེས་པ་ལ་སོགས་པས་ལས་རྒྱུ་འབྲས་བསླུ་བ་མེད་པའི་རྣམ་བཞག་གསལ་པར་གསུངས་ནས། རེ་ཞིག་དང་པོར་ཉན་ཐོས་དང་རང་སངས་རྒྱས་ཀྱི་ལམ་དང་འབྲས་བུ་ལ་འགོད་པར་མཛད་ཅིང༌། འཁོར་ལོ་བར་པར་དངོས་འཛིན་དགག་པའི་ཕྱིར། །གཟུགས་ནས་རྣམ་མཁྱེན་བར་གྱི་ཆོས་རྣམས་ཀུན། །སྟོང་ཉིད་རྨི་ལམ་སྒྱུ་མ་ལྟ་བུ་ཞེས། །བསྟན་ནས་ཐེག་པ་མཆོག་ལ་འགོད་པར་མཛད། །བཀའ་བར་པ་མཚན་ཉིད་མེད་པའི་ཆོས་ཀྱི་འཁོར་ལོ་བསྐོར་བ་ན་སྔར་ལས་རྒྱུ་འབྲས་དང་བདེན་བཞི་ལ་སོགས་པ་ཀུན་རྫོབ་ཏུ་ཡོད་པར་གསུངས་པ་ལའང་དོན་དམ་དུའང་ཡོད་དམ་སྙམ་དུ་མངོན་པར་ཞེན་པ་སྤང་པའི་ཆེད་དུ་ཆོས་ཐམས་ཅད་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་དང༌། སྣང་ཡང་རང་བཞིན་མེད་པ་རྨི་ལམ་སྒྱུ་མ་ལྟ་བུ་ལ་སོགས་པར་བསྟན་ནས་ཐེག་པ་ཆེན་པོ་ལ་སྦྱོར་བར་མཛད་ལ། འཁོར་ལོ་ཐ་མར་ཀུན་རྫོབ་འཁྲུལ་སྣང་འདི། །དཔྱད་ན་མེད་ཅིང་དོན་དམ་ཆོས་ཀྱི་དབྱིངས། ། འགྱུར་མེད་ཡོངས་གྲུབ་མངོན་དུ་གྱུར་པ་ལས། །རྣམ་གྲོལ་མཐར་ཐུག་ཐོབ་པའི་ཐབས་མཆོག་སྟོན། །བཀའ་ཐ་མ་དོན་དམ་རྣམ་པར་ངེས་པའི་ཆོས་ཀྱི་འཁོར་ལོ་བསྐོར་བ་ན། ཀུན་རྫོབ་སྣང་ཙམ་དུ་ཡོད་ཀྱི་དོན་དམ་དུ་མེད་པ་དང༌།དོན་དམ་ཆོས་ཀྱི་དབྱིངས་རང་བཞིན་གྱིས་རྣམ་པར་དག་པར་ཡོད་པ་དེ་ཉིད་གློ་བུར་གྱི་དྲི་མ་དང་བྲལ་བ་ལས་དག་པ་གཉིས་ལྡན་གྱི་འབྲས་བུ་ཐོབ་པ་ལ་སོགས་པ་ལེགས་པར་རྣམ་པར་ཕྱེ་ནས་སྟོན་པ་སྟེ། དེ་རྣམས་ཀྱང་མདོ་ལས། ནོར་བུའི་དྲི་མ་སྦྱོང་བའི་ཚུལ་དཔེར་མཛད་ནས། རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་མཁན་༼ནོར་བུའི་རིགས་ལ༽མཁས་པ་ནོར་བུ་སྦྱོང་བའི་ཚུལ་༼ལམ་ཐབས༽ལེགས་པར་ཤེས་པ་དེས་༼སྦྱངས་གཞི༽ནོར་བུ་རིན་པོ་ཆེར་རིག་ནས་༼དྲི་མས༽ཡོངས་སུ་མ་དག་པའི་ནོར་བུ་རིན་པོ་ཆེ་བླངས་ཏེ། སྦྱོང་བྱེད་ལན་ཚྭའི་ཆུ་༼བུལ་ཏོག༽རྣོན་པོས་སྦངས་ནས་སྐྲའི་རེ་བས་ཡོངས་སུ་སྦྱོང་བར་བྱེད་དོ། དེ་ཙམ་གྱིས་བརྩོན་པ་འདོར་བ་ཡང་མ་ཡིན་ཏེ། དེའི་འོག་ཏུ་ཟས་ཀྱི་༼སྟེ་ཉ་བཙོས་པའི༽ཁུ་བ་རྣོན་པོས་སྦངས་ནས་བལ་གྱི་ལྭ་བས་ཡོངས་སུ་སྦྱོང་བར་བྱེད་དོ། །༼འདིའི་སྐབས་ཀྱི་མེད་ན་དངུལ་ཆུ་རྣོན་པོ་དང་བཅས་པས་བཀྲུས་ཏེ་བྱུང་ངོ༌།༽དེ་ཙམ་གྱིས་བརྩོན་པ་འདོར་བ་ཡང་མ་ཡིན་ཏེ། དེའི་འོག་ཏུ་སྨན་ཆེན་པོའི་ཁུ་བས་ཡོངས་སུ་སྦངས་ནས་དར་སྲབ་མོས་ཡོངས་སུ་སྦྱོང་བར་བྱེད་དོ། །ཡོངས་སུ་སྦྱངས་ཏེ་དྲི་མ་དང་བྲལ་བ་ནི་བཻཊུརྱའི་རིགས་ཆེན་པོ་ཞེས་བརྗོད་དོ། །རིགས་ཀྱི་བུ་༼ནོར་བུ་སྦྱང་ཚུལ་གསུམ་བསྟན་པ༽དེ་བཞིན་དུ་༼སྦྱོང་མཁན༽དེ་བཞིན་གཤེགས་པ་ཡང་༼སྦྱོང་གཞི༽ཡོངས་སུ་མ་དག་པའི་སེམས་ཅན་གྱི་ཁམས་མཁྱེན་ནས་མི་༼སྐྱོ་བ་བསྐྱེད་ཚུལ་ནི་སྐད་ཅིག་གིས་འཇིག་པས༽རྟག་པ་དང་༼འཕགས་པ་དང་མི་མཐུན་པས༽སྡུག་བསྔལ་བ་དང་༼བྱེད་པ་པོའི༽བདག་མེད་པ་དང་༼ལུས༽མི་གཙང་༼དང་བཞི་ནི་གང་ཟག་གི་བདག་གིས་སྟོང་པའོ་དེ་དག་གིས་དྲི་མ་ཆེན་པོ་གང་ཟག་གི་བདག་འཛིན་ཡིན་ལ་དེའི་གཉེན་པོར་གང་ཟག་གི་བདག་མེད་རྟོགས་པ་ལ་འགོད་ཅེས་པའི་དོན་ཏེ༽བ་༼ཚུལ་ཇི་ལྟར་ན༽ཡིད་འབྱུང་བའི་གཏམ་གྱིས་༼སྐྱོ་བ་བསྐྱེད་པར་མཛད༽འཁོར་བ་ལ་དགའ་བའི་སེམས་ཅན་རྣམས་སྐྱོ་བ་བསྐྱེད་པར་མཛད་དེ་འཕགས་པའི་ཆོས་༼དུག་གསུམ༽འདུལ་བ་ལ་འཛུད་པར་མཛད་དོ། །༼དྲི་མ་འབྲིང་པོའི་གཉེན་པོ་ནི༽དེ་ཙམ་གྱིས་དེ་བཞིན་གཤེགས་པ་བརྩོན་པ་འདོར་བ་ཡང་མ་ཡིན་ཏེ། དེའི་འོག་ཏུ་༼ཆོས་འཁོར་གཉིས་པ་ཆོས་ཐམས་ཅད་གང་ཟག་བདག་གིས༽སྟོང་པ་ཉིད་དང་༼འགོག་པ་ཞི་བ་གྱ་ནོམ་སོགས༽མཚན་མ་མེད་པ་དང༌། ༼འདུས་བྱས་མི་རྟག་པ་ཟག་བཅས་སྡུག་བསྔལ་བ་ནི༽སྨོན་པ་མེད་པའི་༼སྟེ༽གཏམ་གྱིས་དེ་བཞིན་གཤེགས་པའི་ཚུལ་༼ཏེ་རིགས་སམ་ཆོས་ཉིད་དམ་བདག་མེད༽རྟོགས་པར་མཛད་དོ། །༼དྲི་མ་ཆུང་ངུའི་གཉེན་པོ་ནི༽དེ་ཙམ་གྱིས་དེ་བཞིན་གཤེགས་པ་བརྩོན་པ་འདོར་བ་ཡང་མ་ཡིན་ཏེ། དེའི་འོག་ཏུ་༼ཆོས་གང་བསྟན་པས་འཛུད་ན་ཞེས་པའི་དོན་ནི་ངེས་པའི་དོན་གྱི་མདོ་སྡེ་ལ་བརྗོད་དེ༽ཕྱིར་མི་ལྡོག་པའི་ཆོས་ཀྱི་འཁོར་ལོའི་གཏམ་༼དེ་ལ་ཞུགས་ནས་དེའི་དོན་སྤང་བར་བྱ་བ་མ་ཡིན་པ་དང་དོན་དེ་ལས་གཞན་དུ་དྲང་པར་བྱར་མེད་པའོ༽འཁོར་གསུམ་ཡོངས་སུ་དག་པའི་གཏམ་གྱིས་༼གང་འཛུད་ན་དབང་པོ་དང་ཁམས་ཀྱི་ཞེས་པའི་དོན་ཡང་དུས་གསུམ་མཉམ་པ་ཉིད་དུ་རྟོགས་པ་ཡིན་ཏེ་མདོ་བརྒྱད་སྟོང་པ་ལས། འཁོར་གསུམ་ཡོངས་སུ་དག་པ་གང་ཞེ་ན་འདས་པ་ལ་སེམས་མི་འཇུག་མ་འོངས་པ་ལ་རྣམ་པར་ཤེས་པ་མི་འཇུག ད་ལྟར་བྱུང་བ་ལ་ཡིད་ལ་བྱེད་པར་མི་འཇུག་གོ༽རང་བཞིན་སྣ་ཚོགས་ཀྱི་རྒྱུ་ཅན་གྱི་སེམས་ཅན་དེ་དག་༼གོ་གང་ལ་འཛུད་ན་ཆོས་སྐུ་དེ་ཐོབ་པའི་ལམ༽དེ་བཞིན་གཤེགས་པའི་ཡུལ་ལ་འཛུད་པར་མཛད་དོ། །༼ཞུགས་པའི་དགོས་པ་ནི་སྤྲོས་བྲལ་གྱི་ལམ་ལ༽ཞུགས་པར་༼གྱུར༽ཅིང་༼རང་དོན༽དེ་བཞིན་གཤེགས་པའི་ཆོས་ཉིད་༼དམ་ཆོས་སྐུ༽རྟོགས་༼ཤིང་ཐོབ༽ནས་༼གཞན་དོན་དུ༽ནི་བླ་ན་མེད་པའི་ཡོན་གནས་ཞེས་བརྗོད་དོ། །ཞེས་གསུངས་པ་ལྟར་རོ། །འཁོར་ལོ་གསུམ་ཀའང་གདུལ་བྱའི་སྐལ་བ་དང༌། །མཐུན་པར་གང་ལ་གང་འདུལ་སྟོན་པས་ཟབ། །འོན་ཀྱང་རིམ་གྱིས་དྲངས་ནས་ངེས་པའི་དོན། །མཐར་ཐུག་སྟོན་པས་ཕྱི་མ་མཆོག་ཏུ་གསུངས། །འཁོར་ལོ་གསུམ་དང་ཐེག་པ་གསུམ་དང་སྡེ་སྣོད་གསུམ་ལ་སོགས་པའི་ཆོས་ཀྱི་ཕུང་པོ་མཐའ་ཡས་པ་གསུངས་པ་རྣམས་ཀྱང་གནས་སྐབས་སུ་གདུལ་བྱ་མཐའ་ཡས་པའི་མོས་པ་དང་མཐུན་པར་གང་ལ་གང་མོས་སུ་བསྟན་པས་ཟབ་པ་ཡིན་མོད་ཀྱི་འོན་ཀྱང་རིམ་གྱིས་དྲངས་ནས་མཐར་ཐུག་ངེས་པའི་དོན་གསལ་བར་སྟོན་པས་ཕྱི་མ་ཁྱད་པར་དུ་འཕགས་པར་ཡང་ཤེས་པར་བྱ། ཞེས་སོགས་གསུངས་སོ། །འཁོར་ལོ་ཕྱི་མ་ལ་མདོ་སྔགས་གཉིས་དང་སྔགས་ཡང་རྒྱུད་སྡེ་རྣམ་པ་བཞི་ཡོད་དེ། བླང་དོར་རབ་གསལ་རྩ་འགྲེལ་ལས། ཕྱི་ནང་གི་ཁྱད་པར་ནི། ཕྱི་མ་ལ་ཡང་མཚན་ཉིད་ཐེག་པ་ལས། །གསང་སྔགས་ཟབ་མོའི་ཐེག་པ་མཆོག་ཏུ་གསུངས། །འཁོར་ལོ་ཐ་མ་ལ་ཡང་ཕྱི་མཚན་ཉིད་ཕ་རོལ་ཏུ་ཕྱིན་པའི་ཐེག་པ་དང༌། ནང་གསང་སྔགས་ཀྱི་ཐེག་པ་གཉིས་ཡོད་ཅིང༌། གཉིས་ཀ་ལའང་བརྒྱད་སྟོང་དོན་བསྡུར། ཤེར་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །ཞེས་གསུངས་པ་ལྟར་མཐར་ཐུག་ངེས་པའི་དོན་གཅིག་ཡིན་ན་ཡང༌། ལྟ་བ་དོན་དམ་པའི་སྟོང་པ་ཉིད་གསལ་བར་སྟོན་པ་དང༌། བསྒོམ་པ་དེ་མངོན་དུ་བྱེད་པའི་ཐབས་མང་ཞིང་དཀའ་བ་མེད་པ་དང༌། གདུལ་བྱ་ཡང་རབ་དབང་པོ་མཆོག་ཏུ་གྱུར་པ་རྣམས་ཀྱི་དོན་དུ་གསུངས་པ་ལ་སོགས་པའི་སྒོ་ནས་གསང་སྔགས་ཁྱད་པར་དུ་འཕགས་པར་ཡང་ཤེས་པར་བྱ་སྟེ། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང༌། ། ཐབས་མང་དཀའ་བ་མེད་པ་ཉིད། །དབང་པོ་རྣོན་པོའི་དབང་བྱས་ཕྱིར། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པ་ལྟར་རོ། །གསང་སྔགས་ཀྱི་ཁྱད་པར་ནི། གསང་སྔགས་ལ་ཡང་བྱ་སྤྱོད་རྣལ་འབྱོར་ལས། རྣལ་འབྱོར་བླ་མེད་རིམ་གྱིས་ཟབ་པར་གསུངས། །དེ་ཡང་རྡོ་རྗེའི་གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྷག་ལ། །སེམས་ཅན་མཆོག་ལ་རྣལ་འབྱོར་མཆོག །རྣལ་འབྱོར་བླ་མེད་དེ་ལྷག་ལ། ཞེས་གསུངས་པ་ལྟར་ཕྱི་ལུས་ངག་གི་བྱ་བ་གཙོ་བོར་སྟོན་པ་འཇམ་དཔལ་རྩ་རྒྱུད་ལ་སོགས་པ་བྱ་བའི་རྒྱུད་དང༌། ལུས་ངག་གི་བྱ་བ་དང་ནང་ཏིང་ངེ་འཛིན་གཉིས་ཀ་ཆ་མཉམ་པར་སྟོན་པ་རྣམ་སྣང་མངོན་བྱང་ལ་སོགས་པ་སྤྱོད་པའི་རྒྱུད་དང༌། ནང་ཏིང་ངེ་འཛིན་གཙོ་བོར་སྟོན་པ་དེ་ཉིད་འདུས་པ་ལ་སོགས་པ་རྣལ་འབྱོར་གྱི་རྒྱུད་དང༌། བདེ་སྟོང་ཟུང་འཇུག་དོན་དམ་ཡེ་ཤེས་ཀྱི་སྐུ་གསལ་བར་སྟོན་པ་རྣལ་འབྱོར་བླ་མེད་ཀྱི་རྒྱུད་རྣམས་ཀྱང་སྐལ་བའི་རིམ་པ་དང་མཐུན་པར་བསྟན་པས། འོག་མ་འོག་མ་ལས་གོང་མ་གོང་མ་ཟབ་པར་གསུངས་ཤིང༌། བླ་མེད་ལ་ཡང་ཕ་རྒྱུད་མ་རྒྱུད་ལས། །གཉིས་མེད་རྩ་བའི་རྒྱུད་རྣམས་མཆོག་ཏུ་གསུངས། །དེ་ཡང་གདུལ་བྱ་རྣམས་རིམ་གྱིས་དྲང་བའི་དོན་དུ། གུར་ལས། སྐྱེས་པ་རྣམས་ནི་གདུལ་བའི་ཕྱིར། །རྣལ་འབྱོར་རྒྱུད་ནི་ཡང་དག་བཤད། །བུད་མེད་རྣམས་ནི་བསྡུ་ཆེད་དུ། །རྣལ་འབྱོར་མ་རྒྱུད་རབ་ཏུ་བཤད། །ཅེས་གསུངས་པ་ལྟར། ཞུ་བ་པོ་སྐྱེས་པས་ཞུས་ཤིང་དེ་དག་འདུལ་བའི་ཆེད་དུ་ཐབས་བདེ་བ་ཆེན་པོ་གཙོ་བོར་སྟོན་པ་གསང་བ་འདུས་པ་དང་གཤིན་རྗེ་གཤེད་ལ་སོགས་པ་ཐབས་ཀྱི་རྒྱུད་དང༌། ཞུ་པ་པོ་རྣལ་འབྱོར་མས་ཞུས་ཤིང་དེ་དག་འདུལ་བའི་ཆེད་དུ་ཤེས་རབ་སྟོང་པ་ཉིད་གཙོ་བོར་སྟོན་པ་ཀྱཻའི་རྡོ་རྗེ་དང༌། བདེ་མཆོག་འཁོར་ལོ་ལ་སོགས་པ་ཤེས་རབ་ཀྱི་རྒྱུད་ཅེས་གསུངས་ཤིང༌། ངེས་པའི་དོན་དུ་ནི་རྩ་བའི་རྒྱུད་ལས། རྣལ་འབྱོར་ཐབས་ཀྱི་ལུས་དང་ནི། །ཤེས་རབ་གཅིག་པུ་དག་གིས་མིན། །ཐབས་དང་ཤེས་རབ་སྙོམས་འཇུག་པ། །རྣལ་འབྱོར་དེ་བཞིན་གཤེགས་པས་གསུངས། །ཞེས་བཀའ་སྩལ་པ་ལྟར། རྒྱུད་ཐམས་ཅད་ཀྱང་ཐབས་དང་ཤེས་རབ་གཉིས་སུ་མེད་པར་སྟོན་པ་ཡིན་ནའང༌། དང་པོའི་སངས་རྒྱས་རྡོ་རྗེ་འཛིན་པ་ཡེ་ཤེས་ཀྱི་སྐུ་དེ་ཉིད་གསལ་བར་གསུངས་པས། མཚན་ཡང་དག་པར་བརྗོད་པ་དང་དུས་ཀྱི་འཁོར་ལོ་ལ་སོགས་པ་རྣམས་ལས་མཆོག་ཏུ་ཡང་གསུངས་ཏེ།ཇི་སྐད་དུ། རྒྱུད་ཀྱི་རྒྱལ་པོ་ཐམས་ཅད་དུ་ནི་ངེས་པར་རྡོ་རྗེའི་ཚིག་འདི་རྡོ་རྗེ་ཅན་གྱིས་སྦས་པ་སྟེ། དང་པོའི་སངས་རྒྱས་སུ་ནི་སྲོག་ཆགས་རྣམས་ཀྱི་ཐར་པའི་ཆེད་དུ་མ་ཚང་མེད་པ་གསལ་བར་གསུངས། ཞེས་པ་དང༌། འགྲེལ་ཆེན་དུའང༌། གང་གིས་དང་པོའི་སངས་རྒྱས་མི་ཤེས་པ་དེས་མཚན་ཡང་དག་པར་བརྗོད་པ་མི་ཤེས་སོ། །གང་གིས་མཚན་ཡང་དག་པར་བརྗོད་པ་མི་ཤེས་པ་དེས་རྡོ་རྗེ་འཛིན་པའི་ཡེ་ཤེས་ཀྱི་སྐུ་མི་ཤེས་སོ། །གང་གིས་རྡོ་རྗེ་འཛིན་པའི་ཡེ་ཤེས་ཀྱི་སྐུ་མི་ཤེས་པ་དེས་སྔགས་ཀྱི་ཐེག་པ་མི་ཤེས་སོ། །གང་གིས་གསང་སྔགས་ཀྱི་ཐེག་པ་མི་ཤེས་པ་དེ་དག་ནི་འཁོར་བ་པ་སྟེ། མྱ་ངན་ལས་འདས་པའི་ལམ་དང་བྲལ་བའི་ཕྱིར་ཞེས་བྱ་བའི་དོན་ཏོ། །ཞེས་པ་ལ་སོགས་པས་མྱང་འདས་མཐར་ཐུག་ཐོབ་པར་འདོད་ན་དུས་ཀྱི་འཁོར་ལོའི་ངེས་དོན་ཤེས་དགོས་པ་གསུངས་པ་ལྟར་རོ། །ཞེས་གསུངས་པའི་ཕྱིར་རོ། །