གཉིས་པ་སེམས་ཅན་དོན་བྱེད་ཀྱི་མི་མཐུན་ཕྱོགས་ལ།
གཉིས་པ་སེམས་ཅན་དོན་བྱེད་ཀྱི་མི་མཐུན་ཕྱོགས་ལ།
དོན་བྱ་བའི་ཡུལ་སྤྱི་དང༌། བྱེ་བྲག་དང་འབྲེལ་བ་གཉིས་ལས། ༣༥ དང་པོ་ལ་དོན་མི་སྒྲུབ་པ་ནི།བྱ་བ་ཡིན་མིན་སེམས་པ། བྱ་བའི་ཁུར་འཛིན་པ། ལམ་དུ་འགྲོ་བ། སྐད་སློབ་པ། ལས་མཐའ་བཟང་པོ་ལ་སྦྱོར་བ། ལོངས་སྤྱོད་བསྲུང་བ། མཁོན་སྤྱོང་པ། དགའ་སྟོན་དུས་ངེས་པའི་བསོད་ནམས་ཀྱི་ལས། བསོད་ནམས་བྱ་བ་དུས་མ་ངེས་པའི་བསོད་ནམས་བརྩོན་པ་སྟེ་གྲོགས་བྱེད་དགོས་པ་བརྒྱད་གང་རུང་ལ་གྲོགས་བྱེད་འོས་པའི་ཚེ་ཁོང་ཁྲོ་སོགས་དང་ལེ་ལོ་སོགས་ཀྱི་དབང་གིས་གྲོགས་སུ་མི་འགྲོ་ན་དགོས་པའི་གྲོགས་སུ་མི་འགྲོ་བའི་ཉེས་བྱས། རྟེན། བྱ་བ། ཡུལ། དགོས་པའི་སྒོ་ནས་ཉེས་མེད་བཞི། ༣༦ སྡུག་བསྔལ་གྱི་བྱེ་བྲག་མི་སེལ་བ་ནི། ནད་པ་ལ་ནད་གཡོག་སོགས་བྱེད་འོས་པའི་ཚེ་ཁོང་ཁྲོ་སོགས་དང་ལེ་ལོ་སོགས་ཀྱི་དབང་གིས་རིམ་གྲོ་དང་བསྙེན་བཀུར་མི་བྱེད་ན་ནད་པའི་རིམ་གྲོ་བྱ་བ་སྤོང་བའི་ཉེས་བྱས། ཉེས་མེད་ནི་རྟེན་དང༌། ཡུལ་དང༌། དགོས་པའི་སྒོ་ནས་གསུམ། ༣༧ སྡུག་བསྔལ་གྱི་སྤྱི་མི་སེལ་བ་ནི། ལོང་བ། འོན་པ། ཡན་ལག་མེད་པ། ལམ་གྱིས་ངལ་བ། སྒྲིབ་པ་ལྔའི་སྡུག་བསྔལ་བ། གནོད་སེམས་སོགས་རྣམ་རྟོག་གི་སྡུག་བསྔལ་བ། གཞན་གྱིས་དམའ་ཕབ་པའི་སྡུག་བསྔལ་བ་སྟེ་བདུན་པོ་གང་རུང་ཁོང་ཁྲོ་སོགས་དང་ལེ་ལོ་སོགས་ཀྱི་དབང་གིས་སེལ་བའི་ཐབས་མི་བྱེད་ན་སྡུག་བསྔལ་སེལ་བར་མི་བྱེད་པའི་ཉེས་བྱས། ཉེས་མེད་སྔ་མ་དང་འདྲའོ། །༣༨ སྡུག་བསྔལ་གྱི་རྒྱུ་མི་སེལ་བ་ནི། ཚེ་འདི་དང་ཕྱི་མའི་དོན་ལ་ཚུལ་བཞིན་མ་ཡིན་པར་ཞུགས་པའི་སེམས་ཅན་མཐོང་བ་ན་ཁོང་ཁྲོ་སོགས་དང་ལེ་ལོ་སོགས་ཀྱི་དབང་གིས་སྐྱོན་མེད་པའི་རིགས་པ་དང་ཇི་ལྟར་འཚམས་པ་ཚུལ་བཞིན་མི་སྟོན་ན་བག་མེད་པ་ལ་རིགས་པ་མི་སྟོན་པའི་ཉེས་བྱས། ཉེས་མེད་ནི་རྟེན་དང་ཡུལ་དང་དགོས་པའི་སྒོ་ནས་གསུམ། ༣༩ དོན་བྱ་བའི་ཡུལ་བྱེ་བྲག་དང་འབྲེལ་བ་གཉིས་ལས། དང་པོ་ཕན་མི་འདོགས་པ་ལ་ཕན་བཏགས་པ་ལ་ལོག་པར་སྒྲུབ་པ་ནི། རང་ལ་ཕན་བཏགས་པའི་གང་ཟག་ལ་མནར་སེམས་སམ་ལེ་ལོ་སོགས་ཀྱི་དབང་གིས་ཕན་ལན་ཆུང་ངུ་ཙམ་ཡང་མི་བྱེད་ན་བྱས་ལ་ལན་དུ་ཕན་མི་འདོགས་པའི་ཉེས་བྱས། ཉེས་མེད་རྟེན་དང༌། དགོས་པ་དང༌། ཡུལ་གྱིས་གསུམ། ༤༠ ཡིད་མི་བདེ་བ་ལ་ལོག་པར་སྒྲུབ་པ་ནི། གཞན་ཉེ་དུའམ་ལོངས་སྤྱོད་དང་བྲལ་བའི་མྱ་ངན་བྱུང་བའི་སེམས་ཅན་ལ་མནར་སེམས་དང་ལེ་ལོ་སོགས་ཀྱི་དབང་གིས་མྱ་ངན་དེ་སེལ་བའི་ཐབས་མི་བྱེད་ན་གཞན་གྱི་མྱ་ངན་སེལ་བར་མི་བྱེད་པའི་ཉེས་བྱས། ཉེས་མེད་སྔ་མ་དང་འདྲའོ། །༤༡ བཀྲེན་པ་ལ་ལོག་པར་སྒྲུབ་པ་ནི། ཟས་སྐོམ་སོགས་སློང་བ་པོ་ལ་སྟེར་འོས་བཞིན་དུ་མནར་སེམས་དང་ལེ་ལོ་སོགས་ཀྱི་དབང་གིས་མ་བྱིན་ན་ནོར་འདོད་པ་ལ་སྦྱིན་པར་མི་བྱེད་པའི་ཉེས་བྱས། རྟེན། དངོས་པོ། དགོས་པའི་སྒོ་ནས་ཉེས་མེད་གསུམ། ༤༢ རང་གི་འཁོར་ལ་ལོག་པར་སྒྲུབ་པ་ནི། རང་གི་འཁོར་བསྡུས་པ་ལ་གདམས་ངག་སྟོན་འོས་ཤིང༌། བྲམ་ཟེ་ཁྱིམ་བདག་དད་པ་ཅན་ལས་ཟས་གོས་སོགས་ཡོ་བྱད་རྣམས་ཆོས་བཞིན་དུ་འཚོལ་ནུས་བཞིན་དུ་མནར་སེམས་དང་ལེ་ལོ་སོགས་ཀྱི་དབང་གིས་མི་སྟོན་ཅིང༌། འཚོལ་བར་མི་བྱེད་ན་འཁོར་རྣམས་ཀྱི་དོན་མི་བྱེད་པའི་ཉེས་བྱས། རྟེན་དང༌། དགོས་པ་དང༌། ཡུལ་གྱིས་ཉེས་མེད་གསུམ། ༤༣ མཐུན་པར་བྱ་བ་ལ་ལོག་སྒྲུབ་ནི། གཞན་གྱི་སེམས་དང་མཐུན་པར་བྱས་ན་དོན་དུ་འགྱུར་བཞིན་དུ་མནར་སེམས་དང་ལེ་ལོ་སོགས་ཀྱི་དབང་གིས་སེམས་དང་མཐུན་པར་མི་བྱེད་ན་གཞན་གྱི་བློ་དང་མཐུན་པར་མི་འཇུག་པའི་ཉེས་བྱས། ཉེས་མེད་རྟེན་དང་དགོས་པས་གཉིས་སོ། །༤༤ ཡོན་ཏན་ཅན་ལ་ལོག་པར་སྒྲུབ་པ་ནི། གཞན་ཡོན་ཏན་ཅན་གྱི་ཡོན་ཏན་དང་དད་པ་སོགས་ཀྱི་བསྔགས་པ་བརྗོད་འོས་ཤིང༌། ལེགས་པར་སྨྲ་བ་ལ་ལེགས་སོ་སྟེར་ནུས་བཞིན་དུ། མནར་སེམས་དང་ལེ་ལོ་སོགས་ཀྱི་དབང་གིས་བསྔགས་པ་མི་བརྗོད་པ་དང༌། ལེགས་སོ་མི་སྟེར་ན་ཡོན་ཏན་བསྔགས་པ་བརྗོད་པར་མི་བྱེད་པའི་ཉེས་བྱས། ཉེས་མེད་རྟེན་ཡུལ་བརྗོད་བྱ་དགོས་པའི་སྒོ་ནས་བཞི། གཉིས་པ་ཚར་མི་གཅོད་པ་ལ། ༤༥ ཆོས་མིན་སྤྱོད་པ་དབང་དུ་མི་བྱེད་པ་ནི། སེམས་ཅན་དམའ་དབབ་པ་དང༌། ཆད་པས་བཅད་པ་དང༌། བསྐྲད་པར་རིགས་པ་རྣམས་ཉོན་མོངས་སམ་ལེ་ལོ་སོགས་ཀྱི་དབང་གིས་དེ་དང་དེ་མི་བྱེད་ན་རྐྱེན་དུ་འཚམ་བར་ཚར་མི་གཅོད་པའི་ཉེས་བྱས། ཉེས་མེད་རྟེན་དང་ཡུལ་དང་དགོས་པའི་སྒོ་ནས་གསུམ། ༤༦ བསྟན་པ་ལ་འགྲས་པ་སོགས་དབང་དུ་མི་བྱེད་པ་ནི། རང་ཉིད་རྫུ་འཕྲུལ་དང༌། མཐུ་སྣ་ཚོགས་དང་ལྡན་ན། སྐྲག་པར་དང༌། འདུན་པར་དང༌། སྡོམ་པ་དང་མི་ལྡན་པ་ལ་དད་པས་བྱིན་པ་སྤོང་བ་སོགས་བྱེད་རིགས་པ་ལ། སྐྲག་པ་སོགས་མི་བྱེད་ན་རྫུ་འཕྲུལ་བསྡིགས་པ་སོགས་མི་བྱེད་པའི་ཉེས་བྱས་ཉོན་མོངས་ཅན་མིན་པའོ། །རྫུ་འཕྲུལ་ལ་སྐུར་བའི་མུ་སྟེགས་ཅན་སོགས་ལ་མ་བསྟན་ཀྱང་ཉེས་མེད་དོ། །དེ་དག་ནི་སེམས་ཅན་དོན་བྱེད་ལས་ཉམས་པའི་ཉེས་བྱས་བཅུ་གཉིས་ཏེ་སྡོམ་ན་ཉེས་བྱས་ཞེ་དྲུག་ཡིན་པའོ། །