གཉིས་པ་སྔོན་གྱི་ཆོ་ག་བྱེ་བྲག་ཏུ་བསྟན་པ་ལ་གཉིས་ལས། དང་པོ་སྔོན་ཆོག་གི་དགོས་པ།

གཉིས་པ་སྔོན་གྱི་ཆོ་ག་བྱེ་བྲག་ཏུ་བསྟན་པ་ལ་གཉིས་ལས། དང་པོ་སྔོན་ཆོག་གི་དགོས་པའི་དོན་ནི།

ཚེགས་ཆུང་ངུས་རབ་བྱུང་དང་བསྙེན་རྫོགས་ཀྱི་སྡོམ་པ་ཐོབ་པའོ། ། གཉིས་པ་སྔོན་ཆོག་གཏན་ལ་དབབ་པ་ལ། སྔོན་ཆོག་ལ་སྒྲོ་འདོགས་དགག་པ་དང༌།སྔོན་ཆོག་དངོས་ཀྱི་དོན་བསྟན་པ་དང༌། རྩོད་པ་སྤོང་པ་དང་གསུམ། དང་པོ་ནི་ཁ་ཅིག་ན་རེ་སྔོན་གྱི་ཆོ་ག་ལ་བཅུ་སྟེ། སངས་རྒྱས་རང་བྱུང་རང་རྒྱལ་མཁན་སློབ་མེད། །ཡེ་ཤེས་ཁོང་ཆུད་ཚུར་ཤོག་སྐྱབས་འགྲོ་དང༌། །སྟོན་པར་ཁས་བླངས་དྲི་མཉེས་ལྕི་ཆོས་སྤོང༌། །འཕྲིན་དང་གསོལ་བཞིའི་ལས་དང་སྔོན་ཆོག་བཅུ། །དེ་ཡང་སངས་རྒྱས་རང་བྱུང་གིས་བསྙེན་པར་རྫོགས་པ་དང༌། རང་སངས་རྒྱས་མཁན་སློབ་མེད་པར་བསྙེན་པར་རྫོགས་པ་དང་ཞེས་པ་ནས། ཡུལ་གཞན་ནས་འོངས་པ་ལ་བརྟེན་ནས་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་དང་བཅུའོ་ཞེས་འཆད་དོ། །དེ་མི་འཐད་པར་ཐལ། འདུལ་བའི་ལུང་དང་བསྟན་བཅོས་རྣམས་ལས་བསྙེན་པར་རྫོགས་པ་བཅུ་ཞེས་གསུངས་ཀྱི། སྔོན་གྱི་ཆོ་ག་བཅུ་ཞེས་པ་ནི་གཞུང་གང་ལས་ཀྱང་མ་གསུངས་པས། སྔོན་ཆོག་བཅུར་འདོད་པ་ལ་སྒྲུབ་བྱེད་ཀྱི་གཞུང་གཏན་ནས་མེད་ཅིང༌། དང་པོ་གཉིས་ཐ་དད་དུ་བགྲང་བ་ནི་མི་འཐད་དེ། མཛོད་འགྲེལ་ལས། རང་བྱུང་གིས་ནི་སངས་རྒྱས་དང་རང་སངས་རྒྱས་རྣམས་སོ། །ཞེས་དང༌། མེ་ཏོག་ཕྲེང་རྒྱུད་ལས་ཀྱང༌། འདྲེན་པ་རང་རྒྱལ་རང་བྱུང་གིའོ། །ཞེས་དང༌། བསྡུས་པ་ལས་ཀྱང༌། སློབ་དཔོན་མེད་པར་ནི་དེ་བཞིན་གཤེགས་པ་རྣམས་དང་རང་སངས་རྒྱས་རྣམས་སོ། །ཞེས་སངས་རྒྱས་དང་རང་རྒྱལ་བསྙེན་པར་རྫོགས་པའི་ཚུལ་གཅིག་ཏུ་གསུངས་པ་དང་འགལ་ལོ། །ལུང་མ་མོ་ཉིད་ལས། དེ་བཞིན་གཤེགས་པ་རང་བྱུང་དང་རང་སངས་རྒྱས་ནི་སློབ་དཔོན་མེད་པར་བསྙེན་པར་རྫོགས་པ་དང༌། ཞེས་གཅིག་ཏུ་བགྲངས་ནས། ཡེ་ཤེས་ཁོང་དུ་ཆུད་པ་ལ་སོགས་པ་གཞན་དགུ་དང་བཅས་ཏེ་བསྙེན་པར་རྫོགས་པ་བཅུ་གསུངས་པའི་ཕྱིར་རོ། །ཡང་སྔོན་ཆོག་བཅུ་བཤད་པ་དེ་མི་འཐད་དེ། འདིའི་དང་པོ་གཉིས་དང་ངེས་ཞུགས་གསུམ་ལ་ཆོ་ག་མེད། འཕྲིན་ཆོག་ད་ཆོག་ཡིན། དྲི་མཉེས་སོགས་སྡོམ་པ་འབོག་པའི་ཆོ་ག་མ་ཡིན་པའི་ཕྱིར། དང་པོ་གྲུབ་སྟེ། སྔོན་ཆོག་དང་ད་ཆོག་གི་ཆོ་ག་ལ་གསོལ་བཞིའི་ལས་ཀྱི་ཆོ་ག་དགོས་པའི་ཕྱིར་ཏེ། རྩ་བ་ལས། ཆོ་ག་ལས་འདས་ན་ལས་མི་ཆགས་སོ། །འདིར་ཆོ་ག་ནི་དགེ་འདུན་ཚང་བ་དང་ལས་བརྗོད་པ་དང༌། ལས་བྱེད་པ་ཉིད་དོ། །ཞེས་གསུངས་པའི་ཕྱིར། རྟགས་གཉིས་པ་གྲུབ་སྟེ། ཁྱད་པར་དུ་ཡང་འཕྲིན་སྔོན་གྱི་ཆོ་གར་འདོད་པ་འདི་ལ་སྒྲུབ་བྱེད་མེད་ཅིང་གནོད་བྱེད་གསུམ་སྟེ། གནོད་བྱེད་དང་པོ་ནི། འཕྲིན་གྱིས་རབ་བྱུང་དང་བསྙེན་རྫོགས་བྱེད་པའི་ཆོ་ག་ཆོས་ཅན། གང་ཟག་གཅིག་གིས་རབ་བྱུང་དང་བསྙེན་རྫོགས་རིམ་གྱིས་ཐོབ་བྱེད་མ་ཡིན་པར་ཐལ། སྔོན་གྱི་ཆོ་ག་ཡིན་པའི་ཕྱིར་རོ། །རྟགས་ཁས་བླངས་སོ། །ཁྱབ་པ་ནི་གཞུང་གིས་གྲུབ་སྟེ། སྔོན་ཆོག་གི་སྐབས་ཀྱི་རང་གི་རྣམ་བཤད་ལས། རབ་ཏུ་བྱུང་བ་ཉིད་དང་བསྙེན་པར་རྫོགས་པ་དུས་མཉམ་དུ་ཡིན་གྱི་རིམ་གྱིས་ནི་མ་ཡིན་ནོ། །ཞེས་པ་དང༌། སྔོན་ཆོག་གི་སྐབས་ཀྱི་ཊཱི་ཀ་ལས་ཀྱང༌། དུས་གཅིག་ཁོ་ནར་དེ་གཉིས་ཀ་ཉེ་བར་བསྒྲུབ་པར་གྱུར་པ་སྟེ། རིམ་གྱིས་ནི་མ་ཡིན་ནོ། །ཞེས་གསུངས་སོ། །འདོད་ན། ལུང་ཕྲན་ཚེགས་ལས། བུ་མོ་ཆོས་སྦྱིན་མ་ལ་དགེ་སློང་མའི་དགེ་འདུན་དང་ངའི་བཀས་དགེ་སློང་མ་ཨུཏྤ་ལའི་ཁ་དོག་མ་འཕྲིན་པར་བཏང་སྟེ་སྐྱབས་སུ་འགྲོ་བ་གསུམ་ནས་རིམ་པ་བཞིན་དུ་རབ་ཏུ་བྱུང་ལ་བསླབ་པའི་གཞི་བཅུ་ཡང་བྱིན་ནས། ལོ་གཉིས་ཀྱི་བར་དུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་གི་བསླབ་པའི་སྡོམ་པ་ཡང་བྱིན་ནོ། །ཞེས་པ་ནས། ཆོས་སྦྱིན་མ་ནི་ལོ་གཉིས་ཀྱི་བར་དུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་གི་བསླབ་པ་བསླབས་ཟིན་གྱིས། དེ་ཡང་ཨུཏྤ་ལའི་ཁ་དོག་མ་འཕྲིན་པར་ཐོང་ལ་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་བྱིན་ཅིག དགེ་འདུན་སྡེ་གཉིས་ཀྱིས་ཨུཏྤ་ལའི་ཁ་དོག་མ་འཕྲིན་པར་ཐོང་སྟེ་ཆོས་སྦྱིན་མ་བསྙེན་པར་རྫོགས་པར་གྱིས་ཤིག ཅེས་བསླབ་པ་རྣམས་རིམ་གྱིས་བྱིན་པར་གསུངས་པ་དང་འགལ་ལོ། །གནོད་བྱེད་གཉིས་པ་ནི། འཕྲིན་གྱིས་རབ་བྱུང་དང་བསྙེན་རྫོགས་བྱེད་པའི་ཆོ་ག་ཆོས་ཅན། མཁན་པོ་དང་བཅས་པ་མ་ཡིན་པར་ཐལ། སྔོན་གྱི་ཆོ་ག་ཡིན་པའི་ཕྱིར་རོ། །རྟགས་ཁས་བླངས། ཁྱབ་པ་ནི་གཞུང་གིས་གྲུབ་སྟེ། ལུང་གཞི་ལས། སྔོན་གྱི་ཆོ་གས་དེ་ལྟར་རབ་ཏུ་བྱུང་ཞིང་བསྙེན་པར་རྫོགས་པ་དག་མཁན་པོ་མེད་པ་དང་སློབ་དཔོན་མེད་པས། ཞེས་དང༌། ཊཱི་ཀ་ལས་ཀྱང༌། མཁན་པོ་དང་སློབ་དཔོན་གྱིས་གནང་བ་ལས་སྔར་བཤད་པས་ན་དེའི་ཕྱིར་སྔོན་གྱི་ཆོ་ག་ཞེས་བྱ་སྟེ། དེ་གཉིས་མེད་པར་ཡང་སྔོན་རབ་ཏུ་བྱུང་བ་དང་བསྙེན་པར་རྫོགས་པའི་ཆོ་ག་བྱུང༌། ཞེས་སོ། །འདོད་ན། ཊཱི་ཀ་ལས། མཁན་པོ་ལ་སོགས་པས། སྐལ་བ་དང་ལྡན་པའི་རང་བཞིན་ཅན་གྱི་རབ་ཏུ་བྱུང་བ་དེ་ལ་བྱ་བ་གང་ཡིན་པ་དེ་དག་མངགས་པ་དེས་རྗེས་སུ་བསྒྲུབ་པར་བྱ། ཞེས་དང༌། འགྲེལ་ཆུང་ལས་ཀྱང༌། མཁན་མོ་ལས་ལུང་མནོས་ཏེ་ཕོ་ཉས་ཁྲིམས་དབོག ཅེས་གསུངས་པ་དང་འགལ་ལོ། །གནོད་བྱེད་གསུམ་པ་ནི། འཕྲིན་གྱིས་ཚུལ་ཁྲིམས་འབོགས་པའི་ཆོ་ག་ཆོས་ཅན། དེང་སང་བྱར་རུང་མ་ཡིན་པར་ཐལ། སྔོན་གྱི་ཆོ་ག་ཡིན་པའི་ཕྱིར་རོ། །རྟགས་ཁས་བླངས། ཁྱབ་པ་མེད་ན་སྔོན་གྱི་ཆོ་ག་ཡིན་པ་དང་འགལ་ལོ། །འདོད་ན། མདོ་རྩ་བ་ལས། སྐལ་བ་དང་ལྡན་པའི་རང་བཞིན་ཅན་ལ་མངགས་པ་དང་འདྲ་བས་རབ་ཏུ་འབྱིན་དུ་གཞུག་པ་ནི་ཆོ་ག་མ་ཡིན་པ་མ་ཡིན་ནོ། །ཞེས་པ་དང༌། དེའི་འགྲེལ་ཆུང་ལས་ཀྱང༌། དེ་བཞིན་དུ་ཡོན་ཏན་ཡོད་ན་དེང་སང་ཡང་ཕོ་ཉས་ཁྲིམས་དབོག་ཏུ་རུང་ངོ༌། ཞེས་པ་དང༌། ཉན་ཐོས་ཀྱི་མདོ་སྡེ་ལས་ཀྱང༌། བཀའ་སྩལ་པ། ཆོས་སྦྱིན་མ་འཕྲིན་གྱིས་བསྙེན་པར་རྫོགས་པར་གནང་གིས། ཕྱིན་ཆད་གཞན་ཡང་འདི་འདྲ་བ་བྱུང་ན་དེ་ཡང་འཕྲིན་གྱིས་བསྙེན་པར་རྫོགས་པར་གྱིས་ཤིག ཅེས་གསུངས་པ་དང་འགལ་ལོ། ། སྔོན་ཆོག་ཡིན་ན་དེང་སང་བྱ་མི་རུང་བས་ཁྱབ་སྟེ། མཚོ་ཊཱིཀ་ལས། དེང་སང་བྱར་རུང་མ་ཡིན་པར་ཐལ། སྔོན་གྱི་ཆོ་ག་ཡིན་པའི་ཕྱིར་རོ། །རྟགས་ཁས་བླངས། ཁྱབ་པ་མེད་ན་སྔོན་གྱི་ཆོ་ག་ཡིན་པ་དང་འགལ་ལོ། །ཞེས་གསུངས་པའི་ཕྱིར། འདོད་མི་ནུས་ཏེ། མཚོ་ཊཱིཀ་ལས། སྔོན་ཆོག་འགའ་ཞིག་ནི་ད་ལྟར་གྱི་ཆོ་ག་གནང་བའི་ཕྱི་ནས་མཛད་པའང་ཡོད་དེ། སངས་རྒྱས་མྱ་ངན་ལས་འདའ་ཁའི་ཚེ་རབ་བཟང་ཚུར་ཤོག་གིས་བསྙེན་པར་རྫོགས་པར་མཛད་པའི་ཕྱིར། ཞེས་གསུངས་པའི་ཕྱིར་ཟེར་ན་དཔྱད་དོ། །རྟགས་གསུམ་པ་གྲུབ་སྟེ། སྐབས་འདིའི་ཆོ་ག་ལ་གསོལ་བཞིའི་ལས་ཀྱི་ཆོ་ག་དགོས་པའི་ཕྱིར་ཏེ། རྩ་བ་ལས། གསོལ་བ་དང་གཞིའི་ལས་ཀྱིས་ཅིག་ཆར་རབ་ཏུ་བྱུང་བ་དང་བསྙེན་པར་རྫོགས་པ་ཉེ་བར་བསྒྲུབས། ཞེས་དང༌། ཆོ་ག་ལས་འདས་ན་ལས་མི་ཆགས་སོ། །འདིར་ཆོ་ག་ནི་དགེ་འདུན་ཚང་བ་དང་ལས་བརྗོད་པ་དང༌།ལས་བྱེད་པ་ཉིད་དོ། །ཞེས་གསུངས་པའི་ཕྱིར། ཁྱབ་སྟེ། ཊཱི་ཀ་ལས། སྔོན་གྱི་ཆོ་ག་ནི་རྣམ་པ་འདི་ལྟ་བུ་རིག་པར་བྱ་ཡི་རྣམ་པ་གཞན་ནི་ཡོད་པ་མ་ཡིན་ནོ། །ཞེས་གསུངས་པའི་ཕྱིར་རོ། །སྤྱིར་ཆོ་ག་ཞེས་པའི་མིང་བཏགས་པ་ལ་གཉིས་ཡོད་དེ། རིགས་པ་རྗེས་སུ་སྒྲུབ་པ་དང༌། ལས་ཀྱི་ཆོ་ག་དང་སྔགས་ཚིག་ལ་ཆོ་ག་ཞེས་བརྗོད་པ་ཡོད་དེ། ལུང་རྣམ་འབྱེད་ལས། ཆོ་ག་ཡིན་ནོ་ཞེས་བྱ་བ་ནི་རྗེས་སུ་མཐུན་པའི་ཆོས་ཡིན་ནོ། །ཞེས་དང༌། དེའི་འགྲེལ་བ་ལས། ཆོ་ག་ཞེས་བྱ་བ་ནི་རིགས་པ་རྗེས་སུ་སྒྲུབ་པ་ཞེས་བྱ་བའི་ཐ་ཚིག་གོ། །ཞེས་གསུངས་པ་དང༌། རྩ་བར། འདིར་ཆོ་ག་ནི་དགེ་འདུན་ཚང་བ་དང་ལས་བརྗོད་པ་དང་ལས་བྱེད་པ་ཉིད་དོ། །ཞེས་དང༌། ཊཱི་ཀ་ལས། སྔོན་གྱི་ཆོ་གའི་རྣམ་པ་ནི་དེ་ལྟ་བུར་རིག་པར་བྱའི་རྣམ་པ་གཞན་ནི་མ་ཡིན་ནོ་ཞེས་བྱ་བའི་ཐ་ཚིག་གོ། །ཞེས་གསུངས་སོ། །སྐྱབས་འགྲོའི་བསྙེན་རྫོགས་ཀྱི་ཐབས་སུ་གྱུར་པའི་སྐྱབས་འགྲོ་སྔོན་ཆོག་མི་རུང་སྟེ། གསོལ་བཞིའི་ཆོ་ག་མ་ཡིན་པའི་ཕྱིར། ཁྱབ་པ་བསྒྲུབས་ཟིན།ཚུར་ཤོག་དང་ལྕི་ཆོས་ཁས་བླངས་ཀྱི་བསྙེན་རྫོགས་ལ་སྔོན་ཆོག་མི་རུང་སྟེ། ད་ཆོག་གི་བཅས་པ་མཛད་རྗེས་སུ་བྱུང་བ་ཡོད་པའི་ཕྱིར་ཏེ། སྟོན་པ་མྱ་ངན་ལས་འདའ་ཁར་ཀུན་ཏུ་རྒྱུ་རབ་བཟང་ཚུར་ཤོག་གི་སྒོ་ནས་བསྙེན་པར་རྫོགས་པ་གང་ཞིག སྐྱེ་དགུའི་བདག་མོས་ལྕི་ཆོས་བརྒྱད་ཁས་བླངས་ནས་བསྙེན་པར་རྫོགས་པའི་སྔ་རོལ་ནས་ཀུན་དགའ་བོ་ད་ཆོག་གི་སྒོ་ནས་བསྙེན་པར་རྫོགས་ཟིན་ལ་སྐྱེ་དགུའི་བདག་མོའི་ཞུ་བ་བྱེད་མཁན་ཀུན་དགའ་བོ་ཡིན་པར་གླེང་གཞིར་བཤད་པའི་ཕྱིར། ལྔ་ཚོགས་བཅུ་ཚོགས་ཀྱི་ཆོ་ག་ལ་སྔོན་ཆོག་མི་རུང་བར་ཐལ། སྔོན་ཆོག་མཚམས་ནང་དེར་ཡོད་པའི་དགེ་འདུན་ཐམས་ཅད་འདུ་དགོས་པའི་ཕྱིར་ཏེ། རྩ་བར། དགེ་འདུན་ཐམས་ཅད་འདུས་པ་ན། ཞེས་གསུངས་པའི་ཕྱིར་རོ། །སྔོན་ཆོག་ལ་གསོལ་བཞིའི་ལས་ཀྱི་ཆོ་ག་མི་དགོས་ན་སྔོན་ཆོག་དེ་བཅས་པ་ལ་མི་ལྟོས་པ་སོགས་རིགས་པས་གནོད་བྱེད་མང་ངོ༌། །ལུང་རིགས་དེ་དག་གིས་གངས་ཅན་གྱི་འདུལ་འཛིན་ཆེན་པོ་མཚོ་སྣ་བས། སྔོན་ཆོག་གི་དབྱེ་བ་ནི་བརྒྱད་དེ། ཞེས་སྔོན་ཆོག་བརྒྱད་བཞག་པའི་ཚིག་ཟིན་མི་འཐད་པར་སྣང་སྟེ། དེ་ལྟར་ན་བསམ་གཏན་གྱི་སྡོམ་པ་སོགས་སྡོམ་པ་ཡིན་ན་ཆོ་ག་ལ་བརྟེན་ནས་འཐོབ་པས་ཁྱབ་པར་འགྱུར་རོ། །འོན་ཀྱང་མཚོ་ཊཱིཀ་ལས་ད་ཆོག་གི་སྔོན་དུ་བྱུང་བའི་རིགས་པ་རྗེས་སུ་སྒྲུབ་པའི་བསྙེན་རྫོགས་ཀྱི་ཐབས་ལ་སྔོན་ཆོག་ཞེས་བཏགས་ནས་བཤད་ལ། མདོ་རྩ་འགྲེལ་དུ་སངས་རྒྱས་ཀྱི་བཅས་པའི་དབང་གིས་སྔོན་ཆོག་ལ་ད་ལྟའི་ཆོ་ག་མ་བྱུང་གོང་གི་གསོལ་བཞིའི་ཆོ་ག་ལ་བཤད་པས་ཐ་སྙད་མི་འདྲ་བའི་དབང་གིས་ཁྱབ་ཆེ་ཆུང་ཡོད་ཀྱང་དོན་ལ་ཁྱད་ཆེར་མི་སྣང་ངོ༌། །རང་བྱུང་བསྙེན་རྫོགས་ཀྱི་ཐབས་དེ་ཆོ་ག་ཡིན་པར་ཐལ། ལུང་རྣམ་འབྱེད་ལས། ཆོ་ག་ཡིན་ནོ་ཞེས་བྱ་བ་ནི་རྗེས་སུ་མཐུན་པའི་ཆོས་ཡིན་པའོ། །ཞེས་དང༌། དེའི་འགྲེལ་བར། ཆོ་ག་ཞེས་བྱ་བ་ནི་རིགས་པ་སྒྲུབ་པ་ཞེས་བྱ་བའི་ཐ་ཚིག་གོ །ཞེས་གསུངས་པའི་ཕྱིར་ཟེར་ན་མ་ཁྱབ་སྟེ། དེ་ནི་ལྟ་བ་དང་འཚོ་བ་དང་ཆོ་ག་ཞེས་པའི་ཆོ་ག་ཡིན་ལ། སྐབས་འདིའི་ཆོ་ག་ལ་ལས་བརྗོད་པ་སོགས་དགོས་པ་གོང་དུ་བཤད་ཟིན་ཏོ། །