ལྔ་པ་མངོན་པར་བྱང་ཆུབ་པ་དང་བཞུགས་པའི་དུས་ཀྱི་ཁྱད་པར་བཤད་པ།
ལྔ་པ་མངོན་པར་བྱང་ཆུབ་པ་དང་བཞུགས་པའི་དུས་ཀྱི་ཁྱད་པར་བཤད་པ་ལ།
མངོན་པར་བྱང་ཆུབ་པའི་དུས་དང༌། བཞུགས་པའི་དུས་ཀྱི་ཁྱད་པར་བཤད་པ་དང་གཉིས།
དང་པོ་ནི། རྩབར། བདེ་བར་གཤེགས་པ་མ་ལུས་ཕྱོགས་ཞིང་སངས་རྒྱས་ཡུལ་དག་ན། །ཕྲ་རབ་རྡུལ་གྱི་རྡུལརྣམས་བདོག་པར་གྱུར་པ་ཇི་སྙེད་པ། །བྱང་ཆུབ་མཆོག་རབ་དམ་པར་གཤེགས་པའི་བསྐལ་བ་དེ་སྙེད་དེ། །འོན་ཀྱང་ཁྱོད་ཀྱི་གསང་བ་འདི་ནི་བསྙད་བགྱི་མ་ལགས་སོ། །ཞེས་བདེ༷་བ༷ར་གཤེ༷གས་པ༷་ཁྱོད་ཀྱིས་མ༷་ལུ༷ས་པའི་ཕྱོ༷གས་བཅུའི་ཞི༷ང་སང༷ས་རྒྱ༷ས་ཀྱི་ཡེ་ཤེས་ཀྱི་ཡུ༷ལ་དུ་གྱུར་པ་ཇི་སྙེད་ཡོད་པའི་འཇིག་རྟེན་གྱི་ཞིང་དེ་ད༷ག་ན༷། རྡུལ་ཕྲ༷་ར༷བ་ཀྱི་རྡུ༷ལ་གྱི༷་རྡུ༷ལ་གྲངས་རྣ༷མས་བདོ༷ག་པ་སྟེ་ཡོད་པ༷ར་གྱུ༷ར་པ༷་ཇི༷་སྙེ༷ད་པ་༷ཡི་གྲངས་དེ་ཙམ། བྱ༷ང་ཆུ༷བ་ཀྱི་མཆོ༷ག་ར༷བ་ད༷མ་པ༷ར་གཤེ༷གས་པ༷འི་ཚུལ་བསྟན་པའི་བསྐ༷ལ་པ༷འང་དེ༷་སྙེ༷ད་ཀྱི་གྲངས་དེ༷་ཡོད་པའི་ཕྱིར་རོ། །འོ༷ན་ཀྱ༷ང་སྟེ་སངས་རྒྱས་ཀྱི་ཡོན་ཏན་དེ་ལྟར་ཡོད་པ་ཡིན་ཀྱང་སངས་རྒྱས་ཁྱོ༷ད་ཀྱི༷་གས༷ང་བ༷་འདི༷་ནི༷་གདུལ་བྱ་ཁ་ཅིག་ལ་བཤ༷ད་པར་བགྱི༷་བ་མ༷་ལ༷གས་ཏེ་བཤད་པར་བྱ་བ་མ་ཡིན་ཏེ། རང་འགྲེལ་ལས། འདི་ནི་སྔོན་དགེ་བའི་རྩ་བ་མ་བསགས་པ་རྣམས་ཀྱིས་ལྷག་པར་མོས་པར་བྱ་བར་དཀའ་བའི་ཕྱིར་ན་བསྙད་པར་བྱ་བ་མ་ཡིན་ཏེ། འགའ་ཞིག་ཏུ་དེ་ལ་ལྷག་པར་མོས་པར་བྱེད་པ་རྣམས་ལབསོད་ནམས་གཞལ་དུ་མེད་པ་བསགས་པར་བྱ་བའི་ཕྱིར་བཤད་དོ། །ཞེས་གསུངས་སོ༷། །
གཉིས་པ་བཞུགས་པའི་དུས་ཀྱི་ཁྱད་པར་བཤད་པ་ནི།
རྩ་བར། རྒྱལ་བ་ཇི་སྲིད་འཇིག་རྟེནམཐའ་དག་མཆོག་ཏུ་རབ་ཞི་བར། །འགྲོ་བ་མིན་ཞིང་ནམ་མཁའ་རྣམ་འཇིག་འགྱུར་མིན་དེ་སྲིད་དུ། །ཤེས་རབ་ཡུམ་གྱིས་བསྐྱེད་པ་དེ་ལ་ཐུགས་བརྩེ་མ་མ་ཡིས། །ཚུལ་ལུགས་བྱེད་པས་རབ་ཏུ་ཞི་བར་འགྱུར་བ་ག་ལ་མངའ། །ཞེས་དུས་གསུམ་གྱི་རྒྱ༷ལ་བ༷་རྣམས་ཀྱི་མ་འོངས་པའི་སྐུ་ཚེའི་ཚད་ནི་དུས་ཇི༷་སྲི༷ད་དུ་འཇི༷ག་རྟེ༷ན་ཏེ་གདུལ་བྱ་མཐ༷འ་ད༷ག་གོ་འཕང་མཆོ༷ག་ཏུ༷་ར༷བ་ཏུ༷་ཞི༷་བ༷ར་འགྲོ༷་བ༷་མི༷ན་པ་སྟེ་གོ་འཕང་མཆོག་ཏུ་ཞི་བ་སངས་རྒྱས་སུ་མ་གྱུར་པ་ཡིན་ཞི༷ང༌། འདུས་མ་བྱས་ཀྱི་ན༷མ་མཁ༷འ་རྣ༷མ་པར་འཇི༷ག་པར་འགྱུ༷ར་བ་མི༷ན་པ་སྟེ་ནམ་མཁའ་མ་ཞིག་གི་བར་དེ༷་སྲི༷ད་དུ༷་གནས་པ་ཡིན་ཏེ། སངས་རྒྱས་ནི་ལམ་ཤེ༷ས་ར༷བ་ཀྱི་ཕ་རོལ་ཏུ་ཕྱིན་པའི་ཡུ༷མ་གྱི༷ས་ནམ་མཁའ་གནས་ཀྱི་བར་དུ་བཞུགས་པའི་སྐུ་ཅན་དུ་བསྐྱེ༷ད་པ༷་དེ༷་ལ་གཞན་དོན་ཁུར་དུ་ཁྱེར་བའི་ཐུ༷གས་བརྩེ༷་བའི་མ༷་མ༷་ཡི༷ས་ཡང་ཡང་བསྐྱང་པའི་དབང་གིས་འཁོར་བ་མ་སྟོང་བར་དུ་བཞུགས་པའི་ཚུ༷ལ་ལུ༷གས་འདི་བྱེ༷ད་པ་ཡིན་པ༷ས་ན། དེ་འདྲ་བའི་སངས་རྒྱས་ཁྱོད་ལ་ར༷བ་ཏུ༷་ཞི༷་བ༷ར་འགྱུ༷ར་བ༷་ག༷་ལ༷་མང༷འ་སྟེ་མི་མངའ་བའོ། །གང་གིས་སེམས་ཅན་ཐམས་ཅད་ཀྱི་དོན་བསྒྲུབ་པར་བྱ་བའི་ཕྱིར་དུས་མུ་མཐའ་མེད་པར་འདི་དག་གསོ་བར་བྱེད་པ་སངས་རྒྱས་རྣམས་ཀྱི་ཐུགས་རྗེ་ཅི་འདྲ་བ་ཞིག་ཅེ་ན། རྩ་བར། གཏི་མུག་སྐྱོན་གྱིས་འཇིག་རྟེན་ཁ་ཟས་དུག་བཅས་ཟ་བ་ཡི། །སྐྱེ་བོ་ཉིད་ཀྱི་ནང་མི་དེ་ལ་ཁྱོད་བརྩེ་ཇི་ལྟ་བ། །དེ་ལྟར་དུག་ཟོས་ཉེན་པའི་བུ་ལ་མ་ཡིས་སྡུག་བསྔལ་མིན། །དེས་ན་མགོན་པོ་མཆོག་ཏུ་རབ་ཞིར་གཤེགས་པར་འགྱུར་མ་ལགས། །ཞེས་འདོད་ཡོན་ལ་བདེན་པར་འཛིན་པའི་གཏི༷་མུ༷ག་གི་སྐྱོ༷ན་གྱི༷ས། འཇི༷ག་རྟེ༷ན་པ་རྣམས་འདོད་ཡོན་ལྔའི་ཁ༷་ཟ༷ས་དུག་དང་བཅ༷ས་པ་ཡང་ཡང་ཟ༷་བ༷་པོ་ཡི༷་སྐྱེ༷་བོ༷། སངས་རྒྱས་ཉི༷ད་ཀྱི༷་ན༷ང་མི༷་སྟེ་སངས་རྒྱས་ཉིད་ཀྱིས་བདག་གིར་མཛད་པ་དེ༷་རྣམས་ལ༷། སངས་རྒྱས་ཁྱོ༷ད་བརྩེ༷་བ་ཆེན་པོ་སྐྱེ་བ་ཇི༷་ལྟ༷ར་བ༷། དེ༷་ལྟ༷ར་དུ་ནི་དུ༷ག་ཟོ༷ས་ནས་ནད་ཀྱིས་ཉེ༷ན་པ༷འི་བུ༷་གཅིག་པུ་ལ༷་མ༷་ཡི༷ས་སྡུ༷ག་བསྔ༷ལ་གྱི་ཡིད་སྐྱོ་བ་མི༷ན་པ་དེ༷ས་ན༷་མགོ༷ན་པོ༷་སངས་རྒྱས་རྣམས་ནི་མཆོ༷ག་ཏུ༷་ར༷བ་ཏུ་ཞི༷ར་གཤེ༷གས་པ༷ར་འགྱུ༷ར་བ་མ༷་ལ༷གས་པ་ཡིན་ནོ། ། རྩ་བར། གང་གི་ཕྱིར་ན་མི་མཁས་དངོས་དང་དངོས་པོ་མེད་པར་ཞེན་པའི་བློ་ཅན་གྱིས། །སྐྱེ་དང་འཇིག་གནས་སྐབས་དང་སྡུག་དང་མི་སྡུག་བྲལ་ཕྲད་ཀྱིས་བསྐྱེད་སྡུག་བསྔལ་དང༌། །སྡིག་ཅན་འགྲོ་བ་ཐོབ་པ་དེ་ཕྱིར་འཇིག་རྟེན་ཐུགས་བརྩེའི་ཡུལ་དུ་རབ་དོང་བས། །བཅོམ་ལྡན་ཐུགས་རྗེས་ཁྱོད་ཐུགས་ཞི་ལས་བཟློག་པས་ཁྱོད་ལ་མྱ་ངན་འདའ་མི་མངའ། །ཞེས་ག༷ང་གི༷་ཕྱི༷ར་ན༷་དེ་ཁོ་ན་ཉིད་ཀྱི་དོན་ལ་མི༷་མཁ༷ས་པའི་གང་ཟག་ཁ་ཅིག་གིས་དངོ༷ས་པོ་ལ་བདེན་པར་ཞེན་པ་ད༷ང༌། ཁ་ཅིག་རྒྱུ་འབྲས་ཀྱི་དངོ༷ས་པོ༷་ཐམས་ཅད་མེ༷ད་པ༷ར་ཞེ༷ན་པ༷འི་བློ༷་ཅ༷ན་གཉིས་ཀྱི་ནང་གི་སྔ་མ་ལས་འབྲས་ལ་ཡིད་ཆེས་ཏེ་ལྷ་དང་མིར་སྐྱེ་བ་ཡོད་པར་ལྟ་བ་རྣམས་ཀྱི༷ས་ནི། སྐྱེ་བའི་གནས་སྐབས་ཏེ་སྐྱེ༷་བའི་སྡུག་བསྔལ་ད༷ང༌། འཇི༷ག་པའི་གན༷ས་སྐ༷བས་ཏེ་འཆི་བའི་སྡུག་བསྔལ་ད༷ང་ཡུལ་སྡུ༷ག་པ་དང༷་མི༷་སྡུ༷ག་པ་རིམ་བཞིན་བྲ༷ལ་བ་དང་འཕྲ༷ད་པ་གཉིས་ཀྱི༷ས་བསྐྱེ༷ད་པའི་སྡུ༷ག་བསྔ༷ལ་མྱོང་བར་འགྱུར་བ་ད༷ང༌། ཕྱི་མ་རྒྱུ་འབྲས་ཀྱི་དངོས་པོ་མེད་པར་ལྟ་བའི་བློ་ཅན་རྣམས་ཀྱིས་ནི་སྡི༷ག་ཏོ་ཅ༷ན་གྱི་འགྲོ༷་བ༷་དམྱལ་བ་ལ་སོགས་པའི་ངན་འགྲོའི་སྡུག་བསྔལ་འཐོ༷བ་པ༷་དེ༷་ཡི་ཕྱི༷ར་དང༌། དེ་འདྲའི་འཇི༷ག་རྟེ༷ན་གྱི་སྐྱེ་བོ་མ་ལུས་པ་ཐམས་ཅད་ཐུབ་པ་ཁྱོད་ཀྱི་དུས་དང་རྣམ་པ་ཀུན་ཏུ་ཐུ༷གས་བརྩེ༷འི་ཡུ༷ལ་དུ༷་ར༷བ་ཏུ་དོ༷ང་བ་སྟེ་ཐུགས་བརྩེ་བ་ཆེན་པོའི་ཡུལ་དུ་གྱུར་བ༷ས་ན། དེ་འདྲའི་སེམས་ཅན་མ་ལུས་པ་ལ་བཅོ༷མ་ལྡ༷ན་འདས་ཀྱིས་དུས་རྒྱུན་དུ་གཟིགས་པའི་ཐུ༷གས་རྗེ༷ས། ཁྱོ༷ད་ཀྱི་ཐུ༷གས་ནི་ཞི༷་བ་ཕྱོགས་གཅིག་པར་གཞོལ་བ་ལ༷ས་ཟློ༷ག་པར་བྱེད་པ་ཡིནཔ༷ས་ཁྱོ༷ད་ལ༷་ཞི་བ་ཕྱོགས་གཅིག་པར་མྱ༷་ང༷ན་ལས་འད༷ས་པ་མི༷་མང༷འ་བར་འགྲོ་བའི་དོན་སྒྲུབཔ་ལ་རྟག་པར་འཇིག་རྟེན་དུ་བཞུགས་པའོ། །