ལས་ཀྱི་གཤིན་རྗེ་ཀུན་འཇོམས་ནག་པོའི་ཟློག་བསད་ཀྱི་མན་ངག་སྙན་དུ་བརྒྱུད་པའི་ཟིན་བྲིས།
ལས་ཀྱི་གཤིན་རྗེ་ཀུན་འཇོམས་ནག་པོའི་ཟློག་བསད་ཀྱི་མན་ངག་སྙན་དུ་བརྒྱུད་པའི་ཟིན་བྲིས་རབ་ཏུ་གསལ་བ་འགའ་ཞིག་བཞུགས་སོ༔
ལས་ཀྱི་གཤིན་རྗེ་ཀུན་འཇོམས་ནག་པོ་ཉིད་ལ་ཕྱག་འཚལ་ལོ། །འདིར་ཏིང་ངེ་འཛིན་དང་སྔགས་ཀྱི་སྒོ་ནས་ཟློག་པ་དང་བསད་པའི་མན་ངག་གི་ཤོག་དྲིལ་དང་སྙན་བརྒྱུད་ཞལ་ཤེས་བཀོད་པར་བྱ་སྟེ། རང་ཉིད་ཁྲོ་ཆུ་དུག་གདོང་དབུ་སྲིད་པའི་རྩེར་སླེབ་པའི་འོག་ཕྱོགས་མདུན་དུ་ནམ་མཁའ་རླུང་མེ་ཆུ་དང་ས་ཡི་དཀྱིལ་འཁོར་གྱི་སྟེང་དུ་བཙོན་ཁང་དུ་བྱད་མ་ལྷ་སྲུང་དང་བཅས་པ་བསམ། རང་གི་ཕྱག་གཡས་པར་ཐུགས་ཀའི་ས་བོན་གྱི་འོད་ཀྱི་འཕྲོ་འདུ་དང་། ཁྲོ་བོ་དྲེགས་པའི་ཚོགས་ཀྱིས་བསྡུས་པ་ལས་བྱུང་བ། ངོ་བོ་དྲེགས་པའི་ལྷ་སྲིན་དང་དུག་རྫས་ལ་རྣམ་པ་དུག་
རྩལྕགས་ཁྲོ་ཆུ་ཁོལ་མ་ལས་གྲུབ་པའི་རི་བོ་ཆེན་པོ་ཟུར་གསུམ་པ་རྣོ་བའི་ངར་དང་ལྡན་པ། ལོག་དང་ཟུར་གསུམ་རྣམས་སུ་མཚོན་ཆ་སྣ་ཚོགས་ཟིང་ཟིང་པོར་སྐྱེས་ཤིང་། དུག་གི་མེ་དཔུང་དམར་ནག་འུ་རུ་རུ་འབར་ཞིང་དུག་རླངས་སྔོ་དམར་ཕྱུ་རུ་རུ་བྱེད་པ་ཞིག་སྒོམ། དེ་ཉིད་རང་གི་ཕྱག་གཡས་པས་ནམ་མཁའི་དབྱིངས་སུ་བཏེགས་ལ་ཁོ་ཡི་སྟེང་དུ་བརྒྱབས་པས་གནམ་ལྕགས་ཀྱི་ཐོག་ཕོག་པ་ལྟར་དགྲ་བོའི་ལུས་གཏོར་ནས་མིང་ཡང་མེད་པར་བྱས། རྣམ་ཤེས་ནམ་མཁའ་དང་བསྲེས་ལ་མི་དམིགས་པའི་ངང་དུ་བཞག་པར་བྱའོ། །འདི་ནི་ཟློག་པ་རི་རབ་ཐལ་དབྱུང་ཞེས་བྱ་སྟེ། གཞུང་
གི་ཟློག་པ། ཡང་ཟློག་སོགས་བྱས་ན་དམིགས་པ་འདི་བཏང་གཏོར་མ་འཕེན་པ་དང་གཏོར་རྒྱབ་སོགས་བྱེད་ཀྱང་དམིགས་པ་འདི་ཉིད་མཆོག་ཏུ་ཟབ། སྤྲོས་བཅས་མེད་ཀྱང་དམིགས་པ་ཁོ་ནས་ཆོག དམིགས་རྟེན་ལག་རྡེབ་བྱེད་དམ་གོས་མཐུ་བརྡབ་ཀྱང་རུང་ངོ་། །ཟློག་བསད་གཉིས་པོ་གང་བྱེད་སྔགས་ཀྱི་ཁ་བསྒྱུར་བྱའོ།། ཨྠྀི༔ རང་ཉིད་གཤིན་རྗེའི་གཤེད་ཀྱི་ཕྱག་གཡས་པར་གནམ་ལྕགས་ཀྱི་མཆོད་རྟེན་པཱུ་རི་སྒོ་བྱེ་བའི་ནང་དུ། མཚོན་ཆ་སྣ་ཚོགས་ཟིང་ཟིང་ཚྭ་ཚྭ་རབ་ཏུ་ཁོལ་བའི་ནང་དུ་དམིགས་བྱ་དངོས་སུ་གནས་པ། ཕྱག་གཡོན་དུག་གི་པཱུ་རི་སྒོ་བྱེ་བའི་ནང་དུ་དུག་གི་མེ་དཔུང་དང་རླངས་པ་སྔོ་དམར་འཕྲོ་བ། དེའི་ནང་དུ་བྱད་མའི་ལྷ་སྲུང་དངོས་སུ་གནས་པ། རང་གི་ཐུགས་ཀའི་འོད་ཟེར་གྱིས་དགྲ་བོ་གནོད་བྱེད་དེ་ཐམས་ཅད་བསྡུས་ནས་གཟུགས་ལ་བསྟིམ། མཆོད་རྟེན་གྱི་སྒོ་གཉིས་ཁ་སྤྲོད་པས་ཁོ་ཡི་ལྷ་སྲུང་ཐམས་ཅད་བདུད་དུ་བབས་ནས་གཤིན་རྗེས་དམག་ཏུ་གྱུར། མཆོད་རྟེན་གཉིས་བརྡབས་པས་བྲག་ཚལ་གྱིས་སོང་ནས་ཤ་ཁྲག་གཤིན་རྗེས་ཟོས་ནས་ལྷག་མ་མེད་པར་བྱས། དེ་ལྟར་དམིགས་ནས་ཐལ་མོ་བརྡབ་དམོད་བཅོལ་བྱའོ། །གཅུན་པ་དང་བསད་པ་པཱུ་རི་ཁ་སྤྲོད་བྱའོ། །
སྤྱི། ཡང་རང་ཉིད་བཅོམ་ལྡན་འདས་གནམ་ལྕགས་འབར་བའི་ཕྱག་གཡས་གཡོན་དུ་དུག་སྣ་ཚོགས་ལས་གྲུབ་པའི་རི་རབ་མཚོན་ཆ་སྣ་ཚོགས་སྐྱེས་པ། དུག་གི་མེ་དཔུང་རབ་ཏུ་འབར་བ་རེ་བསྣམས་ནས། བརྡབ་པའི་བར་དུ་དམིགས་བྱ་རྣམས་ཇིར་ཇིར་དམར་ཉིལ་ཉིལ་བསྒྲལ་བར་བསམ། བསད་པ་དུས་རི་རྩེ་སྤྲོད་ཅེས་བྱའོ། །སྤྱི། གུ་རྒྱ་ས་མ་ཡ་ཁ་ཐཾ། ཡང་རང་ཉིད་ཁྲོ་ཆུར་སྒོམ་པའི་ཕྱོགས་མཚམས་ལྕགས་སྲེག་གི་ས་གཞི་དམར་ལམ་མེ་བ། ཕྱག་ཐམས་ཅད་ཀྱི་དམིགས་བྱའི་རྐང་པ་ནས་བཟུང་སྟེ། །སྲིད་པའི་རྩེ་མོར་ཁྱེར་ཏེ་ལྕགས་སྲེག་གི་ས་གཞི་ལ་བརྡབས་པས། ཇར་ཇར་བུན་བུན་ཆོམ་ཆོམ་བྱ་སྒྲོ་མེ་ལ་རེག་པ་ལྟར་སོང་བར་བསམ། ལག་སྟབས་བྱ་བའམ་གོས་མཐུ་རྡེབ། བསད་པ་གཟུགས་ལེན་མའོ། །སྤྱི། རང་ཉིད་ཁྲོ་ཆུར་གསལ་བས་དམིགས་བྱའི་བྱིས་པ་གར་ཡོད་ཤེས་པར་བྱས་ལ། མདུན་དུ་གཤིན་རྗེའི་ལས་མཁན་སེང་གེའི་མགོ་ཅན། ཁ་གདངས་ཤིང་ངར་བའི་ཁར་དམིགས་བྱའི་བྱིས་སྒྱུར་བས་གྱུར་མིད་དུ་སོང་བར་བསམ་ཞིང་། ལག་པ་གཉིས་གནམ་ལྕགས་ཀྱི་འཁོར་ལོ་བསམ་ལ་ཐལ་མོ་བརྡབ་བོ། །སེང་གདོང་ཅན་གྱིས་བྱིསྔ་བསད་པའི་སྤུ་
གྲི་སོ་རྒལ་ཞེས་བྱའོ། །སྤྱི། གུཉྩ། དྷ་ཐིམ། རྒྱ་རྒྱ་རྒྱ༔ ༈ ཡང་ཉི་མ་དམར་རྩེ་རེ་བའི་དུས་སུ༔ ལ་རྒྱབ་ནས་གཤིན་རྗེ་འཆི་བདག་ནག་པོའི་རྣམ་པ་སྦྲུལ་ནག་པོ་མགོ་དགུ་འཇིགས་སུ་རུང་བ་ཞིག་གིས་ཚུར་ཁ་ཟེད་ནས་ཡོད་པར་བསམ། དགྲ་བོ་བྱད་མ་མི་ནོར་འཁོར་དང་བཅས་པ་དང་། མགོན་སྐྱོབ་བྱེད་མཁན་ཐམས་ཅད་ཀྱང་ཉི་མ་ལ་ཐིམ། ཉི་མ་ཐལ་བ་དང་མཉམ་དུ་ཉི་མ་དེ་སྦྲུལ་ནག་དེས་གྱུར་མིད་བྱས་ནས་སྐད་ཅིག་ལ་ཟླ་བ་གཟའ་ཡིས་ཟིན་པ་ལྟར་ནག་སྐམ་གྱིས་སོང་བར་བསམ། རང་གཤིན་རྗེའི་ང་རྒྱལ་གྱིས་ཐལ་མོ་དགུ་བརྡབ་བོ་། །ལག་གཉིས་ཉི་ཟླའི་བར་དུ་དགྲ་བོ་བརྡབ་ཀྱང་རུང་ངོ་། །འདི་དག་ཟློག་བསད་གང་བྱེད་སྔགས་ཀྱིས་སྒྱུར་རོ། །བསད་པ་ཤས་ཆེའོ། །སམག ཨྠྀི༔ རྒྱ་རྒྱ་རྒྱ༔ ཨེ་མ། དུས་ངན་འདི་འདྲར་སྔགས་འཆང་སྐྱེས་བུ་འགས། །ལིང་གའི་དཔེ་རིས་ཙམ་ཡང་མི་མཁྱེན་ཞིང་། །མིང་ཡིག་ཙམ་ལ་ལྷག་ཆད་མེད་པར་དཀའ། །དེའི་ཕྱིར་ལག་ལེན་ཆེན་པོ་ལྟ་ཅི་སྨོས། །བརྩོན་འགྲུས་བྲལ་ནས་རྫས་ཀྱང་གསེར་བས་དཀོན། །དཔའ་གཏུམ་གཟི་བརྗིད་ལྡན་པའི་དགྲ་བོ་ཡི། །དྲི་མ་ཟག་རྫས་ལེན་པར་སུ་ཡིས་ནུས། །དེའི་ཕྱིར་སྤྲོས་མེད་ཡིད་ཀྱི་མཚོན་ཆ་འདི། །དཀའ་བློ་བདེ་བས་བྲན་གྱི་ཡང་གཡོག་འདྲ། །མྱུར་མགྱོགས་ཐོགས་མེད་ནམ་མཁའི་
གློག་དང་འདྲ། །ནམ་དགོས་ཕན་པ་མགུལ་གྱི་ནོར་བུ་འདྲ། །ཐོག་རྡུགས་མེད་པ་གནམ་ལྕགས་ཐོག་དང་འདྲ། །འདི་འདྲའི་གདམས་ངག་རྒྱ་བོད་གཉིས་ལ་དཀོན། །བརྗེད་པར་འཕང་བ་བརྗེད་ཐོའི་ཡི་གེར་བཀོད། །དོན་མེད་ཕུང་དོགས་ཞལ་ཤེས་སེམས་ལ་སྦས། །གསེར་སྲང་བརྒྱ་ཡི་བཀའ་རྒྱ་ཡོད་པར་ངེས། །བློ་སྙིང་བླ་མར་གཏད་ན་སྦྱིན་རུང་ཞིང་། །ཁ་འཇམས་གཡོ་སྒྱུ་ཅན་ལ་ཅི་ཕྱིར་བསྟན། །དཔེ་ཆ་བསྟན་ཀྱང་ཞལ་ཤེས་སེམས་ལ་གབ། །བསམས་པས་ཆོག་པའི་བསམ་ཆོད་རལ་གྲི་འདི། །ཤིན་ཏུ་ཟབ་བོ་ས་མ་ཡ་རྒྱ་རྒྱ༔ ཨྠྀི༔ བསད་ཟློག་སྤྲོས་མེད་སྙན་བརྒྱུད་ཡིག་ཆུང་འདི། །སྔགས་ནག་ཀརྨ་རཱ་ག་ཨ་སྱས་བྲིས། །འདི་བྲིས་ཉེས་པ་འཇམ་དབྱངས་ཉིད་ལ་བཤགས། །དགེ་བས་བསྟན་དགྲ་རྩད་ནས་གཅོད་པར་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།