གཉིས་པ་རང་ལུགས་བཤད་པ།
གཉིས་པ་རང་ལུགས་བཤད་པ་ལ།
སེལ་འཇུག་གི་མཚན་ཉིད་ཡོད་དེ། རང་ཡུལ་ལ་འདོད་པའི་དབང་གིས་འཇུག་པ་དེ་ཡིན་པའི་ཕྱིར། སེལ་འཇུག་ལ་དབྱེ་ན་གཉིས་ཡོད་དེ། རྗོད་བྱེད་དང༌། རྟོག་པ་གཉིས་ཡོད་པའི་ཕྱིར། བུམ་འཛིན་རྟོག་པ་བུམ་པ་ལ་སེལ་འཇུག་བྱེད་ཚུལ་ཡོད་དེ། དེས་བུམ་པ་མ་ཡིན་པ་རྣམ་པར་བཅད་ནས་བུམ་པ་ལ་འཇུག་པ་དེ་ཡིན་པའི་ཕྱིར། སྒྲུབ་འཇུག་གི་མཚན་ཉིད་ཡོད་དེ། རང་ཡུལ་ལ་དངོས་དབང་གིས་འཇུག་པ་དེ་ཡིན་པའི་ཕྱིར། རང་ཡུལ་ལ་སྒྲུབ་འཇུག་གི་བློའི་མཚན་ཉིད་ཡོད་དེ། རང་ཡུལ་ལ་དངོས་དབང་གིས་འཇུག་པའི་བློ་དེ་ཡིན་པའི་ཕྱིར། རང་ཡུལ་ལ་དངོས་དབང་གིས་འཇུག་པ་དང༌། རང་ཡུལ་ལ་སྒྲུབ་འཇུག་གི་བློ་གཉིས་དོན་གཅིག ཡང་ན་དེ་གཉིས་ཀྱི་མཚན་ཉིད་ནི།གཏན་ཚིགས་རིགས་པའི་དོན་བསྡུས་ལས། སྣང་འཇུག་དང་སེལ་འཇུག་ཏུ་དབྱེ་བ་ལ་མཚན་ཉིད་ནི་རིམ་པ་ལྟར། ཆ་ཤས་སུ་མ་ཕྱེ་བར་ཡུལ་གསལ་བའི་རིག་པ་དང༌། ཡུལ་ཡུལ་ཅན་འཇུག་པའི་ཚུལ་གང་ཞིག ཆ་ཤས་སུ་ཕྱེ་ནས་སྒྲ་དོན་ལ་འཇུག་པའོ། །དབྱེ་ན་གཉིས་ཀ་ལ་ཕྱིན་ཅི་ལོག་མ་ལོག་གཉིས་སོ། །རྟོག་མེད་ཤེས་པ་སྣང་བས་འཇུག སྒྲ་རྟགས་རྟོག་པ་སེལ་བས་འཇུག །ཅེས་བྱའོ། །ཞེས་གསུངས་པའི་ཕྱིར། རྟགས་སེལ་འཇུག་ཡིན་པར་གསུངས་པ་དང༌། རང་ལུགས་ལ་མིང་ཚིག་སྐབས་དུ་མར། ལྡན་མིན་ཡིན་པར་གསུངས་ཕྱིར། སེལ་འཇུག་ཡིན་མིན་དཔྱད་པར་བྱའོ། །སྒྲུབ་འཇུག་གི་བློ་ཡིན་ན་རང་ཡུལ་རྟོགས་པས་མ་ཁྱབ་སྟེ། རྟོག་མེད་ལོག་ཤེས་རྣམས་སྒྲུབ་འཇུག་གི་བློ་ཡིན་པའི་ཕྱིར། བུམ་པ་མངོན་སུམ་དུ་རྟོགས་པའི་བློ་ཡིན་ན་བུམ་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་མཐོང་བས་ཁྱབ་སྟེ། རྣམ་འགྲེལ་ལས། དོན་གྱི་རང་གི་ངོ་བོ་ལ། །བདག་ཉིད་མངོན་སུམ་ཡིན་པ་ལ། །ཚད་མ་གཞན་གྱིས་བརྟག་བྱ་གང༌། །མ་མཐོང་ཆ་གཞན་ཅི་ཞིག་ཡོད། །ཅེས་གསུངས་པའི་ཕྱིར། བུམ་འཛིན་མངོན་སུམ་ཡིན་ན་བུམ་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་རྟོགས་པས་མ་ཁྱབ་ལ། བུམ་པ་མི་རྟག་པ་བུམ་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཡིན་ཀྱང་བུམ་འཛིན་མངོན་སུམ་ཡིན་ན་དེ་རྟོགས་པས་མ་ཁྱབ་པའི་ཕྱིར་རོ། །